قول كلام تاني

بينما العبدلله يقرا في أحدى الصحف لفت نظره تصريحاً لرئيس القطاع التنظيمي بالمؤتمر الوطني المهندس حامد صديق يفيد بعدم إجراء تعديلات في الدستور قبل الانتخابات المقبلة، ويؤكد فيه بإن قيام الانتخابات في العام المقبل من مطلوبات الدستور ويبرئ في الوقت ذاته ساحة حزبه من استخدام أموال الدولة في الانتخابات مؤكداً عدم احتياجه لها قائلاً إن المؤتمر الوطني سيعتمد على اشتراكات عضويته التي تصل 8 مليون عضو …
ما أن قرات هذا التصريح حتي صحت : يا ولد جيب الكالكيوليتر (الآلة الحاسبة) !
طيب إذا افترضنا أن تعداد السكان قبل الإنفصال كان 50 مليون وبعد الإنفصال أصبح 40 مليون وأن 12 مليون منهم دون البلوغ يكون الباقي 40-12 = 28 مليون ، طيب نقوم نطرح منهم 4 مليون طلعوا تركوا البلد دي (مرغمين) 28-4=24 مليون (يعني الفاضل 24 مليون مواطن) فيهم 8 مليون – مؤتمر وطني- كما صرح الباشمهندس يعني 8 مليون مؤتمر وطني و16مليون (ما) مؤتمر وطني وهذا بقانون النسبة والتناسب يساوي2:1 يعني كل عدد 3 من المواطنين فيهم واحد (مؤتمر وطني) .. شفتو كيف؟
ما أن قمت بوضع الحاسبة جانباً حتي سألت نفسي :
– معقوله هسه كل 3 مواطنين فيهم واحد عضو في حزب المؤتمر الوطنى؟
بدأت بنفسى التي وجدتها تنتمي إلى حزب (المواطن) ثم جيراني من الثلاثة جهات .. ثم عرجت على أسرتى الصغيرة .. ثم الكبيرة .. توقعت أن أجد نسبة واحد من كل نفرين (مؤتمر وطني) .. لكنى للأسف الاسيف لم أجد زول وااااحد (من العائلة كوووولها) !!
قلت فى نفسى ربما (عائلتنا دى) عائلة (دورا ميت) ساااكت ولا تفهم فى السياسة وليس لها حس (وطنى) ولا تتوق أن يكون لها (مستقبل حضاري) كدى يا زول شوف أصحابك وأصدقائك، أمسكت بهاتفى الجوال وبدأت فى إستعراض أسماء معارفى وأصدقائى واحد .. واحد .. لم أجد منهم واحداً (من الـ 8 مليون) .. وهنا سمعت طرقات على الباب فتحته فوجدته (فوزي الجزار) :
– أهلاً فوزي
– إذيك يا استاذ .. والله قلنا نتفقدك ليك مده ما ظاهر وما قاعد تجي علينا
– يا فوزي نجيكم كيف مع الكيلو أبو ستين ألف ده ؟
– بكرة يا أستاذ مر علينا نجهز ليك حاجة كويسة
– تجهز ليا شنو يا فوزي نحنا بقينا شغالين عدس ساااكت
– طيب نجهز ليك حاجة كده (قدر ظروفك)
– خلينا من قصة اللحم دي يا فوزي .. دي فرصة أسالك سؤال !
– إن شاء الله خير يا استاذ
– لا خير .. إنتا يا فوزي (مؤتمر وطنى)؟
– تقصد شنو يا استاذ !
– قلتا ليكا إنتا عضو فى حزب المؤتمر الوطنى!
ضحك (فوزي) حتى كاد أن يستلقي على ظهره :
– يا أستاذ إنتا بتهظر .. هو أنحنا قادرين (ناكل) عشان نكون بتاعين أحزاب و(سياسة) وكلام فاضي ؟ .. خليها على الله يا أستاذ
– طيب إتفضل لى جوه يا فوزي نكرمك بى شاي بى أي حاجة
– إتفضل وين يا أستاذ أنا لاحق الجمرة قبل ما تقفل
نعم الحقيقة التى لا تحتاج لأى نوع من الشطارة تقول أن 90% من الشعب السودانى الفضل أصبحوا (ناس معايش سااكت) لا ينضمون (لأى حزب) وأن السياسة بالنسبة لهم (ترف) لا تحتمله (صعوبة الحياة) التي أصبحوا يعيشونها والجرى وراء (قفة الملاح) ومصاريف المدارس والجامعات .. والعلاج .. والمستشفيات والسكن والمواصلات و(الجمرة) والشنو ما عارف .. كما أن الحقيقة (الما عايزه ليها إحصائيات) تقول أن كل الأحزاب التى على الساحة الآن لا تزيد عضويتها الحقيقية (وليست المفبركة) فى أحسن الأحوال عن بضع ألوف لا تتجاوز أصابع اليد الواحدة .. هذا إن لم تكن أقل من ذلك بكثير بما فى ذلك حزب (أخونا الباشمهندس) .

كسرة :
8 مليون … يا رااااجل قول كلام تاني !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟

43 تعليق

    1. يا إخوانا البروف دا ظاهر عليهو خرمان شديييد لكيلو ضأن !! رأيكم شنو نعمل ليهو جمعية ..

    2. مبروك البرنجيه يا امريكي ,,
      هو كان اكل ضان تاني وين نلقي الكتابات دي !!؟ خليهو فييييي عدسه ده , شان يمرق الفي بطنه

      1. لكن مابجيهو قاوت يا جنوبي !!

      2. يا بخته بالعدس في ناس أأأأأأأأأأأأأجنوبي رشوشه ما عندهم

    3. مبروك
      إن شاء الله تنفعك في السقط ده !

      1. شكرًا أخي مندهش إنشاء الله ينفعوك أولادك ، والله اذا جاكم البرد الجد حقنا في بلاد العم سام .. والله إلا تسكنوا في كافوري اصلوا الأماكن دي بكون فيها Heat .. والله انتوا في نعيم تحمدوا ربكم .. Snow واحد والله ترقدوا سلطة .. العجب إذا جاكم فجاتن زي الخريف ..

      2. معذرة يااخوة الكيبورد عامل كده زي الكيزان لخبط الحكاية كلها .. يا المندهش والله إذا جاكم جليد وبرد زي حق بلاد العم سام والله إلا تمشوا تتنحلوا عند ناس كافوري لانو طبعاً ديك الحته الوحيدة البكون فيها دفايات !! العجب الجليد كان جاكم فجاتن زي الخريف !! والله ترقدوا صلطه .. احمدوا الله علي حتة البرد دي .. كفاكم برنجية بس !!

      3. والله يا امريكي انت برئ خلاص ,, ياخوي كلام المندهش ده اوعك تاخدو بي معناه الظاهر !!
        هو كلامو ده كلام زول زعلان علي البرنجيه , ,, ما شفت علامة التعجب الختم بيها دي ؟

      4. انتو يا اخوانا قصة البرنجية دي بتظبط معاكم كيف ؟؟؟
        متفقين مع البروف ولا الحكاية صدف ولا حافظين الزمن ولا شنو ؟؟؟؟؟
        اصلو ما صدقت معاي !!!!!
        انا زاتي لما كنت بدخن , اما بنسون ولا بحاري !!! ولا عندي شغلة بالبرنجي !!!

      5. عباس…
        بتتدخن وين !!؟

    4. مبروووك يا حبيييب البرنجيه والله حسه شفتها،البرد عندنا وهوا ومطر و الجو كعب خلاص

  1. تمااااااااااااانيه مليون !! لا حولااااااااااا يعني ديل كوووولهم منتظرين الدور في سرقتنا !!؟

    1. خلي الجرسة يا جنوبي إنشاء الله تبقي علي السرقة وبس !!!!

      1. يا شباب ورد في الأخبار ان العاهل السعودي استكتب الود تميم حاكم دويلة قطر ، تعهداً بوقف الدعم عن تنظيم إخوان الشيطان .. يلا بعد دا الكيزان يخوموا ويصروا .. في انتظار آرائكم يا شباب ..

      2. وموزة رايا شنو !!! عشان نقدر نقول راينا ,,,!

  2. هو في حاجة فضلت عشان يسرقوها ؟؟ ديل ما كتلوا الجدادة وخموا بيضا كوووولو !! الله لا كسبم ولا ربحم .. بعدين يا أخوانا نحنا ما قلنا الررررررروب دايرين نرجع لي بلدنا ونقعد نستقر فوقا خلااااااس زهجنا من حاجة إسمها غربة !! في رأيكم نعمل شنوووو ؟؟

    1. اخي نانو نعمل تبرعات كلنا المغتربين ونشتري لينا ارض في الصومال ما هي سايبه زي ليبيا عندنا هنا ونسميهو السودان النضيف(النظيف)

      1. أنا عارفك ياعلبان عندك مشاكل مع جهاز المغتربين .. لكن أنا موافق وبالدولار كمان ..

  3. اخخخخخخخخ,,
    على فكرة هم ايام الانتخابات الفاتت كانوا (3) مليون !
    اها بكونوا حسبوا المواليد والمنتفعين المحتملين والارزقية والجزمجية الخايسين الحيبقو معاهم ,,,,
    لكن عمنا الباشمهندس دا للامانة طيب , وانا مستغرب كيف ظهورهو للعلن كدة !!؟
    دا كان فى حكومة الظل لاكثر من 15 عاما !!

    1. الباشمهندس وامثاله ياهم البودرة واحمر شفايف البختوهم في الوش ويجروا بيهم الناس وكت الحوجه , واوول ما يتمكنوا يقولوا كدي ويقشوا البودرة واحمر شفايف , بالله تظهر ليك عجوز وسخه معفنه ووسخانه بوخ العفن يجيك زي البمبان ,,
      هسي عمرنا سمعنا بي المتعافي ولا نافع ولا الجاز وباقي الوسخ القعدوا 24 سنة وفي اخر سنة من عمرهم دسوهم شان ننسي !!
      ايام اب كرشولا برضو مرقوا ليهم ناس نضاف من زمن الجبهة الاسلامية القومية تاني ما شفناهم ! تقول كانوا مجمدنهم في الفريزر ,,,

      1. يا إخوانا والله أنا الايامات دي مسطح ، وقاعد في إجازة قسرية وبطني طامة من العفن دا ! بس وروني الشيخ دا منو ؟ عليكم الله ماتتجاهلوني ..

      2. جنوبى ..
        لا لا لا هو كويس والله ,, لكن ولدو بطال !!
        كمان اخوهو استشهد فى مطلع تسعينيات القرن الماضى ,,
        شوايقة وكدة !

        امريكى….
        هههههههههههه,,,حاشاك من التجاهل ,, الشيخ مهندس معمارى من قيادات الحركة الاسلامية لكن كان بيعمل فى الظل ,,, وهو مسئول القطاع التنظيمى بالمؤتمر الزفت دا

      3. غايتو انتو !! من خليتو العسكرية والطورية ودخلتو السياسة , العسكرية باظت والطورية باظت والسياسة زااااااتا باظت !!!
        وشوق شاقاي شقانا الشايقي الاذاااااااانا , ورا ورا ورا ورا

      4. ههههههههههههههههههههههه,,,
        ومتين يا على تكبر تشيلو منهم !

  4. بروف ( أحسب أن ) لولا إحترام فوزي لك لكان لديه كلام آخر
    العاوز تنبزو بس قول ليهو ياكوز وحات الله دي أحسن منها الواحد يدقوهو وينبزو بأمو وأبوهو!!
    نبرا ونستبرا

    1. تمنيه مليون دي واسعه شديد،الزول ده ساذج ولا شنو وتتيب شذاذ الآفاق كم اذا السذج ديل تمنيه وما افتكر في الشعب السوداني يوجد هذا العدد من السذج

  5. يا جماعة الراجل كان قاصد ٨٠٠ الف بس بس خجل من الرقم وهو الحزب الحاكم وانتو قايلين اعضاء المؤتمن الوتني ديل ساهلين والله الواحد فيهم يساوي عشرة من الشعب الفضل ما شبعانييين ومرطبين ومستعدين يعملوا اي حاجة لانهم ناس اخرة سااااكت وما قالوا هي لله وعارفين الحايدفعوه حا يرجع ليهم ٧٠٠ ضعف ما ناس قران وكدة

  6. يا ابو ناجى .. الزول دا ( الباشمهندس ) أخطا فى الكلام ودا فى حد ذاته ما عيب .. هو سمع إنو فى 8 مليون مواطن طلعوا الرقم الوطنى قام سيادته وسعادته فهمها ( وهى طايرة ) إنو الناس دى كوووولها مؤتمر وطنى .. والفهم قسم ( بكسر الميم وفتح السين وسكون الميم .. لمن فاتهم الإستماع )
    يعنى اصلوا الزول ما يغلط …. دا شنو داااااا ؟؟

  7. تصحيح .. بكسر القاف وفتح السين وسكون الميم ..

    1. كلام الاول ما بتحول !
      كع

      1. كع دي .. زي الهجوم بالنظر !!!!

    2. ( لو فات ) لو جيت الاااااااااااه لو جيت ,,,
      يا ولدي انت متعب حالك مالك بالتصحيح والتنوين يمين ناس القمردينة ديل تكتب ليهم حرفين بس يعرفوك انت قاصد شنو ويتمو الباقي خيال وبمناسبة الخيال دي بكري سكت مالو هسي الجو ده ماااا سمح !!

  8. السادة السمار .
    سلامات .
    لو إفترضنا إنهم تمانية مليون فهم أكيد بقو أعضاء فى المؤتمر الوطنى عشان يلحسو ماعشان يدعموا .
    الزول دة من أسى عايز يبرر لسرقة كبيرة من أجل الصرف على الانتخابات بحجة إنها إشتراكات أعضاء .إنشاء الله يعضيك كلب سعران فى …..تك .

  9. يا ناس القمردينة أزيكم .. يا أخوانا خلونا نكون جادين شوية عشان نشرف السودان وبلاش الألفاظ (السمحة والمهذبة) دي!! أخجلوا معانا بنوت في القمردينة والقروب، وكمان في أجانب بقروا البوستات حقتكم ما دايرين السمعة الطيبة والأخلاق الفاضلة للزول السوداني تتأثر،، سمح !! .. وينك يا بتي نونا (عسى ما شر قاطعة موية ونور مالك) ؟؟ سلااااام ..

    1. اجانب !!؟
      اى خواجات ؟؟؟

  10. بالمناسبة – الناس ما تستهتر بالرقم ده؟ وانا لا استبعده طالما فينا غير المتعلمين الذين يعتقدون الحكومة اله يجب طاعته؟ فئة العمال والموظفين والمزارعين (ايوه المزارعين بعدما الحكومة بسياساتها جعلتهم موظفين حكوميين من منازلهم، فضلا عن شاكلتهم)، الادهى وامر النهج الذي تستخدمه الحكومة للإنتخابات والمتمثل في استعمال قوائم (الخدمات العامة) والموظفين الحكوميين القائمين عليها لتحقيق اغراضها والضغط على هؤلاء المساكين وتأكيد انتمائهم للمؤتمر (شفت كيف؟) يعني بالحسبة اكتر من الرقم المذكور، وانتو لو متذكرين جلسة المؤتمر الاتقال فيها الرقم، المتحدث الموقر قال:( نحن ما شوية وعايزين نربط العضوية بالاشتراكات حتى لو جنيه واحد). وانا اعرف الكلام البقولو ومتأكد منه تماما؟.

    1. يوميها ناس جامعة النيلين قفلوا البنات جوه القاعه ومافي مرقه الا يصوتن ليهم !! صوتن ولمن فترن صوّتن ومرقن !! انا خايف يمشوا جهاز المغتربين كمان ! تصوت تمرق ما تصوت تقعد في العذاب ده !!
      قادرين وفاجرين الناس ديل !!!!!!!!

      1. اأأأأأأأأجنوبي ما تدفع زي تصوت كلها خنق فطس

  11. اها اناس كلما احصل لي فرصه في النت المعدوم هنا عندنا وما فيش حد يسألني انت واين عندي ليكم كتمت

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: