وبعد ما تكملوها؟

ما أن قام العبدلله مؤخراً بنشر ذلك المقال (عملتوها ظاهرة) الخاص بالتعدي على ميدان (بحري الشعبيية) من أجل تحويله إلى (مول) للتسوق ثم أتبعه بالمقال الأخير والذي بعنوان (عملتوها شينة) والخاص بالتعدي على ميدان وساحة (الرعد) ببيت المال وتخصيصه كعمارات لبعض المواطنين .. ما أن قام بذلك حتى إمتلأ بريده الأليكتروني بعشرات الرسائل من مختلف مدن السودان التي تحكي عن نفس (الحاجة) وهي التعدي على الميادين وتحويلها إلى منفعة خاصة !
لو كانت هذه المسالة أو دعنا نسميها ظاهرة هي شيئ فردي كان من الممكن أن نقول أنها (تجاوزات) يقوم بها البعض ولكن أن تكون بهذا الكم الهائل وفي مختلف مدن السودان فنقولها بالمصري (أنحنا بننسرق يا رجالة) نعم وأيم الله هي سرقة تقوم بها (عصابة) لا تحفل بالوطن ولا المواطن ، (عصابة) ما أن يرى أحد أفرادها ساحة أو ميداناً في أحد الأحياء في أي مدينة كانت حتي يسيل لعابه فيشرع في (توضيب) شهادات البحث وبقية المستندات التي تثبت حقه في ميدان (من زمن الأنجليز) !
العبدلله لا يعتقد بأن هنالك بلداً في الدنيا يمكن أن يحدث فيها مثل هذا العبث ؟ كيف يمكن يا جماعة الخير لمكان مخصص كميدان وموجود في الأراضي كميدان وفي خريطة المدينة كميدان وهو على هذا الوضع (ستين سنة) يقوم يجيك زول شايل ليهو شهادة بحث ويقول ليك إشتريتو؟ مش حاجة تخلي باقي السلوك الفي راسنا دي تضرب؟ كلمونا ورونا بتعملوها كيف ؟ عشان إحتمال نفسنا تدخل لينا في ميدان ؟ هل هنالك مسؤولاً واحداً وزيراً كان أم خفيراً يمكن أن (يبرر لنا ما يحدث) ؟ والغريبة أن معظم مدن السودان لم تسلم من هذا النهب الواضح الشئ الذي يعني أن معظم مدن السودان قد فقدت أحياءها الرئة التي تتنفس بها والمكان الذي يقضي فيه شبابها ساعات مقدرة من اليوم وهنالك من يتساءل لماذ إرتفعت نسبة تعاطي المخدرات وسط الشاب؟ يمشو وين بالله بس كلمونا؟ يمشوا المسابح وللا يمشوا المكتبات العامة وللا يمشوا صالات السينما وللا يمشوا المسارح وللا يمشو صالات الجمباز والتنس والكرة الطائرة؟ طيب لمن ديل كووووولهم ما توفروهم ليهم كمان (تقلعو الميادين) الجوة الأحياء البمارسوا فيها الشباب ديل هواياتهم ؟
لمن بالله نشكو حالنا وضعف مآالنا وقلة حيلتنا؟ بالله عليكم أليس هذا هو الغبن بعينه أن يجد المواطن رئته التي يتنفس بها وقد أقتطعت منه ليذهب ريعها إلى لصوص (عصابة الميادين) الذين لا يتمتعون بذرة من الحياء وهم يفترسون الميادين (الليها مليون سنة) أفتراساً ويحولونها إلى (فلل) و(عمارات) ومدارس خااااصة (معليش كترنا من مقالات التعدي دي لكن والله عمكم مغبون) !!
كسرة :
أها وبعد ما تكملوها الفهم شنوووو؟
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو)+و+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و+و؟

51 تعليق

    1. تلاته في برنجيه واحده في نفس الوكت

      1. برضو في نفس الوكت ياعبيد ، ده انت ويكة عدييييل كده، ياخي شن جاب 2:35 لي 2:38 ، ياخي اتواضع وبارك للبرلوم يوسف وشجعو ، انا داك خليني ،،

    2. ياهو ده الاشتراك يا عبيد 2:35 ، مبروك يا يوسف علي ، ولو انو شكلك برلوم لكن عافي منك فرمت لي الجماعة كلهم وقدرت تنافس ود العم سام ، اصحوا يا دكاترة،،

    3. مبروكة البرنجية يا الصديق وإن شاء الله تسبعا

    4. يوسف .. مبروك البرنجيه
      انت طالما داخل طوالي بالبرنجيه معناها ماك غريب وعارف نظامنا بنبارك في البِكري ونخنق في التنِي ..
      عجبني ليكم يا عبيد وامريكي ..

      1. يبروكو فيك خنق يا جنوبي ، سلامة نظرك ، راجع الزمن تلقاه 2:35 ، يعني مشترك ، امبارح قارنتك بالحبشي قلت عندي عقدة لون ، اها الليلة ح اقارنك بي موشي ديان ، رأيك شنو ؟

    1. وبرضو مخمسنها مع بعض

      1. يا خوانا ‘ بالذات المخضرمين في المدونة، عندي اقتراح لتنظيم المشاركات، وهو انه و بما ان البرنجية بقت تقليد و شي لا بد منه ( ويحرق الزول ،اللي هو ما انا) بقترح ان يكون اي تعليق يخص البرنجية/الاشتغراشة ان يكون حصريا فقط في حقل ( رد)بتاع البرنجي او المستغرش حتى نترك المجال للبقية في المشاركة في موضوع البروف دون المساس بالبرنجية و أيضاً لانه يوجد ناس لا يفهمونها او هى لا تهمهم او هو مشارك مؤقت فالأفضل ان لا تقاطع تسلسل المشاركات بموضوع مختلف. رأيكم شنو؟ إتجليت ، مش؟

      2. انتي ( جلي ) عديييل كده .

  1. الحيكومة بتقول ليك يا بروف :
    بعد ما نكملها الفهم كل زول يقعد في حوش بيتو لحين نجيكم جوه بيوتكم !!!
    ونشيل الحيشان لأنو مااافي داعي ليها مع البعوض دا !!

    1. صاح ,,,, الواحد باني ليهو متين متر وعامل ليهو حوش الفين متر !!! دا اصلو شنو ؟؟؟ ما دام المتين ديل مسكناكم خلاس ما تبقوا طماعين والحوش دا الدولة ممكن تستفيد منو !!!!

    2. ختفهتا من كيبوردى يا حبيب !!
      الله يستر على بيوتنا واهلنا ما نرجع نلقاهم باعوهم كمان ,
      اخييييييييييييييييييييي

    1. والله صحي , لسة حي !!!!!!

      1. القال ليك منو حى !!؟

  2. استاذ الفاتح جبرا
    تحياتى و اهنئك على شجاعتك
    اقول ليك لو فتحت ملفات سودانير ما بتخلص هنالك شقة فى روما و بيت فى كينيا و بيت السودان فى لندن و مبلغ 28 مليوندولار تعويضات الكويت و 6 مليون دولار ثمن طائرات الفوكر 50 التى تم بيعها و 600 مليون سودانى فى بنك النيلين اتسحبت و و و كله دة وييييييييييييييييييييييييييييييييييييييييييييييييييييين و فصل من فصل بالغاء الوظيفة و اليوم الثانى نزلوا ناس تعيين جديد فى نفس الوظائف الملغية هذا قانون الارض و نحن فى انتظار قانون السماء

  3. مغبون زيك كدا بس | رد

    بعد يكملوها حتواصل في السؤال عن اخبار خط هيثرو شنوووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووو

  4. أزيدكم من الشعر بيت يا سادة
    عندنا في مدينة واد مدني مدرسة أساس من أعرق وأكبر المدارس وفي موقع بجوار – أو في – السوق الكبير ، هنالك خبر يُفيد بأنّ تلاميذ هذه المدرسة سيتم توزيعهم – تسريحهم – على المدارس الأخرى ، تعرفوا ليه؟ لأن الأرض ستُبنى مووووول كبير ، تعرفوا لصالح منو؟ تخيلوا تكون لصالح منو؟ تصدقوا إنها لصالح حرم ما يُسمى برئيس الجمهورية [الزوجة رقم 2] السيّدة/ وداد.
    ما زلت بين مُصدق ومُكذب لهذا الخبر ، لكن بُكرة ستكشف الأيام عن كل شيء ، وإن لمْ يكن صحيحاً فهناك ما هو أعظم وأسوأ!! !
    الله المُستعان

    1. دى ياتو مدرسة دى !!؟

  5. بل رأسك يا بروف الكلام دخل الحوش كل زول يتفحص شهادة بحثو ولغاليغو عليه ،

    1. سلامه نظرك انت يا أمريكي اخوي ومش حبيب الكل جنوبي،انتا تحياتي دي ما شايفها في اتنين وخمسه تلاتين ،سلامه نظرك،أمريكي اخوي يااخ انت خرخاار والظاهر لمن كنت صغير كنت بتخرخر في الدافوري وطبعا زمن كانت في ميادين للدافوري في أيامنا الحلوه وجميله

      1. هو فضل فيها ميادين للدافوري يا عبيد يا أخوي ؟ ما الحرامية شالوها كلها ، ما شايف البروف شغال دماعة سااااكت ؛:

  6. والله يستر علي المقابر كمان ومواقعها مواقع مولات ساكت،احمد شرفي والبكري والعمارات عييييييك الله يستر علينا بعدين من الدفن السياحي

    1. انت يا العبيد ما سمعت بالتريقة علي السودانيين ،، بيقولوا علينا بندفن الموتي علي ضفاف النيل وبنسكن في الصحراء ، ودونك اشهر مقابر الخرطوم ( حمد وخوجلي ) ،، شكيت محنك لي الله ياعبيد ذكرتها ليهم ،، لكن والله دي حتة فيها جنس عمارات ،، كان مغالطني اسأل العتباني !!

      1. بالله عليك الله يا أمريكي بس لو شتلوا أشجار نخيل علي طول الخرطوم مش كان أحسن من المولات والعمارات الشاهقه،قبل سنتين سافرت مراكش وعلي مساحه اكتر من عشره كيلومتر مزروعه بأشجار النخيل والوارد بكفي المغرب كلها وبرضو بصدروا منو. ،اتحسرت وقلت ياريت بس لو وزير زراعتنا جا وشاف الناس بتعمل شنو،يااخ حاجه تحير قصه الاستثمار الغير مدروس و ناس الطيب في الصحاري يرعوا الغنم وبلدنا خيرها كتييير والله

      2. عليك الله يا العبيد ماااا تقلب المواجع ، ذكرتني لمن قرونا في أولي ابتدائي انو السودان سلة غذاء العالم .

      3. يا جماعة انا اتذكرت حاجة الناس ديل يكونوا عاوزين يقفلوا الميادين علشان ما تكون فى احتجاجات زي ميدان التحرير وكدة دي خطة تكتيكية

  7. الله المستعان وربنا يورينا فيهم .. شكلها لو اتغيرت اللعبة حا نحتاج لمحاكم العدالة الناجزة واي واحد بنى ليه عمارات او مول فى ميدان عام يهدموه ليه فى راسو .. وينك يا ريس ووين قراراتك بعدم التعدي علي الميادين العامة ..

    1. انتو الميادين دي ما داخله فى قانون اليونيسكو

    2. ده الكلام اللي بيخدم. لازم يعرفو انو الناس عارفة وحتاخد حقها ناجزة ام عاجزة

      1. لكن الناس دي ما بتخاف الله، ما تنسوا العملوهو في ناس ام دوم و الحريف شرق و غيرهم. انا عارفه هم عملوا كدا عشان احنا نجي نخاف زي دا، لكن الله غالب!

  8. الموية جات تجرى يا الجعلى غتسنى يا الشايقى امرقنى براااااااحة ,,
    هى يا رحمة , خلى النار تحما !!!

    1. جنوبي هييي ،أمسك شمباتي دا عليك. والله لما يجونا ضيوف الا نتضارى!

      1. بالعكس ! كمان اقعد جمبو واسوي النقدة والريشة ………..
        من كترة ميادينا البنلعب فيها ؟ من مسارحنا البنمشيها ؟ من سينماتنا ؟ ما ياهو نبقي في الزي ده بس !!
        شمباتي .. خمّج الدلوكه ..

      2. نونا ..
        هههههههههههههههههههههههههههه,,لأيييه ياخ ؟ دا انا غلباااااان , اهئ اهئ اهئ ..
        جنوبى…
        يا خمجان يا تلفان ! انت قايلنى ركس ولا مبارى الجوامع والهناى ! وااااااااااااااااااااى

  9. وكتين سعلت الناس ديل بعد اكملو الميادين بعملو شنو بحدثك باقي جيتني في عبي.
    الناس ديل ما عندهم التكتح لا قرش لافهم ولا الحبة دي. وطبعا قصر النظر ده معروف. القضية بقت فينا نحنا. اذكركم بالنكتة المشهورة بتاعات الزول الجا لبتو الاهلية ولقى الجماعة خالطين جيزان ولمن شافهم بتمايعو قال ليها اقري ساكت الحبة دي ما بتجيك. انا ما من انصار العنف والخروج على الحاكم ولكن من انصار الافكار البنائة والقلم الجريء وما ضاع حق ورائه مطالب. رأيي المتواضع ان يتم التكثيف الاعلامي

    1. تكملة.
      التكثيف الاعلامي الذي يبصر بخطورة امتلاك مثل هذه المصالح التي هي مثل القنبلة الحارقة. وان ساكنها او النتفع منها مصير املاكه الى زوال. سياشة التبصير والتخويف. وحتى ان وصل الامر لأبعد مدى. ومصير اخر العلاج الكي.

  10. انتو ياجماعه ما عملوا ليكم كورنيش من امدرمان للخرطوم عشان تكون الفشفاش الي تتنفسوا بيهو معليش الرييه دي ما دايره تجي معاي في الكتابه،يعني يا بروف الفشفاش عوضوهوا بكورنيش النيل وانشالله الحاجات التانيه اللي يعوضوها لينا،مسعوولين من الخير انتو اخونا جنوبي الليله وين لااابد،اخونا نانو ابوحمد ليهو وحشه والله وانشالله نسمع عنو ومنو كل الخير ومن هنا ابعث اليه تحياتي وإعجابي

  11. يا بروف سؤال هل فى واحد او مجموعه منكم مشت فتحت بلاغ فى الشرطه او رفعت قضيه …يا اخوان لازم الناس تكون عمليه وتبدا بالقضاء والقانون اولا عشان تكون قضيتكم مشت اساسا فى الطريق السليم ….بطلوا الردحى

    1. بلاغ فوق منو يا حبيب !!؟
      عبارك كبييير يا مدير ,, هيييييق

  12. الخضر ده متييييييييين يقول لينا هذا فراق بيني وبينكم ! وينبئنا بما لم نستطيع عليه صبرا !!؟ أجي ياخواني مش اسمو الخضر برضو ! بس يخلينا حيرانين طواااالي كده !؟

    1. قصة حقيقية:
      الخضر زوجته اسمها الحياة وهو اسطى بناء، واحد من عمالو “طلبة” بيقول للخضر :(والله يا الخضر الحياة صعبه)، وما على الخضر الا ان فكاهو ليك بالمسطرينة ونزل في خناقو ولسان حالو بيقول :(انت لاقيتها وين؟).
      اها حقو الواحد اجيبو ليهو بت اسميها الحكومة شان اشتم وانبز والعن برااحتو، وكان شاف عربات الحكومة الحايمة برا شغله ومكتوب عليها حكومة افك فيها حجر واكسرها “والمخارجة القانونية وااااااضحة” اللهم ححاجة ننفس فيها كتمتنا.

  13. هل تعلم ان الحكومة طلعت من موضوع فتاة الواتساب بمبلغ 26 مليون جنيه بالقديم ! يعني الشباب لو شدوا حيلهم معانا شوية وكل اسبوع عملوا ليهم مقطعين واتساب مكن يخش علينا في السنة 2 مليار ونص ونبقي سدينا عجز الميزانية !!
    برضو تقولي لي بترول ! وانا اقووول الاولاد ديل كانو اربعة بس ! البقاهم 12 شنو ؟ اتاري الحكومة دي نظرتا ثاااااااقبه !
    قصة نهايتا لسه ! والعندو قروش يعمل الدايرو !!!

    1. الله يقطع شيطانك يا جنوبي ، دي إبليس ذاتو مافكر فيها

  14. الفاتح .. كلو واحد عاوز منهم عاوز يسموهو سيد الحيشان التلاتة ..

    1. وعريسنا جالس بانبساطة ..

    2. وانا عندى كم حوووووووش ؟

  15. صباح الخير عليك وعلى الوطن المنهوب ياعم جبره والله كلنا مغبونين وبقينا خايفين علي بيوتنا بكره يطلع ود حرام ويقول بتاعتو يادووووب عرفنا انو المصريين معاهم حق لما ازاحو سرطان المتاسلمين قبل مايكبر ونحنا للاسف ليس لنا رجاله لاشعب ولا احزاب ولا حتى غيورين الله المستعان

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: