أقساط وعجور

قبل عدة أشهر كتب العبدلله مقالاً بعوان (بس عجور) بعد أن شاهد أحد الإخوة الشيوخ في أحد القنوات الفضائية وهو يتحدث عن (عزوف الشباب عن الزواج) وقد كان شيخنا يحث الشباب (العاطل والشغال) على الزواج بالموجود كما كان يفعل الصحابة وهو لا يعلم أن الغالبية العظمى من الشباب (ما عندهم أبوالنوم) وإنو (حق المواصلات عندهم فيهو مشكلة) ناهيك عن (سندوتش الطعمية) يستوي في ذلك العاطل والشغال !(ماهيتو كم يعني)؟
ولتبسيط مسألة الإعاشة (بس) خليكم من السكن فقد ضرب العبدلله للشيخ مثلاً في المقال المذكور هو لو أن الزوجين أرادا أن يفطرا ويتغديا ويتعشيا (كل واحد عجورة) فهذه 180 عجورة في الشهر وإذا علمنا أن سعر العجورة خمسة جنيهات فهذه قرابة المليون جنيه (عجور بس) !
طيب أيه لزوم المقدمة دي .. لزوم هذه المقدمة صورة لطلب يوزعه أحد البنوك التجارية المعروفة عنوانه (برنامج تمويل الزواج) يعني بالعربي كده (مرابحة زواج) يقول الطلب :
ما هي طريقة التمويل:
– تمويل لمدة أقصاها 36 شهراً (3 سنوات)
– هامش الربح السنوي (يتراوح) 12%
– المقدم 15% من قيمة التمويل
– التمويل أقصاه مبلغ 150000 جنيه (يعني 150 مليون)
ما هو المطلوب :
حساب توفير مميز أو جاري
يتم الطلب من قبل :
– العريس
– العروس
– أب / أم العريس
– أب /أم العروس
الفرق بين ذلك الشيخ المذكور في صدر المقال وما قام به هذا البنك هو أن الشيخ يدعو الشباب للزواج بالموجود وهو لا يعلم بأنو (الموجود ده ذاااتو مافي) بينما البنك عارف القصة دي وبالرغم من كده عاوز يقوم بتمويلها !
طيب .. البنك بيقول ليك يا شاب يا عايز تعرس تعال أفتح حساب جاري وإتصرف من خنا ومن هنا وأدفع لينا 22 مليون ونص (مقدم) ونحنا بنديك 150 مليون لمدة 3 سنوات نربح فيها 45 مليون جنيه بس ! ويقوموا يشتروا ليك الشيلة .. الملابس .. الريحه اللينة والريحة الناشفة .. الدبل .. (طبعن مافي طريقة للدهب) .. ويحجزوا ليك الصالة ويدفعوا ليك للفنان ويجهزوا ليك العشاء والبارد وحق (الفندق وشهر العسل) !
وبعدين يا شاب تمشي شهر العسل وترجع يكون الشيك الأول دخل ، طبعن عاوز تعرف الشيك الشهري قيمتو كم .. طيب خليك ريلاكس كده وأعصابك هادية عشان أقول ليك إنو قيمتو (حسب التضريبات) هي أربعة مليون وتمنمية جنيه (بس) ! تقوم إنتا تدفعا وكمان تدفع معاها (مليون جنيه عجور بس) عشان تعيش إنتا وزوجتك ، يعني يكون المفروض تدفعو شهرياً حوالي ستة مليون (أقساط وعجور) !!
البنك يا سادتي الأماجد لم يذكر في طلبه (الضمانات) التي من المفترض أن يقوم بتقديمها الشخص الذي يريد التمتع بهذه الخدمة (الخطيرة) ويبدو أنه قد ترك ذلك (متعمداً) ليفاجأ بها الشخص عند التقديم ، ولما كان من البدهي أن يطالب البنك بضمانات حماية لأمواله المقترضة (إن شاء الله شيك ضمان) فهذا يعني أن هؤلاء العرسان المقترضين سوف لن يشاهدوا إبنائهم وهم يولدون لأنهم سوف يكونوا حينها في الحبس (لحين السداد) !!
هل يمكن أن نقول أن هذا البنك يقدم خدمة للمجتمع؟ بالطبع لا فالقائمون على أمره يعلمون تماماً بإنو (القصة بايظة) وأن الإقتصاد يمر بحالة من الإنهيار وأن ضروريات (الاسرة) أصبحت عصية حتى على الذين (كانوا) قادرين ، للأسف هذا البرنامج الذي طرحه هذا البنك يحمل في طياته شروراً للمجتمع لا آخر لها وإلا فليخبرنا من فكروا فيه كيف لشاب غير قادر على الزواج أن يقوم بدفع قسط شهري للبنك يقارب الخمسة مليون؟
متي يعلم المسؤولون عموماً بأن (القصة) ما قصة (تنفيذ برنامج الزواج) بقدر ما هي القدرة على إستمرارية برنامج (ما بعد الزواج) وإستطاعة الشخص توفير المتطلبات الأسرية التي تمكنه من العيش (في سترة) هذه المتطلبات (الضرورية) التي أصبح الإيفاء بها في هذا (العهد الميمون) مفارقة تبعث على الضحك والبكاء معاً .

كسرة :
لن نندهش إذا رأينا أحدهم يقف أما موظف البنك (سايق) العروسة وهو يخاطبه :
– شيلو عروسكم دي ورجعوا ليا المقدم بتاعي !!

تنبيه :
اليوم تضاف واو جديدة وكده !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و+و؟

21 تعليق

    1. رغم انك ما باركتي لي امس الا معليش نبقي احسن منك ! مبروك

      1. ماقصرت تب ولك العتب حتى ترضي
        الجابات اكتر من الرايحات
        وبدور أسالكم الامريكي القال بيمنعنا البرنجية وينو؟

  1. الحل: يا ايها الشباب عليكم بالصوم ….( هات من الاخر)

    1. هي الناس ما صايمه خلقه انت كمان ! يعني هسي البياكل عجور ده فاطر يعني ؟

    2. و الصوم دة ما داير ليهو سحور عشان يتقوو بيهو على الصيام؟؟ اها يتسحرو بشنوووووو !!!!

  2. برنجيييييييييييييييية ،،، دي الكلمة المعتمدة !!!!

    1. بنت السودان جازفتا منكم لمن الموضوع طلع فيو عرس و كدة !!!

    2. زي دفع الله انت ! اصلك ما بتعترف بالحريم ,,,

    3. الكيبورد اسلامي وكدة
      ثم تانيا السرعة مطلوبة أنت لمن تكتب برنجيييييية أكون انا استغرشت وانتهيت

    4. ههههههههههه,,
      احييك يا مندهش ,, مبروووووكة

  3. المتبع انو البنك كان اشتري ليك بيت او عربية بكونن مرهونات عندهم او بكونن بي اسم البنك لحدي ما تخلّص الاقساط , اذن في الحالة دي حيرهنوا شنو ؟ العروسه ؟ اها لو انا ما سددت يقوم يشيلوها مني ؟ ياربي حيشغلوها ! اها نقول الليلة بي .. لالا استغفر الله استغفر الله …
    الله يرحم عبدالرحمن المهدي وشيخ البرعي وشيوخ ام ضبان !! ويرحم زواج البركه وزواج الكورة !
    وفي ظل دولة المشروع الحضاري الله يرحم اقلهن مهرا اكثرهن بركه !!
    هو زااتو الكلام ده كله فوق كم !!
    قال الشاعر الجنوبي دينق مجوك :
    انا جيت بأرس مرااااا
    قالو بأرس مرا بجيب أشره بقرااااا
    انا وديت أشره بقرا أدوني واهد مراااا
    بأد وديت أشره بقرا وأدوني واهد مراااا
    لقيت واهد بقره بساوي أشره مراااااااااااااااااااااااااااا ….

  4. مبررروكه البرنجيه يا بت السودان وعقبال جنوبي وانشالله يجيبها حتي ولو بعد حداشر شهر،ههههه

    1. جنوبي ببارك عديييييل , مش زي ناس كده يقعدوا يتعزروا ! انا كنت سايق وعملت لي تيييت وشنو ما عارف ! ههههه

      1. وطيب مادام الحياه صعبه كده يا جنوبي ما ياكلوا سكسكانيه واهي الحاجه الما بتلقاها الا في السودان

      2. صحي السكسكانية في لاكين منو البيحول ليهم دولارات يشتروها بيها !!
        ناس السودان بقوا زي إبل الرحيل شايلا السقا وعطشانة يا عبيد !
        تعرف انا اول ما جيت البلد دي , لقيت موظف معانا سعودي , شايل قسيمة زواجه في جيبو , لاكين مرتو في بيت ابوها , قال ما بيدوها ليهو الا بعد يكمّل اقساطا !! تصدق الكلام ده ؟ طبعا انا استغربت عشان قالوا الما شفتو في بيت ابوك بيخلعك ! لاكين بيت ابونا ده شكله بعد كده حنشوف فيهو كتييير!! يلا اهي تبقي لينا حصانة من الخلعه !!
        آآآآآآآآآآخ يا بلد !!
        زكي عبد الكريم زمنو ده كووولو يكورك : العرس بالفاتحه يا ناس ما حلال ؟ ولاااااااا واحد رد عليهو !!
        مع البشير نشوف كتييييييييييييييييييييييييييييييييييييييييير !

  5. الخدمة دى لو دخلت البلد حايكون فى سجن تالت غير سجن الرجال وسجن الحريم وحايسموه سجن الاسر . لمن يعملوه ماعندنا منو مانع تب بنقدم للخدمة دى ونخش السجن دة عشان تانى مانشيل هم العيشة وغلاء الاسعار …

  6. وأنت قايل حايقدموا ليك أكل وشراب في السجن ده عشاء توفر حق العيشة ؟؟؟ كان قدموا للواحد موييييية يكون كتر خيرم .. سلاااام ..

    1. لمن يسجنونى مع مرتى تانى بى موية ماعندنا مانع منها . بس بنقولليهم خلو الداية قريبة .

  7. ما قصرت يا بروف في تضريباتك ،،،
    لكن بالغت في أكل العجور للعرسان ، كان تحسب ولو للعريس فقط حاجة كويسه إنشاءالله كيلو طحنية لمُذة شهر فقط طالما الشغلانية كلها دين في دين.
    بعدين يا أخوانا تفتكروا عرس زي كدا – بالربا – ربنا حا يبارك فيه؟
    “اللهم أغننا بحلالك عنْ حرامك وأكفنا بفضلك عنْ من سواك” اللهم آآآآآآآمين

  8. يااخوانا ما فى زؤل جاب سيره للمقدم والموخر

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: