زبادي ساااكت

لدى الشعب السوداني الكثير من العادات والسلوكيات الجميلة والتي لا تتوافر في كثير كم شعوب العالم إن لم يكن كلها مثلاً (الشهامة) لم يحدث قط أن توقفت عربة العبدلله بسبب (نزول) لستك حتى هب لمساعدته المارة من الشباب فقاموا برفع العربة وتبديل اللستك ومضوا في حال سبيلهم دون إنتظار كلمة شكر .. هذا يا سادتي لا يحدث إلا في السودان !
لا يجد مواطن سوداني شخصاً مصاباً في حادث إلا وتوقف وأركبه في عربته غير آبه للدماء التي تنزف منه وثيابه التي تلطخت بتراب الرصيف و(الجرجرة) القانونية التي سوف تحدث له وأورنيك 8 وما أدراك ما أورنيك تمانية ، يوصله المستشفي ويتابع علاجه وكمان لو القصة عاوزه ليها حقن .. شاش مش عارف أيه يدفع من جيبو وينتظر معاهو لحدت ما أهلو يعرفو ويجوهو ، وهذه أيضاً لا أظن أنها تحدث في أي مكان في العالم .
وكما أننا شعب له إيجابيات فأيضاً نحن شعب لديه من السلبيات الكثير والتي لا تحدث إلا في السودان مثلاً جميع شعوب الأرض لديها إهتمام بمسألة الوقت .. يدق جرس طابور المدرسة الساعة 8 صباحاً تلاقي المدرسة كووولها موجودة المدير والوكيل والمعلمين والمشرفين وبتاع البوفية والعمال والفراشين لكن لدينا الأمر مختلف .. يدق الجرس .. يقيف الطابور تدخل الحصة المعلم ما يجي تسال يقولو ليك :
– أستاذ عوض ده ساكن بعيد !!
– يعني هو ما عارف نفسو ساكن بعيد وللا أيه ؟ طيب مش يطلع أبدر شوية؟
أما حكاية تقدير الوقت فحدث ولا حرج .. تقوم بإعطاء الطلاب مشروعاً أو بحثاً وتعطيهم شهراً لإنجازه إلا أن الواقع يقول أن معظمهم يبدأ ويشرع في عمله قبل أيام معدودات وهاك يا بحث في (الإنترنت) وهاك يا (كوبي أند بيست) وقطع ولزق وطباعة متسرعة عجلى مليئة بالأخطاء وتغليف مش ولا بد حتى أن بعضهم من فرط العجلة ينسى كتابة اسمه على (البحث) !
أما حكاية الموظفين والموظفات فده كوم تاني خليكم من الحضور والإلتزام بمواعيدو تعالو نمسك الحتة بتاعت الإستفادة من الوقت ذات نفسو .. تاتي لقضاء معاملة فتجد الشباك مقفول ، تسال :
– الشباك ده قافل ليه؟ الساعة يا دوبك تسعة ونص
– الموظفين ديل في الفطور
– (بعد مدة) : يا جماعة الساعة بقت حداشر وشوية
– (ست الشاي) : لا خلاص بيكون في السكة
– (في إندهاش) : السكة؟ يعني ما قاعد يفطر هنا؟
– لا الموظفين ديل أصلهم بيفطرو عند (الفوال الرهيب) في نمرة إتنين .. (وتكون الوزارة في شارع النيل)
ويأتي بعد شوية الموظف بسلامتو ويفتح الشباك تديهو الورق بتاعك يقوم يقول ليك :
– إنتا عرس ناس عصام ده في الصالة الذهبية وللا صالة المعلم؟
وقبل أن تقتلك الدهشة تقوم تكتشف إنو خاتي ليهو سماعة بتاعت موبايل وبيتكلم ليهو مع زول .
وشويتين الشباك يقفل :
– على وين يا أبو الشباب؟
– الصلاة يا جماعة الضهر وكتو دخل
– ودي ح تصليها في مسجد النور؟
– لا لا المسجد أهو داك !
ويسلم الإمام وتنتهي الصلاة .. وأبو الشباب ما يظهر .. نص ساعة .. ساعة.. ساعة وشوية ويفتح الشباك ويقوم صاحبنا بإجراء معاملة أو معاماتين ثم يلملم موبايلو .. ومفاتيحو .. وجرايدو :
– معليش يا جماعة اليوم إنتهى تعالو بكرة !

كسرة :

الوقت كالسيف إلا عندنا نحنا .. زبادي سااااكت !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟

Advertisements

34 تعليق

    1. كل شئ ولا الشاش يا بروف ؛:؛:؛:؛:!!!

    2. إجازتك دي باقي فيها كتير !!؟

      1. بس يخلصوا الأولاد من الامتحانات .. لكن .. اااجنوبي والله أكان رجعت بلاد العم سام إلا تشوفوا البرنجية طائرة بالهوا وكمان من غير طيار .. انتوا قايلو زين ولاسوداني .. خليكم مع الزبادي يا أخوي ..

    3. مباركة انا من الصباح مرابطة وبرضو ما زبطت احييييييي ……!!!!!

      1. شكرًا يا بت السودان يا أصيلة .. لكن ناس جنوبي ديل إلا يرابطوا ليها في جامعة الرباط .. كابو سااااكت ؛:؛:؛:؛:

      2. والله صحي البلقي هواهو بضري !! لاكين لو بتدوم كان دامت لي عبيد , مش اجازتك دي ؟ بتخلص وفرقنا معاكم 12 ساعه وبالقليل 8 ساعات , تلقي المباركة زاااتا بردت !!

    4. عمي العزيز سام
      مبروكه البرنجية وإن شاء الله تتهنى بيها !!

      1. جزاك الله خيراً وزوجك بكراً وأنجبت عشراً يا مدهش يارايع .. هييييي يا جنوبي اوعك تنط لي في رقبتي وتقوم تشبهني بي كوز ؛:؛:؛:؛:؛

    5. وكمان حكاية المدراء دي حكاية تانية يصبح الساعة تمانية ويقول عنده اجتماع في الوزراة (البزنس حقو) ويجي داخل آخر الدوام لزوم يتمم على الشغل
      ياخ الناس ديل والله بختهم عدييل بس بيتخارجوا يوم القيامة كيف الله أعلم

    6. ألذ تعليق لو دامت لدامت لعبيد ولكن عبيد يوم الأربعاء بكون في معمعه وفي يوم الأربعاء ما عندي حتي طريقه زبادي فعشان كدا يوم الأربعاء انا بوقف التدخين والسر ده بعرفو فلاديمير ولكن الظاهر أمريكي ما اداهو فرصه ههههه

      1. خلينا من الأربعاء والزبادي يا عبيد ؛: ما عجبك لينا ولا شنو ؟ بعدين خلينا من الأعذار .. يا التزام بالوقت أو كابو سااااكت ؛:؛:

      2. ألف مبروك يا حبيب وأما عن الوكت فانا مع الناس ذاتهم البحترموا الوكت والعمل ومبروكه ايام الأربعاء ،مبرووك يا أمريكي

  1. لاكين صراحة انا ما عرفت قيمة الوكت الا بعد طلعت من السودان !!
    اكتر حاجه بعاني منها في الاجازات اني اكون ماشي كذا مشوار ويادااااب اكون سايق بسرعة 60 القي واحد ماسك اقصي اليسار وماشي بي سرعة 20 وقدر ما تضرب ليهو بوري ما يفتح ليك وياخد يمينه , اقوم اخالف قانون المرور واتجاوزو باليمين يقوم يحمر لي ويقول انت طاير كده لاحق شنو ما تصبر!! وكأنو انا ماشي معاه مشاويره هو!!
    واكتر كلمة بتغيظني لما يقولوا لي انت شفقان كدي مالك ؟ ما تخت الرحمن في قلبك هي الدنيا دي طايرة ؟!!
    بي طريقتنا دي يوم القيامه زاااتا بتقوم والناس تمش تتحاسب ونحنا نسوي في خليهو بعد الفطور , وياخي الواطه سخنت خليهو نمشي العصر !!!

    1. وعشان كده أنا بقول ليكم الدنيا طارت ؟؟ يا دوبك خمسة وعشرين سنة بس !!
      لا حقين شنو ؟؟

  2. لا لا لا لا يابروف ,, بعد صلاة الظهر حلقة التلاوة !
    اخخخخخخخخخخخخخخخخخخخخخخخخخخ

  3. الاخوة الكرام .
    سلام.
    والله أى مواطن سودانى عندو قصة مع موظفين الدولة والمعاملات تنفع تتعمل فلم لما لها من إستهتار بالمواعيد وعدم إحترام للمواطنين.
    واى سودانى يمسك ليهو وظيفة يتعامل بيها مع الناس تلقاهو داير يزلهم ويوقفم إنتباه.
    لايغير الله مابقوم حتى يغيروا ما بأنفسهم .

  4. واحد بيقول لصاحبه .. اسمعنى أنا ح أجيك الساعة 4 العصر لو لحد الساعة 6 ما جيتك .. الساعة 8 أمشى شوف مشاويرك ..

  5. iا الغلبان رجع وكتمت كتمت كتمت

  6. إنتو عارفين أكتر حاجة أنا بكرها في السودانيين الجرجرررررة ..تعال بكرة وبعد بكرة !! والموظف تلقاه غائب من الشغل ليه ؟؟
    بت خالة حبوبة عمة أمو طهرو أولادها !! وبت شنو ما عارف ولد عمة بت جيرانهم جابو ليهو ولد !!…. إلخ حا أحكي ليكم قصتي مع جرجررة البنايين (الحاجة أم الأولاد جات عسكرت معاهم في السودان عدييل كده عشان بناء البيت) جزاها الله خير، لكن البنايين جابوا ليها الصمرقع وسوا ليها ضغط وسكري .. يمشوا الفطور ساااعتييين وبعده الشاي وسجارة وسفه … وكل يوم طالعين ليهم بي حجة للغياب (3 سنة) شغالين في البيت مع إنو والحمد لله الكاش كان متوفر والمواد كمان موجودة بس كسل السودانيين وجرجرتم الفوق دي وصلت الشغل لي 3 سنين !! فقعوا مرارة أمي وطبعاً متابع مع المدام بالتلفون ..
    ولمن خلصوا البناء وفضل على التشطيب أخدت إجازة (شهرين) وجبت معاي المواد في كونتينر وعملت معاهم إجتماع بحضور المقاول ضاعفت لي كل واحد منهم يوميتو، بس بي شرط مافي زول يطلع من البيت لحدي ما أقول ليهم خلاااس أمشوا .. وقلت ليهم الفطور ، الغداء، العشاء، الشاي القهوة السجاير ، التمباك والعصير كل دا علي .. وكل خميس بضبح ليكم خروف ، وقلت ليهم الموافق يجي بي هنا والما موافق مع السلامة الباب يفوت (فييييل) !! دا كان من باب الترغيب .. ومن باب الترهيب كان في كلب شرس ومليان قراد حق الغفير الكان ساكن في القطعة قبل البناء شفتو مرة نط في كديسة وجابا من الحيطة قطعها حتت.. قلت لا بد من التخلص منو خوفاً على الأولاد وعشان أرش البيت قبل عمل السراميك .. فأخذته ورميتو بعييييد 15 كيلو لكنه رجع تاني يوم !! وكان راقد في الحوش فشلت مسدسي ومن شباك الغرفة أديتو طلقة في راسو جابت أجلو طوااالي والجماعة خافوا .. قلت ليهم أي واحد يتلولو معاي بدي طلقة طوالي .. وكانت معاي حبوب بونستان{Ponstan} مزيلة للإرهاق ومنشطة (بس ما مخدرات) !! كلما أشوف واحد تعب أديهو حبة يرجع يشتغل بي همة ونشاط لحدي الساعة 6 مساء .. المهم بحمد الله خلصنا تشطيب في ظرف 23 يوم فقط وأنا حكيت ليكم تجربتي دي بالتفصيل الممل عشان تستفيدوا منها أصلو الجماعة ديل لو ما تديهم العين الحمرا ما بشتغلوا معاكم مظبووط ( ناس تخاف ما تستحي ) !! رأيكم شنو دام فضلكم ..

    1. تمام التمام ومنكم نستفيد واللذيذ كمان يا اخي نانو انو البنوستان عالجت بيهو الإرهاق مع انو هو دوا ذي البروفين والفولترين والأسبرين لعلاج الآلام والأوجاع ،هههه تمام

  7. Obeid على 10 يناير 2014 عند 12:25 صباحاً
    تعليقك بأنتظار الموافقة بالنشر.
    تمام التمام ومنكم نستفيد واللذيذ كمان يا اخي نانو انو البنوستان عالجت بيهو الإرهاق مع انو هو دوا ذي البروفين والفولترين والأسبرين لعلاج الآلام والأوجاع ،هههه تمام

  8. أخونا عبيد شكراً على تعقيبك .. أنت وين موقعك أنا في جدة خلينا نتواصل .. وأخونا د. شمباتي كيف حالك ؟؟ بحسب إفادة أخونا جنوبي فهمت إنك معانا في جدة خلينا نتواصل أديني إيميك وبكده نقدر نتعارف ونتواصل سلااااام لكل القروب و ( القمردينة ) ..

    1. وعليكم السلاااام نانو ,,
      انا فى مكة ودا جوالى 0555040149
      اما الحبيب عبيد ففى بلادا طيرا عجمى !!

      1. الأخ نانو
        لك التحيه وانشالله نتواصل ،رقم موبايلي مع الأخ او الابن شمباتي

      2. يا شمباتي ونانو وجنوبي بطلوا العنصرية بتاعتكم دي ،، نحنا كرهناها عند ناس المؤتمر الوثني ،، أخوي عبيد أنا وانت في بلاداً طيرا عجم تعال نعمل حزب الطير كيتاً علي ود خوجلي ..

      3. هههههههههههههههههههههههههههههههاااى,,
        اعمل الداير تعملو !
        طبعا انا والحبيب القريب نانو طلعنا معارف بصورة او باخرى !
        دنيا دبنقا اوبسورى ضيقة ,,,

  9. يا ود العم سام كان نحنا عندنا عنصرية زي ما بتقول ما كان لمينا معانا (جنوبي) خاصة بعدما إنفصلوا مننا !! لكن نحنا في الأول والآخر سودانيييين قوميين لا عندنا عنصرية ولا جهوية .. ولا فرق لعربي على أعجمي إلا بالتقوى .. ألا هل بلغت اللهم فأشهد ..

    1. ههههههههههههه
      عليك الله اديني وزارة الثروة الحيوانية !!!!!!!

      1. يا جنوبي يا أخوي الثروة دي الكيزان مابدوك ليها لكن الحيوانية ممكن !!

  10. أخونا العبيد كيف حالك .. لك التحية والتقدير .. قال لي ولدنا د. (شمباتي) إنت في بلداً طيرو عجمي وكمان بلدي !! إن شاء الله حا آخد رقمك منو ونتواصل، الله يكون في عونك وعون أمريكي وفلادمير وكل الذين هم في بلاد الغربة (البعيييييدة) .. نسأل الله أن يرد غربتنا جميعاً وأن يزيح من صدورنا هذا الهم والغم الذي إبتلانا بيهو وخاصة (المؤتمر الوثني وجماعتو) كلهم الله يقلعم من جذورم .. قولوا آاااامييين يا رب العالمين

    1. لك التحيه وربنا يرد غربتنا إنشا الله، وتحياتنا لجميع الاخوان والأخوات و اخونا الغلبان

  11. تحياتي للجميع بدون فرز وربنا يرد غربتنا انشالله ونتقابل في ساعه خير

  12. في شنو ياخواني ! خوفتونى! مالكم؟ اخوى ما اخوي، ابني ما بعرف شنو ، ساعة خير !!! مالكم وتدعوا سااااي!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: