وداعاً شاعر الشعب

سرررررررررررررررررررررررررريفا

يا اللي بتسمع والما بتسمع

لازم تفتح اضانك وتسمع
صوت الشارع لمن يدوي
كل قلاع الخونة بتهوي
وكل جباه الكهنة بتركع
وشمس الحق السرقو شعاعها
بكرة بامر الشعب بتطلع
ياللي بتسمع
والما بتسمع
نحن اسودا ما بتدجن
ونحن سدودا ما بتهدن
ونحن جبلا ما بتصدع
لملم ناسك ولحمة راسك
وارفع ايدك عننا ارفع
يا اللي بتسمع
والما بتسمع
لو بي بنادقك ما بترهبنا
ولو بى خنادقك ما بترعبنا
*****
والتاريخ يا جاهل بيشهد
والايام لسع بيناتنا
وكل الحق الضايع بيرجع
يا اللي بتسمع
والما بتسمع
اسأل كل العسكر قبلك
وكل الحاول فكر متلك
الاستأسد والاتنمر
مهما استعلا ومهما استكبر
برضو في يوم الغضبة بيهلك
وبيلقى مصيرو نفس المصرع
واننا أمة عظية اصيلة
لينا خصايص ما في مثيلها
وفينا طباع بالفطرة نبيلة
والاسلام ما جانا الليلة
ولا اخلاقو علينا دخيلة
الايمان من بدري سبيلنا
والقرآن في الصدر دليلنا
انقى وارقى واسمى وارفع
يا اللي بتسمع
والما بتسمع
نحكي ليك لو كان ما بتعرف
حاجة بسيطة بس عن ماضينا
انحنا رضعنا الثورة رضاعة
وبالوطنية انحنا ربينا
التدجيل ما بنفع فينا
والتضليل ما بيمشي علينا
انحنا عبرنا السكة مشينا
وشفنا عدونا وشفنا صفينا
وما بنهاب لا سيخ لا مدفع
يا اللي بتسمع
والما بتسمع
الانقاذ ما بالدبابة
ولا احلام شايلاها سحابة
ولا اوهام عالم كضابة
ولا ارقام خاوية وخلابة
والاصلاح ما جربندية
الاصلاح ما بالزندية
الاصلاح عدل وحرية
الاصلاح موضوع وقضية
الاصلاح عزقة وطورية
نحن بنفكر بتاريخنا
يا اللي بتسمع
والما بتسمع
نحن اولاد الوطن الواحد
متسامحين من يوم ما قمنا
عشنا حبايب ولسه حبايب
ما اتخاصمنا ولا اتصادقنا
فينا مساجد بتهليلها
وفينا كنايس بي انجيلها
وفينا معابد يسرج ليلها
ربنا واحد وشعبنا واحد
وحبنا واحد ودربنا واحد
يا اللي بتسمع
والما بتسمع
دايرين نختم نحن كلامنا
ودايرين نحسن نحن ختامنا
للاحرار نديها تحية
وللثوار تعظيم وسلام
نحن الفوق الشمس مقامنا
ونحن جبين الثمسر مرامنا
ونحن وقود الحارة ونارها
ونحن منية الباغي سهامها
الا ارادة المولى ارادت
حكمت فينا وفي حكامنا
بعد ما ازهري كان هو زعيمنا
بعد المهدي الصلى امامنا
بعده الغرد الضوو جبينا
بعد الدرر الزانو زمانا
جات البقرة عشان تحكمنا
وام رخم الله مشت قدامنا
جل جلالة الملك الواحد
يأتي وينزع
ويعطي ويمنع
ويخفض ويوفع
يا اللي بتسمع
والما بتسمع
يومك قرب يا ظالمنا
وبكرة حناخد منك تارنا وما بنرجاهو حساب الآخرة
داكا حصابا من غفارنا
يمكن يصفح ويمكن يسمح
ويمكن يعدك من اشرارنا
الا انحنا حسابنا براهو
يوم الحارة بتوقد نارنا
تحصد كل الداسو حقوقنا
تحرق كل الخربو ديارنا
دايرين نعرف وين شهدانا
دايرين نعرف وين ابرارنا
والشرفا الراحو اوانطة من طلابنا ومن احرارنا
والآلاف الشردتوها من خبراتنا ومن اخيارنا
والمؤتمرات الدبلجتوها من اخوانا ومن اعمارنا
نحن عرفنا البير وغطاها
ونحن خلاص قرارنا
ونحن حنضرب كل العملا
ونحن حنصلب كل الجهلا
نحن حنغبن عصابة القتلة
ومن الباغي حناخد تارنا
وعالية ترفرف راية العزة
وغالية عزيزة حترجع دارنا
ونور الفجر القادم يسطع
يا اللي بتسمع
والما بتسمع

Advertisements

20 تعليق

  1. له المغفرة ولاهله الصبر والسلوان وإنا لله وإنا إليه راجعون

  2. نسال الله له المغفرة و القبول الحسن و يلهمنا و اله و ذويه الصبر و السلوان و حسن العزاء ….

  3. الله إن كان محسنا فزد في حسناته وإن كان مسيئا فتجاوز عنه – اللهم نقه من الخطايا كما ينقى الثوب الأبيض من الدنس – الله أغسله بالماء والثلج والبرد – اللهم لا تحرمنا أجره ولا تفتنا بعده – أكرم نزله ووسع مدخله – والهم اله وصحبه ومحبيه الصبر وحسن العزاء

  4. On Thursday, April 3, 2014, “الفاتح جبرا” wrote: > الفاتح جبرا posted: ” يا اللي بتسمع والما بتسمع لازم تفتح اضانك وتسمع صوت الشارع لمن يدوي كل قلاع الخونة بتهوي وكل جباه الكهنة بتركع وشمس الحق السرقو شعاعها بكرة بامر الشعب بتطلع ياللي بتسمع والما بتسمع نحن اسودا ما بتدجن ونحن سدودا ما بتهدن ونحن جبلا ما بتص” >

  5. والله يا استاذ رغم حبي واعجابي بكتاباتك وشجاعتك في قول الحق الا اني كنت قربت اكوّن رأي سلبي تجاهك لمن لقيتك ما نعيت لينا حبيبنا وصوت همسنا محجوب شريف , لكن الحمدلله ابدا ما قعد تخيّب ظننا ,,
    محجوب شريف رجل يبكيه الرجال قبل ان تبكيه النساء محجوب شريف ارجل سوداني مهما ذكر تاريخ السودان غير ذلك محجوب شريف رغم التعذيب في السجون والظلم الذي عاشه من حكم نميري وحتي حكم هؤلاء الغرباء لم يهادن يوما ولم يهرب يوما ولم يلين , محجوب شريف عمره ما اتكلم عن نفسه وكان يتكلم عن السودان , عمره ما حكي الظلم الذي تعرض له , بل كان يتكلم عن الظلم الذي يتعرض له السودان , محجوب شريف كان خشمه يتوقف عن الطعام ويعيش بالدرب رغم ذلك ما كان بقيف عن الكلام البيسري جوانا زي الدِرب !!
    محجوب شريف الولولة فيهو شوية والسكليب فيهو شوية وكل كلمات النعي عليهو شوية , محجوب شريف يتمنا كلنا .
    بالله تاني منو اليكتب لينا ومنو اليغني لينا !!!

  6. غفر الله له وتجاوز عنه وجعل الجنة له متكئا ومقيلا ,,,

  7. الناس ﺍﻟذﻳﻦ … ﺧﻠﻴﺘﻢ ﻭﺭﺍﻙ …ﻭﻋﻴﻮﻧﻬﻢ ﺣﺰﻳﻨﻪ …ﻳﺘﺒﻠﻞ ﺛﺮﺍﻙ
    ﻭﺍﺑﻮﺍﺏ ﺍﻟﻤﺪﻳﻨﻪ … ﺑﺘﺴلم ﻋﻠﻴﻚ …. ﻭﺍﻟﺸﺎﺭﻉ ﻳﺘﺎﻭﻕ … ﻳﺘﻨﻔﺲ ﻫﻮﺍﻙ وياحليلك حليلك يامحجوب شريف عاش شريفا ومات شريفا
    اخر حاجه ليهو هو رفض زيارة مامون حميده له وقال لو جا خاشي هو بيطلع من المستشفي وبالفعل لم يسمح ل وزير الصحه بزيارته
    الا رحمه الله رحمتا واسعه

  8. اللهم اغفر له وارحمه وأدخله الجنه مع الصديقين والشهداء وانا لله وانا اليه راجعون

  9. الأعزاء الأحباء ..
    الحبيب جنوبي

    لقد شق عليا الفقد .. ولم استطع تحمل الفاجعة لذا تأخر البوست .. الراحل الباقي في وجداننا صديق منذ بدايه تسعينات القرن الماضي .. عرفته عن قرب فعرفت فيه إنسان السودان الخالص من كل الشوائب .. رحمه الله رحمة واسعد وأدخله الجنة مع الصديقين والشهداء وحسن أولئك رفيقاً .. انا لله وانا إليه راجعون ..

    1. نعزيك يا بروف و نعزي السودان ، الأمة التي ثكلت بفقده، إنّا للّه و إنّا إليه راجعون، كل يوم فجيعة و فجيعة ، على وييييين يا بلد! ما فضل في القلب مكان للحزن ، القلوب مليانه فجيعة و وجيعة

  10. اللهم اغفر لمحجوب شريف يا غفار
    اللهم آنس وحشته و ارحم غربته و قه عذاب القبر و عذاب النار

  11. لبس المسئول غالي الثياب وتعطر وامر الكاميرا ان تتحضّر ليوثق النفاق بزيارة من هم امرضوه , فكان رد المريض ان لا زيارة للغرباء , فرجع خائباً يتحسّر , وهيأ كريههم عباءته والعمامة ومني نفسه ان في الصلاة علي قتيله يتصدّر , فكان رد قتيله ان لا يتبعه ولا يصلي عليه فاسد متكبّر , فعاده الشعب في مرضه وتبعه الشعب في نعشه وصلي عليه الشعب بصدقٍ الله اكبر , الله أكبر , الله أكبر , الله أكبر
    اللهم اغفر لمحجوب واكرم نزله
    اللهم اجعل قبره روضة من رياض الجنة
    اللهم ان محجوب شريف كانت شيلة زواجه مصحف اللهم فاجعل مصحفه في يمينه

  12. اللهم اغفر لمحجوب شريف وارحم البلد الذي غنى له محجوب شريف هو ايضا توفي العزاء لنا جميعا في محجوب وفي الوطن الذي مات

  13. كتمت كتمت كتمت وطن بالفيهو نتساوى نحلم نقرأ نتداوى

  14. الم زعلني يا خوانا إنو الله يرحمو كان يكتب شعر و يسخن الدلوكة ، راجينا نسوّي شي للأسف فضلنا نعرِض و نتفنس، و كان بااااالغنا نحرّر الصفقة. الله يرحمو بس!

    1. الله يرحمه ويحسن اليه
      المشكلة تاني العرضه والفنسه ذااتهن ما حنلقاهن !
      لكن صحي نحن شعب مقدود , شعراء يحرضونا نسوي غنا ونرقص بيهو , كتاب يعبونا نسوي ضحك ونتنفس بيهو , حكام يزلونا نقول مصير ونستسلم ليهو ,
      اللهم ان محجوب شريف كان يتمني لنا العيش الكريم فأكرمه يا الله

  15. لا إنتو جند الله

    ولا جند الوطن

    بل إنتو حقاً جندهم

    وبعض من ما عندهم

    سندة قفاهم وغمدهم

    لكنهم هم

    ما ح تسكن حيّهم

    ولا ح تاكل زيهم

    ولا ح تلبس إنت زي

    زي زيهم

    واذا عطشت،ء

    بعيد بعيد،ء

    ما تقترب من ريهم

    هل شفتهم

    ملأوا الشوارع

    في الصباح،ء

    عند الظهيرة مغبرين

    طالعين من الوردية

    والليل انتصف؟

    باين على وجوهم تعب؟

    وزمن صعب؟

    القفة

    والدكان

    ودخان الفرن

    ومرتبات حال الثبات

    لا تحل وظيفة ولا نبات

    هل شفتهم بين كر وفر

    والدنيا حر

    بين صف وصف

    واحد وقف

    هل شفت يوما هؤلاء؟

    هل تذكرهم؟

    زاروكا يوم أو زرتهم

    بس إلاّ في شارع ظلط

    ومظللاتهم مسرعة

    كلا ولن ولا بالغلط

    ما شفتهم

    على إيه إذن

    لي مين إذن

    وانت بتشوف

    غرقانة كم

    في الدم

    مفاتيح الخزن

    هم دربوك على الأذى

    تقتل تدوس

    تحرق

    ولا يهمك

    كذا ولا كذا ولا كذا

    كم فر طاغية من بلد

    ما خلا غير كلب الحراسة

    يئن وحيداً في القفص

    متلك مصيرو

    العزلة والخوف والجزع

    إن متَ حتى ولا عزا

    حكّم ضميرك يا ولد

    أمشي استحمى واعتذر

    واغسل يديك

    من كل ما يخليك

    أمام روحك قذر

    ألبس عراريق الحياة اليوماتي

    واقدل في الدرب

    لا يدسو منك لو غشيت

    ولا إنت أقرب زول إليك

    منك حذر

    أو فانتظر

    أو فانتظر

    أو فانتظر
    __________________

  16. ﻣِﻦْ ﻭﺟْﺪﺍﻧﻲ
    ﺻَﺤَّﺔ ﻭ ﻋَﺎﻓﻴﺔ
    ﻟﻜﻞ ﺍﻟﺸﻌﺐ ﺍﻟﺴﻮﺩﺍﻧﻲ
    ﺍﻟﻘَﺎﺻِﻲ ﻫﻨﺎﻙ ﻭﺍﻟﺪﺍﻧﻲ
    ﺷُﻜﺮﺍً ﻟﻸ‌ﺭﺽ ﺍﻟﺠﺎﺑﺘﻨﻲ
    ﻭﺍﻟﺪﺭﺏ ﺍﻟﻠﻴﻜﻢ ﻭﺩَّﺍﻧﻲ
    ﻳﺎ ﻃﺎﺭﻑ ﻭﺗﺎﻟﺪ
    ﻳﺎ ﻭﺍﻟﺪ
    ﺍﻟﻨﻴﻞ ﺍﻟﺨﺎﻟﺪ ﺷﺮَّﻓﻨﻲ
    ﻭﺍﺣﺪ ﻣﻦ ﻧﺴﻠﻚ ﻋﺪَّﺍﻧﻲ
    ﺇﻧﺖَ ﺍﻷ‌ﻭﻝ ﻭﻣﺎ ﺑﺘﺤﻮَّﻝ
    ﻭﺗَﺐ ﻣﺎ ﻋﻨﺪﻱ ﻛﻼ‌ﻡ ﺑﺘﺄﻭَّﻝ
    ﺃﻧﺖ ﺍﻷ‌ﻭﻝ
    ﻭﻛﻞ ﺍﻟﻌﺎﻟﻢ
    ﺑﻌﺪﻙ ﺗﺎﻧﻲ
    ﻳﺎ ﻣﺘﻌﺪِّﺩ ﻭﻣﺎ ﻣﺘﺸﺪِّﺩ
    ﻣﺎ ﻣﺘﺮﺩِّﺩ … ﻣﺎ ﻣﺘﺮﺩِّﺩ
    ﻣﻠﺊ ﺟﻔﻮﻧﻲ ﺑَﻨﻮﻡ ﻣُﺘﺄﻛِّﺪ
    ﺑﻞ ﻣﺘﺠﺪِّﺩ .. ﺗﻨﻬﺾ ﺗﺎﻧﻲ
    ﻭﻟﻤﺎ ﺗﻌﺎﻧﻲ .. ﺑَﻌﺎﻧﻲ ﻭﺍﻋﺎﻧﻲ
    ﻭﻗﻠﺒﻲ ﻭﻋَﺎﻧﻲ ﺃﺣﺒﻚ ﺃﻛﺘﺮ
    ﻭﻣﺎ ﻛﻔَّﺮﺕَ .. ﻭﻻ‌ ﻧﻔَّﺮﺕَ
    ﻭﻟﻢ ﺗﺴﺘﻌﺼﻰ ﻋﻠﻴﻚَ ﻣَﻌَﺎﻧﻲ
    ﻋﻠﻤﺘﻮﻧﺎ ﻧﺴِـﺪ ﺍﻟﻔﺮﻗﺔ
    ﻭﺇﺗﻘﺎﺳﻤﻨﺎ ﺭﺣﻴﻖ ﺍﻟﻄَـﺮَﻗَـﺔ
    ﻭﻛﻢ ﺷﻠﻨﺎﻫﻮ ﺛﺒﺎﺗﻚ ﺩَﺭَﻗﺔ
    ﺑﻜﻞ ﺍﻟﺒَـﻲْ ﻭﻋَـﻠَـﻰْ ﻭﺣﻴﺎﺗﻚ
    ﺃﺗﺤﺪَّﺍﻩ ﻛﻤﺎ ﺃﺗﺤﺪَّﺍﻧﻲ.

  17. الله يرحمك يا محجوب ويرضيك كما ارضيتنا ,, ما عارفين نرثيك ام نرثي حالنا بعدك
    لا حول ولا قوة الا بالله
    كتير الماتوا قبالك لاكين موت الرجال حار

  18. رحم الله شاعر الشعب واسكنه فسيح جناته.
    لقد فارقنا جسدا وسيبقى في دواخلنا ما دامنا على قيد الحياة …

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: