سودانيين كتار

حديث لآخر الرسل والأنبياء سيدنا محمد عليه أفضل الصلاة والتسليم مكون من سبعة عشر حرفاً يحل مشكلات الكون أجمعها .. (حب لأخيك ما تحب لنفسك) .. لو ده حصل يا جماعة الخير كنا سوف نقوم بإلغاء الشرطة وأقسام الشرطة والسجون ووزارة العدل (لو فضل فيها عدل) ! ونستغني عن السلاح ونوفر (حق الملاح) ونقضي على الفساد ويرتاح العباد ومش ح يكون عندنا مفصولين صالح عام ولا محسوبية ولا (تمكين) لأننا بنمشي بكلام (الدين) !
وبما أنه مطلوب منا كما جاء في الحديث (أن نحب لإخواننا ما نحبه لأنفسنا) فإننا لا نرضي لإخواننا من الدول المجاورة والذين لم يجدوا العيش الكريم في أوطانهم ورجوه لدينا أن نعاملهم بقسوة وبعدين الدنيا دي ذاااتا ما دواره وأهو ملايين من الشعب السوداني الفضل منتشرين في كل أصقاع الدنيا يبتغون كريم العيش بعد ان سدت كل المنافذ في وجوههم (والمسألة نسبية وكده) !
أيه لزوم المقدمة دي .. أقول ليكم :
جاء في الصحف مؤخراً خبراً يقول أن البرلمان قد أجاز قانون اللجوء لعام 2013 والذي قضى بإيقاع عقوبة السجن لمدة لا تتجاوز سنتين أو الغرامة أو العقوبتين معاً في حال علم الشخص الذي يؤوي اللاجئ بعدم امتلاكه إذنا للعمل في البلاد من وزارة العمل .
التصريحات التي تفقع المرارة عرفناها .. لكن يبدو اننا في مرحلة القوانين التي تمزق عضلات القلب .. هسه زي الخبر ده الزول يتعامل معاهو كيف؟ بالأقراص المسكنة وللا القاتلة للألم وللا بالصبغة وينتهي من الموضوع ؟ كل المسؤولين قاطبة وكل سوداني وسودانية وأجنبي واجنبية يعلم تمام العلم بان مسألة دخول غير السودانيين للبلاد والإقامة والعمل بها (السلطات ما شغالة بيها شغلة) ولو هسه سالنا لينا مسؤول عن عدد الأجانب بالبلاد فلن يستطيع أن يحدد الرقم (ولو بالتقريب) حتى وإن إستعان بالتومة الوداعية !
القصة سايبة .. والسلطات (عاملة نايمة) لا يعنيها توفيق أوضاع هؤلاء (اللاجئين) من الدول المجاورة .. الاسواق مزدحمة بهم .. المطاعم .. الكافتيريات .. وسائل المواصلات .. محطات الوقود .. الشوارع .. المنتزهات .. لم نسمع أو نشاهد (شرطياً) يستوقف أحدهم ليسأله عن (الإقامة) أو الهوية كما يفعل إخوة عرب لنا في (بلدان إسلامية) لا يريدون لبلادهم أن تكون (وكالة من غير بواب) .. فكيف بعد كل هذا يقوم المجلس الوطني وأعضائه الميامين (الميامين مش النايمين أقرأ كويس بالله) بإجازة قانون كهذا ؟ يعني السلطات شايفه شغلا وبقت على المواطنين؟
من يقرأ هذا (القانون) والعقوبة (القاسية) التي تنتظر من لا يعمل به يظن أن عدد الأجانب الذين يسرحون ويمرحون بالبلاد لا يتجاوز الدستة دستتين (مش المليون مليونين) بل أنه من فرط تواجد هؤلاء الجيران بكثافة فقد طالب العبدلله المسؤولين أكثر من مرة بإنشاء سفارة للجالية السودانية بالخرطوم ..
نحن ضد قطع أرزاق الناس أياً كانوا (ما نحنا برضو ناس) ولكن لا يمكن لدولة في العالم أن تستباح عيني عينك كما يحدث الآن .. نحن نطالب بحصرهم ومعرفة أماكن تواجدهم وكيفية تحويل مدخراتهم بل نفرض عليهم رسوم إقامة تساعد في مصروفات هذا الحصر (بس ما يقوموا يجنبوها وكده) !
بمناسبة كثرة أعداد هؤلاء (الجيران) قيل ان أحدهم ويسكن في الصحافات تم سؤاله عما إذا كان هنالك شئ يضايقه فرد :
– كل شئ تمام بس سودانيين كتار !
كسرة :
– أقطع دراعي ان معظم المسؤولين لديهم شغالات غير مسجلات ولا يحملن إذن عمل .. إذن عمل مين وبتاع ايه .. القصة هااااايصة يا وزير الداخلية وما عايزه ليها (دليل) !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟

Advertisements

54 تعليق

    1. أربعاء و عقاب عبيد يا فلاديمير ، ظنيتكم مفرغين ليكم زول مخصووووص للبرنجية . لينا الله احنا، نتككم حديد و اللتنا ظنيتو صيني . تستاهلا! تحياتي

      1. يباركوا ليك السمح يا نونا ،، و فعلا فى البلد دى،، النت يرد عليك قبل ما تخلص الكتابة زاتو ،، ديل ناس تحت الصفر يا عمك.،،، و انتوا تشتكوا لى لمن وصلت عندكم ١٥ !!!!

    2. الموضوع بادي بحديث للرسول , الجاب الشيوعيين شنو في البرنجية !؟
      تدخل عليك بالقُحه ووجع السدُر !!

      1. ههههه – مقبولة منك يا بتاع عربى جوبا ،، ألما بتلحقو جدعو !!

  1. ادونا فرقة معاكم !!!!!!

    1. ركس يا أخوى كدى انتفاهم ليك مع العبيد فى الجاية ،،، بس ما يجازفوها منك ناس جنوبى و نونا !!

      1. انت اصلك يا ود بوتن بتغير من الأمريكان من زمن الحرب الباردة ،، لكن ليك علي تاني اصلو ما بنوم تب .. يعني سقد سااااكت ..

  2. ما في ليك طريقة مع ديل يا ركس !! تلقاهم ما ناموا لحدي حسع عشان يجيبوا ( برنجية) معليش ولا يهمك المرة الجاية ..

  3. أولا مبروك البرنجيه يا اخوي فلاديمير ،
    ثانيا موضوع اليوم تعجيزي وكمان ناس البرلمان وكما عوا ادونا بطرح مواضيع انصرافيه او تعجيزية ،كدي بس ناس كسلا ال يبدو بالحصر قبل ناس الخرطوم ودي ذكرتني النكته دي سودانية ولبنانيه بتنافسوا على وظيفه في دبي .. سألوا السودانية ما معنى الترتيب الانتقائي اللاجزئي لأبجديات العلم الأيدلوجي؟
    قالت معناه يا كلاب دايرين توظفو اللبنانيه

    1. حلوووووة يا العبيد أخوي ضحكتني من الصباح كدا.. دي زي واحد (كوز) عندو واسطة والتاني عنقالي ساااكت ما عندو التكتح مقدمين لي وظيفة ، قامت لجنة الإختيار سألت الأول (العندو واسطة) قالوا ليهو : بلد عربي في المغرب العربي كافح ضد الإستعمار الفرنسي لمدة 40 سنة وقدم مليون شهيد في سبيل الإستقلال فما هو ؟؟ ما عرفو !! قالوا ليهو أول حرفين منو ألف ولام وآخر حرفين ياء و راء برضو ما عرف !! قالوا ليهو توتي تطلع شنو ما جزيرة ؟؟ قال آااااي .. قالوا ليهو طيب قول البلد .. أخيراً قال الجزائر قالوا ليه (صاااااح) .. والتاني قالوا ليهو (يلا ورينا أسماء الشهداء ديل منو) ؟؟

    2. ههههههههههههه عافيت منها ..

  4. البروف الأيام دي قاصدني عارفني بساهر مع العيال في المذاكرة ، عشان كده الليلة ظهر أخونا بوتن ،، مبروووك ..

    1. ماااا حرب باردة و كدة !!! و الا شنو ؟

    1. انتي بس تابعي يا ساره، أوعى تغمض عنيك!

      1. يعني يا نونا يا بتي فسرتي ليها الموية بالموية ؟؟ (وفسر الماء بالماء) ما كان تريحيها وتقولي ليها معنى برنجية زي ما طلبت !! أها يا سارة يا بتي (البرنجي) يعني الأول وعلي كدة برنجية معناها إنو هو أول من قرأ الموضوع وعلق عليه مفهووووم ولا أزيدك !!! سلاااام لكل السمار بالقروب رجال ونسوان !!

      2. شفت يا جنوبي الجنس اللطيف ردو ظريف كيف .. انت عاملها لينا كلها بامبرز وحاجات تاني !! غايتو انت يا جنوبي يا خرفت يا ضربك الزهايمر ….

    2. رد علي البرلومة دي يا جنوبي ،، بس خليك رقيق معاها لو سمحت ؛:؛:؛:؛:

      1. هههه يوم تشيلا , يوم تشيلا يا امريكي ,, اليوم داك بقع ليها ..
        بس خليك رقيق دي زي قولة ابو يوسف لي اخوانه , قدملهم عزرهم بي اخاف ان يأكله الذئب وانتو بتلعبوا ..
        سارة اهلا بيك .. وزي ما قال ليك نانو ابو احمد يعني البشيلا ده كأنه شال الجُماده ووش اللبن ويشرب من اتي بعده لبن مويه ساااااااااااكت ..
        ومن هسي بنوريكي نحنا بنبارك في اول مره ونبرك خنق في المره التانية ,,

      2. يا ود ياحنين انت !!!

  5. رزق زول ما بشيلو زول ! وأي زول ربنا قاسملو رزقو , والرزق بيبري سيدو محل يمشي , يعني الحبش ديل لو بقوا 20 مليون في السودان ما ماش يشيلولم رزق سوداني واحد , في النهاية بشيلوا الكاتبا ليهم سيد الرزق ,,
    وزي ما قال البروف بس الحكومة تكون عارفاهم كم ؟ وهم منو ومنو ؟ نصاح ولآ مرضانين ؟ وشغالين شنو ؟ شغل شريف ؟ ولآ شغل مخيف ؟ !
    وانا ضد أي قانون يخلي بني آدم يكفل ( يستعبد ) بني آدم زيو ! ومفروض الحكومة هي التكون كافلا الناس ديل لأنو للاسف هسي عندنا في السودان في سودانيين كافلين حبش وبشيلوا منهم قروش !!
    الحكومة دي بس تخرا وتقول لينا شطفوني !! رفعوا الدعم عن المحروقات قالوا عشان قاعدة تتهرب لدول الجوار وزدنا السعر عشان نقلل التهريب , وسخين خلاص ! انتو ما شايلين نصيب الاسد واللبوة في الميزانية للأمن والجيش ! ما تسدوا الحدود وتمنعوا التهريب ! شاحد الله تهرّبوا بدون ما تحسوا , لمن يلبسوكم بامبرز !! هسي كمان خلوا الحبش ملوا البلد بدون حصر وبدون كشف طبي وبدون جوازات زاااتو , ويجوا يقولوا لينا اياك ان تبتل بالحبشي !!!
    ناس المؤتمر الوطني ديل بررضو بيعملوا بالحديث الزكرو البروف بس المشكلة هم بحبوا الاذية !! شان كدي كل مره يأذونا الله ياذاهم .. ولو ما همهم كله اذيتنا صحي ليه ما يعملوا للناس ديل اقامات وتصريح عمل برسوم سنوية ؟ ليه كل همهم يغرمونا نحنا باقي الشعب ( الفصل ) !
    السعودية فيها قريب 9 مليون اجنبي وكل اجنبي بيدفع سنويا 2400 مكتب عمل و 150 موارد بشرية و 500 اقامة يعني كل اجنبي بيدفع للدولة 3050 ريال × 9 مليون بي قريب 27 مليار ونص تدخل خزينة الدولة , ومافي زول فينا بيدفع قروش لزول في يده , كله عن طريق البنك تودع في حساب الحكومة مباااااشر .
    قال علمني ابقي هايف , قال ليهو تعال ع الهايفه واتصدّر , هم يوم وااحد ما يناقشوا الحروب المدورة في البلد دي ؟ ما يناقشوا تقارير المراجع العام دي ؟ ما يناقشوا وزير الصحة البيقفل المستشفيات ويشرد المرضي ؟ ما يناقشوا احتفالات افتتاح المشاريع البتكلف اكتر من المشروع دي ؟ وما وما وما ..
    اها وحسبو كان رأيو شنو ؟ تلقي كان يصفق بي يدينو وينضُم , اكيييد جابوا سيرة بنات الحبش ..
    حبشييييية انا ما عارف انا بهب كسلا وقدارف .. خلوهم ياخ بس نظموهم .. برضهم ليهم لزمه ولو لو ما كان في نقص في عمالة معينة ما كان لقوا شغل ..

  6. المشكلة الفاقعة مرارتي يا بروف إنو الحكومة ذااااتا في عضما شايفة الفيل تطعن في ضلو !!!! بسسسسس عليهم يحبسونا لييييي شىنو؟ إذا كان هييي ذااااتا مفرطة في منجم دهب ، الجماعة ديل ما بشيلو منهم ايييي حاجة ، في سجم القريييبة دي رسوم دخول جنينة الحيوانات بتفرق بين مواطن و أجنبي!!! حكومتنا ما فارزاهم مننا ، نجي احنا نفرزم؟؟؟؟ حنغالط الحكومة احنا؟ حد يشتكي الحكومة للحكومة؟

  7. أكاد أجزم بأنه لو إحتسبت الحكومة الإنفاق على اللاجئين فى شكل أجورهم التى يعملون بها كصدقة فى كباب إبن السبيل مثلا ح يحصل خير كتير.
    و أود أن أضيف أن من يتكفل بدفع زكاة الغارمين من مساجين الشيكات تخصم من دخل المتصدق كزيادة منصرفات بغرض حساب الضرائب سوف ترغب فى الزكاة و تنصلح كثير من الأحوال المجتمعية.

  8. (إن علاج الإسهالات والخراج والفتاك إهدار كبير للموارد) ، في تصريح لوزير الصحة مجمور حميضة يفسر به نقل الخدمات الصحية للأطراف و ليس المركز!!!!! بالله في قلة أدب اكتر من كده؟ الراجل ده ياخواني مافي زول يضربوا لي و انا يكفل اولادو لمن يطلع من السجن ههه! شوفوا الإستهزاء و الصلف و العنجهية بل و الغباء كمان! اولا الأمراض الذكر ها دي ممكن تكون أعراض لأمراض اخطر!! و هو الواحد لو عارف مروضو إسهال ساااااكت البخليهو يجازف و يمشي مستشفى في الخرطوم شنو؟ ولا أحسن نمش واحدة من مستشفياتو الخاصة يا فاسد! كل روح أزهقت و كل نفس عانت من مرض في رقبتك الى يوم يبعثون و عندها ستجد ما ينتظرك عند مليك مقتدر لا يظلم عنده احد!!!! ( مغسستي عليهو مغسة !!!!)

    1. يستاهلوا السودانيين عشان لم
      ا الاطباء اضربوا شالوا حالهم ,,
      اخخخخخخخخخخخخخخخخخخخخخخخخخخخ

    2. يا نونا هم ادرى بما تسببوا فيه للسودانيين من امراض – الخراج من الحمى الداخلية، والفتاك من الحاملنو وصابرين عليهو، والاسهال عاااااااادي الزول كان داخل السوق شاف حالو برجع البيت بإسهال خلي اشتري؟

      1. يعني فعلا اهدار موارد لأنه عارف بقاء المرض ببقاء مسبباته، ومسبباته مرض في رقبتها

  9. والله يا جبر ده قوية شديد ، انت قاصد شنو بالكلام ده يا وزير الداخلية ولا الحكاية جايطة ساكت

  10. كلامك دا يا بروف كان تكتبو ايام وزير الداخلية الاسبق !
    كااااااااااااااااااااااااااااااك

    1. والله انا خايف يكون عملوا للحبوش ديل رقم وطني وبعدين يكسحونا بيهم في الانتخابات !! مفروض لجنة الانتخابات تتاكد من أي ناخب بعد اجتيازه لامتحان النطق الصحيح للصحافه زلط والحصاحيصا ,,
      كدي امش اتأكد من اسماء اخوانك في الرقم الوطني ما يكون عندك اخو اسمو تسفاي شمباتي وتبقي عليك قطيعة صلة رحم تجهجك بعدين …
      الداخلية لقمع وقتل الشعب والزراعه لاحياء الزرع واطعام الشعب والبيكتل ما بيحيي ولا بيطعم ..
      سنينو دي كووولها في الداخليه يجوبق فيها والمطبلاتية يمدحوا فيهو , الليلة ودوا الزراعة قالوا مشي مكانه الصحيح وده اصلا تخصصه وهو مهندس زراعي , خلاص يورونا زرع كم شتلة في الداخلية , ميتينم منافقين ..

      1. هههههههههههههههه,,,نان انت قايل جابوهو الداخلية لشنو !!؟
        وتانى كان فاز زول غيرهم !
        خيبهم الله من كلاب ….

  11. سودانيه كتار بره السودان وموجود ين في كل واااادي

  12. 5 حارسين البرنجيه !؟ خلاص ودوها الثورة ال 34

    1. يا جنوبي رفقاً بالقوارير .. قلنا ليك معانا جنس لطيف .. وخصوصاً اختنا سارة الآن هي مركزة شديد ..

      1. هسي انا قت حاجه !!

      2. لا لا حاشاك .. بس وصيتي ليك باقي اليوم دا اشرب زبادي سااااكت ونوم !!!!

  13. قالوا واحد عنده صفاارة سحرية وكل يوم بجي شاقي الغابة في طريقه من بيته لسوق القرية , واول ما يعزف بالصفارة كل الحيوانات المتوحشه ترقد تنوم تحت كرعينه , !! في قردين يوميا متابعين الزول ده , يوم صاحبنا بتاع الصفارة ده جا شاقي الغابة يصفر سااااكت والحيوانات تتوقع ساااكت تحت كرعينه , فجأة ظهر اسد عجوز من بعيييد وجاي عليهو , واحد من القرود قال للقرد التاني : أمممممممممممك شوف الاسد صاحبك , والقردين بحركة قرودية نطوا طلعوا فوق الشجرة وبقوا متابعين من فوق , صاحبنا بتاع الصفارة يصفّر وماشي علي الاسد , والاسد جاي عليهو , والقردين متابعين من فوق الشجرة ويضحكوا ساااكت , الاسد العجوز وصل صاحبنا بتاع الصفارة وطااااااخ قشطوا ليك كف , صاحبنا وقع في حتة والصفارة في حتة , واحد من القرود قال لاخوه : ما قت ليك الاطرش بضيّعو .

    امبارح قالوا بكري حسن صالح استدعي المسئول عن شركة سكر كنانة وقال ليهو شنو قصة الهندي السرق خمسة مليون دولار من مصنع كنانة ومشي ده ؟ وكيف سرق القروش دي ؟ وانتو كنتوا قاعدين وين لحدي ما يسرق قروش قدر دي ؟ وشنو مره تقولوا للاعلام سرق ومره تقولوا ما سرق ؟ انتو مستهبلين ولآ شنو ؟ وبكري ينضم وهايج كدي قالوا صاحبنا المسئول مسك الصفارة وداير يعزف وقال : اصلوا يا سعادتك ,,, وقبل يتم سعادتك دي قالوا بكري طاااااخ اداهو كف الراجل وقع في حتة وورقه في حتة , وقال ليهو انا لا بعرف هندي لا بعرف جن احمر , القروش دي تجيبا انت ده , انت شايف ليك قنبور هنا يا حرامي يا معفن , والله القروش دي ما ترجع انا الفك لف ,,, ( او كما قال ) .
    الخبر :

    اقتباس:
    توقعات بإقالته ومطالبات من نائب السفاح بإرجاع المبلغ الذي نهبه الهندي
    01-18-2014 09:55 pm
    خاص: الراكوبة

    أفاد مصدر موثوق بأن محمد المرضي التجاني العضو المنتدب لشركة كنانة تلقى صفعة على وجهه من نائب البشير بكري حسن صالح بعد غضب الأخير من مهزلة المحتال الهندي الذي نهب مبلغ 5 ملايين دولار من الشركة، وكان المرضي قد تم استدعائه إلى القصر الجمهوري ووجه له نائب الرئيس إهانات قاسية على الفضيحة وطالبه باعادة المبلغ المنهوب، ومنعه من السفر هو وحسن ساتى مدير سكر النيل الابيض. وتوقع المصدر صدور قرار باعفاء المرضي

    .

    1. هههههههههههههههههههههههههههههههههههههه,,,
      انت القال ليك منوووووووووووووووووو !!؟
      احم احم

      1. انت ما عارف جنوبي دل زول غابة ؟؟ الليلة البرنجية محروسة .. الحشاش يملأ شبكتو .. يلا يا سارة ..

    2. يا جنوبي الله يجازي شيطانك أنت الأخبار دي بجيبا طااااازة كل يوم !! يبدو عليك مواكب كويييييس .. وقصة الصفارة والقردين والأسد العجوز دي بتنطبق على كل الجماعة الطيبين اللي في بالي !! إسمعوا الدايرين يسمعوهو، ويطنشوا الدايرين يطنشوهو ويعملوا أضان الحامل طرشا، عليك أمان الله جايهم يووووم يخليهم يبقوا قرووود سااااكت تتفرج فيهم الناس .. سلااااام ..

      1. هههه انا ما كنت واحد من الاتنين الفوق الشجرة ,,
        هم قايلين ده بتاع قيام ليل بالكضب كضب ! ده بتاع لف ليل ده , وجاهم اليأدبم اولاد الهِرمه ,,,

      2. يعني معترف إنك ( قــرد ) !! هههههيهيه أسمع يا شمباتي

      3. شمبانزي ده منو كمان !!

      4. هيييي يا جنوبى ,, احترس ,,
        بكرى دا صاحبى وبلفخك لمن تعرف شمبانزى من الشانزليزيه !ّ هيييق

  14. ياخ ما حرقتو روحنا بالبرنجيه دي ! هسي الواحد داب يصل المكتب يلقي واحد فيكم خطفا , ان شاء الله ما تنفعو ,,

    1. والله إلا تاخد إجازة .. انا مقطع أظافري وفاتح عيني ..

      1. شاحد الله تجي داير تضفر الخنصر يقوم يفضل فيهو حتة صغيييرة بالركن وتقوم تقرب مصبعك لعينك شان تضفر الحتة الصغيرة دي يقوم الضفر يطير ليك في عينك الفاتحا للبرنجيه دي وتقوم تدعك عينك كدي وفي نفففففس اللحظة تنزل البرنجيه الجديدة واشيلا انا وبعد انا اشيلا شاحد الله الضفر يطلع من عينك وعينك تبقي بييييضه وسممممحه واسمح من اول كمان ..

      2. ألفي قلبو حرقص براهو برقص ..

      3. صدقت يا ود عم سااام … طاااااخ

      4. الليلة أمانة ما وقع راجل .. اصحي يا بروف ؛:؛:؛

  15. انتو تكشو من الجيران ما نحجنا هنا كمان كثار ولا ورقة اثبات حتى هااااااااااااااااك ليبيا دي ومعمر قام بعاتي

  16. رجعني محل ما حاولت تنقذني !! | رد

    الحكاية جايطة بتتذكروا السفاح التشادي القبضوه في اليمن بقتل طالبات الطب
    وعنده جنسية سودانية ..
    والناس كلها يقولوا السفاح السوداني ..
    هسه سفاح هو ولا سفاح الاداهو الجنسية

    سنة 93 لوري مليان تشاديين تم القبض عليهم بالصدفة في تفتيش جبل أولياء ( تصدقوا )

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: