ده إسمو كلام؟

قبل حوالى العام تمت إستضافة العبدلله في مداخلة عبر الهاتف للمشاركة في برنامج (المحطة الوسطى) وقد كانت الحلقة عن الخطوط الجوية السودانية سودانير وقد كان ضيف الحلقة هو الشريف أحمد عمر بدر رئيس مجلس ادارة سودانير السابق والذي في عهده تم فقدان الخط (راح وكده) .. وعند سؤال (الشريف) عن كيف جاء بشركة عارف لتكون شريكاً أصيلاً لناقلنا القومي وهي ليست لديها أدنى فكرة عن (الطيران) بينما هنالك شركات ذات باع طويل وتاريخ مشرف في عالم الطيران .. أجابني (الشريف) : الكويتيون بحبونا

وهنا لم يتمالك العبدلله نفسه لذلك الرد المستفز وقال ما قال ومن يريد أن يستمع لما قاله العبد لله فما عليه إلا إستخدام (قوقل) فالمداخلة تجلس (للتاريخ) في موقع (اليوتيوب) لتوثق لهذه الحقبة (المتوضيه) في تعاملها مع المال والشأن العام .
من الواضح الذي لا تخطئه العين أن هنالك خلطاً شنيعاً يمارسه الكثير من المسؤولين بين (المال العام) و (المال الخاص) فالمسؤول (عندنا) يتصرف أثناء توليه الوظيفه وكأنها ملك خاص له دون خوف من رادع أو قانون والمثال السابق حول أستقطاب (مجموعة عارف) كشريك في (سوانير) فقط (لأنو الكوايته بحبونا) كما صرح بذلك رئيس مجلس إدارة سودانير السابق في تلك الحلقة (لمسجلة) يوضح ذلك بجلاء .
العبدلله تذكر هذه المداخلة السابقة وهو يقرأ في الزميلة (الصيحة) عن فساد مالي واداري في (مفوضية نزع الأسلحة وإعادة الدمج) حيث حصلت الزميلة على تقرير رسمي صادر عن اللجنة القانونية الإدارية حول التجاوزات المالية بمفوضية نزع الأسلحة وإعادة الدمج وكشف التقرير عن تجاوزات مالية وإدارية ومخالفات للوائح المالية والمحاسبيه إضافة إلى وجود معاملات تجارية مشبوهة وخلصت اللجنة إلى أن هناك فساداً مالياً وإدارياً تُختزل مسؤولية في السيد المفوض العام بالدرجة الأولى وقد قامت الصحيفة بنشر بعض المستندات التي تكشف حجم الفوضى العارمة داخل المفوضية .
العبدلله لا يود الخوض في الفساد المالي الذي ذكرته الزميلة (الصيحة) فالفساد المالي لدى المسؤولين أصبح (عادي بالزبادي) ويمكن للمسؤولين عنه أن يطلعو ذي الشعرة من العجين (لو في عجين من أساسو) ما يود العبدلله الخوض فيه وقد أتت به الزميله الصيحة (موثقاً) هو الغش والإحتيال والتزوير الذي مارسته المفوضية حيث أصدرت المفوضية خطابات رسمية بإسمها تخاطب فيها جهات سيادية لتسهيل تأشيرة الدخول إلى بلاد عربية وغربية لأشخاص لا علاقة لهم بالمفوضية والزعم بأنهم موظفون فيها .
هذه الجزئية من التقرير تعتبر شيئاً خطيراً للغايه وهي تعني أن بعض المؤسسات الحكومية قد أصبحت نهباً للمحتالين والمزورين .
إستباحة المال العام (عرفناها) وأصبحت شيئاً عادياً وغير مقلق لا (للص) ولا (للحكومة) بل تفوقنا فيها علي شعوب الارض جميعا حسب اخر التصنيفات العالميه ولكن أن يبلغ الأمر بان تصبح مؤسسة حكومية كمفوضية نزع السلاح هذه (وكالة سفر) تحتال على المرافق الحكومية والسفارات العربية والأجنبية طالبة منها إستخراج تأشيرات دخول لمن تدعي أنهم من منسوبيها وهم (ناس ساااي من الشارع) فهذا والله شيئ مؤسف وجد خطير يوضح تماما كيف يسئ الأدب من أمن العقوبة.
بأي مصداقية سوف تتعامل معنا سفارات تلك الدول التي علمت أن إحدي مؤسساتنا الحكومية تقوم بالتزوير والإحتيال وتستخدم خطاباتها الرسمية وأختامها الأصلية في الغش والتزوير؟ إلا يعد هذا الفعل فعلاً بشعاً يستحق من قام به أشد العقوبة والتنكيل؟ للأسف الشديد يحدث مثل هذا العبث بسبب ضعف الوازع الديني وعدم الاحساس بالوطنيه والانتماء لانسان هذا الوطن الكادح الصبور وإنعدام العقاب والتكالب على المال من أجل بناء (القصور) وركوب (الفارهات) وإقتناء الجياد من (الحريم) مثني وثلاث ورباع !
لقد تحدثنا في مقال الأمس عن مخالفة 14 جهة حكومية للقانون وفرضها لرسوم غير قانونية والآن هذه جهة حكومية تقوم بالتزوير والأحتيال .. بالله ده إسمو كلام بالذمة؟ لو فضل فيها ذمة !!

كسرة :
لو عاوز تأشيرة وترتاح .. أمشي مفوضية نزع السلاح !!!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

24 تعليق

    1. بت السودان نحنا ناس ديمقراطيين واعترف بشراكتك في البرنجيه ,,
      الغلبان مخاتفة شنو كمان ! فرق الزمن البينا يودي الزول من جده للخرطوم ! بارك وابقي مارق
      نانو داير تطردني من البلد عشان برنجيه ! ما تطرد الكيزان ما تطرد الضبان المابدور فتيش !
      عبيد كان ليك ! شفت ليك جنوبي بيدي حقو لزول ؟ ابييييييييييت ,,

      1. فرق التوقيت وفرق الاسعار وفرق الامن وفرق الامان وكاااااااااااااااااااااااااااتمة برضه وهاك الفروقات دي ما تقول لي هاتها تبقى من الجماعة طوالي هههه تقبل المرور

    2. مبرووووك ( نص ) البرنجية !!!!!!!

    3. بالبركة ان شاء الله يا جنوبى – و العبيد اظنو الليلة قاطع نت و الا كان كابسك فيها !!

    1. أسي No دي في ليها داعي ؟؟ لو كتبتي 1 بس كان حصلتي 10:37 وشلتيها تتّو !!!!

  1. مفوضية نزع السلاح وتوزيع السلاح والناس ديل ما بطلعوا منها الا بالسلاح وكتمت كتمت كتمت

    1. مفوضية نزع السلاح من عبده تي واعطائه لحميد تي ونزعه من حميد تي واعطائه لخميس تي ! وفي كل مره تصرف ميزانية نزع السلاح من فلان !!!
      عمرنا ما شفنا مفوضية نزع السلاح دي جابت ليها اسلحة وابادتها ! يكون بيودوا الاسلحه البنزعوها دي وين ؟؟؟
      ياخي موية البلاعه لما ينزعوها الناس بتشوفا مدفوقه في الشارع !!!

  2. مبرووووك عليك البرنجية يا جنوبي ( بقيت أحسن منك مش كده ؟؟) وهاردلك بت السودان تكبري تنسي !! ناس جنوبي ديل قاعدين متربصين أول ما ينزل البوست تلاقي نط طواااالي … ههههههه .. سلااااام ..

  3. برنجيه يا جنوبي معااك وطبعا ما عندك مانع،أخوك الكبير وكدا

  4. كدي يا أبو ناجي عليك الله أسالم لينا تأشيرة أمريكا بي كم ؟ وأوربا بي كم ؟ وشرق آسيا بي كم ؟ لأني ناوي أقوم بجولة (سياحية) في مختلف أرجاء المعمورة ” لو فضل فيها معمورة” لأجل الأستجمام والراحة من نكد (الغربة) والشلهته !!! .. سلالااام ..

    1. نانو ابو احمد مغترب جوه الخرتوم مع الجماعة والا شنو ههههههه

      1. لك التحية يا أخوي (الغلبان) أنا ما مغترب مع الجماعة في الخرتوم بس قاااعد براااي ومعاي ربي !! سلاااام ..

  5. يا د. طارق (ود العبيد) السلام عليكم .. بت السودان والغلبان وأنا “بالترتيب” سبقناك في المحاولة ، لكن الجنوبي دا نسوي ليه شنو ؟ ما داير يريحنا ويمشي بلدو – بعدما إنفصلوا – قاعد لينا شوكة حوت لا تنبلع لا تفوووت !! كل مرة ناطي لينا في البرنجية .. وعلى قول صاحبو الفرعوني كما يقول أمريكي – (يدي الحلق للي بلا ودااان) – وبعدين يا ود العبيد رسلت ليك على الواتسآب صهينت وما رديت علي !! عسى ما شر ؟؟؟ .. سلاااااام ..

  6. استغفر الله العظيم ,,,
    عشان كدة سفاراتهم بقت ما بتدى تأشيرة حتى لكبار المسئولين !
    والخارجيات بقت ما بتسمح للمشير بدخلو اراضيها للعلاج !
    احححح يا بلد ,,,,

    1. ما سمحو ليهو عشان ما جاهم برسالة من المفوضية !!!

      1. يفضوا فيهو مجموعة آر بجى !
        سب عليو ,,

  7. تلاتة كباري وشارعين وسد…
    قديتونـــــا قصــادهــــم قــــد…
    لو جينـا لكشف حساب وجرد…
    أمسك واحد أول بدء:
    سرقتو وطن واسع ممـــــتد…
    فكفـكتوهــــو…
    وزعزهتوهو…
    وأرهقتوهــو…
    وبشتنتوهــو…
    وهديـــــــتوهو هــــدا هــــد…
    وهاك التاني أمراً أد :
    حكمتو شعب كان زي الورد…
    أفقـرتوهـــــو…
    وشردتوهـــو…
    وجهجهتوهو…
    وعنصرتوهو…
    وقطعتو حبل كان واصل ود…
    أُخد التالت لو ترتد:
    وجدتو مصانع لقيتو مزارع…
    وسكـــة حديـــد جد بالجــــد…
    عطلتوهـــا…
    وفرتقتوهـا…
    ووقفتوهــا…
    وشلعتوهـا…
    وقطعتو رزق عمـال من حد…
    أحسب رابع وتابع العد:
    وين تعليمنا ووين ترنـيمــنا؟
    وين آدابنــا ووين كتــابنــــا؟
    وين رياضتنا ووين ريادتنا؟
    مرمطوهـا…
    وأخرتوها…
    وأفشلتوها…
    وطيشتوها…
    وخلفـــتوها جهـــل عن قصد…
    شوف الخامس أخذ ورد:
    كيف وحدتنا وكيف دولتـــنا ؟
    كيف عيشتنا وكيف حالتــــنا؟
    ووين ثرواتنا؟
    ووين أموالنا؟
    وين غيرتنا؟
    وكيف سمعتـــنا؟
    خرمجتوهـا…
    وبشتنتوهـا…
    وبـددتوهــا…
    ولوثـتوهــا…
    وبي سمعتنا مسحتو الأرض….
    هاك السادس ونفسك سد:
    ((رئيساً راقص)) رقصاً شين…
    مسئول ((مزواج)) ركاب سرجين…
    وزارة تجارة وبياعين…
    ناساً عايشة ومبسوطين…
    جضوم منفوخة ملمعة زين…
    كروش ممدودة متر مترين…
    أيادي طرية نعومة ولين…
    طالعين ماكلين نازلين بالعين…
    مناشر تنشر مطحونين…
    بفقه السترة محميين…
    ومندسين ومدسوسين…
    بفقه ضرورة وقوة عين…
    نهابين ومغتصبين…
    فساد شفناهو رأي العين…
    وشميناهو أبو العفين…
    وناس بهناك دايشين دايخين…
    بطونهم خاوية وما لاقين…
    وجوهم هايمة وفقرانين…
    وعينهم طالعة وكمان صابرين…
    وليه ساكتين؟؟
    ولي متين ساكتين؟؟
    بإسم الدين الخداعين…
    خلو حياتنا زفت وطين…
    تجار الدين الأفاكين…
    ملعونين ملعونين…
    ملعونين لي يوم الدين…
    غشيتونـــا…
    وبشتنتونـا…
    وعذبتونـــا…
    وجننتونـــا…
    وبكيتونا دمع ودم ولطخة خد…
    وتقولي كمان!!!!!!!
    تلاتة كباري وشارعين وسد!!!
    بس يــا ود…
    حيلك شـــد…
    ويد علي يد…
    كلنـــــا ضد…
    ضد العسكر وحكـــم الفرد…
    ضد الظلمــة ومــن أفســد…
    نضال وارثـنو أب عـن جد…
    أكـتوبر أولى لــنا بتشــــهد…
    وأبريل التانية أعادت مجد…
    والتـالتة قريبة وما بتبــعد…
    خليك واثق واتأكــد…
    للأحلى حيكون الغد…
    للأفضل راجنو الغد…
    للأجمل حنبني الغد…
    للأحلى حيكون الغد…
    للأفضل راجنو الغد…
    للأجمل حنبني الغد…
    اللهم ارحم محجوب شريف واغفر له وعافه واعف عنه , اللهم ابدله دار خيرا من داره واهلا خيرا من اهله , اللهم ان كان محسنا فزد في حسناته وان كام مسيئا فتجاوز عن سيئاته , اللهم اكرم نزله , اللهم ثبته عند السؤال
    اللهم اني اشهد له انه كان حاملا همنا فأحمل عنه همه اللهم وجازه خيرا ,, اللهم ارحمه يا رحمان اللهم ارحمه يا رحمان يا رحيم ,, انا لله وانا اليه راجعون
    وداعاً حبيبنا ود مريم ,,,,,,,,,,

    1. شايهو وجبنتو والأيدي الصديقة .. يلا نسد فرقتو.. حب الناس درقتو .. يا موت لو تركتو مننا قد سرقتو .. كنا نقول ده وقتو .. لكنك حقيقة ..
      غعفر الله وجعل الجنه له سكنا ,,,

  8. جنوبي ما خليت للبعدك حاجة
    رجل ليس بقامة وطن
    ولكنه الوطن في قامة رجل
    رحمك الله يا شريف ووسدك الباردة بدل ضغطك والسكري ووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووو
    أخبار الحاجات العند النائب العام.

  9. هاكم دي
    ترددت أنباء بأن السلطات الأمنية استدعت الأسبوع الماضي (2) من كبار الموظفين برئاسة ولاية الخرطوم وحققت معهما بشأن الإشتباه بتورطهما في عمليات فساد محتملة.

    وتجئ الحادثة في الوقت الذي أشار فيه تقرير المراجع العام القومي بولاية الخرطوم للعام 2013م الي ارتفاع في حجم الاعتداء على المال العام في ولاية الخرطوم عن العام 2012م. وأن حالات الاعتداء تمثلت في الاختلاس والتزوير وأرجع ذلك لتنوع وتطور الأساليب من عام لآخر واستخدام أدوات تنم عن ذكاء إجرامي مستغلين ضعف أدوات الرقابة الداخلية وغفلة بعض المسؤولين أحياناً.
    وورد في الأنباء ان المشتبه بهما وهما في الأصل ضابطان بقوات نظامية تم إلحاقهما للعمل برئاسة الولاية أحدهما ضمن الطاقم الخاص لمكتب والي الخرطوم الدكتور عبد الرحمن الخضر والآخر يتولي منصب إداري حساس ، وجهت لهما تهماً تتعلق بإختلاس أموال وتزوير مستندات أراضي بغرض الاستحواز علي أراضي حكومية فيما لم تعرف بعد نتائج التحقيق حيث يتوقع تحويلهما الي النيابة المختصة حال ثبوت التهم المنسوبة إليهما.

    – يقال و العهدة على الراوي ان المبلغ اكبر من ٤٠ مليار جنيه ( وما تسألوني بالقديم ولا الجديد ، لأنني ما عرفت أعدّ الأصفار )!
    – رحمة الله عليك يا محجوب شريف و أسكنك فسيح جناته ( لو ما كنت متّ ، كنت حتموت من الأخبار دي حسي)

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: