إحتجاب

اعتذذذذذذذذذذذذذذذذذذذذذذذذار

Advertisements

60 تعليق

  1. اها الليلة البرنجية لمنو مع (حجابات) البروف ؟؟؟

    1. مبروكة البرنجيه يا شاب يا جذاب ،ويا فلاديمير اخوي ياحليل زمن الخنفسه والشعر الكثير

    1. يا عمك تنقو وانت كنت محتجب وين الزمن ده كلو وما بتظهر الا مع الاحتجابات وحتي اخوانا ناس جنوبي وركس والمندهش ونانو وشنباتي وأمريكي محتجبين خالص الايامات دي

  2. المستغرش رقم واحد، ما تخلوووها سكسكانيه

  3. البتذكر منكم منو في القمردينه جنه الاطفال بكون من دفعتنا في ذاك الزمن الجميل

    كلنا تاميين كلنا تاميين وانشاء الله كمان دائما سالمين
    كلنا تامين كلنا تامين

    وانشاء الله كمان دايما سالمينياخوانا نجيكم كل مره

    شايلين افراح فيها مسره

    وزهور ريحان وفل وياسمين

    ياجنة خلاص اتلمينا

    والاسرة اكتملت فى مودة

    والدينا اهلنا واخواناواخوانا والشمل اتلم

    كانت لحظات ما احلاها

    من عمر سعيد ما احلاها

    فرفشنا ضحكنا نورنا

    مرت بسراع ما احلاها
    البرنامج من تقديم المرحوم محمود الصباغ (الجد شعبان) وماما امال واخراج بدرالدين

    1. آآآآآآآآي والله ! ماما ذااتا قعد تحكي لينا الكلام ده !!
      ناس ابوقبورة , وصاااااااااح ياااا عزوز , ولااااااا لا الليلة يا قروية .. وقالوا لي في الخرتوم البت تنقي عريسا والدبله الدبله تمشي تقيسا ( زمان تنقي عريسا وتقيس الدبله , هسي تقيس عريسا وتنقي الدبله !! مخير الله ! )
      فلاديمير : مبروك برنجية الحجاب يا شيوعي
      عبيد : اصلا بعد عُمُر معيّن الزول بحن للقديم !!! ( ان شاء الله ما تغني لي زي عركي : ما عرفتك بتقصد شنو( وش ضاحك ولسان طالع ) وتاني قفل القوس الاول ) آآي شان ما ننساه ,,,,,,,,,,

      1. اى عليك الله يا جنوبى،، يعنى الحظ لمن يجى و نجازف البرنجية، تطلع فى احتجاب !! على قولة المصريين (أصحابك) قليل الحظ يلاقى العظم فى الكبدة…
        و جنة الأطفال زماااان دى ما شفتو صورتى فيها،، مع أصدقاء البرنامج،،، و فلان يحيى بابا و ماما و نتمنى له النجاح فى المدرسة ..
        و بعدين منو فيكم بيتذكر مسلسل (الليث الأبيض) اللى كان بيجيبوه المساء لمن يفتح التلفزيون للفترة المسائية ،،، كنا بنفرتق ليو الدافورى عدييييل عشان نلحقو..
        و اللى حضر الليث الأبيض أكيد حضر السندباد،،، البطل العربى من بغداد ،، و معه باسمينا….
        يا العبيد ،،، ذكرتنا الزمن الجميل فعلا بكل ما فيه …
        لله درك يا وطن !!!

      2. ايييييييك ,
        دا انتو عُجاز بشكل !!

    2. نحن غايتوا جنة الأطفال بنشيدها دا حضرناها في زمن ثورة اﻷنكاث وكان فيه عم جحا المرحوم (سليمان محمد سليمان) وتقديم إيناس محمد الحسن
      ؛؛؛لكن ماااا دفعتكم ؛؛؛؛

      1. تصويب : سليمان حسين سليمان

      2. بت السودان،، انتى بتكونى هسة من اللى بيحضرو (قطار الزهور) ،، مش كدة !!

    3. تصويب يا عبيد، لكن هووووي انا مااا دفعتك ( جابوا لي)

      ١- وزهور ريحان ( و عطور ياسمين)
      ٢- فرفشنا ضحكنا( اتنورنا)
      بعدين يا فلاديمير ، يا سلاااااام على الليث الأبيض و زوجته الرقيقة ليلي لكن انا كنت صغيروووونه ( دفعة ورد ولدو)هههههه

  4. وكمان في ناس ما بعرفوا بفرزو (قلوط النفساء) من (قلوط الندا) ….. في واحد قال حضر مسلسل (بائع السموم) قلتا ليهو اكيد انت دفعة جنوبي …
    نحتجب غصبا عن الظروف والحال الحرن

  5. نسبة للاحتجاب ………
    شوفو دي
    منقول:-
    نبض للوطن
    سودانّا يابلد العجايب
    لم أندهش لخبر صحيفة السوداني الذي تحدثت فيه أمس عمّا سمته السيناتور الأمريكي (المزيّف) الذي دخل البلاد بعد أن قدمته جهة رسمية على أنه (سيناتور) بمجلس النواب الأمريكي ، وانخرط في إجتماعات مارثونية مع كبار المسؤولين في الدولة من لدن مساعد رئيس الجمهورية إبراهيم غندور، ورئيس البرلمان ووزير الخارجية ووزير المعادن وعدد من الوزراء والمسؤولين ، ولم يكتشف حقيقة الأمر أحد غيرأن السفارة الأمريكية تكرمت علينا بذكرالحقيقة التي توصلنا بعدها إلى (الحقيقة الكاملة) التي تقول أن السيناتور بتاعنا طلع مدير شركة أمريكية يعني (تاجر عاآآآآآآدي زي جماعتنا ديل …!!!! )… المشكلة الخطيرة من وجهة نظري تكمن في أن هناك جهة (رسمية) قدمته لوزارة الخارجية على أنه سيناتور من مجلس الشيوخ الأمريكي ، وهذه (الجهة) هي محل ثقة لعلي كرتي وأركان حربه في الوزارة،وطالما أن هذه (الجهة) قالت سيناتور يبقى خلاص سيناتور (غصبا عنه وغصبا عن كل الخونة والمارقين ، والعملاء.. وفي حدي بيعرف أكتر من الجهات الرسمية) .. أكرر أن المشكلة وكل مشاكل البلاد المعقدة تأتينا بسبب (العفوية القاتلة) من تلقاء بعض الرسميين ،لأنهم حينما يتصرفون أو يقولون ينسون أنهم رسميين ويتعاملون بذات العفوية القاتلة على طريقة الرعاة ، وأصحاب الدكاكين وبغباء لا يحسدون عليه بل ويحسبون أنهم يحسنون صنعا .. الناطق الرسمي باسم وزارة الخارجية دفع بتبرير فطير جدا وغير مقبول البتة حينما أشار إلى أن (الضيف ) لم يأت عن طريق وزارة الخارجية وأن جهات رسمية (نواب) قدمت (الزائر) للوزارة الخارجية على أنه (سيناتور) وأن هذه الجهات محل ثقة للوزارة … رجال الدولة لا يتعاملون بهذه الطريقة العشوائية : (ناس محل ثقة وقالو لينا الزول دا سيناتور ، وخلاس اعتبرناه سيناتور … آها الزول طلع ما سيناتور وما من مجلس الشيوخ الأمريكي ، آها تودودوا وشكم وين ؟؟؟..!! … أما الجهات موضع ثقة وزارة الخارجية بد اكتشاف السيناتور (المزيف) يصبحون أمام أمرين إما أنهم (متآمرين ) ومتسترين على جريمة (إنتحال الشخصية ) ومشاركين فيها أو أنهم أناس على درجة عالية من السذاجة والبساطة والمسكنة القاتلة ، فلهم أن يختارو بين الإثنين .. الدول لا تدار بهذه السذاجة والعفوية الموغلة في العشوائية ، ولا شك أن مثل هذه التصرفات محلها الحقول والمراعي وأسواق أم دفسو والملجة وأسواق البطيخ والشمام ، وليس مؤسسات الدولة الرسمية ..
    المضحك المبكي أن (الراجل) بحث مع المسؤولين مسار العلاقات السودانية الأمريكية ، وكيف أن أمريكا فوتت فرصة ثمينة للإستثمار في مجال النفط السوداني ، وربما استخدم (السيناتور) الجزرة الأمريكية الشهيرة ، ومن عجب أن المسؤولين هللوا وكبروا واستبشرو بـبيعهم الذي بايعوا به السيناتور المزيف… هذه لم تكن المرة الأولى في التعامل الرسمي بـطريقة بلدية و (عشوائية ) في قضايا حساسة ولن تكون الأخيرة طالما لا يزال العقل الرعوي يقود مؤسسات الدولة .

    1. يا لسة حي اخوي
      من قبل غشت هم وحدة black American و كمان trash و قالت هي ملكة و عاوزة تزور النوبة ولا شنو كدا و لا ملكة نوبية ما بعرف ، المهم فتّحت ليها كل البواب المغلقة و قابلت اكبر المسئولين ألما تحلم تشوفه في الحلم انت المواطن، و بانت الحقيقة و عاااادي! انا ما عارفة شغل ناس المراسم شنو،؟ الأمنجية؟ ما بسألك ليه عن الناس دي؟ من الدونية العندنا بحتفوا بالناس دي زيادة عن اللزوم! فيها شنو لو اتحروا عنه قبل ما يعملوا ليه مواعيد؟ موضوع بسييييط جداً في عم غوغل دا!!! لكن هم خجلوا يعملوا كدة مع إنو دا برا عادي لأنو يتعلق بسيادة البلد ما الشخص، دي حق البلد! الأمريكان عاااادي نزلوا وزير خارجيتان من عربيتو و فتشوها!!! دا حق بلدهم و ما يتهانوا فيه! شي يزعل! حقو لو عاوز المسئول يقابلم في بيتو عشان ما يتسمى بيها السودان!!آاااه يا بلد!!!

      1. تقولي شنو …………….. والله غلبنا ……..لكن املنا في الله وشبابنا كبير وكبير جدا
        والله في

    2. فضيحة السناتور دي مفروض تنفض وزارة الخارجية نفض , زول فيهم يقعد في محله ماف ! هم ذاتم وكت بريدوا امريكا كده ! ما يمشوا ليهم بالباب عديييييييييل !!
      لا وكمان حقت حفيد غردون داك ! والصادق يشيل ويعزم فيهو ! وجدي وجدك وحبوبتي وحبوبتك ! وطلع غردون ما عندو التكتح ! زي نعاج بورتسودان المزورات ديك ! صاحبه ساااااكت زي الخواجات ما عندو !! مخير الله ..

  6. عدنا .. السلام للكل ..

    1. عودا حميدا وحمدلك بالسلامة

      1. سلمك الله يا بت السودان ،، إيه اخبار السودان ؟ هو لسع الجماعة قاعدين ؟ ما وثبوا ؟

    2. وعليكم السلام يا أمريكي ،ويين انت رجعت امريكا ولا لسه في السودان،

      1. وعليكم السلام أخي عبيد وكل الاخوة .. كنت في سياحة الي نيويورك العرب ( دبي ) اااه يازمن !! قيل ان الشيخ زايد عليه رحمة الله أتي الي الخرطوم في سبعينيات القرن الماضي وطلب من السيد كمال حمزة ان يجعل من دبي عاصمة كالخرطوم .. اااه اااه يازمن ،، الله يجازي الي كان السبب ياعبيد ،،

  7. اقتباس :

    02-12-2014 12:11 PM
    سيف الدولة حمدناالله

    لفت إنتباهي إعلان نُشر بالصحف اليومية بقيام مسابقة لإختيار “أجمل” فحل شامي بالسودان، وقد جرت المسابقة – بالفعل – بحدائق قاعة الصداقة بالخرطوم برعاية وزير الزراعة بولاية الخرطوم وفي حضور حشد من المسئولين ورجال الأعمال والجمهور بحسب ما جاء في الصور التي تم عرضها بعد قيام المهرجان.
    الفحول المقصودة هي “تيوس ماعز” تم إستجلابها من الشام، وشمل المهرجان مسابقة أخرى لإختيار أجمل أنثى من نفس الفصيلة، أي “غنماية” شامية، وقد أوضح الإعلان شروط الإشتراك بالمسابقة، من بينها أن يكون “الفحل” أو الماعز في صحة جيدة، وأن يكون له أو لها مظهر لائق (أي والله)، وأن يتم تنظيف وتجهيز الفحل بقص أظافره وترتيب شعره (أي والله)، وأن تُدفع عن كل فحل أو ماعز رسوم بواقع (500) ألف جنيه للرأس، ويتحصل الفائز في أي من المسابقتين على جائزة نقدية مقدارها خمسة مليون جنيه علاوة على كأس المهرجان.
    وبحسب ما ورد في إعلان صاحب المزرعة الذي قام بتنظيم هذا الكرنفال، فإن الفحل “المميز” يبلغ سعره في الخرطوم اليوم (10) ألف دولار (الفحول والماعز “غير المميزة” تتراوح اسعارها بين 3-4 ألف دولار بحسب الإعلان)، وبحسب رأي صاحب المزرعة فإن من شأن هذه الأسعار أن تُسهم في مكافحة الفقر بلجوء الغلابى لتربية هذا النوع من الفحول والماعز وارد الشام. (لعشاق هذه الهواية يمكن مشاهدة صور الفحل الفائز وذلك بالنقر على محرك البحث بشبكة الإنترنت).
    في نفس اليوم الذي إلتأم فيه هذا الحشد لإختيار الفحل الشامي الفائز، كان هناك جمهور آخر إحتشد في أحد أحياء الخرطوم لمتابعة مشهد تنخلع له القلوب من موضعها، والمشهد الذي جرى تم عرضه بعدد من المواقع الإلكترونية، يصور طفل صغير قام بتسلق عمود كهرباء ضغط عالي بقصد وضع نهاية لحياته وذلك بسبب عجزه عن مغالبة الأسى الذي يعيش فيه لعدم مقدرته على توفير الدواء لوالدته المريضة وهو يراها تكابد الآلام.
    المشهد يصور جسد الطفل يتدلى من بين الأسلاك وهو في إرتفاع شاهق، ووسط هذه المأساة ظهرت بطولة صبي آخر أخذ يتسلق عمود الكهرباء بيديه وهو يحاول الوصول لرفيقه المكلوم للإمساك به وإثنائه عن فعله، ولم تكن المخاطرة التي واجهها هذا البطل المجهول (الإرتفاع الشاهق والتيار الكهربائي) أقل من التي أوجد نفسه فيها الصبي المكلوم، ولم تحتمل أعصابي متابعة هذا المشهد حتى النهاية، والذي يزيد من قدر التوتر فيه صراخ الجمهور وعويل النساء طوال فترة عرض الشريط.
    فيما بعد، علمت بأن الفتى المكلوم قد هوى إلى الأرض من ذلك الإرتفاع ولقى حتفه.
    يا وجعي على والدة هذا الطفل المفجوعة، تُرى ماحال هذه الأم الثكلى!! هل نجرؤ أن نواسيها !! وما عسانا أن نقول لها !! بل ما عسى هؤلاء الشيوخ الذين يتصارعون على الحكم أن يقولوا لها !! وكم مثلها من الأمهات والآباء والأطفال الذين يفتك بهم المرض وهم يصارعون الألم في صمت ببرشامة بندول!! (أوردت الصحف أن 30 طفل يقومون بغسيل الكلى يومياً بالخرطوم و50 مثلهم في واد مدني).
    انتهي ..
    علي الطلاق يدوني سلطة , أي زول جايب تيس يتباهي بيهو , اخلي تيسو يركبه قدام الناس !!
    تيس شامي بي 10 الف دولار !!! هي الشامية في عضما بي 500 دولار !!
    شعب هايف ! والله كان ربنا صلح حالنا , شنبي ده يقوم في أمي !!!

    1. والله يا جنوبي كنت ماشي كويس وشديتنا بمواضيعك الشيقة لكن !! خربتها بركوب التيس ،، يا أخي كان ممكن تساهم معاهم ( وتدلك ليهم التيس بالدلكة ) تحياتي ..

      1. انا كان لقيت كنت دلكت وزير الزراعه بالدلكه … للتيس !!

      2. وينك انت يا نانو ؟ انا كانت في سفرية .. يعني كلام أخونا جنوبي ده عاجبك ؟ جنوبي ده لازم نبعدو من الفرعون ده ..

      3. ههههههههههه,,,
        ممكن اشارك ؟؟

      4. كلم نانو وكلم بان كي مون ذااتو !
        خلي يجوا يورونا رأي الدين و اللا دين شنو في دولة تعمل مسابقة ملك جمال التيوس والناس ما لاقيه تاكل !! جنوبي تطير عيشته !

      5. انا كان لقيت كنت دلكت وزير الزراعه بالدلكه … للتيس !!
        هعهعهعهعهعهعهعهعهعهعهعهعهعهعهعهعهعهعهعهعهعهعهعه
        هعهعهعهعهعهعهعهعهعهعهعهعهعهعهعهعهعهعهعهعهعهعهعه

  8. مأساة بهنس مرة اخرى : التشكيلي ﻋﺎﻣﺮ ﺻﺎﻟﺢ مشرد في شوارع اليمن
    مأساة بهنس مرة اخرى : التشكيلي ﻋﺎﻣﺮ ﺻﺎﻟﺢ مشرد في شوارع اليمن
    02-12-2014 01:05 AM
    ( فيسبوك – حريات )

    تداول نشطاء عبر مواقع التواصل الاجتماعي صورة للفنان التشكيلي عامر صالح في حالة يرثي لها .

    وهو ﺳﻮﺩﺍﻧﻲ ﺍﻟﺠﻨﺴﻴﻪ ﻣﺴﻘﻂ ﺭﺃﺳﻪ مدينة ﺍﻟﺪﻭﻳﻢ بولاية ﺍﻟﻨﻴﻞ ﺍﻻﺑﻴﺾ ﻋﻤﺮﻩ 63 ﻋﺎﻣﺎ … ﺣﺼﻞ ﻋﻠﻰ ﺑﻜﻼﺭﻳﻮﺱ ﻓﻨﻮﻥ ﺟﻤﻴﻠﻪ ﻣﻦ ﺟﺎﻣﻌﺔ ﺣﻠﻮﺍﻥ – ﻭﻓﺎﺯﺕ ﻟﻮﺣﺘﺔ ﺍﻟﺸﻬﻴﺮﻩ ﺑﺎﺳﻢ ” The way to glory ” ﺍﻟﻄﺮﻳﻖ ﺍﻟﻰ ﺍﻟﻤﺠﺪ ﺑﺎﻟﺠﺎﺋﺰﻩ ﺍﻟﺒﺮﻭﻧﺰﻳﻪ ﻓﻲ ﺍﻟﻤﻌﺮﺽ ﺍﻟﺬﻱ ﺍﻗﻴﻢ ﻓﻲ ﺭﻭﻣﺎ ﺳﻨﺔ 1984 ﻟﻠﻔﻨﻮﻥ ﺍﻟﻌﺎﻟﻤﻴﻪ .

    وهو ﺧﺒﻴﺮ ﺁﺛﺎﺭ ﻋﻤﻞ ﻣﺪﻳﺮﺍ ﻟﻤﻌﻬﺪ ﺍﻟﻔﻨﻮﻥ ﻣﺤﺎﻓﻈﺔ ﻋﺪﻥ ﻭﺍﻧﺘﻬﻰ ﺑﻪ ﺍﻟﺤﺎﻝ ﺍﻟﻰ ﺍﻥ ﻳﻜﻮﻥ ﻣﻘﺎﻣﻪ ﺑﺸﻮﺍﺭﻉ ﺍﻟﻴﻤﻦ ﻭ ﺗﺤﺪﻳﺪﺍ ﻣﺪﻳﻨﺔ ﺍﻟﺤﺪﻳﺪﺓ ﺑﻼ ﻣﻠﺠﺄ ﻳﺘﻨﻘﻞ ﺑﻴﻦ ﺍﺯﻗﺔ ﺍﻟﺤﺪﻳﺪﻩ ﻭﺷﻮﺍﺭﻋﻬﺎ … ﺗﺎﺭﺓ ﻳﻨﺎﻡ ﻓﻲ ﺍﻟﻜوﺮﻧﻴﺶ ﻭﺗﺎﺭﻩ ﻓﻲ قارعة ﺍﻟﻄﺮﻳﻖ … ﻭﺍﻟﺠﺎﻟﻴﻪ ﺍﻟﺴﻮﺩﺍﻧﻴﻪ ﺑﺎﻟﺤﺪﻳﺪﻩ ﻻﺗﺴﻤﺢ ﻟﻪ ﺑﺎﻟﻨﻮﻡ ﺣﺘﻰ ﻓﻲ ﻓﻨﺎﺀ ﺍﻟﺠﺎﻟﻴﻪ …

  9. وكما ورد بالراكوبه،
    يعني كل زول بي لوحه بتاعتو،ولازم يختها في ضهرو،ههههه،واو جديده يالفاتح وقرار غير مدروس صح،
    كشفت وزارة الداخلية عن اتجاه قوى لإصدار قرار جديد يقضي بإلزام أي مواطن يرغب في إبرام عقد لبيع عربته لمشترٍ آخر بالاحتفاظ بلوحة العربة ووضعها في العربة الجديدة التي يريد امتلاكها. وأرجع وزير الدولة بالداخلية بابكر دقنه الخطوة إلى وجود مشاكل صاحبت تكرار عمليات بيع السيارات من مشتر لآخر، وقال إن اللوحة ستكون مملوكة لصاحبها يتحمل أي مسؤولية تجاهها. وأشار إلى أن المشروع سيخضع لدراسة قبل البت فيه، وتوقع مساهمة القرار في انخفاض مستوى الجريمة في سرقة السيارات، ونوه إلى أن المسألة حال اكتمالها ستخضع لضوابط مشددة وربطها بالرقم الوطني.

    1. تحياتي أخي عبيد ولكل الأخوة .. بعد ربع قرن من الزمان لأول مرة اسمع بقانون له قيمة ،، حقيقة أخي عبيد وحسب تجربتي في بلاد العم سام ، يجب ان تكون لوحات السيارة ملك لصاحبها ان أراد شراء سيارة أخري عليه استعمالهما مرةً أخري بعد إكمال الإجراءات بمكتب الحركة ، وان لم يرغب في شراء سيارة أخري يقوم باسترجاع اللوحات الي مكتب الحركة ، ومتي ما أراد شراء سيارة يمكنه الحصول علي لوحات جديدة ، وهذا الإجراء له العديد من المزايا ، كتقليل جرائم السرقة ، والتزوير في بيع العربات ، مع ملاحظة : ( ١ ) عند بيعك لسيارتك عليك بنزع اللوحات فوراً ، حتي لا تستخدم في جريمة باسمك ، وفي بلاد العم سام ( السماء قريب أو كما قال الراعي ) ان يتركك تذهب بالسيارة متراً واحداً بعد شرائها . ( ٢ ) المحافظة علي اللوحات واحكام وضعها بصورة تمنع سرقتها .. أخي عبيد ارجوا الموافقة علي هذا المقترح ، حتي نتباهي بان لدينا ( حيكومة ) .. أخي جنوبي رأيك شنو في الغنماية الأردنية الفائزة ؟؟!!

      1. يعني يا جنوبي اللوحه ح تبقي زي الرقم الوطني وانا عندي في شهاده الرقم الوطني المهنه طبيب وفي البطاقه المهنه اعمال حره واها لوحه العربيه ح يكتبوا في المهنه شنو منسق تتويج لملكات الغنامايات ولا شنو،حاجه تحير

    2. يعني الدار يسرق عربيتك بجي يستأذنك !؟ ولا نقعد محل ما نقيف نفك اللوحات ونختها في جيبنا , وبعد نقضي غرضنا تاااني نجي نركب اللوحة ونسوق عربيتنا !!! قانون بليد
      هنا في السعودية لما تشتري سيارة , اول شئ البيع يتم عن طريق معرض سيارات , يمشوا البائع والمشتري ويوقعوا علي عقد البيع , ويتم حجز السيارة في المعرض , وصاحب المعرض يمشي المرور وبموجب عقد المبايعة يتم تغيير ملكية السيارة من البائع للمشتري والمرور يصدر استمارة باسم المالك الجديد . حتي بعد داك المشتري يستلم السيارة , لكن قبل ان تنقل الملكية في اسمه لو روحو طلعت ما يقدر يطلّع السيارة من المعرض .
      هسي يعني ناس المرور حيعملوا شنو ؟ الا يقعدوا يومهم كله يسجله تم بيع الكورلا موديل كده ورغم الشاسيه كده والتي كانت لوحتها رغم كده , لفلان الفلاني وبما ان فلان الفلاني يملك لوحه قديمه للأتوس موديل كده وشاسيه رغم كده فقد تم قلع اللوحه رغم كده للاتوس موديل كده وتركيبها في الكورلا موديل كده وبما ان بائع الكورلا موديل كده قد اخذ لوحاته معه وهي رغم كده فسننتظر حتي يفتح الله عليه بشراء عربية لتركيبها فيها !!
      بالله ده كلام ده !!!
      ياخي عربية ملفها جااااهز في المرور يغيروا اسم المالك ؟ ولا يدخلوا في ده كله ؟
      الغنماية الاردنية ياتا !؟ الكان لابسه مايوه أزرق !؟

      1. لكن ياجنوبى فى السعودية لك حق امتلاك وبيع اللوحة !
        ولك حق الاحتفاظ بها ,,
        انت ما لابس ولا شنو ؟؟؟
        ترراااااااااااااح

      2. قصة حفل ملكة جمال الغنم الفي السودان دي شنو ؟؟؟؟؟

      3. ما كلكم غنم في نظر الجماعة ،، عندكم شك ؛:؛:؛:

      4. يا شمباتي لك حق ! كما قلت وده اجراء بيتم في المرور وتعمل تعديل بيانات لوحة السيارة الانت اصلا بتملكها لكن باقي معلومات السيارة كما هي ويمكن الاحتفاظ او بيعها لأنها ما الاساس لكن في السودان دايرين يبقوها الاساس يعني اقوي من معلومات السيارة الطلعت بيها من المصنع.
        بس هنا ما ممكن بيع سيارة بدون لوحة الا في حالة تمشي تعمل ليها اسقاط في بيانات المرور وفي الحالة دي بتتباع لناس التشليح ( خرده زي الحلبي حق ام درمان ) . لكن سيارة صالحة للاستعمال ما بتتباع بدون لوحات .
        هسي لو فرضنا زول عربيتو برادو وسرقوها وقلعوا اللوحات وركبوها في كومر , اها الزول ده يعتبروهو سيد الكومر !؟

      5. أخي جنوبي ،، فات علي ان اذكر في تعليقي السابق ان في بلاد العم سام حيث يطبق قانون ملكية المواطن للوحة سيارته ،، وذكرت فوائدها ،، ان كل أفراد الشرطة ( بغض النظر عن الرتبة ) كل شرطي يقود سيارة شرطة مزودة بكومبيوتر به معلومات كل مواطن يحمل رخصة قيادة أو إثبات شخصية في كل الولايات ، وبه كل تفاصيل المركبات في كل الولايات ، يعني اذا هنالك شخص بلغ عن لوحته المسروقة في واشنطن ، ما عليه إلا التبليغ وهو علي ثقة بان الشرطة سوف تحصل عليها في اي ولاية أخري خلال سويعات ،، حتي ركبها في كومر يا جنوبي ، وصاحب البرادو بعطوهو رخصة مؤقتة والمسروقة بتكون ألغيت ، يعني يا جنوبي صاحب الكومر بكون سائق كومرو من غير لوحات ودي جريمة جنائية في دولة القانون يا جنوبي ،، صدقني يا جنوبي ده القانون الوحيد الصاح الذي اسمع به خلال ربع القرن الماضي ، بس .. مافيش شرطي حايم كداري ، كل شرطي سائق عربية شرطة مزودة بكومبيوتر به معلومات كل مواطن امريكي وكل مركبة ( في الخمسين ولاية ) ، اديك معلومة إضافية يا جنوبي ،، تخيل ابوروف بتاعت أصحابنا ،، بتكون مغطاة بعشرة سيارات شرطة ، وانت عشان تبلغ ما محتاج تمشي القسم ، قبال تنتهي من مكالمة الهاتف بتلقي الشرطي واقف ليك قدام الشقة ، يأخذ أقوالك ويقول ليك شكراً ، مافيها حق فطور ولا غداء .. القانون المقترح ده يا جنوبي والله روعة ،، لكن بالمواصفات المذكورة أعلاه ،، اخبار التيس شنو يا جنوبي ؟ انا كنت في دبي وجبت معاي بخور Touch me بس التيس يشومو بس ..

      6. تصحيح ،، يا جنوبي جبت معاي بخور تطش مي ،، بس التيس يشومو ..

      7. طيب هم ما يفعلوا القانون ! ليه يعملوا قانون جديد ؟
        يعني كل من يبيع عربية وما يسجل المبايعة في المرور وينهي مسئوليتو عن العربية المعنية يكون مسئول عن كل ما يحدث بها . وبالتالي في المرور بتكون عربية جنوبي اعتبارا من يوم كده بقت حقت امريكي وتبقي انت المسئول عنها من تاريخ البيع ! لكن لو انا قلعت اللوحات وعملت السبعه وذمتا يعني انا ما مسئول ؟ ويجيني الشرطي اقول ليهو هيييييييي لوحاتي تحت مخدتي شوف العمل العمله دي منو !
        هنا يا حبيب لو اتسرقت سيارتك طوالي تمش تفتح بلاغ ويبدأ البحث عن عربيتك ومن لحظة فتح البلاغ لحدي ما يلقوا العربية بتكون ما مسئول جنائيا عنها . اما لو اديت أي زول عربيتك يسوقا بتكون مسئول عن أي شئ يحدث بها حتي لو قاتل رقبة بتركب فيك . عشان كده هنا الناس حريصة وما بتدي عربيتا لأي زول . ولو باع ما بيسلموك العربية الا بعد تحويل ملكيتها عليك .
        Touch me رغم انو اسمه قلة أدب لاكين ريحته سمحه , طبعا هنا في السعودية تم تقليده وخربوا سمعته لاكين الشركة غيرت الاسم ل ( النبيل ) nabeel .

  10. جاينكم رجال بي شطورهم ! برنجية الليلة شفتها في الراكوبه وده طرفي منها ! الليلة خلوها للحريم يا عبيد ..

    1. أوكي ياحبيب وما تقول عندنا عواصف بي جاي

    2. افو يا جنوبي ما قلت تيس ،،

  11. ” محمد طه القدال ”
    نِحنَ سَوادنه مُشهادنا الشرف والعِفَّه
    نحن اهل العَوَض زِدنا المكارم كَفَّه
    راضعين القِـيَم شَطْر الحَرَم والشَّفَّه
    عينَّا ملانه إيدْنا الحَاشا خَاتيه الخِفَّه
    عاصيه قلوبنا للقال يَنْهَرا يْطَـفْطِفَّا
    حَتْ راعينا حارِصْ لا بَلَسْ لا لَفَّ
    لا هَمَّل سَـعيتو ولا فَرَزْها كَـتَفَّا
    لا جَربَعْها لا سـاوَم على طارِفَّـا
    ما هَمَّاهو مال الكون، وعادْم السَفَّه
    ما خاف البَشَر عين الله بس خايـفَّا
    المارضِنِّي دول أهَـل الدُقون ام تِفَّه
    هي التستاهل الجَز والحَلِق والنَتْـفَه
    يا ربي الدروس يا الله فَـكُّوا حَرِفَّا؟
    ياتْ مَن يؤتمَن خَان للأمانة شَـرَفَّا
    وين ما قَـبَّل اب طير سلفَقا ولفلَفَّا
    أب خشماً خَمَش لا دين وَزَع لا وَفَّى
    أدَّوهو الضمان وسقوف بنوكنا نَسَفَّا
    قام من نومو مَلا قَـدُّومو لاما سَرَفَّا
    لا وَرْديَّة قـام لا ساق بهيمة عَلَـفَّا
    ما بيحَموها خابرين وين بياكلوا كَتِفَّا
    والعين ما بْتَرِف إن الضمير ما رَفَّ
    دِغميس الضَلام بُكره الصُبُحْ يكْشِفَّا
    والفِي السيله مضمون البِسيل جَارِفَّا
    مابدوم الكِضِبْ باكِـر تـشيلو التَّفَّه
    والهَبُو والـرماد والهايفَه والـهايفَّا
    تَنْقُزبو الهبوب هَبَبَايها عاتي النّـفَّه
    … … … إلخ. إلخ
    وشِلْتَ النُقطة، خُتْ النقطة يا العارِفَّا.
    ————
    بحري _ وأنا وانت والنيل .. والنور الجَهَـر

    1. أنقروا النقطة شالا من وين ؟
      انا غايتو عرفتها ! ودي فايدة السفاهة مرات !!!!!
      يلا يا عبيد وامريكي وحنين وكتلوني والمندهش ونانو ذاااتو معاكم , ممنوعى دخول النساء شان ما نبقي في سجمي !
      شمباتي وركس ما ذكرتكم لأنكم معاي في سرج وااحد , بس قاعدين تعملوا بودرة وروج وتتجملوا قبل المرقه وانا بغسل وشي وابقي مارق !, عرفتوها يا مساخيط مُش ؟

      1. الله يهدينا ويهديك يا جنوبي ..

      2. وين ما قَـبَّل اب طير سلفَقا ولفلَفَّا

      3. هيييييييييييييييييييييي ,,,
        سرج شنو كمان ؟؟
        شرع الله يبرا من الشفوت ,
        توووووووووووووووووووووووت

      4. والله يا أمريكي كان جينا للجد جنوبي هيّن، انا والله بخاف من شمباتي دا!!!!

      5. الله يكمّلك بعقلك يا نونا .. وريهو الغبيان ده !
        ههههههههههههههه

      6. ( للذكر مثل حظ الانثيين ) لسع يا جنوبي بدري عليك .. يا قلبي لا تحزن ..

      7. حنين .. فزت معانا بي قلوبيه شان تمسك بيها أي طير حايم ..

      8. ياجنوبى إنت من زمن القلاليب . القلاليب الزمن دة بقت ما بتجيب طير كبار أنا محتاج لى خرطوش عشان أجيب لى طييييييير كبييييير زى طير ال…. طير طير يا ….

      9. نونا يا ظالمااااااااااااااااااااااانى ,,
        اهئ اهئ اهئ

  12. انتو الاستاذ كان قال الخميس القادم ولا الخميس القاااااادم ؟

    1. هههههههههههههههههههههههههههههه,,
      انا ذاتى مستحير لكن مستحرم !!
      يكون هناى ؟

  13. يا جنوبي انتا عندك فكره الاحتجاب ده ح يكون لبتين يعني كدي تاوق لينا كدي علي ناس الراكوبه وورينا الحاصل شنو،،

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: