المفاجأة

كل الشعب السوداني الفضل كان منتظراً خطاب الرئيس الموعود .. العبدلله كان خارج المنزل ومعه إبنه (10 سنوات) يقضيان بعض الحوائج وعندما إقترب موعد الخطاب سارع بالعودة حتى لا تفوته تلك اللحظة المفصلية في تاريخ هذه الأمة ..
– يا بابا إنتا مستعجل كده ليه ؟
– عاوزين نحصل خطاب الرئيس عشان عندو خطاب فيهو مفاجأة
وجلسنا أمام التلفاز نستمع إلى الخطاب وما أن إنتهي حتى إلتفت لي (ناجي) قائلاً :
– يا بابا أنا عرفتا ليك المفاجأة وين؟
– وين؟
– المفاجأة يا بابا إنو مافيش مفاجأة !!

كسرة :
هات الحبوب يا ولد !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟

Advertisements

85 تعليق

    1. بالله يا أمريكي اخوي عندك نفس للبرنجيه اليوم،الظاهر عليك وثبت وجازفت ،الشوكليت كيك طشت واهو زي ما قالت اختنا نونا النتعارف بعد كم وعشرين سنه،مبررروكه ولكن مشترك

      1. اعد يا عبيد ،، راحت عليك

      2. والله يا عبيد يا أخوي انا أصبت بي فاجعة لأنو دعوتي للم الشمل طرشقت ، راح علينا اللعب علي المكشوف ، انا امبارح قلت ليكم لمن شفت أبو العفين وأبو وشاً اسود حايمين في القاعة بطني طمت وقنعت من خيراً فيها ،، بس انا ظني انو كانت في مفاجأة لكن الورقة الفيها المفاجأة سحبوها ، والدلوكة ده يشيل ويقرأ وماجايب أي خبر ، ده اريتو كان بعرف يقرأ ..

    2. مبروكة بالحيل يا أونكل سام ،،، البركة فى المفاجأة الخلتك مساهر لحدى ما تجازف البرنجية ،، ياللا أمشى نوم بعد دة !!!

      1. شكرًا أخوي بوتن بس الفاجعة طيرت النوم من عيونا

    1. شوف الوكت مشترك ولكن النفس مابيها،مدبرس وكدا يعني عشان خيبه الأمل وعدم فهم الخطاب

      1. وينك انت يا جنوبي ؟ شوف عبيد ده . قال مشترك ! خلي بالك المفاجعة طلعت ليهو في راسو ،، كفارة ياعبيد،،

      2. ما كلامه صحي انت الساعه 11 وهو الساعه 11 ! قادر الله امبارح دافقت والليلة تيمان !!

      3. جابوك فرعة بقيت وجعة يا جنوبي شن لمة الساعة 11 علي الساعة 11:04 ، هسع كان ده نانو كنا نقول ناس أبوروف ديل عنصريين ، عشان كده الله فجعكم والرحلة طارت عليكم ..

      4. لا يا عبيد كمان ما تحقر ، انت المفروض زي أمريكي عااااارف الفرق : هو 11 وانت ١١:٠٤هناك فرق. طبعا جنوبي بحسبا زي العرب يقولوا ليك ما فرقت دقائق. استحقيتا يا أمريكي عن جداً إمارة ، مبروك! ( احنا ترانا نحكم و نبارك بس يا قول جنوبي!)

      5. ينصر دينك يا نونا ، تسلمي ، عاملة كيف من وجع اللوز.. شرك مقسم انتي ..

      6. عن جدااارة، أسفة دا الكيبورد

      7. سمح يا نونا كان الكيبورد ! انا شدة ما غلبني اقراها قت يمكن كتبا ليك الكتب خطاب امبارح !

      8. هييي يا جنوبي نونا دي كان كتبت من غير كيبورد نحنا بنفهمها بس انت اطلع منها بره ..

      9. ههههها ما بسألك يا جنوبي، غايتو اي بادي دا كان مستلفو زول امبارح مني!!!

      10. يا نونا حداشر ،double check,
        اليوم الثاني من الوثبه،

      11. تقريبا البيكون كتب الخطاب منووو؟ – ده رئيسنا ولا كلف نفسو اطلع عليهو – هشتكنا وبشتكنا يا ريس – وقال للشعب السوداني والسياسيين ما قدروا استوعبوه (واستوعبو هول المفاجأة)، ديل من الصدمة لمن صفقوا، الصادق نايم، الترابي هايم، د المرغني قاعد في كرسيه كويس والالفة ما كتبوا مهرجل، ود الصادق العميد يشيل ويكتب في الملاحظات – يا الله بيكتب في اخطاء الرئيس النحوية؟ – اتو عم متصور كان في؟،
        اللهم المباراة كانت عرس لم كامل المشاطيب والاحتياطي وقدماء المحاربين.
        العجبني الوزير الكان بعاين للكرسي يمين الرئيس ولسان حالو يقول “اتغندر يا كرسي”
        الوثيقة تكضب الشينة والشعب السوداني في انتظار خريف شهر فبراير.

    2. صحي كلام ولدنا ناجي , مرات عدم المفاجأة ذاااتو مفاجأة !!
      هسي الحايشرح لينا خطاب امبارح ده منو ؟ عبد الله الطيب , الله يرحمه . فراج الطيب , الله يرحمه . الحسين الحسن , الله يرحمه . ابراهيم احمد عبد الكريم , الله يرحمه . عبد الله البشير , الله يرحمه . ياربي السفير الصيني بيقدر ! ولا نبقي تحت رحمة حسين خوجلي الليلة ويشرحو لينا زي الرسم السريالي ..

      1. و الغريبة انو فى اتنين تلاتة من الصحفيين قاعدين يهزو فى رؤسهم و كأنهم فاهمين حاجة !!

      2. والله والله يا ود بوتن هز الرؤوس ده وجعني وجع اكتر من وجع الفاجعة ، اصلواالسودانين بتجيهم خلعه قدام الكاميرا ، كان ده جنوبي ذاتو ظنيتو كان هوزز راسو ، رأي الفرعون صاحبك شنو في المفاجعة يا جنوبي ؟ ما هزز وسطو ..

      3. هههههه وعبد الرحمن الصادق كان ماسك ورقة وقلم وبيكتب !! إملأ .. !!؟

      4. أيام المرحوم نميري يا جنوبي قالوا كانت في امرأة كان عندها ولد ريالتو أبت تقيف كولو كولو والولد بقي راجل وريالتو كابه ماخلت دكتور ما مشت ليهو ، الجماعة وصفوا ليها فكي ، مشت ليهو ، الفكي قال ليها بسيطة والدواء موجود عندي ، الفكي خشه وجاب ليها حجاب لبسو للولد ، الحاجة ساقت الولد ومشت ، من ديك وعيك الريالة طارت الطيرة الياها ، الحاجة رجعت للفكي قالت ليهو إلا توريني سر الحجاب ده ، الفكي قال ليها ختيت ليهو سورة نميري في الحجاب ، قال ليها اصلو نميري ده نشف ريق الشعب السوداني كولو غالبو ينشف ريق ولدك ؟ اها انتوا بشبش ده نشف ريقكم الحل شنو ؟ كسرة يا جنوبي : رأيك شنو يا جنوبي تشوف لينا الفكي الفنقلتو أمك

  1. وينو وين يا ناس وينو ………

  2. عندنا بت صغيرة لمن ما تفهم الكلام الناس بيقولوا تقوم تصرخ وتقول اسكتو
    أها انا امبارح قعدت وما فهمت حاجة ونعست قمت قلت أكون براي لكن الحمدلله طلعت مع الناس والخطاب شكلو موجهة لناطقين بغيرها ونتظر الترجمة قريبا

    1. و الله يا بت أمي المفاجأة ولا صمّت الخشم
      مالو كلامو واااضح كمان ما بتعرفي ايدولوجية وثبة اﻷحاييل ؟؟؟؟

      1. والله بالجد نفسي افهما – ولا بالتقريب ما جات معاي

    2. قالوا شهود عيان امبارح شافوا كارتر خاتي ايديهو فوق راسو ونطق الشهادة !!

  3. الناس وكل الناس قاصد شنو الزول ده ؟؟؟؟؟؟؟؟؟؟؟؟؟؟؟؟؟؟؟؟

    1. بعااتي و ما فاضي | رد

      دي دعاية سوداني و متفق معاهم

  4. غايتو انتو نكاااريييين خلاص ! كيف يعني ما كان في مفاجأة ؟ هسي في ذمتكم دي حصل يوم شفتو البشير بدون ما يكون معاهو عبد الرحيم محمد حسين ؟
    حصل يوم البشير ده خلوهوا يتم خطاب بدون ما يقاطعوهوا , الله اكبر الله اكبر ؟
    هسي في ذمتكم دي امبارح كان في رقصة الرئيس ؟
    يا معارضه يا شيوعيين يا اعداء الوطن ,,,

    1. وين انت ياخ ؟؟
      والله العظيم امس اتصلت عليك تلاتة مرات وجوالك مقفول !!!

      جاتني وهمة في رقبتي وقلت امكن بقيت اهبل وعوير وما بفهم !!
      اها يا حبيب اتصلت على الناس كلهم في الداخل والخارج لقيتهم برضو عايشين في الطراوة وكلهم متلي !!!
      اها اديني الخلاصة الزول دا قال شنو ؟؟

      1. اوووو حبيبنا .. اها ظهورك ده واحد من فوائد خطاب امبارح ,,
        فعلا فتحت الجوال قبل شوية ولقيت انك متصل وبرضو قفل الجوال ده واحد من مساوي خطاب امبارح ,,
        صاحبي امبارح بعد الخطاب قال سمعت الكلب بينبح في الشارع مرق يشوف الحاصل قال لقي سكران يتوقع والكلب ينبح , قال لي قت للكلب : ده اعقل واحد فينا يا ابن الكلب , ده الوحيد فينا الاستثمر زمنو !!

      2. الله يلعن شيطانك يا جنوبي ..

    2. صحي والله امبارح قدر مانططت عيني ماشفت عبودي شكلو مع الحجة في البيت لعلو ما مرضانة

  5. زي ما قلت ليكم امبارح ، بس كان زول يولع في القاعة دي بي ناسا! كلو كوم و جعفر الطيار كوم ! قاعد زي الفاهم حاجة و ود ابو هو داك يوسوس ليهو ساكت اظنو كان بعمل ليهو update و بقول ليهو: طبعا يا جعفر الأيام الفتات دي كان في ازمه في الوقود و الرغيف و كدا … ! بلا يخم كم كلكم ! منططين عيونم و جايين قاشرييين قايلين روحهم حيسموهم رؤساء ولا حاجة ! اكتر ان مزعلنى لأنهم شباب و تراهما دوهم فرصة لكن كل واحد عايش في جلباب ابوه!

    1. وحات الله يا نونا انا مبسوط جنس بسطة أسكتي ساي
      الصادق و ولدو و الترابي وغازي وحسين خوجلي ومهدي ابراهيم و الود جعفر الطيار ومنصور خالد وجميع الدهاقنة
      كلهم اتمحنوا في جنس الكلام دا وما فهموا التكتح ،، غايتو الله اداهم السم القدر عشاهم ههههههههه

  6. الراجل معذور يا اخوانا،، دى اول مرة يخطب فى الناس بورقة ،، و كمان داخل ماشى بدون عصاية،، و لمن عاين جنبو ما شاف الاورغن مربوط ،، و عاين قدامو لقى الفطاحلة كلهم قاعدين قدامو و قاعدين ليو بالمرصاد ،، و ما شاف باقى الشعب الفضل المسكين اللى بيكبروا و يهللوا لاى كلمة يقولها يعنى عرف ما فيها رقيص و فنجطة،،، فكل هذه الإحداثيات مجتمعة اترث عليو و ما عرف يأخذ راحتو و ينداح لينا… فاعذروهو ،، ان شاءالله الخطاب المفاجأة القادم يكون مترجم و (يسهل على امسالنا فهمو) ….

    1. الاحرى تقول (يسهل على امساكنا فكتو) !
      احححححححححححححححححححح

    2. شنو الاسهال الليكم يا مُقرفين !!

      1. يلا يا إخوانا ود خوجلي عايز يترجم الخطاب !!

      2. شفت المخنث ده بيقول في شنو ؟ قال الإخراج كان ضعيف .. شاحذ الله ربي يا ود خوجلي محل اخراجك ينسد تاني ما ينفتح ليوم القيامة ، معذرة يا جنوبي اتكلمت بلسانك

      3. هههههههههههههههه,,
        حسين خوجلى عاوز يقول وملاوز !!
        ههههههههههههههههههههههههههههههههههه,,
        منظرو بيييييض

  7. بعااتي و ما فاضي | رد

    وثبة… قصدي برنجية ناشفة

  8. زاعو قبل شوية قالوا بعدين الساعة 8 ونص اترقبوا مفاجأة تاني من الرئيس
    خطاب لترجمة خطاب أمبارح !! هشتكنا وبشتكنا ياريس ده انت رئيس والنعمه كويس وهيييييييييييي

    1. يا حبيبنا المندهش انت وين ياخي ،
      كدي نسمع خطاب الوثبه التانيه ح قول فيهو شنو ،وانا مستغرب ليه ما كان في موتمر صحفي بعد الوثبه الاولي

      1. هم لحقوا يفوقوا من الاندهاشه شان يعملوا المؤتمر !! ما خلاهم فاتحين خشمهم ومشي !

  9. عليك الله يا بروف قول لينا شنو المفاجأة اللي كنت متوقعا

  10. الله يجازيهو !! غايتو ونّسنا شوية ! ربنا يجعلو ليهو فيييي ميزان حسناته ان شاء الله !
    أحييييييييييييييا رئيس لذيذ خلاص !!

    1. والله يا جنوبي بذكرني توم اند جيري بحضرها الولد الصغير ، حاجة ظريفة خلاص الحلقة كلها ساكين بعض يجيهو بي جاي يزوق منو بي هناك مابتنتهي كولو كولو ظنيتو ربع قرن مايمسكو ..

      1. ههههه انت شفت السك ده كووولو وبرضو بيحضرا الولد الصغير !!
        انا الاولاد بكونوا فاتحين ام بس سي ثري اول ما يجيبو توم آند جيري بقولوا لي بعض غيّر سريع قبل بابا يشوفا !!

      2. انت عليك الله بتشوفها مالك ؟ توم اند جيري بتاع امبارح ده ما كفاية عليك ؟ صحي يا جنوبي الخطاب غيروهو والدلوكة ما جايب خبر ؟ قالوا المشير حمار بشير ذاتو ما مصدق !!

  11. أولاً مبروووووك يا أونكل ساااام .. تانياً والله كوووولكم فايقيييين ورايقييين وما عندكم أي شغلة تشتغلوها كان نسوان أو رجااال !! القعدكم عشان تسمعوا (الخرابيط دي شنو) ؟؟ تصدقوا أنا بطلت أسمع (للبشكير) و (حسين خوجلي) و الأهبل (حسن عمر) لأنهم ما عندهم موضووووع وكونه تسمع ليهم يعتبر ضياع وقت .. والناس السمعوا (الوثبة) قالوا لي كانت كلاااام خاررم باررم وما فهموا منو ولالالالا حاااجة !! أنا قلت ليهم إمكن يكون زي سؤال لجنة المعاينة في دبي للسودانية المنافسة اللبنانية عشان وظيفة سكرتيرة تنفيذية مع أنو السودانية مؤهلة أكادمياً ومهنياً وفنياً أكتر من اللبنانية ، لكن اللبنانية (مؤهلة بالنظر) عشان كده سألوا السودانية قالوا ليها :
    ما معنى جملة (الترتيب الانتقائي اللاجزئي لأبجديات العلم الأيدلوجي ) ؟؟

    1. هسع انا قلت نانو ده مختفي كده شغال بترجم لينا في الفاجعة .. اخخخخخ انت زول محبط خلاص

  12. خليكم من ده كلو دايرين واحد فالح كده ةيترجم القالو الراجل ده شنو ولى منو وعشان شنو وكيف تتعمل الوثبة والنطه دى شكلها كيف والبنط منو ونصل لى شنو مخنا انفجر ياستاذنا الفاتح جبرا وروووووووووووووونا نعمل شنو الضغط زاد السكر زاد الجلطه جات هى يااخوانا عرفت المفاجاة موت الشعب الفضل فجأه دون مقدمات

  13. الله الله عليك ياريس يامبهدلنا ويامجوعنا ويامزعلنا ويافاجعنا نخلى البلد ونمرفق منها ولا اقول ليك بيعنا واقبض التمن ودخلو لاجيبك وريحنا

  14. كلام ولدك ناجى ابن العشرة اعوام صح بدون مفاجأة

  15. المفاجاة كانت ظهور رواس الاحزاب وهم يستمعو للمفاجاة حتي الرئيس كان منتظر المفاجاة لكن الجماعة غير الخطاب وختو ليه خطاب ثاني لدرجه انو كان ما قادر يقراء الخطاب زايد الاخطاء الاملاء والتغلثم في الخطاب كان واضح جدا ضحك علينا المواتمر الوطني الفشي حسبي الله ونعم الوكيل عليهم جميعا انا لله وانا اليه راجعون

  16. امبارح التاسعه مساء كان انسب وقت ليوم القيامه للسودانيين
    خيرها فى غيرها

  17. غايتو انا اعتقدت انو الترابى حيطلع بعد الربع ساعة الاولى ,,
    لانو الحصل دا بالجد عدم احترام وتقدير للناس الاتطوطحت وجات للاهمية وطلع مافى اهمية يا حرامية !
    اتفوووووووو عليك يا عمر , اتفووووووووووووووووووووو

    1. هييييييي انت مااالك ما بتكمّل الشتيمه !؟
      قول إتفووووووووو عليك وعلي الي جابك , شان كان كان طلع بعد ربع ساعه برررضو الشتيمه تلحقو ..

      1. ههههههههههههههه,,
        شتااااامة يا فهامة !
        هييييق

  18. آآآآناس .
    سلام.
    كدى ياجماعه باركوها أنا أصلى كنت بايت فى الشغل وماسمعت الخطاب . بدوركم توقعوا لى الزول دة قال شنو .
    والكلام بالمهلة . واحدة واحدة قال شنو عن غلاء الاسعار وزيادة الجاز والبنزين .بكون معترض عليها أنا عارف .
    وقال شنو عن الفساد الفى البلد شركة الاقطان والتقاوى الفاسدة وخط هيثرو والنقل الميكانيكى وعن الشركات بتاعة الجماعه الناجحة ومزارعم الخاصة وإستثماراتم .
    طبعا مابكون نسا مشروع الجزيرة والسكة حديد والنقل النهرى وعايز يرجعا لأمجادا الاولى .
    وكلمونى عن رايو وتوصيتو لمعالجة العطالة وتوفير الوظائف بالكفائات وليس بالمحسوبية والتمكين .وإنو حايرجع ناس النقابات الزمان والكانو بيقيفو مع العامل المسكين حتى يسترد حقوقو من المخدمين الظالمين وبينفزو الاعتصامات والاضرابات والمسيرات والمظاهرات السلمية .
    وطبعا أكيد بكون جاب خبر المعتقلين السياسيين وأعلن عن عفو عام لكل من خالفهم فى الرائ وأوصى بالحرية التامة لكل من لة رائ مخالف للدولة والجلوس معهم لسماع آرآئهم وإنتقاداتهم فى الحكومة .
    كلمونا ياجماعه عن كلامو وتبشيروا لينا عن مستقبل مشرق لبلادنا وإنو شبابنا وكفائآتنا ما حتحتاجين يتطلعوا برة البلد ,
    وروووونا ياجماعه علييييييييكم الله .

    1. وحاة الله ما خلي لينا شئ ما اتكلم فيهو ! نص عمرك ضاع
      قال وثبه وقال وجبه وطنية وقال سيرورة والناس كل الناس وقال الجنوب انفصل وقال الاستعمار , إإإإإإإإإإإإإإإإإإإإإيك , أمانه ما فاتك , عجبني ليك شان تاني تبيت في الشغل !
      وآآآآآآآآآخر شئ قال لينا كان راجين مني شئ , الترابه دي في خشمكم ومشي !!

  19. مسدار الوثبــة
    ===========================
    وثبـــة ووثبتيــن والتالتة بــرة الــدولــة
    والقافلين عليك خسرو الرهان والـجولة
    يسألك الكريم رب العباد المولــــــــــي
    حلــــقات المسلسل ام خطابك اولي ؟

    يا عـــــــــمر البشير انا معترض..ما راضي
    ممكن انسي ليك كل الحصل في الماضـي
    الواجعني منك .وفي سبيلــو بقاضــــــــي
    يا خسارة المسلسل زمنو راح في الفاضي

    اتلاقو الجميع كل عمة تضرب عمــــة
    والناس يا عمر.. آمالا كان في القمـــة
    نسمع بالخطاب قلنا الحكاية مهــــمة
    دا الجامعنا ليهو من العصــــــر بالذمة ؟

    يا عمــر البشير الدولة رسبت رسبــة
    و اضحت للجهــــاز .. نص البلد منتسبة
    السبب القبيل خلي الخلوق محتسبة
    قمبلة الرئيس طلعت اشاعة ووثبــــــة

    يا عمر البشير حبل الصبر اتمطـــي
    والـسودان يسير ..بس إلا زي البطة
    منتظرين قرارك وقلنا زي الشطـــة
    يوم طلع القرار القصة طلعت نطـــة

    يا عمر البشير الوثبة تب مرغوبـــة
    نتمني العمار لي ارضنا المحبوبة
    في عز الخريف ما تشكر الراكوبة
    لـــــكن بالخطاب فعلا قلبتا الهوبة

    يا عمــر البشير هاك الكلام الواعي
    البترول يطير ..سودانا ارضو زراعي
    خليك للسلامة وللتقدم ساعـــي
    لكن للخطاب صدقني مافيش داعي

    يا عمر البشير ..ضيعتا زمن الامــة
    قلنا لقيت علاج ممكن يزيل الحمي
    عاملين للخطاب قومة وشمار و هلمة
    قايلنو اسكريم.. لكن طلع داردمــــة

  20. كعععععععع أبشري يا بت السودان إن شاء الله خشمك ما ينقفل (لا فض فوك) .. وأنت يا أمريكي خجلان مالك ؟؟ ما تقول أنا كنت بتفرج في توم & جيري عادي ما فغيها حاااجة !! وذكرتني بي نسيبي أول ما طلعت الـ Play Station قال لي: بالله جيب لي واحد للأولاد ديل جننوني شافوهو عند الجيران قالوا لازم يجيبوهو ليهم ، وفعلاً جبتوا وجيتم تاني يوم لقيتو (بلعب هو) وبطرد في الأولاد ويحاحي فيهم أمشي يا ولد أبعد من هنا وشغااال لعب ما داير يخليهم يلعبوا !! قلت ليه ” دا شنو ما قلت للأولاد ” ؟؟ قال لي أنا عااارف كان قلت ليك لي أنا ما بتجيبو ( نحنا زمااان لعبنا بي حاجة زي دي ) !!! فأنت كمان يا أمريكي أتفرج زي ما عائز ما عيييب !! ههههههههههههههههههههههههههههههههههههههههههههههههههه .. سلااااااام ..

  21. هسي يعني خلاص كده !!!!؟
    اريت لو كانوا خلونا عايشين احساس الوهم القبل الخطاب داك ! والله كان إحساس حلو خلاص !
    غايتو بس زي الناس الراجين عرس ولدهم , يغيروا الملايات ويضربوا البيت جير جدييد والاولاد يشتروا البناطلين والقمصان والبنات يمشن الترزي يفصلن فساتين شان تجي مقاس الجسم بالظبط , والحريم يتدخنن ويتحنن , والشُفع يشتروا ليهم البدل والبنات الصغار فساتين زفاف , والابهات العمم والشالات وينضفوا الشارع ويحجزوا الصيوان , ويجيبوا حاجات الاكل كووولها والطباخين يشدوا حِللم , وناس العرقي يتفقوا مع عوضية تحجز ليهم باقة بِكر , يقوم يوووووووووووووم العرس الصباح يموت واحد من العائلة او من الجيران !!
    الله يقهمك يا بشة زي ما قهمتنا ,,,

    1. قلت لي يا جنوبي انت قلم رصاص مبري بالجيهتين ؟ اها قالوا في خطاب تاني يوم الثلاثاء والله الكيزان ديل حالفين إلا يكملوك يا جنوبي

      1. تتذكر قصة محمود الكضاب !؟ هجم النمر هجم النمر !!
        المره دي لو قال هجمت هيفاء وهبي نقول ليهو مبروكه عليك !

      2. شطحت بعيييد يا جنوبي يا أخوي

    2. بالغت يا جنوبى يا ظريف لخصت الموضوع تماما ….وين صاحبك شمباتى فاقدين الون تو معاك اليوم

  22. اخطأ الناس في تقدير معايير صدق القشير مرة أخري ووقعو في نفس الحفرة القديمه، فقد ضقنا ذرعاً من ولولات الشكوي من هذه الهوة القديمة فلطالما هم الناس وانشغلو بتوافه ونواقص الامور القشيرية فهو كان دائم ومواظب علي الكذب العزير.. وهو لم يخطئ فهو يمارس فحشاء السلطة ورذيلتها بإستدام وإنتظام.وهي رغبة جبل عليها الإنسان وفطر وهي الإلتصاق والإلتحام ببنبر السلطة (كرسيها سابقاً) فقد سار علي نهج ظلمة الإنسانية فرفع الدعم وعلق المواطن من رقبته ورجليه.
    فلماذا اصلا نسمح له بإستباحة انظارنا وحواسنا لمشاهدة خرطقاته.

  23. افاد شهود شمار انو البشير عامل شمطه لي رب السما في القصر ومزرزر الجماعه وبقول ليهم انتو الايام الفاتت دي كلها تقولوا للناس مفاجأة مفاجأة وانا اقول ياربي مفاجاة شنو دي ! وأجي القاكم عاملين المفاجأة لي انا , ما للشعب ؟ هسي الكلام القلتو انا ده معناه شنو ؟ ووينو الخطاب الانا لي اسبوع بتمرن فوقو داك ؟ والله ما توروني الزول العمل الكلام ده انا بكره دي اقلبا تاني ! وقالوا شتمن ما خلي ليهم جنبه يرقدوا عليها ! وقالوا ناس غندور اتكبكبوا وقالوا ليهو هسي الاسبوع الجاي ده بنعمل ليك لمة تانية , وبنجيب ليك فنان ونخليك تشيل عصايتك , قام قال ليهم طيب ناس الصادق وغازي والترابي بيجوا ؟ قال ليهو آآي وحنقدم ليهم ( وزارات ) دعوة ! قام قال : سمح ناس عبد الرحيم وبكري ؟ قام غندور دنقر في الواطه وطنطن كده , خلاص خليهم يجوا !!!!!!!!!
    يا ربي كشفت راسي واتجهت علي القبله ما تصلح العسكريين والاسلاميين .. افتنن فوق بعض بي قدرتك يا قادر خلينا نلقي لينا شوية فجة نتنفس بيها ..

    1. يعني يا جنوبي يا أخوي في أمل نتلاقي في شاطئ أبوروف ؟؟

      1. أمريكي اخوي اااخر أمل كان يوم الوثبه وضيعها الرئيس ،كانت فرصه ذهبية الناس كلها كانت تأمل الكثير ولكن زي ما عارف الحصل والخطاب ما مفهوم،،
        لا لا يا اخوي أمريكي مافي امل،ضاعت الآمال

  24. المفاجأة البديلة :
    زار السودان في الايام القليلة الماضية ضيف مميز احتفت به حكومتنا وصحفنا وجلس معه امام الانصار بحكم انهم حفيدي رجلين لهم مكانة في تاريخ السودان المعاصر , اخذ ضيفنا واجب الضيافة واكثر ثم رحل تصحبه السلامة الي دياره ..
    وطلع اصلو غردون لا اتزوج قبل كده ولا عندو اولاد ولاااا حتي كان عنده صديقة شان نقول ود حرام !!
    ده إحنا طلعنا أي كلام يا امام !!!!

  25. شر خلف لشر سلف ..
    صرح رئيس البرلمان الجديد الفاتح عذالدين عن قيامه باستقصاء اراء المواطنين بالبلاد وبالخارج من خلال الشارع العام والمواقع الالكترونية الاجتماعية”فيس بوك ،وتويتر” ،مؤكدا وجود رضي عام عن خطاب الرئيس نافيا ان يكون محبطا كما يروج البعض.

    عليكم النبي يا تضحكوا لي معاكم يا واحد فيكم يجي يكلكلني
    يا جماعه الناس ديل طالما بيفهموا سخريتنا شُكر تعالوا بعد ده نمدحم يمكن فهمهم أحوص !!

    1. والله ياجنوبى أنا لا أستبعد أبدا أن يكون من كتب الخطاب هما غندور والفاتح عزالدين ولسان حالهما يقولان للبشير . نحن بتين جينا ويادوب ماقعدنا كويس عايز تشيلنا وتعمل حكومة جديدة كدى مهلنا شهر شهرين نامن نجر نفسنا ونعمل لينا حركة حركتين ونغزى حسابنا الفى أندونيسيا دة يادوبنا فتحناهو ولسا فاضى . طول بالك علينا ….

  26. مسطول في حرامي متلحو .. كل يوم جاي وفاتح دولاب المسطول يشيل العندو … قرر المسطول مفاجاة الحرامي ولبد ليهو في راس الدولاب .. اول ما الحرامي جا المسطول نط عليهو من فوق الدولاب .. الحرامي اتفجع وقعد يكورك .. تبت .. والله تبت ما حا اعملها تاني .. المسطول رد عليهو .. هسي خلينا من التوبة بتاعتك دي .. رايك شنو في الوثبة دي .. ؟!!! 

    1. والله يابت السودان الله يديك العافية وأنتى تخرجينا من جو الغبينة ومرارة اليأس .

      1. مين دبجو ده يا جنوبي ؟؟

  27. اقتباس :
    الوالي : الحركة الشعبية تسيطر على (15) محلية في جنوب كردفان من بين(17) محلية
    01-29-2014 11:11 PM
    الخرطوم
    كشف والي جنوب كردفان آدم الفكي عن سيطرة الحركة الشعبية قطاع الشمال على(15) محلية في جنوب كردفان من بين(17) محلية ـ كلياً وجزئياًـ حيث أكد أن الحكومة تسيطر على محليتين بشكل كامل، وقال: ( إن الولاية تعيش مشاكل حقيقية في جميع مجالات الحياة من صحة وتعليم وعدم توفر الخدمات الأخرى من مياه وكهرباء) ومن جانبه قال أحد القيادات البرلمانية في الملتقى: ( إن لا أحد استفاد من تجربة الجنوب قبل الانفصال حيث حدثت مذابح ودمار هناك) مبيناً أن ذلك يتكرر في دارفور وجنوب كردفان.

    الميدان
    :
    سمح يشوفوا الوالي وحكومته ديل واقفين علينا بي كم في الشهر ويقسموها علي ال 17 محلية , والحركة الشعبية تدينا حق ال 15 ! غايتو بس دايرين يعيشوا سلفقة كده ساااكت !!
    قال سيشهد هذا العام انهاء التمرد بجنوب كردفان قال !!! ياخي قولوا انهاء ( عدم ) التمرد بجنوب كردفان !!

    دبجو يا نانو كان فتي قمة طموحه ان يدعوه يسترزق من درداقة في سوق الملجة بسلام , فحاربوهوا في رزقه وحاربهم , واكتشف ضعفهم في الحرب , سالموهوا فسالمهم واكتشف ضعفهم في السلم فتخلي عن حلم الدرداقه واخيرا اصبح مستشارا للحكم اللامركزي !!
    مثله مثل كثير من الولاة والمعتمدين فان كان راس القوم في الحكم جاهل فما شيمة الوالاة والمعتمدين والمستشارين الا مزيدا من الجهل ..

    1. يعني يا جنوبي قصدك نخلي بلاد العم سام ونجي نسوق لينا درداقة ولا شنو الفهم يعني ؟!

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: