غير الوووووووووووواوات دي يخربنا

لفت نظر العبدلله تصريحاً صحفياً أدلي به السيد وزير العدل بالبرلمان مؤخراً حذر فيه مولانا محمد بشارة دوسة من التباطؤ في الإجراءآت القانونية حول قضايا شهداء سبتمبر، وقطع بمتابعته للقضايا عبر اللجنة المكونة من وزارته، داعياً إلى التبليغ الفوري عن أي تأخير إلى وزارة العدل .
ما أن أكمل العبدلله قراءة التصريح حتى تذكر رسماً كاريكاتورياً في ستينيات القرن الماضي لرسام الكاراكاتير المبدع الراحل عزالدين عثمان وقد كانت رسوماته عليه رحمة الله محببة لقلوب وعقول المواطنين إذ أنها كانت ذات خطوط بسيطة تتميز بمقدرتها على التعبير عن الواقع المعاش فى الحياة في أسلوب ساخر عميق .
كان الكاراكاتيرالمذكور يناقش مشكلة تأخر الفصل في القضايا لسنوات ويظهر الكاريكاتير (معلن محكمة) أمام قبر في إحدي المقابر وقد (تكل عجلتو) على أحد الشواهد وأمسك بورقة في يده (إعلان محكمة) يتلو ما فيها على (المرحوم) : بهذا أنت مكلف بالحضور لجلسة يوم كذا الساعة كذا !
ما لفت نظر العبدلله كون أن هذا التحذير صادر من (وزير العدل) وليس أي شخص آخر .. وزير العدل الذي من مهام وزارته تعزيز دور القضاء بما يكفل أداء رسالته في إقامة العدل بين الناس وحماية حقوقهم، ومراقبة سير العمل القضائي والإجراءآت القانونية بما يحقق سلامة تطبيق القوانين وإرساء العدل بين الناس .
يا ترى هل يحذر السيد وزير العدل نفسه أم يحذرنا أم يحذر موظفيه ومنسوبي وزارته ؟ من يحذر السيد الوزير؟ (بالله العارف يقول لينا) ، عموماً إن كان السيد وزير العدل يرى بأن التباطؤ في إقامة العدل حتى يراه الناس يقلل من (هيبة الدولة) ويقلل من إشاعة الطمأنينة بين الناس ويحذر من ذلك فنحن نتفق معه تماماً ونهديه هذا (المقطع الإسلامي) للخليفة عمر بن الخطاب رضي الله عنه، الذي قام بوضع مبادئ أساسية للحكم وإدارة الدولة بيان بالعمل (وليس بالتصريحات) عبر تطبيقات صارمة على أرض الواقع يراها كل مواطني الدولة الإسلامية من أجل أن تسود العدالة الإجتماعية والمقطع المعني هو واقعة عمرو بن العاص والي مصر عندما ضرب ابنه شخصاً (قبطيا) فاز عليه في سباق خيل، وعندما اشتكى القبطي إلى عمر بن الخطاب، (لم يتقل) رضي الله عنه )الملف( عشان ود الوالي بل أمر (بن الخطاب) رضي الله عنه بإحضار ابن عمرو بن العاص (ومعاهو أبوهو الوالي ذاااتو) إلى المدينة، وكان الحكم أن يقتص القبطي من ابن عمرو، إلا أن الخليفة أمر القبطي قائلا له: “دونك الدرة فاضرب بها ابن الأكرمين”. وبعد أن ضربه قال له الفاروق “أجلها على صلعة عمرو، فو الله ما ضربك ابنه إلا بفضل سلطانه”.
أهو ده الشغل .. وده العدل الذي نريد يا سعادة الوزير وهذا هو مقطع صغير من مقاطع كثيرة حفل بها تاريخنا الإسلامي حيث كان العدل يمارس على الهواء مباشرة والعدالة تطبق حتى على أبناء الأكرمين (والأكرمين ذاااتم) .نحن من هذا المنبر نحيي السيد وزير العدل على تصريحه الذي يدل على حرص سيادته الشديد في عدم التباطؤ في تحريك الإجراءآت القانونية وطالما أن سيادته قد دعا في تصريحه إلى التبليغ الفوري عن أي تأخير إلى وزارة العدل فها نحن نقول له كما قال عمنا (المرضي الترزي) لكسار الحطب .. فعمنا (المرضي) كثير الصمت وإن تكلم تخرج منه الطرفة والحكمة .. كان له دكان (ترزي بلدي) في أب روف في مواجهة (النيل) .. أمام دكانه سبيل ماء به عدد من (الأزيار) .. كانت السيجارة (البرنجي) لا تفارق يده إلا عندما يضعها على حافة (مكنة الخياطة) مجبراً ثم يعود لها مجدداً .
في ظهيرة يوم غائظ الحر .. جاء أحد الأعراب الذين (يلفون في الأحياء) عارضين خدماتهم في تكسير الحطب .. جاء الإعرابي وقد أضناه العطش (من الحوامة) فأدخل يده في كل الأزيار ولما لم يجد بها ماء قام بسؤال (عمنا المرضي)
– ما عندكم موية؟
فقام عم (المرضي) بوضع سيجارته على حافة المكنة في هدوء وأجابه :
– غير دا (وهو يشير إلى النيل) … يخربنا !

كسرة :
فنحن يا سيدي وزير العدل غير (الواوووووووات التحت ديل) يخربنا !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟

Advertisements

43 تعليق

    1. مبررروكه وختيييره كمان

    2. يعني يا بروف ما لقيت إلا سيجارة ( البرنجي ) ووجع ووجع يا جنوبي .. شايفك قاعد تأكل في اضافريك ..

      1. ههههه والله مصري زميلي بقي لي في الرقبه ,, ياعم اوم نفطر , ياعم اوم نفطر , تقوم قيامته ان شاء الله …
        يا زول مبروك والله قلعتها قلع

    3. ههههههههههههههه,مبروووكة يا امريكى ,,,
      واخدتها رجالة وحمرة عين ,
      عافى منك آالخواجة ,

      1. ايو والله الجنى مثل سلاطين مش عارف بذكرني بيهو (انا المصيبة المعلقة في سبيبة اكان انقطعت السبيبة وقعت المصيبة ) ههههههه حبوباتكم حجوكم ا شمباتي

    1. والله انت الختير يا عبيد ، الفرق دقيقة بس !! لكن الدقيقة في الزمن دا تحول بيها 10 مليون دولار الي ماليزيا ، هوا بس …

    2. الواووااات يا خوي الفاتح بعدين يقولوا كيد سياسي،،،،
      جنوبي اخوي الظاهر عليك قاعد عزابي في السعوديه وساكن مع مصري،يا عم اوووم افتر،
      والذي بعثرنا في كل واااادي

  1. ههههه صحي الواوات بقت اطول من بحر ابروف !

  2. بعااتي و ما فاضي | رد

    غير البرنجية دي… يخربنا ما عندي امل معاكم زاتو، مبروكة عليكم جميعاً.
    السيد الفاضل ابو ناجي، تسلم يداك بالجد على كتاباتك و منتظر برنامجك ( السيارة ترجع الى الوراء ) على احر من الجمر

  3. الاستاذجبرا مافى فائده ابد ا ابدا لا الواوات بتحلها ولاعدل احلها بس احلها رب العالمين

  4. هووووي يا جنوبي أبعد من أبروف وبحرا وخليها في حالا أوعك تغلط !! البرش أبروف بالموية نرشه بالدم حرررررم!!
    دا حيي ومسقط رأسي، فيها إتولدت وبها نشأت وفيها درست وكمان عرست وبرضو سكنت .. أخيييير ليييك فتح أضنيييك ..

    1. سمح بالمناسبة تعال نسألك , انت بتاع السمك الجموعي الفوق البحر داك وديتوا وين مع كرنيشكم الجديد ده ؟ مشيت اجازتي دي اصلي ما عرفت بكانه الشارع بقي لي غريب غريب , وقدر ما فتشت ما لقيتو , وحتي طلحكم بقي ما فيهو ريحة دعاش البحر ومكسرنوا دقاااااااااق انا قايلو صير !!

      1. إنت قصدك منو ، الحلبي ولا بلة؟؟ الأول مات موت طبيعي، وبلة كتلو واحد (مجنون) دخل عليه في دكانو دون أي سبب وطعنو أكتر من 10 طعنات!! رحمة الله عليهم جميعاً .. أما الطلح والشاف والكليت والمباخر والشملة وكمان مقعد الدخان والكبارييت بقوا (يحنكشوهم) لزوم خليك مع الزمن!! وزي ما قلت إنت بقو ما ليهم لا ريحة ولا طعم .. كدي أسال البنوت المعانا ديل يدوك رأيهن ..
        أها شن قولكن يا بناتي ؟؟

      2. شنو يا نانو الحكاية ؟ جنوبي خربك ولا شنو ؟؟

      3. أفو أنا بوك آاااحمد !! شن قدرو علي ؟؟ لكن دي بس شان أرد ليهو سااكت وأكون مع الزمن .. شفت كيف يا جنوبي بي سببك جاتنا (طراطيف كلاااام) على العموم شكراً لمرورك يا ود العم سااام ..

      4. شم شم شم شم شم ,,,
        احححححححححححححححححححححححححححح
        استنغفر الله

      5. ختو الملامه علي
        ارمو الملامه علي
        لوم الاحبه جراح زاد الاسي الفيني وشال نوم عيوني وراح ..
        انتو تقولوا الشئ وتختوا فيني !؟ اصلي ما عافي ليكم , شان ربنا يجعلا لي اجر , ويوم القيامة تعالوا متقلين يمين شان انا طماااااع ..
        الحلبي وبلة الله يرحمهم ويغفر ليهم , انت وامريكي ارجوا الجاييكم مني ,,

    2. أخوي نانو اها طلعنا من نفس مسقط الرأس (أبوروف )،وفعلا الواووااات بقت كتيره و ح تطلع كيد سياسي او مستهدفين من الدول الأخري ،لدي ذكريات جميله في أبوروف وأتذكر زمان البنطون وكذلك في سوق الشجره كنا ينمشي لعم الصادق رحمه الله عليه والذي كان يفصل لنا جلاليب العيد وطبعا زمان اي حاجه كانت حلوه وما كان في غير واو وااحده ،اااه يا حليل ايام زمان وناس زمان

      1. أهلاً بيك أخوي العبيد (ود أبروف) فعلاً كنا بنفصل جلاليب العيد عند عمك الصادق وبنأجر العجلات من عمك عطا (أبو لعيبة الكورة محسن وعوض الله) في سوق الشجرة، ونشتري اللحمة من عمك بابكر الجزار (من حيران الشيخ قريب الله) وحاجات البقالة نجيبها من عمك خضر بشقة أو علي الإمام في ود اللدر والبوش من الحالة رحم الله الأموات منهم وأحسن إلي الأحياء .. وكنا نلعب الدافوري في حفر ود دلوك أو ميدان مدرسة وداعة للبنات (هسي نادي أبروف) ، ونمشي نادي الزهرة نعلب الوست وكان البياخد إسنا يزفوهو الحلة كلها ، ونمشي البحر نعوم وبنتحدى أولاد بيت المال في قطع البحر (قبل البنطون)، ونشاغل جوزيف (السطلنجي) في البحر لمن يلف سيجارتو (الخضرة) ويقعد يحكي لينا نكت بلهجتو المصرية.. وبالمناسبة أنا السميت اللاعب عزالدين (بالدحيش) لأنو كان شكل شعرو لمن يطلع من الموية زي الدحش ….الخ هيييييييييي .. والله رجعتني 40 سنة أو أكتر لي ورا !! حليل الأيام الحلوة الما بتعود تاني .. كدي قول لي إنت من وين في أبروف ؟؟؟ طبعا كل الألسر الزمااان (الحيشان) بعرفوا بعض ما زي هسه (لحم راااس) سلااام ..

  5. السمار سلامات .
    يا جماعه ناس بشارة دوسة ديل بى طريقتم دى مابجيبوا لينا حق ضايع ولا بفشوا لينا غبينة .
    لكن بكرى الدنقلاوى دة قالوا أمبارح رشح المرضى بتاع سكر كنانة كف صاموطى على خلفية النكبة التى تعرضت لها شركة سكر كنانة بفقدانها مبلغ خمسة مليون دولار من موظف هندى كان يعمل فى قسم تقنية المعلومات .وعلية دايرين ملف الفساد دة يمسكو لينا بكرى حسن صالح على الاقل بياخد لينا حقنا كفوف وشلاليت من الحرامية ديل …

  6. بركة اللمينا في الواواووووات دي ، بكرة ح يخصخصوها ليكم،
    بعدين يا جنوبي مصاحب ليك مصري؟ كونت رأي فيك لكن! عجبني ليك ، البباري الجداد قالوا شنوووووو…. تم الواواووووات دي براك ههههههه

    1. لا لا يا نونا .. ما بلومك لأني كنت زيّك
      لاكين ده حالة شاذة فعلا
      17 سنة ما شفت منه الا رجاله ارجل من السودانيين ولعلمك امتحنتوا في مواقف كتيرة جدا , نجح حين سقط سودانيين !!.

      1. متكون كاميرا خفية

  7. البروف والسمار الكرام
    ادارة بلدنا بقت ادارة اولاد الدفشقي
    وادارة اولاد الدفشقي دي طرفة مصرية قديمة بتحكي ان اولاد الدفشقي ديل عندهم بندقيتين واحدة عطلانة والتانية ما بتضربش , ضربو بيهم طيرتين واحدة طارت والتانية ما اضقبدتش, ختوهم في الحاة واحدة نية والتانية ما استوتش
    عشان كدة يا بروف واواتك دي حا نضطر نعمل ليها مقياس رسم عشان نقدر نقراها

  8. أخونا الفاتح .. إنت الظاهر عليك عاوز مولانا وزير العدل يبوس الواوا ( مفرد واواتك الكتيييييرة ) ..
    كدى خليهو يشوف لينا الراجل عضو المؤتمر الوطنى اللى إغتصب الطالبة ( اسمو ………… ) وحكموا عليهو ب 10 سنوات سجن وكمين جلدة .. يشوف لينا لاراجل دا أطلقوا سراحه عشان شنو ؟ وبقرار جمهورى كمان .. وبالله شوف الفرق بين عمر …وعمر ..
    ومولانا دوسه دا بيقول كلام للإستهلاك البرلمانى بس ..
    تقول لى قال ليك ؟؟؟؟

    1. هههههههههههههههههههههههههه,,
      الواوا التقوم لى فلانة فى الحتة دييييييييييييييييييييييييييييييك !

      1. هووووي يا شمباتي أعمل حسابك ما قلنا جنس الكلام الشين دا عيييييب !! أوعك تنجرف في تيار جنوبي !! هو ذااااتو كتر خيرو بطلو وسمع الكلااام (شاااطر)، وما تنسى إنو معانا أجانب وجنس لطيف في القروووب..

      2. ما جنوبي ده اها ده طرفي من يوم الليلة وخلي الاجانب والجنس اللطيف يسمعونا زغرودة !!

      3. ههههههههههه,
        اركز اركز ما تجيب رخوة !!

  9. البروف والاحباب ..سلامات…
    دوسة تف قرارو وقعد فراجة ! شن فايدة مديدة الحلبة يااااااا ابو احمد ؟ شن فايدة مديدة الحلية والويقود والزفت ذاتو !
    الراجل الاغتصب فكوهو , والاحداث المارسوا الرذيلة مع الحبشية جابوهم فى غمضة عينة !
    وفى رمشة عيييييين بعدوك يا حبيبى ,,
    لعنة الله على الظلم واهله ….
    تقول لى دوسة ؟؟

    1. ما بعرفا !! أسال البنوت المعانا ديل فول ليهن ليه النفساء بأكلوها مديدة حلبة ؟؟ والأولى أنت التدينا فايدتا !! مالك ما درست الطب البديل ((Alternate Medicine)) ؟؟ أنا الما طبيب بعرف عنو الكثير .. سلاااام ليكم كووولكم بدووون فرز ..

      1. ده كلام شنو يا نانو ياخ !! يسأل البنوت كيف يعني ؟ لا تنهي عن خلقٍ وتأتي بمثله …..
        مااالك زي ناس المؤتمر الوطني تدخلنا الجامع وتمش الانداية !! هييييييييي يكاااااااااااااااا .

      2. يا جنوبي مالو ما فيها حاجة دي ( لا حياء في الدين ولا حياء في العلم) ..
        وبعدين أهل مكة أدرى بشعابها هن أقولنك رأيهن كان سمح ولا لا !!!

      3. انا بمناسبة البرنجية خالف رجل علي رجل وبتابع فيكم ، يا نانو هسع وينو العلم والدين هنا ، انت عايز تبقي لينا عضو في البرلمان ولا شنو ؟؟ بعدين يا جنوبي انت اعترف بالهزيمة ما تقول لي مصري ولا جنوبي ، وبحذرك والله والله أخير ليك تختي الفراعنة ديل ، انا عندي معاهم تجارب كتييييرة في بلاد العم سام وحتي في مطار القاهرة لمن أكون ترانزيت ، ونصيحتي ليك وزي مابعمل انا الفرعون مجرد ما يفتح خشمو معاك طوالي طلع جزمتك ودخلها ليهو في خشمو والله بحترمك خلاف كده بحتقرك وخصوصاً انتوا يا السودانين .. والشي الأخير .. نحنا كلنا أصبحنا أخوة وبنحب بعض من غير ما نتلاقي .. نصيحتي ليكم ( من كترة حبي ليكم ) مافي زول يكشف اوراقو ،، من انت ،، ومن اين انت ،، لأنكم تعرفون من اين أتي هؤلاء ؛:؛: تحياتي وحبي لكم ؛:؛:؛:؛:؛: الي لقاء في برنجية أخري ..

      4. شووووقك ليها تاني يا أمريكي الجماعة تب ما بدوك فرصة!! وبالنسبة لسؤالك ” يا نانو هسع وينو العلم والدين هنا” ؟؟
        وتعليقك (انت عايز تبقي لينا عضو في البرلمان ولا شنو) ؟؟
        الرد (مش الرد الرد بتاعة الجماعة) : المقصود بالعلم هو: دايرين تعريف لفوائد الحلبة الطبية أها دي شنو ما علم ؟؟ والمقولة الشرعية لا بد من أن تكون متكاااملة ما تتقسم لي إتنين وهي: ( لا حياء في الدين ولا حياء في العلم ) !!
        أما بالنسبة لموضوع كوني أبقى عضو في برلمان الكيزان دي رابع المستحيلات !! بل والله ثم والله لو قالوا لي تعال أبقى رئيس الدولة بدل البشير حرررررم ما أرضى ولا أقبل !! أسوي بيها شنو بلد منهاارة وما عندها موارد والموجود لحسوهوا وإتقسموهوا الكيزااان !!

      5. ههههههههههه,,
        دى جزء منن مسدارللشاعر القدال (ابو السرة) ,,
        وبعرف فايدتا للامانة !
        اى والله

      6. يا د. شمباتي كلامك ما واااضح بتعرف ولا ما بتعرف ؟؟
        ( كان بتعرف وما داير تورينا تبقى مصيييبة !! وكان ما بتعرف تكون المصيبة أكبر ) !!!!

      7. Knock knock احمممممم

  10. المقداد بابكر | رد

    أخاف يا أستاذ إنو يجي عليك يوم الدكتور يمنعك من قراءة الصحف, مشاهدة التلفزيون و سماع الراديو لظروف صحية

  11. رجعنا موقتا لكم وكتمت كتمت كتمت هنا وهناك

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: