توقعات 2014

سألنى كثير من القراء عن توقعاتي للعام الجديد .. هاكم بعضها وسوف تلاحظون أن بعضها كان توقعات لأعوام مضت لكنها لم تحدث

أن يتم إنشاء سفارة للجالية السودانية بالخرطوم
أن تختفي أرتال (الجنادب) وتحل بدلاً عنها (الخنافس) .. ما لازم تهاجمنا حاجة وكده
أن تتم زيادة المرتبات بنسبة تصل إلى .00002
أن تكثر أمراض نقص الفايتمينات لخلو أجساد المواطنين منها .. (يجيبوها من وين مع الغلاء ده)
أن يتم التزايد في أعداد الفنانين والمطربين لنصل مرحلة الإكتفاء الذاتي (فنان لكل مواطن فنان)
أن تزداد نسبة البطالة في البلاد بحيث يصل متوسطها إلى 3 (أبطال) لكل أسرة !
أن تختفي جميع الوجبات من المنازل ويأكل المواطن وهو ماشي (ح يكون شية؟ ما طعمية وفول حاجات)
أن يتم ارتفاع معدل صادراتنا من طائرات (صافات 2) وصافات 3 وذلك بعد إشتداد الطلب (عالمياً) عليها .
أن تقوم الدولة بتوفير 24 فرصة عمل للخريجين
أن تختفي من تقرير المراجع العام كل حالات التعدي على المال العام وذلك بسبب الخوف من العقاب (الأخروى طبع)
أن ينتقل عدد مقدر من المواطنين إلى الرفيق الأعلي جراء تصريحات بعض المسؤولين (فقعان مرارة وكده)
أن تنخفض أسعار السلع الغذائية .. (طبعن عشان مافي زول قادر يشتريها)
أن يتم إستيراد تقاوى فاسدة (جزئياً) للموسم الشتوي القادم (ما لازم يكون في فساد ولو جزئي)
أن تنتشر عيادات الأعشاب والتداوى بالقرآن (البيقدر على ملايين المستوصفات دي منو؟)
أن يأتي الخريف فجأتن زي كل مرة (يعني الجديد شنوووو؟)
أن يتم القضاء على أزمة المواصلات بالعاصمة بعد أن تقعد الناس تماما في بيوتا (المارقا ليها شنوووو)
أن تتزايد نسبة أعداد جرائم القتل (الناس بقت روحا محرقاها)
أن تتحول الحيوانات الأليفة (كلاب وكدايس) حيوانات نباتية … (نحنا لاقين لحوم؟)
أن يتم تسليم المتضررين من سيول وفيضانات الخريف القادم الإغاثة كاملة (الخيم أم جنريترات دي يعمينا ما شفناها)
أن توقف بقية شركات الطيران رحلاتها للخرطوم وتلحق باللوتهانزا ويصبح المطار فاااضي (فرصة لبيعو)
أن يتم تولي (شاب) لقيادة حزب سوداني … (طبعن بعد ما رئيسو مات وكده)
أن يبدأ العمل بالمدينة الرياضية وكل زول يبني القطعة بتاعتو (بس يخلو لينا ميدان سلة واااااحد)
أن يحدث تحسن في مياه الشرب حيث يتم القضاء على البكتريا و(تفضل الطحالب) بس !
أن تتفاقم حمى الأغنيات (الحربية) وتحطم أغنية (قطعنى بي سكينك وبيعني للجزار) الأرقام القياسية في المبيعات .
أن يحرز فريقنا القومي كأس الأخلاق الحميده في بطولة أفريقيا
أن يصبح (التمباك) أحد أعمدة الإقتصاد السوداني ( 13 مليون مستخدم حسب آخر إحصائية .. أها شوفو كم سفة في اليوم وضربوها)
أن يحصل الممثل السوداني (حسن داندرمة) على لقب أفضل ممثل عن عن أداء دوره كـ(ميت) في الفلم السوداني (غلطان المرحوم)
أن ندخل موسوعة جنيس للأرقام القياسية بإنتاجنا لأصغر عيشة في العالم (لا ترى بالعين المجردة)
أن تنتشر المخدرات بين طلاب المدارس بحيث يتم تطبيق شعار : (دفتر) لكل تلميذ !
أن يكثر (الطيارون) – الناس البتجي ساكت- في بيوت الأفراح حتى يلجأ اصحاب الفرح لدخول المعازيم إلى الصالة عن طريق الدخول بـ(البصمة)!
أن يتم شراء لعيبة محترفين بما يعادل عدد 5000 ماكينة غسيل كلي
أن تنحسر ظاهرة نسيان الأطباء للشاش داخل بطون المرضى بفعل تنامي ظاهرة نسيان الموبايلات !
أن نحرز المركز الأول في الشفافية بعد أن يتم إرتفاع البث في قضايا الفساد إلى خمسة حالات من أصل ألف وخمسمية !
أن يرتاح معظم المعاشيين بفضل رحمة الله وتبديله لهم بدار أحسن من دارهم ومعاش (أحسن من معاش الحكومة)
أن يتزايد إهتمام السودانيين بالزمن والإلتزام بالمواعيد وتنحسر أطول مدة للتأخير إلى ساعة ونصف
أن تتناقص حالات جرائم الإغتصاب نسبة لتفهم الحكومة بأن (العطالة) وراء هذه الظاهرة (مش قامت بتوظيف الـ 24 الفوق ديلك)
أن يتم إنشاء مفوضية (عليا) للفساد وذلك لمراقبة أداء المفوضية (العامة) للفساد والتى بدورها سوف تقوم بمراقبة المفوضية الخاصة بالفساد .
أن تزداد نسبة المتسولين بحيث يكون هنالك (شحاد) مقابل كل مواطن (شحاد)
أن تنخفض أسعار اللحوم بشكل ملحوظ بسبب منافسة بعض اللحوم (الأخري) لها ….. ح تكون عجااااالي يعني

كسرة :

من توقعات العبدلله لعام 2014 أن ننال جائزة السعفة الذهبية في مهرجان (كان) عن فيلم أبي فوق الشجرة .. ( شانق نفسو طبعن)
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و؟

Advertisements

19 تعليق

  1. اها الليلة البرنجية من اصقاع سيبيريا ،،،، تقولو لى السودان فيو سقط !!!!!

    1. مافيهو سقط فيه إسقاطات على رأي الجماعة الطيبين

    2. الليله بس بقت علي حكاية ود الزومة والرباطابي الخلي ابوه في المستشفي ومشي السوق وجا لقاه مات وقعد يولول والشايقي قال ليه : انا قبيل وكت بقولك لا تفوت ابوك ده .. خايف يسرقو !!؟
      بالله من قبييييل لابد ليها بس مشيت اصلي واجي القاك سويت سواتك دي !!
      مبروك يا زول .. اها جيتك فييي بيتك مش زي ناس تمش تبارك في بيت الجيران !!

      1. الله يبارك فيك و فى غاليك ،، حبابك ألف يا الجنوبى يا أخوى ،، و البيت بيتك !!!

  2. لقيتني بردان يا فلادمير !! مبروك عليك إنشاء الله البرنجية تبقي ليك heat ..

    1. تسلم يا أونكل سام ،،، عقبال برنجيتك الجاية ،، قول امين ،،، و انتوا لحدى هسى بردانين ؟؟؟

  3. فلادمير نطيط لي من وين سبقتني الليلة بالبرنجية !!!! تحياتي لك وللجميع

    1. أخونا نانو،،، ما انا النطيت ليك ،، برااااها جاتنى لعندى مقنطرة و أخوك ما كضب خبر طوالى راح شايتا و صفارى كمان …،

  4. وما تنسى يا بروف من أهم التوقعات ( ودي مؤكدة ) أن تزداد الواوات لأطناشر واو في أخبار ملف خط هيثرو
    العند النائب العام شنو(وووو وووو وووو وووو وووو وووو)+و؟

  5. جائزة السعفة الذهبية دي إلا يستلما سوداني مغترب !! هو حيكون فضل زول تحت الشجرة يستلما !؟

  6. * أن يتزايد إهتمام السودانيين بالزمن والإلتزام بالمواعيد وتنحسر أطول مدة للتأخير إلى ساعة ونصف !!
    ما قلنا ليكم السودانين بقوا بتاعين جررررجرة تفقع المرارة وتودي الآخررررة .. هاكم السيناريو دا لي مكانيكي مسسسسطووول !!
    ميكانيكي مسطول يوصف حالة السودان :

    قال ليك مكانيكي مسطوووول سألوه عن ﻋﻦ ﺣﺎﻟﺔ ﺍﻟﺴﻮﺩﺍﻥ من زمن الأنجليز، وبعدهم الإستقلال
    والحكومة الوطنية … ولحدي هسع المسألة ماشه كييف؟؟

    ﺳﺤﺐ ليك ﻧﻔﺲ جااامد ﻣﻦ سجارتو (الخضراء) .. ﻭﺣﻚ ﺭﺃﺳﻪ وﻗﺎﻝ:

    ﻭﺍﻟﻠﻪ ﺍﻟﺴﻮﺩﺍﻥ دا عامل ﺯﻱ ﺍﻟﺒﺺ !! أيام ﺍﻻﻧﺠﻠﻴﺰ كان جديد.. ﻟﻨﺞ

    ﺑﻌﺪﻫﻢ ﺟﺎﺀ أزهري وعبدالله خليل دعكوه شوية .. ﻭﺟﺎﺀ عمك ﻋﺒﻮﺩ ﺩﺷﺪﺷﻪ حبتين ..

    ﻭبعده ﺟﺎﺕ ﺍلأﺣﺰﺍﺏ لاكين ﻣﺎ ﺳﺎﻗﺘﻮا كتيير !!

    نط ﻓﻴﻪ عمك النميري قام قلبو ليك ﻗﻠﺒﺘﻴﻦ ﻛﺴﺮ قزازو وبهدلو لحدي ما بقا ما يقوم إلا دفرة ..
    ﻭﺟﺎﺕ ﺍلأﺣﺰﺍﺏ تاااني خلتوا ليك البلد واقفة ﻋﻠﻲ ﻋﺠﻞ ﺍﻟﺤﺪﻳﺪ !!

    أخيراً ﺟﺎﺕ (الإنقاذ) ..

    ﻋﻤﻠﺖ صيانة شاملة للبص وسمكرة ﻭﺑﻮﻫﻴﺔ خلتو يلمع .. ولمن ﺑﻘﻲ ﺟﺎﻫﺰ للسواقة نط فيه عمك البشير ﻭعشق للخلف !!
    وعليك أمان الله لي يومك دا الباص بقى ماشي خلف ( لي ورا ) ……

    تااااني ما ليقالو زوولن كدي قدر يوقفوا ولا ﻳﻌﺸﻘﻮ ﻟﻲ قدااااااام كلوكلو!!!!

    ههههههههه

    ( خذوا الحكمة من أفواه المسااااااطيييل)

    1. ورا ورا ورا ورا ورااااااا

      1. الله اجازيكم يا ناس شمبات – رباطاب انتو؟

    2. هههههه هسي المسطول قعد جمب السواق ان شاء الله يقدر يقنعوا بس !!
      بالله البص ده السكاري والمساطيل كانوا سايقنو كوييييس لحدي ما جو ناس مساخيط غيرو ليهم فهمهم للمتعة وبدل يمصوا العرقي بقوا يمصوا دمنا وبدل يلفوا السجارة لفوا راسنا .!! بالله البص ده شدة ما قوي في عضمه ماشي خلف بي عجل الحديد 24 سنة !!

  7. الاخوة الكرام .
    العام الجديد إنشاء الله يعود علينا بالخير والبركات .ويعود على بلادنا بالنعيم والرخاء .
    أمبارح عثمان ميرغنى قال كلام غريب عن إستقلال السودان إنو الحكومة البريطانية كانت زهجانة من السودان لأنة بيشكل ليها عبء إدارى أدى الى خروج البريطانيين فى مظاهرات فى شوارع لندن تهتف بالخروج من السودان لأنة يساهم فى هبوط إقتصاد الانجليز .
    ولمن أحد النواب السودانيين إقترح خروج المستعمر من البلاد الحكومة البريطانية ماصدقت وطوالى إتخارجت فى أقل من إسبوعين لترفع عن نفسها الحرج.
    يعنى الانجليز راميين طوبتنا .
    مخير علينا الله …..

  8. الأخ الفاتح
    السلام عليكم
    يا أخي انت متشائم جدا خلينا نتفائل شوية كدة لعل وعسى الجماعة يروحو في الف داهية والله يفرج عنا .

  9. كما ورد،لم استطع قرااه الرقم
    رقم موبايل،رقم عداد كهربا،نمره شاسي
    غلبني والله

    12-19-2013 09:27 AM
    ودمدني: عبدالوهاب السنجك
    كشف تقرير المراجع العام بولاية الجزيرة بأن مخالفات اللوائح المالية بالولاية بلغت 58 مخالفة لعام 2012 وطالب أعضاء المجلس التشريعي لولاية الجزيرة في جلسة التداول حول تقرير المراجع العام أمس الذي
    أوضح تزايد جرائم الاعتداء على المال العام والتي بلغت مبلغاً قدره 1.402.870.38 جنيه بزيادة مبلغ 21.123.46 جنيه عن العام السابق وبلغت جملة المال المسترد 468.815.6 جنيه والمبلغ الواجب استرداده
    934.054.78 جنيه طالبوا بمحاسبة المخالفين واتخاذ إجراءات قانونية فورية ضدهم مع وقف تجنيب المال ووقف تعدد الحسابات بمؤسسات الولاية مع ضرورة ضبط الصرف والحفاظ على المال العام بالإضافة الى تقوية مراجعة الإدارات المالية بالمحليات والوزارات وتوضيح مديونية الولاية بالأرقام
    وإلغاء لجنة المزادات الدائمة ومراجعة كافة المؤسسات بالولاية خاصة شركة الجزيرة للطباعة والنشر وطالب أعضاء المجلس بوقف التعاقدات الشخصية وخروج الولاية من الشركات وتفعيل مبدأ المحاسبة حسب
    القوانين المجازة

    الجريدة

    5 | 0 | 677

  10. منى محمد الحسن | رد

    ما احسن نتفائل الخيىر حتى نجده ولا خلاص ما باقى اى مساحة للتفاؤل الله يكون فى عوننا وعون عزة العظيمة

  11. توقعات 2010
    البشير يترشح للرئاسه وتحويل الجمهوريه الي مملكه
    عبدالرحيم ينال ترقيه لي شنو ماعارف بس البشير مبسوط مني(وحاجه هديه قالت كده)
    وداد بابكر تؤلف روايه مش هي السيده الاولي ..عربيا
    مظاهرات للحبش ف شارع النيل وقوات مصريه تهدئ الموقف
    محاوله انقلابيه من حسين خوجلي ….مش قلب لونو (لونو السياسي ي جنوبي ماتفهمني صاح)
    الخرطوم تطالب بالانفصال
    اكتمال طريق الانقاز الشرقي
    افتتاح وزاره القهوه والشيشه اصلو محلاتهم كتيره والمحليات مابتقدر تغطي جباياتهم
    بيع شارع النيل للصينين

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: