يكون من شنووو؟

المواطن السوداني أو الفرد السوداني زول نضيف جداً .. نمرة واحد على المستوي العالمي .. مافيش حد في العالم قاعد يستحمي مرتين في اليوم ومرات كمان تلاته مرات .. وكمان بالليفه

والصابون .. ومافيش حد في العالم حريص إنو يتسوك وينضف أسنانو كل صباح ومرات بالليل ذي السوداني .. خليك من الملابس الخارجية الهدوم أو الملابس الداخليه أتحدي أي شعب في العالم يكون بيغيرا كل يوم ده لو ما كان مرتين في اليوم .. خليكم من ده .. معظم السودانيين بتلاقي إنو الواحد لو ضفورو طلعت مليمتر ما يتحملا وتلاقيهو طوااالي جاب الضفارة أو القصافه وواساهم .. معظم الأسر السودانية تحرص على النضافه الذاتيه والشئ الغريب أن هذه المسألة ليست مقصورة على فئه معينه .. كل السودانيين كده .. المرا .. الراجل .. الشاب الشابه .. المتعلم والجاهل .. الوزير والخفير .. الموظف والعتالي .. كل السودانيين بمختلف مستوياتهم التعليميه والمادية والعمرية والمهنية بيشتركو في إنو ناس نضيفين وبيحرصو على المسأله دي وهم رقم واحد في العالم من حيث النضافه الشخصية .. لكن .. وللأسف الشديد والشديد جداً نحنا طيش العالم في مسأله النضافه العامة .. ودي ما عايزه ليها أي أدله أو براهين .. ناخد أمثله ..
– الزول ينضف البيت .. (ما هو زول نضيف وعايز البيت يكون نضيف) .. ويقوم يكشح الوسخ في الشارع (ما الشارع ده حق الناس كووولهم وما حقو براهو)
– ماشه قدامك عربية ممكن تكون (برادو) تمنها مليار جنيه إلا شويه .. تلاقي القزاز إتفتح وشووو قزازة مويه أو عصير أو حتى منديل ورق جاك طاير !! ودي طبعن بتوريك إنو مافيش علاقه بين (السلوك والقروش) .
– وإنت طالع السلم بتاع أي مستشفي أو مؤسسه عامه .. عاين للحيطه ح تلاقيها كووولها مليانه تمباك وشنو ما عارف وشكلها يطمم البطن !
– عاين لأي شارع .. ح تلاقي الأوساخ مشتته فيهو .. يستوي في الكلام ده الشوارع الكبيرة .. شارع الستين .. عبيد ختم .. أو الأربعين أو المورده .. أو شارع الإنقاذ أو شارع المعونه .. دي الشوارع الكبيره أما الشوارع الصغيره فحدث ولا حرج … والأزقه والشوارع الفي الأحياء خليها سااااكت
– أمسك الأسواق .. دي كمان كوم براهو .. ما تقدر تمشي .. شئ كراتين وشئ بواقي أكل وشئ أكياس نايلون وشئ مش عارف شنو؟ والعجب كان جات مطره .. مطرة وااااحده .. كفيله بتنشيط التفاعلات الكيميائية بين كل المخلفات دي وتقوم تطلع ليك كميه من الغازات العجيبه .. وكميه من الحشرات الغريبه في تشكيلات مختلفه شئ طائره وشئ زاحفه وشئ ما عارف شنو؟ ده غير الحشرات معروفه الهويه ذي الضبان والباعوض والصراصير …
– أمشي أدخل أي دورة مياه في معظم المؤسسات والشركات والبنوك ح تلاقي إنو مستوى النضافه فيها تعبان .. وح تلاقي الزول القبلك ما شدا السايفون … يشدو ليه؟ ما هو إنتهي وخلاس !!
– أدخل ليك أي مطعم أو كافتيريا خاصة لو كانت في حته شعبية .. ح تلاقي الضبان حايم .. والكراسي وسخانه والطرابيز ملسلسه والعجب المطبخ جوه محل بيعملو الأكل .. تلاقي الواطه سخنه والعامل البعمل في الأكل العرق نازل منو وبينقط في الحله .. ولابس ليهو قميص أو مريله من الصعب جدا تصدق إنها كانت في يوم من الأيام لونا أبيض .. ده غير إنو بيشتغل بي أيدينو العاريات تمامن .. يحش في البصل .. يقطع في اللحم .. ويخت ليهو سفه .. ويرجع تاني يواصل .. بعد ما يقش أيدو في المريله أم من غير ملامح !!
– أمشي ليك لأي مستشفى حكومي وكمان بعض المستشفيات الخاصة .. عاين للجير بتاع الغرف أو الهولات أو السلالم .. جير شنو؟ ديل إتغطوا بطبقات تانيه ما ليها أي علاقه بالجير والبوهية .. عاين لي كيس المرتبه الراقد عليهو المريض أو كيس المخده .. ح تلاقي عليهم لوحات سرياليه فان جوخ ما يرسما .. وح تلاقي الإستاند البيعلقو فيهو الدرب من كترت هبش الأيدين وعدم النضافه الدوريه ح تلاقيهو ملسلس لسلسة السنين وهو براهو ممكن يجيب للزول مليون مرض !
– طيب نشوف حاجه تانية عجيبه جداً .. لاحظ لأي شارع أو زقاق في أي حي من أحياء العاصمة الشعبية والراقيه . لازم تلاقي ليك يا لوري تراب يا كوم أنقاض.. يا كوم أي حاجه يعني الشارع لازم تكون فيهو حاجه .. لا يخلو أي شارع أو زقاق في كل أحياء العاصمة من (كوم حاجه) .. تراب ، طوب، أنقاض، أوساخ أو أي حاجه.
ليه يا جماعة الخير نحنا على المستوي الشخصي ناس نهتم بالنظافه وعلى المستوي العام (ما كده) ولا نعطي هذه المسألة أي إهتمام .. ده يكون من شنو؟؟؟
كسرة :
بس نعرف للتسميات وإنشاء الكيانات .. قال أيه هيئة تطوير السلوك الحضري .. سلوك مين وحضارة أيه كدي أمشوا السوق المركزي !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

26 تعليق

  1. برنجية – و بتخميستها كمان للحبان ،،،،

    1. تسلم لاشتراكيتك يا خ انا اخر نفس ههههه

    2. جيب نفس يا فردة
      أححححححح مبروكة عليك وتتهنى بيها يارب

    1. مبروك البرنجية المشتركة يا طارق
      وقول للبعزم هناك بدون يشاورك جنوبي جا بارك ومشي ..

      1. جنوبي حبيبنا مالك قاعد تفلق فينا والبرنجيه مخمسينها مع الحبيب ود بوتين ،تحياتي للجميع ولاخونا المحترم نانو ،يا اخوي نانو حاولت الاتصال بك من السودان ولكني لم أحظ بالتحدث اليك وحاولت اكثر من مره وكانت المحاولات ممتعه بالاستماع لنغمه موبايلك وذاك الصوت العذب للمنشد الصداح

  2. بعااتي و ما فاضي | رد

    صايونة لوكس

    1. ومعجون سيجنال تو وسجائر بينسون

  3. الوسخ ما حلو خاصة مع الكتمت كتمت كتمت كتمت

  4. والله يا بروف – لو ما كل فجل – موضوعاتك بتلمس الحم الحي ومن الأجدر الأخذ بها ، لذا السؤال اللي بيطرح نفسه : هل في إمكانية إنه هذه المواضيع تصل بأي صورة لما يُسمى بالمسئولين؟ ثانياً هل إذا وصلت لهم يأخذ هؤلاء المسئولين بالنظر – بعين التقي المسئول – لهذه المواضيع ويسعوا فيها؟
    اللهم أرحمنا

  5. تصويب :
    اللحم الحي (بدون لام ربما تضامناً مع غلاء اللحوم)

  6. صدقت يا بروف في حكاية النظافة الشخصية دي عند السودانيين، وحصلت معاي قصة عجيبة كانت سبب في إسلام فلبيني يعمل معنا !! فقد كان يشتغل في البيوت بعد إنتهاء ساعات عمله اليومية، وكان معنا في السكن مجموعة كبيرة من الخواجات بينما نحن (3) أسر سودانية فقط ..
    كان هذا العامل يغسل ويكوي ثياب الأسر بالدستة فسألني يوماً سؤالاً عجيباً قال لي ” لماذا ملابس الرجال السودانيين (الداخلية) نظيفة بينما ملابس الخواجات قذرة ومقززة” ؟ فقلت له لأننا مسلمون والدين الإسلامي هو دين النظافة وهي جزء من الإيمان .. وكانت تلك هي الشرارة التي أوقدت حب الإسلام في قلبه حتى أسلم وسميناه إسماعيل بعد أن كان أسمه إزاميليو الحمد لله على نعمة الإسلام..

    1. هنيئاً لك يا صاحبي ,, وامانة عليك بعدين تفقدني وتسأل عني يمكن ربنا يقول ليك امش شوفو كان هناك جيبو ,,

      1. الحبيب نانو…جزيت خيرا يا طيب ..
        جنوبى..انت محل ما بجيبوك منو عاااارفو ! بلاش تسلبط وتلبد !!

  7. الموضوع ده زي قصيدة العرب زمان بدأ بالشكر والتفاخر وانتهى بالذم والهجاء

    1. ههههههههههههههههههه,,
      ملاحظة حلوة

  8. تاملوا قوله تعالي (…….فبئر معطلة وقصر مشيد ) هذه من نذر نهاية الحضارات.

  9. سلام سمار
    يا ود الحكووومة، في دي بقي الحكومة مالهاش دخل، هي وسخانة من الداخل و الخارج اي نعم ، لكن السلوك العام دا مسئولية كل زول منفردا مسئولية شخصية، يعني معلّقة في رقبتو،و للأسف الناس بتتربّي عليها. يعني اهلك بربّوك انك لازم تستحمّى كل يوم ، لكن عاادي يقولوا ليك ارمي المنديل دا بالشبّاك!! دي مسئولية الناس ، الحكومة ما ممكن تعمل شي فيها. و الله انا شخصيا و أسرتي بعد نرجع من الإجازة نقعد مده شايلين البواقي و المناديل وفي أيدينا في العربية ، ما عارفين تؤديها وين وفي نفس ألوتك خجلانين نرميهم بي شباك العربية ، لما بقينا نخت كيس فاضي في العربية للنفايات لانه بناتي ذااتم يرفضوا يرموا حاجة بالرغم من صغر سنهم و دا دليل على كلامي ، هم اشفوا دا برا و اتعودوا على سلوك معين، أصلا انا ما كان ممكن أشجعهم على غير كدا برا( مجبر أخاكم لا بطل) و إلا حادفع غرامة و يمكن دي واحدة من الوسائل اللي ممكن تسبقا الحكومة ( الشريفة الموثوق بها) حتى تنشر ثقافة زي دي!! لأنو حكومتنا دي تعرييييفة ما حنديها( سامعين يا ناس المحلية؟ عشان بكرة ما تنطوا لينا تقولوا رسوم سلوك حضاري!!! )عارفاكم انا!

    1. طالما نحنا نضاف جوه بيوتنا يبقي بره العيب من الحكومة ! هل عمرك شفتي ليكي برميل قمامة في راس شارع عشان الناس ترمي القمامة فيهو ؟ بيتونا مسئوليتنا لكن الشارع مسئولية الحكومة وفي كل الدول عربات البلدية بتجي صلاة الصبح تنضف الشوارع وتاني تجي نص اليوم , في السودان الحكومة بتجي نص الشهر وتاني تجي اخر الشهر شان تشيل قروش النضافه !
      يا نونا انا والله حضرت شوارع السوق العربي البلدية بتغسلا بالموية الصباااااااااح !! والسوق الافرنجي اقسم بالله لما اكون ما لابس كويس بخجل امشي فيهو !!
      الشارع لما يكون نضيف بيجبر أي انسان يحترم نضافة الشارع لكن لما القي شارع فيهو كوم من الوسخ بشوف منديل الورق او القارورة الصغيرة دي نقطة في بحر الوسخ الموجود شان كده برميها بدون تردد لأنو رميت او ما رميت كده كده وسخان ,,

      1. كويس إنو البروف فتح موضوع زي دا للنقاش
        يا جنوبي الحكومة دي ما برضو أفراد من الشعب ، اتربوا نفس الرباية ( الا الحكومة دي ، رباية التابا) ، القصد إنو هم عارفين أولويات الشعب و المواطنين شنو! يعني حي غشّ الناس بي برميل وسخ و لا طماطماية؟ انا اجزم إنو الناس حتقول اكّلونا اول!! دا ما دفاع عن الحكومة لكن كوننا نائمين عليهم ما المفروض يخلينا نعمى عن الحقيقة!!
        اما الحقبة الزمنية ديييك يا جنوبي ( ايييك كان كدا انت مومياء عديل كدا) بالسلوك العام حينها لو راجع تو حتلقاهو سلوك راقي و الناس كانت حينها قمة في التحضّر ، انا بعرف ناس من الزمن الجميل داك الي الان متمسكين بي شاي الساعة ٥ و يلاقوك في البيت بالفُل سوت!!! ديل ناس زمن غسيل شارع الإفرنجي و العربي!!!
        الشاهد إنو الحكومات ما بتربّي فيك سلوك متحض ّر ، دورها انها تحاول تنشرو بعدين دورا رقابي للمحافظة عليه!! و لّا شنو؟ حقو نبدأ بي نفسنا، ( المعاي يرفع ايدو و المع جنوبي يصفّق) ههههه

      2. اها يا نونا ورينا , بعد ننضف جوه البيت نودي الوسخ وين ؟
        نخلي راااقد جوه البيت ؟ وتعالي كمان قولي لينا كل واحد يعمل مكان لفرز الوسخ واعادة تصنيعه وحرقه منزلياً !!
        هسي فيييييييييي ذمتك دي عاميل ناس الحكومة دي عمايل ناس اتربوا نفس رباية الشعب ؟ سمح الشعب متمحّن في شنو !

    2. أهما حاجه الغرامه بي اورنيك ١٥ ولا بدون ؟؟؟؟
      ؛-)
      الموضوع دا ذكرني بي قصه حصلت معاي انا قبل ٣٠ سنه
      رجعنا في الإجازة الى السودان الحبيب و نحن من صغار متعودين انو يكون في سله زباله ولو صغير في الغرفة
      فا كنا في زياره لي بيت عمي في الكلاكله ف بعد تقديم الحلاوة و واجب الضيافة عندي أختي بتسال ( عمو وين الزباله عندكم ؟؟؟ عشان عايزه ارمي ورقه الحلاوة فضحك بشده و ردا عليها ارمي في اي حته السودان دا كلوا زباله )
      فا الثقافه دي للأسف ما من الليله ولا امبارح ما عندنا

      1. اها شوف جنس دا؟ يعني الشفاعة كان جواها بذرة لكن للأسف ما لقت السقاية!! اها بعد دا ترمي في اي مكان!!
        بعدين يا جنوبي شكواك من عربة النفايات أيها شكوى كل السودانيين ، و دا الكلام البقول فيهو البروف ذاااتو، ننضف بيوتنا وأريتا بطن أمي بطرانة! بس كل واحد همو بيتو و قدام بيتو!!؟ الحكاية ما نفايات بس، والله شوف عين ما جابوهو لي، واحد من ارقى احياء العاصمة الحكومة رصفت الشوارع ببلكات جميلة وملونة ، ما تمت كأم يوم واحد من سكان الشارع عندو مناسبة قام دق دق دق دق دقّ صيوان. في نص الشارع و قلع البلوكات و لا عليه و بعد المناسبة ساب الشارع محفّر يحمد الله و لا حاول يرجع شي مكانو!! اها زي دا الحكومة سوت لي شنو؟ بعدين حي راااقي يعني دا سلوك عاما و ما مرتبط بفئة معينة!! الواحد تلقي شايل كيس موز يأكل موزاية و ما عاوز يترسخ يرمي القشرة في الشارع!!! طيب ليه؟ ما تختو جوة الكيس لمن تصل البيت!! لا طبعا ما حيوسخ البيت لكن الشارع مال و مالو؟ ولا ناس المتباكي- أعزكم الله- ديل كوم تاني يسفوا و بالشباك فيراس أتخم تخين!!! دا كلام ياخوانا؟؟ حق ونراجع نفسنا و كل زول لو حاسب على سلوكه و عمل حساب الآخرين حكومة زانا مآب نحتاج ليها و،بل حنغصبا تساعدنا في الموضوع دا، لكن بالأنا شايفاه دا،اي جهد رسمي يبقى حفر في الموية، نبدأ ب نفسنا اول!

  10. شكراً يا بتي نونا ويا أخونا جنوبي وكل الأخوة السمار على الطرح الجميل الهادف بخصوص النظافة، وشكراً لكل الحبايب السألوا عني في غيابي، وعلى رأسهم أخوي د. طارق ود العبيد وأقول ليه معليش سامحني والله ما شفت إتصالك ولا عرفت إنو دا أنت وإلا كان رجعت ليك لأنو رقمك بالسودان ما عندي !! بالإضافة إلي أنو رجعت من الأجازة لقيت كل الشغل (مردووووم) قاااعد مستنيني كالعادة !! لكن المرة دي خلااااص أعلنتها بالفم الملياااان لي ناس الشغل قلت ليهم أنا تاني ما قاعد دااير أرجع بلدي أستقر هناك ، وتعال شوف يا تحانيس وإغراءات (لكن خلااااس تب ما قاعد تاني) رغماً عن كل الأحوال المتردية في بلدنا وآخرها إنعدام الأمن وإنحدار الأخلاقيات، ومن يومين كتبت في القمردينة عن البتين الختفوهم عشان (ينزعوا أعضائهم) والخبر تم تداوله في مواقع التواصل الإجتماعي، وهم من أسرة عريقة بأمدرمان أعرفها شخصياً لكن الموضوع ما مشى (في إنتظار الموافقه) لأنو فيه الرابط اللي جاب الخبر مع صور البنات !!! شفتوا لي وين وصلنا !! الله يجازي اللي كان السبب حسبي الله عليهم .. سلاااااام …

    1. الليله هم بيحنسوك عشان تقعد وبكره انت حتحنسهم عشان ترجع !!
      اووووعك ترجع والتافهين ديل قاعدين هناك , والله نحنا المساخيط ديل غلبتنا القعده معاهم , وانت الزيك ده ما صِدِيق يمين ما تاخد معاهم قلية ..
      الزبير بشير طه لليلة اسرته ساكنة في بيت مدير جامعة الخرطوم وهو والي الجزيرة وليهو اكتر من 14 سنة من خلي جامعة الخرطوم ! اها أمش ياها دي الخدمة المدنية وقوانينا , واللي كان السبب راجيييييييك ويمطق ,,

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: