الكلية الوطنية البعيدة

الكلية الوطنية للدراسات الطبية وتقنية المعلومات تأسست عام 2005 م ( تم ترفيعها الآن رسميا الى جامعة) تضم عدداً من الكليات المختلفة : ( الطب البشري – الاسنان – الصيدلة – المختبرات الطبية – هندسة الحاسوب – علوم الاتصال …الخ) وتزخر بهيئة تدريس تضم نخبة من أميز الأساتذة / الدكاترة المتخصصين .. كل في مجاله .. مما اسهم في ترقية الأداء بها مما جعل كثير من أولياء الأمور يلحقون أولادهم وبناتهم بها .
طيب المشكلو وين؟ ما هو لازم تكون عندنا مشكلة !
المشكلة يا سادتي الأفاضل أن من خطط لقيام هذه الكلية ثم الجامعة قد إختار لها ولمستشفاها التعليمي الخاص بها إختار لها مكاناً قصيا بعيداً جداً من أحياء وسط الخرطوم (خليك من ناس بحري وأم درمان فالجامعة تقع يا سادتي على طريق (الخرطوم – مدني) عند نهايتي شارع الستين وشارع ( الهواء) النازل على خط الكلاكلات .
يمكنك عزيزي القارئ أن تتسأءل : كيف يتمكن الأبناء الطلاب ( بنين وبنات ) من الوصول الى الجامعة صباحا ؟ هل توجد خطوط مواصلات تعمل بين (الكلاكلة مثلاً) أو (الصحافات) وموقع الجامعة أو حتى قريب منها؟ للأسف الإجابة هي المواصلات نادرة إن لم تكن معدومة !!
طيب كيف يتعامل الطلاب من الجنسين هذه المعاناة وكيف يتصرفون ؟ .. الواقع يقول انو هؤلاء الأبناء يكونون تحت رحمة عابري الطريق من أصحاب السيارات الخاصة .. يعني بيوصلوا الجامعة (يا عم) ومش عم واحد ممكن يا عم (3-4 مرات) يعني تنزل وتركب تاااني يا عم .. وده كووولو كوم وخروجهم مساءا بعد نهاية اليوم الدراسي (عند الثالثة والنصف مساء وفي بعض الاحيان يمتد يومهم الى السادسة مساء ) كوووم تاني حيث يضطر الطلاب للمشي مسافات طويلة في منطقة نائية مظلمة لا كهرباء فيها ولا دوريات أمنية مما يعرضهم للخطر — ولك أن تتصور ما قد يحدث من ضعاف النفوس ومعتادي الإجرام والحرامية والبلطجية الذين تعج بهم هذه المنطقة .. طبعن أولاد (المرطبين) ما عندهم مشكلة قاعدين يجو الجامعة بالأكسنات والكوريلات والألنترات لكن السواد الأعظم ناس (قريعتي راحت) ديل .
العبدلله شخصيا ما عارف كيف ممكن طالب يوصل الجامعة (يا عم) وفيها يلاقي وفيها ما يلاقي .. وينزل وتاااني يفتش يا عم .. و… لحدت ما يوصل الجامعة .. أها ذي الطالب ده عاوز ليهو كم ساعة عشان (يشيل نفسو) ويقدر يكون في حالة يستوعب بيها (المحاضرات) ومش محاضرات ساااي (طب وكده) ؟
بالطبع ليس غريبا أن يكون من قاموا بإنشاء هذه الكلية ثم الجامعة في هذا الموقع قد تناسوا أنه يقع بعيداً عن المناطق السكانية فثورة (التأليم) كانت يجب ان تقوم (بأي شكل وفي أي حتة) وأن تنتشر الكليات والمعاهد والجامعات الخاصة والعامة وأن يصبح في كل بيت (ولدين وبت) في الجامعة حتى ينشغل الناس بالأقساط وتصوير المستندات وحق الفطور وحق المواصلات (ده غير الجمرة والشنو ما عارف) !
العبدلله يناشد إدارة الجامعة ان تنظر في هذا الامر باهتمام وتوليه عنايتها حفاظا على ارواح الابناء (وعشان كمان يتفرغوا للقراية مش للمواصلات) ويقترح الآتي :
— إما ان تتولى ادارة الجامعة مسئولية ترحيل الطلاب بحافلات خاصة لقاء رسوم معقولة يتفق عليها وهذا أمثل الحلول وسيجد قبولا من جميع اولياء الامور .
– اما وإذا تعذر للجامعة توفير حافلات لعدم مقدرتها المادية فيتم مناشدة الجهات المختصة (بمحلية ولاية الخرطوم) لتسيير خط مواصلات لموقع الجامعة يمر بمواقع ونقاط معلومة في الأحياء السكنية يتجمع فيها الطلاب صباحا — ( وبتقاطر صباحي و مسائي ) يمكن الطلاب من الذهاب و العودة عند نهاية اليوم الدراسي الى ذويهم بسلام وطمأنينة ويكون ذلك برسوم معلومة يتفق عليها (ودي والله ما ظنيتا) لأنو القصة بقت قصة ربح وخسارة (إنسانية مااافي) وحكومة (قاعدة تتفرج) !
– الحل التالت هو ان تتفق الجامعة مع (مقاول ) يلتزم بترحيل الطلاب من مناطق سكنهم الى الجامعه عبر نقاط تجمع تحدد حسب جغرافية الاحياء وبالتعرفة التي يتفق عليها وسوف يكون أولياء الأمور سعداء لدفع رسوم الترحيل طالما تصب في مصلحة الابناء .
غني عن القول أن الأسر تشهد حالة من الترقب والخوف بصفة يومية خوفا على أبنائها وما قد يلحق بهم من أذى فهل ننتظر حتى تحدث كارثة ( لا سمح الله ) ثم نعتدل في جلستنا لنبحث عن الحلول !؟؟
لن نتحدث عن الرسوم الدراسية الباهظة التي يدفعها أولياء أمور هؤلاء الطلاب ولكننا نعتقد بأن (أبسط شئ) يمكن فعله هو تأمين وسائل مواصلات مريحة آمنة لاستكمال العملية التعليمية في سهولة ويسر.
من هنا نطالب إدارة الجامعة متمثلة في مديرها الأخ البروف / قرشي محمد علي أن تتفهم معاناة هؤلاء الطلاب وأسرهم وتعمل على حلها عشان أولادنا ديل تعبوا شديد والله وإن شاء الله يا بروف (نسمع خير) !

كسرة :

قولوا (وصلتوهم) بعدين الشغل كيف؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟

38 تعليق

    1. الليلة لقيت أمها مافي ياعبيد ؟؟؟ علي كل حال ألف مبروك ..

    2. مشتاقة تسعي لمشتاقِ …
      بركه الجمعتوا !!!

      1. الليلة يا جنوبي خلي بالك أخونا عبيد لقي أمها مافي .. ألف مبروك يا العبيد ..

    3. غايتو يا عبيد و أمريكي حيرتنا، قعدتونا ف ّراجة ساااااكت. لكن الكلام في التقنية ما في الأيدي العاملة!!! هههه و الا يكون البروف طابور خامس يا ربي!!!

  1. برنجية 2 بالتوقيت المحلي

  2. البروف الحبيب
    والبروفات الأحباء
    يا ريت يا بروف نعرف هل الكلية ولا الجامعة دي للأولاد يعني ( عزابة فقط ) ولا معاهم طالبات عشان نعتدل في جلستنا لنبحث عن الحلول !؟؟
    لأنو الموضوع هنا بختلف كتير جداً

  3. مش الكليه الوطنية البعيدة ،الوطنية والهويه أصبحتا بعيدتان،ااها ايه العمل

  4. يا استاذ انت نسيت انو الجامعة دى بتاعة ناس مابركبو مواصلات اصلا؟

    1. بالضبط كدة اختى فاطمة ,,
      دى جامعة خاااصة ورسومها باهظة جدا ,, يعنى البدفع الرسوم بعرف يصل !!

  5. ياخي اولاد الطبقة العاملة ( ازعاج ) ديل مزعجين خلاص !!
    يعني قدر ما نبعد بعييييد منهم ونعمل لاولادنا حاجة خاصة بيهم , برررضوا يجوا لاحقننا ويعملوا لينا مشاكل !
    انتو صحي في السودان ليه مافي مؤسسات ترحيل طلاب ؟
    هنا في السعودية محل ما تعاين بتلقي حافلة مكتوب فيها مؤسسة هناي لترحيل الطالبات , وتلقي المؤسسة عندها مئات الحافلات
    ترحيل طلبة ثانوي وترحيل جامعي , مع انو الشغل ده مربح جدا لكن في السودان ما شايف الشغل ده الا في ترحيل الروضه وفي مدارس الاساس الخاصة !!

  6. يادكتور انت ناسى ان. الكليه الوطنيه كليه خاصه والطلاب الذين يدرسون بها اولاد وبنات الخاصه والمتشبهين بهم وعايزين اولادهم يطلعوا دكاتره حتى لو دخلوهم باى مجموع اونسبه وليست كلية او جامعة الرازى باقرب منها ولا حتى جامعة نصرالدين .وانا من المتابعين لمقالاتك وعامل ليها ملف ارشيف لانها بتهتم بهموم العامه لكن المره شايفك اهتمين بهم ناس قادرين .اما مواقع الجامعات الثلاثه انا اعتقد مثالى فى كل شئ من حيث امكانية الانشاءات والميادين المستشفيات وخلافه اما حكاية وصول الطلاب وسلامتهم فى الشارع دى مؤولية اولياء الامور وناس الجامعات دى شعارهم الماعندوش مايلزموش.
    الجامعه الاهليه ام درمان نشات فى موقع اوحش من هذه الجامعات وفى زمن اصعب من هذا الزمان فى ندرة المواصلات لكن طلابها ليسوا من الخاصه لان مصاريفها كانت فى مقدرة العامه وعذطلابها مناسب وكبير وبدون تخطيط من اى جهه قامت لها مواصلات مباشره وتجاريه من الخرطوم والشهداء وبانت وبحرى وخلافه عشان كدا يا استاذ الموضوع اللليله ماجايب حقوا. ومصداقا لحديثى لوجبت هايس ووقفت فى المركز الاسلامى وخليت القموسنجيه يصيحوا الوطنيه. ،؟ .،؟ .ماحاتلاقى ركاب إلا عمال البناء فى المنطقه ديك.

  7. أها يا جنوبي بختك جاتك الفرصة لحدي عندك يا بوي (مبيضة ليك في قفص)، يلا شوف شغلك أعمل ليك 3 حافلات (كريز) لترحيل الطلبة والطالبات ( ما زي السعودية طالبات فقط) !! البنات يقعدوا قدام، والأولاد (المشاطات) زي ما كنا زمان بسميهم في الجامعة يقعدوا ورا !! وأنت تسوي ليك دكيكين ولا كشك جنب الجامعة تراقب حافلاتك وتلقط قريشاتك أول كل شهر وكمان تبيع بارد وسندوتشات وتسوي ليك مكنة تصوير وكمبيوتر لزوم الأبحاث وكده .. صدقني تعيش ملك لا حق زكاة ولا حق نفايات ولا ضرائب ولا يحزنون أصلهم ما حا يجيبوا خبرك بس حايجوك (للكشك) !! وممكن تتفاهم معاهم وتمشي حالك مع السلطات (سيبك بلا سعودية بلا بدوان بلا قرف) أصلو الحكاية هنا صفصفت خلاااااس وبقوا يطردوا الناس عدييييل كده !! ولو ما دايرا ممكن ولدنا د. شمباتي ينط فيها وكمان يشتغل محاضر في كلية الطب بنفس الجامعة ,.. سلااااام …

    1. يارييييييييييييييييييييييييييت

    2. ههههههههه وافرزم كيفن عشان اقعدم قدام وورا !؟
      الشنطة نفس الشنطة , المحتويات نفس المحتويات , التيشيرت نفس التيشيرت , الجزمه نفس الجزمه احمر واصفر وبنفسج !
      لا لا ياخوي انت داير تمحني ساااكت في اخر عمري , اخير لي هنا ,,,
      انا عااافي لي شمباتي , اللمش ساكت , قشه ما تعتر ليهو ,,,

      1. سلام جنوبي
        تفرزم سااااهل، تمسك الواحد/ الواحدة ، تصجّو كف صاموتي، لو ( قال) آي يبقي وليد، ولو ( قالت) آي تبقى بنية هههههه ( منها تتفشّى لي رقبتك دي)

      2. هههههههههه,,سيب لى الفرز انا !
        وما تسمع كلام بتنا نونا دى , جاى تغتس حجرك ,,
        ههههههههههههه

      3. حتي في ( آي ) مشتركين يا نونا !!؟ مخير الله !!
        لاكين نحنا من كرهنا للحكومة دي بقينا ننتقد أي حاجه !! هسي الجامعة دي بتم توزيع الطلبه من مكتب القبول ولآ الطالبة براااها بتمشي تنقش تنقش وتسجل فيها ؟
        لو بتم توزيعم تبقي مشكلة التعليم العالي .
        ولو ما بتم توزيعم يبقي واحد من اتنين :
        يا الطالبة دي مشيت سجلت وعارفه نفسها حتتوصل كيف , يا بس لقت الناس ماشين ومشت ساااكت
        لو مشت سجلت وعارفه نفسها حتتوصل كيف ما مشكلة , لاكين لو بس لقت الناس ماشين ومشت ساكت ! يبقي واحد من اتنين :
        يا معاها كم طالب من نفس حلتا وحيتفقوا مع بتاع امجاد يوديهم ويجيبم , يا حتمشي بالمواصلات ! لواتفقو مع بتاع امجاد يوديهم ويجيبم ماا مشكلة , لاكين لو حا تمشي بالمواصلات ! واحد من اتنين :
        يا تطلع الصباح بدرييييييي وتمشي سوق الخضار وتركب مع ناس الطماطم الجو من قري الجزيرة وباعو طماطمم وراجعين بلدم , يا تطلع الشارع تكابس في المواصلات ! لو ركبت مع بتاعين الطمااااطم الراجعين اهلهم ماا مشكلة , لاكين لو طلعت الشارع تكابس المواصلات ! واحد من اتنين :
        يا تركب المواصلات لحدي الميناء البري وتحجز في بصات مدني , يا تقيف وترجي فضل الظهر ! لو ركبت مواصلات لحدي الميناء البري وحجزت في بصات مدني , مااا مشكلة , لاكين لو رجت فضل الظهر ! واحد من اتنين :
        يا لقت واحد داير الاجر , يا لقت واحد داير الفجور ! لو لقت واحد داير الاجر بيوصلا الجامعه ولو لقت واحد داير الفجور بيوصلا المجامعه ,,
        ودي فايدة ثورة التعليم العالي للدايرين الاجر والدايرين الفجور !!!!

      4. ههههههههههههههههههههههههههههههههههههههههههههههههههههاااى,,
        جيب نص !
        هيييييييييييييييييق

  8. على قولك يا جنوبي يا أخوي .. والله الزمن دا ما تقدر تفرز الولد من البت إلا تعاين بي قدام للصدر!! لأنو اللبس نفس اللبس والشعر نفس الشعر وكمان في الجبجبة بقوا زي بعض !! وبرضو سمعنا إنو في واحدين بمشوا (الكوافير) بدل الحلاق حقنا الزمااان .. وسمعنا وسلمنا في بعض البنات بقن (بويااات) يتحرشن بالبنات الزيهن وممكن يقتلن لو واحدة صاحبت واحدة تانية !!! الله يستر علي ولايانا وولايا المسلمين أجمعين .. اللهم إن أردت بعبادك فتنة فأقبضنا إليك غير مفتونين وألطف بنا فيما جرت به المقادير..

    1. سلام نانو اخوي
      فكرة حلوة، لكن ما ممكن ركشات؟ المحيرني الطلبة الدفعوا الرسوم ديل و ما قادرين يصلوا!!!! بعدين ياخواني احنا من زماااان عندنا عقده من ( الخاص) يعني زي البلدة بلدة ( حلوه زي دي، مش؟) و انا اقوووول الناس دي تموت سااااااي في المستشفيات ليه ! تاري طلبة الطب ما قادرين يصلوا! بركة العرفنا السبب ، تاني ياخواني ما تلوموهم ساي و تلومونا!

  9. يا جنوبي الله يهديك ويصلحك ما قلنا ليكم الألفاظ (الـ…..) دي خلوها !! معانا بنات ناس، وكمان رجال أغراب (ما سودانيين) بدخلوا معانا وبنتقدوا أي حاجة مافي محلها ودائماً بسألوني دي شنو؟؟ ودي معناها شنو؟؟ …..إلخ .. شوف كلامك القلتو شنو:
    (يا لقت واحد داير الاجور, يا لقت واحد داير الفجور! لو لقت واحد داير الاجور بيوصلا الجامعه .. ولو لقت واحد داير الفجور بيوصلا المجامعه !!!!) ,, عيب كده ما عائزين واحد أجنبي يعرف إنو حاجة زي دي ممكن تحصل عندنا !!!

    1. خلاص هاك راسي ده غطسو لي في كوم رملة , انا غلبني ادسو في الرمال !
      ورغم كده لك العتبي حتي ترضي , بس كمان الشئ ده فاق حد الغتغتة وما بتغتي تاني يا نانو , انت اظنك بتمش كل كم سنة لكن انا بمش كل 11 شهر .
      واحد بعرفوا عمل دراسة للوسط الطلابي الجامعي , شملت جانب السلوك والله خجل ينشروا رغم ما عاني في الدراسة دي من تعب مادي وبدني .
      اخيرا : جيب لي أي اجنبي ونقارن مجتمعنا ومجتمعهم رغم التدني الوصلنا ليهو حنلقي نحنا ما زلنا افضل منهم ولكن يأتي الاستغراب من اننا لم نكن كذلك وليس لأننا الافسد .
      واكرر لك العتبي ان خذلتك في مجتمعنا الذي صار ,,

      1. هههههههههههههه,,,
        انت ياجنوبى الظاهر عليك عايز مقطوعة (عاازة فى هواك) !
        خُد

      2. بسسسسسسم الله يا جنوبي ، مالك؟ ريلاااكس. الناس ما قالوا شي بس لفتوا انتباهك لشي يمكن فات عليك. ما تزعل ! أنتو الاتنىن اجتمعوا على غيرتكم على البلد لكن كل واحد طريقته مختلفة. ربنا يجزيكم خير على الاجتهاد

      3. شكراً ليك يا بتي (نونا) بت نانو على مداخلتك ونصيحتك لي جنوبي ولينا كلنا، والهدف من مثل هذه الملاحظات والمداخلات هي تصحيح المسار وتعديل الحس الوطني ليكون الولاء والبراء والإنتماء للسودان (الوطن الأم)…
        بلادي وإن جارت علي عزيزة *** وأهلي وإن ضنوا علي كرااااام .. سلااااام ..

      4. هههه .. هيييي يا نونا ! هسي القال ليك انا زعلت منو !؟ ما هدا قاعدين نتناقش !! بسسسسم الله , جاية تعملي لينا المديدة حرقتني , والقصة زي ما انتي قلتي لكل شيخ طريقته ,,( عااارفك شيختيني تبع ياتو طريقة لاكين ما مشكلة ) ونحتفظ بحق الرد .
        شمباااتي ! احسن ليييييك ,,,
        عازة حالا صااار .. حال الجُبال
        ادوها زول قشِير .. فوق راسا بال
        شرّدنا في البلاد .. وشال حالنا حال
        بقينا بين الناس سيم سيم عيال بنغاااااااال
        عازة في هواك عازة نحنا ( ما ) رجاااااااااال
        علي الطلاق الخليل لو قام من قبره يدي فينا أي زول كف ويتف ليهو في وشو . ويشيل كفنو ويمشي يفتش ليهو قبر في بلد تانية !!

      5. طبعاً كالعادة رهييييييب يا جنوبي الله يجازي شيطانك !!!… وكمان قصيدتك مبااااالغة بس خليني أفضى ليك شوووية وأديك حاجة بسييييطة من قصايدي العملتها في الغربة .. إنت قائل روحك برررااااك الشاعر ؟؟؟؟

    2. نعم يا أخ نانو ياريت نحاسب على ألفاظنا فى المدونة وبلاش منها الألفاظ الصريحة الواضحة دى ورسولنا الكريم صلى الله عليه وسلم نهانا عن الفحش والتفحش ونشكر لك غيرتك وحرصك على شعور الآخرين ..

      1. كتر خيرك يا أختنا أم أيمن وجزاك الله خير (مش حقت الكيزان) على المداخلة والنصيحة الطيبة الموجهة (للجميع) مش لجنوبي بس ..
        ولعلمك يا أخ جنوبي أنا بمشي السودان كل 3 شهور تقريباً وعاااارف الحاصل شنو !! وأظنو قبل كده نوهت لحاجة قريبة من كدى، لمن ذكرت زيارتي لبتي عندما كانت تدرس في كلية الطب بجامعة الجزيرة ولقيتها أكلت كل الرصيد الإحتياطي الخليتو ليها (5 ألف دولار) !! دا غير المصروف الشهري البرسلو وصرفت كل دا علي نفسها وصاحباتها الفقراء خوفاً عليهن من الإنحراف.. وكما تعلمون فإن الحاجة والفقر هم أكبر دافع للإنحراف .. لعن الله الفقر!! وكما قال سيدنا عمر رضي الله عنه : ( لو كان الفقر رجلاً لقتلته) ..

      2. سمح يا نانو ياخوي انت وكت شفت بي نفسك ! نقعد نتضاري ليه ما نكون صريحين ونواجه المشكلة !
        دي بس ياها حقت الام العرفت ولدا بيشرب سجاير وبقت تدس من ابوهو , وتمشي تديهو حق السجاير بالدس , الولد كبر وخلي السجاير وبقي يشرب بنقو , الام بقت تجقلب , الحقنا يا ابو فلان ولدك ضاع مننا !!
        ام ايمن .. غايتو تاني الا البس ليك الكلمة الكتبتها دي حجاب واكتب ليك بين قوسين هذه الكلمة لا تصافح الرجال !! بعدين يا ابيض يا اسود شنو اللون الرمادي ده !!
        هسي ذاااتو الكلمة الحرقتكم دي وينا ؟ اصلي ما لقيتا !!
        هو طهور البنات بقوا يناقشوا في التلفزيون !! تلقي المذيعة خالفه رجلها وقاعده والضيفات خالفات رجلن ! اها حصل ليهن شنو ؟ هسي جاتم داية شايلة موسا وداخله !!؟ ما تناقشن ومشن شنو ليكم ,,,

      3. يا جنوبي .. الله يرضي علينا وعليك .. كسر موسك دي وبسط الأمور يا أخي .. جادلهم بالتي هي أحسن ، والله نحنا عندنا أولاد وبنات والحمد لله ، كنا عايشين في بلاد العم سام رجعناهم البلاد قلنا يتعلموا الدين والوطنية ، الدين الحمد لله مجتهدين ، لكن الوطنية !! لقينا البلد ما عندها وجيع !! والآن عايشين بين نارين ،، والله جينا هنا وجدنا الفساد والانحلال فوق مما كنا نتصور ، منكرات وفواحش يشيب لها الولدان ، وأصبحنا نقارن بين هنا وهناك ، هنا وجدنا فساد ورشوه ومحسوبية وانحلال خلقي وظلم وكل شئ قبيح يخطر علي البال !! وهناك وجدنا عدالة .. وهذه تكفي .. نفكر في اليوم مليون مرة لخط رجعة وبضغط من الأبناء .. خصوصاً أنهم يحملون جوازتهم بأيديهم .. ونحن نتمسك برحمة الله .. ولا تقنطوا من رحمة الله .. اذكر اول صلاة جمعة لي في مسجد المدينة التي كنت أعيش فيها ، ان أتوا بجنازة للصلاة ، أصبحت ابكي كالطفل الرضيع .. نعم لاتدري نفس بأي ارض تموت .. نسال الله حسن الخاتمة .. ونسأل الله العزيز تكرارا ان يبدل أحوالنا ويصلح حال العباد والبلاد انه سميع الدعاء .. فيا إخوتي عليكم بالاستغفار والدعاء ،، انه علي كل شئ قدير ..

  10. شكراً ليك أخوي جنوبي على مشاعرك الرقيقة الفاضلة، وزي ما قات ليك قبل كده أنا معجب بكتاباتك وأسلوبك بس لمن أشوفك مشيت كده ولا كده بحاول أنصحك لتعدل من مسارك.. ونحنا زي ما قلت أنت عن الشعب السوداني ما زلنا (أفضل السيئين) !! لكني أريد أن نحتفظ بالسمعة الطيبة التي إكتسبناها وتمتعنا بها طوال العهود والعقود السابقة بين مواطني دول مجلس التعاون الخليجي بصفة خاااصة، وباقي بلدان العالم بصفة عامة… وأخوانا المصريين عندهم مقولة بيقولوا فيها (غلطة الشاطر بعشرة) .. سلاااام ..

  11. بالإضافة الي ان المواصلات وبكل أنواعها مرتبطه بالوقود وموقف الترحيلات وفي رأيي هنالك مشكله نظام وتخطيط

    1. حلوه وملعوبه دي ,, ههههه
      وفي مواصلات بنزين وفي مواصلات جاز ! ونحا جاااااز يا عمك ابنص تقيل …
      اها لقيتني كيف ؟

      1. آآآآهـ !!؟

      2. والله يا جنوبي ما عارفاك بتكتب بي كيبورد و لا رشاش!!!!

      3. نونا .. لك تحياتي ، والله جنوبي دا شارط عينا ، قولنا ليهو معانا جنس لطيف .. وهو مصر يفحط ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: