إلا في الأمازون

(1)
طبيب يتجه إلى مستشفى (أمازونيا) الحكومى حيث يعمل (عشان يمسك الوردية بتاعتو) فيفاجأ وهو يهم بالدخول بأحدهم يمنعه من الدخول :
– يا دكتور معليش مافي ليك طريقة تدخل؟
– يا خي أنا دكتور شغال هنا !
– يا دكتور أنا عارف إنك دكتور لكن خلاس شركة (صحة وعافية) مسكت المستشفى ده
– يعني شنووو؟
– يعني البشتغلو هنا إلا الدكاترة والسسترات والممرضين التبع الشركة
– وبعدين ؟
– بعدين كدي أمشي قدم ليهم أوراقك كان أخدوك تعال بندخلك !!
(2)
مسافر عائد يتجه إلى كاونتر الجمارك وهو يحمل شنطته التى أخذها لتوه من السير … يضعها أمام رجل الجمارك الذي يقوم بفتحها وإفراغ محتوياتها .. ثم
– شايل ليك تلاته موبايلات وكمان كووولهم (ثري نوت) ؟
– وفيها شنو ؟ واحد ليا والتاني هدية لزوجتي والتالت للولد
– لكن الكلام ده ما مسموح بيهو .. مسموح ليك بجهاز واحد بس
– والعمل ؟
– العمل تخلي لينا واحد هنا وتشيل الباقين
– لكن ده إبتزاز ؟
– إبتزاز ما إبتزاز تخلي واحد وللا ح (نجمركم) ليك كووولهم
– ده كلام غريب والله … رئيسكم وين؟
– (مبتسماً) : هناااك في المكتب الفيهو المكيف دااك لو عاوز أمشي ليهو
– (يتجه إلى المكتب) :
– السلام عليكم
– وعليكم السلام .. يا أخي العسكري بتاع الجمارك داك قال ليا يا يشيل موبايل من التلاته موبايلات دي يا (يجمركم) كووولهم .. يااخ معقوله بس ما ..
– (وهو يخمش موبايلين) : عسكري شنو يا مواطن .. ده ما عسكري .. الجمارك دي ما بقت ماسكاها شركة (تتجمركون) !!

(3)
هرج ومرج وصياح بعد أن توقفت عدد من البكاسي ونزل منها بعض الأفراد المدججين بالسلاح والخراطيش السوداء وهم يرتدون زياً موحداً يشبه إلى حد بعيد ذي قوات الشرطة الأمازونية إلا أن لونه كان (بمبياً) ، يهجمون على ستات الشاي والفريشة ويضعون كل من لا يبرز رخصة (المحلية) في (البوكس) هو (والعدة بتاعتو) !
حوار يدور بين بعض المواطنين الذين يشاهدون في المنظر :
مواطن (1) : الله لا كسبكم والله بس قوات صاقعة
مواطن (2) : ما لازم يكونو شرسين كده إنتا ما عارف؟
مواطن (1) : عارف شنو؟ ناس المحليات ديل والله جنو!!
مواطن (3) : الظاهر أخونا ده ما ناقش حاجة !
مواطن (1) : يا جماعة ما توضحو ليا ما ناقش شنو؟
مواطن (2) : ياخي ديل ما تبع المحلية ديل تبع شركة (العصبة لخدمات الكشات السريعة) .. الظاهر عاوزين يطلعو ثمن العطاء الوقع ليهم من المحلية في يوم واااحد !!
(4)
الشعب الأمازوني يصطف على شارع طويل لمشاهدة طابور عرض عسكري في إحدي المناسبات الوطنية :
(مواطن أمازوني بيشرح لأخوهو المواطن الأمازوني) :
– شفتا البنات الشايلات كلاشات ولابسات أصفر مبرقع ديييييك
– شفتهم .. مش اللابسات (طرح) بيجية (وجاكات) ديييك
– أيواا
– أها ديل تبع شركة (نسيبة للدفاع عن الوطن)
– والرجال الشايلين الآر بي جي
– ديل ناس شركة (أبودجانة للراجمات)
– طيب والعربات المصفحة الأسود بأبيض ديييك
– لا دي تبع شركة (اللموزين الحربي)

(5)

مواطن أمازوني يمسك بالصحيفة اليومية ثم يضعها ويصفق قائلاً :
– والله ياهو ده الفضل !
– مالك يا أبو محمد (الأمازوني طبعن)
– تعالي شوفي الخبر ده
– خبر شنو كمان ؟
– قال ليك ( شرطة السجون الأمازونية) تشتبك مع أفراد شركة (أب عضل لخدمات السجون) عشان عاوزة تمسك منهم كل سجون الأمازون !!
(6)
أمام كاونتر البلاغات (قسم شرطة أمازونيا الأوسط) مواطن أمازوني يحمل عريضة في يده ويريد فتح بلاغ
– يا حاج كده بتأخر نفسك ساااي قلنا ليك لو الليلة لفيت أمازونيا دي كووولها ح تلاقي كل الأقسام ما شغالة
– لكن معقولة بس قسم شرطة يكون ما شغال؟ كيف الكلام ده
– ما قلنا ليك يا حاج (الشركة دي) بتقفل في حساباتا عشان آخر السنة
– شركة شنووو؟ إنتو ما ناس الشرطة ..
– شرطة شنووو كدي عاين ليا كده لبسي ده لبس شرطة؟
– مال إنتو منو؟
– نحنا يا حاج شركة (ذو البأس للخدمات الأمنية) .. فزنا بالعطاء بتاع (فتح البلاغات) وكمان في شركة (الكلبشات المنيعة) فازت بالعطاء بتاع (الحراسات) !!
– والشرطة مشت وين؟
– الشرطة الأمازونية إتفرغت للمهام الجسام !! وما تودينا يا حاج في داهية !!

– كسرة :
الشعب يريد شعب جديد !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)؟

Advertisements

51 تعليق

  1. برنجيييييييييييييييييييييييية

    1. لو الياءات ديل زدتهم تلاتة بس كان لقيتني نطيت قدامك !!!!!!!!!!!!!!!

      1. بزيدهم في 54 دقيقة ؟؟ غايتو جنس سلبطة يا ركسونا !!!!

    2. سلام آآآآآآآآآآآآآآآآ المندهش المشتهي الحنيطير بلا برنجية بلا لخمة انا عاوز كسرة بي موية ساااااااااااااااااااااااااااااكت جوع اخوي

    3. برنجيييه امازونيه مش دي امازونيه الشماليه

    4. شكله عباس ركس دا من ناس دقنك حمست ههههه والله على قولك 54 دقيقة تكتب فيهم (3) جنس لولوه

      1. العجب كان شفتو في الكتشينة ! الجوكر هارت يحلف انو شيريا !!

  2. المستغرش 2

  3. انتو ما بتنوموا ؟؟؟

  4. وشعب أمازونيا الفضل بقول ليك ألف حمداً لله بالسلامة وما تشوف شر أبداً يا رائع
    عنهم / ذو البأس وأولاده و نسيبة وأخواتها وابو دجانه وأولاده وأب عضل وعصابتو

    1. كدى !!

  5. و بعدين يا بروف ؟؟؟ انت بتدي الناس دي افكار …بنضحك …لكن بكره بعملوها جد …و الله افكارك كان ما نفذوها الا احلق شنبي .

  6. يامندهش نخلص من عبيد والامريكي تجينا انت ههههههه بالهنا (من تحت الضرووس)

    1. عبيد والله مستغرش جنس استغراشه ،جري نضيف،زياره سريعه وكدا

      1. هههههههه والله انا ذاتي مستغرش وخرمان في برنجيه عديييييل بس تقول شنو !
        انت يالعبيد ياخوي الامريكي وييينو ؟؟ شفقنا عليهوا اتدسا زي طياره ماليزيا هههههه

  7. الله يفتح عليك ويجبر بخاطرك يا الفاتح جبرا . في انتظار المزيد.

  8. مساعد رئيس الحزب الحاكم في امازونيا بقول ليك يا بروف نحن البلد دي ماسكنها وبنديرها بطريقتنا والما عاجبو (اقوي ضراعو )

  9. والله الليلة ياجبرا دى قلبت فيها الهوبة .
    يعنى أسى إشتباك ناس أمن المطار مع ناس الهدف والعطل حركة الطيران فى مطار الخرطوم دة كان فى ليهو داعى .
    ناس الهدف (الشركة الخاصة)وقع ليهم العطاء بتاع تأمين البوابات الداخلية وصلاحياتم تداخلت مع صلاحيات أفراد أمن المطار التابع للدوله فما كان من ديلك إلا أن يحردو الشغل ويوقفو إجراآت السفر ,
    دة الكلام .بلد سايبة وغفيرا نايم .

    1. اريتنا بي نومهم غفراء البلد دي ما نوم الهناء آآآآآآآآآآآآآآآآخوي ومحمد احمد ان شاء الله بالصاقعه

  10. الفريق حماد زعيم البلاد ^_^ الامازونيه طبعن | رد

    معاك الفريق حماد زعيم البلاد (الامازنيه طبعن) .. عشان ماتزعل يابروف وتروق المنقا .. الراي شنو تخش معانا شراكه في تستنيرون الثقافيه التربويه وماتخاف بنديك معها وزراره التربيه فقط او وزاره التعليم فقط .. ما ا ا كل واحده نقااااطه براها _______انت بس اختار سريع عشان في منافسه علي الوزارتين ديل من حريم السلطان

    مهام الشركه في الوزارتين استيراد الكتب المدرسيه والكراسات واستيراد السيطان والطبشير والسبورات والاساتذه من الصين الشقيق هههه هههه حتسالني مانستورد طلبه بعد دا !! انت بس ماتشفق الطلبه دي المرحله الجايه ..

    وزاره التربيه وانت ابوالعارفين حتكون تابعه لجهاز الامن الوطني (الامازوني) لينشا النشء مربي تربيه صحيحه …وعسل وطحنيه كمان لايطلع في مظاهره ولايعرف سياسه وكان سالؤهو الثوره ويين مايعرفها في بحري ولافي الشماليه .. وماتخاف دي ربحها مضموووون

    عندك لحدي البرنجيه الجايه تفكر وترد

  11. يااابروف معاك الفريق حماد زعيم البلاد (الامازنيه طبعن) .. عشان ماتزعل يابروف وتروق المنقا .. الراي شنو تخش معانا شراكه في تستنيرون الثقافيه التربويه وماتخاف بنديك معها وزراره التربيه فقط او وزاره التعليم فقط .. ما ا ا كل واحده نقااااطه براها _______انت بس اختار سريع عشان في منافسه علي الوزارتين ديل من حريم السلطان

    مهام الشركه في الوزارتين استيراد الكتب المدرسيه والكراسات واستيراد السيطان والطبشير والسبورات والاساتذه من الصين الشقيق هههه هههه حتسالني مانستورد طلبه بعد دا !! انت بس ماتشفق الطلبه دي المرحله الجايه ..

    وزاره التربيه وانت ابوالعارفين حتكون تابعه لجهاز الامن الوطني (الامازوني) لينشا النشء مربي تربيه صحيحه …وعسل وطحنيه كمان لايطلع في مظاهره ولايعرف سياسه وكان سالؤهو الثوره ويين مايعرفها في بحري ولافي الشماليه .. وماتخاف دي ربحها مضموووون

    عندك لحدي البرنجيه الجايه تفكر وترد

  12. عدنا بحمد الله وفضله، وأشكر كل الأخوة الذين سألوا عني في غيابي وعلى رأسهم دكتور طارق ( ود العبيد ) فجزاهم الله خيراً، وأليكم هذا السيناريو المشابه لما جاء في مقال اليوم والذي حدث أمامي مساء يوم السبت 15 مارس في مطار الخرطوم بعد أن مريت بالسودان في طريق العودة .. وأنا داخل للمطار وجدت أشكال جديدة وناس قيااافة لابسين (Full suite) يدققون في جوازات الركاب ويمنعون أي شخص غير مسافر من الدخول مهما كان منوعسكري أو مدني !! فأشتغرشت بشدة وسألت أحد موظفي المطار عن من هؤلاء وأين أمن النقل الجوي الذي كنت قد ساهمت في تأسيسه عندما كنت أعمل بالسودان ؟ فقال لي إن كووول الحراسات الأمنية للمطار مسكتها ( شركة الهدف ) !! وكمان زاد إستغراشي بشدة لأنو حراسة المطارات ما زي حراسة أي مرفق تاني ، فهي عائزة تدريب خاااص وخبرة ودراية ليتم التصرف والتعامل مع كل حالة على حدة حسب الوقائع والأحداث ، كما سبق وأن دربنا ( أمن النقل الجوي ) داخل وخارج السودان .. ومما زاد الطينة بله كان هناك شبه تمرد وإضراب من أفراد أمن النقل الجوي الذين رفضوا تسليمهم مهامهم وقاموا بقفل كل المعدات التي كانوا يتعاملون بها بما في ذلك سيور العفش مما أدى إلي حدوث إرتباك في العمل وأضطررنا أن نحمل عفشنا بأيدينا !! وكمان بعد الميزان حمل عمال الخطوط العفش يدويا ً لنقله للطائرات مما أدى لتأخير اتلرحلات .. وأنتشرت شائعة أن هناك إضراب في مطار الخرطوم ذلك اليوم !! مشكلة السودان يا أخوان أن هناك جهات تعمل على ( إعطاء الخبز لغير خبازو ) ، ويكفي أن أشير إلي أن رئيس مجلس الإدارة والمدير العاااام للطيران المدني إتخذ له مستشارين ( لبنانيين ) أبعدوا كل زوي الخبرات من منسوبي الطيران وعينوا أشخاص لا علاقة لهم بصناعة الطيران ، وهذا سبب كل البلاوي التي تحدث وسواصل السرد في هذا الموضوع لاحقاً .. سلااام ..

    1. اولا ..عوداً حميدا اخونا نانو ..
      ثانيا.. صدقت اخي في سبب البلاوي وابعاد الخبرات واعطاء الخبز للمكانيكي والخباز وزاره الطيران

      ثالثا .. تاكد ان ماحدث في مطار الخرطوم هو دا سبب المقااال زاتوا

      واحنا لوجاملنا حكومه امزونيا دي نقول انه فشل اداري تااااام وكل مسئؤل افشل من الذي يليه في الهرم الوظيفي ..
      يعني كلمه حكومي دي اصبحت عين الفشل ذاتو .. لاحظ اني ماقلت فساد

      بصراااحه انحنا مش عاوزين ثوره احنا عاوزين مستعمر من اول وجديد ..^^

    2. اخي الحبيب نانو والله في شوق شديد وسعدت كثيرا بمساهمتك اليوم في قمردينتنا الحبيبه،انا الايامات دي مستغرش بالسودان و دائماً مع حبيبنا بروف المستغرشين الفاتح،لك كل التقدير والاحترام

    3. نانو حمدلله علي السلامه
      انت دفعة ناس قاسم الشريف ( الله يرحمه ) مش كده .
      زمن شعار الخطوط السودانية طيران الشمس المشرقة !! بالله الزمن داك الخطوط السودانية رفضت تبيع لبريطانيا شكل الشعار ( وكان علي رأس السودان ناس يسكرون ويهيصون ويصلون ) هسي ناس يتعبدون ابان دقون باعوا خط هيثروا ذاااااتو !

      1. كفنك آآآآآآآآآآجنوبي الناس ديل نهايتهم قربت لانه الناس عوووووووووووووووووووك طلعوا من البلد ما فضل غير النسوان والعجائز حتى انا العجوز دا غلبتني العيشه فيها وغلبني امسك (هلي) وطفشت وان شاء الله بس احيا لمن اؤدي مسؤوليتي ولو كنت عارفهم بيعملوا جنس دا ما كان عرست من اصلو غلب ما طبيعي حتى اصبحت الغلبان ربك يكون في العون ونشوف فيهم يوم

      2. يالغلبان اخوي
        الزول لمن امرق بره البلد بمرق شن شنو
        مو شان اوفر لقمت العيش الساهلة وكريمة؟
        وموش بخلي في البيت ابوه وامو الكبار واخوانو الصغار واخواتو
        واشتغل زي الحمار كل شي ممكن وما ممكن شان اوفر ليهم اللقمة وحق الصعود والسجائر والعصائر و”البيتزا” والكماليات
        وبكل الرضا ارسل ليهم وامكن هو ما اخلي معاهو حق الأكل، ووجبة واحدة في اليوم.
        طيب في الحالة دي نقول الأسرة إتماسكت ولا إنهارت “نهايتها قربت”
        فهمت يالغلبان
        قالوا تاني بل تتعبوا وتجو تدفعوا في المغتربين بيجوكم هم هناك “اينما كنتم”
        اللهم الطف بنا وبالسودان

    4. ألف حمدا لله بالسلامة يا ابو أحمد
      أنت يا أخوي لما كنت مسافر في مشكلة وجايي برضو في مشكلة !!
      مشكلتك شنو ؟
      والقمردينة نورررررررررت

  13. مقهورين وساكتين | رد

    ………………………………………………………………….

    1. وغلبانين ………………………………….

  14. شعب الامازون ده يحلّو ثقب الاوزون ,,,

    1. وثقب الاوزون دا فوق للخط والا تحته

  15. شكراً ليك أخوي جنوبي وبالمناسبة أنا ما دفعة قاسم الشريف (الله يرحمه) ولكني دفعة ( علي دينار ) إنت نسيت ولا شنو ؟؟؟؟؟
    هههههههيههي .. سلاااام ..

    1. ههههههههه لو ما كنت عرفت شخصيتك الحقيقية كنت قلت ليك قلبك اسود لاكين الكلام ده ماااا من قلبك ,,,
      قاسم الشريف ( الله يرحمه ) كان في سودانير لحدي ما جوا العنقالة ديل وشردوهوا هو ودفعته كلها وقاسم كان هنا في الرياض ومن الناس الوضعوا بصمة واضحة في وكالة الطيار وهسي وكالة الطيار ميزانيتها اكبر من ميزانية سودانير, اتوفي قبل اربعه او خمسة سنة تقريبا ,,

      1. الله يرحمنا كلنا اجنوبي ما نحنا الاموات الذين نمشي على الارض والا شنو

  16. إنت عارف يا جنوبي لمن كنت (مستجد) صادف أن كنت بمطار الخرطوم في الفجر وكانت الطيارة السودانية ماشة لندن وكان مدير عام سودانير هو المرحوم عبد الباقي محمد الذي كان يحرص على حضور قيام كل رحلات سودانير لأوربا . فشاهد أحد الركاب متجه لطيارة سودانير المتجهة إلي لندن وكان الرجل يرتدي بنطلون وقميص ساااكت بي بره يعني (Casual) ! فأمسكه عبد الباقي وقال له :
    يا أخي أنت ماشي لندن بلد الناس المنظمين وأنت بتمثل السودان فهاك ألبس الكرفتة دي ، وخلع كرفتته من رقبته وألسها له بعد أن طلب منه حشو القميص بالداخل !! وبالمناسبة لمن كانت سودانير (سفريات الشمس المشرقة) تسير رحلات لأوربا بطائرات الكومت النفاثة ما كان كان في حاجة أسمها الأماراتية ولا القطرية ( الحصلوا على تصنيف 5 نجوم الآن ) .. وحتى الخطوط السعودية كانت تسير رحلاتها على المستوى الإقليمي بطائرات الداكوتا (DC3) القديمة والعتيقة بالنسبة للكوميت فأين نحن الآن وأين هم !!؟؟؟؟؟ !! أممممممممممم سبحان مغير الأحوال من حال إلي حال .. قال تعالي: {إِن يَمْسَسْكُمْ قَرْحٌ فَقَدْ مَسَّ الْقَوْمَ قَرْحٌ مِّثْلُهُ وَتِلْكَ الأيَّامُ نُدَاوِلُهَا بَيْنَ النَّاسِ وَلِيَعْلَمَ اللّهُ الَّذِينَ آمَنُواْ وَيَتَّخِذَ مِنكُمْ شُهَدَاء وَاللّهُ لاَ يُحِبُّ الظَّالِمِينَ} صدق الله العظيم والله المستعان … سلااااام …

    1. اصلك ماااااا طمنتنا !! يعني نحنا خلاص اخدنا ايامنا زمان !!؟
      الله يرحم زمن أي سوداني يسافر للخارج يعتبر سفير لبلده !!
      انت صحي اول طيارة في الخطوط الاثيوبية كانت هدية لاثيوبيا من سودانير ؟

      1. والله يا جنوبي ما عااارف حاجة عن المعلومة دي !! لك العتبى حتى ترضى وبس بحب أعاكسك وزي ما قالوا ( البحبك بحب يعاكسك) دمت في حفظ الله ورعايته .. وين أنت ناس أمريكي وروسي ونونا وبقية السمار ؟؟

      2. امريكي ده راجي اللوفتهانزا , ونونا عرسوها وراجلا حماها تخش القمردينة , وروسي ( فلاديمير ) في دولة من الدول القاطعتنا واظنه التزم بالمقاطعة ,,,

      3. تحياتي من ارض الكتمه ووالله ليكم كلكم وحشه

  17. غايتو لحدي ما تجي شركة ال Black Water خلي ناس الهدف وأسوار وأواب و………والمابعرفو شنو
    يبرطعو في أمازونيا دي
    ولنا الله

    1. ونحنا ما عندنا ال blackwater السودانية ( الجنجويد ) !!

      1. والحين برضو عندنا الجنتشاد والجننيجر وبرضو بيقموا في حفظة القران اصحاب غلاف القران لك التحية جنوبي

  18. أخوي المندهش كتر خيرك وشكراً على التحية والقمردينة منورة بأصحابها .. وأنت لسه فاااكر ؟؟ ما قالوا الشقي يلقى في الفشة عضمة !! نصيبي كدي أعمل شنو ؟؟ شكلي محل ما أمشي بنحصل مشكلة كفى الله الشر !! ويا بتي يا نونا مبرووووك عليكي لو كان كلام جنوبي ده صحي ،، إن شاء الله بالرفاء والبنين (بارك الله لكما وبارك عليكما وجمع بينكما في خير) .. وأنت يا أمريكي شكلك ما حتسافر لو راجي اللوفتهانزا ،، يبقى زمانك فااات وغنايك مااات .. وفلادمير أظنو مشى للأستفتاء ولسه ما رجع !! ووينك يا حبيبنا د. شمباتي والله ليك وحشة ، مالك يا خوي قاااطع مووووية ونور عسى ما شر ؟؟ … سلاااام …

    1. وعليكم السلااااام ورحمة الله يا حبيب ,,
      حمدالله على السلامة وجيتا جيت ,,
      انا مانى قاطع علا هناى !
      كل يوم فى بلد وقرية وهجرة ,, احححححححح ,,
      اكل العيش وكدة ,,

      1. أهلاً بيك يا الحبيب ربنا يعينكم ويصلح حالنا وحالكم ويخلينا نرجع بلدنا معززين مكرمين .. ويعيد أيام كان السودان بي خيرو ومجدو وعزو قول آااامين .. سلاااام ..

    2. شيخنا و أخونا العزيز نانو ابو احمد
      اشكر لك سؤالك عنا و عن غيبتنا، اما عن زواجي فأشهد أنك من المؤمنين فالمؤمن صديق ( ولو صدّق جنوبي ذاتو) ، و لو ان ذلك خارج الموضوع، فأنا و الحمدلله ( على ذمّة راجل من زمااااااان يا شيخنا ) و لي من البنين و البنات ثلاثة و الحمدلله ( لكن ولادي صغاااار ، انا كمان صغيرة) و راجلي ما حماني و لا شي و هو بي قرا تعليقاتي كوللللها من زمني الحايمة بينكم فَتَا برأي لكن هذا لا يمنع دعاءك لي ، اما انقطاعي اخي نانو بس طُمام بطن ساااااي ، ماسكاني قرفة و الله، دا حال عليك الله؟ بلد بقينا ما فاهمين ليها اي شي، قاعدين فرّاجة بس! و يمكن فات عليك برضو إنو البروف كان بعافية شوية و دا من الأسباب الهذيان بيها اللعب برضو ( جنوبي اداهو عين في فبراير و قال أنتجوا غزير فيهو، قدر ما كلمتو و قلت ليهو يا جنوبي كدا عيب بتطق البروف عين ، ابى يسمع الكلام!!! هههه سلامة يا بروف و عودا حميدا اخي نانو

  19. بدخل كثير وكاتمه ومتربص بالبرنجية

  20. وريهم وفتح ليهم عيونهم عشان يطلعوا عينا. يا برف اتق الله في الامازونيين الفضلو

  21. يا بروف بتشيل ذنب الناس دي، انا قلت ليك سيناريوهاتك دي بنفّذوها بالحرف

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: