عند كشك الجرائد قابلني جاري (عبدالحميد) وبعد التحية إنتحي بي جانباً والدهشة تعلو قسمات وجهه وسالني :
– قريت كلام الوزير؟
– ياتو وزير ما كووولهم غير الكلام ما عندهم حاجة
– وزير الصحة
– قال شنو؟
– وزير الصحة د. حميدة يا أستاذ قال إنهم قاموا برصد ولقو إنو في 3 أطفال مجهولي الأبوين بيتم ألقائهم في الشوارع يومياً
– ده في الخرطوم بس !
– أيوه والله .. يعني لو في كل ولاية 3 يكون عندنا أكتر من خمسين طفل يومياً .. يعني 18 ألف طفل سنوياً .. ودي ما المشكلة يا أستاذ
– المشكلة شنو؟
– المشكلة إنو ديل البيلقوهم .. غير القاعدين يدفنوهم ويرموهم في السيفونات و…
– معني كده العدد أكبر من كده ! .. تفتكر يا حاج السبب يكون شنو؟
– شوف يا استاذ الكارثه دي كووولها عملتا ثورة التعليم القالوها دي
– كيف ؟
– أقول ليك .. هسه البت تجي من (القرية) الكانت فيها للعاصمة تصرف على نفسها من وين؟ أبوها يكون دخلو الشهري ألف جنيه .. لو أكلت ليها وجبتين بس فول بي عشرة جنيه في الشهر عاوزه ليها 300 جنيه .. أها وين طباعة المذكرات ووين الحاجة البارده ووين (الكريمات) ووين العبايات ووين المواصلات ووين الصابون ووين معجون الأسنان و
– ويا ريت تكون بتقرأ ليها (علوم ذرة) وللا (فيزيا حيوية) تلاقيها بتقرأ في دبلوم حاسوب !
– والله يا حاج السودان بقى كووولو دبلوم حاسوب التقول عندنا (مايكروسوفت)
– أها يا أستاذ زي البنية دي مش مشروع أنحراف ؟
– صاح يا حاج .. عرس ذااتو مافي
– عرس شنو يا استاذ .. الأولاد ديل يعرسوا بي شنو ؟ وقول عرسو يعيشوا بى شنو؟
– وتفتكر الحل شنو يا حاج عبدالحميد !
– حل ؟ والله يا استاذ الحالة الوصلنا ليها دي إلا بس (العناية الإلهية) لكن زول (بني أدم) كده يقدر يصلح الحصل ده مافي .. جنس (اللبع) و(الهبر) الحصل ده (لبع نصاح)؟!
– ليه التشاؤم ده يا حاج
– لا تشاؤم وللا حاجة .. عشان المسألة تتصلح والشباب ده كان يتزوج ويبعد عن الحرام كان مفروض الدوله تعمل مشاريع تنموية عشان تكون في فرص عمل والشباب ديل يشتغلو ويكون عندهم مصدر دخل ويكونو عندهم المقدرة على الزواج !
– والحصل شنو؟
– الحصل إنو المسؤولين عملوا المشاريع (لى روحهم) وبقوا هم يتزوجو مثنى وثلاث ورباع ، ده غير (فك التسجيلات) !
– مش ممكن يا حاج الأمور تنعدل شوية .. والحالة الأنحنا فيها دي تتغير .. ويجي رخاء والأولاد ديل يلاقو وظائف .. ويكون عندهم دخل محترم .. والغلاء ده يقيف ويقدرو يعرسو؟
– والله يا أستاذ دي عاوزه ليها معجزه ولحدت الكلام البتقول فيهو ده يا استاذ يحصل نحنا عاوزين لينا (دار مايقوما) قدر (المدينة الرياضية) قبل ما يشلحوها وكده !
كسرة :
بالمناسبة (الغير سعيدة دي) أخبار المدينة الرياضية شنووووووو؟ هي متل العمايل دي ما الياها خلت ده يحصل .. وللا شنوووووو؟
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و؟
الفاتح جبرا 
Salamat
مبروك يا العبيد
عِلا إت ماالك ما بتقول برنجيه !!
برنجيه
ياجنوبي عبيد دا شبع برنجياااات بقي يسلم سااي .. لييييك يوم خ خ خ (:
وحديثا سمعنا بالزواج العرفي وزيجات كثيره باسما مختلفه،زواج المسيار وزواج الجهاد وما سمعنا بي زواج الحاسوب لسه،اللهم احفظ ولايانا واولادنا
والله يا استاذ الواحد فينا في الغربة دي كان مادي لسانو مترين ما سودانيين وكدي!!؟ هسع الواحد بقى يزوغ لما أجيبوا السيرة دي. بالمناسبة انا ب عندي غرام خاص مع كسرة خط هيثرو الهبروهو الجماعة لاني بديت عملي اﻷنا فيهو اﻵن مع بداية الكسرة و ح أخليهو مع نهايتها لكن شكلي كدا حأكون في المعاش و كسرتك دي دايرة ليها صفحة و أقلب أختها.
عبيد .. سلاماتك دي حيرتنا .. علي كل حال مبروك .. لكن ياشباب الموضوع جد خطير .. عايزين نقاش هادف لبتر هذا السرطان .. حتي إذا اضطررنا الي إنشاء جمعيات حمايةً للعرض والشرف .. من منكم من ليس له عرض أو شرف ؟؟!! الموضوع اصبح كارثياً لا يحتمل السكات ودفن الرؤوس في الرمال .. اصدقكم القول بانني أحضرت أولادي من بلاد العم سام ، فوجدت الحال هنا أسوأ بكثير .. فالأمر جد خطير خطير .. هل من مستمع ؟؟!!
السبب الاول من ما يسمي بصندوق دعم الطلاب , بت عندها دقن يدوها ما عندها دقن ما بيدوها !!
تانيا : الداخليات الكيري ( يعني بيوت العزابيات ) ومفروض كل الداخليات تكون بادارة الجهات المختصة , مش كل كم بت يأجرن ليهن بيت او شقة ويقعدن !!
ثالثا البنات ديل بيدخلن الجامعه في عمر صغير جدا ولسه ما نجضن بما فيهو الكفاية عشان يعرفن ظروف اهلهم من ظروف ناس تانيين وزي ما زميلاتن المرتاحات بيلبسن دايرات يلبسن هن كمان , وطالما الجامعات بقت شُفع حقو يعملوا ليهم لبس موّحد !!
والاهم من ده كله انو في فئة من المجتمع تافهه جدا وظهرت مع الحكومة دي , ناس فجأة لقت القروش في يدها , وديل بيجندوا بنات من الجامعات ويجرن ليهم بنات الناس , شئ تصوير داخل الداخليه وتهديد البت , وشئ مخدرات وشوية شوية للدعارة عشان تقدر توفر حق الجرعه , و.. ومصائب كتييرة .
في مقطع في اليوتيوب عن بنات جوه الداخليه بيتونسن بزواجهن العرفي ومصاحبتن لرجل كبير غني يوفر ليهن كل احتياجاتن !!
وكمان في ابهات يرسل بتو من القرية تقعد داخليه عشان تقرأ ليها دبلوم او كلية ما عندها أي معني !!
اخوي جنوبي
انت صندوق دعم الطلاب ده هو عباره عن شنو ومن المدرا الذين تواكبوا علي إدارته و ان كان الواحد بقي ما بثق في اي مسؤول وياريت لو فتح هذا الملف وأكيد ح تلقوا بلاووووي متلتالا،ملف صندوق دعم الطلاب ح يكون ملف خطير جداً
صندوق دعم الطلاب يا العبيد اخوي هو باختصار كده في محل نصب بدل اركان النقاش الزماااان ديك , ويتم عن طريقه تجنيد الطلاب الجُدد, تنضم للتنظيم تٌدعم , ما تنضم تهلك …
وما اظن بشوفوا مراجع عام ولااااا مراجع خاص !!
اخوي جنوبي هنا في بريطانيا اي واحد عاوز يشتغل في شي له علاقه بالتدريس او في العمل الطبي او اي عمل فيهو أطفال والخ لازم يكون عندو ما يثبت من الشرطه بانه ليس عليه او لديه جريمه تختص بالأخلاق والشرف والأمانة وإذا ما عندو للشهاده دي لايسمح له بالعمل ويا حبذا لو وزير الداخلين الجديد سنا مثل هذا القانون في السودان
يعنى ما يشتغلوا معاكم ولا كيف يا عبيد اخوى !!؟
هسي البعيد شنو انو الشُفع ديل يكونوا شفع الحبش الملن الخرطوم ديل ؟ ما بشبهووووونا !!
هيييي يا جنوبي ارفع رأسك فوقققق لا تدفن رأسك في الرمال !! الموضوع جد خطير .. المجتمع السوداني يسير الي الهاوية بسرعة مخيفة .. لابد من التفاكر والتكاتف .. كان راجين الحكومة واطاطكم أصبحت ، ديل مستلزين بالشغلانية دي ، انهم يسعون لخراب قيم المجتمع السوداني ، لذلك يا جنوبي فالنبادر بتكوين رابطة نطلق عليها رابطة البروف لحماية القيم ،، في مصر أنشئت جمعية تحرش لحماية المرأة المصرية .. لانريد ان نحاكي أحداً .. بل فالنشمر السواعد ونشحذ الهمم فالموضوع جد خطير ، اصبح يؤدي الي هلاك أمة فضلاً عن خلط الأنساب ..
هييييييييي جني جن افكار حسين خوجلي دي , وكت نحنا نعمل أي حاجه الحكومة دي لزوما شنو !؟ بس دايرة تقعد لينا زي المره المدخنة وممسحة وخايفة تمرق الشارع تتغبرن ؟ انا لا بعمل رابطه لا بعمل حاضنه امل ولاااا بشمر , هو ذاااتو ساعد ما عندي عضم ساااااكت !!
سمح الحبش ديل عاقرات كلهن ؟ مش يمكن عندهن واحد من التلاتة او اتنين من التلاته ويقومن يمسكن الشافع وفنن يقولن لينا هذه ولادتكم ردت اليكم ,,
يا جنوبي .. سامحك الله اذا قارنت بيني وبين حسين خوجلي ،، الحمد لله اربا من ذلك ،، وليكن في علمك هذه اشانة سمعة ، عليك بالاعتزار .. ولكن ما اهدف اليه ان الشريعة السمحاء ( كمان تعال قول لي مؤتمر وثني ) الشريعة اجازت الدفاع عن الشرف والعرض والمال .. أخي جنوبي ارجع الي تعليقي السابق الذي ذكرت فيه ان الحكومة تستلذ بذلك ،، فهل نكتف ايادينا وننتظر الحكومة ؟ 24 سنة عملت ليكم شنو ؟ خلاص اقعدوا اتفرجوا كده لامن البت فاطنة تكتب ليكم مقال تاني لمن تخوتوا عينكم في الواطة ،، غايتو ياجنوبي أنا فكرت ارجع بعيالي لبلاد العم سام تاني والله والله هناك الكلب عندو حقوق ،، وعنده مستشفيات ، هنا للبني ادم ما متوفرة ،، الله يعينكم يا جنوبي ويقوي سواعدكم ويجبر عضامكم وانت بالذات يا جنوبي ..
يا جنوبى ويا أمريكى .
كيف حالكم .
والله ياجنوبى أنا الحبش ديل واجعنى وجع شديد خلاس .
أها وزير الداخلية قريبم طلع من الداخلية الوزير الجديد دة ما أخير يقبل عليهم ويعمل ليهم حصر بس عشان يعرف إنو قروش البلد دى بتطلع منها كيف وتتحول لى دولارات بالسوق الاسود . يعنى لو كلو حبشية بترسل لى أهلا خمسين دولار بس فى الشهر ستمية دولار فى السنة فى تلاتة مليون حبشى دى مليار وتمنمية مليون دولار فى السنة دة غير الاكل البياكلوه وغير المستراحات البملوها غير الامراض البجيبوها غير الاطفال .غير المواصلات وغير العلاج .
مخير الله علينا …
امريكي ليك اعتذاري وحقك عليا , مع اني ما شبهتك بحسين بس شبهت الفكرة , لأنو اليومين ديل داير يقنعنا انو نحنا المقصرين ما الحكومة ,,
ياخي ماااالك داير تجني علي شُفعك ! لو كان في قيم زمان كان قلت ليك قعدم في السودان لاكين قيم تقعدم ليها ذااتو مافي !!
عندي خالي من ساكنين ميامي القداااام قال كلب امريكا عندو حقوق اكتر من بني ادم السودان
انا مجبور مقعدم في السودان اقلو لسه القيم هناك احسن من السعودية ولولا خوفي عليهم يطلعوا معقدين نفسيا وترسخ فيهم احساس الدونية ما كان وديتم !!!
أخي جنوبي .. اعتذارك مقبول .. لكن والله أنا الممغصني وفاقع مراررتي عشنا في بلاد العم سام مافيها دولة إسلامية ، لكن فيها عدل ومساواة مافيها رشوة ومحسوبية القانون عندهم واحد زايد واحد يساوي اثنين .. الإسلام مطبق في الحياة عدل ومساواة ، والله سبحانه وتعالي ينصر الدولة العادلة وان كانت كافرة أليس العدل من أسماء الجلالة ؟؟ نحن كمسلمين في بلاد العم سام والحمد لله نودي فرائضنا وبزياده ، المساجد مفتوحة 24 ساعة ، لكم دينكم ولي دين .. جينا هنا وجدنا فئة تتاجر بالدين وتقول ليك نحن حركة إسلامية ، كان البقية بقية الشعب لا إسلاميين ، وهم ابعد ما يكونوا عن الإسلام ، باختصار وجدنا إسلام ولم نجد مسلمين .. ليس هنالك إسلامية آلبتة ، لذلك حل غضب الله سبحانه وتعالي علي الشعب السوداني بما كسبت ايادينا من فساد ورشوة ومحسوبية ، وسلط علينا الله حكام لا يخافونه ولا يفكرون مجرد تفكير في يوم الحساب والعقاب .. وأضعف الإيمان ان نسأله سبحانه وتعالي ان يفرج كربتنا ..
معذرةً أخي جنوبي علي الخطأ ،، الصواب أننا عدنا الي السودان وجدنا مسلمين ولم نجد إسلاماً ..
لكن يا امريكي ياخوي كل القلناه ده عبارة عن مسكنات اما العلاج هو في علاج المشكلة الاقتصادية للبلد وعلاج المشكلة الاقتصادية في علاج المشاكل السياسية وعلاج مشاكلنا السياسية في يد ناس لا يهمها السودان كبلد ولا مواطن وكل همها السلطة والثروة !!
سيدنا علي قال : لو كان الفقر رجل لقتلته وحاكمنا ده نظريته لو كان الفقر رجل لقبّلته !!! شغال بي فرّق تسُد وجوّع كلبك يتبعك , الله يأذيهو زي ما اذانا ياخ , الله يأذيهو .
امبارح حوّلت الريال بي ألفين وستين , اقسم بالله قلبي وجعني , الاسر الما عندها زول بره دي تعيش كيف ياخ !!
الله يأذي الكان السبب زي ما اذانا الله يضره زي ما ضرانا الله يشرّدو زي ما شرّدنا في بلاد الله ,,,
أمريكي جنوبي وبقية البورداب السلام عليكم، الحقيقة الموضوع دا خطييير جداً جداً، وناس تسفاي ديل شجعهم قريبهم وزير الداخلية السابق وفتح ليهم الدرب على مصراعيه (بوابة عبد القيوم) !! وهناك مناطق معينة في الخرطوم بسكنوا فيها ومسيطرين عليها تماماً بأجروا الأودة الواااحدة بي 2 ألف في الشهر. ولو واحد جاء داير بت تشتغل معاهو يقولوا ليه عدييل كده: (داير بت غسيل ولا سرير) أها شفتو الحكاية وصلت لي وين !! ودا لا ينفي إنو بناتنا بتاعات الأقاليم زاااتم إنحرفوا زي ما قالوا الجماعة (إلا من رحم ربي وقليل ما هم) !! أذكر لمن جبت بتي تدرس طب في جامعة الجزيرة قبل 12 سنة (لمن الدنيا كانت بي خيرا) والأخلاقيات والمثل والقيم أحسن من هسع بكتييير !! فتحت ليها حساب توفير في البنك ختيت ليها فيهو خمسة ألف دولار قلتا ليها يا بتي دي خليها إحتياطي الدنيا ما معروفة عشان ما تتبهدلي لو حصلت لي أي حاجة (الموت وارد والمرض وارد والكشة واااردة) وطبعاً هي ساكنة في الداخلية داخل حرم الجامعة وما محتاجة ترحيل، وبقيت أرسل ليها 500 ريال شهرياً ومتابع معاها بالتلفون .. جينا أنا وأمها بعد 6 شهور نزورها لقيناها أكلت القروش الإحتياطي كووولها ما خلت فيها حاجة !! شاكلتها وكنت حأضربها فساقتني لمديرة البنك (قريبتنا) وسألتها قدامنا: (صاحباتي فلانة وفلانة وفلانة أهلهم برسلوا ليهم كم في الشهر) ؟ فجابت ملف التحاويل وقالت: 5 جنية، 7 جنية و8 جنية !!! وعلى قول عادل إمام قلتا ليها (في الشهر) ؟؟ فقالت بتي يابوي ديل بنات ناس ممتازات وشاطرات وعفيفات دايرني أشوفم محتاجات وأخليهم ينحرفوا عشان يجيبوا قروش يسدوا النقص ما لازم أديهم .. قلت ليها جزاك الله خير يا بتي لكن ما ممكن أنتي تصلحي المجتمع كلو !! أنعل أبو التعليم والفقرالبخلي بنات الناس ينحرفن عشان يصرفن على نفسهن ما في داعي ليهو كلو كلو ولا مش كده يا جماعة ؟؟
اخوي نانو ابو احمد بتك الله يحفظها ويحفظ بناتنا وبنات المسلمين في كل مكان ..
لكن انا ما عارف يعني في أسر كده عارفه انها ما عندها القدرة تصرف علي بتها ما عارف ليه بيرسلوهن يقرن بره الولاية الهم فيها , وكمان الاغرب انو تلقي البت بتقرأ حاجه هايفه جدا , لا هي تستفيد من شهادتا ولا اهلها يستفيدوا منها ولااا راجلا واولادها ذااتم يستفيدوا , وظهرت اسامي كليات كده والله انا لليلة ما عارف الطالب لما يتخرج حيشتغل شنو يعني !؟ يومتا سألت ولد انت بتقرأ شنو ؟ يمين قال لي اسم كده انا لليلة ما قادر انطقوا او اتذكره ذااتو ! خلاني ليك زي حبوباتنا الزمااان لما يقولوا ليها البت دي سميناها نيفين والله الحبوبة لما تموت لا تقدر تنطقو ولا تعرف معناه شنو , قمت سألتو : يعني لما تتخرج بتشتغل شنو ؟ قال لي ( حاجات كتييرة ) وقالا بالفظ ده وسكت وانا سكتّ !!
التحية ليك والتحية لأبونانو أحمد وكل البورداب – بمناسبة السألتو من اسمو ده – ايام الجامعه طلعت متأخر من بيت العزابة الطلبة ومقدمني واحد منهم بعد الساعة 2 ، اللهم انا المشوار عموما متعود عليهو مشي، قريبي قال لي اشر للملح بتلقى وشجعنا على ذلك وجود 3 شبان – وقفنا بعيد منهم شوي واشرنا لأول سيارة – وقفت مشيت عليها اتحركت، وقفت وقفت، مشيت عليها اتحركت، وقفت وقفت، اللهم اتحركو عليها التلات شباب وقفت وركبو، وبعد اتحركت بمسافة واحد من الشباب طلع راسو وبكل غنج ودلال الفتيات قال: (هيييييي …. بس ما عرفناكم جداد ولا ديوك) والله قريبي وقع في نص الزلط اضحك اكثر من 3 دقائق وانا جاري بورا السيارة واجدع بالحجار …. اها الشاكلة دي بقت متوفرة بكثرة في مجتمعنا وبرضهم يقرو في الجامعات وكمان اولاد خرطوم وفي منهم اولاد اقاليم (حليل زمن الاقاليم والتوزيع الجغرافي) بس الغالبية منهم ما محتاجين – القصدتو انو الموضوع ما موضوع احتياج وبس، وياما في محتاجين واولاد وبنات ناس، وما بيعو مبادئهم، بس في حلقة مفرغة متى ما وضعنا يدنا عليها زال سحر السااااااااااااااااااااااااااااحر.
اولا ابدي امتناني لإثارة الموضوع – واثمن المشاركات لاسيما اخونا امريكي – وبإختصار المشكلة ال 24 سنة غيرت في الشعب السوداني الكثير، وانا اعترف في حال اعتراف الحكومة ان انجازاتها المزعومة تطور طبيعي للإنفتاح العالمي وتطور الاتصالات بأن ما حدث لأبنائنا وبناتنا هو نتاج نفس السبب – والا فهي السبب – وفي الحالتين ضاعت قيم ومثل وبقى القليل منها – انتم منكم من هم في السعودية، وتعرفون انه ما بقى للسوداني غير سمعته الحسنة “امانته” وهي في طريقها للإنحسار حيث ان جميع العادات والتقاليد تتداعى بتداعي الظروف الاقتصادية – ارجو منكم جميعا التكاتف كي نرضي انفسنا اولا بأننا قدمنا لهذا الوطن – وبأننا وقفنا في صفه – كل بطريقته – وان كان تنفيسا عن النفس في حدائقجبرا الغناء – وبعدين مطر الحبش رش شششش ده ما السبب بس، الاسباب كتيرة اهمها كثرة الجامعات “الفارغة” واظن الاخ جبرا قبل اليوم ناقش الموضوع في مشكلة جامعة النيلين علاما اعتقد – ولأني اعرف ان بعض المسؤولين وظلالهم وعيونهم يتابعون ويعون ويعتبرون ويضعون في حسبانهم ما في هذه المدونة – ارجو من الاخ جبرا دمج افكار هذا البوست وافكار البوست الخاص بكليه الالكترونيات جامعة النيلين ومشاركات الاخوة الفعالة في قالب يعصر فيه افكاره ويرويه من بعض البوستات الاخرى ذات الصلة في افكار – يعني غشش المسؤولين او وريهم الحلول لأنهم لو عارفين كيف احلوها ما كانت مربوطة ليها 24سنة. ولاشنو؟
كسرة: مكسرة سنون الحكومة الهرمانة
و أنا من هذا المنبر أشكر الصحفية فاطمة الصادق !! و بالرغم من رفضي و رفض الناس لها في التعميم إلا أنها قالت ما عجز عنه الكثير حتى داخل بيوتهم في تربية أبنائهم وقوله لهم ،، وأذكر أن البروف في بوست سابق ذكر حكاية البنت ممكن تجي أواخر الليل و أهلها في إنتظارها مستنين العشاء !! ففاطمة قد ألقت حجراً في ترعة الماء !!
يا أخوانا شوفو الحاصل في الشارع ،، في المدارس ،، في المواصلات ،، في الجامعات ،، في الحدائق العامة ،، الحالة وصلت لطريق اللاعودة فعندما تقول هذه الصحفية أن في كل بيت في سكران ومسطول وزاني فهذه شئنا أم ابينا بعض الحقيقة فالسودان أكبر دولة منتجة ومستهلكة للبنقو !!! العرقي بأشكاله وانواعه وماركاته راااااقد وبالبذار كمان ،، الزنا ! دار المايقوما للأطفال المحظوظين الذين كتب الله لهم عمراً جديداً ، تشهد بأن هناك زناة و جاءت الآن الشهادة من أعلى الهرم من الوزير شخصياً وكل سبب لابد له من مسبب !! زرعنا فحصدنا مشروع حضاري ،، تمكين ،، قيادة العالم ،، دولة رسالية وعييييييييييييك
حقو الحكومه تااخد أفكارنا دي ولعل وعسي …
اول مرة أشوف لي زول بحلم وهو صاحي ياعبيد !!
أخي عبيد لك ولكل الأخوة تحياتي .. يجب ان يكون التوافق الأكبر علي نشر التوعية والتبصير بالحساب والعقاب الرباني ، في زمن أصبحنا فيه نري الفجور والانحلال والفساد يعم القري والحضر وتري الكاسيات العاريات في الطرقات حتي يخيل إليك ان ليس هنالك أولياء أمور ، وأتسال من اي البيوت يخرجن هؤلاء الفتيات ؟ الم يطلعن علي قصة المرأة السوداء التي رآها بن عباس وقال عنها أنها من أهل الجنة ، حيث أتت الي الرسول ( ص) وقالت له يا رسول الله أنا امرأة اصرع ، فادعوا الله لي فقال لها الرسول الكريم : اتصبرين ولك الجنة ، فقالت له ادع لي الا اتكشف ، وقد كان .. يا سبحان الله بشرت بالجنة ولا تريد ان يري جسدها الطاهر أحداً ، يا سبحان الله ، اين بايعات الهوي والجسد في هذا الزمان الغابر من تلكم المرأة التي بشرت بالجنة لمجرد أنها صبرت علي ابتلاء رباني ، إخوتي .. والبروف قائدنا فالنبتكر من الوسائل الي الدعوة والتبصير بان الأمة تنحدر الي هاوية سحيقة ، مع ملاحظة أننا كشرقيين نضع خطوطا حمراء تحت بند الثقافة الجنسية ، فكيف اذا لأطفالنا بنين وبنات ان يتجنبوا الذئاب البشرية ان لم نسلحهم بالمعرفة والابتعاد ، متزامناً مع التربية الدينية وأداء الصلوات في أوقاتها والالتزام بطاعة الله ورسولة ، والمثل يقول ابنك كان كبر خاويهو .. وكلكم راع وكلكم مسئول عن رعيته .. كسرة .. ياجنوبي .. اوعك تقول لي دا شغل الحيكومة .. تصبحون علي خير .. اها برضو حسين خوجلي ؟؟!!
اللهم انتو اعملو الخير وارموه البحر – اقلو بترضو انفسكم وبترضونا
بعدين والله الكلام ده والافكار ما بيضيعوا
ربنا يعين؟
سلام ياشباب ..لو كلنا ابناء واباء ختينا في بالنا انو التربيه ليست فقط دين وعادات بل هي قيم ومنطق يتم غرسه عميقا بالمواقف الحياتيه وليس الكلام … الاب يجلس يشاهد الافلام الخليعه ويصفق للنساء العاريات وينصح ابنه بعد قليل ان يبتعد عن الرذيله …يدخن ويخبر ابناءة ان التدخين ضار بالصحه …يكذب ويقول ان الكذب حرام ..يعامل جارة حبشيا كان او جنوبيا بعنصريه ويخطب في الناس ضد العنصريه … في بعض الاسر التي اعرفها تعب الوالدين من عقاب ابنهم وطرده من البيت لانه يعود مسطولا كل يوم …اخبرتهم لاتعاقبوه ولاتطردوه استقبلوه وانظرو اليه بعين الشفقه والرفق تكسرو عينه فلا اعظم من الخجل دافعا للاقلاع عن مسببه … المجتمع السوداني خلاص رمى طوبة الحكومه الكلام الذي شبهتوه بانه كلام حسين خوجلي صحيح وليس معناه االجبن او االتخاذل انما هو قد يشكل خطوة تساوي الخروج الى الشارع … كيف؟؟؟ تغيير المجتمع لان سبب تخاذلهم هو ماهم فيه من انشغال وتغييب عقل ..المستيقظ يوقظ النائم ..مانديلا اقام الدنيا من داخل سجنه …ياليتنا نقدر ان نصبر ونخطط لشئ بعيد المدى عظيم النتائج