عاوزين القانون

لو أن صمويل بيكيت رائد مسرح العبث واللا معقول الأيرلندى الأصل (1906-1989) يعيش بين ظهرانينا الآن لأحنى هامته لنا من فرط العروض المسرحية العبثية واللامعقولة التى أصبحنا نشاهدها على مسرح حياتنا البائس !
كانت هذه مقدمة مقال بعنوان (أهو كلو تعاون) كتبناه عندما قامت الأستاذة إشراقة سيد محمود بتعيين شقيقها (مجدي) مديراً لمكتبها حينما تم تنصيبها وزيراً للتعاون الدولي علماً بأنه ظل يتنقل معها مع كل منصب فقد كان معها عند توليها منصب وزارة الرعاية الاجتماعية بالولاية الشمالية ثم إنتقل معها حينماأصبحت وزيرة في الحكومة ثم إنتقل معها حينما أختيرت معتمداً للرئاسة بولاية الخرطوم ثم بوزارة التعاون الدولي وأخيراً حط الرحال معها بوزارة العمل !
لقد قلنا في ذلك المقال أن ما حدث من تعيين يعد سابقة خطيرة لم تعرفها الأمم السابقة ولن تعرفها الأمم اللاحقة فمسألة التعيين في مرفق حكومي عام تحكمه قوانين العمل و(التنافس) إلا أن الست الوزيرة وهي مستضافة قبل أيام في برنامج الأخ عادل سيدأحمد (نادي الإعترافات) بفضائية أم درمان وفي سؤال لها حول هذا الأمر أجابت بأن القانون يسمح لها أن تقوم بتعيين من تشاء !! وأضافت (وأنا بقول ليكم الكلام ده وأنا وزير عمل) !
ثم طفقت (سيادتها) تردد بان هذه الوظائف وظائف مؤقتة وأن أصحابها يذهبون بذهاب الوزير وأنهم ليسوا في كشف المرتبات وحينها قام الأستاذ عادل سيدأحمد بسؤالها (طيب أخوك ده بيصرف مرتبو من وين؟) وهنا أخبرته (الأستاذة) بأن شقيقها لا يصرف من (الفصل الأول) في الميزانية (بند المرتبات والأجور) لكنه يصرف مرتبو من بند مخصصات الوزير (شفتو كيف)؟
العبد لله (بعد أن تناول الحبوب) طفق يسأل نفسه (معقول يكون في قانون زي ده؟) ! يعينوك وزير تقوم تجيب أخوك مدير لمكتبك وأختك (سكرتيرة) وخالك (سواق) وعمك (جنايني) وجارك (كهربجي) وكووولهم يصرفو مرتباتهم من مال (الشعب الغلبان ده) ؟
طيب دى وظائف تتبع للحكومة (مش قطاع خاص) مش ممكن يكون في ناس أكثر خبرة وكفاءة من الناس ديل؟ ألا يندرج هذا الفعل تحت المحاباة والمحسوبية؟ لماذا يستأثر شقيق (الست الوزيرة) بهذه الوظيفة دون غيره؟ ويبقى فيها ما بقيت ويحط الرحال معها أينما حلت ؟ هل يمكن لقانون في الدنيا أن يجيز هذا الفعل ؟ هل يمكن أن تكون صلة القرابة بالوزير هي كل ما يحتاجه المرء ليتم توظيفه (حكومياً) ومن ثم يتمتع براتب ومخصصات تستقطع من المواطن الغلبان؟
وهل فات على الست (الوزيرة) أن الأجور والمرتبات التي يتم إدراجها في (الفصل الأول) للميزانية ومخصصات الوزير كلاهما (مال عام؟) ، إن الست (الوزيرة) إن كانت تري بأن مخصصات الوزير (ليست مالا عاما) بل تخص الوزير يصرفها أنى شاء فهذه وأيم الله كارثة !
دعونا نسلم بأن هنالك قانونا كهذا يمنح الوزير صلاحية أن يعين ما يشاء من أقربائه وجيرانه وبني جلدته في وظائف حكومية .. طيب الألف وعشرومية وزير إتحادي وولائي ديل لمن كل واحد يعين ليهو خمسة القصة ح يكون شكلها كيف؟

إن حديث الست الوزيرة بان القانون يجيز لها تعيين شقيقها في هذه الوظيفة (كلام ما بيدخل الراس) ولأن (العبدلله) لا يفهم في القانون كثيراً لذلك من هذا المنبر نناشد الست (الوزيرة) أن تمدنا بصورة من مواد ذلك القانون الذي يجيز هذا الفعل للإطلاع عليه حتى نقوم برفع دعوى بعدم دستوريته لتعرضة مع مبدأ المساواة بين المواطنين … ومنها كمان الزول (يثقف نفسو وكده) .

كسرة :

القانون ده يا ربي عندنا برااانا وللا الناس دي كووولها عندها ! يعني مثلاً وزيرة العمل الألمانية (أندريا ناليز) ممكن تعين أخوها (شارل ناليز) مدير لمكتبا وللا الكلام ده في (فرنسا) ما بمشي؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و؟

Advertisements

63 تعليق

    1. فينكم يا جماعة ؟ فينك يا جنوبي روحت ع الفطور مع الفرعون ولا ايه يا حبيبي ؟ ايه اخبار السمنار يا سي نانو .. فينكو كولوكو يا حبايبي ؟ شوفتو الست اشراقة وعمايلها ..

      1. مبروكه عليك البرنجيه الخلتك تنضم مصري !
        ما كنت مع المصري لاكين واقف بره في الشارع والجو اوروبي والمطرة شكشاكه والسجارة عندها طعم تاني ..
        الليلة فطرت مع بتاع البقالة جمبنا سوداني ومعانا سواق سوداني ظبطنا بوش في البوفيه بي جبنة وطعمية وزيت سمسم وبيض مسلوق وبصل كتييير والله مع الجو ده كان حاجه رهيبة خلاص , اريتكم كان معانا ,,

    2. مبروك تااانى يا أونكل سام – و الله اتجدعتا فيها اليومين دى ،،
      وثبتين متتاليتين ،، قوية منك
      الظاهر عليك انك الوحيد فينا اللى فهم الخطاب ..

      1. تشكر أخوي بوتن ،، انت ما سمعت بالعم كارتر قالوا زولك نطق الشهادة ( العهدة علي جنوبي )

  1. هذا هو الفساد المقنن ولايمكن في تعليمات ولافتوي غير مكتوبة من شخيهم دفع الله إنة كل وزيرة يكون معها محرم خوفاً من شهواتهم الماعندها حساب .

  2. اخوي أمريكي مبروكة البرنجيه والدور ده استحقيتها بجداره ولكن المره الفاتت بتتذكرها بتاعه الوثبه فكنت مشترك معي في الساعه حداشر ومش الساعه حداشر واربعه دقائق .
    موضوع اليوم وبرضو يورينا شي من الفوضي والرجااله والفتونه السلطويه ويعني غصبا عنكم واااي بعينوا واعملوا الدايريين تعملوا وكان عجبكم،والله فعلا استفزني الموضوع ده

    1. عبيد أخوي تحياتي .. والله انت راجل عكليته خلاص براحه سحبت 11:04 وختيت محلها 11 .. والله ذكرتني أبو العفين سحب الأصل وخت لينا التقليد .. أما موضوع الموزموزيل شروقة دي اصلها بتشرح ليكم في الوثبة ماشايفين المحرم بتاعها ده بنط معاها من مكان لي مكان ..

      1. نصرة برنجية العبيد :

        امريكي 28 يناير 2014 عند 11:00 صباحاً | رد
        برنجية
        obeid 28 يناير 2014 عند 11:00 صباحاً | رد
        صحي مفاجاه
        اها يا عبيد قصرت معاك ؟ بس كيتا في الطابق البرنجية وقام من نشوته ويهتف ده !!

      2. ده شنو شغل الدهنسة ده يا جنوبي ؟ انا ما قلت ليك انت ترباية مصريين،، اين انت يا نانو ؟ ده سمنار ولا وثبة ؟

      3. ههههههههههههههههههههه,,
        ينصروك يوم لقا والدم يتشايح يا جنوبى ,,
        لقيتك بمبى وما بتتعصر ,,,,

  3. لﻷسف الشديد دا الحاصل في أغلب مؤسسات الدولة أن لم تكن كلها
    بس الباقي لي الوزيرة دي عشان اتحادية كل مرة يجيبوها ويتوطحهو بيه
    وهي كان ما شافت من غيرها ما كان عملت

    وأنشاء الله حقنا دا ما بنخليه ليهم يوم القيامة

    1. وبرضو للأسف الاسيف يا بت السودان انو البلد فيها قانونين اتنين ماا قانون واحد , في قانون للعامه وظاهر للعيان , زي القانون البموجبه المراجع العام فتح بيهو بلاغ في وزير الاوقاف واتهمه بالفساد وتبديد المال العام , طبعا النيابة بعد شافت القانون قالت المراجع العام كلامه صاح وفتحت البلاغ وتم تقديم الوزير للمحاكمة , والوزير لما وقف قدام القاضي قال للقاضي انت داير تحاكمني بقنانون العامه كيف ؟ انا ما من العامه انا من الخاصة وده القانون حقنا ! قام القاضي لما شاف قانون الخاصة لقي كلام الوزير صاح وعنده تفويض بتبديد المال العام , قام القاضي طلّع الوزير براءة وشطب القضية ,
      اما عن كلامك انو حقنا ما بنخليهو ليهم يوم القيامة فده للاسف خيارنا الوحيد , لأنو القانون بقول كل من تمت محاكمته في قضية وصدر حكم وتم تنفيذه او ثبتت براءة المتهم , تاني لامن تقوم القيامة مافي زول يقدر يقدم نفس المتهم لمحاكمة بنفس القضية , يعني وزير الاوقاف ده يقعد يطلّع لسانه ويكاوينا كده لي يوم القيامة ,,,
      نصبر بس يختي قالوا القيامة ذاااتا قرّبت ..

  4. لعن الله الراشي والمرتشي والرائش ..
    الراشي هي الحكومة بدفعها مبالغ خارج الميزانية للوزير ..
    الرائش هو الوزير الذي يستلم هذه المبالغ ليشتري بها ذمم آخرين قد يكونوا عقبة في طريق تنفيذ سياسات الحكومة في الوزارة التي تعنيه .
    المرتشي هو من يبلع ذمته و يبيع ضميره لهذا الوزير ..
    وايضا يستغل الوزراء هامش التصرف لفائدة المقربين ..
    فكل وزارة تقدم برامجها وخططها التي تنوي تنفيذها في هذا العام وبموجبه يتم اعتماد ميزانية الوزارة وتصرف لها وزارة المالية الميزانية المعتمدة , فلماذا يعطي الوزير مبالغ خارج ميزانية الوزارة ..
    اها كده كيف معاكم النيو لوك ده ..!

    1. والله يا جنوبي اخوي النيو لوك رهيب وبس فضل بحه الصوت والنيو لوك يكتمل وفي واحده اسمها جويل لبنانيه اختصاصية في النيو لوك وممكن تخليك تلوك زي نانسي عجرم ههههه ،

      1. آه يا بتاع جويلي ونانسي انت ، كان كدي أخير منك انا بتاع توم اند جيري ،، بالمناسبة شفت مدام شروقة في ( التفلزيون ) عامله ليها خصلة كيف تقول نانسي عدييييل كدة .. طيب المحرم ( الوثاب ) ده لزومو شنو ؟ والله البنية شكلها أهل العوض ..

      2. ورد في الأخبار ان الممثل العالمي جورج كلودي يقود حملة تبرعات لمساعدة الشعب السوداني ( أي والله الشعب السوداني ) قيمة التبرع 10 دولارات في شكل يانصيب اخر يوم هو 31 يناير والفائز المحظوظ سوف يكون حضوراً لافتتاح فيلمه الجديد رجل الآثار ، وسوف يكون الفائز بجوار كلودي في السجادة الحمراء لحظة افتتاح العرض ، تذكرتان مجاني وإقامة ليوم واحد مع الإعاشة ، انتهي ، ولمعرفتي بطباع الشعب الأمريكي ، أقول لكم وداعاً للجوع والفقر أيها الشعب السوداني ، الشعب السوداني اصبح انترناشيونال ، شد حيلك يا جنوبي 10 دولار فقط وتعمل ليك وثبة عالمية ، وكان عايز تكب الزوغة في بلاد العم سام أخوك عارف الدروب ماعندك مشكلة ، بلا أبو العفين بلا شروقة بلا خطاب بلا لمة العدد تم ،،

      3. مساعدة السودانين الذين يعانون الفقر والجوع ، هكذا ورد في الخبر،،

      4. يا عبيد وامريكي الله يهديكم ..!!
        ياخ ما قنا ليكم معانا بنات !!
        معليش يا نونا امسحيها لي في وشي ,,

      5. الله الله عليك يا جنوبي اوعك تقول لي بقيت شيخ طريقة ،، انت ما قريت خبر اليوم ،، الحكم سنتين والجلد 80 جلدة علي شيخ طريقة تحرش بفتاة بالدويم ،، دحين يا جنوبي دي الوثبة الثانية ولا الوثبة الاولي الزماااان ديك ؟؟

      6. هييييييي جورج كلودي ده يلم قروشنا ويديها لناس اللجان الثورية يطلعوا ميتينا اكتر ما هو طالع !

      7. ها اختلي رجل وامرأة الا وكان الشيطان ثالثهما ,,
        يبقي الرجل ده مدرس قرآن مدرس انجليزي مدرس جن احمر ياهو الرجل وما مفروض يخلوا معاه بنت في خلوه بالذاااات ناس الدين ديل شان بكونوا مسقرطين وقالوا الماشاف هناي بهجوا هناي هناي !! آآآ] بعد شتموني يلا ,,

      8. يا جنوبي والله بالغت عدييييل كده شنو مسقرطين دي سقراط ذاتو خجل منها ،، يا أخي قلنا ليك معانا حرييييم ، هسع شروقة دي كان انضمت لينا تقول شنو ، ونحنا ذاتو نودي وشنا منها وين ،، يجازي محنك يا جنوبي ،،

      9. جورج كلوني ياخوانا،كلووووني ما كلودي. أنتو يمكن لخبطتو وقصدكم تلودي؟

      10. انا عارفه كلوني ولا كلودي ! ما المسنوح ده مسكني فيهو ومشي ! كمان بغالطو في اهله !

      11. ليه تزعلنا منك يا امريكي، يعني شان امريكي ما عاجبنك اهل العوض؟

  5. لئيما بعرفا!! وأخوها مفتري التقول جايي بي عرقو، وزماااان لو تتذكر يا بروف انا علقت ليك على انها وزيره عمل و تعمل عملية زي دي! و بالمناسبه ما في حاجة اسمها وزير يعين من يشاء ، و هم لما وضعوا في القانون فقرة زي دي قصدهم بيها ( بما فيه مصلحة العمل) ما سبهلل سااااكت! و مصلحتنا شنو في اخوك الممسح دا يمش معاك محل ما تمشي؟ هو مصلحتنا شنو من الاول انتي تبقي وزيرة؟ سألونا؟ ما جيتي ترضيات ساكت! اها و العربية السايقه بسلامته ،برضو من قريشاتك! وقالت محرم قال! منو الجابرك؟

    1. كنتي ماشة كويييس يا نونا بس ( انتي الجابرك ) دي ،، شوية عصلجت معاي ،، دايره ليها قاموس زي الوثبة ،، مدد مدد يا جنوبي ..

    2. هي سجمي ! هو ممسّح !؟ سمح ما يجيبوا خالن معاهم محرم !!

      1. ما تديهم الفكرة دي يا جنوبي، بكرة ينفذوها ليك و نبقى في ندامة!

  6. مبروووكة عليك البرنجية أخوي ود أونكل ساام تستاهلا والسيمنار خلاااس خلص (كيتاً في جنوبي) !! ويا أخوي ود العبيد كلامك دا ” والله يا جنوبي اخوي النيولوك رهيب ” أقول ليك : وهل يصلح العطار ما أفسد الدهر ؟؟؟ ههههيهي .. ويا أختنا بت السودان سامحيني أضفت بعض اللمسات إلي قصيدتك الرائعة (مسدار الوثبة) وأرسلتها للقروب بتاعي ومنهم ود العبيد، لكن من باب الأمانة نسبتها إليك “بتصرف مني” .. وتعقيبي على مقال البروف اليوم أقول:
    دخل “عمر” مش حقنا !! بل سيدنا عمر بن الخطاب رضي الله عنه (وشتان بين العمرين) ، دخل يوماً إلي السوق فوجد قطيعاً من الإبل تريان (يعني سمين)، ونظيييف يسر الناظرين فأعجبه فقال : (لمن هذه الإبل) ؟ قالوا لعبدالله .. قال: أي عبيدالله؟ قالوا عبدالله بن عمر!! قال: عبدالله بن عمر ولدي ؟ قالوا نعم .. قال إئتوني به الآن .. فحضر أمامه فقال له عمر (من أين لك هذا يا بن عمر) ؟ وكان أول من إستن قانون من أين لك هذا .. قال عبدالله بن عمر ” يا أمير المؤمنين هي إبل لي إشتريتها في سنة من السنين” يعني سنة قحط وجفاف وأطلقتها في البرية “يعني في الخلاء” حتى سمنت وأتيت بها إلي السوق لأبيعها .. وهنا قال عمر “بخ بخ أعلى كتفي يا بن عمر” !! يقول الناس: هذه إبل إبن أمير المؤمنين ذروها تأكل وذروها تشرب ( فقط شبهة محسوبية) !! فتأكل إبلك وتشرب وتسمن وتجوع إبل الناس وتهزل !! ليس على كتفي ياااااا بن أمير المؤمنين .. يا بن عمييير (لاحظ التصغير)
    ( بعها وخذ ما دفعته فيها وأطرح الباقي في بيت مال المسلمين ) !! ياااااا الله أين نحن وحكامنا من هذا العدل ؟؟ .. سلاااام ..

    1. ينصر دينك يا نانو ،، تقول لي مسقرطين يا جنوبي ،، عقبال نبيع الإبل الليلتنا الفي ماليزيا ووزارة ماليتنا تبقي مليااااااااانة ،،،

    2. العفو يانانو بس لﻷمانة هي ما بتاعتي لكن بعرف سيدها وانا زاتي بقول ليه العفو من هنا

      1. الله يغفى علي وعليك ويسامح الجميع ، لكن بصراحة القصيدة رائعة ومعبرة وجات في وقتها ودا الخلاني أتدخل وأضع فيها بعض اللمسات !! أصلو أنا عندي ملكة شعر بتاورني من وقت لآخر وسانزل لكم بعض القصائد ( في مناسبتا ) إن شاء الله، ..
        وأرفق لك القصيدة بعد اللمسات التي وضعتها عليها .. سلااااااام ..

        مسدار الوثبــة
        كلمات بت السودان (بتصرف)

        وثبـــة ووثبتيــن والتـالتة بــرة الــدولــة ** والقـافلين عــليك خسـروا اـلرهـان والــجــولـة
        يسألك الكريم رب العـــباد المولــــــــــي ** حلــــقات المسـلسل أحسن أم خطابك أولي ؟
        يا عـــــــــمر االبشير انا معترض ما راضي ** ما بقدر عديل أنسي الحصل في الماضـي
        الواجعني منك وفي سبيلــو بقاضــــــــي ** يا خسارة المسلسل الزمنو راح في الفاضي
        إتلاقوا الجميع كل عــمة تضرب عمــــة ** والنــاس يا عـمـــر آمــالا كـانت قـــمـــة
        نسمع بالخطاب قلنا الحكاية مهــــمة ** دا الجـامعنا ليهـو من العصــــــر بالذمـة ؟
        يا عمــر البشير الدولة رسـبت رسـبــة ** واضـحت للجهــــاز نص البلـد منتسـبة
        السبب القبيييل خلي الخلوق محتسبة ** قنبلـة الــرئيس طـلعت إشـاعة ووثبــــــة
        يا عمــر البشير حبل الصبر إتمطـــي ** والـســـودان يسييـــير لـكــنو زي البــطــة
        منتظـرين قــرارك القــلنا زي الشـطـــة ** بـس صــدر الـقـرار وحكايتو طلعت نطــة
        يا عـمـر البشـير الوثبة تب مرغوبـــة ** ونـتمـنى العـمــار لـي أرضـــنا المحبـوبـة
        في عـز الخـريف ما بتنشكر راكـوبة ** لـــــكن بـي خـطابك فـعــلاً قــلبتا الـهــوبــة
        يـا ود البـشـير هاااـك الكـلام الواعي ** الـبترول يطــيـير ســودانا أصـلو زراعـي
        خـــليــك للســلام ولـلـتقـدم ســاااعـــي ** لــكــن الخطـاب صدقني ما كان ليو داعي
        يا عمــر البشير ضيعـتا زمـن الامــة ** قـلـنا لقـيت عــلاج مـمكن يـزيـل الغـمـة
        عاملين للخطاب توم وشمار وهلمة** قــايلنو إيسـكـريم لكنو طـلع داندرمــــة

  7. الكلام ده بقى عادي ، انا شخصيا اعرف شخصية في المؤتمر الوطني اتحفظ على اسمه ، متزوج من اكثر من واحدة ومدي كل واحدة فيهم ارض حدادي مدادي في كافوري ، وكروت بنزين وعربات ، اذكر انه قام بتعيين نسايبه وماعندهم ادنى فكرة عن وظيفتهم شنو وفي منهم كانوا بمشوا يستلموا الراتب ، وبس عشان اطمم بطنك الزول ده ماوزير ولا عنده وظيفة في الحكومة ده زول في الحزب ساي ، انتا اتخيل انه حتى اصغر صغار الحزب عندهم شقق وبيرسلوهم بعثات ملح ، ووالله والله مابقول كلام مابعرفه ، الكلام ده حاصل وناس بعرفهم كثر ، انتموا للحزب من اجل ان يعيشوا حياة كريمة !!!

    1. برهنت انك زول ساي وما عندك قيمة كمان ،، وجبان كمان ، حصل يوم واحد شفت البروف قال كلام مبهم ، يجب ان تقتدي باللوائح أو تغادر ،،

      1. امرييييكي !! بسسسسسسسسسسسسسسم الله ! ماااالك يا امريكي !
        هسي الزول ده قال شنو ؟
        زول ساي .. اتفق معاك بس اختلف في آخر كلمة ( كريمة ) وليتك كتبتها رخيصة او ذليلة او دنيئة ..

      2. ههههههههههههههههههههههههههه,,,
        الراجل مغبون وداير يتفشا فى مكان ما او شخص ما ,
        مالك انت ؟؟
        بايخ وسغيل ,,,

      3. إنشاء الله يا شمباتي بوختك بوخة العروس في الحمام المغربي ..

      4. ههههههههههههههههههههههه,,
        آميييييين ,,
        بركة البلد الطيب ينقبل الدعا الطيب دا !

      5. ههههههه
        عجبني ليك انت يا البوخوك و البنات فاتوك في القطار ال فاااااااااااااااات .
        امريكي احترم نفسك معانا بنات ياخ !
        ده كلو من ( نانو) الهدي ناس وطرطش ناس ومشي ده !

      6. الله يكافينا شر التعب والأكل الكعب ،، نسيت يا جنوبي فتوتك ،، دخان المرأة لزوجها ودخان الرجل للمرض ،، خلاص كلكم بقيتوا مرضانين ؟ ما تمشوا للدكتور بتاع البروف ، يا كفي البلا لا دكترة ولا كدارة

  8. ةبعدين على مسؤوليتي ما في قانون يسمح بي قرايب في نفس المؤسسة درءا للشبهات! يمكن يسرقونا حسي و يدفنو سوا! ومعاك يا بروف، عاااوزين القانون ، عاوزين القانون، عاوزين القانون

    1. الأخت نونا عندي سؤال هل يمكن لأي مواطن عادي بفتح بلاغ فيما يختص بالموضوع ده ولا ما ممكن قانونيا

      1. عااااادي سيادة الرئيس مش قال أي زول عندو مستند يجيبو !؟
        شيل مستندك وامش , طوالي يفتحوا ليك البلاغ , هي البلاغات المفتوحه شوية ! عشان يبخلو بيها عليك !!

  9. سلامات كتيرات … معاها وثبات

    1. اهلييين حمدلاك بالوثبه , هي بسم الله بالسيرورة ! هي بالناس كل الناس ! ياخي حمدالاك وخلاص ,

    2. وثابا !!!

  10. يااااابروف ,, قانون من وين !!؟
    هى دولة قانون ولا ناسا ناس قانون ؟؟
    دى دولة اللقيمات والكانون ,,
    لقيمات للجضيمات وال…..
    والكانون عشان البخور وال….
    آآآهـ ؟؟
    بكرى مالو ؟

    1. يا شمباتي الله يرضي علينا وعليك ،، نحنا قلنا خطرفات وهطرقات جنوبي ده نحنا ما دايرنها للمرة المليون ،، معانا حريييييم ،،

      1. هييييييييييييييييييييييييييييي ,,,
        باقى انت لسه ما شفت خطرفات وتشنجات !!!

      2. يا شمباتي أنا بضم صوتي لي صوت ود أونكل سااام (بلاش حركات جنوبي دي) معانا جنس لطيف .. سلاااام ..

  11. شيء اخر يا استاذ وكم راتب السيد سكرتير وشقيقي الوزيره هل تعطيه بقدر ما تقدر او يكفيه ام توجد حدود للراتب وما حد تلك الحدود
    بلد فوضى

  12. صباحات شوقنا بي خيرن .. صباحكم طلة الياسمين
    مافي برنجية ؟ سمح هاكم إتمحّنوا :
    ” الجيش يدعو لإعلان وقف إطلاق النار بجنوب كردفان ”
    طلب الجيش السوداني من الحكومة اعلان وقف اطلاق النار بجنوب كردفان , سمح وكت الجيش ما داير الحرب ! ده منو المُصِر عليها ده !؟
    هل طلب الجيش ذلك من هول ما يراه من فظائع , أم ضعف ألم به , أم لعدم جدواها , وهل يملك وزير الدفاع القرار
    كما قالت خالتنا في مقطع الواتساب ذاك :
    نعلة الله تغشاكن وتغشي من جميع ما شالو بندقية وعاق بيها مسلم وحرق بيها حشا أمو , و … امو و …. ابوه !!
    يبا للحرب مهما كانت الاسباب ,,,

    1. والله ياجنوبى لقيتك حفظتها بى ضبانتا وما نسيت فيها ولاشولة …

      1. ههههههههههههههه,خلى الطابق مستووووور يا حنين !!

  13. ياجماعه سيادة الوزيرة دى من المرة الفاتت أقنعتنا بى حجتا وبررت لتوظيف أخوها حين زكرت قولة تعالى على لسان سيدنا موسى (هارون أخى ,أشدد به أزرى , وأشركه فى أمرى )
    إنتو حاسدنها عشان دعمتا مستجابة …
    تلحقنا وتفزعنا ….

  14. قمة التستر علي الفساد وللأ سف رعم تعيين الأقارب الفساد واضح وهذه هي الكارثة

  15. يا اخوانا امكن عايزاه محرم جنبها، والعيب ما فيها بالشكل ده – العيب في القانون والصلاحيات؟؟؟؟

  16. والله ده الحاصل فى كل مؤسسات الدولة كل مسؤؤل يجيب اتباعه وجيشه يعينهم فى وظائف سموها وظائف شخصية تتبع للوزير ولمل يذهب الوزيريمشو معاه محل مايحط رحاله ينزلوا معاه وكمان وظائف بدون هيكل يعنى مرتباتهم ومخصصاتهم ليس خصما على بند تعويضات العاملين حسب التسمية الجديدة اللى كان اسمها الفصل الاول على بند مخصصات الوزير واولادنا يقولو لازم تقديم بلجنة الاختيار والاختيار برضو مايقع على اولادنا مفاجأة ليهم يهاجر كل الشعب السودانى الفضل ونخلى البلد ليهم يسرحو ويرحو فيها على كيفهم ودى تكون مفأجاة ظريفة ليهم اظرف من مفاجإأة الرئيس

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: