لمــاذا؟

• لماذا لا تمثل عضوية جميع الأحزاب أكثر من 1% من مجموع الشعب السوداني؟
• لماذا لم تساهم الزكاة في السودان في تقليل حدة الفقر؟
• لماذا يركب المسؤولون العربات الفارهة بينما لا يوجد (شاش) بالمستشفيات؟

• لماذا يدفع المواطن رسوماً لإقامة حفل بينما الشرطة لا تحرس الحفل؟
• لماذا لا تعانى (بنات) المسؤولين من (العنوسه)؟
• لماذا لا يرتفع المعاش الشهري مع إرتفاع الأسعار؟
• لماذا يلزم الزائر لمعاودة مريض بدفع رسوم والرسول (ص) يحثنا على زيارة المرضى حتى وإن كنا فقراء ونحن فى دولة الشريعة؟
• لماذا لم يقدم مسؤولاً واحدا للمحاكمة بتهمة الفساد مع إنو الفساد على قفا من يشيل؟
• لماذا تهتم شرطة المرور بتنظيم الكشات المرورية ولا تهتم بتنظيم الدورات التوعوية ؟
• لماذا يتم إنشاء مفوضيات ونيابات وشنو ما عارف للفساد طالما إنو مافيش فساد كما يقولون؟
• لماذا يتوقف السير لمرور عربات الدستوريين ؟ (خلاس الدقيقة بتفرق يعني)؟
• لماذا يصر (أبوهاشم) أن يتحدث بأسمنا وهو لا يتواجد معنا إلا يومين في السنة ؟
• لماذا لا يخجل المسؤول على (دمو) وقد دخل الوزاروة مستأجراً وخرج منها بأربعه عمارات وأربعة (نسوان)؟
• لماذا يسمح للصحف والقنوات الفضائية بالإعلان عن (الدجالين) وأرقام هواتفهم ؟؟ هنالك من يعلن بأن لديه دواء للصلع يعمل على نمو الشعر في عشرين دقيقه !!
• لماذا يمتلئ السوق بالمنتجات غير المطابقة للمواصفات والمقاييس بينما لدينا هيئة مقاييس وشرطة جمارك ومكافحة تهريب
• لماذا الإصرار على صرف المليارات على كرة القدم لدينا مع إنو (فاشلين فيها)؟
• لماذا تتم التسويات في قضايا الفساد المالي ؟ ما يعني أسرق ولو قبضوك ترجع الفلوس
• لماذا لا توجد لدينا حديقة حيوان بينما توجد في كافة الدول في العالم؟
• لماذا يتم تغيير السلم التعليمي من فترة لأخري (بجربوا في أولادنا يعني؟)
• لماذا لا توجد لدينا اسعافات مجهزة – دي حاجه تاني غير اسعاف؟
• لماذا يصر بعض المغنواتية أن يعذبونا كل هذا العذاب؟
• لماذا يصر زعماء الأحزاب على مسألة التبادل السلمي للسلطه وهم قاعدين في كراسهم بالسنين ؟
• لماذا تغض الدولة طرفها عن التجنيب مع إنو (سرقه وااااضحة)؟
• لماذا لا يتم إزالة التظليل من عربات المسؤولين؟ القانون ما بمشي عليهم؟
• لماذا يتبع معهد النور للمكفوفين لوزارة التربية والتعليم ولا يتبع لوزارة الرعاية الإجتماعية (مش سؤال)؟
• لماذا يتباهى المسؤولين بتملكهم لشركات ومؤسسات مع إن (الإسلام) ينهى عن ذلك (إسلامنا طبعن)
• ماذا لا يتم عمل سلم تعليمى (12- صفر) ونرتاح من مسألة (6-3-3) و (8-3) والتخبط ده
• لماذا قامت الدولة بزيادة أعداد الجامعات بينما لا توفر للخريجين فرص عمل؟
• لماذا لا توجد للروساء والوزراء سن تقاعد؟
• لماذا يقوم المسؤول بترحيل العاملين بمكتبه إينما ذهب؟ (فاهمنو وفاهمم مثلاً)؟
• لماذا يطلب من المرأة أن ترتدى زياً محتشماً ولا يطلب من الرجل ذلك (والله في رجال بيلبسو جنس لبس) !
• لاماذا يتساءل المسؤولون عن تزائد أعداد اللقطاء (يعني هم ما عارفين إنو عرس مافي؟)
• لماذا رسوم إستخراج الأوراق الثبوتيه باهظة (المواد غاليه مثلا)؟
• لماذا يتجه جميع أثرياء (الغفلة) للفن والرياضة والشعر والأضواء (وكمان جابت ليها حركات)؟

كسرة :
لماذا لا يتفاعل المسؤولون مع كسراتنا التحت دي يعني؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

Advertisements

30 تعليق

    1. ختييير يا ود بوتين مبروكة

      1. مش كدة بالله ؟ شفتا الترجمة الحرفية دى ختيرة كيف !!!
        دى يا سيدى لانو لو قعدت لحدى ما أغير لغة الكيبورد،، البرنجية بتكون اتجازفت !!

    2. حيرتونا اتربصنا ما نفع الله؟؟؟

  1. الليلة ود بوتين قلعلا منك قلع يا أخوي ود العبيد !! تحياتي للجميع ولنا عودة بأذن الله .. سلااااام ..

  2. ولاى إنتو ما عارفين الختير منو ،،،،،، الختير جبرا البقا يكتب يوماتى .
    غايتو البروف كان ادانا الوصفه البتخلى الزول لسه ممكن يقدر يفكر فى دولة أمازونيا بكون ما قصر تب

    1. ارصد الشارع وانت تنزف كتابه

  3. لماذا لاتوجد مويه مقطره لتذويب الهيدروكورتيزون في مستشفي النو بامدرمان ووجود ذاك العدد الكبير جداً من الطبيبات وليه يعني الغزاره في الإنتاج والسوء في التوزيع ده،اتصلت في إجازتي بالسودان بمدير عام مستشفيات الخرطوم وقد وعدني بعمل كشه وحتي الان ما عارف هل الكشه حصلت ولا أخد بعقلي ،مويه حقن يا ناس ما موجوده وكنت اريد بان أنقذ حياه إنسان في تمام الساعه الواحده صباحا واهو في النهايه المدير الطبي شاكرا اداني امبوله واحده وقال ما عندو تاني والإمدادات الطبيه من زمن ما ادتهم،اليوم التاني ذهبت للصيدليات ووجدت الامبوله بي ألف جنيه واشتريت كميه ووزعتها اصلو جاتني عقده امبولات ودي مشكله فعلا فيا زميلي مدير عام مستشفيات ولايه الخرطوم حل لينا الحقن وحل لينا موضوع مويه الحقن دي وخاصه هي مهمه للادويه المنقذه للحياه،كلمه منقذه ينقذ إنقاذا برضو بتعقدني فهي مجرد مسميات

    1. آآآآآآآآآآآآآآآآلعبيد كان جات موية الحنفية الناس روت ساكت يكون خير وبركه ههه انا في حوادث بحري شفت درب وقافي رايك ايه يا دكتور

  4. لماذا يحكمنا هؤلاء ؟؟؟؟؟؟؟

    1. اوجه سؤال يا المندهش لانها كاتمه وما فيش زول امه محدساهو هع

  5. يا بروف سؤالك لماذا يطلب من المرأة أن ترتدى زياً محتشماً ولا يطلب من الرجل ذلك ؟؟ (والله في رجال بيلبسو جنس لبس) !

    وعلى ذكر الملابس أحكي لكم تجربة مرت بي شخصياً :
    ذهبت مع إبنتي لجامعة السودان لتسجيلها قبول خاص (بالدولار وكده) لأنو شهادتها من خارج السودان !! دا ما موضوعنا البهمني هو اللبس فقد كانت بنتي لابسه بلوزة طوييييلة لحدي نص الساق مع (بنطلون) طويل وعريض فضفاض ساتر يلامس الأرض زي اللبس الباكستاني مع طرحة كبيرة يعني ما يظهر منها غير الوجه والكفين كما أمر الرسول صلى اللعه عليه وسلم ، لكن الحارس رفض برأس أبوه ما يدخلنا ليه قال (البنطلون ممنوع) !! في حين إنو دخل بنات لابسات أسكيرت ضيييق يصف ويشف البدن ويظهر كل شيئ حتى الملابس الداخلية، مع بلوزة شفافة ومحزقة تبين ما تحتها بلا إستثناء !! وكمان دخل أولاد لابسين بناطلين على الموضة الأسمها (طيحني أو بابا سامحني) !! ما تقدر تفرز الولد من البت من طريقة تسريحة الشعر واللبس الفاضح الغير محتشم !!
    بالله عليكم هو ده كلام ؟ قال بلد الشريعة والنهج الحضاري قال !!

  6. اجابة السؤال (٥)
    لأنها يتزوجن اولاد المسئولين، زيتم في بيتم والقرش في البرش. ودي بقت ظاااهرة الواحدة يا كافي البلا ما بتتقابل يتزوجا ود فلان لأنها بت فلان و لو ما كان ابوها مسئول في الزمن الغبر دا كان حسي المستشفيات اتملت بي أمراض حامد

  7. ابو هاشم مالو سالك عينك في الفيل تطعن في الظل

    1. هو لو كان بسأل البروف كان قال؟

  8. امرئ لله حقاً حاول تجاوب
    ١احصاء سنة كم دي يا بروف؟
    ٢-لأنها بتتصرف على العاملين عليها
    ٣-ما مشوا يجيبوها!
    ٤- الرسوم( لعدم الحراسة)
    ٥- انظر أعلاه
    ٦-والله المعاش الشهري لو بارا الأسعار دي حيفتر
    ٧- الرسوم للباب ما للزيارة ( أبقوا فرقوا ياخوانا!)
    ٨- كلو من ( قفا مين يشيل ) دا
    ٩- دي لي قدام ( بعد رسوم الكشات تنتهي)
    ١٠- ما في شرطة مرور بدون مرور ( اشمعنى يعني؟)
    ١١- فرقت معانا احنا يعني ؟ ترانا واقفين لينا كأم و عشرين سنة كدا
    ١٢- الكحة و لا صمة الخشم ، مع أنى ما سمعتوا بتكلم ( نفسي اسمع صوتو)
    ١٣- ما تحسدوا، هي لله
    ١٤- ما احنا في دولة الدجالين ذااااتا
    ١٥- الصف طويييل يا بروف
    ١٦- والله دي محيراتي انا ذاتي من زمان
    ١٧- ما بسألك يا بروف يعني عاوز يتحاكموا عديل كدا؟
    ١٨- ما عندنا الحيوانات بره الأقفاص
    ١٩- آيْ نعم
    ٢٠- هي وينا المستشفيات أليسعفو ليها!
    ٢١- المؤمن مصاب
    ٢٢- أهو
    ٢٣- ما في خيارات؟
    ٢٤- آيْ نعم
    ٢٥- ليهم الله!
    ٢٦- ما في خيارات؟
    أحسن نسأل كابتن قاقرين عن أحسن خطة
    ٢٨- دا سؤال، الجامعات الخاصة نصها حقتم ، تتوظف ولا تتفلق ما بخصهم
    ٣٠- الكراسي فيها غراء
    ٣١- ما قاعدين زي عدمتم ، حسي لو رحلت ما بتشيل عفشك معاك ( العفش داخل البص على مسئولية صاحبه)
    ٣٢-هو في موضوع في البلد دي غير المرأه و لبسها؟
    ٣٣- والله يا بروف يطرشنيرزووول اتساءل ماف
    ٣٤- اشمعنى دي؟
    ٣٥- يعني يقعدوا زينا سبع صنائع و البخت ضائع؟

  9. اما سؤال الكسرة فاختياري مع كوووول الأسئلة الفوق دي، وانا ما شايلاه، اخير احاول اجاوب الكام وتلاتين سؤال ديل ولا السؤال دا، لأنو حيرنا ولو كان بتجارب كان الفوق دا كلو إتجاوب

  10. جبت من الآخر يا استاذ جبرة، ولو تحققت النقاط المذكورة لما احتاج ساستنا الجلوس حول دائرة اتساعها اكبر من افق فهمهم للسودان وشعبه الذي يشكو بإختصار من الساسة وليس لهم.

  11. طيب يا ناس ما دام ده كله حاصل يبقى انا صاح كتمت كتمت كتمت كتمت

    1. يا الغلبان ما كتمتنا معاك وجننتنا بي كتمتك دي!! وما تقول الأيام دي حايم بي عندنا فيروس الكورونا الخطير البسبب الكتمة الصحي صحي يعني تنكتم خااالص ويودوك أحمد شرفي خروج نهائي عدييل من غير عودة .. أبعد كتماتك مننا الله يكفينا شر الكتمة !!!!

      1. صديقي نحنا هنا في (من ليبيا يأتي الجديد) هههههه كان الله في العون يعني بالنسبة لي كاتمة جوه وبره هههههه

    1. يا الغلبان اخوي معليش ولايهمك وتهون إنشاء الله وعندي زميل ليبي وكلمني كتير عن الزوميطا وافتكر نوع من الأكلات ولكنها مقويه ومغذيه وافتكر أحسن تكتر منها

      1. اخي العبيد كما يقولون من يهن هان الهوان عليه ما لجرح بميت ايلام مر الحال هو الذي جعل العبد لله يذهب الى ليبيا غير مختار وانما محتار رجعت نهائيا من الامارات وكان لدي شركة نظافة (بالنسبة للشركات التي بالسودان نمبر ون كما يقول جنوبي) ما الذي حدث ههههه في ظرف سنة ونص عدمت التكتح لانوووووووووووو (زي واوات الكسرات) ما بتقدر تشتغل معاهم لانهم شغالين بالجرادل ساكت وما دايرين زول يشتغل معاهم حتى لو كان عطاؤك اقل وبقية الاعمال بالبلد حدث ولا حرج فأخرجني الزمن مرة ثانية الى الغربة وللاسف الى ليبيا اما عن الزميطه يا خوي فهي مجرد (دقيق ساااااااااااااااكت محمص في زيت وخاتين ليهو سكر) وربك يستر وبرضه يا العبيد يا خوي كتمت كتمت كتمت

    2. والله ذكرتني أيام رجعنا السودان أوائل التسعينات أيام كانو الناس ديل جدااد و فالقين الناس بالأحلام و الأماني …. سنه كانت زي عام الرمادة و دقينا الميس .. كل ما اتذكر الغصه تحرقني … الله يديهم العافية الوالد و الوالدة جاهدوا جهاد عشاننا و صبروا صبر أيوب … و بعد كم وعشرين سنة رجعت البلاد للمربع الأول …. الله يصبرنا عشان اولادنا

  12. تحياتي لك يا استاذ اكانك تتكلم عن العالم عربي كله ليس سودان فقط لاسف اجابه المندهش خير جواب لماذا يحكمنا هؤلاء????????

  13. لماذا ………………. رغم انها كاتمة

    1. بالله يا خوي الغلبان دقيق سااكت كده وليه يعني بقت زوميطه يا زول أحسن ليك تتخارج كان الدقيق بقي زوميطه وفي السودان الجوع بقي هوت دوق وغايتو النتوثب سااكت

      1. الوثبة بتبقى هجرة غير شرعية في قارب بلاستيك طوله 12 متر ومفيش لا قبطان ولا كابتن ولا شي محرك صغير وقارب بلاستيك واحد المهاجرين يجند نفسه بحار حتى الشاطي الثاني شفت كيف وبوصلة صينية رخيصة من ابو بلاش ديك والناس ماشيه شمال شفت ودونا بالتفكير لحد وين (ربك يستر وما افكر فيها)

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: