الدفن ذاااتو

تلك الطرفة الشائعة التي تقول أن صاحب مطعم وضع على باب مطعمه لافته كتب عليها (بكرة الفطور مجانن) ، وكلما جاء الزبائن وجدو أن المقصود هو (اليوم التالي) الذي لا يأتي ابداً !!
حال هذه الطرفة هو حال (ملف خط هيثرو) الذي ما فتئنا كل عام وبين الفينة والأخري نستمع لتصريحات المسؤولين أن (بكرة الفطور مجانن) !!

في مارس من العام الماضي وجه لسيد رئيس الجمهورية بمحاسبة الجهات المتسببة في فقدان السودان خط هيثرو وإعادته، أو إعادة قيمته، واتخاذ الإجراءات اللازمة لحفظ حقوق الخطوط الجوية السودانية وذلك حسب ما جاء في تصريحات وزير النقل والطرق الجسور للصحافة في ذلك الوقت .
ولقد ظل العبد لله منذ ذلكم التاريخ يتساءل عبر (واواته) عن أسباب تأخر لجان التحقيق في إعلان النتائج ، إذ لا يعقل أن يستغرق التحقيق كل هذه السنوات في قضية بهذه البساطة (خط وإتسرق) ولقينا السارق (قادل) بيهو شنو يعني؟ كيمياء ؟ لقد طالبنا ولا نزال بمحاسبة المتورطين في بيعه وحفظ حقوق الشعب السوداني الذي أصبح يعيش معيشة ضنكا من أثر العوز والفقر .
لقد صرح السيد وزير النقل والطرق والجسور في مارس من العام الماضي (يعني ليهو سنه وشويه) بأن لجنة التحقيق في فقدان خط هيثرو توصلت إلى نتائج دامغة في القضية تدين مجلس إدارة الخطوط الجوية السودانية السابق، مما يعني أن المسألة (جاهزه) لتقديم (اللصوص) إلى العدالة وهاهو عام قد مضي منذ ذلك التوجيه وذلكم التصريح دون أن نسمع عن القضية شيئاً ليأتي السيد رئيس لجنه النقل بالبرلمان عبدالله مسار مصرحاً بصحيفة الوفاق عدد الأمس الأحد 13 أبريل بأن قضية خط هيثرو لم تدفن وأن المتورطين سينالون جزاءهم؟ (بكرة الفطور مجانن) !
ولنسأل السيد (مسار) سؤالاً مشروعا (هو الدفن ده شنوووو؟؟) ما ياهو جنس القاعد يحصل ده .. لماذا (من أساسو) ينتظر السيد وزير النقل توجيه الرئيس بمحاسبة الضالعين في بيع الخط؟ ولماذا (من أساسو) يتم عمل (لجان تحقيق) ؟ الشئ المعروف أن أن المخطئ يجب أن يحاسب في كل زمان ومكان دون ايعازاً من أحد بمحاسبته ودون أنشاء لجان تحقيق (تقعد بالسنوات ولسه) من أجل التوصل لمن باع الخط وهو أمر يمكن أن يتم التوصل إليه في أيام لأنو القضية واضحه وغير معقده وما عايزه (المحقق كونان) !!
لقد سئم المواطن السوداني هذاه المماطلة في تقديم (الفاسدين) إلى القضاء هذه المماطلة والمماحكه التي أصبحت تصيب الشخص بالغثيان والتي تشير إلى عملية التستر التي تمارس على من إستباحوا أموال ومقدارات هذا الشعب الصابر الكادح المسكين (الما عرف يلاقيها من مين وللا من مين؟) والتي تمد لسانها سخرية لحالة (النضافة) والتقي والزهو التي تتقمص المسؤولين وهم يصرحون (العارف ليهو فساد يجيب الوثائق) .. وثائق مين يا عم وبكره الفطور مجانن ّ!!
غني عن القول إن مثل هذا التستر على هذه التجاوزات والمخالفات التي تحدث من كبار المسؤولين بالحكومة وإيماءاتها التي تقول للمواطنين أنهم فوق القانون، أمر من شأنه أن يحبط الرأي العام ويقلل من ثقته في القيادة والشخصيات السياديه (ده لو فضل فيها ثقة) !
عموماً تبقى تصريحات المسؤولين حول قرب تقديم الضالعين في هذه السرقة المفتشرة والتي يصرح المسؤولون عبر وسائل الإعلام بين الفينة والأخري بتقديم الوالغين فيها إلى العدالة كذلك الإعلان الذي وضعه صاحب المطعم (بكرة الفطور مجانن) !!
كسرة :
عليكم الله عاينو لى جنس (الواوات التحت دي ) .. ويقولو ليك (القضية لم تدفن) .. طيب ما ده الدفن ذاااااتو !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟

كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

Advertisements

24 تعليق

      1. وانا برضو مشترك صاح ؟

    1. الليلة شايفك عابدين دِرمة بس ! جاي اووول زول المقابر ..

  1. وحات اسم الله يا بروف خايف يورطوك فيها انت زااااتك ؟
    انت قايل شنو .. هم لحدي الآن ما عارفين يقدموا منو قرباناً لهذا الخط التعيس الذي كشف عن سوءاتهم
    عشان كده ممكن الجريمة دي تدور وتدور وما يلقو ليهم زول يلصقوها فوقو ويقولو ده انت !ّ

    1. صدقت ياخوى المندهش .
      البروف دة أول زول بجيبوهو بأعتبارو محامى الاتهام وهو الوحيد الذى يمتلك كل الادلة والمستندات التى تورط المجرمين .
      عشان كدة ماتستبعد أحد الحلول الثلاثة إما بالاقصاء أو بالشراء أو يلفقو ليه تهمه ويبتزوهو بيها…

    2. ههههههههههههههههههههههههههه,,
      انت مجرم يا مندهش ,,,

  2. انت في خط هيثروا ولآ كمان قالوا طياراتنا مكوووعه في مطار الخرطوم وبيدفعوا ليها تأمين بالدولار !!
    ياربي يكون تأمين ضد ( الارضة ) ؟
    غايتو ناس سودانير ديل !! بري بري منهم !!
    انا يبقي لي كان ما توجيهات السيد الرئيس دي الموضوع ده كان خلص زمااااااااااااااااان !! إلا شقي الحال وجّه !

    1. هههههههههههه يعني أريتو كان مااا وجّه
      بالجد عجبتني !

    2. المشكلة ما التأمين المشكلة في الناس المشت اتفسحت على حساب انها رائحه تأمين الطيارات الواقفه وباركه تقول لي عابدين درمه ودفن

  3. يا حبايب مش خط هيثرو براهو وسودانير انتو الخطوط البحريه ذاااتها وين واخشي ما أخشي بان تكون بيعت كل سفننا البحريه وغايتو حسه عرفنا الخطوط الجويه وما االت اليه ولكننا لا نعرف اي حاجه عن الخطوط البحريه،مسطحين شديد
    يا ود بوتين يا فرده كدي شوف لو خطوطنا البحريه ولا سفينه من سفننا اتباعت عندكم،انا غايتو سنه ٩٩ شفت لي سفينه اسمها الدندر علي ما اعتقد في ميناء دربن بجنوب أفريقيا

    1. لحدي قبل سنتين كان عندها باخرتين برضهن مكوعات في الميناء وكانن معروضات للبيع , لاكين باعوهن ! هدوهن ! شلعوهن ! جيدوهن ( تم صهرهن في جياد ) ما عارف .. انت صحي باعوا الميناء ؟

      1. معقولة يا جنوبي اخوي ممكن يبيعوا الميناء،
        لا لا ما أظن للدرجه دي،ممكن يبيعوا العده لكن الميناء ما ظنيتم يبيعوا

      2. يا العبيد هى جات على الميناء بس ألما باعوهو؟ ديل باعو فنادق و أراضى و مدن و كبار،،، هسة الواحد فينا بقى يخاف يجى خاشى بيتو يلقاو باعوهو ،، عشان كدة بنعمل شهادة بحث كل كم شهر كدة بغرض التأكد،،، و صدقنى برضو ما متأكدين !!!!

      3. السفن وجياد آآآآآآآآبخبرو لكن دبابات وعتاد ايام هجليج المعلومة مشت جياد وقروشا انكبن في جيب واحد والعهدة على الراوي البلد اخوي جنوبي كلها بقت ريحتها فساد ريحتا شنو بقي الفساد يسد انفه ههههه

    2. (سنه ٩٩ شفت لي سفينه اسمها الدندر علي ما اعتقد في ميناء دربن بجنوب أفريقيا) دا كان يا دوبك ليهم 10 سنين دحين تكون قاعدة لي هسي؟؟؟؟؟!!!!!!! ما اظنها

    3. الخطوط البحرية خصخصوها وشلعوها ,, واصلا اللى عمل ليها شنة ورنة الرجل الوطنى المخلص الدكتور / مصطفى نوارى ,,, اللى كان عندو خلاف واضح مع وزير المالية وقتها وبموجبو شالوهو وبعدو الخطوط ما شافت عافية ,,

  4. أولا مبروووكة عليك البرنجية أخوي ود العبيد، وثانياً يا أخي ما قلنا ليك أرجع للواتس رسلت ليك حاجات حلوووووة ولأخونا شمباتي. أما بالنسبة لموضوع تقديم المسئولين المفسدين للمحاكمة فكما يقول “علي عوض” صاحب جنوبي البقول خلاهو ( أبأ آااااابيلني ) !!!!

  5. انا اقترح يا أستاذ الكسرة الجديدة تكون كالتي 😦 الدافنة متين )

  6. ” الخرطوم – اصدر الرئيس السوداني عمر البشير الاثنين قرارا جمهوريا ينظم انشطة الاحزاب السياسية الزمها فيه بالحصول على موافقة مسبقة من السلطات لتنظيم اجتماعات داخل مقارها.
    وجاء في القرار الذي نشرته وكالة الانباء الرسمية (سونا) “لا يكون لأي من الاحزاب السياسية الحق في عقد اجتماعات عامة وندوات ولقاءات داخل دورها او مقارها دون الحصول على موافقة مسبقة من السلطات المختصة”. ”
    :
    :
    مافيش حد يفهم الزول ده معني حريات البيلوكا زي اللبان دي !

    1. هههههههه نعلكم كدي مصديقين هههههههه انا عارفك يا جنوبي حصيف لكن الطامه في احزاب السجم عشان كده انا بقول كتمت كتمت كتمت ومش حال البلد بس الكاتم حال احزاب السجم كمان كووووووووووووووووووولها عشان كده (ودي تسريبه كدي من ناس الامن- مكتب قياس الراي) بيقول انه طالما الناس بيقولوا كان طلعنا مظاهرات نان البجي منو فالجماعة مرتاحه ونايمه على العسل لكن في اليوم البيقول فيهو الناس بنجي نحنا اليوم داك ناس اب دقن اليشدو حليهم ساكت افكار كدي مجهجهة في راسي لولكنك سيد الفهام

    2. بلوك اللبانه والا الحريات فهمنا انا غايتو شايفه رقاااااااااااااص التاني ابعرفه لوك لبنانه من غيره؟؟!!!

  7. تلك الطرفة الشائعة التي تقول أن صاحب مطعم وضع على باب مطعمه لافته كتب عليها (بكرة الفطور مجانن) يا عمك جبرا هو كلامه عن الدمقراطيه اللي هسع بطن في الاذن دق منه طناش هههههه

  8. الكلام الجد كتمت كتمت كتمت كتمت

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: