إشانة سمعة

في نهار قائظ الحر قبل عدة ايام وبينما العبدلله عائد إلى منزله بعد قضائه لبعض الأعمال بالخرطوم إذا بالهاتف يرن وإذا بالرقم رقم غريب غير مسجل وهذه معناه أن شخصاً جديداً غير مسجل لديك يريد محادثتك وهذه بالنسبة لي لا تعني مشكلة فرقم هاتفي اعطية لإستقبال أي صحيفة أعمل فيها وأطلب منهم أن يعطوه لأي سائل عنه .. (يعني متاح لأي زول) .. رقم جديد (معناتا) زول بيتكلم معاك لأول مرة وعليك أن تجهز نفسك لمعرفته ومعرفة سبب إتصاله بك وقد فعلت :
– السلام عليكم يا أستاذ
– وعليكم السلام ورحمة الله تعالى وبركاته
– أنا مساعد شرطة حماد من شرطة نيابة الصحافة والمطبوعات
– مرحب بيك
– يا أستاذ بس عايزنك عشان نسمع أقوالك عشان ناس الشرطة ديل فاتحين فيك بلاغ إشانة سمعة !
– في شنووو؟
– لمن تجي ح نقول ليك يا أستاذ
– طيب مكانكم وين؟
– إنتا بس يا استاذ تعال نادي الأسرة في الخرطوم وأتصل عليا في الرقم ده ذاتو
– طيب شكراً ..
إستبد بي الفضول غاية الإستبداد فكيف برجل مثلي أن يقوم بإشانة سمعة الشرطة التي من المفترض أن تحميه وتوفر له الأمن ولأطفاله وعائلته ولجميع المواطنين فقمت على الفور بتغيير الإتجاه من أم درمان إلى الخرطوم .
كثير من الإحترام بذله لي مساعد شرطة حمدان .. وبعد فنجان القهوة أجاب عل سؤالي وفضولي :
– يا أستاذ إنتا كتبتا مقال قبل كده بعنوان (الشرطة ناقوس الخطر) !
– ومالو؟ بنحذرهم !
– الناس ديل قالو دي إشانة لسمعة الشرطة
لعلم القارئ الكريم ان المقال كان يتحدث عن مواطن لا أعرفه إتصل بي وقال إنو الصباح مشي يركب عربيتو الكانت في الشارع (مقفلة) بايته قدام بيتهم قام لقى (القزاز) مكسور وبعض المقتنيات التي بالعرية غير موجودة .. لم تأخذ المسألة وقتاً طويلاً حيث أخبره جيرانه عمال الفرن (المخبز) الذين كانوا يعملون ليلاً بان عربة شرطة ترجل منها عدد من أفراد الشرطة بالزي الرسمي وقاموا بكسر العربة !!
بعد أن أخبرني المواطن بالحادثة الفاجعة قمت على الفور بالإتصال بصديقى الدكتور عميد شرطة هاشم على عبدالرحيم بشرطة ولاية الخرطوم وشرحت له ما حدث حيث أخبرني بأنه سوف يتصل برئيس شرطة محلية كرري الذي يتبع لها القسم المعني وبالفعل إتصل بي بعد دقائق ليأخذ منى رقم هاتف المواطن ذاكراً لي أن رئيس شرطة محلية كرري سوف يهتم بالأمر شخصياً .
وطفقت أتابع مع المواطن التحقيقات التي أجرتها الشرطة مع منسوبيها والتي أخذت شهوراً حتى تمت محاكمة الأفراد الذين قامو بتلك الحادثة (يعني القصة ثبتت عليهم) !
طيب السؤال البفرض نفسو هو (طالما القصة ثبتت) إشانة السمعة وين ؟ نحنا جبنا كلام من راسنا؟ وللا الأخوان في الشرطة عاوزننا نسكت ونحنا نري هذه التفلتات التي تحدث يومياً حيث أصبح من العادي أن تطالعك الصحف بأخبار من شاكلة (القبض على شرطي يروج للمخدرات) .. (القبض على أفراد شرطة يبتزون المواطنين) إلى أخر مثل هذه الأخبار التي تفقد المواطن إحساسه بالأمن والطمأنينة .
لك أن تعلم عزيزي القارئ ان الأفراد الذين تمت محاكمتهم في الحادثة موضوع هذا المقال والعاوزين (يجرجرونا فيها) للمحكمة قد تم إنذارهم وتغريمهم فقط ولم يتم رفدهم من الشرطة .. يعني (أمشوا أنهبوا تااااني) !! بينما قد يواجه العبدلله حكماً بالسجن إذا ما رأت المحكمة أن المقال يحتوي على إشانة سمعة لجهاز الشرطة (شفتو كيف؟) !!
كسرة :
لو الشرطة بتفتكر إنو ممكن نسكت على تفلتات أفرادها ومنسوبيها تكون (بتحلم) ..

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)؟

23 تعليق

  1. ناس البرنجية نائمين ولا شنو

    1. مبروكة يا حبيب، وعقبال هناي والايامات دي هناي ساكت

    2. ما فهمنا حاجه !
      1 شنو يعني ؟ واحد فول واحد شاي ,, وضّح

      1. هههه يا جنوبي وينك يا راجل

    3. اتنييييييييييييييييييييين !!
      مبروكة يا ركس وعقبال الهناى ,,,

  2. هي ؟؟؟؟؟؟؟؟؟؟؟؟؟؟؟؟؟

    1. هى يكا ،،،،
      مخلوع مش كدة ؟؟؟
      عادى – ناس كتااار كانو زيك كدة ،، و بعدين اتعودو…
      بالبركة و الهناء ان شاءالله …

      1. ولاحظ كمان 1 وبس , تجي تكتب برنجية ( 5 حروف ) ينط ليك واحد قدامك ولا يقول ليك ( مشترك ) !!!!!!!

  3. بدل ما يختشوا ويلموا الموضوع , فاتحين بلاغ ؟؟؟؟؟
    انا منك يا بروف افتح بلاغ في الشرطة بتهمة اشانة سمعة الشرطة !!!!!!!!!!!!!!

    1. ياعبس انت نزلت صالح عام ولاشنو زعلان من جماعتك كده ..

    2. كان يعمل ليهم مقال ويسميهو .. هي ويييينا السمعة !!
      نظامي يقتل فتاة رفضت الزواج منه جم ست شاي !
      نظامي يتسبب في مجزرة بامبده !!
      نظامي يقتل منو كده !
      نظامي يسرق شنو كده !
      لمن بقينا ما عارفين منو البوليس ومنو المجرم !!
      انت بس تعال نادي الاسرة في الخرطوم واتصل علي في الرقم ده ذاتو !! ده نظامي ولا شئ تاني ؟ هييييييييي يكا ,,

  4. مقهورين و ساكتين | رد

    شوكﻻتااية 2

  5. ملاحظ البرنجيات بقت بدري بدري توقيت صيفي ولاشنو ! .. عليك الله ياجبرونا جيب لينا شمار ود ابوقرده وبتاع البوليس الدقوه هههههه عشان حماد مايضرب ليك تاني ههههههه

  6. السمار .
    سلام .
    والله ياجماعه البروف دة شكلو قرف خلاس من البلد دى . لاحظو معاى ز(لو الشرطة بتفتكر إنو ممكن نسكت على تفلتات أفرادها ومنسوبيها تكون (بتحلم) ..

    1. ليو حق يقرف من البلد , وبعدين ده ياتو زول ده اللسه ما قرف منها؟

    1. كتلوني دا بقول كلام زي الفل !!!!!
      لامن تكتل ليك زول بطريقتك دي !!!

      1. هو بتكلم عن الحصل في مطار الخرطوم امبارح مُش ؟
        غايتو الكسرة حقت جبرا راحت شمار في مرقه .. بعد ده الا يقول اخبار مطار الخرطوم الكان بيملك خط هيثرو الملفه عند النائب العام شنو ؟
        شركة الهدف بعد ان اثبتت نجاحها في تأمين بوابة الميناء البري و السوق المركزي لذلك رأت الحكومة الرشيدة توكيلها لتأمين بوابات المطار و الطائرات ..
        بعد ده ( المسعورين واولاد المسعورين ) بختهم يشيلوا الدولارات بالكونتينرات ويمرقوا !!
        وطيري يا طيارة طييييييييييري طيري يا طيارة طي ييييييييييييري
        انتخبوا مرشحكم طه سليمان لاعادة البهجه وايام زمان …
        والداير البشير زيييييييييي المشتهي الحنيطير … ي طير ,,,

      2. كتالين كتلا انتو !!

  7. ا يابوليس امك مسكينة !!
    دى اسمها (عايرة وادوها سوط) ,, او (المتبلبل بعوووووم) ,,
    لكن ما عايزين نستعجل ونشوف اخر الاشانة دى وين !!

  8. يا عبيد ماااااااا عذبتنا …..
    ياخ عذبت الراجل ده من مكتب مرور لي مكتب اراضي لي شئون الهجرة واللاجئين !! شنو ياخ !!
    فكو لينا يوم واحد ينزل ليهو مقال ننفس بيهو شوية !!!
    وبعدين تنقو المسكين الراجيك من الحول ده ! راجيك للفول بالجبنة !؟ وين سوق الناقة , حوش السمك , صاج الكبده , ياخ ان شاء الله تجاني اقاشي يرم عضمه شوييييييييييييييه ,,,

  9. شرطه يعمل أفرادها من اجل حمايه مصالحهم فقط من اجل الكرسي ويضيع جهد رجال عملت من اجل هذ الوطن
    عملو بجهد وإخلاص واضعو شبابهم في خدمه الشرطه والشعب وكان الجزاء جزاء سنمار الى متى تظل الحسوبيه عامل أساسي في عمل الشرطه والتربص لبعضهم البعض وترك الحرميه يمرحون في ما تبقي من آلاف ميل

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: