حكاية ذوالنون

تخيل عزيزي القارئ لو أن موظفاً قد قام بإكتشاف فساد في المؤسسة التي يعمل بها وقام بكتابه تقريراً موثقاً لرئيسه في العمل بهذا الفساد وليكن ذلك في أشد البلاد كفراً وإلحاداً .. ماذا سيحدث؟ .. سوف يتم تقديم الوالغون في الفساد إلى مجلس تحقيق ومن ثم يتم فتح بلاغ جنائي في مواجهتهم ويحاكمون جراء ما إقترفت اياديهم الآثمة ..

في دولة المشروع الإسلامي الحضاري (في كلام تاني) .. يبقي الفاسدون في أماكنهم (ليرتعوا أكتر ما القصة هاملة) لا ومش كده وبس .. يتم الإستغناء عن خدمات (الموظف الشريف) !!
قرأ العبدلله بمنتهى الحزن والأسي (والطمام) ما نشرته الزميله (الصيحة) بالوثائق الدامغة قصة الفساد المالي والإداري بمفوضية نزع السلاح هذا الفساد الذي قام بكشفه المواطن السوداني (النضيف الشريف) ذو النون بخيت عبدالرازق مدير إدارة التدريب بالمفوضية .. نشوف القصة شنو؟ كما وردت في تقرير الزميله الصيحة :
أخونا (ذوالنون) مدير أدارة التدريب بالمفوضية كان في مأمورية خارج البلاد وعندما عاد أكتشف إنو في تجاوزات ، وقد قام برصدها ليتضح الآتي :
1- قامت إدارة المفوضية بإصدار خطاب تطلب فيه من الجهات المسؤوله الموافقة والتصديق بسفر ثلاثة موظفين إلى تركيا لجضور ورشة (وهمية) بعنوان – تطوير الهياكل التنظيمية والوظيفيه لمواكبة المستجدات والمتغيرات – (شفتو الإسم كيف؟ نجر صاح) وذلك بعد أن جاءتها دعوة من الدار العربية للتنمية الإدارية (برضو نجر ساااكت) !
2- صادقت الجهات المسؤولة بناء على خطاب المفوضية على سفر المذكورين وقد قام المذكورون باستلام المبالغ التالية من وزارة المالية وهي :
قيمة تذاكر سفر ذهاب وإياب إلى تركيا
مبلغ 6000 دولار رسوم إشتراك (للفرد الواحد)
مبالغ كنثريات وإعاشة
بعد ما مواعيد الدورة إنتهت .. ولأنو أخونا (ذوالنون) بيشتغل (بالقانون) وحسب ضوابط السفر الخارجي الصادرة من المجلس القومي للتدريب قام أخونا (ذوالنون) وللتعترو بمخاطبه المتدربين (التلاته) وذلك عبر (المدير الإداري للمفوضية) طالباً منهم مده بتقرير عن الدورة وشهادات الدورة وإيصالات تسديد رسوم الدورة بالإضافة إلى صورة من جوازات سفرهم تشمل المغادرة والقدوم وذلك حسب ضوابط المجلس القومي للتدريب (يعني الكلام ده ما جايبو من راسو) !
لا المدير الإداري وللا الجماعة المذكورين إشتغلو بخطاب أخونا (ذوالنون) ده شغله الشئ الخلاهو يشك في المسأله وفي قصة سفرهم (ذاااتا) ليكتشف الأتي :
– ليست هنالك دورة تدريبية من أساسو ولا يحزنون
– المعلومات التي أرسلتها المفوضية إلى وكيل وزارة المالية بخصوص نثرية السفر والتذاكر ورسوم الإشتراك كانت غير صحيحة إذ أن درجاتهم الوظيفية المذكورة في الخطاب غير صحيحة (الخطاب ده الطلعو منو يا ربي؟) وقد تم رفعها حتى ترتفع النثرية (ما مال سايب وكده)!
– قد سافروا بجوازات سفر رسمية من وزارة الخارجيه رغم أن درجات وظائفهم لا تسمح بذلك إذ أن الجوازات الرسمية لا تمنح إلا لموظفي الدرجه الأولى (ودرجاتهم بين السابعة والتامنة يا عيني .. تزوير راسو عديل)
طيب .. اخونا (ذوالنون) بصفته مديراً للتدريب عمل شنووو:
قام طوااالي خاطب المدير الإداري والسيد المفوض العام (وما أدراك ما المفوض العام) وأخطرهما بهذه التجاوزات التي تمت مطالباً بإسترداد المبالغ التي تسلمها (هؤلاء اللصوص والمزورين) وأعادتها إلى خزينة الدولة لكن المدير الإدارى والسيد المفوض لم يستجيبا (يستجيبوا ليه؟) وعندها قام أخونا (ذوالنون) بتصعيد الأمر إلى جهة أعلي (عل وعسى) وهي المجلس القومي للتدريب بصفته الجهة المسؤلة غن السفر الخارجي جاء الرد من المجلس بإسترداد المبالغ (المنهوبة) من المذكورين ومحاسبتهم ولكن مع ذلك لم تتم محاسبتهم ولم يتخذ ضدهم أي إجراء (ما عصابه وكده) !
هنا وفي محاولة أخيرة قام (أخونا ذوالنون) بمخاطبة المدير الإداري للمفوضية والمفوض العام (وما أدراك ما المفوض العام) رسمياً طالباً منهما مرة أخرى إعمال القانون ومحاسبة المذكورين ولكن بدلاً من ذلك شكلا له مجلس تحقيق بتهمة الإساء لموظف شئون العاملين (شفتو كيف؟) !
ولما لم تجد (شوف تاء التأنيث) مدير الشئون الإدارية ما تقوم به حيال (الزول العكليته ده) قامت بتسليمه خطاب بإنهاء خدماته من المفوضية (النوع ده بقى ما بنفع) !!
وبقيت مدير الشئون الإدارية في منصبها .. وبقي المدير الإداري في منصبه .. وبقي المفوض العام .. وبقوا (الحرامية والمزوراتيه التلاته) في ظائفهم (واحده فيهم جابت شهادة تدريب من مصر بينما الدورة قالو في تركيا) … وذهب (ذوالنون إلى الشارع) !!
إلتماس :
بكل الإحترام والتبجيل نحن الشعب السوداني الفضل .. نلتمس (شوفو الأدب ده) من السادة ولاة أمرنا .. إعادة السيد/ ذوالنون بخيت عبدالرازق إلى عمله (مع ترقيته) لنزاهته .. وتقديم هذه (العصابة) إلى القضاء (أعملوها مرة واااحده الله يرضي عليكم) وإعادة هذه الألوف من الدولارات التي تم الإستيلاء عليها (تزويراً وبهتانا) والإستفاده منها في شراء أدوية لمرضى السرطان .. أو الفشل الكلوي .. أو السل الرئوي .. أو إلتهاب الكبد الوبائي .. أو أي مرض من الأمراض التي يعاني منها هذا الشعب المنكوب الما عارف يلاقيها من وين؟ وللا من وين؟
كسرة :
البلد دي قروشا ما بتكمل؟
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

19 تعليق

  1. برنجيييييييييييييييييييية

    1. حيرتونا آآآآآآآآآآآآآآآلمندهش نسينا طعم البرنجي

  2. بعااتي و ما فاضي | رد

    مبروك البرنجية لكن نفسي كتم من الزعل في الموضوع دا

    1. ااااااااااااااه يا بعاتي زعل بس؟؟؟؟؟؟؟؟؟؟؟؟؟؟؟؟؟؟؟

    2. نفسك كتم انزل شم هوا (في الشارع وكدي)

  3. سبحان الله ! ذوالنون سيد الاسم القرعة وقعت عليهو 3 مرات حتن بعد داك رموهوا , وديل رموا ذو النون حقنا ده بدون قرعه ذاتو !!
    ذوالنون حقنا ده يا جبرا أظنه كان من الساجدين المسبحين بصدق عشان كده ربنا ربنا نجاه من بطن حوت الانقاذ وقذف به عند اليابسه ( باقي الشعب اليبس ) ..
    هسي ذوالنون ده ذاااتو ربنا ما ارسله الي اهل الانقاذ ليردهم الي عبادة الله وحده , ولكن هي عادة الظالمين ..

    1. صدق يا جنوبي هم بدعوا انهم من جماعة ذو النورين ومرات ذو الشهادتين وبناتهم ذات النطاقين حاجة تجنن

  4. هي كتمت وهم اطلقوها امس يا طلعت كذبت ابريل يا تمهيدا للمخارج بما نهبوا بدون المساس بهم ما بتفوت على الغلبان الحركات دي اه يا بلد كتمت كتمت كتمت

  5. لا حول ولا قوة الا بالله العلي العظيم

  6. يا استاذ جبرا انا خايفة انت ذلك بخصوص خط هيثرو دة يقوموا يصفوك و كدةلانه ما بقدروا يرفتوك انت سيد نفسك مين اسيادك بس زى ما قلت ليك خايفة عليك من التصفية

  7. القصة الحزينة في البلد الحزين

  8. احيييييي انا يامرارتي … منكن يكونو كانو في اندر كفر ميشن خخخخخخخ ..فخمتو حاجه

  9. أحيييييي يا وجع قلبي بلد ما عنها وجييع !!! عليكم الله ما ترفعوا لينا ضغطنا الفينا مكفينا وكان الله في عون الشعب (الفضل)

  10. ياناس معناها الموضوع ده بحصل كتييييييييير!!!
    الاسبوع الفات وانا في احد المولات شفت صديق سابق ويعمل في جهه حكوميه وكضبت عيوني قلت لالا مامعقول ده بكون بشبهو ساي لانو النوعيه دي مامحتاجه للاغتراب إلا يكون جاي سياحه, مشيت عليو ولقيتو زولي زاااتو ومعاهو شله, يازول الجابك هنا شنو؟؟ قال لي والله جينا مع (اخوانا) ديل وعندنا دورة تدريبية و… الخلاصة القصة مشابهه لقصة اخوانا التلاته المزكورين اعلاه ولك الله ياوطن

  11. وقذف ذا النون فى البحر وبقيت الحشرات والهوام والدواب وما يضر الناس ,,,
    قُذف غير مأسوف عليه ,,
    6 / ابريل

    1. ما قلت الا الحق يا شمباتي احني قامتي لذا النون وتعظيم سلام ليه والله واحد من الغبش بوريهم في عوجة الرقبة بتاعتهم

  12. ذو النون دا يا بروف بس يحتسبها لله! لو حاول يعمل ايييي شي ما حي قدر ،العمل عمل ربّنا و غير ما حي بدا ليهو واوات جديده ما خيسوّي شي.
    و إلى السمار، الموجوعين منكم و الموجوعات، عاااادي بالزبادي،زي دا بالكوم و الردوم بس حاولوا اسمعوا و استمتعوا بحياتكم الرخيصة -قصدي الغالية – كلما سمعتوا قصة جديدا! بس خلاص

    1. صحيح يا نانا او نونا او النان نون ايه كلامك بس ذا النون بي عمليتو الصغيرة دي كشف كل الزيف والمرض والسرطان والوسخ وال وال وال لان قضيتو سمع بها القاصي والداني يعني بشه سمع بيها لي هسع وما عمل حاجة ولم يسوى لها الطريق وعثرة البغلة وموش بغلة واحدة بغال كثيرة يعني بس لو قلنا قصة ذا النون زايد قصة هيثرو تخلى اي انسان يملك ذرة من الانسانية يعيد حسابات هي لله هي لله يا نظفها عديل يا اصبح عنده ضمير واستقال وانزوا في اي غار يتعبد عسى الله يغفر له

  13. نفشت فيه غنم القوم – القوم الغنم – لكن حتى الغنماية بتحلب اللبن ولبنها كلو فوائد وخالى من الكليسترول البرفع الضغط – وديل بحلبوك وارفعو ضغطك واطلعو زيتك من جوة.
    الله في
    الله غالب

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: