مستشار تطوير وجودة

الإصطلاح السياسي للتقشف أنه برنامج حكومي ذو طابع اقتصادي، يستهدف الحد من الإسراف من زيادة الإنفاق على السلع الاستهلاكية؛ وتشجيع الادخار، والعمل على مضاعفة الإنتاج؛ علاجاً لأزمة اقتصادية، تمر بها البلاد .. والتقشف والترفق بالمال العام في الدولة الإسلاميه وعدم إستباحة (دينار واحد منه) يحدث حتى وإن لم تكن هنالك أزمة إقتصاديه بل حتى وإن كانت الدولة في أوج عظمتها المادية لأن الإسلام ينهانا عن أكل الأموال بالباطل حتى وإن كانت عامة ..

ولأننا سادتي في عهد (وريتنا جديد ما كان على بال) فهذه مقارنه بين المشروع الإسلامي والمشروع الحضاري في كيفية التعامل مع المال العام واضعين في الإعتبار الحالة الإقتصادية للدولة .
المشروع الإسلامي (الحالة الإقتصادية) :
جاؤوا إلى أمير المؤمنين عمر بن عبد العزيز بأموال الزكاة، فقال: أنفقوها على الفقراء
فقالوا ما عاد فى أمة الإسلام فقراء،
قال: فجهزوا بها الجيوش.
قالوا جيوش الإسلام تجوب الدنيا،
قال: فزوجوا الشباب.
فقالوا من كان يريد الزواج زُوِج. وبقى مال،
فقال: اقضوا الديون على المدينين.
فقضوها وبقى مال،
فقال: انظروا (المسيحين واليهود) من كان عليه دين فسددوا عنه. ففعلوا وبقى مال،
فقال: أعطوا أهل العلم.
فأعطوهم وبقى مال،
فقال: اشترو بها قمحاً وانثروه على رؤوس الجبال لكي لا يقال جاع طير في بلاد المسلمين.
الكلام الفوق ده يؤكد بأن المواطنين في عهد هذا الخليفه كانوا مكتفين تمامن .. طيب تعالو نشوف تعامل الخليفه مع أموال المسلمين :

المشروع الإسلامي : التقشف
( جاء البريد ذات ليلة إلى أمير المؤمنين عمر بن عبد العزيز (الفوق ده ذاااتو) فأشعل السراج ليقرأ الرسائل، ويسأل رجل البريد عن أحوال المسلمين في بلده، ولمّا انتهى من كلّ هذا أطفأ السراج، وسئل في ذلك فقال إنّ زيت السراج من بيت مال المسلمين، وقد أضاءه ليبحث في أحوال عامّة المسلمين ويسأل عن أمرهم ليعرف ما هم وأمراؤهم عليه، وأطفأه لأنّه الآن يبحث في أموره الخاصّة)
المشروع الحضاري : (الحالة الإقتصادية )
الفقر يضرب بأطنابه ، حيث تمتلئ صفحات الصحف بالنداءآت الإنسانية التي تخاطب أصحاب القلوب الـ في شتى مناح الحياة شئ عمليات جراحية بتاعت حياة أو موت وشئ طلبات لأدوية عجز المواطنين المرضي أن يشتروها وشئ تسديد أجرة منازل يخاف شاغلوها أن يقذف لهم بالعفش للشارع وشيئ كراسي لمعاقين حتى يتمكنو من التنقل والحركة وشئ تسديد رسوم لطلاب عجزو عن تسدديدها ويواجهون خطر
الرفد من الجامعات وأشياء وأشياء توضح تماماً سؤ الحال الذي وصل إليه مجتمعنا من فقر وأملاق .
المشروع احضاري (التقشف) :
كشفت مستندات تحصلت عليها الزميلة (اليوم التالي) من مصادرها عن ارتفاع تكلفة فاتورة الاستهلاك الشهري لفاتورة هاتف خضر الأمين مستشار والي الجزيرة لتطوير الأعمال وضبط الجودة عن شهر مارس 2014 م والتي بلغت (10579) جنيها (عشرة مليون ونص وشويه) من بينها قيمة فاتورة محادثاته العالمية والتي وصلت وحدها ـ حسب المستندات ـ مبلغ (8,614) جنيها وذلك حسب الخطاب المعنون إلى المدير العام لوزارة المالية للسداد، والصادر من فضل موسى جادين الأمين العام لحكومة الجزيرة .
إنتهت المقارنة :
بالله عليك عزيزي القارئ قارن بين بلاد يكتفي مواطنيها فلا يوجد من هو بحاجه إلى مال الزكاة فيطلب الخليفة أن يشترى بها قمحاً لينثر على رؤوس الجبال لكي لا يقال جاع طير في بلاد المسلمين والحال هكذا من كفاية ورفاهية لم يشأ هذا الخليفة (المسؤول) أن يعتدي على أموال المسلمين ولو بأخذ (شوية) زيت يستضيء بها وينير بها (منزله) الخاصّ، لم يقل إنّ بيته هو بيت (الحاكم) فيجب أن يكون مضاءاً (24 ساعة) ولم يقل إن (لمبتو) هي (لمبة الحكومة) التي تعمل من أجل راحة المواطنين .
ثم قارن بينه وبين الفقر الذي يرزح فيه شعبنا وفاتورة هاتف خضر الأمين مستشار والي الجزيرة لتطوير الأعمال وضبط الجودة عن شهر مارس والتي بلغت (عشرة ملايين ونص) لتعرف إن الإسلام براء مما يحدث !

كسرة :
ده كووولو كوم وحكاية مستشار الوالي للتطوير والجوده دي كوم تاااتي .. لو عندنا في كل ولاية مستشار والي للتطوير والجوده فدي (كارثة) وإذا الوظيفة دي (إتنجرت) للزول ده براهو فدي تبقى (فجيعة) ونحنا في هذا العهد الميمون كتبت علينا الكارثة والفجيعة .. وأريتنا ما طلعنا منها !
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

32 تعليق

    1. مبروك يا ابو الشوش البرنجية

    2. حلوقك انت جيتنا من وين الليله

    3. جدادة الخلا !
      كاااااااااااااااااااااك

      1. السلام عليكم يالشمباتى وماشايفك في الليله السياسيه( الامتحان )في الميدان بتاع الرابطه؟ ورايك ؟

      2. وعليكم السلام ورحمة الله ابو عمر ,,
        انا بطلت امتحانات خلاس !
        كبرنا وكبرت احزاننا ,,
        اهئ اهئ اهئ

  1. سبحان الله
    بعد ما أقراء المقال كللللو وما اجد اي برنجية حايمة
    اول مشاركة وبرنجية
    شفت

  2. عشرة مليون
    لا حول ولا قوة الا بالله

  3. مغبون زيك كدا بس | رد

    اذا سئلت عن العدل في بلدي فقل ان عمر قد مات

  4. الود والتحايا للبروف والجميع
    كتر خيرك يا بروف بتزكيرنا بالمشروع الحضاري ودولة الشريعة والامام او الرئيس الرسالي او كدة لانو الجماعة ديل المواضيع دي رمو طوبتا زمااااان , اسي بقو ناس لغف عديييييييييييييل كدة لاداسينو ولا خجلانين منوما شفتو البكارقد كيف لمن التعديل الوزاري الاخير طبعا قالو تحت تحت قال عمارتي ما تميتا ياخي ده كلام هو كل سنة عمارة ما تدي فرصة لغيرك , بعدين يا بروف داير منو اليشوف ليك احوال المسلمين ده البقا جنو سفر ده من قلة الشغلة , غايتو بركة الضيقو ليهو الميز خلو يلف بس بين بورتسودان واثيوبيا وتشاد والباقي نججججم مافي ليك

  5. الزول الصباح يسابقو ناس العبيد والغلبان والعصر يجي يلقى ابو الشوش …طيب تخميسه ياخ

    1. والله يا خوي مفروض يعرضوا البرنجية على بالاول اكان (ابيتا) بشوفوها باقي الناس

  6. مقهورين و ساكتين | رد

    في وظائف كتيرة شبيهة بدون فعل مناصب مكاتب مخصصات والخ الخ الخ

    1. والله يا بروف الممغصني قصه المكالمات الخارجيه دي وكمان مش القروش الانصرفت شوف كم دقيقه ولا كم ساعه من ساعات العمل الحكومي اتكلم ودي كلها مدفوعه من ميزانيه البلد و ومحمد احمد الغلبان يشيل ويدفع شي رسوم شنو ما عارف،والله ما عارف أقول شنو،غلبني الكلام ويعني الواحد ذاتو استغرش لمن جاب الزيت،
      مبروكة يا الشوش وعجبني ليك يا جنوبي وعارفك ما بتحب المجازفات زي اخونا الغلبان،
      اخوي نانو والله الواتس اب جربتو عيلا جاب لي هوا ولكني مواصل معاك بالايميلات ولك تقديري واحترامي واعتزازي

      1. اقطع يدي من هنا لو ما كان الزول ده بيتصل علي الارقام اياها ,, انت كنت ترغب في ونسه دافئة فأضغط رقم .. وان كنت تريد ممارسة الحب مع شقراء اضغط رقم … تمانية مليون وستمية مكالمات خارجية هو اصلو علي كرتي !! ينعل ميتينو ,,

      2. هههها و انت الورّاك دا شنو يا جنوبي؟؟؟؟ هههه
        يا خوانا الراجل دا طبعا بكون عامل مهم ، وأي زول من أهلوا عاوز يتكلم مع اي زول برّا بتبرّع ليهو ( بي تلفونٌا) و يقول ليو( أتفضل،أتفضل ما في مشكله ، أخد راحتك!) و أمال آيه في حد يقدر يسألو؟ او يكون متابع اعمالوألفي ماليزيا!!!!اما عن الوظيفة يا بروف ، فحدّث و لا حرج ، أكان اتقابلنا يوم بإذن واحد احد احكي ليك حاجات والله القمردينة دي ذااااتا حتحردا! دي بلد ما عندها وجيع!!!!
        أخد دي تصبيييرة، ( مستشارة )والي الخرطوم شنو كدا الطويل، تبع حزب حاجة كدا ( يستشيروها أفي شنو ما بعرفو) عربيتا كانت في الصيانة ( عربية الحكومة يعني) قاموا أجروا ليها عربية موديل ٢٠١٤ بي ١٢٠٠ جنيه في اليوم( وما في الشهر يا قول عادل امام ) لأ في اليوم. و أريتا نفعتنا بي شي!!! تجئ ما شة فووووووو في الناس!!! هي بس؟ أصلا النفعنا منو؟ غايتو دي كدا بس قزقزة على حسّ مستشاري الولاة في ألبلد السائبة دي

      3. عليك الله ياجنوبى ورينا الارقام العالمية دى بتجى كيف إمكن الله يدينا ونبقى مستشارين لى والى ويكون عندنا خط ساخن ..
        نكون عندنا فكرة وكدة…

      4. حنين .. انت بعد تبقي مستشار والي , البقاك ذااتو بيوريك الارقام دي بتجي كيف , اصلو هم بلا يعلموا بعض السفاهة عندهم شنو ؟

  7. والله خدر الامين دة مطالب يجيب تفاصيل المكالمات دى ويورى اى مكالمة دخلت للبلد كم ورفعت معاناه البلد قدر شنو ووفرت شنووو…
    عشان مايبقى نضم فى الفارغه والمقدودة …

    1. يا خوفي يكون الكلام مع ناس فلانه

  8. لكن ياجماعه الزول ده عندو موبايل واحد وخشم واحد بينضم بيهو ولا هو متبرع بى مكالمات أهلو الفى الحله كلها…؟؟؟

    1. آآآآآآآآآآآآآلحنين اخوي ديل قايلهم زينا عندهم خشم واحد ههههههه مال البلع الحاصل دا شنو ؟؟؟؟؟؟؟؟؟؟؟

  9. العدل دا الا ابو سامى !
    كع

  10. اول كسرة: والله قيمة الفاتورة دي راتب لوالي الجزيرة زاتو كتير عليهو وما بستاهلو خلي تلفونات.
    تاني كسرة: هو استشيرو في شنو – وهو وواليهو وباقيهم عارفين شنو – بس نجاض في التبرع للمؤتمر الوطني ولمن اجي اجتماع الميزانية الاتحادية اشيلو قروشم وما ادوهم منها بحجة انه الجزيرة ما محتاجة – وكان ده فاتورة تلفونو كده كلامهم صحيح – وارقام الدخل تكون فلكية.
    كسرة ثالثة: كانت ابنة بشر الحافي تغزل على شموع الجند وتبيع غزلها لتأكل منه – فسألت احد العلما عن ذلك فسألها (إبنة من أنت؟) فقالت: (إبنة بشر الحافي) فقال لها:(حلال لغيرك وحرام عليك)، اشارة منه كونها ابنة رجل ورع تقي اي كونها من بيت علم ودين وخلق حسن.
    الحكومة عليها ان تأتي بالانقياء الاوفياء الذين حرام عليهم لا اللذين حلال لهم.
    ده كان فضل من النوعية المنقرضة دي

  11. أولاً: يا بتي نونا أنتي الجنوبي دا بتضحكي ليهو لييييه ؟؟ ما بتقري بين السطور هو كاتب شنو !!
    ثانياً: الإسلام دين الحياء فقد كان الرسول صلى الله عليه وسلم أشد حياءاً من العذراء في خدرها ..
    (شوف يا جنوبي هوووووي أحسن لييك حاسب على ألفاظك لأنو معانا بنات ناس) ..

    ثالثاًاً: يا بروف إنتا تاعب روحك سااااي لأنك بتنفخ في قربة مقدودة فكما قال الشاعر بشار بن برد:

    لقد أسمعت لو ناديت حياً *** ولكن لا حياة لمن تنادي
    ولو نار نفخت بها أضاءت *** ولكن أنت تنفخ في رماد

    .. سلااااام …

    1. هههههههههههههههه
      إياااااهو حُقرتك جنوبي ده !!
      يقول ليك وزير مسكوهوا نهارا جهارا سكران ومعاه بت مستوردة واكيد كمان الخمره مستوردة !! ! ده كووولو هيّن ! لا وكمان مُظلل العربية ! وقبل ما نفيق من ده يقول لينا مستشار تطوير وجودة !! وانت خالي ده كله وجاي تفتش بين سطور جنوبي ؟ جنوبي يفط سطر ويتحيّر في صينية يلقاها في شان يقيف فوقا ,,,,
      بالمناسبة يا نانو وحسب معلومة اكيدة من صاحبي ( بنشرجي ) قال حتي القربة لو مقدودة ممكن تتنفخ وده بيتوقف علي قوة الهواء المضخوخ من الكمبرسون .. هسي الخروف مش بكون مضبوح وبرررضو بيتنفخ من الرجل بعد تتسلك بالمفراكه !؟ وتيييييييب !

      1. هههههههههههههههههه والله احلى ناس

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: