عملتوها ظاهره

• العبدلله لا يندهش إذا أخطأ مسؤول فالمسؤول بشر (وكمان سوداني) ولكن أن تستمر الأخطاء والتجاوزات بهذه الصورة التي نراها في هذا العهد السعيد وأن يتم التمادي وبسفور في إنتهاك القوانين والتلاعب بمقدرات المواطنين (عيني عينك) دون وازع من دين أو حياء فهذا والله يجعلنا نقيم مأتماً وعويلا لهذا البلد الذي يتهاوى نحو الدرك الأسفل للقاع في متوالية هندسية دون أن يهتم مسؤول واحد ويعمل على إيقاف هذا السقوط !
كلنا يذكر ذلك القرار الذي سبق وأصدره السيد رئيس الجمهورية يمنع التعدي على الميادين العامة (بعد أن عدمت العاصمة الميدان) وتحول معظمها إلى (إستثمارات) مشبوهة لا يعلم حقيقتها أحد ، ولكن على الرغم من ذلك القرار فهنالك جهة ما لا تأبه له بل وتتحداه بالقانون (كمان) !
اهلنا في الشعبية جنوب بحري (غرب المؤسسة) يتعرضون لعصي وهراوات قوات الامن وهم يناضلون من أجل ألا ينتزع منهم ميدانهم الوحيد الذي يمثل المتنفس لكل اهل الحي هذا الميدان الذي يمثل رئة حقيقة لشباب هذا الحي والأحياء المجاورة منذ أكثر من نصف قرن حيث يمارس فيه الشباب والصبية والأطفال كل أنواع الرياضة من كرة قدم وكرة الطائرة وخماسيات وتقام فيه الاحتفالات الكبرى والليالي الثقافية والبرامج الرمضانية ، اضافة الى اقامة المواطنين لمناسبات افراحهم وأتراحهم فيه.
أهلنا يقولون إذا عرف السبب بطل العجب .. طيب ليه السلطات عاوزة (تقلع) الميدان ده ضاربة بعرض الحائط ما يقدمه من خدمات لشباب وأهل الحي؟ السبب يا أعزائي القراء كما يقول أهل الحي أن أحد المستثمرين يريد أن يقيم فيه (مولاً) أي مكاناً راقياً للتسوق ! – ناخد حبوبنا ونواصل – !
بداية لماذا تمنع الشرطة المواطنين وبالقوة من إبداء حقهم في التعبير السلمي تجاه نزع ميدانهم؟ اإلا يعبرون عن ما يحيق بهم من ظلم وإزدراء لإنتهاك القانون (ذات نفسو) وقرار الرئيس القاضي بعدم التعدي على الميادين العامة؟ ثم (يعني) العاصمة دي كوووولها أخونا (المستثمر ده) ما لقى ليهو فيها مكان إلا الميدان ده ؟
كما ذكرنا في بداية هذا المقال فيمكن للشخص أن يخطئ مرة وربما ثانية وثالثة وعاشرة ولكن أن يكون الخطأ وأن يكون التجاوز على قفا من يشيل وأن تستمر هذه المسرحية البايخة بتاعت التعدي على الميادين العامة وبيعها للمستثمرين وأولي الحظوة فهذا والله عين الفساد بل عين الدمار لهذه البلد وشبابها الذي أصبح لا يجد مكاناً صالحاً لمزاولة هواياته فإتجه لتعاطي الخمور والمخدرات والتفرغ لمتابعة ما يستجد موضات وبناطلين (ناصلة) وكمان جابت ليها (حفر دخان) !
العبدلله لا يلوم أبداً هؤلاء الشباب فالدولة على مدى ربع القرن الأخير لم توفر لهم ما يعينهم على الإستفادة من طاقاتهم لتطوير انفسهم ولم تصرف على ذلك ما تصرفه على أسطولاً واحداً من عربات أي مسؤول .. يعني لا مكتبات عامة ..لا صالات جمباز .. لا حمامات سباحة .. لا أندية مشاهدة .. لا أندية ثقافية .. لا قاعات سينما .. بدلاً عن توفير كل ذلك أو بعضاً منه يا سادة يا أماجد تقوم الدولة بنزع الميادين عنهم ثم يصرح مسؤوليها عن إرتفاع نسبة تعاطي المخدرات وسط الشباب ؟ وإرتفاع نسبة (الشنو ما عارف) ..عاوزنهم يعملو شنو يعني؟
هل يوجد مسؤولاً واحداً يستطيع أن يقنعنا بأن إزالة هذا الميدان (خليكم من الميادين التانية) فيهو فايدة أكبر للمواطنين؟ بالطبع لن يستطيع كائناً من كان أن يدافع عن مثل هذا القرار (الغريب) والذي تشتم منه رائحة ضرب الحائط بمصالح المواطنين من أجل المصالح الخاصة الضيقة .
العبد لله بعد ما طرح المشكلة دي ما عرف يقوم بمناشدة ياتو مسؤول عشان يحلها ويعيد الميدان لأصحابو المواطنين .. ما هو أساساً لو في مسؤول (مسؤول) ما كان ده حصل (وللا أيه) ؟ لمن المسؤول يكون شايف (الغلط) وساااكت ده يناشدوهو فوق كم ؟ عموما نحنا خلاس فترنا من مناشدة المسؤولين و(من هنا ورايح) ح نناشد من بيده الملك وهو على كل شئ قدير أن يعيد لهؤلاء المواطنين ميدانهم فهو حق لهم وأن (يشل) يد كل من يضرب أحداً منهم وأن (يهلك) كل من تواطأ لبيع هذا الميدان وأي ميدان فيه متنفس للشباب والمواطنين وأن (يدمر) أي فاسد لا يريد مصلحة هذه الأمة .. قال أيه عاوزين يعملوهو (موول) بالله ما بتخجلو؟ ما عملتوها ظاهرة وكده !!
كسرة :
مناشدة المسؤولين دي خليناها .. تاني ح نناشد اللا نام لا أكل طعام وهو حسبنا ونعم الوكيل !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و+و؟

27 تعليق

  1. المستغرش رقم واحد

  2. بان تكون شابا في هذا الزمن العجيب فعليك ان تقاوم كل السلبيات والتي ترتبت عليها ما اال اليه كثير من شباب هذا الزمن،طبعا نحن كنا شباب الزمن الجميل وكان كل شي فيهو جميل،يا زمن ارجع شويه

  3. اوعا ده يكون الميدان االواقع جنوب شارع الأزهري، غرب الجامع/غرب صيدلية الأول؟؟؟

  4. نعم يا بروف الدوله هى المسئوله الاولى عن ما يجرى لشبابنا اليوم …. الغريب ايضا ان الانديه الرياضيه المتكامله هى ايضا اصبحت استثمار فلماذا لات تشجع الدوله اصحابها اللى عندهم فلوس ان يبستثمروا فى هذا المجال وبذلك تضرب عصفورين بحجر واحد ولكن الجماعه عارفين ان المولات فيها فساد وفرص للكسب من عدة نواحى اخرى ظاهره ومستتره …….بعدين يا خى مع الفلس الحاصل ده البيشترى منو؟؟؟؟؟

  5. بعااتي و ما فاضي | رد

    دي فرصة تشغيل شركات البناء الواقفة من العمل المملوكة تحت تحت لمسؤول من المسؤولين، لان مااااا معقولة خلو الواطة و الدنيا دي كلها و حبكت معاهم يبنوا المول هنا… اللهم اجعل كيدهم في نحرهم… الله في ، الله في… و من يومنا ما بنشكي الا لي الله.. لا مسؤول و شي…

  6. يعني يا بروف عايزهم يبنو المولات وين ما دي الاماكن الممكن يتجمهرو فيها ويعملو مظاهرات وشوية المولات دي بتشغل الشباب بنفسه وما بتخليه واعي بدوره الحقيقي
    وفساد الشباب دا كلو في رقبتهم يوم القيامة – قالو مشروخ حضاري

  7. سلامات لكل الاحباب البروف وجميع السمار
    انا ياجماعة الخير دايره متبرع يلخص كل الفاتنى

    1. وعليكم السلاااام ورحمة الله وبركاته ,,,
      حمدالله الف على السلااااامة ,,
      وتلخيص واحد ماف ! ادخلى ساااااى كلو زى دا !!

      1. الله يسلمك ياشمباتي
        انا ما كنته بجهز ليكم الوثبه والمفاجاه كده تمشوا وتخلوني

      2. مشيتي ونحنا بشتم وجيتي ولسه بنشتم , زي شكل المصريين بالخشم ساااكت ! ابقي شاتمه بس ,,,,,,,

    2. هههههههههههههه
      ان شاءالله اخر الشتايم ياجنوبي
      وكلهم ندفنوم في الميدان ونصلى عليهم صلاة الغايب فى الميادين المجاوره

    3. ليك وحشة والله والقمردينة أخيرا نورت (ومن هذا المنبر ندعو كل الاعضاء الذين غادرون بالعودة لاحضان القمردينة)

    4. الف حمد لله على السلامة اختنا ,, و بركة بالشوفة فى حوش القمردينة من تانى ,, و زى ما قال شمباتى تلخيص مافى ,, اكيد سمعتى و فهمتى (الوثبة) !! هو دة الملخص

    5. الاخوان فلادميتر وبت السودان شكرا على الكلام الطيب ومعليش على التاخير فى الرد اصلى بشحد النت شحد عشان يدخل معاى اظن وكل الظن اثم انو مهكرنوا لينا فى الشغل

  8. يا سادة يا افاضل ناس بحري يستاهلو و ناس السودان يستاهلو مش يقلعو ميدان لو قلع بيتك تدي عن زلة و انت صاغر طالما انو نحن راضين بالكلاب اولاد الكلب ديل يحكمونا و يسرقو عرقنا اكتر من 25 سنة و لسة بواصلو و الحكومة جلها جهلة و السوق معظم تجارو جهلة و المثقفين (مع…….ن) و شيوخ الدين شيوخ سلطان يسكتو عن قتلالطلبة و يتكلو في التبغ حرام و ما يجوز و الشعب في حالة غيبوبة مش نايم , اخوك بضربو جمبك و انت بتتفرج و زي مثال بحري كلاب الشرطة يضربو في السودانيين و كلنا ممكن نجي و نتفرج , يا جبرة حرام عليك هريت مصارينا كفااااااااية بلد ما منها امل
    انا لله و انا اليه راجعون
    نتلاقى يوم القيامة العصر

      1. ههههههههههه يكون بسوي في جبنة ! كمان ناس الشرق ديل بخلوها !!

  9. شكيتهم على الحي القيوم اللا بكل لا بنوم ,,
    شكيتا لا تتعطل ولا تتبطل ,
    يلقوا فى سماعاتهم ودماعاتهم وجنياتهم وعافيتهم ,,

  10. وكت شكيتوهم لي الله داااب ياخدوا راحتم فينا !! هم كان خايفين الله بيسووا متل سواتم دي ؟
    اولاد الحلة لقيتم بيتمرنوا يوم وااحد في الاسبوع ! قت ليهم ليه ؟ قالوا لي انت قايل الميدان بنأجروا بي كم شان نتمرن اكتر من يوم ! وزااتو كان عندنا قروش وين نلقي يوم فاضي ! اولاد امبده واولاد الدوحه واولاد حي الضباط واولاد ابوكدودك واولاد بانت غرب , ديل كوووولهم بيتمرنوا في ميدان واااحد !! حوش جمب جوزات ام درمان في ابو كدوك يتأجر بالساعة زي ايجار العجلة زمان !!
    سعودي اكل مكفوله قروش والمكفول قدر ما كورك السعودي اصلو ابا يدي قروشه , المكفول داير يخوف السعودي قال ليهو : حقي باخدوا منك يوم القيامه ومشي , السعودي كورك ليهو , : اقول تري يوم القيامه عجّل لا تتأخر المتلك كُثيييييييييير .

  11. كيف حالكم .
    والله ياجماعه غلبنى الاكتبو . غايتو ده ما أول ظلم ولا حايكون آخر ظلم من الجماعه ديل .بس مافى إيدنا شى إلا نقول .: آآآآآآآآآمييييييييييييييييييييين . للدعاء الفوق ده كلو ….
    آآآآآآآآآآمييييييييييييييييييييين.

  12. الزول مرات يقول يكفر ,, يرجع يقول معليش ,,
    شقيش نقع ,,,,,,,,,,, شقيش ,,
    ما يقبضوا الباعوض ,, ما يقبضوا الضبان الما بدور فتيش ,,,,
    احنا الحراميين ,, ولا السرقنا العيش ؟؟؟

  13. قالوها لينا زمان شيطان ولا الكيزان
    اولادنا لفوا الشملة في حفرة الدخان
    ونعاجنا مرقت بره مركّبه الخِصيان
    وكان يا ما كان .. كان اسمها السودان

    1. والله بكيتوني يا شمباتي و جنوبي!!!! ما عارفه أقول شنو بس!!! حسبي الله هو نعم الوكيل!! الغريبه إنو تقرا مواقع الكترونية تقوا حسسسسسي دي الناس حتطلع، تطلع برا تقول حسسسسسي دي ،،الناس مواقع الكترونية!!!! محل سر!

  14. الوثبة علي الميادين وحقوق المواطنين وأكل السحت وسرقة المال العام هذه إحدي مستهدفات الوثبة البشيرية .

  15. هنالك مقطع فيديو لراعي غنم يعمل بالسعودية ظهر في جريده الراكوبه ،فيهو عبر وتذكير بيوم الحساب والذي يبدأ من القبر،لنا جميعا بان ان نتذكر بان الله سبحانه وتعالي يرانا وهو الذي سيحاسبنا ،هذا الفيديو إهداء عبره عظيمه لنا ولهم

    1. عدنا .. السلام وعليكم ..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: