رسوم درداقات وترفيه

خبران يمكن عند قراءتهما أن يوديا بحياة أي مواطن معتل القلب مثلي .. الخبر الأول هو توصية أوصت بها اللجنة المالية لمجلس تشريعي ولاية الخرطوم بزيادة الرسوم علي الدرداقات لتبلغ 15 جنيه في في اليوم والدرداقة للناطقين بغيرها هي عربة يدوية صغيرة (بلستك واحد) لها يدان تجران بها يستخدمها (الصبية) لنقل الأغراض داخل الاسواق للزبائن لقاء مبلغ تافه من المال .
مجلس تشريعي الخرطوم لم يناقش يا سادتي الأماجد إتساخ الأسواق ونتانة رائحتها وعشوائية عرض السلع فيها وإزدحامها بالطبليات التي تؤجرها المحلية حتي صار السير في الأسواق مشكلة (للراجلين) .. لم يناقش مجلس تشريعي الخرطوم الإستعدادات للخريف القادم حيث تصبح الاسواق عند كل خريف بركاً من الماء الآسن لتصبح مرتعاً للبعوض والذباب الناقل للأمراض .. لم يناقش المجلس هذه الأمور التافهة .
بدلاً عن مناقشة أيجاد حل وبدائل لعمالة الأطفال الذين يدفعهم الفقر والعوز للعمل بالأسواق كسائقي درداقات هاهو المجلس يناقش كيفية الإستفادة مما يحصلون عليه حيث طالب عضو المجلس سليمان ادريس بزيادة الرسوم المفروضة على الدرداقات قائلاً (مافى زول سائق درداقة مسكين) ومدعيا بان العامل يدر دخلاً يومياً من عمل الدرداقة يصل الى 100 .. تصوروا يا سادتي كل العالم يعمل للحد من عمالة الأطفال ومجلسنا التشريعي يمتص دمائهم اليانعة وعرقهم الطهور ويفرض عليهم مزيداً من الرسوم بل يري عضو المجلس المحترم بأنو مافي زول سائق درداقة مسكين ! يا للهول ويا لإطلاق الحديث على عواهنه .. هي المسكنة شنو؟ غير إنو الزول يكون (طفل) وشغال .. ممنوع إنو يحلم يبقى في يوم من الأيام مهندس أو طبيب أو طيار أو موظف؟ يشتغل مما تشرق الشمش لحدت ما تغيب ويرجع بيتو منهوك القوي وخائر البدن عشان تشرق صباح اليوم التالي ويعيش نفس المأساة ..
يبدو أن العضو المحترم ما جايب خبر .. يااخ السودان كلو مسكين .. المية جنيه المستكترا على المساكين ديل لا تكفي كمصروف لأصغر اسرة ليوم واحد .. إن الفقر والمسغبة التي طالت معظم شرائح وطبقات (الشعب السوداني الفضل) أيها العضو المحترم هو الدافع الرئيسي خلف قرار العائلات بإرسال أطفالها للعمل في هذه المهن الشاقة المضنية من أجل تأمين مورد رزق يعينها على هذه الحياة التي أضحت (بسياساتكم) لا تطاق !
لقد قامت مؤسسة “مابلكروفت” المتخصصة بتقدير المخاطر المصاحبة للأعمال بدراسة ومسح 197 دولة أثبتت هذه الدراسة أن عشر دول يعيش فيها العمال الأطفال ظروفا بالغة الصعوبة (جاء السودان خامسها) وهي على التوالي: أريتريا والصومال والكونغو الديمقراطية وميانمار والسودان وأفغانستان وباكستان وزيمبابوي واليمن !
قال أيه : (مافى زول سائق درداقة مسكين) .. بهذا المنطق .. (مافى زول سائق أمجاد مسكين) و (مافى زول سائق تاكسي مسكين) .. و(مافى زول سائق هايس مسكين) .. و(مافى زول سائق قريس مسكين) و(مافى زول عندو صاج طعمية مسكين) و(مافى زول عندو صاج لقيمات مسكين) و(مافى زول عندو صاج سمك مسكين) .. (مافى زوله ست شاي مسكينة) الناس دي كووووولها يصل متوسط دخلها في اليوم إلى الـ 100 جنيه (يعني كيلو ونص لحمة) !
ياخي إنتو مفروض توفروا (للعيال) ديل حياة كريمة .. أكل وسكن وشراب وملابس وقراية .. مش لمن تدفعهم الظروف (الرديئة) للعمل الشاق تشيلو عرقهم .. ياخي والله فعلاً الإختشوا مااااااتو !
كان ذلك الخبر الأول أما الخبر الثاني فلا يقل (سخفاً) منه .. فبينما المواطنين قد أصبحو (جارين وراء لقمة العيش) السنة كووولها ومعظمهم لا يكاد (بالكاد) يستطيع توفير ضروريات الحياة له ولأبنائه .. وبعد أن تم شطب بند الترفيه من حياة المواطن السوداني (العادي طبعن) .. والوضع هكذا وجدها المواطنون فرصة للذهاب مع أسرهم (مرة في السنة) لقضاء وقت يرفهون فيها عن (تعب السنة الفاتت) ولكن تأبى الحكومة ممثلة في وزارة المالية إلا أن تنتهز الفرصة لتفرض عليهم وهم يحلمون بقضاء عطلة عيدالإستقلال رسوماً .. .. يعني عاوز ترفه تدفع قروش !! وذلك عبر تحصيل إيرادات مالية لخزينة الدولة اختارت لها اسم ( رسوم ترفيه )، حيث تولت الهيئة القومية للغابات (كما جاء في الخبر الذي أوردته هذه الصحيفة) عملية الجباية بواسطة أورنيك 15 صادر عن وزارة المالية والاقتصاد الوطني، وقررت فرض مبلغ (22) جنيهاً على كل حافلة كبيرة تدخل الى غابة السنط المعروفة بالخرطوم، فيما فرضت مبلغ (11) جنيهاً على كل حافلة صغيرة ( كريس، هايس) !
بالله عليكم لماذا أيها المسؤولون هذا التضييق على المواطن؟ ماذا تفعل هذه الرسوم التي تأخذونها من المواطن لدولة يكفي وقود عربات مسؤوليها لتشييد (ديزني لاند) .. ماذا تفعل هذه الرسوم لدولة تمتلئ تقارير مراجعها العام في نهاية كل عام بمليارات الجنيهات المختلسة والمنهوبة ؟ ماذا تفعل هذه الرسوم لدولة تسرق نصف ميزانية إحدي ولاياتها فلا يعلم أحد أين ذهبت حتى اللحظة؟ ماذا تفعل هذه الرسوم لدولة تستورد تقاوى بعشرة ملايين دولار فتجدها فاسدة ؟ ماذا تفعل هذه الرسوم لدولة لا توفر للمواطن حتى التمتع بأشجار غابة السنط؟

كسرة :
أقعدو ضايقو في المواطنين ديل ساااااكت !!………… (وبس)

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟

42 تعليق

  1. برنجيييييييييييييييييييييييييية 2014

    1. ختييييير وادهشتني ومبروكه

    2. مع بعض في نفس الوكت يعني مخمسه

    3. مبروك يا حبيب البرنجية المُقعّدة , ,,,

    4. والله يا مندهش محظوظ , واوات برنجية ديل لو زدتهم وااااحدة كان لقيت عبيد نط قدامك !!!!!
      انشاء الله تكون بداية موفقة لي 2014 !!! مع ناس رسوم الترفيه ديل !!!
      ولو خاشي الغابة دي اضرب لي سيجارة بدفعوني رسوم شنو ؟؟؟؟؟؟؟؟؟؟؟؟

    5. الإخوة المباركين
      يبارك في أعمالكم وأعماركم ،،، وإن شاء الله دائما أنا خاتف البرنجية وإنتو تباركو قولو آآآمين

      1. مبروكة آلحبيب , سويتها وقعدت ,,
        هييييع

      2. وما دايما البشير خاتف الرئاسة ونحنا بنشكّر فيهو , يعني شنو !؟
        نحنا شعارنا الشالو ما يتني وما يشيل خلافو ,,,

    6. لاكين ماااا ادهشتنا عديييل كدة يا المندهش … بالبركة ان شاء الله ,, بس اوع (العضو المحترم) يفرض ليك عليها رسوم و ضرائب !!!

    1. مبروكة ليك انتا برضو يا العبيد ,, مع ان المندهش جازفا منك ,,الظاهر انو ال server عندو بقى اسرع من عندكم المرة دى !!
      بس المهم الفكرة !!!

  2. العبيد والمندهش .. انتوا ما بتفطروا ؟ ياجماعة اكلوا ليكم لقمة في الأول .. وبعدين شوفوا البرنجية ..

  3. يا بروف شايفك مصر علي وصف العضو ( المحترم )! ولآ ده التأكيد البفيد النفي !!
    شُفع الدرداقات ديل مفروض الحكومة تقول ليهم تعالوا المدرسة ونحنا بنديكم 15 جنيه كل يوم ,,
    حلوه حكاية اورنيك 15 في رسوم الترفيه دي ! إيه الشفافية دي , ايه النزاهة دي , ايه الحلاوة دي كلها وا حلاتو يا ناسي وا حلااااتو ( جيبو لي جضوم وزير المالية ده ادغدغم شوية ) , خلاص نحنا قبلانييييييين بي اورنيك 15 ده , بس كمان دايرنوا في رسوم النفايات وفي سداد الكهرباء والموية وفي رسوم المغتربين كلها من اورنيك التأشيرة لحدي تجديد الجواز وكمان في كل الوزارات وحتي رسوم قطع الجمار في المساجد التابعه للشئون الدينية والاوقاف , ونشوف البكورك منو في الاخر ! المواطن الحيدفع وهو عارف قروشو ماشه وين , ولآ الحكووووووووووووووماااااااااااااااااااااا !!!

    1. والله يا جنوبي عندك شوية أمل كدة وحبة تفاؤل – ما في محلهم !!!!!!!
      اجيبها ليك بالمفتشر عشان تاني ما تفكر في ( ولا حتى اجازات ) , لم البي هناك عليك !!!
      يعني شنو اورنيك 15 , انت قايل العالم دي بوقفهم اورنيك !!!!! وحتى رسومك القلتها دي لو عملوها كووووولها بي 15 دا يعني شنو ؟؟؟
      ما متذكر مرة كوتة اقليم كاملة من اورنيك 15 قالو اتحرقت وطلعوا ليهم بديل ,,,, بعد شوية الاتحرقت دي ظهرت في قنصلية جدة وشغالة تش !!!!!

      1. التش تش تش تش تش تش

      2. والله لو ما كنت في ( السوء دية ) كان لميتهم زمااااان .
        لاكين انت قايلنا زي ناس عبيد هنا مهما تقعد ( لصيق الطين في الكرعين ماااا ببقي نِعلين ) حجيبهم هسي وبعد كم سنة تااااني حاوديهم للجامعات !!

    2. غايتو ضحكتوني ، انت فاكر يا جنوبي أرويك ١٥ولا حتى١٨ دا بردع الجماعة ديل؟ لأ اكيييييد عارف . آيه رأيك بقى الرسوم دي بالذات بي أرنيك خمس تباشرها ما ظهرت في الموازنة العامة !!!مش مفروض عشان بتتلم لوزارة المالية؟ إها ، ولا عليهم. بعدين وزير المالية مش قال موازنة ٢٠١٤ خالية من اي جبليه ؟ اها ودي شنو انشاء الله، ختة؟؟ أرنيك شنو يا شباب ،نقوم نلف أحسن

      1. سوري ، قصدي جباية. لكن جبلية او جبلاية برضو تنفع ليهم

  4. وغابه السنط تم بيعها بحساب المتر ….. وحسه المتر بأكثر من ألف دولار وهذا للمعلوميه وعلي الأجيال القادمه معرفه اين ذهبت أراضيهم ولمن بيعت ومن المستفيد وهل الطفل السائق الدرداقه استفاد من بيع غابه السنط،بيع خط هيثرو،بيع الأقطان ،بيع البترول،بيع الذهب،أموال الزكاه،وسرقه أموال الاوقاف والحج،وغسيل القضا وغسيل الأموال ،،
    عزيزي الطفل سائق الدرداقه اوعك تدفع ولا مليم

    1. و غابة السنط هى شنو غير (كوشة منضفة شوية) ؟؟؟!!!

  5. البروف الحبيب
    والبروفات الأحباء
    الشعب عايش في أمانتي الله واكلين شاربين متعلمين متعالجين وبقت الرفاهية كمان في الأكل بإكتشافاتهم الرائعة في إعداد وتقديم الوجبات وأطالب بشدة بفرض رسوم على المطاعم الفارهة التي تقدم هذه الوجبات وإليك المانيو :

    شوربة كوارع الجداد المدعوة “أصبر”……..
    شية راس الجداد المدعوة” تايتنك”………
    سندوتش الموز آآآي الموز الواحد ده …….
    الامبلكسات:
    الطلب بي ٤ جنيه .. لحمة محمرة والمكونات من جلد البقر ..
    ال (سكو سكو) :
    دي وجبه خفيفه والمكونات عباره عن مصارين الجداد وكيلو الكمونيه بي تسعه جنيه ..
    الينامووقه :
    لحمه محمرة بس لحمة شنو ومن اي حيوان ما معروف و التركيبة لا أحد يعرفها إلا المنتجين لها ول نوع الحيوان شنو!!
    .. بس طاعمه جنس طعومية .. و كمان بياكلوها بالملعقة شفت الرفاهية دي كيف ؟؟؟؟
    وبصراحة أنا أدعو المجلس التشريعي لولاية الخرطوم بفرض ضرائب بنسبة 100% على هذه الاكلات الكلها بروتين و بالطبع مافي داعي للبذار ده كلو ود . شمباتي ود . العبيد قالو زيادة البروتين مضر بالصحة !!

    1. الامبلكسات لحمة محمرة من جلد البقر !!!؟
      ما قايلك بتخجل كده !! ادي الناس المعلومة الصحيحة يا المندهش ما تدسها , الامبلكسات هي العضو التناسلي بتاع التور ( اها مش هذبتها ليكا ؟ ) …

      1. يخسي عليك !!
        تهذيب الياباني
        لكن قالو الأمبلكسات بتعالج وجع الضهر !! جربتها ؟؟؟

      2. منو ده ؟ انا !!!! بري ,, يسمني !!

    2. انتو ما سمعتوا بى سوق اللقمة (لا اقصد العصيدة) ….. ده فيهو طش بتاع فتة لحم وعضام بحاسبوك باللقمة الاكلتها

  6. الانقاذ وحكوماتها المتعاقبة فهمهم لانقاذ الشعب دا هو في اتخاذ القرارات المؤثرة سلباً على حياته ومعيار النجاح عندهم هو عدد قرارات المسؤول البتضييق على الناس كلما كانت القرارات من هذا النوع كلما ضمن الوزير البقاء والاستمرار في منصبه ، والحاجة المؤلمة انه الوهم ديل كلهم طالعين من بيئات فقيرة واوساط تعبانه جدا وقبل الانقاذ دي كانوا فقراء حق الفطور ما عندهم

  7. اتفوووووووووووووووووووووووووو

    1. إنت كل يومين تلاتة كده ؟؟
      كملتو كلو يا اللمبي

      1. ههههههههههه,
        لكن اسوى شنو يا حبيب !!؟
        ياخ حاجة مقرفة بشكل ومقززة حد الارتجاع ,, اووووووووع

  8. و بعدين ليه نحنا مستغرشين من فرض الرسوم على الدردافات؟؟ ما نحنا متعودين على الشطحات بتاعت اخوانا (الاعضاء المحترمين) ,, فقبل شوية كان طلع لينا والى شمال و الا شرق دارفور بفرض رسوم على (الطلح – حطب الدخان) ,, و ناقص يتفرض علينا رسوم الشملة و الضفرة و تصديق حفرة الدخان ,, و كلو باورنيك 15 !!!

  9. طبعا الدرداقات دي في كل سوق بيحتكرا زول تابع للمؤتمر الوطني , او عنده صلة قرابة بأحد مسئولين المحلية او صلة شراكة , هو البشتري كمية من الدرداقات يختها جوه حوش او دكان , ويأجرا لأطفال عمرهم بين 10 سنة و17 سنة وديل بسموهم اولاد الدرداقات , وايجار الدرداقه قبل سنة كان 10 جنيه يدفعا الشافع من الصباح عند استلام الدرداقه ويرجع الدرداقه اخر اليوم للحوش او الدكان , وصاحب الدرداقات ده ما عليهو أي التزام تجاه الدولة مع انو يعتبر تاجر !! وده لو عنده 100 درداقه بدخلن ليهو 1000 جنيه تدخل بااااردة في جيبو !!!
    يلا تعالوا نشوف التزامات الطفل ولد الدرداقه ده :
    10 جنيه ايجار درداقه + 15 جنيه رسوم درداقه + 15 جنيه تلاتة وجبات + 5 جنيه مواصلات من والي السوق + 10 جنيه ايجار درداقة بكره عشان يدفعا من الصباح قبل الشغل ولازم يوفرا من حق الليلة . الاجمالي = 55 جنيه التزام يومي ده غير حق السفنجه والهدوم وغير البترجاهو منه امه عشان يجيبو لاخوانه الصغار .
    الله ينعل ميتين ده برلمان البناقشوا فيهو رسوم الدرداقات ده , بدل ما تناقشوا الحل اليخلي الشفع ديل يعيشوا طفولتهم تقعدوا تمصوا دمهم عشان تستمتعوا بي كهولتكم , يا رمم يا وسخ !!
    دقاقات خردة تجيبا وزارة الزراعه ما تشوف ! درداقه لازيها شافع تشوف !!؟

    1. بعد شويه الشفع ديل اذا أتم ما حيلقو شغل، لأنو ببساطة كدا، ما عندنا النشيلو في درداقة. أجي ياخواني، ؟ درداقة شنو اللينا؟ كلها طماطمتين وتلات باميات و خيررررايا !!!!!ههههههههااا

      1. ههههههههه والبزار لزومو شنو ؟ الخيار والطماطم ديل ما من الفواكه !! باميه وقشر بصل وقشر توم ما كفاااايه , اهو تغيروا للاولاد شوية من الهوت دوق الطلّع عينهم ده !!

  10. اخونا الحبيب / كتلوني ولسه حي
    ياخي دايما بحاول الاتصال عليك وتلفونك مقفول
    غيابك عن القمردينة مصدر قلق ,, مااالك ماك طيّب ؟

    1. هههههههاي طيب انت !!
      تتذكر يوم قلنا عن مشروع تكاسي الغرام
      أها من الزمن داك كتلوني ولسه حيّ بدرس في المشروع وهسع مشى ينفذو
      وكمان الدرداقات دي برضو مشروع فيهو نقاطة كويسة
      وربنا يرجعو لينا بالسلامة

      1. هههههههه . يعني هو هناك ؟
        وانا اقووول , تعرف في اجازتي دي الصباااح شفت لي واحد بيشششبهو جمب سلخانة ام درمان, بس قت لا لا الزول ده هناك !! شلت ام فتفتي ومشيت ,,
        الله يرجعوا بالسلامه
        هو في غرام تاني !! غرامات ساااااكت

      2. امممممممم,,
        خيانات جد !!

  11. إنتو يا جماعة الخير .. النائب المحترم الجسور دفع الله حسب الرسول ما قاعد يسمع بالجبايات دى عشان يتكلم عنها … ولا يقراها فى الجرايد .. ؟؟ما سمع بحاجة اسمها أكل أموال الناس بالباطل ؟؟ وما سأل نفسه يوم من الأيام عن الفلوس البياخدها من البرلمان دى حلال ولا حرام وهو ما قاعد يعمل حاجة .. شغلتو كووووولها عن النسوان بس .. تخصص نساء وولادة ..وختان ..
    غايتو لاكين جنس تخصص ..

  12. عجبتني كسرة 2014 الجديدة دي
    والله شكلك يا استاذ تكمل 2014 دي والبوست اتملي كسرات، وتسمع اذ ناديت حيا، ولكنك تبقي فينا الامل بيوم بكرة جميل، ولابد يوم باكر ابقى اخير.

  13. يا أستاذ ما كلمتنا عن (دقة) العضو البرلماني خارج الاستديو..

    1. دقة ريحة ؟؟
      هيييييييييييييي يكااااااااااااااااااااااااااا

  14. يا خوي يا بروف مسكين البد يأمل وامله يغلبوا تحقيقه ما كانت في يدهم كانت عاوزه شوية صمود وتنفرج اها رجعت تاني كتمت كتمت كتمت

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: