وكمان سكران؟

العبدلله يمكنه أن يجزم بأن جميع سيارات المسؤولين الفارهة (من برادو وإنتا طالع) جميعها مظللة تظليلاً يشبه إلى حد بعيد (سواد الليل) بحيث لا يمكن لأي كائن من كان أن يستطيع رؤية ما (من) بداخلها على الرغم من أن السلطات تمنع تظليل العربات بل وتقوم بنزعه على قارعه الطريق .

لن يكابر احد من قادة شرطة المرور أن مسالة التظليل هذه تطال فقط المواطنين الغبش وأن هذا القانون لا يسري على المسؤولين وأبناء المسؤولين ، قبل حوالى الشهر كنت بالمركز الطبي الحديث الذي يقع في بداية شارع أفريقيا (المطار) وعندما تأخر الطبيب أصابني شئ من الملل فخرجت إلى الشارع (أشم هواء) .. كان هنالك ثلاثة من أفراد شرطه المرور بالزي الرسمي يقفون على حافة (الظلط) أمام بوابة المستشفي حيث كنت أقف ، مرت أمامنا عربة فاخرة (زرقاء اللون) مظللة بالكامل ، أشار أحد رجال المرور الثلاثة لسائقها بالوقوف وبالفعل توقفت على بعد أمتار منا ، خرج من العربه شاب في العشرينات من العمر يرتدي بنطال من الجينز و(تي شيرت) ، صافح الشاب رجل المرور وسرعان ما إندمجا في (ونسه) ، كان العبدلله يظن بأن (التوقيف) من أجل (القزاز المظلل) فإتضح بأن التوقيف كان من أجل التحية والسلام .
إتفت العبدلله لرجلي المرور الذين كانا لا يزالان يقفان بالقرب منه وخاطبهم قائلاً :
– أنا مفتكر زولكم ده وقف العربية عشان مظلله زعاوز يعمل ليهو مخالفة
– العربية دي معروفع لينا بتاعت مسؤول وده ولدو
– وعشان عربية مسؤول ما بتسألوهو؟
– نعمل شنو المسؤولين ديل كمان في زول بيتكلم معاهم؟
– يعني هسه إنتو القوانين دي ما بتطبقوها على الجميع؟
– والله يا أستاذ إنتا براك شايف؟

في تبريرهم لإزالة تظليل عربات المواطنين يقول المسؤولون بأن التظليل يمكن أن ترتكب بواسطته جرائم نكراء أقلها الافعال الفاضحة والخادشة للحياء (ده لو ما إرتكاب الفاحشة نفسها) !!
طيب وعربات المسؤولين ؟ مع إنو ده سؤال منطقي وموضوعي والجميع مفروض أن يكونو سواسية أمام القانون إلا أن الرد ربما يكون من شاكلة (ياخي المسؤولين ديل كمان بيعملو كده)؟
لذلك نحن نهدي الفقرة التالية لرئاسة شرطة المرور المكلفة بإزالة تظليل عربات المواطنين زغض النظر عن عربات المسؤولين :
يقول الخبر الذي أوردته صحيفة الجريده عدد أمس السبت على لسان الأستاذ كمال رزق إمام وخطيب المسجد الكبير بالخرطوم أنه طالب برفع الحصانه عن وزير ولائي تم ضبطه مخموراً وبصحبته فتاة أجنبية داخل سيارته (المظللة طبعن) وذلك بشارع النيل..
أنتهي الخبر وبهذا سادتي الأفاضل يتضح لنا كيف أن المسؤولين ديل بشر (ذينا وواحد) يمكنهم أن يسيئوا إستخدام التظليل ويرتكبو من خلف سواده المعتم كل أنواع الموبقات والمهلكات .. يعني الواحد في العربيه ممكن تكون ( معاهو بت وكمان سكران) !

هل سترفع عن هذا الوزير الولائي الحصانه ونشاهده في محكمة النظام العام وهو يجلد (حداً) والسوط يهوى على مؤخرته وللا حكاية (الجلد) دي حصرياً على (الغلابه) ناس قريعتي راحت !!

كسرة :
يا سعاده مدير المرور : يا نظلل كوووولنا .. يا (ما) نظلل كووولنا !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

45 تعليق

  1. برنجييييييييييية بنكهة البرادو

    1. مبروكة يا المندهش اخوي ودي عملتها كيف ويعني جازفتها من اخونا فلاديمير والغلبان،انتو أمريكي غاطس وين الايامات دي واوع يكون كتمت معاهو زي اخونا الغلبان

      1. بالبركة يا المندهش – تصدق مع انى شفتها و كنتا ناوى ليها الليلة بس اكل العيش و نداء الواجب لخمونى شويتين كدة ..
        لكن ممكن تخميسة معاك انا و اخوى الغلبان دة عليك الله – اصها كاتمة معاو كتمة شديدة من الزنتان لحدى كاجو كاجى !!!

    2. مبروك يا هناي ..

    3. هههههههههههههههه قدر ما اتربصت فاتتني زي ما يقول ملاعين هنا الله غالب

  2. مع خالص تقديري لما يخطه قلمك المصادم ولكن للأسف لا حياه لمن تنادي

  3. معاو فتاة أجنبية ؟؟؟
    يخسي عليو
    البروف كمان انت ماااا تبالغ ،،،المسئولين و أولادهم وعرباتهم كمان زي الناس العاديين شذاذ الآفاق ؟ !ّ

    1. ما خلاص عمل اربعه عاوزه يعمل شنو تاني (من اين اتى هؤلاء)

  4. نحنا نقوم كوووولنا نبقي مؤتمر وطني ونطلع بطاقات الحزب وكل واحد فينا يبقي مسئول في لجنة وتقوم الحكومة تفتح لينا البارات ويرجعوا لينا سبعة بيوت وملوص وتوتو كورة ويفتحوا لينا ال GMH ونرقص وننبسط ويبقي مافي زول غريب بينا شان يطبقوا فوقوا القانون !
    سكران وكمان معاه بت ؟ البزار لزومو شنو ؟ مزاج واحد يكفي !

    1. ما خفي اعظم يا جنوبي بس دا يكون اتعكلت فيهو زول ساكت

    2. الحساده الكاتلاك شنو ده ما ولد الحكومه ؟؟؟؟؟؟؟؟؟

      1. وتعود سينت جيمس لسابق عهدها

      2. ومعاهو ناس شارع كاترينا والا اجنبيه من وين من الدولة الجديدة هههههه يا مسافر جوبا غايتو جنس غايتو

    3. آآآآآآآآآآآآآآآجنوبي آآآآآآآآآآآآآآخوي تبقى مؤتمر وطني بعد ما صفصفت ؟؟؟؟

  5. طيب لو قالوا لينا : ( يلا ظللوا كلكم ) !!!
    الموريس والهنتر تتساوى مع الليكزس والهمر ؟؟؟؟؟؟؟
    والراكب 11 خ ولابس نظارات شمسية يعتبر مظلل ؟؟؟

    1. والراكب 11 خ ولابس نظارات شمسية يعتبر مظلل ؟؟؟ لو شايل الخضراء يكون ستين مظلل

  6. تااااني يا جنوبي قمت لي هضربتك يا أخي (إذا بليتم فأستتروا) !! وأليكم هذه القصة:
    أتى أسامه بن زيد رضي الله عنهما وهو (الحب بن الحب) كما يسميه رسول الله صلى الله عليه وسلم ليتشفع في المخزومية التي سرقت وهي إمرأة شريفة من قريش بعد أن إختاره القوم لتلك المهمة لعلمهم بمكانته عند رسول الله صلى الله عليه وسلم، فغضب الرسول منه حتى تمعر وجهة وقال في نبرة حادة ( أتشفع في حد من حدود الله يا أسامة) !! ثم قام وخطب الناس قائلاً: (أيها الناس! إنما أهلك الذين قبلكم أنهم كانوا إذا سرق فيهم الشريف تركوه، وإذا سرق فيهم الضعيف أقاموا عليه الحد، وأيم الله لو أن فاطمة بنت محمد سرقت لقطعت يدها) .. الله أكبر – (بتاعتنا) كوول الناس سواسية أمام القانون وهذه هى المساواة والعدالة بعينها يعني مافي محسوبية ولا مجاملة ..
    يا أخونا إنتو وييين ود بوتين وود أونكل ساااام مختفين وما ظاهرين عسى ما شر ؟؟؟

    1. اخوى ابو احمد ,, الف شكر لسوءالك و ان شاء الله تسأل عنك و تغشاك العافية دائما يا رب..
      اخوك موجود الحمد لله و لكنها مشغوليات الحياة ,, اى نعم مرات ما بنقدر نجازفها و نعمل ضيق لناس عبيد و المندهش بس برضو بنلاقى لينا دقايق كدة نشوفها و نبقى مارقين..
      لكن فعلا ود اونكل سام هو المختفى من الساحة الفنية مؤخرا و قاطع موية و نور .. يا ربى يكون اعتزل و الا شنو ؟؟
      اوع تكون زعلتو يا جنوبى و حردا ليك ؟؟ مع انو استحلف لينا كلنا قال تانى الا كان تشموها قدحة !!!!

    2. انتو صحي امريكي وين ؟ ما زعلتو والله وحتي صحبة المصريين خليتا …
      ما نهضرب كيفن يا نانو ياخوي مع جنس ديل ! الدخلونا الجامع وجامعوا ديل ..

      1. الله يصلحك ويصلحنا جميعاً أخوي جنوبي، ويصلح حال بلدنا ويولي علينا من يصلح، عشان نرجع لي بلدنا وأهلنا نقضي باقي عمرنا دا هنااااك في طاعة الله وعبادته والدعوة الي دينه الحنيف ( بدوون ” هي لله هي لله ” بتاعة الجماعة) !!! … قولوا آااااااامين .. سلااااام ..

    3. يا نانو اخوي صحي خبر البتين بتاعين ( جابت ليها تشليح؟) انا والله لو ما انت مصدر نثق فيه كنت عاوزة اعلق! انا شخصيا بميل لرواية الأمن إنو البنات اختلقوا القصة! كان فيها شوية ثغرات’ بتاع الركشة سااااهل يجيبو، بعدين شنو حكاية يعلّموا في جسمهم دي! ما مكان الكلى ولا غيرو معروف، الحاجة زي دي يشتغلوها طوالي مش يعلمواّ؟! و يعلّموا لمنو؟ هم كائنات فضائية؟ و دا كلو كوم و الحراس ناموا و سابوا الباب فااااااتح!!!!! كنت عاوزة اقول ليك أكيد معرفتك ديل أسرة كريمة و اي شي ، لكن بنات الزمن دا ما بتقدروا!!!

      1. كدي التشليح خليهو الحاصل قدامنا ما اكثر من التشليح

      2. وأن أضم صوتى لأختنا نونة القصة فيها إن وشغل خيال واسع ، أى نعم الركشات أصبحت مصدر فساد وخطر لكن القصة دى سبكتها مليانه خروم ، بعنى فيها نوع من عدم المعقوليةوالتأليف والله أعلم

  7. اها برضو تقولو كتمته ما في ؟؟؟؟

  8. الزن وشرب الخمر ويظلل و و ، ده كلو بينهم وبين ربنا ان شاء غفر او لم يغفر، البيهمنا البينا وبينهم، والاستيلاء على حقوقنا، او التفريط فيها،
    اها – يادوب فهمت عليكم، انتو قاصدين مسألة الشرف والامانة البموجبها اشلحوهو من الوزارة
    كان كدي خلاس – بكرة لن يفضل فيها سفيها.

  9. مش و كمان سكران؟ ، المفروض وكمان اجنبية؟ ديل الكل يوم عاملين حملة تسجيلات للأجانب ؟ ( يا ربي مسجلة؟) و يوم يقول ليك أوكار المعرفش آيه!! و يوم يقولوا ليك حاربوا ألما عارف شنو داك لأنهم بن قلوا آيه كدا ،ما عارفه! و مرات يقوم شيخ الطٍرَح فينا و يهيج و يقول قسما ما يتوزع الشي داك شان الأولاد و البنات يتعلموا قلة الأدب؟ و مرة مرة يقوموا على ستات الشاي و يقولوا بوزان السجم!!! أجي ياخواني!!!! الشي دا كوووووولللو بس دائر لي مسئول وااااااحد بس يطبّقوا ليكم زي الترتيب ! و لا تتتعبوا نفسكم

  10. عجايب يا بروف (يقول الخبر الذي أوردته صحيفة الجريده عدد أمس السبت على لسان الأستاذ كمال رزق إمام وخطيب المسجد الكبير بالخرطوم أنه طالب برفع الحصانه عن وزير ولائي تم ضبطه مخموراً وبصحبته فتاة أجنبية داخل سيارته (المظللة طبعن) وذلك بشارع النيل..) ناس يترجو في اقامة الحد عليهم وناس يكردوهم كرد ونفذوهو فيهم كان اعوج كان صحي برضو ما كتمت كتمت كتمت

    1. وقالوا اليوم داك برضو قال الشباب من كترة ما بيتفرجوا علي المواقع الاباحية بقوا ( ما بيعرفوش ) والواحد فيهم كان نادتوا مرا ما بيقدر يعمل معاها حاجه !! الشيخ ده لا خلا البيعرف ولا خلي الما بيعرف ! ما عرفناهو شايت وين ؟
      لكن قالوا خطبة الجمعة ديك كانت اباحية وناس كتااااار وضوهم بطل .. ظنيتو خميسو كان كاااارب ,,,

      1. الناس اخوي اجنوبي كان نادته كان ما نادته ما بقدروا (نفسيه وجووووووووووووووووع ساكت يا خوي ما فرجه) والله يلعن اللي بوظ النفسيات والله يلعن الجوع الناس بس اتمنى بدل جوع كلبك يتبعك تنقلب وتصير ربما جاع الكلب فأكل صاحبه ويلا على الشارع ما كاتمه وكده

  11. صلى الله وسلم على علم الهدى خاتم الانبياء ,,
    ولعن الله الوالى الحرامى والوالى الزانى والحاكم الكاذب ,,,
    اتفوووووووووووووووو

    1. ونسيت يا نونا والسمار أقول ليكم (حسب مصادر ثقة من الأسرة) ، إنو البنات طلعن من (طاقة) صغيرة ما من الباب وذلك قريب الفجر وكان الحراس ناااائمييين في سابع نومة … والله أعلم … سلااااام …

  12. زوجة علي كرتي وسفيرة السودان بإيطاليا – أميرة قرناص تقول أن ما يميز المسؤلين في هذه الحكومة هو تدينهم الذي يفرض عليهم مشاطرة المواطنين معاناتهم وزوجي دائماً يعلم أبناءه أنهم ليسوا أفضل من المواطنين ويرسلهم إلي الخلاوي في الإجازات ونحن لا نأكل اللحم عدا 5 مرات بالأسبوع وهنالك يومين لا نذوق طعم اللحم فيها وكل هذا من تواضع علي وبساطته !!!

    1. ماكان تكتب الرد بتاع صاحبك الفى الواتساب ! كاااااااااااااااااااك

      1. جنوبي رسل لي الواتس بتاعك عشان نتواصل عبره ( لأني بحبك وعائز أعاكسك ) ههههههههههههههههههه .. سلاااام ..

  13. كشفت إشراقة سيد محمود وزيرة العمل وتنمية الموارد البشرية عن تذليل كافة العقبات التي كانت تحول دون حصول السودانيين على عقودات للعمل في دولة قطر، وأعلنت عن اتفاق سوداني قطري على زيادة أعداد العمالة السودانية في قطر خلال الفترة المقبلة، وفتح فرص التسجيل عبر موقع الوزارة على الإنترنت للراغبين في العمل بدولة قطر، ولمن ليس لديهم عمل داخل السودان. وقطعت إشراقة بعدم وجود أي مشاكل في منح التأشيرة، وأشارت في تصريح لـ(اليوم التالي) إلى أن الأهم هو الحصول على عقد العمل، وأكدت إشراقة الاتفاق على تيسير الحصول على عقودات العمل مع وزير العمل القطري، وأضافت: “أزلنا كل المشاكل المتعلقة بالحصول على عقودات العمل والفترة المقبلة ستشهد زيادة كبيرة في عدد السودانيين الذين سيذهبون إلى قطر”، وكشفت عن إرسال طلبات أكثر من (15) خبيرا سودانيا في مجالات السلامة والصحة المهنية والتفتيش الإداري، وتشريعات العمل طلبتهم قطر من السودان في وقت سابق، كما أعلنت إشراقة عن تعاون مستمر بين السودان وقطر لزيادة أعداد العمالة السودانية، وقالت وزيرة العمل: “لدينا عدد كبير من أصحاب الخبرات سجلوا وأرسلنا أسماءهم إلى دولة قطر وسيتم توظيفهم”، وأضافت: “أي شخص يرغب في العمل في قطر يسجل بياناته في الإنترنت عبر موقع الوزارة والتسجيل مستمر( شر البلية ما يضحك اخوتي من الخبر عاليه ليبيا الرصاصه بيلعلع كتمتو نفس الناس فيها اشي مرمطه اشي بهدله اشي رشوه اشي اتاوة يخس عليكم وزراء تفوووووووووووووو ) اعذروني اخوتي غلبان ومقهور كثير من ناس ديل واآآآآآآآآآآآسفاي

    1. اشراقة سيد محمود وزيرة العمل وتنمية الموارد البشرية بدولة قطر الشقيقة !! ؟

  14. يا بتي نونا السلام عليكم وعلى جميع السمار، رداً على تساؤلاتك المتعلقة (بفبركة قصة البنتين) وما أثارته السلطات الأمنية من شكوك حول الواقعة لكي يبرروا فشلهم وتقصيرهم في حفظ أمن المواطن والوطن أفيدكم بالآتي:
    أولاً – كما ذكرت سابقاً فأنا أعرف أسرتهم شخصياً وهي أسرة محافظة ومتدينة وميسورة الحال يعني ما محتاجه للماديات لتغطية النفقات (عشان ينحرفوا البنات) فكل أمورهم ميسرة وكل طلباتهن مجابة.
    ثانياً- بعدما عثر عليهن أخذوهن لطبيبة أخصائية نساء وتوليد وكشفت عليهن كشف نساء دقيق ووجدت أنهن سالمات وما زلن عذراوات (لم يمسسهن أحد) !! هذا بشهادة إبنتي (طبيبة) وهي صديقة الأسرة.
    ثالثاً- التأشير بقلم شيني على المواضع المراد أخذ الأعضاء منها أعتقد كان لكي يبينوا (للجراح) الذي لم يكن موجوداً معهم ولا يظهر أمامهم بل يأتي متخفياً ويقتلع الأعضاء التي يحتاجونها ( حسب الطلب ورغبة العميل) !!!!!! والله أعلم .. سلاااام ..

    1. انا ما عارف ليه الناس تشكك في رواية البنتين ديل ! قبل كم سنة مش لقو شقة في المهندسين ولآ الفتيحاب ما عارف وكانت مجهزة بشبه غرفة عمليات ؟ ومش الدولة نفسها اقرت انو في عصابات إتجار بالبشر ؟ ولآ البيصل كسلا ما ممكن يصل الخرطوم !
      وبعدين لو اصلا البنات ديل عملن كده شان يتهربن من اداء الامتحان كما تدعي الحكومة , يعني هي الاعذار شوية شان يختلقن قصة زي دي ؟ ما كانن يدخلن الامتحان ويدعن انهن غمرن ولآ أي مرض ولآ تمسك بطنها بالكضب وتكورك ويودوها المستشفي وأي طبيب غبي كان حيعمل ليها عملية زايدة طوالي !
      هي الحكومة كضبت في لا اله الا الله يعني بس حتصدق في البتين ديل ؟
      كمان جابت ليها تشكيك في الشرف ! يعني يا المواطن يسكت عن تقصير الجهات الامنية يا كمان يبقي فيييييي شرفه !!

      1. شكراً ليك أخوي جنوبي وجزاك الله خير (ما حقتم) على هذا الرد الشافي والكافي .. وما سمعنا منك أي حاجة على الرد يا بتي نونا !!!

      2. اخي نانو
        آسفة جداً على الرد المتأخر ، حقيقة لم أر ردك في حينه! انا و الله على ما أقول شهيد لم أشك في شرف البنتين أبدا ( فوجئت عندما قرأت ردك و رد الأخ جنوبي) ، انا أشرت لتصريح ناس الأمن بخصوص تهربهن من الامتحان فقط و لم يرد ببالي اي شيء عن الشرف او غيره ( بديهي لو واحده أعوزه تقل أدبا ما حتسوق اختها) انا فقط لم تدخل الحكاية في راسي ، ثم لماذا يعلموا للطبيب يا اخي، ما بس يقولوا ليهو دائرين الكلى و القرنية مثلا وهو حي قوم باللازم !!! يعني القصة شوية كدا ما بتدخل الرأس
        اما يا جنوبي فكونوا انه حصلت قبل كدا ما معناها نصدق الحصل و الماحصل!! الله عرفوها بالعقل!

  15. الله عرفو بالعقل ( العتب على الآيبادًًً)

    1. هههههههه
      الاخت من ( أندينا ) ؟
      عندنا في البلد يا نونا مرتين ( جمع مرا ) اتشاكلن مع بعض , كواريك لي رب السماء في نص الشارع وواحدة تالته تحجز وتهدي فيهم , جاء طبيب القرية ماشي وشاف المنظر وبقي يحجز ويهدي في المتشاكلات وبعد فرقن من بعض مسكين داير يعظهن ولي شلاقته بدأ بالكانت بتحجز وقال ليها بالله يا حاجه فلانة ربنا ده شافوا بالعين ولآ عرفوهوا بالعقل ؟ وديك طوالي جاوبت : شافوهوا بالإين يا هكيم …

      1. ههههه
        انا و الكاشف اخوي من انديكم ( الآيبادًًً و انا بت ام روحي دي من انديكم ) ، لكن ما تشتغلوني! أخطائي كتيره لكن الآيبادًًً بتفولح براهو و انا ما عندي ليهو زمن ( أرد على جنوبي بي يد ، و أسوط الحلة بالتانية) اعذروني!

      2. و ما براجع و لا بصحح، الا بتاعت الله دي حرقتني و احرجتني، شان. كدا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: