يركبو الظلط

(السترة والفضيحة متباريات) كما يقول المثل السوداني المعروف .. تظل الأشياء التي تخص الشأن العام والشخصيات الحكومية (العامة) مستورة ما لم تأتي نازلة غير متوقعة وتجعل منها (فضيحة) تذهل المواطن الذي يتلقاها بإستغراش شديد .

فبينما يعتقد المواطن البسيط أن المسؤولين (ناس ّذينا كده) لا يملكون من حطام الدنيا شيئاً يصرفون مرتباتهم أول الشهر ثم يوزعون معظمها للدائنين من بقال وجزار وبتاع خضار يتفاجأ المواطنون بسرقه منزليه لأحد المسؤولين (قبل سنوات قريبه) تطال مبالغاً نقديه كبيره بتسعة عملات (مختلف ألوانها) كانت كالتالي :
(91)ألف جنيه سوداني و(13.140) يورو و(11.360) فرنك سويسري و(645) ألف ليرة لبنانية و(420) ألف ليرة سورية و(20) ألف جنيه مصري و(9) آلاف ريال سعودي و(5) آلاف جنيه استرليني و(26) ألف دولار !!!
ولولا تلك السرقه لمنزل هذا المسؤول لكنا حتى الآن نعتقد بأن البنوك وحدها هي التي تتاجر وتحتفظ بمثل هذا الكم من العملات ..
مناسبة هذه الرمية (كما يقول أستاذنا البوني) هو تلك الفضيحة التي جاءت في فحوي الخبر الذي نشرته الزميله (الوطن) مؤخراً وتناقلته صفحات الإنترنت والذي يفيد بأن شخصاً مجهولاً قد قام باضرام النيران في عربة مدير إذاعة القضارف الحكومية بينما كانت متوقفة أمام منزله وان النيران التي اشتعلت بالعربة ادت لحريق شامل وتلف بالداخل لم تسلم منه الا الماكينة حيث تم فتح بلاغ بشرطة القضارف تحت المادة (182) ضد مجهول .
يمكن أن يكون الخبر (لحدت هنا عادي) مواطن مسؤول (جا واحد ولع في عربيتو النار) .. ولكن غير العادي هو أن العربة المحترقه هي من نوع (البرادو) التي يناهز ثمنها المليار جنيه أو يزيد قليلاً !! قبل أن نستطرد في المقال ونيابه عن أفراد الشعب السوداني الفضل ومواطني القضارف الذين يتعالج مرضى الربو (الأزمة) منهم بجهاز (واحد) يتراصون أمامه من أجل ان يأخذ أحدهم (نفس واحد) يعينه على الإستمرار في الحياة نشكر جميعا ذلك (المواطن المجهول) الذي قام بحرق العربة فلولاه لما علم دافعو الضرائب والزكاة والرسوم والرخص والعوائد والجبايات والرشاوي ذلك !
عند ما قرأ العبد لله الخبر سأل نفسه في غباء ، طيب مدير إذاعة (مونت كارلو) بيكون راكب شنو؟ خليكم من (مونت كارلو) طيب مدير إذاعة (البي بي سي) بيكون راكب شنو؟ وإذا مدير (إذاعة القضارف) راكب برادو ده معناتو مدراء كل الإذاعات الولائية بيكونو راكبين برادو ونحنا عندنا كم وعشرين ولاية معني كده عندنا كم وعشرين مدير إذاعة .. معنى كده عندنا كم وعشرين (برادو) .
ولأنو التلفزيون (توأم) الإذاعة فكما مدراء الإذاعات الولائية فمدراء التلفزيونات الولائية بيكونو راكبين (برادو) .. وعلى كده يكون عندنا (قطيع) من البرادوهات ! وأكيد نواب المدراء (في الإذاعات والتلفزيونات) ح يكونو راكبين حاجات (أقل قليلا) من فصيلة (الألنترات) و (السينتافيهات) .. ده غير أخوانا في الإذاعات والتلفزيونات الإتحادية والذين (قطع شك) يمتطون من فارهات العربات ما يفوق (برادو) أخونا مدير إذاعة القضارف تلك المدينة التي لا تتوافر في مستشفياتها أحياناً (قطعة شاش) والتي يتسيطر الاهمال تماماً على معظم مستشفياتها العامة ومراكزها الصحية والتي تعاني من قصور الخدمة والعجز فى أعداد الكوادر الطبية المؤهلة اضافة الى عدم توفر الادوية .
إنها وايم الله فضيحة من المفترض ان تزلزل عروش المسؤولين الذين ما فتئوا يحدثوننا عن التقشف وتقليص المنصرفات والما عارف ايه في بلاد يسير إقتصادها نحو الهاوية في متوالية هندسية وأصبح معظم مواطنيها يعيشون على وجبة واحده فقط .. بلاد أصبح مواطنوها لا يتورعون عن بيع (أعضائهم) من أجل سد عجزهم عن تدبير العيش الكريم لهم ولأسرهم .
المشكلة في هذا العهد الميمون أنك لا تستطيع أن تجد مسؤولاً يجيب على تساؤلاتك (بس تموت بيها) .. يعني في هذه الحاله هل نجد مسؤولاً مثلاً يجيبب على أسئلتنا البايخة دي:
– (إذاعة القضارف) دي كوووولها بي كم؟
– ساعات البث في الإذاعة دي كم؟
– الدرجه الوظيفيه للمدير (أبو برادو ده) هي شنو؟
– هل كل الموظفين الفي درجتو دي راكبين (برادوهات)؟

المنطق بيقول : بما أنو مدير إذاعة القضارف راكب برادو فباقي مدراء الإذاعات والتلفزيونات راكبين برادو وبما إنو (المدراءالفاتو ديل راكبين برادو) فعلى كده كل مدراء الوزارات والمؤسسات والبنوك الحكومية (راكبين برادو) .. وبما إنو الجماعة الفاتو ديل كووولهم (راكبين برادو) فمعني كده كل المعتمدين ونواب المعتمدين راكبين برادو وعلى كده كل الولاة ونواب الولاة راكبين برادو .. وبما إنو (الناس الفاتو ديل كووولهم راكبين برادو) فعلى كده كل الوزراء (راكبين برادو) وعلى كده كل المستشارين (راكبين برادو) وكل المساعدين والدستوريين (راكبين برادو) وبما إنو الجماعة المذكورين فوق ديل كوووولهم راكبين برادو فمعني كده على المواطنين أن (يركبوا الظلط) !!

كسرة :

يا جماعة الخير الوزير في (طوكيو) بيمشي الشغل بي عجلة .. مدير إذاعه في (القضارف) يمشي الشغل بى (برادو) .. هات الحبوب
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

Advertisements

30 تعليق

  1. مجموعة برنجى كدة و الحبايب كمان معانا !!

    1. يا خاين لخمتني هناك وجيت شلتها هنا !!
      بالقحه وبلغم السدر

      1. ماااالك – ما كنتا مبسوط باللخمة و كدة – معليش تعيش و تاخد غيرها …
        و الله يبارك فيك برضو !!

    2. يا جماعة الخير بنجونا معاكم

      1. نحنا ما مبنجين ،، نحنا مبرنجين ،، و أتفضل ليك معانا نفس – عزومة مراكبية !!

  2. معاكم ان شاء الله اخر نفس

    1. و ليه كفالنا الشر اخر نفس؟ ناوى تعتزل و الا شنو؟؟ ان شاءالله مزيد من الأنفاس الجاية ليك !!

  3. برنجيه

  4. الله يرحم أحد برادوهات السودان
    بس المُشكلة يا بروف إنه ثاني يوم منْ الحادث الراجل – أي السيد/ مُدير الإذاعة – يكون نزل غيرها أو مشى بي فورشنر قبل ما يجيب البرادو أول الشهر ،،، وكما قال المُصطفى صلى الله عليه وسلم [أي لحم نبت منْ سحت فالنار أولى به]

    1. هع هع هع كانه ما عندو غيرها انت ماا اظنك عارف هم خموها كلها

  5. سمح والي القضارف راكب شنو ؟
    اتخيلوا تمن البرادو ده واظنه ما اقل من مليار بي كتير ! كان بيزرع ليهو كم فدان سمسم !!؟ لاكين عمركم شفتوا ليكم سمسم طبّل لي زول ؟؟ يدوهوا قروش قدر دي لي شنو وهو ابكم !
    آآآآآخ يا الجنقوجوراي وآآآخ يا كمبو كديس وود أمونه !! كنتو مبسوطييين وباسطننا بالسمسم والفتريته !! ضريناكم وضريتونا بي مشروعنا الكاذب ده ,,
    يا سمسم القضارف الزول صغير ما عارف

    1. اه لو اه تفيد مجروح يا اخوي يا جنوبي فضلت شعره واحده ونص فيوز يحلنا الحله بله من دي حكومة دا عكيم ده دا شنو دا الحاصل آآآآآآآآآآآآآآآآآآجماعة الخير لمتين

    2. كلهم راكبين يا خوي يا جنوبي وتصدق الشعب السوداني ما هناك هناك راكب اللي انت عارفه (بالسودان) ولكن هنا (بركبوا الطرورة عديييييييييييييييييل حتى يعبروا البحر الابيض ويا لمبادوزا جاك زول وشفتهم بي عيني ما قالوا لي) شفته ودونا لي وين؟وسفارتنا اااااااااااااه من سفارتنا في طرابلس واااااااااااااااه اكثر من سفارتنا زمان في ابوظبي وااااااااااااااه من سفارتنا الجاية لانه لسه في طشيش تقبل مروري اخي جنوبي

      1. هناك وهناك مقصود بها السودان

    3. والتحية لك يا جنوبي ولعبدالعزيز بركه ساكن ولكل مبدع

  6. كتمت كتمت كتمت احرقوا ليهم كل حاجة تحريض لكل الناس (ان شاء الله بالدس زي الحرامية بس احرقوا احرقوا احرقوا) وكتمت كتمت كتمت

    1. لكن لما تحرق ليهم كل شيء تكون ما عملت شيء بل زدت الطين بلة لأن مصير العرجاء لمراحها

      1. العرجاء لو كان ليها مراح ماكانت اتخارجت من البلد بعد غربة 20 سنة تاني اتخارجت

  7. تصدق !! حادث حريقة البرادو دي فيها حلات كسرة وكسرة ثابتة كمان لحدي ما نعرف عدد البرادوهات كم في البلد دي
    وعلى بركة الله نبدأ
    أخبار البرادووو شنووو ؟

    1. هوى يا المندهش ،، اتاكدو من البرادوهات بالأول قبل ما تولعوها ،،، انا لأنى وزير و لأنى معتمد و لأنى مدير إذاعة و لكن الحمدلله عندى برادو حصاد و شقى السنين ،، ما تقومو تحرقوهو لينا ساى !!

      1. هههه برادوك ما بحرقوها الناس البريدوك يا خوي

  8. البروف والسمار الكرام
    اولا الرحمة والمغفرة لشاعر الشعب الاستاذ محجوب شريف
    هي كان بقت علي البرادوهات هينة , الكلام في المرتبات والنثريات والماموريات وهلم جرا , يا جماعة الخير جنس المسئول الفوق بتاع كوكتيل العملات ده وما في وزنه بيصرفوا من ستة الي عشرة رواتب في الشهر رئيس او عضو مجلس كم شركة كدة من الشركات الفكة بتاعة الحكومة ورئيس او مقرر او عضو لجنة من اللجان اياها وتشمل ذلك كل النثريات والاكراميات والاجتماعات ابو خمسة مليون جنيه ( هل تصدقو انو المسئولين لمن يجتمعو ويكوضمو ليهم كم تمرة كدي وحبة فول مدمس بدوهم خمسة مليون علي الاجتماع ده – ما امازونيا وكدة ) وهذا كله من رحم فقر الشعب الامازوني .
    ويجي امبراطور امازونيا الكبري يقول الاصلاحات الاقتصادية دي سبعين في المية ماشة الفصل الاول طيب ما هو الفصل الاول زاتو هو المشكلة ,,,,,,,,,,,,وفي النهاية دقي يا مزيكة خلينا انرقص

    1. ابو الشوش الرقيص للرئيس نحنا نبرطع ساكت

      1. فعلا الرقيص حقو براهو يا غلبان وقالوفي احدي زياراتو لي شندي والجماعة قفلو السوق اجباري عشان زيارتو وواحد من التجار زهجان وواقف من طول الخطابات وقال باعلي صوتو يا اخوانا رقصو لينا الرئيس دة خلونا النمشي – وللشباب اليافع زمان رقيص العروس كان نهاية الحفلة –

  9. إنتو الحسادة ليكم شنو ؟ ما تخلوهم يركبوا برادو ولا طرورة !! مش هم سياد البلد وناس النهج الحضاري .. هي لله هي لله .. سلااام ..

    1. صحي يا نانو ناس النهب الحضاري

  10. السلام عليكم ورحمة الله
    وتاني جا ود (الخالة موزة) واتبرع ليهم بمليار دولار _ التمن ما مهم_ المهم انو في مليار حتخش خزينة الجيوب وبعد داك يركبو الدايرين يركبوهو _____ وانحنا بره

    1. البلد كردوها كرد والعطية البتجي من الله بتوزعوها آآآآآآآآآآآآكتلوني

  11. بمناسبة المليار دولار دي قال لي انت عارف السودان الفضل بكون باعوهو واحنا نصبح ضيوف
    وقالو تميم دا ذاتو من شذاذ الافاق ودايرين يوطنو اخوان قطر السود لانهم عنصر غير مرغوب فيهم وبالمرة تخفيف الضغط عليها

    1. وانتا ي كتلوني نان قايل الناس ديل طلعو رقم وطني لي شنو ما للبيع يشوف عندهم كم راس
      والله جمهورية كوزخستان دي حيرتنا معاها

      وبالنسبه للقطريه اديكم وصيه اي زول لمن يجي داير ينوم يلم سفنجاتو عليهو لانو جايز تصحي الصباح تلقي سفنجاتك باعوها لي قطر

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: