القصة فيها كلام

في بعض الأحايين تشد العبدلله بعض التصريحات أو الأحداث أو الأخبار فيختزنها أو يحتفظ بقصاصاتها عازماً الكتابة عنها .. لكن زحمة الحياة والمشغوليات تنسيه ذلك .. أحد الاشياء التي أراد العبدلله أن يكتب عنها هو إعلان في ربع صفحة قام صاحبه بصياغته حتى يبدو وكانه تحقيقاً صحفياً وذلك من أجل الترويج لخدماته .
صاحب الإعلان يدعى (أبو مين كده) وهو لا يكتفي بإسمه فقط بل يلحق به جنسيته ليصبح الإسم كاملاً (أبو مين كده الفلسطيني) هذا مع صورته و(لحيته) وبقية أدوات الشغل .
في الإعلان المذكور الذي تم نشره في إحدي الصحف السياسية وتمت صياغته على شكل أسئلة كانت إجابات أخونا (أبو مين كده الفلسطيني) تؤكد على مقدرته على علاج المس الشيطاني وإستخراج (الجن) من المصابين وكذلك مقدرته على علاج كافة الأمراض المستعصية كالسرطان مصحوباً بأرقام هواتفه!
عندما قام العبدلله بقراءة ذلك الإعلان وقرر أن أكتب عنه مقالا سأل نفسه سؤالاً ساذجاً : يعني الراجل ده جاي من فلسطين وقاطع ليهو كم بلد كده عشان يطلع للسودانيين جنهم ويعالجهم من السرطان ؟ ليه بالذات (صاحبنا) أبو مين كده ده (إستهدفنا) من كل بلاد العالم وجانا يقدم لينا خدماتو دي؟ (فلسطين ذاااتا) ما فيها (جن) وشيطان ولا ما فيها (سرطان)؟
كان ذلك هو السؤال الذي لفت إنتباه العبدلله فقرر أن يكتب عن الموضوع لاحقاً لولا أن (الموضوع) ضاع مع زحمة الحياة و(الزهايمر) ولكن صباح اليوم تذكرت الموضوع عندما كنت أقرأ في أحدى الصحف فوجدت إعلاناً تحذيرياً للشيخ (أبومين كده) الفلسطيني يحتل مكانا وحيزاً كبيرأ ويحمل عنوان (تحذير وتنبيه) .. فصحت كما يقول أخوتنا المصريين قائلاً في إستغراش (بطلو ده وأسمعو ده) .. ببساطه يا سادة يا كرام الشيخ أبومين كده (بيحذركم) بعدم تقليد منتجه الذي يعالج (السرطان) و(ينبه) في إعلانه بانه الوحيد صاحب ومخترع هذا (العقار) الذي يوزع فقط عبر (دار كذا للعلاج بالقرآن الكريم) ولم ينس (صاحبنا) أن يقوم بوضع صورته وأرقام هواتفه النقااااالة (لإصطياد الزبائن) .
بالطبع إن طرح دواء جديد في السوق للاستخدام البشري ليست بالعملية السهلة , فهي تتطلب الكثير الكثير من الدراسات والتجارب والبحوث وهنا نأتي للإجابة على ذلك السؤال الذي بدر إلى ذهن العبدلله أول مرة أعلاه وهو : يعني الراجل ده جاي من فلسطين وقاطع ليهو كم بلد كده عشان يطلع للسودانيين جنهم ويعالجهم من السرطان ؟ فلسطين ما فيها سرطان ولا ما فيها شيطان؟
والإجابه يا ساده يا أفاضل هي لأنو نحنا بلد (سايبه سااااكت) .. أي زول ممكن يدخل البلد دي ويعمل العاوزو ومافيش حد ح يتعرض ليهو .. لا وكمان يفتح دار (عديل كده) للعلاج بالقرآن .. ويعلن في الصحف الرسمية عن خدماتو ومنتجاتو (الصيدلانية) .. لا وأيه : يحذر (المواطنين) – واخدين بالكم – ؟ بعدم تقليد منتجاته (ما فضل ليهو إلا يقول ح يلجأ للقانون) وبيني وبينكم ممكن تحصل ما القصة فوضى سااااكت وهايصة !!
يا أخي (أبومين كده) الفلسطيني أرحل .. فالفينا مكفينا .. وإن كانت لك المقدرة على أخذ الجن بالنواصي فعد إلى ديارك وأستخدمهم لسحق العدو المختال حتي تتخلص بلادك من الإحتلال .. وأفتح لك داراً هنالك للعلاج بالقرآن والعلاج بالليزر والعلاج بالأعشاب والعلاج بالامواج والعلاج بالزجاج .. وصنع ما شئت من العقاقير والدهانات لشفاء الأورام والأحلام والسرطان والبمبان والسلم والثعبان وإن كنت يا شيخنا قد جئتنا (كفقير) لتجود علينا بمعرفتك للقرآن والأسرار فاعلم أن لدينا (شيوخ) كبار.. أبوحراز و أبو عصاية وأبو قناية وأبو جلابية ,ولو عاوز (أنطون) فلدينا الفكي (تلفزيون) وهذا يمكنة ان يجعلك تشاهد وأنت في (تونس) ما يحدث لإخوانك في (خان يونس) بث مباشر على الهواء علي طشت من الماء .
ثم يا أخى لماذا لم تذهب بعقارك هذا إلى أوروبا وتسجله عند أحدي شركات الدواء العالمية وقد أهلك السرطان معظم من في البرية؟ ألا تريد ملايين الدولارات ؟ أم إنك متخصص في (الجنيهات)؟ إن كنت كذلك فإني أقول لك هيهااااات فنحن شعب اصبحنا على (الحديدة) وكل ما نجنيه أصبح لا يأكلنا (مديده) .
أرحل يا عزيزي فنحنا ما ناقصين .. لا فقرا ولا عشابين .. لا لاعبين ولا مدربين .. لا عازفين لا فنانين .. لا حرامية لا نشالين .. لا أذكياء لا محتالين .. بلادنا يا شيخنا فيها في كل شئ فائض عمالة .. فلا داعي للرذالة .. أما لماذا (تركوك هكذا) تسرح وتمرح (وكمان تحذر) دون سؤال فلأن المسؤولين عن أمننا الاجتماعي (في الراحة) وبلادنا أضحت مستباحة !

كسرة :
مرحباً (أبو مين كده الفلسطيني) إن جئتنا خبيراً في النفط أو الزراعة أو الصناعة ولكن خبيراً في شئون الجن والسرطان والأورام فالقصة فيها كلام !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و؟

Advertisements

15 تعليق

    1. مبروكة مبروكة يا العبيد ،،،،

      1. شكرًا يا ود بوتين ومهداه الي الأخ الغلبان والابنه نونا،ويا أمريكي انا ما شغال في جهاز ال…….. وتقبل تحياتي

      2. ثانكس يا ود بوتين واهديها لاخونا الغلبان والابنه نونا،،
        يا أمريكي انت لسه بردان.شفت البرد عندنا كيف في السودان

      3. حمد لله علي السلامه يا عبيد انك ما طلعت شغال تبع الجهاز اللعين .. ألف ألف مبروك

  1. انت يا عبيد مابتنوم ؟؟ أتقول شغال في جهاز ……

  2. والله البلد بقت جبانه هايصة وزريبة من غير بواب !! كل من هب ودب يدخاها ويعمل اللي هو عاوزو !! الكلام ده ما مسموح بيه في معظم بلدان العالم إلا بتصريح من الدولة .. وفي السعودية بقصوا رأسو بالسيف في ميدان عام بأعتبار أنو دجال وساحر ..

    يا جنوبي وينك مما يجري في بلدك من قتال جهوي وقبلي وأثني ؟؟ ما سمعنا منك حاجة عن الموضوع دا !! مالكم ما قلتوا دايرين إنفصال ولقيتوه (أها قمتو لي جنكم) ما تخلوا صاحبنا (أبو مين ما عارف الفلسطيني دا) يطيروا ليكم طيرة أم ريش من الدريش هههههههههه .. سلااااام لكل المستغرشين والمستغرشات المشاركين في القروب والبروفات ..

    1. يعني انت الما عندك قتال جهوي وقبلي وإثني !!؟ بس ياها اب سنينه يضحك علي اب سنيتين !! انتو قتالكم بقي جوه قلبا , شيخ اللميييييييين يا ,,, وانتو ذاااتكم ما ضبحتوا التور ! ان شاء الله اكلتوهو ؟
      هسي ابو مين كده الفلسطيني ده حيتفاهم مع الجن الكلكي حقنا ده كيف ؟ حيشبكو أفرجيكي واطعميكي يمين الكلكي ده يفتكرو شتيمة ويخمشو ليك يخلي هو ذااتو داير ليهو شيخ ..
      تركوه لأن اكثر المسئولين اليوم يؤمنوا بأمثال ابو مين الفلسطيني ده !!

      1. قتالكم البيناتكم خلوهو كدي تعالوا ليبيا ههههههههه كاتمة ما كتمت نصاح

  3. (والإجابه يا ساده يا أفاضل هي لأنو نحنا بلد (سايبه سااااكت) .. أي زول ممكن يدخل البلد دي ويعمل العاوزو ومافيش حد ح يتعرض ليهو .. لا وكمان يفتح دار (عديل كده) للعلاج بالقرآن .. )
    الأخ الفاتح .. ياخ الطيارات فى السماء دخلت وضربت وقتلت ومرقت فااااااااااااااااااتت وما فى زول شافها ولا قال ليها عينك فى راسك معقول يشوفوا زول دخل عن طريق المطار وسط ناس كتااااار ؟؟

    1. والفلسطينى دا راجل قنوع جداً ومش طماع ..ورضى بالجنيهات دون الدولارات واليورو والشى التانى عرف إنو السودانيين بيسافروا كتير للأردن طلباً للعلاج بعد ما يئسوا من الأطباء المحليين وبيتكلفوا كتير فقال أحسن أسهل عليهم وأمشى ليهم فى عقر دارهم ..واهو جنيهين حلوين برضو ينفعوا لليوم الأسود ..
      دكتور شنباتى ..إيه رأيك ترجع وتشارك الراجل الفلسطينى فى مشاريعه الطبية دى ..وسيبك من الفوارة وأم سلاسل والعيكورة ..

      1. ههههههههههههههههههههه,,,
        شريك معاك ولا كيف النظام يا حبيب ؟؟
        اول شئ شركنى معاك فى عمارتك بتاعت كافورى ّ
        خُد

    2. خلوهو يطلع لينا جن 89 والقربان روحي ودمي بس الناس ترتاح من دي مهزلة

  4. جيتكم تاني كتمت كتمت كتمت كتمت

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: