التصبينة

من المفردات التي كنا نستخدمها عندما كنا صغاراً مفردة (التصبين) وهي إخفاء ودس (الحاجة) بحيث لا يتم إخراجها أو الإفصاح عن مكانها إلا عندما تتوافر ظروف معينة .. تذكر العبدلله هذه المفردة التي طواها النسيان وهو يقرأ ما أوردته صحافة الأمس من أخبار عن قيام السلطات بحكومة الجزيرة بإبادة كميات كبيرة من مواد الإغاثة للمتضررين من الأمطار والسيول منذ العام الماضي وخزنت بمخازن الحكومة بمارنجان ولم توزع للمستحقين والمتضررين لتنتهي فترة صلاحيتها وتتلف وتصبح غير صالحة للإستخدام الآدمي (والحيواني ذااتو) والمواد يا سادة يا أفاضل كما أوردتها الصحف عبارة عن 363 كرتونة مواد غذائية وكميات كبيرة من الدقيق والأرز وبسكويت الأطفال والحليب !
ليس هنالك لهذه الحادثة المأساوية إلا تفسيراً واحداً وهي أن هذه المواد كانت (تصبينة) حيث قام أحدهم (والله كتار كترة) بتصبينها في ذلك المخزن ليتم إخراجها بعد مرحلة توزيع الإغاثات وبيعها في سوق الله أكبر لكن ذلك (الأحدهم) والذين معه ربما شغلهم شاغل من (لغف) آخر (ثمين) فنسوا أمر هذه المواد حتى تم إكتشافها بواسطة تيم المراجعة .
كم من مواطن متضرر وكم من مواطن فقير وآخرمريض كان في أمس الحاجة لهذه المواد؟ وكم من طفل وتلميذ عانى من الجوع ونقص الغذاء وكان ممكن هذه المواد (تسندو)؟ بالطبع إن أول ما يتبادر إلى الذهن في هذا الأمر هو (من المسؤول)؟ على من يقع عاتق مسؤولية تخزين وتوزيع هذه المواد الغذائية (المصبنة)؟ الشئ (الغريب وعجيب) ما أن تحدث نازلة لنا من فيضان أو سيول أو خلافه ويقوم الإخوة الأشقاء وبقية أبناء العالم (الشفوق) بإرسال الإغاثات ويتم توزيعها عبر مناديبهم إلى الولايات والمدن حتي تشاهد صور (المسؤولين) في نشرات الأخبار وأوراق الصحف وهم يقومون بعملية التسلم وسط صيحات التهليل والتكبير ! ولكن ما إن تتسرب (مواد الإغاثة) إلى الأسواق أو توجد (مصبنة) ومنتهية الصلاحية كما في هذه الواقعة إلا (يختفي) أولئك المسؤولين وتقيد (الحادثة) ضد مجهول وما أكثر الحوادث التي قيدت ضد مسؤول في هذا العهد (المتوضئ) ذو المشروع الحضاري والتوجه الإسلامي ذلك الإسلام الذي يقع يد (فاطمة بنت محمد) لو أنها سرقت ! وكأمثلة وليس للحصر دعنا أيها المواطن المسكين نسأل أنفسنا :
– من المسؤول عن التعدي أراضي المدينة الرياضية وتوزيعها كقطع سكنية ومحال تجارية والتصرف فيها بالبيع دون أن تدخل خزينة البلاد (مليم أحمر) من عائدات البيع؟
– من المسؤول عن تعثر قيام مشروع سندس الزراعي لأكثر من عشرين عاماً على الرغم من دفع المغتربين لملايين العملات الصعبة ؟ (حساباتو ذاااتا وين)
– من المسؤول عن إستيراد ما يعرف بالتقاوى الفاسدة بمبلغ عشرة ملايين دولار أمريكي؟
– من المسؤول عن ضياع وإختفاء أكثر من نصف ميزانية ولاية سنار في عام مضى؟
– من المسؤول عن بيع خط هيثرو وقبض ثمنه دون توريد المبلغ إلى حكومة السودان ؟
– من المسؤول عن تقديم ديوان الزكاة مبلغ خمسين ألف دولار لقناة الضحى الفضائية (الوهمية) !
– من المسؤول عن إستيراد الدولة لبصات مستعملة توقف معظمها بعد أشهر قلائل من إستخدامها ومشت (الحوش)؟

هذا فقط ما أسعفتنا به ذاكرتنا الخربة وهو قيض من فيض من حالات التعدي على المال العام والتي ترد سنوياً بتقرير المراجع العام (وكمان القصة جابت ليها تصبين) ولعل العامل المشترك في كل هذه الحالات أن الجهات العدلية وعلى الرغم من لجان التقصي وأوراق التحري والتوصيات والشنو ما عارف في آخر الأمر فإنها (ما بتلقى ليها زول مسؤول) لتلقي عليه التهمة والدليل على ذلك أننا لم نشاهد مسؤولاً واحداً يقف أمام القضاء (مسؤولاً) عن فساد ! ولعل الشئ الفادح في الموضوع أن التقرير السنوي الأخير للمراجع العام قد أورد أن هنالك حالات للتعدي على المال العام بديوان الزكاة والأوقاف (يعني القصة خشت مال الله والنبي) وأفتكر بعد ده أحسن الزول يسكت !

كسرة :
بالله لمن (تصبنوا) ليكم حاجة ما تنسوها .. حاجات الأكل دي (بتبوظ) ما زي (العربات) بيرفعوا لساتكا !!

كسرة ثابتة (قديمة):
أخبار ملف خط هيثرو العند النائب العام شنو(وووو وووو وووو وووو وووو وووو)+و+و+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و+و؟

Advertisements

53 تعليق

    1. والله ختفتها لو ما التلفون علق ما كان لقيت ريحتها

    2. شايفك اخدت عليها !!
      انت قايل القمردينة دي ما فيها بير ؟

      1. ههههههههههههههههههههههه,,
        حامضة منك يا جنوبى ,,
        جاى تلحقو ام شوايل ؟؟

      2. انت يا جنوبي وكت فصيييح كدي ما تحتفظ بي حق الرد و تقلب الهوبا تستغرش اول!!! ( هييي ما تقوم علي ، انا مركبي معاك وانا واحدة)

  1. برضو في “تدكين”
    دكنّ الشيء أي دسه وأخفاه

  2. برنجيييييييييييييييية

    1. مبروك البرنجيه يا حبيب
      وياكا لبن عُشرنا … كيتا في يوسف

      1. ههههههههههههههههههههههه,,,
        نبارك ليك سمح وجديد عيالك انت ياالواعى ,, والما ببارك لى برنجيتى دا ياها المقاطعا ,,

    2. دى قلع عديل يادكتور الفرق بينك وبين يوسف 14 دقيقه وتخيل لزن ده ال 14 دقيقه ممكن تسوى شنو
      انا تقريبا كده عارف ردك ورد جنوبى فارجو ان تحتفظوا بالرد لان معانا عوائل وكده

      1. عباس…
        ههههههههههههههههههههههه,,قلع وهمبتة ذاتو ! وعفيناك تب .. هههههههههه..
        نونا..
        امممممممممم,هل النوم بجيب اللوم ؟؟ آآآآهـ ؟؟

    3. يااا حليلك يالنايم على حيلك، كان نفسنا لكن نسو شنو ، سبقك يوسف عليها

  3. بس ياها يلمها النمل ويطاها الفيل !!
    والله عدونا لا امريكا ولا اسرائيل ولا الحركة الشعبية ولا اللجان الثورية علي الطلاق الشيطان ده كان ربنا ما حسم امره كان قلت ما عدونا !! عدونا ياهم اللاعندهم ذمة لا عندهم مِلة ديل ..
    وانا كان بي يدي والله اجيبهم كلهم واقفلم فييي مخزنم ده وما امرقم الا بعد ياكلوا الاكل الفاسد ده كووولو , وإن ما كتلم بعد داك اكتلم انا ده ..

    1. ياكلوهو بى خشومهم !!؟

      1. آآآآي شان انا قصدي التسمم ,,,

    2. جلدهم تخين ما بأثر فيهم لكنهم لأنهم لهاطين و هر..رين و حاجات تانيه حامياهم بموتوا من العفنه

    3. شوالله آآآآآآآآآآآآآآآآجنوبي يلهطوهو عادي والحبه ما تجيهم

  4. اي حاجه بقت مصبنه وقس علي ذلك السياسه،الرياضه،الفن وحتي قله الأدب بقت غريبه ومصبنه بت ستين تصبينه

  5. ياخ والله حاجة تقرف عديل كدة !!
    والمشكلة يجى المشير والمجلس الحقير ويتفاخروا ويتباشروا بانو مافى فساد !
    ويقول ليك جيب دليل !
    اهو دا دليل !
    ودونهم تقارير المراجع العام اللى انا لو كنت محلو كان اشتريت آر بى جى وراجعت حساباتى مع المعتدين ديل !
    اتفووووووووو ,,,
    شحدت ربى القاضية والصاقعة والخسف والرجم ليهم

    1. زي ما قال المثل : الفاسد ما بشوف عوجة ملفه ..!

  6. و الله يكون على بعد مترين من المخزن دة فى اكثر من 1000 طفل جيعان و عنده كواش حسبنا الله و نعم الوكيل اين سيدنا عمر بن الخطاب ليتنى خلقت فى زمانه انا و الله الظلم بوجعنى و بحرق قلبى الله المستعان و عليه التكلان و لا حول و لا قوة الا بالله

  7. يا الصابونابى مددددددد مدد
    و يا ست العرقى التصبينه بتاعتك بقت رسميه تانى كان جوك و قالو ليك التصبينه وين قول ليهم فى مدنى السنى يا ، مارنجااان يا بورسودااان يا امدرمااان يا ورا ورا ورا ورااااا

    1. هييييي ها !!
      ما شربت جبنتك الصباح ولا شنو ؟؟
      هييييق ,,
      اديك نص ؟

      1. ههههههههه الشكيه ل ابيدا قويه

      2. جنوبي ما قلت ليك أمسك شمباتي دا عليك انا؟

      3. أمسكو كيفن يا نونا مع البدقوا ليهو اللوليه ورافعين البينسون والويسكي ديل ! اللنزل يمكن النزلة دي تريحو شويييييييييه !

      4. ههههههههههههههههههه,,النزلة التنقلب عنتهاب !
        يعفوا ويرضوا ,, بى دستووووووركم ,,
        شيخى ابونورا !!!

  8. آآآآآآآآآآآآآآآآآآآآآآآآآآآآآآآىناس كتمت كتمت كتمت

    1. ها يالغلبان ، كيفك اخوي؟ علا لسة ما كتمت هنا

      1. لك التحية من ارض الكتمة بس قريبا احادثكم من كاودا خرتوم لي ما في الا ينفكوا عن رقبتنا

  9. والله يا بروف انت لك سنوات تنبح فى الجرائد وحسين خوجلى له شهور فى التلفزيون والاذاعه ومافى واحد اتحرك
    الظاهر انو الناس دى خلاااااااااااص دى بى طينه ودى بى عجينه
    اقعد انت وحسين شوفوا خطه تانيه

    1. البروف مع حسين خوجلي؟ يااا حليلك انت. انت جادّي يا اخوي مصدق مسرحيات خوجلي دي؟

    2. يااااا راااجل !!
      لو قايل البروف زي مهند ونور تبقي غلتان وداير ليك دكتور ..

      1. جيييييييييييييييييييتكم ,,
        شيلوا البروف وادونى حسين !
        اححححححححححححححححححححححح

    3. خطة غير الشارع ما فيش لله دركم اولاد بمبه فهمواها وهي طايره هههههه ديل خلاص استوطنوا الا جراحه يا خوي البضربوا النسوان بالنيران بكل برود ويقولوا برضه اعمال تخريبية ربك يكون في العون بس انحنا ما اولاد ترهاقا ولا من صمدوا للمكسيم في كرري بقينا كح سااااااااااااااااااااااااااكت

  10. في دي بقي يا بروف، مش أحسن ما باعوها منتهية الصلاحية؟

    1. ما شاء الله انتاج فبراير دا يا بروف ! ١٨ – ٣اصدارات يبقي ١٥ في شهر واحد و اقصر شهور السنة! دي مغسة شديدة دي يا بروف!

      1. اها اسحريهو ! هسي نبقي في الاستاذ يعتذر والاستاذ يحتجب !!

  11. والله يابروف انتو العلمتوهم اتاريه التصبين ده من زمااااااااااااااااان من زمنكم ونحن ماعارفين

  12. التوثيق كويس يا بروف – ونتمنى انو الناس البتوثق بالادلة تكون متابعه – وما ضاع حق له مطالبون.
    احدهم تكلم عن حسين خوجلي – رأي الشخصي ان الرجل “بيقح”؟ في زمن الكوليرا.

    1. يقح برضك !؟
      هههههههههههههههههههههههههااااى

  13. عجبني رد اخونا “جنوبي” نحنا اهل الطيب الابا يبيع النعجة” وعايز اكتبو تاني لو سمحتو
    جنوبي 19 فبراير 2014 عند 12:48 م | رد

    نحنا اهل الطيب الابا يبيع النعجة
    طبعا دي رسالة حايمه في الواتساب بتقول :
    السودانيين في السعودية يعيشون هذه الايام احلي ايامهم , ويخرجون من غير اقامات ويعملون مع غير كفيلهم , فاذا تعرض لهم احد , اشهروا الهوية الجديدة وقدموا انفسهم : نحنا اهل الطيب الابا يبيع النعجة ..
    طبعا الرسالة دي كانت مع ايام ظهور مقطع الفيديو للراعي السوداني الطيب الزين الذي شرفنا ورفع راسنا بعدم قبوله لخيانة الامانة رغم ما قدم له من اغراء , بل وتحول من راعي لواعظ وقدم درسا للذين ارادوا امتحانه .
    ومن بركات الطيب , امس في الشارع الذي اسكن فيه في احد احياء الرياض كان في حملة من الجوازات بعد تسعة بالليل , هل تصدقوا انو كان بيسألوا أي اجنبي عن هويته الا السودانيين ! ماف سوداني واحد سألوه عن اقامته والعسكري كان يعمل فيها كأنه ما شايف السوداني داخل المحل ويسأل غير السودانيين ..!
    وفعلا نحنا اهل العوض الابا يبيع النعجة , وليتنا كلنا نكون الطيب الابا يبيع النعجة ,,
    اللهم بارك للطيب في ماله وولده واغنه بحلالك عن حرامك ..
    ————————————————————————————————————-
    تعليقي:
    نحن بره السودان “نحنا اهل الطيب الابا يبيع النعجة”.
    نحن جوه السودان “نعاجا فاقدها الببيعها”.
    مع الاعتذار لكل خروف.

    1. صحي التوثيق كويس , ما قلنا حاجه ! إلا جنس توثيقك ده بودِرنا !!!!
      جنوبي براهو القال يا حبيب قساي ؟ الناس دي كووولها ما قالت !
      القال ليك منو ما باعونا ؟ وحات الله باعونا بيع السواد والرماد ! انت ما عرفت انو ( زول اسمو زي وااته ده ) جاي تاااني !؟
      واا تُرااااابي ووا عجاااااجي !! زي ما بتقول خالتي ..

      1. اخوي جنوبي ما تخاف من توثيق كلاماتك،،،،ههههه و يعني الحيحصل شنو ،،،يعني في النهايه تتصبن وما تتوثق،انتا يا جنوبي اخوي مش قالوا برضو الواتساب فيهو تصبين وانو في حاجه جديده اسمها تيليجرام ودي كمان الشمارات قالوا تصبين روسي وغايتو نتصبن نحنا ونستغرش نحنا و نقعد نلوص كدا،خش علي الروسي

  14. الاستاذ الفاتح

    كدي إختف رجلك امش على مباني وزارة المالية ولاية الخرطوم واسأل عن عطاء توريد 100 بص 18 متر وقول ليهم الحصل فيه شنو ؟؟؟ وليه وزير المواصلات والبنية التحتية خجلان من اعلان النتيجة
    أسالهم ان كانت الشركة التي تم التعاقد معها قد قامت بإحضار ضمان العطاء كما هو مطلوب ؟؟ واسالهم ايضا ما حكم من لم يات بضمات العطاء خسب القانون
    اسالهم ايضا لماذا سافر بعض المسعورين ( المسؤولين ) لزيارة مصنع الشركة بالصين في الوقت الذي كانت فيه لجنة تقييم العطاءات – المغلوب على امرها – لا زالت تدقق في العطاءات التي امامها ؟
    أرجو الا تسأل من وراء هذه الشركة التي تم التعاقد معها رغم عدم اهليتها (ineligable) حتى لا يتوقف نبضك وانت زول ضغط وسكري على حد علمي

    1. و اها ده اسمو شنو يا اخوي الجوكي،تصبين صيني ،دي قصه وان كانت بقت عاديه ومتعووووده دااايما

      1. وكمان ما ننسي التصبين بتاع الدواء الأردني والذي اثير مؤخراً في احدي القنوات وكمان ما ننسي التصبين التركي بتاع التقاوي عيييييك صبيييييين أممي ونحن حقيقتااان مستهدفين

    2. الجوكى ياااااا جوكى !
      شكلك ماسك حاجات وملفات !
      لو راغب فى النشر ممكن اديك طريقة تواصل معاى يا عشاى ,,
      آييييييي

  15. دي الحمد لله الاتصبنت ومدتا انتهت
    كويس الماباعوها لينا مدتا منتهيه

  16. السمار سلام .
    الجماعه أوفدوا مصطفى عثمان إسماعيل عشان يمشى للراعى الطيب الابى يبيع النعجة . ولمن كرموهو و إحتفلوا بيهو وبقوا يكبروا ويرفعوا فى السبابة قام الطيب ولطيبتة رفع معهم السبابة وهو يكبر وأنا فى الحقيقة تكبيرتو ماوجعتنى لكن الوجعنى وقططع مصارينى رفعتو للسبابة .

  17. ” نفذت سلطات سجن كوبر الاتحادي حكم الإعدام شنقاً حتى الموت في حق «فكي» أجنبي قام بقتل «فكي» سوداني طعناً بسكين لخلاف نشب بينهما حول قيمة «حجبات». وكانت محكمة الموضوع قد أصدرت قراراً بتوقيع عقوبة الإعدام بعد أن طالب أولياء دم القتيل بالقصاص، وتم تأييد القرار من قبل المحكمة العليا.

    وتشير الوقائع حسب قضية الاتهام بأن المجني عليه ويعمل في الدجل والشعوذة، تعرف على المدان الذي جاء من إحدى الدول الأفريقية عن طريق وسيط وطلب منه العمل معه واستأجر له منزلاً بالقرب منه ونشبت بينهما خلافات حول قيمة «حجبات» لم يسددها المجني عليه وأمر أصحاب المنزل بطرده، وفي يوم الحادث توجه إليه بمنزله وقابله وطالبه بالمال إلا أنه رفض وسدد له طعنة أمام منزله أودت بحياته في الحال، وتم إبلاغ الشرطة التي أسرعت إلى مكان الحادث، وأفاد المدان خلال استجوابه بأنه حضر إلى السودان بتوجيه من رئيس دولته الذي طلب منه عمل «حجبات» لمسؤولين كبار بالدولة مقابل مبالغ مالية تقدر بالملايين، وأضاف بأن المجني عليه أخذ منه عدداً من «الحجبات» وامتنع عن دفع قيمتها له مما دفعه الى قتله.

    آخر لحظة ”
    فكي وكتل فكي , شِن لينا في .. كان كتل مراسي واا خراب راسي , ده ماااا من ناسي
    شفتو الفكي قال شنو ؟
    حضر إلى السودان بتوجيه من رئيس دولته الذي طلب منه عمل «حجبات» لمسؤولين كبار بالدولة مقابل مبالغ مالية تقدر بالملايين .
    وانا اقول كاتبننا وين ؟ كاتبننا وين ! عِن ياتو شيخ عِن ياتو فكي !! غايتو الحيكومة دي ما فضل ليها الا تدق الزار في الساحة الخضراء !!

    1. هى لسه ما دقت !!؟
      وكان مات فكى ؟ ما غرضنا بى !
      وكان مات راجل المرا ,, الحلو حلا ,,, نقول بلا وانجلا !
      وهوى بييييي هوى بيييي

  18. من أين يمكن أن نشتري كتابك؟ شكرا لك.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: