حكاية عجيبة

• العدل هو اسم من أسماء الله جل وعلا والعدل مقصود به الإنصاف، وإعطاء المرء ما له، وأخذ ما عليه. وهنالك آيات كثيرة في القرآن الكريم تأمر بالعدل، وتحث عليه، وتدعو إلى التمسك به، يقول تعالى: (إن الله يأمر بالعدل والإحسان وإيتاء ذي القربى) (النحل: 90) ويقول تعالى: {وإذا حكمتم بين الناس أن تحكموا بالعدل(النساء: 58) ، والعدل أساس الملك، فقد كتب أحد الولاة إلى الخليفة عمر بن عبد العزيز -رضي الله عنه- يطلب منه مالاً كثيرًا ليبني سورًا حول عاصمة الولاية. فقال له عمر: ماذا تنفع الأسوار؟ حصنها بالعدل، ونَقِّ طرقها من الظلم فهل يا ترى يحصن مسؤولونا عاصمة الولاية وينقونها من الظلم ؟ الإجابة بعد أن تقراوا معي مظلمة المواطن (أحمد سليمان عبدالله محمد) وهي مرفوعة لوزارة العدل (لو فضل فيها عدل) :
• المواطن أعلاه وحسب ما هو مكتوب على شهادة البحث الصادرة بغرض التأكد بتاريخ (امس) الثلاثاء الموافق 4 فبرائر 2014م هو المالك لقطعة الأرض رقم 391 مربع 8 بحي الشجرة بالخرطوم والتي مساحتها 1831 متر مربع.
• قبل أربعة سنوات وشويه فوجئ المواطن المذكور بان الشركة السودانية لخطوط أنابيب البترول تقيم على أرضه مصنعا فقام بمقابلة المسؤولين بها واطلعهم على شهادة البحث وقال ليهم (يا جماعة الواطة دي بتاعتي ) ولكن ردهم أن قاموا بطرده شر طردة ولسان حالهم يقول له (أعلى ما في خيلك أركبو) !
• ولأن المفروض أن يكون أعلى ما في خيل المواطن هو (القانون) فقد توجه المواطن أحمد سليمان إلى النيابة في يوم 7/10/2011م وقام بفتح البلاغ رقم 392/2011 المادة 47 أجراءآت (نيابة الشجرة) !
• بعد التحقق الأجرائي الذي أثبت ملكية القطعة للمواطن أحمد سليمان تم فتح بلاغ بالرقم 1226/2012 بتاريخ 3/7/2012م تحت المادة 183 قانون جنائي (التعدى)
• لاحظوا معي أن الفترة الزمنية منذ فتح البلاغ وعمل (الإجراءآت) وحتى توجيه الإتهام هي 9 أشهر (بس)
• تم شطب البلاغ (ليه ما تعرف) فقام المواطن أحمد سليمان بالإستئناف للنيابة الأعلى التي أعادتة
• ومنذ ذلك الحين (حوالى 4 سنوات) والمواطن أحمد سليمان يساسق في المحاكم .. يوم مهندس المساحة ما جا الجلسة .. مرة مستشار الشركة عندهم وفاة .. مرة القاضي نقلوهو .. مرة شنو ما عارف !
• قال لي المواطن أحمد سليمان في حسرة : يا أستاذ لمن الناس ديل بنوا المصنع بتاعهم ده في واطاتي كان كيس الاسمنت بخمسطاشر ألف هسه الكيس بي ستين ألف والطوب نفس القصة والسيخ كمان هسه البعوضني منو؟
• قلت ليهو : إنتا كدي أول واطاتك دي الترجع ليك !!
• نعم العبدلله يشك تماماً بأن أرض المواطن أحمد سليمان سوف ترجع له قبل أن ينتقل إلى الرفيق الأعلى لأن العدل يا سادتي أصبح في بلادنا كما أغنية الحقيبة التي تقول (يمشي خطوة إتنين مستحيل) .. العدل في بلادنا يعاني بطء الإجراءآت في كل مراحله (شوفو الواووووات التحت دي) !
• من هذا المنبر نتوجه للسيد وزير العدل أن يتدخل سريعاً لحسم ملف هذه القضية (الما عايزه ليها دليل) وأن يقوم بحسم أي أمور تعيق تسليم هذا المواطن (واطاتو) وتعويضه عن الظلم الذي احاق به وهو (يعافر) 4 سنوات (في حقو) !!
• الشئ الغريب كبف تسمح وزارة التخطيط العمراني لجهة أن تشيد وتبني في واطا ما بتاعتا ؟ ما قالو ليهم جيبو شهادة البحث ؟ والله حكاية عجيبة !!
• ونحن نعيش هذا (الخراب الشامل) الذي نعيشه الآن من ضيق في العيش وتفش للأمراض والأوبئة وخراب في النفوس لابد أن نسأل انفسنا (ليه ده كووولو) لتأتينا الإجابة على لسان (ابن خلدون) في المقدمة و بالتحديد في الفصل الثالث و الأربعون الذي عنوانه (أن الظلم مؤذن بخراب العمران) حيث قال : ( جباة الأموال بغير حقها ظلمة و المعتدون عليها ظلمة و المنتهبون لها ظلمة و المانعون لحقوق الناس ظلمة و خصاب الأملاك على العموم ظلمة و وبال ذلك كله عائد على الدولة بخراب العمران الذي هو مادتها لإذهابه الآمال من أهله و اعلم أن هذه هي الحكمة المقصودة للشارع في تحريم الظلم وهو ما ينشا عنه من فساد العمران و خرابه و ذلك مؤذن بانقطاع النوع البشري وهي الحكمة العامة المراعية للشرع في جميع مقاصده الضرورية الخمسة من حفظ الدين و النفس و العقل و النسل و المال)
• سيدي وزير العدل :
• إن العدل يوفر الأمان للضعيف والفقير، ويُشْعره بالعزة والفخر.
• إن العدل يشيع الحب بين الناس، وبين الحاكم والمحكوم.
• إن العدل يمنع الظالم عن ظلمه، والطماع عن جشعه، ويحمي الحقوق والأملاك والأعراض
فأعدل يا سيدى (ورجعوا للزول ده قطعتو) قبل أن تقابلوا ربكم فيسالكم عنها يوم لا ينفع مال ولا بنون !!
كسرة :
عزيزي المواطن : ما تفرح وإنتا شايل شهادة بحثك .. لأنو إتضح إنو ما منها أي فائدة ويا مغتربين أسمعو كلامي وكل زول عندو قطعة واطة مرة مرة أخير ليهو يتفقدها !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و+و؟

42 تعليق

    1. مبرووووك الليلة لكن ماو

      1. الليلة وثبت وثبة لمن خليتنا نندغم

    2. انت غشيتنا وقلت مسافر وجيت من ورانا شلت البرنجيه , ما بنبارك ليك ..

      1. وذاااتو طارق اب احمد مشترك معاك 9:57 يعني برنجيه ميته

  1. أنسخ و وزع

    ( جباة الأموال بغير حقها ظلمة و المعتدون عليها ظلمة و المنتهبون لها ظلمة و المانعون لحقوق الناس ظلمة و خصاب الأملاك على العموم ظلمة و وبال ذلك كله عائد على الدولة بخراب العمران الذي هو مادتها لإذهابه الآمال من أهله و اعلم أن هذه هي الحكمة المقصودة للشارع في تحريم الظلم وهو ما ينشا عنه من فساد العمران و خرابه و ذلك مؤذن بانقطاع النوع البشري وهي الحكمة العامة المراعية للشرع في جميع مقاصده الضرورية الخمسة من حفظ الدين و النفس و العقل و النسل و المال)

  2. مبروكة البرنجيه يا نانو اخوي،

  3. الحقيقة الوثبة دي كانت بسبب إنو الطيارة إتأخرت، وما كان عندي حاجة أسويها !! فكنت داير أكسر الزمن فقعدت (أطبز) في النت فوثبت بسرعة ب مجرد ما نزل البوست !! شكراً شعبي على التهنئة ههههههههه ، وينك يا جنوبي ويا ود سام ويا ود بوتن ويا شمباتي وباقي السمار ؟؟,وأحب أديكم هدية بمناسبة سفري تتسلوا بيها لمن أرجع بأذن الله “لو أراد الله لي الرجوع” أمبارح كنت نزلت ليكم روابط لبعض الحلقات التي سجلتها للتلفزيون بعنوان (قبسات من السيرة النبوية العطرة) ولكنها ما نزلت (في إنتظار الموافقة) !! ولكن ممكن تكتبوا على اليوتيوب (الشيخ محجوب فهمي وقبسات من السيرة العطرة) تنزل ليكم على طول إن شاء الله ..
    نفعني الله وإياكم بما نقول ونسمع، ولا تنسوني من صالح دعائكم بظهر الغيب وجزاكم الله خيراً .. سلاااااام ..

    1. ههه انت مسافر بستهم ولآ شنو ( الخطوط السودانية ) !!
      لقيت حلقات باسم :
      محبة الرسول صلي الله عليه وسلم – الشيخ محجوب فهمي
      ماذا يحب اصحاب الرسول
      الهجرة
      وصف الرسول كأنك تراه
      وقفات مع محبة الرسول
      المحاولات البائسة لسرقة جسد الرسول
      اسماء وصفات الرسول
      مواقف من معركة بدر
      ثوبان ومحبة الرسول
      لو البتكلم في الدروس ده انت ! انا عافي ليك من مصاحبتي ياخوي فإنما انا فتنة فلا تكفر !!
      دخلت بالعنوان الانت زكرته اداني الشيخ كشك عليه الرحمة , بس لما كتبت الشيخ محجوب فهمي اداني المقاطع المذكورة فوق دي …

      1. يا جنوبي أخوي ما يجوز تقول على نفسك (إنما أنا فتنة فلا تكفر) !! لأن قائل هذا النص هو إبليس فلا تشبه نفسك به !! وياني أنا ذااااتي ما زولاً تاني، ومالك ما بتبارك لي البرنجية (دي حسادة منك ولا شنو) ؟؟ وأنا ما مسافر بي (ستهم حقتنا) مسافر بالخطوط السعودية البقت بقدرة قادر “ست ستهم” وهي متأخرة 6 ساعات عن موعد الإقلاع وأنا بسميها (Saudi Late Always) بدلاً من (Saudi Airlines) .. سلااااام ..

      2. بالله يا نانو أدينا رأيك بصراحة عن الفتوي الاصدرها علماء السودان بجواز طلب المرأة الطلاق لأن زوجها بيشرب سجاير !
        وهل ضرر السجاير أخف ام تشتيت الأُسرة ؟
        في رجال ممكن يكون بيدخن 10 علب سجاير في اليوم لكن ما مقصر في واجبات بيته بيصرف علي اولاده وزوجته وبقوم بكل واجباته الشرعية والحياتية تجاهم , فهل زي ده لو زوجته مشت قالت انها دايرة تتطلق منه عشان ما بتطيق ريحة السجاير , يقوم يطلقوها منه ؟ وهل في الحالة دي ضرر الطلاق بكون اخف !؟ وهل الزوج ده لو طلق زوجته حيكون اهتمامه بأولاده زي اول ؟ ولآ حيجي اول كل شهر يرمي ليها النفقه البتقررا المحكمة والما بتكفي حتي اكل عيش حاف لنص الشهر !!
        وفي رجال يكون بصلي اوكاته كلها في المسجد لاكين لا قايم بواجباته الشرعية تجاه زوجته ولا بصرف علي اولاده ولا جايب خبر معيشتم , بس الحمد لله لا بشرب سجاير ولا بسف صعوط ولا بشرب شيشة ! اها ياتو فيهم الاصلح لأسرته ؟
        نحنا عارفين الشرع كفل لكل زوجة حق الطلاق في حالة تضررت من زوجها واثبتت الضرر حتي لو كان زوجها امام مسجد , يبقي الفتاوي الزي دي لزومها شنو ؟
        وانت تقول لي ما تصف نفسك بي ابليس ! هسي دي ما عمايل ابليس ذااتا , يفرقون بين الرجل وزوجته !!

      3. أخوي حنوبي كيف حالك أنا ما زلت في إنتظار رحلة Saudia Late Always عشان كده برد ليك .. طبعاً الأفضل الشخص الذي يقوم بواجباته كاملة لأسرته .. ولكن هناك في الشرع ما يسمى (بالخلع) وحدث في عهد الرسول صلى الله عليه وسلم أن جأته إمرأة وقالت له إني لا أعيب على فلان (زوجها) ديناً ولا خلقاً ولكني كرهته !! فبعث إليه وقال له ما قالت وأضاف أتطلقها ؟؟ قال لكني وهبت إليها بستاناً فقال لها أتردين عليه بستانه ؟ قالت نعم .. ثم طلقها منه .. فالمعيشة والعشرة ينبغي أن تكون بالتي هي أحسن وبالتراضي وليس الغصب والله أعلم .. سلاااااام ..

      4. والله يا نانو ياخوي ما عارف اقول شنو ! لاكين في فرق بين اني اكره شخص وبين اكره صفة في شخص !!
        لاكين لو اتفتح باب زي ده , بكره زوجة المكنيكي تجي تقول الراجل ده بجيني ريحته زيت وشحم , وزوجة العربجي تجي تقول الراجل ده بجيني ريحته عرق وحصان حصان , وزوجة الفحامي تجي تقول الراجل ده بجيني زي السكن , وزوجة السماكي تقول بجيني ريحته سمك سمك . وزوجة الطبيب ذااتا تجي تقول الراجل ده النهار كله في المستشفي وبالليل في العيادة , و البلد تتملي عزبات واولاد طلاق

      5. و فيها شنو يا جنوبي؟ الأمثلة الإنت ضربت بيها مثل دي ما يمكن كوووللللهم نسوان متضررات!! كان من ريحة راجلا ولا من سكنو، ولا شنو؟ يعني انت ما المفروض تحجر على النسوان حقهم ، وكونو الفتوى دي أعلنت او ما إرتضيتوها ما معناها انها غلط!! شيخ الحكيم كان قصدو يوري النسوان حقوقن و إنو ممكن يتطلقو من الضرر العليهن و دي حاجة بستفيدو منها نسوان كتار لايكات القرض و ساكتات و ما عارفات حقوقن ( هووووي انا ما منهن والله، أوعكم تنطوا لي تقولوا المديدة حرقتا)، كدي أتخيل أختك في محنة مع زوجها و ما عارفه حقها وين. معلوم إنو الطلاق أبغض الحلال لكن في الاخر هو حلال و علاج و اخر العلاج الكي. و ما أظن النسوان يجروا يتطلعوا لأمور تافهة زي ذي ، الموضوع ما ساهل و ما في زول بخبر بيوت بي ايدو!

    2. مبارك البرنجية يا حبيب ودربك اخضر ,,
      تمشى وتجى بالسلامة يا حبيبنا مع السلامة ,,
      وزادك الله علما ورفعة ….

  4. في بنيان قابل للترميم وفي بنيان ما عندو علاج الا يتهد ويتبني من جديد , الحكومة دي مسيطرين عليها المفسدين في الارض وطالما بيمارسوا الظلم يبقي عمرنا ما حنشوف خير , لأنو الدولة الظالمة ربنا ما بينصرها ..
    الرئيس بقي متشكك من كل الحوالينو وبقي ما ليهو الا يرتمي في حضن الفاسدين حتي لو افسدوا كل الوطن طالما بيحموه او بيوهم نفسه بأنهم حاموه فما حيقدر يقول ليهم تلت التلاته كم !
    والتغيير لازم يبدأ من فوق والعرب قالت : وهل يستقيم الظل والعود أعوج ؟
    يا بروف دي مشكلة بين مواطن وشركة فمن ينصف المواطن لو الدولة نفسها بتمارس التعدي علي ارض المواطنين ببيعها للمستثمرين وتحرم المواطنين حتي من حق مقاضاة مغتصب ارضهم !!!!!!
    اللهم هذا ضعفنا ظاهر بين يديك اللهم فأرحمنا برحمتك واعنا يا معين وخلصنا بقدرتك من هؤلاء الفاسدين المفسدين ..

    1. ياجنوبى .
      بعد ما عرفت نانو أبو أحمد شايفك إتضايرت وجلست القرفصاء وبقيت تتكلم كلام محترم .
      للشيخ محجوب التحية وربنا يجعل حلقاتة فى ميزان حسناته .

      1. آآآآي والله يا حنين !!
        ماااا هجمني !

  5. الأخوة والأخوات السمار الكرام السلام عليكم: شوفوا الحلقات وأدوني رأيكم بصراحة .. ودي دعوة للبروف أيضاً لأني أعرف أنه مهتم بالسيرة النبوية.. وللعلم ربما تلاحظون بأني قد تناولت جوانب في السيرة العطرة غير مطروقة من قبل العلماء الذين تحدثوا عن السيرة النبوية والذين يتهمون من يتحدث عن هذه الجوانب بأنه (صوفي) !! ..سلاااام ..

    1. شيخنا الفاضل / أبو أحمد
      قد تغيب الصور يوماً و لكن يظل الدعاء رمز للوصال فإن بخلنا به ………فبم نجود؟!
      اللهم أرح قلبه بلطف عفوك و حلاوة حبك …. و أعمر أيامه بذكرك وأحفظه و أحفظ عليهم دينه,,,و أسعد الله قلبك دائماً
      أتمنى وأرجو الله أن ألتقيك ….

      1. جزاك الله خيراً وأحسن إليك ورحم والديك وأصلح ذريتك وأعظم أجرك إنه ولي ذلك والقادر عليه .. وأساله تعالى أن نتلقي في ساعة خير وبلادنا تنعم بالرخاء والهناء والعدل والأمان .. سلااااام ..

  6. وأنا خسمتكم بي الله يا وزير العدل
    لاتعدلوا يا سيدى (و لا ترجعوا للزول ده قطعتو) عشان أنا عاوزكم تقابلوا ربكم ويسألكم عنها يوم لا ينفع مال ولا بنون !!
    وعاوز كمان الزول ده يشوفكم يوم القيامة كما أخبرنا الصادق المصدوق وصورتكم كالآتي :
    قال رسول الله صلى الله عليه وسلم ( من أخذ شبراً من الأرض ظلماً طوقه من سبع أرضين). متفق عليه،
    وقوله عليه الصلاة والسلام ( من اقتطع أرضاً ظالماً لقي الله وهو عليه غضبان)
    دحين يا أخوي سيد الواطه خليها ليهم ولو في ناس برضو متضررين معاك برضو الصبر طيب والحساب يجمع وفي النهاية يا أخوي أختها ليك على بلاطة لن تستطيع إرجاعها مهما إستطعت من قوة أ.هـ

  7. اسال الله ان ينتقم ممن اغتصب ارض الرجل الغلبان , وان ينتقم ممن يفترض به ارجاع ارضه له ولم يفعل ,,
    وان يرينا فيهم اياما سوداء كايام عاد وثمود وقوم لوط ,,
    وان ينتقم لنا فى اسماعهم وابصارهم وذراريهم ,,
    اللهم لا تكلنا الى غيرك فيشمت بنا الاعداء ,, منك واليك الامل والرجاء

    1. آمييييييين , من جوووووووووووووووووه باستثاء الفقرة 2 ..
      كان ورانا فيهم زي عاد وثمود ما بنضيع كلنا يا شقي ,,

      1. طبعا ما عرفتكم من العربي الفصحى، هههههه والله يا شيخنا أمانه مااااا أدب تهم هههه

      2. جنوبى..
        انت مطرطش !!؟ بننجو باذن الله ,, شن عرفك بالدين انت كمان ؟؟ عين غاااامزة..
        نونا…
        من يووومنا عربينا فصيح ولسانا لديح (لكن جنوبى عربيو تعبان) ! آيييييييي

  8. علي خلفية جواز طلب طلاق المرأة من زوجها المُدخّن , لما يسببه لها من ضرر التدخين السلبي ! هل يجوز للرجل الذي تكثر زوجته من دخان الطلح ان يطلقها ؟ مااااااااا برضو تدخين سلبي !!
    غايتو البلد دي حتتملي كترة عزبات !!
    بكره نسمع . النبي سعاد ديك طلقوها ليه ؟ تقول ليها اسكتي مش راجلا طلع بيشرب سجاير !
    وواحده تانية : النبي فاطنه طلقوها مالا ؟ تقول ليها : راجلا قال بتتدخن كتير !
    قصة ونهايتا لسه ,,,,

    1. هههههههههههههههههههههه,,
      امكن عندو ربو زى ناس كدة !
      كح كح كح كح كح

  9. نفسى اعرف جنوبى وصجبة بينططوا هنا لية
    هنا الفنان بيغنى حقيبة وهم بيرقصوا (جيركى)

    1. جر يا كلب فك لى توبى !
      التوب مغترب ,, فك لى توبى ,,
      هو هو هو هو هو

    2. لا حولااااااااا ! انت من زمن الجيركي يا سامو !؟ خش في حضني خش يا تراث انت …

      1. احم احم

  10. يا بروف نحنا قبيلة المغتربين لايمنك !
    ليه ما بتكتب عن مشاكلنا الكتيرة :
    اول حاجه واكبر هم , ليه يخصموا من نسبة الشهادة العربية لدرجة انو اولادنا لو جايبين 100% برضو ما بيقروا كليات علمية كويسة ونضطر ندفع قروش عشان يقروا قبول خاص ( ومنو القال مقررات الشهادة السودانية اقوي من العربية ؟ ومتين كان آخر مرة عملوا مقارنة وتقييم بين الشهادتين ؟ )
    ليه الدولة تطالبنا نحول قروشنا عبر القنوات الرسمية ونفقد 600 جنيه في كل ريال ! مقابل شنو ؟
    وليه ندفع ضرايب ؟ مقابل شنو ؟ غايتو الا يكون مقابل انو ما قعدنا ليهم جوه السودان شان يعذبونا زي ما معذبين الهناك !
    ليه ما بيوزعنا لينا اراضي سكنية زي ما بيوزعوا للناس القاعدين هناك ؟ زي مدينة الصحفيين وضباط الجيش والقضاة والاسكان الشعبي وموظفين الحكومة ! يعني نحنا ما سودانيين ؟ ما يعملوا لينا خطة اسكانية زيهم !!
    وليه كل مرة نمش السودان يطلعوا روحنا في تأشيرة الخروج ؟ انا طالما مقيم بره السودان واسمي مقيد في جهاز ( شجون ) المغتربين , وعندي تأشيرة دخول للبلد الماشي ليها لزوما شنو تأشيرة الخروج اصلا , او يعملوا لينا تأشيرة خروج متعددة او بمدة معينة سنة سنتين او تلاته وكل مدة برسوم معينة حسب طلبنا ؟ بس نقعد كل اجازة يضيع مننا يوم او اتنين في تأشيرة الخروج !!
    وليه ما يكون عندنا حق التصويت في انتخاب النواب والولاة ؟
    وليه امين شئون المغتربين يعينوهوا تعيين ليه ما ننتخبوا نحنا ؟
    وهنا في الرياض 80% من السودانيين في حي اسمه غبيرا , ليه السفارة ما تعمل مكتب فيها وترحم الناس من الذهاب لحي السفارات علما انو الزول العايز يمشي حي السفارات يضطر يأجر لموزين ماشي وجاي ب 80 ريال لأنو مافي مواصلات بتمش حي السفارات .!

    1. هسسسسسسسسسسسسسسسسس ,,,
      خشمك عندك !!

    2. يااااااحليلك يا جنوبي، تاريك ممكووون!!!! علا يرضو غااااايظني كلامك عن الفتوي الاخيرة!!! بس بتي بي عافية شويه و حأفضي للرد عليك!

      1. بتك ربنا يشفيها ويغتيها .. يحفظهم ليك ويحفظك ليهم ..
        وقال الشاعر : راجل السجارة ما تفكي .. اعملي ليهو مكان للتدخين وامسكي فيه ..
        السجاير ضرر شخص واحد والطلاق ضرر لكل الاسرة زوج زوجه واولاد , ده غير توتر علاقات بين اسرة الزوج والزوجه ويبدأ الطعين بالكلام بين امها وامه , وابوه وابوها يبقي السلام بيناتم اخير عدمه , ولو بقي اخت الراجل متزوجه اخو الزوجه برضهم يتطلقوا إييييييييييييييك ..
        عجبني ليكي , الفتوي ذاااتا نكروها وقالوا نحنا ما طلعنا الفتوي دي !! يلا شوفن ليكن شيخ داقس تاني !
        اصلا ما ممكن يكون جبر الضرر بي ضرر اكبر ! الدين ده ما بخاطبك العقل يا نونا , وينو العقل في الفتوي دي ؟
        مع الاعتزار لاخونا سامو علي هذا ( الجيركي ) ! ياخي اعتبرا أوفر نايت ,,,,

      2. اها فضينا الحمد لله، قالوا ما قالوا برضو حأرد عليك يا جنوبي مادام دا رأيك في الموضوع،
        اولا، هل كون ان تمرض وحده بسرطان يعتبر اقل ضررا من الطلاق؟ولنفترض انها ما اتطلقت و ماتت ، منو الحيربي العيال؟ ولا تجروا تعرسوا غيرا؟ و المشكلة إنو برضضضضضو حيسجّر هو و حتموت هي. لنفترض إنو واحده طلبت الطلاق بسبب تدخين راجلا! So what? تزعلوا منها لأنها إختارت صحتها و اللي بيها ممكن تربي جيل كاااامل صحي؟ ولا لازم تضحي بي صحتها( ولا حظ صحة عيالهها كمان) عشان الأسر ه ما تتفرتق؟ و هو حيحصل لما تموت. ودا كوووووولو ليه؟ عشان بس حضرته عاوز يشرب شجاير؟ يعني ما شفنا اي شجب للموضوع دا، بالعكس بتتكلموا و كإنه امر مسلم بيه، givenإنو يسجّر؟!!!!!!!! بدلا عن كدا كان أولى يسجنوا الرجل المدخن او يغرّم لانو دا سبب ضرر الاسرة من كل النواحي : صحية،اقتصاديه، اجتماعية الخ العقل إنو المرأه تضحي بي صحتها عشان أسرتها؟ الدين قال : لا ضرر ولا ضرار! ما قال المرأ طواااااااالي تضحي ! يعني شنو لو إختارت صحتها ولو على حساب أسرتها ذاتو؟ مش من حقها؟ بعض النظر عن صحة الفرض او عدم صحتو. و الرجل منو اداهو الحق إنو يعبث بصحة غيرو صحتو هو على كيفو بس بعيد من الاسرة

      3. اللحظة البنشرب فيها السجارة التلصّق الليكن شنو ! البيت ده ما واااااسع ! فرّن وتعالن طايرين نحنا ! تطير عيشتنا ,,

  11. آمييييييين!هههههه

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: