تزوير إستغراشي

أطباء مزورون :
تناقلت الصحف مؤخراً أخباراً بالقبض على أكثر من 40 طبيباً مزيفاً (عندهم عيادات) يقومون فيها بفحص المرضي ووصف العلاج لهم فإذا هذا هو العدد المكتشف في (الطب العديل) ترى كم هم الأطباء المزيفون في مجال (الطب البديل) ؟ أعشاب ورقية شرعية !

معلمون مزورون :
في المدرسة التي يدرس بها إحد أبنائي جيئ بمشرف أكاديمي علمت بانه يتعامل بقسوة شديدة مع التلاميذ فذهبت وتناقشت معه ولأن العبدلله عمل في حقل التدريس أكثر من ربع قرن فقد تأكد له تماما بأن هذا المشرف (ما مسك ليهو طبشيرة في حياتو) فأخذ يسأل (تحت تحت) عن سيرته الذاتية فوجد أنه كان يعمل مضيفاً أرضياً قبل أن يتم الإستغناء عن خدماته !

أوراق عملة مزورة:
لا يمر يوماً واحداً إلا وتقرا في الصحف عن القبض على عصابة لتزييف العملة وبما أن العبدلله قد تلقى دورات متقدمة في التزييف الأليكتروني بحكم تخصصة وبما أنه يوميا تقع في يديه العديد من أوراق العملة المزورة (الما بتغباهو) أثناء تعاملاته المالية فهو يناشد المسؤولين القيام بإستبدال هذه العملة المتداولة بإخري يستحيل تزييفها بسبب الخامة المصنوعة منها ( حكاية الشريط المعدني والعلامة المائية والشنو ما
بعرف دى بقت تتعمل بسهولة) ! ومن هذه المواد مشتقات مادة البوليمر مثل biaxially oriented polypropylene
ممكن (خبير) يقول ليا تكلفة الطباعة عالية وفي الحالة دي نقول ليهو ما أغلي من العملة التالفة بسبب التمزق والعملات المزورة التي تهدد إقتصادنا (وهي قصة ما ح تنتهي بالشايفنو ده)

مرضعات مزورات :
تم توظيفهن في وظيفة (مرضعات) بدار المايقوما للأطفال فاقدي السند ولم يكونو غير رجال كاملي الرجولة (القصة ما فيها زراعة أعضاء زي النعاج) رجال بي (شنباتم) !

رجال أمن مزورون :
لا تخلو الصحف من أخبار القبض عليهم يوميا وهم يمارسون إبتزاز المواطنين بشتي الحيل وإقتلاع ممتلكاتهم من موبايلات ومبالغ مالية وخلافه ثم رميهم في العراء ! المشكلة الواحد من ديل وبعد ثبوت التهمة ومحاكمتو يدوهو ليك ستة شهور سجن ! عشان يطلع تااااني ويواصل (نهب) !

خراف مزورة :
بالطبع من أعجب أنواع التزييف وأغربها تلك القصة التي رواها لنا الأخ الزميل الطاهر ساتي عبر زاويته المقروءة بصحيفة السوداني قبل أيام والتي تتحدث عن إكتشاف نعاج معدة للتصدير وهي في شكل خراف بعد أن تمت زراعة أعضاء ذكورية لها

– من هم هؤلاء العفاريت الذين هم وراء هذه العملية؟
– كيف مرت هذه الخراف المزورة من جميع اقسام الفحص حتى وصلت لمرحلة المغادرة؟
– هل قام بعمليات الزراعة الجراحية طبيب متخصص وللا طبيب مزيف ؟
– هل تمت في عيادة بها حجرة عمليات مجهزة ومصرح بها وللا في (عيادة المحجر ذاتو)
– هل تمت العملية تحت البنج الكامل أم الموضعي (تفرق طبعن) ما برضو دي أرواح وكدة
– هل الزراعة تمت عن طريق الجراحة أم اللصق وإذا كان اللصق ما هي المادة المستخدمة (أوعا يكون صباع أمير) !
– ما مصير (الذكور الذين تم إستئصال أعضائهم)؟
– من هو الشخص المسؤول من فحص هذه الخراف صحياً (وما لاحظ حاجة) !
– هل سيقدم هؤلاء الذين يخربون إقتصادنا إلى العدالة وللا (نعمل ليهم كسرة) !

كسرة :
التزوير بتاع النعاج ده إسمو تزوير إستغراشي !
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و+و؟

Advertisements

38 تعليق

    1. مااااا قلتو الخميس ! خميسكم الزي ليلة القدر ده !

  1. رقم واحد استغراشا

    1. اقصد مشتغرشا،انا غايتو ما مزور،ههههههه

  2. انت بدل تتعب نفسك وتكتب عن المزور الأفضل تشوف الما مزور شنو؟؟؟؟

    1. د. نادية مرحب بيك
      انت د. نادية بتاعت علم النفس ؟

      1. إنشاء الله تكون بتاعت علم نفس يا جنوبي ، انا متبرع اوديك ليها وعلي حق الكشف والامجاد ، وكان طلعت مزورة ،، عز الطلب ،، عشان تروح فيها يا جنوبي ونرتاح من خرمجتك دي ، قال كورة تنس ، كورة تنس في عينك ،،

      2. اها يا جنوبي جاتك باللغة الهيموغروفية أعيدها ليك ولا فهمتها ؟

      3. هي الهيموغرافية دي ما لغتنا الام لاكين الله غالب عربتونا وبشتنتونا !!
        ههههههه اديني حق الكشف والامجاد فييييي يدي براااااااي بطيب

  3. ياعبيد شكلك الليلة عامل زي البرلومة .. مبروك

  4. أطباء مزورون = مافي صحة
    معلمون مزورون = مافي تعليم
    عملة وخراف مزورة = مافي اقتصاد
    رجال أمن مزورون = مافي أمن وطمأنينة
    مرضعات مزورات !! أجي ياااااااا سعد الحليمية !

  5. الموضوع ده ذكرني نكته ممكن نقول عليها فحم مزور ،، يحكي ان صاحب دكان ذهب الي الزريبة ليشتري فحماً وكان الوقت ليلاً ، فأعطاه صاحب الزريبة ( طلحاً ) ، صاحب الدكان شال الطلح ومشي ولع النار ووضع القدرة في النار ،، صاحب الزريبة قام الصباح مشي لي بتاع الدكان ، سالو ، اها الفول كيف ؟ بتاع الدكان فال ليهو والله من الصباح بحاول ادخل الكمشة في القدرة ما عايزة تخش !

    1. أجيّ !!!
      عشان لقيتو ( نانو أبو أحمد ) مافي وعاوزين تتضرعو !!
      أصبرو بكلمو ليكم

      1. يعني يا المندهش الفرق شنو ما برضو النعاج ركبوا ليها أعضاء ذكورة ، موش البروف قال كده ؟

  6. بمناسبة الخراف دي !!
    غايتو كل واحد يخلي بالو من لغاليغو ،،، بعد شوية باقي الشعب الفضل كلو ح يبقى نعاااااج !!

    1. مع المرضعات المزورات ديل ! لغاليغنا بضاعة بايرة يا المندهش , وصي الحريم يخلن بالهن من شِطورن ,,

      1. جنوبي نرجوا الالتزااااام ..

      2. هوووووي يا جنوبي
        وثبت قلت اندغم معاكم شوية في صيرورتكم دي لكن اندغامي زاد وجبتو لي مشروعية في الأحابيل أها انا ماشي !!!

      3. والله يا امريكي انت بس بتذكرني ود حلتنا زمااااااااان كانت كورة التنس حقتو , هو يشوت ضفاري ومن واحد فينا يشوت الكورة ضفاري يقول ليهو انت ما تلعب معانا , بتقد لي كورتي !
        هسي انت والمندهش انا سويت شنو غير رددت كلامكم ؟ ولآ خطي ما سمح !
        المندهش سألت الله تندغم في خط الملك فهد الساعه واحدة ضهر , وتكون العربات ماشه مشي النمل في صيرورة وانت في الزنقة دي تتزنق موية وما تلقي مشروعية دخول الحمام !

  7. و الغريبة الشهر دا كلو كان شهر التزوير !!
    الراعي بتاع النعجة طلع مزور
    والسيناتور الأمريكي طلع مزور
    وحفيد غردون طلع مزور
    وخطاب الوثبة طلع مزور
    وروحنا زاااتا طلعت !!

  8. التزوير و التوزير فرق الترتيب بس الاخرة واااااحدة

  9. هل سيقدم هؤلاء الذين يخربون إقتصادنا إلى العدالة وللا (نعمل ليهم كسرة) !
    يا دكتور تعمل كسرة لشنو وتخلي شنو – ياربي تكسر نزيف في كل مخرب – وما القى ليهو دكتور مزور اركب ليهو بدائل.
    بعدين خلينا نستعدل كسرة هيثرو. يا ود بدر من الفقر.

  10. أكسر من هسي وبالله كبًر الكسرة

  11. جامع مزوّر :
    تغرب المواطن عن اهله سنوات واشتري قطعة ارض لتستره واسرته وبنا فيها غرفة وحمام وسور , وهو في اجتهاد ليتم باقي البنيان , اعتدت الدولة علي ارضه وازالت الغرفة والمنافع والسور وشيدت مكانه مسجد ( ليذكر فيه اسم الله ) !!
    اتي المسكين في اجازة ليجد منزله مسجدا ! فشكا وبكي ولا مجيب ! استنفذ كل اجازته محاولا استعادة منزله وهو في سعيه هذا انتهت تأشيرة الخروج والعودة , ففقد بيته وفقد عمله .
    هيئة علماء السودان: لا تجوز الصلاة في مسجد إبراهيم شمس الدين
    قال المثل : تموت موت الجداد .. لا تلقي الجامع لا تلقي و؟؟؟

    1. ما جاب كراكة وهداو ؟؟

      1. ياشمباتى الزول دة ماعندو إستطاعه عشان يجيب ليهو كراكه .
        كل البقدر عليهو إنو يخش الجامع يبول فيهو …

      2. يا اخوة السلام وعليكم ، الفتوي تحتمل الصواب والخطأ ، مادام هو بيت من بيوت الله يرفع فيه الأذان ، يجب الا نتعدي الخطوط الحمراء ، والله اعلم ..

      3. والله قال اقلعوا حق الناس وادوني ليهو يا امريكي ؟
        ربنا جعل الارض كلها مسجد للناس وربنا ما محتاج عشان يقلعوا حق زول غلبان ويدهوا ليهو لأنه هو المعطي لكل شئ !
        ليه ما بنوا المسجد في بيت ابراهيم شمس الدين ذاتو ؟ ولا بيت الزول ده ياها محل دبابة ابراهيم وقفت !!
        حتي لو الحكومة ما كان بنت المسجد في بيت الزول ده وخصصت ارض فاااضيه ملك الدولة , برضو ما بيحق ليها تقول المسجد حق ابراهيم لأنو قطعة الارض حقت الشعب كله , وهبها الله لنا , هل نحنا الشعب اتنازلنا عن الارض ؟
        الاذان يرفعوا في الباطل ؟ جنس سواتم دي ياها البتخلينا نتعدي الخطوط الحمراء !!
        واخيرا إن الله طيب لا يقبل الا طيبا
        هسي مسجد الشهيد ده ذاااتو لو كان بنوه فندق ودخله يرجع للايتام والفقراء , ياتو الكان بيرضي ربنا ؟ بناء مسجد في محل ما فيهو سكان ولآ فندق يرجع دخله للفقراء والايتام ؟
        خلي داير تفرملنا بالدين ! شوف يا حبيب الكلام ده يكون مقبول في حالة انو الحي ده ما فيهو أي مسجد ويتم ترضية وتعويض صاحب القطعة ليتنازل عنها بنفس راضية , لكن غير كده ده اسمه قلع ..
        صلاة الناس مقبوله ما قلنا شئ , لكن ابراهيم شمس الدين كان لقالوا حبة أجر ! ده شنبي !!
        ونستني رأي شيخ نانو ابو احمد …

      4. والله انت يا جنوبي مرات تقول كلام زي العسل ومرات تانية تصوط صواطة عدوك ، المهم انا لا اقر اخذ ممتلكات المواطنين بغير وجة حق فالقضاء موجود ، وعدالة السماء سوف تعطي كل ذي حق حقه ، إنما أردت ان أقول يجب ان نعظم بيوت الله في الأرض ما دامت قائمة ، لا نتبول فيها ولا نرفع أصواتنا داخلها وووووو ، والآخرة خير وابقي يا جنوبي ، وعسي الله ان يجعل ثواب المسجد لصاحب الأرض ، والله اتمني اذا كنت مكانه ، الخير فيما أراده الله ..

  12. ههههههه لا تلقي هايلوكس الفينات

  13. انا بصراحه مستغرش ببساطه ايه الصعوبه في القبض علي الجاني واثر فاسه بائن في النعاج ؟

  14. نحن في 2014 ولي هسي تعاملاتنا أغلبها بالكاش , في حين أنه حالياً في دول بقى التعامل بالكاش فيها شبه معدوم ومحظور , نحن لي هسي الناس تجيب القروش بالشوالات , و الدولار متدفق في السوق ما معروف جاي من وين وماشي وين , المفروض الحكومة تبدأ التفكير جدياً في تحويل كل تعاملاتها الى تعاملات بنكية الكترونية , بحيث أنه المواطن كان داير يمشي يقضي ليهو شغلة في مصلحة حكومية الدفع كله يكون بالبطاقات البنكية , التعامل لما يكون بنكي بيساهم بشكل كبير في القضاء على الاختلاس و الاحتيال و التزوير وغسيل الاموال , لانه العملية كلها حتكون أرقام وتحويل من حساب الى أخر فمن المستحيل أن يتواجد طرف ثالث غير مرغوب به أول مرحلة للقضاء على الفساد تكمن في التخلص من الكاش ده , لانه الكاش ده هو أس البلاء وبسببه البلد في حالة أنهيار أقتصادي بسبب الاختلاسات و التعاملات الغير نظيفة والاموال الغير شرعية و الاحتيال و النصب على المواطن المغلوب على أمره

    1. يا زول انت جادي ؟ انت قايل روحك في امريكا ولا شنو ؟

      1. الصعب شنو في كده , هسي في السودان أنتشرت مكائن الصراف الالي , وأصبح التعامل بالبطاقات الالكترونية موجود فعلاً , لكن محتاجين أنه المفهوم ده يتوسع أكبر من شكله الحالي , خصوصاً أنه الوسائل والاجهزة متوفرة و موجوده

      2. عليك الله لمن تجي تنوم اتحصن ..

  15. حقو تاني لما تكتب ياود جبرا أكتب عن الحاجات الشاذة التي تتعارض مع المشروع الحضاري والتي هي لله مثل الأمانة وعدم أكل مال السحت وأمثلة لمواطنين يحافظون علي المال العام ده السلوك الغير سوي الذي يراه دعاة واصحاب المشروع الحضاري .

    1. احييك

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: