مش سؤال؟

مش سؤال ؟
25 يناير 2014م

العبدلله مولع منذ الصغر بقراءة السيرة النبوية فقد قرأ منذ وقت مبكر سيرة بن هشام وسيرة بن إسحق و السيرة النبوية لابن كثير وزاد المعاد لابن القيم وامتاع الاسماع للمقريزي وعدد من كتب السيرة الاخرى ومن فوائد الإطلاع على السيرة النبوية أنها تساعدك على فهم كتاب الله تعالى، فقد نزل القرآنُ تعقيبًا على أحداث حوتها تلك السيرة العطرة فقراءة السيرة تساعد على فهم العقيدة الإسلامية بطريقة عملية من خلال التعرف على السلوك العملي للنبي – صلى الله عليه وسلم – ومن ثم الإقتداء به وبصحابتة علاوة على أنها أنها تمنحك وجبة ثقافية دسمة تتعرف من خلالها على أوجه حياة المسلمين والعرب عموماً مما يسهل على الشخص المقارنه بين تلك الحياة والحياة التى نحياها اليوم .
أيه لزوم هذه المقدمة ؟ أقول ليكم :
العبد له في كل ما قرأه في كتب السيرة لم يرد بصورة تدعو إلى التوقف عندها أن هنالك (عدداً) من الصحابة أو التابعين وصفوا بان لديهم زبيبة على جباههم (علامة صلاة) وهي بقعة مستديرة سوداء يقال أنها نحدث من كثرة السجود لله سبحانه وتعالى على الرغم من أن هؤلاء الصحابة والتابعين كانوا يسجدون على الحصي والحصير لا على السجاد الفاخر الذي تفرش به معظم المساجد الآن ،
لقد كان العبدلله يسائل نفسه وهو يتمعن في ظاهرة إنتشار هذه العلامة : (الحكاية دي تكون من شنو؟) حتى جاءت الإجابة عبر تحقيق قامت به صحيفة (حكايات) مؤخراً جاء فيه أن هنالك سوقاً رائج لعلامات الصلاة الصناعية (حسب الطلب) يقوم بها بعض الاشخاص مستخدمين في ذلك (نوى التمر) وقد أكد هذا التقرير الذي نشرته (حكايات) الشكوك التي كانت تساور العبدلله بعد أن تفشت هذه الظاهرة وصار كل من يظهر على شاشات التلفاز وكل من يقف خطيباً وكل من يعين خبيراً وكل من ينصب وزيراً (يقتني) هذه الدائرة السوداء التي من شأنها أن تكسب حاملها الوقار وتعطي مشاهديه الإنطباع بالصدق و الأمانة والتدين .. خمسة جنيهات هي كل (المسألة) تعطيها (لصانع العلامات) تخرج بعدها وأنت كامل (الصلاح) سيماؤك في وجهك من أثر (النواة) الشئ الذي من شانه أن يبعد عنك كافة الشبهات ويسهل لك خداع الناس غير آبه بأن هنالك إله لا يمكن خداعه !
المسألة الثانية التي لم (تقع في رأس العبدلله) هي حكاية إنتشار عيادات (خبراء) العلاج بالقرآن وإستخراج الشيطان إذ ليس هنالك في كل كتب السيرة النبوية ما يشير إلى أن هنالك من الصحابة أو التابعين من تخصص في هذا الأمر حتى إشتهر به وسط الناس (وعمل ليهو عيادة وكشف) ولو كان لأشخاص أن يعالجوا بالقرآن ويستخرجوا (الشيطان) حتى يعرفوا بذلك لكان صحابة رسول الله صلى الله عليهم أولى بذلك لكن مع ذلك إنتشر هؤلاء القوم حتى زاحمت عياداتهم عيادات الأطباء والمتخصصين بل أنهم أصبحوا يعلنون عن بضاعتهم عبر الصحف والفضائيات ويضعون أرقام هواتفهم لجذب (الضحايا) دون رقيب أو حسيب حيث إختلط حابلهم بنابلهم في ظل عدم إخضاعهم لأي نوع من الإختبارات التي تؤكد كفاءتهم للقيام بهذا الأمر أو حتى التحري عن أخلاقهم (إن شاء الله فيش وتشبيه) حتى يتم فرز (الشيخ الحقيقي) منهم من بتاع (نواة سوق ليبيا) !
كسرة :
لماذا لا نجد علامة الصلاة عند (النساء)؟ مع أن بشرتهن أكثر حساسية من (الرجال)؟ .. مش سؤال؟
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟

Advertisements

102 تعليق

  1. البرنجيه حقت جنوبي والله العظيم

    1. نفسي بس اعرف الليلة جنوبي ده ليه ما روح الفطور مع الفرعون ؟؟!! مبروك يا جنوبي .. مبروك علي انك اتحررت من الفرعون !!!

      1. فعلا جنوبي جازفها اليوم وعلي الريق صباحا ويستاهلها ،مبررروكه يا جنوبي يا حبيب الكل

      2. لا اعترف ، كان في ربكة ،، لكن برضو مبروك ..

    2. الليلة قصدوني عديييل .. لاكين نحنا ناس مؤمنين وعسي ان تكرهوا شيئا هو خير لكم ..
      وبرنجية الصدقة دي ماااا دااايرا ..

    3. I gave u ! This really un fair !
      حرقتني بالجد ياخ والله!

      1. لالا انا زول مسامح !

      2. انا برضو واجعانيي شديييييد ،لكن دا كج عجيييب خلاص يا جنوبي ودا كلو عشان تزوغ من الفطور مع صاحبك ولكن ولايهمك يا حبيب الكل

      3. ها ااجنوبي أخوي ، انت جنس الرطانة البترطنه حبيبتنا نونا دي ( علي قول نانو ) دحين فاهمها يا مرسي ؟

      4. نونا دايرة تتدّول القضية ! ونحنا ناس متعودين نحل مشاكلنا تحت ضُل شجرة !
        انتو نانو وينو الليلة ؟ والله ابيت برنجية العبيد عشان نانو ده ما يحرجني ! مسنوح ! امانه ما كنت اتفسحت فيك الليلة لاكين تأتي الرياح بما لا يشتهي المكوجي ,,,

      5. I mean ( I gave up ) that is really unfair. سوري يا شباب

      6. زيك زي احزابنا كان ما فزتي بيها معناها مخجوجه , يسمك ! تباركي بس ..

      7. Bad luck. Continue. Next time you will attain it

      8. We wo’t believe me! It is not just a bad luck , it is a conspiracy ! Me and ganubi are being targeted !
        لكن معليش! ، والله انا سمعت بالشي دا لكن ما كنت مصدقاهو، المهم بجيب نتيجة و لا بشتنة ساي

      9. هههههه شوف دايرة تضمني في صفها !!
        انا حقتي دي قضاء وقدر ماااا تشربكي الامور

      10. Haha.I thought we were friends .
        “Blame the status quo”

      11. Genubi is a nice person. I am on his side. I recently got to know him. He is a good sport

      12. Forbidden to speak English , please go back to our language .

      13. هز سايد هز سايد ! بكرا بجي الخريف و اللواري بتقيف! لكن ما رديتوا علي ، كلام البروف دا حسي بالصح؟

      14. لخبتي الحكاية يا نونا ، جيبتي لينا الباعوض في الشتاء وعايزه تتملصي منها ؟

      15. شكرا يا عبيد علي الاطراء واتمني اكون دايما عند ( ظن حسنكم ) ..
        والله ي امريكي ما عارف حصل ليهم شنو الاتنين ديل ؟ بس الليلة كل شئ مااا طبيعي !! احييييييييا يا برنجيتي !

      16. الظاهر عليك انت زول تعيس ، اعد

      17. انت يازول بقيت كوز ، حسن ظنكم علي وزن حسن سلوكة

  2. وماننسي صيام الاتنين والخميس خمشة تراب في الشفتين وخلاص والفطور في مسجد …….
    لكن اتخيل لي دا كان زمان بقوا ما محتاجين الايامات دي!!!

  3. فعلا كلام غريب يا بروف وخليك من علامه الصلاه المصطنعة ووو كمان كلمه حقيقه(حقييقاتان)دي لا في حديث نبوي ولا سيره ولكنها استهلكت شديييييد برضو ،الكلمه دي حقييقاتان بتنرفزني شديييييد

    1. اتاريهو ربع البلح وصل 150 جنيه !! الله يجازيكم يا كيزان .. اها يا نونا البروف قال انتوا بشرتكم حسااااسه .. ليه ما بتظهر ليكن علامة صلاة .. هس يا جنوبي ولا كلمة !!

      1. أكان ظهرت البشتغل بينا منو؟ دي لزوم الشغل و التمكين و ديل اكتر ناس اضطهدوا المرأة . بالعكس لو لحقتي عمليتها، دقستي! يشكروك آييييي لكن الشغل مواصفاتو عكس كدا تماماً، ولا شنو رأيكم؟

      2. اها يا امريكي ! شفتا الفلّيق المن بعيييد ده كيف ؟
        ما قت ليك سلييييييطه !

  4. سيماهم في وجوههم يعني الصلاح والقبول ظااااهر في الوش وتلقي الزول الخاشع المتعبد صحي صحي وشه منور وتعجبك شوفتو ,, وحتي كان الزول اسود مني برضو وشه تلقاه فيهو نورة الايمان ..
    اها قاموا تجار الدين المعفنين غيروا تفسير الاية عشان صعب جدا ينوروا وشهم قاموا فسروها لينا بي النقطة السوداء ! هي نقطة سوداء كيف تكون صلاح !!؟
    علي عثمان ده ظنيتو بيدعك وشو دعك في السجود !!
    بعدين حريمهم ديل ناقصات شنا شان داير تعمل ليهم سواد في وشهم كمان !؟
    الغريبة ناس انصار السُنة ( بضم السين ي عبيد ما تكسِرا ) ما عندهم علامة الصلاة !

    1. انت يا جنوبي ما قالوا ليك هسسسس ! هههههه

  5. قالوا اتنين من اولاد الجماعه اياهم مسكوهم في مطار الخرطوم طالعين بي اكتر من تلاتة مليون دولار كااااااااااش دولار ينطح دولار !!
    اييييييييييييييك هسي كان فكوها تعمل كم علامة صلاة !؟ يمين ما يفضل فاسد في البلد !!

  6. انت يا بروف دقة قديمة لامصاصة تمرة ولا شجرة نخيل هاكم وصفة يا جنوبي ( والله انا ماعملتها ) لكن استعملتها كعلاج للرطوبة في الركبة وآثارها للان موجودة وأنا سمعت بيها في بلاد العم سام قالوا الكيزان بستعملوها في الجبهة عشان علامة الصلاة يعني لزوم الشغل ، يعني أوباما ذاتو عارف الاعيبهم ، يعني الكيزان شهرتهم عالمية ، بس ماعليك إلا تجيب ليك فص توم وتهرسو حسب الحجم والطلب وتضعو في المكان المناسب في الجبهة ، وتربطوا بقماش للصباح ( وتفكوا قبل ماتمشي الجامع لصلاة الصبح ) والله البشوفك يقول كنت معتكف في الحرم المكي عشرات السنين ، طبعاً المكان المناسب في الجبهة حسب وضع العمة ونوع البيزنس والدابة ، اصحي يا جنوبي

  7. يا أمريكي ويا جنوبي الليلة ماالكم قمتوا على بتي نونا ؟؟ أنا تب ما برضا فيها !! لقيتوني الليلة مشغول من الصباح في سمنار وقعدتوا تتسلطوا عليها .. أها أنا جيت أعملوا حساااابكم .. ومرحبتين بي بت السودان منورة وييينك من زمااان ما سمعنا منك حاجة ؟؟ وما أنسى أبارك ليك يا جنوبي البرنجية ( تقطعا بي عرق العافية ) .. سلاااااام ..

    1. إنشاء الله بي عرق النسا

      1. الحاضر يكلم الغائب وأي زول فيكم اضانو تقيله قبال ما ينوم الليلة ينقط ليهو نقطتين زيت زيتون في كل اضان ،، بكرة الساعة 8:30 مساء خطاب بشبش

      2. ههههه بركة عجبني ليك يا جنوبي ، شان تاني ! والله حقروني يا نانو اخوي ، لكن برضو انا المستغرشة رقم واحد، انت كابس براااااك مع ناس عبيد ديل يا جنوبي كان تشمها قدحة!

      3. الحق ما علينا يا نونا الحق علي الفرعون لأنو ماخدش جنوبي ع الفطور الليلة

    2. سمناااااااااااار ! قال سمنار قال والله برنجيتي دي لو كان ثبتت كان بقيتو ليك سم فار , إلا مخير الله , البرنجية دافقت !!

      1. تاني رجعت يا جنوبي ما قلنا ليك معانا جنس لطيف خلي المخاشنة دي ، سامحينا يا نونا

    3. جزاك الله خير (مابتاعة الكيزان) كنا شغالين شي امتحانات وشي معاينات بس ما بندور نتجرس جرسة الامريكي والنصحية لله متابعين ما انقطعنا منكم أها نعمل شنو غير كل يوم يفقعوا لينا مرارتنا

      1. تسلم مرارتك يابت السودان ، لكن انا مازول جرسة تب ، بالتوفيق إنشاء الله .

      2. هههههههههه,,والله عرق النسا بتاعك دا اخير منو الدفاق !
        دفقت مويتى على الرهاب ,
        كع

      3. انتظرونا اليوم الساعة 8:30 مساء اليوم .. سوف يتم مسح كل بلاوي ربع قرن من الزمان

      4. الشافع البوسخ في روحه ما بغسّل نفسه ! بغسلوهوا يا امريكي !!
        عمرنا ده كوووولو بنعرف انو المعارضة تقدم رؤي اصلاحية للحكومات لاكين حكومة تقدم رؤي اصلاحية للمعارضة ! يطرشنا مااا سمعنا بيها قبل ده !!
        يلا 8:30 قرررررررررررربت كان تجيب مريسة تام زين !

      5. انت من زمن مريسة تام زين يا جنوبي .. اييييك انت دقة قديمة خلاص ، الشغلانة بقت مستورد وأشكال وألوان انت ماسمعت بي كافوري يا أخوي ، هاازول انت قاعد فوق اضنيك، نفسي اعرف الكيزان اللقفوا قورشنا ديل ، 24 سنة لقف لقف لقف الساعة 8:30 مصيرهم ح يكون شنو ، تاني نرجع نقول عفا الله عما سلف ،، الله يطلع روحهم يا أخي ، والله انا أصلو مابعفي حقي ، الظريف انو المدام قالت لي عشان تقيف تتخاصم مع واحد يوم القيامة الصف بكون طوييييل ، قلت ليها والله إنشاء الله اقيف لي يوم القيامة ، حقي اصلو مابخليهو حق البترول والدهب ومشروع الجزيرة والاقطان وسندس وهيثرو وكل كسرات البروف وعيييييك ، إلا يا جنوبي اخبار الفرعون شنو ؟! كسرة : بعد الساعة 8:30 ممكن نتعارف علي المكشوف نتلاقي انا وجنوبي ونسوق معانا نونا والمندهش وبت السودان والغلبان وكل الجماعة ونمشي نزور ناس أبوروف يعني كده نعمل رحلة ، ما خلاص تاني مافي كلاب امن ،، اللهم اجعله خير ..

      6. والله مالا ظنيتني! الجماعة ديل كوولللللهم برا السودان ، و انت يا خوي محصصصصن بي سفارتكم ، انا مسكيييييييين! إنشاء الله أتعرف عليكم ،بعد عمر طويييييييل، بعد أشوف الجماعة بي عيوني ديل وراء القضبان ، بعدييييييييييين أكان الله حيانا!

      7. بالجماعة الاولى يا أحبااااااااب ، قصدي ناس عبيد و جنوبي و شمباتي و نانو و الغلبان – رد الله غربتو- و من سعى سعيهم ( حلوه دي عجبتني) ،اما الجماعة التانية ( فلا يخفى عليكم) ما قصدي بيها زول ! ههههههه

  8. يا بروف طالما أنك مهتم بقراءة السيرة العطرة ، فأني أرشح لك كتاب ( الرحيق المحتوم لصفي الدين المباركفوري ) أحد علماء الهند رحمه الله، إن لم تكن قد قرأته حيث لم تذكره من ضمن الكتب التي قرأتها !! فهو كتاب باللغة العربية ويتميز بأنه شامل ومختصر وبه معلومات ثرة وغزيرة عن السيرة النبوية .. وبالمناسبة أنا أيضاً مهتم جداً بهذه الدرر ولي (23) حلقة سجلتها للتلفزيون (قناة ساهور) بعنوان قبسات من سيرة الحبيب المصطفى صلى الله عليه وسلم .. وأنوى تنزيلها على اليوتيوب وسأزودكم بالروابط عنما يكنمل العمل في تنزيلها بأذن الله .. ما تقولوا بعمل دعاية لي نفسي !!!! .. سلااااام ..

    1. لا لا حاشاك يا نانو

  9. الناس البطلعوا الجن ديل مره في بيت مسكون في حلتنا صاحبو مشي جاب جماعة من المسجد الجمبنا , خمسة ستة كده معاهم شيخهم , دخلوا مع المغرب كده وبقوا يقروا ساااكت , شوية كده بدأ الفلّيق بي حصحاص صغير , وناس الحلة واقفين بره خشم الباب يراقبوا , والجماعه كل مره يرفعوا صوتهم في التلاوة مع بعض الحشرجات في الصوت من بعضهم ( اظنهم قلبهم ما ثابت ) , وكل ما يزيدوا في التلاوة يزيد حجم الحصحاص لحدي ما بقي الفلّيق بالطوب عديييل , اصحابنا جوا نابلين من جوه زي حصين السبق , والله فتحوا فتح , منهم من تمسك بمصحفه ومنهم من فدي به نفسه , ويا روح ما بعدك روح …
    الغريب بعد كم يوم في شاب صغير من الحاره الجمبنا جاء لناس اهله ساكنين حلتنا وقال ليهم انا حلمت امبارح جاني زول في المنام وقال لي في حلتكم دي في بيت ساكنه جان , أمش طلعوا ليهم , ودوهوا للبيت المسكون دخل اخد كم ساعه وجاء طالع قال لسيد البيت خلاص الجان طلع , سوق اولادك وخش ! ومن يومها سيد البيت ما اشتكي تاني !!
    والقصة دي حقيقية ما خيال والما مصدق كله يجيني في القمردينة الخفية اوريهو اسم حلتنا والحارة واسم صاحب البيت المسكون واسم الجامع الجابو منو الشيوخ حصين السبق النفعتهم جلاليبم القصيرة في الجري واسم الولد الطلّع الجان من البيت .
    برضو عندنا في الحلة واحد كده عنده هوس شيوخ وما شيوخ وعنده حوش فاضي جمب بيته بجيب فيهو شيخ يقرأ لحريم الحلة نظام بعالجن يعني , الشيخ ده ( مجازا يعني ) بلم الحريم في حلقة ويقعد يقرأ ويلف عليهن يشلتن بي رجلو ! آآي والله يشلتن عديييل .
    الفضح الشيخ ده انو مره نسوان الحلة اقنعن أمي انها تمشي معاهن وقعدن يقولن ليها والله شيخ ما شاء الله , امي صدقت يا مؤمن ومشت , وهو بيقرأ ولافي للتعترو شلّت أمي , امي وهي قايمه من الواطه شالت معاها الزول ده من كرعينه ولط دقت بيهو الواطه , قالت ليهو يا ود ال … و يا … ويا … , الزول ده طبق شنطتو ويا فكيك , ومن اليوم داك نسوان حلتنا مسكينات ما لاقيات زول يعالجن ,,,
    ودي برضو حقيقية والله …

    1. عشان كده تاريك يا جنوبي هارينا فليق ؟؟

    2. كدي شوفوا الزول المنتشر في الفيس بوك ولامي في الناس عضعيض ويقرم في كرعين الناس وقال بطلع النبت وعين السمكة من جذورهم – موش زي الدكاترة الحاسدنو ديل !!!!!!

      1. شحدت ربى يلم فى جنوبى يعضيهو من نخرتو ويمرق الخاشى فيهو دا !!

  10. آآآآآآآآآآآخ يا برنجيتي الدافقتي ,,,

  11. حل الغلوتيه بتاعه مسابقه العدد السابق:مستوصف الثناء

    1. اي سوري انا أمس قلت السلام ( دا ختِف الكلام) أسموا الثناء في الامتداد و هو فعلا تبع نقابة عمال وزاره التخطيط

  12. المندهش :
    الريده بين الناس صلا
    رديتنا الحق حصلا
    ليه يعنى داير تفصلا
    الدنيا حب ومواصله
    بقيت ما زى زمان
    علمتنا الحب والوفاء من نار جفاك ياجميل كفا
    بقيت مازى زمان

    1. يا أخونا المندهش ريدتنا الحق حصلا ASAP

      1. يا العبيد ما قلنا ليك خلي ( الفلفسة ) دي ، اتمني ان تكون في القريب العاجل ..

      2. يا أمريكي برااكم هبشتوني،اسأل نونا

    2. لا لا ياخ ,,
      ألحبيب المندهش متوفر فى الفيسبوك وعندو صفحة جميلة جدا ,,
      كدى اتصل عليو وقول ليهو غنيتك دى ,,
      وبالمرة شوفوا لينا خبر (كتلونى ولسه حى) !
      قصتو غريبة وعجيبة يا وهيبة !!

      1. كتلوني ولسه حي اتصلت عليهو الصباح لقيتو رجع وقال قعد يزاكر في المواضيع شان ما يجي خاشي غلط ! كأنه يوم دخل صاح !!
        المندهش مالو قاعد في وش الكتاب زي ما قال نانو ! مايجي هنا جوه الكتاب !

  13. عايزنك تكتب لينا عن اولياء الله والشيوخ الافاكين الذين لا يوجدوا في بلد اسلامي الا هذا البلد الطيب

  14. العلامة دي ماليها أي علاقة بالاية ” سيماهم في وجوههم من أثر السجود ” لانه هنا المقصود ظهور الخشوع على الوجه كله , العلامة دي معروفة من زمان الناس بحكوها حك بنواة التمر , لكن في ناس بتجيهم من نوع المصلاية , لكن هي ماليها أي علاقة بالتقوى أو أي حاجة , بس الناس سرة عليهم وبقى أي زول عنده العلامة دي يقول ليك زول تقي ومصدر ثقة و هو ممكن يكون زول حرامي ومحتال طابع ليه علامة عشان يظبط بيها الشغل , لكن ما معناه كل زول عنده العلامة دي زول محتال .. نفس الحاجة عند النسوان العباية و النقاب بقى في نسوان كثر يستخدموا النقاب كتنكر ورخصة لخداع الناس أو الهروب من أعينهم لممارسة الرذيلة

    1. أوافقك الرأي يا مهاب وعلي الإنسان بان يحترم الإنسان لشخصه ولافعاله بدلا الي النظرالي المظهر والقبيله والمهنه واللون والشكل والجنسية وهذه أشياء وللأسف موجوده،الإسلام كرم الإنسان ووضع معايير لذلك وان أكرمكم عند الله اتقاكم والتقوي هنا مش الصلاه والصوم فقط بل الأفعال والغرب طبق هذه المعاني الجميله في قول لا فرق بين عجمي علي عربي الا بالتقوي وممكن اخوي أمريكي قد ذكر منها الكثير ووالله العظيم كل المعاملات الحياتية هنا مبنيه علي احترام الإنسان لأخيه الإنسان وصدقوني يا أحباب اجمل شعور بان تشعر بانك إنسان ذو حقوق وواجبات فكلكم مسؤول والخ وطبعا شيخ جنوبي حافظ الكثير من الأحاديث بمتابعتي له في بعض كتاباته وهو ممكن يصححنا،الابنه نونا لك التحيه والتقدير

      1. و عليكم السلالم يا عبيد اخوي ، علا ما فهمت انا الجابني هنا شنو!!! تنظر لأفعال الانسان ما الانسان ، و معايير ما معايير ،بعدين: الابنة نونا لك التحية!!! أجي؟! هههههههه

      2. الاخت نونا دخلتك في الموضوع مش انتي ممثله النساء في يستغشرون وبما انك المستغرشه رقم واحد فدخلتي فكان هذا القصد،وبقول الابنه لانو والله شايف عمري فات الخمسين بتلاته سنوات وكلمه الابنه مناسبة لاسم نونا،، غايتو زمنا ما كان في الاسم ده ،إنشاء الله فهمتي كلامي مع انو مافيهو لا وثبه ولا وجبه

      3. واحسرتاه .. لقد ضاع الحلم بقضاء يوم سعيد علي ضفاف شاطئ النيل بابي روف ، وإنشاء الله يا عبيد عقبال تطفئ الشمعة ( دبل ) ، ما تزعل يا أخوي إنشاء الله نتلاقي في الدرجات العلي من الجنة وهناك العمر بكون تلاتين وزايد تلاتة يعني عز الشباب ، آه يا قلبي لاتحزن ، الله يجازيك يا مشير حمار البشير علي رأي جنوبي ، ثكلتك أمك يا دلوكة أخونا شمباتي ما قصر في الدعاء عليك ونحنا بتقول اميييين

    2. مرحبا مرحبا بالشيخ ..

      1. كدي مش أحسن يا أمريكي ولا شنو رأيك يا اخوي ،قلت لي ننسق نتقابل بعد الخطاب

      2. بالحيل يا عبيد يا أخوي ولابد من تكوين جمعية المستغرشين ويكون من اول أهدافها الرئيسية ،، من اين لك هذا ،، حتي اذا اضطررنا الي دخول الغابات الأسمنتية ونجر الكوز الحرامي من اضانو ونقول ليهو دي ورثتها من أبوك ؟ لازم كل من أجرم في حق هذا الشعب المسكين الصابر ان يلقي عقابه وان تسترد وتصادر كل الممتلكات والأموال المنهوبة ، قلبي يحدثني ان هنالك طبخة تطبخ في الخفاء بين الزعماء المزعومين لاقتسام ما تبقي من ثروات ، فكل الشعب السوداني يعلم ويدرك ان هذا البلد لم تحكمه قيادة راشدة حتي الآن ، وإلا لاصبحنا دولة عظمي بما نمتلكه من هبات ربانيه ، ودونكم ما حدث بعد انتفاضة أبريل 1985 ، وما تم سرقته باسم تعويضات ال المهدي والختمية وحتي الشيوعين وما عرف بتعويضات عز الدين علي عامر ، قلبي يحدثني ان الكرة سوف تعود من جديد ، مالم يعي الشعب السوداني لهذا المخطط اللئيم حتي لا نفاجأ بتعويضات أخري أو تحت أي مسمي وخوفي ان يكون هدف المعارضة المزعومة ان تلحق بنصيبها من الكيكة خصوصا وانهم كانوا يشاهدون السرقة والنهب المصلح علي مدي ربع قرن من الزمان ، الله يكضب الشينة يا عبيد يا أخوي ويجب ان ندعوا الله بان ينعم الشعب السوداني بالطمأنينة والرخاء انه مجيب الدعاء ،، ننتظر حتي 8:30 م ونحيا ونشوف .

    3. وعشان الكلام الزي ده وانو حيجي يوم الناس ما تكون فاهمة الدين الرسول صلي الله عليه وسلم لما عرّف التقوي قال : والتقوي ها هنا , التقوي ها هنا , التقوي ها هنا , واشار بيده الي قلبه ثلاثة مرات .
      ودايما الشئ الفي القلب بكون بين العبد وربه , يعني لا داير مظاهر ولا فشخرة , بعدين هو ذااتو القال كترة الصلاة لمن الزول يبرط وشه عبادة منو ؟ شان يجي واحد يستدل بالعلامة الفي وشه ؟ في قصة الاعرابي الجاء للرسول صلي الله عليه وسلم وقال ليهو علمني الصلاة المفروضه , الرسول قال ليهو : الصبح ركعتين والظهر اربعه والعصر اربعة والمغرب ثلاثة والعشاء اربعة ركعات , الاعرابي قال للرسول صلي الله عليه وسلم : ياها دي بس ؟ الرسول قال نعم , الاعرابي قال للرسول والله ما ازيدن ركعه واحده ومشي , الرسول صلي الله عليه وسلم قال للصحابه : قد افلح لو صدق .
      هو زمن الصحابة الناس تخط وشها في الواطة مباشرة ومرات تكون قلاية عديييل وزي ما قال البروف ما سمعنا صحابي وصفوه بي علامة الصلاة في جبهتو نجي الليلة في عصر الموكيت البلد كلها تتملي وشوشا علامات صلاة ! ياخي السديس اما الحرم ما عندو علامة الصلاة البقولوها كيزان الرماد ديل !!

      1. انت يا جنوبي مدام عندك كلام زي ده مالك شغال فينا فليق وطقيع ؟!

  15. باقي نص ساعه لي تمانية ونص النلحق نمش البيت اشرب لي كركدي بااااارد احتياطيا كدي ,, باقي الوسخ ده رفاااااع للضغط .

    1. المسجد في الأول يا جنوبي .. انت عندك علامة جاهزة ولا شنو ؟

      1. شوفتو أبو العفين وأبو وشاً زي قطعة الفحمة حايمين في القاعة ؟ القصة بايظة !!!

  16. اجدادانا الكيزان انشاءالله ربنا يخسف بيهم الارض هسع في زمن خطابهم دا قبل مانسمع شي

      1. نص ساعة كلام ! فاهمين حاجة من الاهبل ده ؟

      2. كضب كضب .. كذاب منافق

      3. الحبوب يا ولد .. ياتو حبوب يا أبوي ؟ كلها كلها يا ولد حقت الضغط والسكري والقلب والمصران وووووتصبحون علي خير ..

      4. مش بركة ألما تعارفنا على المكشوف يا أمريكي ! يااا حليلك انت يالنايم على حيلك ! المؤمن صديق عشان كدا كنت مؤمل . الله في!

  17. سيدي الرئيس المشير حمار بشير ..
    بعد الشتيمة والاحتقار
    تابعت خطابك من بداية تسييسكم للقران الكريم بتلاوة وكنتم علي شفا حفرة من النار فانقذناكم علما اننا لم نكن علي شفا حفرة عندما ابتلانا الله بكم لتدعوا انكم انقذتونا !!! مرورا بالوثبة ولم ادري عن أي وثبة تتكلم ووصولا الي الوجبة وايضا لا ادري أي وجبة تقصد
    عموما كتر خيرك انك ما خيبت ظننا فيك ولكن بما اننا لم نفهم شئ فلا نستطيع الحكم لأن النية يحاسب عليها الله وحده ..
    واخيرا :
    اضم مصبعي الي مصبع تلك الجنوبية التي لم ترضي بوصفهم بالحشرات , أتذكرها ؟ ولكني اضم المصبع الكبير …

    1. وانا اضم مصابعينى كوووووولها ويا خشم البقرة جاتك مصابع !
      اتفووووو عليو

  18. والله العظيم ما فهمت ولا شي من الخطاب ، و والله العظيم قلت لأبو العيال في نهاااايتو كدا هو دخل في عضم الموضوع ولا لسة؟ المضحكني إنو قال لي : لسة بحكي في الحاصل عموماً لكن لسة ما قال حاجة! طبعا ( الشرط ضحكني!!) لما قال : والسلام عليكم ورحمة الله! غاااايتو جنس محن! الشي الوحيد الكان مفروض يحصل بما إنو ( الأمة كانت مجتمعة) إنو كان الزول يولع في القاعة دي كووولللههاا بي جاز!!!!

    1. يا سلام يا الاخت نونا ويا الأخ أمريكي ويا الأخ فلاديمير ويا الأخ جنوبي ويا الأخ ركس ويا الأخ المندهش وشنباتي وكتلوني و الغلبان والأخت بت السودان ما ح تجونا في ابروف وما ح نتعرف عليكم وانا وأخوي نانو حضرنا الكركدي والشاي وكيكه الشوكولاتة ااااه فقدنا الاتصال

      1. هههههه معليش خيرا في غيرا كلها ٢٦ سنه تاني و خطاب جديد و نتعرف

  19. يا جموني الله يصلحك أنت ما بتووووب ( شنو حكاية الأصبع دي ) ؟؟ عييييب كدة معانا جنس لطيف !! وأنت كنت مستني شنو من صاحبك (البشكير) كنت راجيلك رجا منو ؟ كلامو دا ما مفهوم زي كلام لجنة الأختيار في دبي للسودانية المنافسة اللبنانية !! وبعدين زي ما قال ليك أمريكي فليييقك كبار كبار بالبلوك ما بي الحصحاص .. سلاااام ..

  20. بعد سماعى لخطاب المشير البشير امتلأت غيظا وكمدا وحزنا , ولم استطع التحدث او التواصل مع اى شخص باى وسيلة من وسائل التواصل المعروفة ,, واحسست برغبة كبيرة فى الخلود الى النوم علّنى افيق على وطن معافى ..
    نعم اخلدت للنوم باكرا جدا لكننى استيقظت بُعيد من منتصف الليلة لاجد دمعات ساخنات تبلل خدىّ ..
    احسست برغبة عارمة فى الذهاب للحمام لافراغ الفاظ وانواع سباب امتلأ بها فمى واحاطت بعقلى وجوارحى ,, احتجت ان افرغ تقلصات بطن من تلبك افكار وقياء خطاب ذلك المشئوم ..
    نعم ,, بكيت حتى استدميت مقلتىّ ,,
    بكيت لانى للم استطع ان اثب كما اراد الرجل فى خطاب (الوثبة) ,,
    بكيت لاننى لم استطع ان التهم واهضم وجبته المرادة فى خطاب (الوجبة) !!
    لقد تقبّض الرجل وتلبك وتكلم وهرطق وهرف بما يعرف وما لا يعرف ,,
    خطابا ممجوجا سمجا ضحلا قمئا مقيتا ,,
    اللهم فاخزه وبالسوء اجزه وعنا ازحه ,,
    اللهم فارحنا منه بالداء والمرض والسقم والعلة ,,
    اللهم لا تمته الا ابشع ميته ولا تختم له الا بشر ,,
    أللهم فارنا فيه وفى طغمته وزبانيته عجاااائب قدرتك وكن للمستعضفين والمساكين والارامل واليتامى والثكلى والفقراء …
    اللهى اليك الملجأ والملاذ والاضطرار ..
    ولا حول ولاقوة الا بك …

    1. آآآآمييييييييييييييييييييييييييين

  21. في عدم وجود الترجمة، هاك الشرح دا :
    مُدَعْشَر أي مُتَبَغْدِد
    بالقِعْطلين أي بالحُشْرمين
    تَحَشْرَمَت أي تَفَشْخَلَت
    شُرَّافاتاه أي رؤتاه
    الخُرْبُعْطُل هو صغير أبي الغرنوط.
    تفشحَط كما في تحشرم
    الفشحاط أي المتحشرم
    البُعْبُعْبُل ، ليس من العربية في شئ، و لعله إسمٌ لنبات نتن الرائحة.
    و مدعشرٍ بالقعطلين تحشرمت شرّافتاهُ
    فخَرَّ كالخربعطلِ
    و تفشحطَ الفِشحاطُ في شَحَطِ الحِفى
    بروكةِ البعبعُبلِ.
    هذان بيتان وجدانيان، ينعى فيهما الشاعرُ حظَّه و بُعدَ أصحابه عنه.

    1. والله يا شنباتي اخوي الظاهر عليك فعلا ما قدرت تنوم وانا أقول فعلا كانت فرصه ذهبية للبشير لعمل إصلاحات وتغيرات كان الكل يتوقعها ويؤيدها والدليل حضور بعض قيادات الأحزاب الأخري ووجود الإنسان العاقل دكتور منصور خالد،اعتقد بانها كانت فرصه ذهبية لا اعتقد في المستقبل بان تعاد،الخطاب اعد بصوره صعبه الفهم او بلغه أخري لم نفهمها ،كلي أمل بان تكون الأفعال اكثر عمقا وفهما ،، ااااخ يا لمتنا الطشت علي ضفاف شاطئ ابروف وحيث الشوكليت كيك والشاي

      1. اعتقد انو الطريقة البوهيمية اللى اتكتب بيها الخطاب كانت متعمدة ومقصودة ,
        لاسيما وانو الجماعة ديل كيسهم فضا خلااااااص ..
        لعنة الله تغشاهم …

      2. اديكم الخبر ده .. قالوا البيت الأبيض شكل لجنة لترجمة الفاجعة !!

  22. بعد انتهاء الخطاب :
    الزوجه للزوج : قال حاجه عن الغاز ؟ انا والله الفحم ده عماني عديييل , وزااتو بوسخ لي البيت بالرماد , تاني لا بطبخ ليكم بالفحم ولا حاجه !
    الزوج : غايتو سمعتو بقول حاجه عن وجبة وطنية ! لاكين بي نقتك دي ما خليتينا نسمع حيبدوا يوزعوها لينا من متين !!
    الابناء بصوت واحد : يعني يا ماما بكره اجازة ولا ما اجازة !؟
    قام القط من رقدته فتمطي قليلا واخرج لسانه لعق به شفتيه ومشي رافعاً زيله مُقلباً جعباته في المشية !!!!!!!!!!!!!

    1. يا جنوبي قلنا ليك معانا حريييييييم

      1. هو نص اولادنا ما دنها الهوا !! الليلة حقات الكديس بقت عورة ؟ ياخي خلاص اعتبره كديس داقي سستم !

      2. جنوبي دا شكلو ماا معترف بينا!

      3. حاشاك يا نونا انت ست الحريم

  23. هههههههههههه,,
    التع\يل فى النص احيانا يفقد القصة مغزاها ونكهتها ,,
    جنوبى ,, انقرع قرعك بلا يخمك ….

  24. هذه ثقافة الإنقاذ والمتأسلمين تشجيع الإحتيال بأسم الدين وتبني المحتالين والمنافقين وحمايتهم وشيخ ود البنا مثالاً لاحصراً

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: