لو ربنا كتب ليك

للعبدلله له تجارب مريرة مع بعض هذه المستشفيات الخاصة أسفرت عن إنتقال نصف أفراد أسرته إلى الرفيق الأعلى كل فى مستشفى غير التانى ! وتلك بلا شك هي إرادة الله عز وجل الذي لا راد لمشيئته ولكنها بالطبع (نسبة مقدرة 50%) تشير بما لا يدع مجالاً للشك بان المسالة فيها (إن) وأن هذه المستشفيات الخاصة ذات السرير (اليومو بالشئ الفلاني) تفتقر إلى زيارات الجهات الرقابية للتعرف على ما بداخلها فهنالك (على لسان وزارة الصحة نفسها) بعض المستشفيات الخاصة بها أدوية ومستهلكات (منتهية الصلاحية) كما أن بعضها يستعين بكوادر أجنبية غير مرخص لها بالعمل فى البلاد (يعني كيري ساااكت) وبعضها يخفق في أبسط الأشياء (حفظ الدم) بصورة سليمة كما أن بعضها بها معامل فحص تعمل دون ترخيص أما الطامة الكبرى يا سادتي الأماجد أن الوزارة (وبعضمة لسانها) تعترف بوجود تجاوزات خطيرة فى المؤسسات العلاجية الخاصة العاملة بالولاية تتمثل بوجود اشخاص ينتحلون صفات اطباء (شفتو كيف؟)
عموما بحكم تجارب العبدلله المريرة التي جاءت في فاتحة المقال فقد رأى أن يقدم للقارئ العزيز عصارة هذه التجارب والتي سبق ان قام بسردها وأن يرسم له خارطة طريق قد تفيده عند التفكير فى التعامل مع إحد هذه المستشفيات الخاصة … إحتمال الله يكضب الشينة !!
عليك أولاً وقبل البدء فى إختيار الورشة أقصد المستشفى الخاص الذى سوف تذهب إليه تكوين لجنة تقصى من بعض أصدقائك ومعارفك وذلك لعمل التحريات اللازمة عن المستشفى التى وقع إختيارك عليها ومن أهم طرق جمع المعلومات هو الوقوف لعده أيام أمام باب المستشفى لتسجيل عدد حالات الوفيات الطالعة والإنتباه لما يردده ذوى المرحوم فى تلك اللحظات من عبارات مثل :
– والله المرحوم جاها بى كرعينو !
– مستشفى شنو الما فيهو غير أنبوبة أوكسجين واحده ده !
كما تشمل هذه التحريات نوعية العلاج وتكلفته ومبلغ الأمنية المليونية التى توضع تحت الحساب وهل يقوم المستوصف بإستلام أشياء عينية (أمانات) لحين توفيق الأوضاع المادية (سلاسل – غويشات) ،وأيضاً تشمل هذه التحريات تقدير نسبة الإحتمال المتوقعه لخروجك سالما دون عاهات مستديمة !
بعد أن يقع إختيار لجنة التقصى على المستشفى المعنى بعد الدراسة أعلاه وقبل أن تذهب برجليك إلى حتفك يجب ان تستخير الله تعالى وتطلب منه أن ييسر لك الذهاب إلى ذلك المستشفى إن كان فيه لك خيراً وأن يمنعه عنك إن كان فيه شراً ولابد !
بعد أن تستخير الله سبحانه وتعالى وقبل الذهاب إلى المستشفى الذى قمت بتحديده عليك بأن تقوى إيمانك بالقضاء والقدر وأن تستعن بالله وتتوكل عليه وأن تعلم تماما أن ما يصيبك لم يكن ليخطئك وأن من لم يمت بالإهمال مات بالتيتانوس وأن الدنيا دار فناء وأن كل إبن آدم وإن طالت سلامته يوماً على نقالة محمول ! بعد ذلك أحضر ورقة وقلما وقم بكتابة وصيتك فالظروف ما معروفه إذ أن معظم هذه المستشفيات الداخل إليها مفقود والخارج منها لو خرج مولود !
بعد كتابة وصيتك تبدأ مرحلة تجهيز نفسك مادياً لمقابلة هذه الخطوة التى أصريت وألحيت أن تخطوها رغم عواقبها غير المضمونة وأعلم أنك سوف تحتاج إلى كل مليم لديك فهذه المستشفيات لم ينشأها أصحابها من أجل سواد عينيك بل من أجل بياض جيوبك وتنظيفها من أى مليم فحاول أن تجمع أكبر قدر من الفلوس بأي وسيلة كانت ، اقتراض ، رهن ، بيع ، ولا تنس أن هنالك قائمة من البنود فى إنتظارك بداية من رسوم فتح الملف مروراً بالتحاليل والفحصوصات ثم العملية فالعناية المكثفة ح تدخلا يعنى ح تدخلا نهاية برسوم إستلام الجثة !
إن كانت عمليتك ذات طبيعة إستئصالية فلا تنس ان تقوم بعملية لـجرد أعضائك عضو عضو وتسجيل ذلك فى ورقه وتسليمها لورثتك وذلك لمضاهاتها بما تبقى لديك من أعضاء وذلك فى حالة خروجك سالماً !
قبل إجراء العملية تفحص في يدين الجراح خاصة في أظافره فإن وجدت أي رواسب أو بقايا جير أو بوهية فهو (نقاش) أما إذا كانت الرواسب ذات طبيعة زيتية أو شحمية فمن المؤكد أنه ميكانيكي ينتحل صفة جراح ويفض إن كنت ممن يتحدثون اللغة الإنجليزية أن تباغته بسؤال من نوعية هل سوف تستخدمون بنج كامل أم موضعي ؟ فإذا لم يجب على سؤالك وعمل رايح وبيلبس في (الجونتيات)
فبعدين إنتا وحظك بقى !
ونسبة لأن هذا الطبيب الذى سوف يجرى لك العملية بيعمل ليهو 600 عملية فى اليوم وبيكون ما مركز فلا تنس وأنت تدخل إلى العملية أن تقوم بوضع علامة بالقلم الشينى على موضع العضو المصاب حتى لا يتم إستئصال عضو آخر !
كما يحبذ أن تقوم قبل إجراء العملية بوزن نفسك ومضاهاتها بوزنك بعد العملية لمعرفة وزن الشاش والمقصات وأى أدوات طبية أو مكتبية أخرى تركت بداخلك سهواً لو ربنا كتب ليك تطلع !

كسرة :
إبتسم أنت في السودان حيث لا رقابة إلا الرقابة … ولا مافي داعى !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟

Advertisements

75 تعليق

    1. مبروك : ( انظر نانو ابو احمد )

      1. نُظِر !

      2. أمممممممممممممممممممممممممممممممم شكراً !!!!!!!!!!!!!!!!!!!!!!!!!!!!!!!!!!!!!!!!!!!!

    2. مبروكة اااااالعبيد ،،، تتهنا بيها ان شاءالله ،،،
      و يا ركس وينك؟؟ خليتا ليك يوميييين،، لكن ناس العبيد جازفوها منك !!! اها نسوى ليك شنو بعد دة ؟؟؟

      1. مشكور يا ( رفيق ) فلاديمير : لكن انا اقتنعت انو البرنجية دي ( توفيق من عند الله ) بس , أكان مكتوبة لينا بتجينا ,,,,

    3. اصبروا شوية يا جماعة الخير انا كتمت معاي هنا وراجع السودان وتاني البرنجي دا الا تشموه قدحه لكم التحية جميعا

      1. يا غلبان اعمل حسابك من ناس جهاز المغتربين .. بس لي علمك البرنجية ما عندها وطن ،، اصلها بتجي طايرة بالهوا …

    1. حمدلله على السلامة ،،، وين اختفيت ؟؟ من بداية رفع الدعم ما شايفينك !!

  1. برنجيه من المستغرش رقم واااااحد

  2. بعااتي و ما فاضي | رد

    برنحية

  3. برنجية حقت أخونا العبيد وبس!! لباقي كوووولو برررره فرقت ثواني يا طارق أب أحمد (مبرررروكة عليك يا العبيد)

    1. آآآي حامي ليهو مااا طلعتوا الاتنين ق. ب ( قبل البنطون ) انتو مفروض يزربوكم بي سلك شائك ! أتاريكم طلعتوا ثروة قومية ونحنا ما عارفين , شكيتكم ! لقيتونا شُفع صغار وكل يوم تشيلوا مننا البرنجيه ..

      1. هههههههههههههههههههههههههههههههههه,,,
        و(ق.ش) كيف معاك ؟؟؟
        هيييييق

      2. أنتو تعالوا الإختصارات دي معناها شنو (ق.ب و ق.ش) ؟؟ أنا بس بعرف “ق ش م” لأنو أول ما مات أبراهيم شمس الدين الناس قالت ( ق ش م ) معناها ( قتلوا شان مرتو ) ههههههههيهيههي

      3. خلى بالك دى (كسير تلج) يا الجنوبى ،، يمكن العبيد بتنازل ليو عن البرنجية الجاية !!!

      4. ديل طلعوا آثار عديييل كده !!!

      5. ههههههههههههههههههه,,,دى قوية يا نانو !!
        ق ش م جد !!

  4. الفساد هو قلة ضمير فمتى يرجع الناس لله فيخافوه
    الا يعلموا ان القبر قريب والحساب عسير ؟
    سبحان الله .

  5. يا أحباب أولاً السلام عليكم وبعد ،،،
    بالله ما تخلونا من برنجياتكم دي والتسابق عليها
    زمان تعليقاتكم كانت جميلة وآرائكم نيرة كنا والله بنستفيد ونأخذ منها الكثير!! !
    بالله عودوا لسيرتكم الأولى حتى لا تفقد المُدونة مضمونها.

    1. وعليكم السلام ورحمة الله تعالي وبركاته
      البرنجيه دي الناس بتخلق بيها جو من المرح والتنافس علي البجي اول , يعني منو فينا الدخل القمردينة اول وعمرها ما كانت خصماً علي التعليقات لأنو ناس البرنجيه ياهم نفس الناس البتشارك بالتعليقات ,,
      الكلام في الناس اللا بتكابس في البرنجيه ولاااا بتشارك بي مداخله شان نعرف رأيها في الموضوع شنو !!
      ومع السلامة عليكم ورحمة الله تعالي وبركاته ..

      1. تحياتي اخي جنوبي بعد غيبة اولا وثانيا ود الحكومة دا كان ما غير اسمه ما يدخل معانا هههههه ما هي المصايب كلها من الحكومة وما زالت الكتمة قائمة هنا وفي السودان وربك يستر راجع اعمل قدرة فول واكون ضمير للشعب وربك يستر من ناس ديك ما يجرجروني واغني اسفاي

  6. خخخخخخخخخخخخخخخخخخخخ,,
    انا عجبنى العقيد طبيب جراح داك !
    خوووووووووووووووووووود

  7. الطبيب السوداني لا زال في دول المهجر مميز وذو سمعه طيبه وذلك يعزي للإمكانيات المتوفرة والمطلوبه لأداء المهنه بالطريقة الصحيحة والتدريب في السودان في أيامنا كان علي ايدي أطباء أفذاذ ،كلي أمل بان تولي الدوله اهتمامها بالطبيب والذي بدوره سينعكس علي مستوي الخدمات الطبيه بالسودان

    1. مرة و انا مسافر وفى مطار الخرطوم قابلت طبيب شاب مسافر لإحدى دول الخليج و كان يبحث ليو عن شخص يديهو اوراقو،، لأنو لو عرفو من الأوراق انو طبيب ممكن يمنعوه من السفر !!!!!
      قلت ليو: طيب انت مسافر ليه؟ البلد هنا محتاجة ليك اكتر من الناس اللى ماشى ليهم،،، فمهنتك دى لايمكن ان يؤديها اى شخص اخر غير طبيب،، اما معظم المهن الاخرى فخريجين الثانوية ممكن ان يؤدوها ..
      فقال لى: كلامك صحيح و لكن ان يموت مريض تحت يدك فى عملية زائدة و الا لوز بسبب انقطاع الكهرباء او عدم التعقيم ،، فهذا شىء كبير و لا يمكننا احتماله،، خاصة لما يجبك أهل المريض منهم من يسبك و منهم من يتهمك شخصيا و احيانا توصل لحدى الضرب !!!
      بصراحة أشفقت عليه و قدرت وضعه ،،، فبالله عليكم يا اخوان دة كلام؟؟؟ شوفو كم الخبرات فى شتى المجالات تركونا بسبب هذا التقصير فى احتواءهم ….
      نسال الله السلامة و العافية لنا و لاهالينا و أهاليكم جميعا ياااا رب …

      1. يا ود بوتين كلامك جميل ومنطقي وصااااح 100% أها دى الحالة الوصلت ليها البلد مع الناس ديل !! نعمل شنو ؟؟ مخير الله .. ربنا يجيب العواقب سلييييمة ويخلصلنا من النحنا فيهو ويولي علينا من يصلح قولوا آااااميين ..

  8. مبروك يا العبيد .. كالعادة لقيتني نائم .. برضو يا جنوبي مشيت الفطور مع الفرعون ؟؟ انتوا شغالين طلبه ولا شنو ؟؟!!

    1. أخوي ود عم سام خف شوية على أخونا جنوبي دا !! والله أنا تب ما برضى فيهو .. سبحان الله بدون ما نتشاوف أحس بأني بعرفوا من زماااان .. ويا جنوبي يا خوي النصيحة ليك يا الله أولاد بمبه ديل عاملين زي الياي لو دستو بي رجلك بقعد خامد وساكن ، أما إذا شلت رجلك منو بطير فيك يكسر وشك فأعمل حسابك من أولاد بمبه ديل ( ما أعمم لكن الغالبية العظمى منهم كده ) .. سلاااام ..

      1. معاك في الغالبية العظمي دي ..
        قال لقيتني نايم قال ! ما قتو امريكان ؟

      2. والله يا نانو الفراعنة ديل الواحد لو دقنو جاره بالواطه يا هو فرعون فرعون ، اصلو دي جينات بتولدوا بيها ، وأنا المحيرني جنوبي دا لسع ما اكتشفهم ؟؟ انت عايش في العصر الحجري يا جنوبي ؟ معليش أخونا نانو .. قسوتي دي علي أخونا جنوبي ،، انا عايزو يصحي .. ويا جنوبي والله الفراعنة ديل بنظروا للسودانين من فوق وبتعالي ، اسمع كلامي ،، دخل للمصري الجزمة في خشمو بحترمك ،، خلاف كده سجمك ؛:؛:؛:

      3. طبعا يا نانو وامريكي انتو مصرين علي رايكم رغم اني بقول ليكم انا معاشره كم طاشر سنة , هل معقول المدة دي كلها ما يكون فيها مواقف للامتحان ومعرفة الزول ؟
        بعدين النظرة دي يا امريكي انت البتتحكم فيها وانت البتخلي الناس تنظر ليك كيف ! بقيت عالي , غصبا عنهم بعاينوا ليك من تحت ولو الزول بقي واطي حتي بني جلدته بنظروا ليهو من فوق …

      4. يا جنوبي ما تعمل لي فيها شفت ، ديل التقول عليهو موسي يطلع ليك فرعون ، يا أخي دي جينات بيتولدوا بيها ..

    2. أنتا يا أونكل سام جنك نوم؟؟؟ طيب بتصحى الساعة كم عشان نخلى البروف يعمل ال post فى وقت مناسب !!!!

      1. والله يا بوتن يا أخوي انا متفرغ للعيال وبساهر معاهم في المذاكرة والاستيقاظ با كراً .. ( عليكم الله كلكم وختيتها ليكم في ذمتكم ان تدعوا لنا بالتوفيق ) اها الوقت البصحي فيهو بكون جنوبي ماشي يفطر مع الفرعون .. والله الكلام دا بالحيل واجعني

  9. ودّارة الصحة دي وزيرا منو ؟ في زول بتقصي عن نفسه كمان !؟

    1. جاوبى انتى نيابة عنى , حد يقدر (يقصى) نفسو !!؟
      كان نفسى اكتب شئ تانى لكن خفت !
      وى وى وى

      1. ههههه اعتبرني قريتو ,, احححححححح ما منعونا وكده ,,

      2. ههههههههههههههههههه,,
        علا بارك الله فى ركس ! طلع ثعلب صحى !
        سُب عليو المطموس

  10. طبعاَ ما حأتكلم في وزارة الصحة و لا في حال الصحة في البلد دي ، لأنني زي ما عارفييين يا أحباب ماااا برضي في وزير الصحة. حييييي انا، أقول شنو يا ربي؟ وااامعتصماااااااهً!

    1. اسمعي دي يا نونا .. ( تتذكروا حقت التيس ؟ تتذكرها يا جنوبي ؟؟ ) .. اها دي واحده تانية وحقيقية كمان ، يعني قصة واقعية .. طبعاً انتوا كلكم عارفين الفرق بين دبي والخرطوم في كل الخدمات ، وخصوصا الخدمات الصحية ( انا بقول في الكلام دا وفي القلب غصة ) !! المهم حبوبتاً لينا ( ما ح اوريكم المنطقة يا نانو وعبيد ، اصلو الخواف ربي عيالو ) حبوبتنا دي عندها بنت في دبي حامل ، رسلو للحبوبة عشان تجئ تنفس بتها في دبي ، الحبوبة دخلت المستشفي لقتها زي القصر الجمهوري ،، انبهرت عديييل كده ،، نفست بتها ورجعت السودان. .. طبعاً شمارات النسوان انتوا عارفينها .. اول واحدة لاقتها سألتها .. اها يا حاجة دبي كيف ؟؟ قالت ليها دبي .. دبي .. والله عندهم مستشفي … يحملني خوجلي سااااااي ……

      1. هوووي يا أونكل سااام حاسب علي ألفاظك وشوووف إنت بترد لي منو ؟؟؟ دي ما بتي نونا أعمل حساااابك !!!

        س سوأل: إنتو وين كتمت كتمت ؟؟

      2. اخوي أمريكي ،بخصوص ذكر الأسماء فانا علي يقين بان في هذه الحكومه ناس صادقين وفي المعارضه برضو والسودان بلدنا كلنا والنقد الصادق سيجد دائماً من يحترمه .
        وبخصوص ذكر الأسماء فلا أظن أننا وصلنا الي هذه الدرجه ونحن كسودانين نختلف تماماً عن بقيه الدول العربيه الأخري والتي بمجرد الاشاره بشي او حتي ذكر شي(برنامج قلم رصاص) يغطسوا ليك الواحد في خبر كان،فلذلك نحن بنحترم شهامتنا في مثل هذه المواقف ودي ذكرتني لمن كنت في الثمانيات والدراسة خارج السودان ايام حكومه نميري رحمه الله عليه وكنا ما مبسوطين منو خالص وتبين لنا من بعد بانو كان إنسان وطني بالرغم من أخطاؤه في بعض الأشياء ،المهم كان في واحد طالب عربي وبقي يشيل وينبز وكامل ديفيد والخ وقمت قلت ليهو وبرضو عندكم في حكومه بلدكم أخطاء كثيره وفجاه أشوف ليك الزول جري بعيد وخايف ،اليوم التاني قلت ليهو واشمعنا،
        أرجو من الناس الصادقين في حكومتنا النظر فيما تقدم أعلاه من قبل الواوات وبرضو يشاركونا في المدونه ولهم تقديري واحترامي

    2. نونا،،،، لقيت (عمرااااااه) ما منو فائدة ،، قبلتا على (معتصمااااااه) ؟؟؟

      1. قبلتي لو سمحت ، في فرق كبييير و لا انت من أهلي؟

  11. تصحيح كامب ديفيد،من الكيبورد،حسه الصق ليهو واو،ههه

  12. الليلة الطاهر ساتي كتب مقال في الراكوبه بعنوان زول من الوطن الجميل بتكلم عن أ.د. ابشر حسين وعيادته الخيرية في بانت , والله حاجه كده زي الخيال . غايتو الليلة شوية كده اطمنا انو السودان لسه بي خيره رغم أنف مامون حميده ..
    صحي زي ما قال المثل : لو مات مؤتمر وطني .. زي الما حصل شئ .. ولو مات شماسي فراقو قااااسي ده ما من ناسي ..

    1. هازول .. جنوبي الليلة بقي نانسي عدييييل كده ..

      1. نص واحد !؟ هيييييييييييييييق …
        شكلكم شلتوها صباحى …

      2. شوفوا انتو الاتنييين المطاميس ديل ! واحد فيكم تاني يجي حايم قدام واتسابي ده بعد 10 بالليل بكسر ليو كرعينو , اديتونا السهر ! سهر الجداد ان شاء الله ,,

      3. اخبار الفرعون شنو يا جنوبي ؟؟

      4. هههههههههههههههههههههههههههاااى,,
        الساهر بيك منو !!؟ انا طلعت من 12 شووكة ,,
        لكن المغربى كيف معاك ؟
        هيييييق

      5. ههههههه والدخلتهن علينا برضهن مرقن معاك الساعه 12 شوكة ؟ شوكة التطعنك آآ مسنوح ..

      6. امريكي شان ما ( تدخّل ) دينا بالفرعون ده , الزول ده قعد يدفع معاي في كل شئ شباب الحوادث بنك الثواب و..و.. واول امبارح دي لمينا قروش شان نسفر سوداني عيان دفع معانا ! نات مااالك حكاك كده ياخ !

      7. لن اتزحزح عن قناعاتي .. برضو فرعون !!!

      8. هههههههه لايوووووق انت ياخ ! صحي امريكي !
        اها وان شاء الله مشيت سلمت علي كارتر , قالوا عندنا اليومين ديل ,,

      9. والله نحنا الحاجة بنتفها تف ( كسر التاء الأولي وفتح الثانية ) لمن نحقق هدفنا ،، أما بخصوص كارتر .. الدلوكة عندو ليكم مفاجأة قنبلة بس اترقبوها وعلي ضوئها سوف يتم مسح كل مساوي ربع قرن من الزمان ، يعني كده عفا الله عما سلف .. هل لاحظتم اين الصقور التي نحيت ، انها تفرغت الي إدارة أعمالها كان شيئا لم يكن .. ترقبوووووا …

      10. لن يحدث ما تتوقعه يا امريكى ,,
        لن يحدث ابدا ,,

  13. كتمت على استحياء

    1. الغلبان كيفنك .. كان رجعت السودان اعمل ليك مستشفي خاص , ده الشئ الوحيد اللا بضايقوك فيه ناس الصحة ولا ناس النفايات بس تعملك باب قزاز بره وتشحد من عباس الحداد جاركم اسطوانة اكسجين وجيب حسن المكنيكي يشتغل اخصائي باطنة وعمر الكهربجي بتاع اعصاب وشوف ليك سطلنجي يشتغل تخدير وعمك علي المنجد بتاع جراحه ولاااا في زول بسألك من شهاداتم !!

      1. انا يا خوي تربية حبوبات علاج بلدي بس واكان دخلت في غيبوبة ودخولني واحده من المستشفيات اياها وصيتي ليكم وليهم (اهلي) لاننا بروتاريا زي ما يقول عمك فلادمير ما تدوهم التكتح وخلو ليهم الجثة ان شاء الله تغني ليهم

  14. اقتباس :
    ” 01-22-2014 06:46 PM

    الخرطوم: أسامة:

    وجه وزير الصحة بحكومة الخرطوم مامون حميدة بإغلاق المستشفى الخرطومي الذي توفي فيه مواطن شاب نتيجة لخطأ طبي فادح بحسب إعلان طبيب كان مرافقاً للمريض قبل مفارقته الحياة، وذلك إلى حين إشعار آخر، بجانب تشكيل لجنة تقصي لمراجعة الأوضاع بالمستشفى الذي هو أحد استثمارات هيئة نقابية بوزارة مرموقة بولاية الخرطوم. وبحسب المصدر إن الوزير أبدى اهتمامه بملف القضية ، وفي ذات الوقت جددت أسرة الفقيد تأكيداتها بمواصلة إجراءات تقاضي المستشفى، وأبلغ الفاضل محمد خير ـ أحد أفراد الأسرة ـ الصحيفة أمس أن أصدقاء الفقيد أعلنوا تبنيهم حملة إعلامية عبر مواقع التواصل للتعريف بالقضية وأبعادها ولفت الأنتباه للأخطاء الطبية.

    اخر لحظة ”
    اعلامنا زاااتو بقي زي الحكومة شغال بفقه السترة !!
    مستشفي كتل زول والتشريح قال خطأ طبي يرقي لدرجة القتل العمد , والطبيب الشرّح الجثة قال ما قادر يصدق انو العملية دي عملا طبيب ! برررضو الاعلام يقعد يتمايع و( … المنعوني منك ) ويقول لينا مستشفي خرطومي وتابع لنقابة مرموقة ! ما تجيبوا اسمه يجيكم البلاء الياخدكم وياخدو في ساعة واحدة ! خايفين علي سمعته يعني ؟ قولوا اسمو خلوا باقي المساكين الراقدين فيهو ديل يجروا يمرقوا قبل ( …. ) ام حِلتم ..
    اخخخخخخخخخخخخ بس لو كان خليتوني اكتب محل النقط نقط ديل , كان اتفشييييييت …

    1. وصلت ,, وصلت الفكرة يا جنوبى مافى داعى تكتب !!!

    2. حاجه تحير جد يعني مستشفي خرطومي وتابع لنقابه وبيقول باااع،. غلووووتيه دي ولا شنو

  15. يا جماعه ما عرفتوا حل الغلوتيييه،اسم المستشفي شنو وعشان الواحد يعمل حسابو

    1. هووووي يا ود العبيد أوووعك تفكر ترجع تشتغل في السودان بالوضع الراهن دا !! يعني لو أنت مااااهر في شغلك الأمكانيات بتخذلك !! ما سمعت بي قصة الدكتور الكان بعمل في عملية والكهرباء قطعت وما عندهم (مولد إحتياطي لغرفة العمليات) !! مما ترتب عليه إنقطاع الأوكسجين خلال العملية وبالتالي مات المريض !! وكان قد دخل بي كرعينو للعملية ( الله يرحمو ) .. لكن أهلوا إتلموا ليك في الدكتور وعلقوهو علقة جاااامدة ( جبطك جبطك ) – على قول جنوبي – لحدي ما جات الشرطة وفكتوا منهم (بين الحياة والموت) !!!

    2. لسه ما عرفناه لاكين يبقي لي محتفظين بالاجابة شان دايرين يجيبوا السؤال ده في مسابقة شركة زين والجائزة تكون عربية !!!هههي هههي
      قبل شهر تقريبا مستشفي الزيتونة حق ودّير الصحة ذاااتو ! عمل عملية لمريضة عندها خشونة في الركبه , المريضة بعد فاقت من البنج قالت ليهم : هي سجمي دي مااا كراعي السمحه !! ولاااا قفلوا الزيتونة !!! صحي كلام جبرا بعد كده الواحد يشيل معاه قلم شيني ويعمل علامة في الحتة الداير يعمل ليها عملية !!
      انت يا عبيد في بلدكم ديك لاقاك واحد اسمه د. حسان الفيل ؟

      1. اخوي جنوبي أبدا والله ما سمعت بالاسم دا ولكني ح اسأل ليك،هل هو طبيب صغير ولا قديم وكان صغير ومتخرج في الخمستاشر سنه الفاتت فما ح اعرفو ولكني برضو ح اسأل ،
        انت اسم المستشفي عرفتو يا جنوبي ولا لسه،
        ااوه نانو يا دفعه والله كلي شرف واعتزاز للعمل في بلادي اذا ربنا سهل الأمور وبالمناسبه كيف القي رقم موبايلك اذا سنحت لي الظروف بالعمرة او الحج او العمل بالسودان

    3. الحبيب طارق … سلام…
      للاسف انات عارف الطبيب والمستشفى بلكن منتظر الحيكومة تعلن عنو او بعلن انا !!
      ولقيت تلفونك ورجعت ليك لكن تلفونك مقفول !
      ورسلت رسالة بس ابت تمشى !
      عل المانع خير …

  16. قالوا مستشفى السلام تبع نقابة عمال وزاره التخطيط العمراني

    1. قلت وزارة شنو ؟؟!!

  17. وزارة الصحة الإتحادية والولائية تعلن عن قبول دفعة جديدة من السباكين والميكانيكية والنقاشين والبنايين للتعيين كأطباء تخصصيين في التخصصات الآتية :-
    1.المسالك البولية ( المؤهل العلمي – شهادة خبرة كسباك لاتقل عن ثلاث سنوات – شهادة من المحلية بسداد جميع الجبايات المقررة 2.الجراحة ( المؤهل العلمي – شهادة خبرة ميكانيكي لاتقل عن ثلاث سنوات في مجال عمرة محركات السيارات وتغيير وتوليف قطع الغيار – شهادة من المحلية بسداد جميع الجبايات المقررة
    3.جراحة التجميل ( المؤهل العلمي – شهادة خبرة نقاشة أو بناء أو لياس لاتقل عن ثلاث سنوات – شهادة من المحلية بسداد جميع الجبايات المقررة
    المؤهل العلمي لايشترط أن يكون من إحدي الجامعات أو مراكز التدريب بالرغم من سهولة إستخراج ذلك إن سمحت ظروفك المالية وإن لم تسمح يكتفي بشادة صادرة من إحدي الورش أو المقاولين أو من أي جهة تتمكن من استخراج المطلوب منها .. تقبل الطلبات بمكتب الوزير الولائي أو بأحد مستشفياته أو بمكتب الوزير االإتحادي وبكل المستشفيات التابعة له بكل الولايات أو بمكاتب أصحاب العمل بالخرطوم حيث يشارك بعضهم في المستشفيات الخاصة وكافة الفرص متاحة طالما ان النظام والدولة توفر المناخ الطارد لكل الكفاءات الوطنية .

    1. اووووووو زُمُل !! فيها باقي ولا طفيتا ؟

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: