وحامضة كمان 1-2

هنالك عبارة تكثر في صفحات (الحوادث) عند أخواننا في شمال الوادي وهي عبارة (تشكيل عصابي) يقصدون بها أن الجريمة قد ساعد فيها وقام بها عدة أشخاص كل قام بدوره حسب ما هو مخطط له والعبدلله يعتقد إعتقاداً جازماً بأن ما يعرف بقضية فساد الأٌقطان هي من هذا النوع .

لمن هو غير مطلع علي مجريات (القصة) نورد هذا الموجز :
• شركة السودان للأقطان يا سادتي شركة تساهم الحكومة فيها بنحو بنسبة 28% وذلك باسم الصندوق القومي للمعاشات وبنك المزارع، ونحو 72% يمتلكها المزارعون في مشروع الجزيرة والمناقل وحلفا الجديدة ومؤسسة الرهد الزراعية والمعاشيين التابعين للصندوق القومي للمعاشات والمساهمين في بنك المزارع
• المدير العام لشركة السودان للأقطان (أنذاك) هو عابدين محمد علي
• العضو المنتدب (أنذاك) هو محي الدين عثمان
• وزارة الزراعة والغابات المسئولة عن تدبير مدخلات الموسم الزراعي تقوم بتكليف شركة الأقطان سنوياً بتوريد تلك المدخلات الزراعية من آليات وسماد ومبيدات وتقاوى ومحالج
• قامت شركة الأقطان في السنوات الأخيرة بتحويل هذه المهمة إلى شركة قطاع خاص دون منافسة أو طرح عطاءات وهي شركة تاجا الهندسية لصاحبها محي الدين عثمان (المسجلة في دبي).
• استطاعت تاجا أن تدبر تمويلاً بـ 30 مليون دولار من بنك دبي الإسلامي بفائدة قدرها 5,5% تسدد خلال 3 سنوات ويبدأ دفع الأقساط بعد سنة سماح واحدة.
• عليه طلب وزير الزراعة خطاب ضمان من بنك السودان لهذا القرض ثم تنازلت وزارة الزراعة من خطاب الضمان لشركة تاجا بوصفها وكيلاً لوزارة الزراعة في اختيار وطلب البضائع حسب العقد الموقع بين تاجا وشركة الأقطان
• يعني بالعربي كده (تاجا) دي تشيل الـ 30 مليون دولار وكانها وزارة الزراعه تجيب الحاجه الغاوزه تجيبا .. تدور القروش دي في السوق تعمل بيها العايزاهو (مافي شروط)
• الخطاب (الغريب وعجيب) الذي تم بواسطته تنازل وزارة الزراعة عن خطاب الضمان أبو تلاتين مليون دولار ده لصالح شركة خاصة (تاجا) قام بالتوقيع عليه (أحمد البدوي محمد صالح) الذي أصبح فيما بعد مديراً عاماً لشركة متكوت للتجارة العالمية التي يمتلكها محي الدين عثمان نفس مالك شركة تاجا (شفتو كيف) !
• أسس كل من عابدين محمد علي (مدير عام شركة الأقطان) ومحي الدين عثمان (العضو المنتدب للشركة) عدة شركات لتعمل في مجالات المعدات والمواد الزراعية المختلفة يمتلكها أولادهم وأزواجهم وأخوانهم منها الرائد لحليج الأقطان و متكوت للتجارة العالمية، لتكون وسيطاً للمعدات والمواد التي تطلبها شركة الأقطان (شفتو كيف) وفي عملية واحدة هي شراء خيش من بنغلاديش بـ 10 مليون دولار كان فرق السعر فيها حوالي 6 مليون بين السعر الحقيقي وبين السعر الذي ادعته شركة تاجا (والناس ما لاقية حقن)!
تعالوا معاً لنقرأ بعضاً (لاحظ بعض) من الإفادات التي أدلى بها المتحري في قضية الاقطان عقيد شرطة عوض الكريم المبارك :
• ان المتهمين الأول والثاني قاما ببيع الأسمنت التابع لشركة الأقطان الى صاحب شركة ببحري ، تعمل في مجال مواد البناء المختلفة وإستلما مقابل ذلك مبالغ مالية ، وأدخلاها في حساب شركة (مدكوت) .
• أن المتهمين الأول والثاني حصلا على عمولات من البنوك التركية ، في عمليات تخص الأقطان ، قدرها أربعة ملايين دولار ، موجودة في رصيدهم خارج السودان
• انه من خلال التحري والمراجعة اتضح أن المتهمين الأول والثاني استغلا اسمي ابني أختيهما في عضوية مجلس إدارة شركة مدكوت العالمية، لإسناد التمويل الخارجي الذي تحصلت عليه شركة السودان للأقطان من البنك الإسلامي للتنمية بجدة بمبلغ (55) مليون دولار، إضافة إلى تمويل قدره (120) مليون يورو من بنك (A.B.C) الفرنسي لشركة ميدكود وأشار المتحري إلى أن الأرباح التي ستتحصل عليها الشركة ستعود للمتهمين الأول والثاني، وزاد قائلاً: من خلال التحري والمراجعة ثبت أن المتهم الثاني (العضو المنتدب لشركة الأقطان) هو المتحكم في الشؤون المالية لشركة ميدكود.
• وتعالو نقرأ ما أفاد به رئيس لجنة التحقيق بابكر أحمد قشي في تنوير للصحفيين 9 مايو2013
وكشفت لجنة التحقيق في فساد شركة الأقطان بأنها إستردت (23.9) مليون يورو و(30) مليار جنيه كجزء بسيط من الأموال المنهوبة ، وان الإجراءات جارية لإسترداد المزيد . وقال رئيس لجنة التحقيق بابكر أحمد قشي ان لجنته إستردت اموالا ضخمة وآليات ومعدات زراعية وعربات بما قيمته (23) مليون يورو و(987) الف فاصل (530) يورو ، كما إستردت عن طريق (التحلل ) أكثر من (7) مليون جنيه (مليار قديم) وشيكات تصرف بالاقساط باكثر من 9 مليون جنيه (مليار) وشيكات مستحقة تصرف لاحقا اكثر من (4) مليون جنيه (مليار) بالاضافة الي شيكان مستحقة للاداء قيمتها اكثر من 10 مليون جنيه (مليار) ، أي ان المجموع أكثر من (30) مليار جنيه ، والتي دفعها المتهمون طوعاً (لاحظوا طوعاً دي) لـ(التحلل) (يعني الأموال المنهوبة تكون كم؟) !
غداً نتابع كيف قرر التشكيل العصابي الخروج من كل هذا (اللبع) غير المسبوق (ذي الشعرة من العجين) ومش كده وبس … طلعت الأقطان (شركة الشعب الفضل) مطلوبه (لهؤلاء اللصوص) ومفروض تسدد ليهم قروش !! .. ياااا ولد هات الحبوب

كسرة :
والله .. والله.. عملتوها شينة وحامضة كمان !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

Advertisements

70 تعليق

    1. حامضة منك يا جنوبى ،،،
      لاكين برضو مبروكة عليك ،،،

      1. الليلة ما دقست وباريتك في الواتس ههههههههه
        يا نانو انا البرنجية كان ممغوس ببارك فيها متين ما باركت ليك ؟

  1. مبروووكة عليك يا جنوبي , أنا بقيت أحسن منك وهنيتك على البرنجية ما زيك لمن أنا جبتها !!! مش كده ؟؟

    1. خليوهو جنوبي انا حاااااااااااااااااسدك عديل عليها قدر ما صاقرتها ما نلتها

  2. يعني احمد البدوي الكان وزير الزراعه ده زي الزول العكس الكورنر وجرا ضرب الكورة هد وجابا قون !؟ بالله شوفوا اللعبة دي !
    انا ما بفهم في القانون لاكين بالعقل كده , من البداية يا تبقي محكمة يا تحكيم ! لاكين قضية بدأت المحكمة تحكم فيها وصدرت احكام وقبلوها المتهمين ودفعوا دفعات من باب ( التحلل ) ! يقوموا يشيلوا القضية يودوها التحكيم وتبقي قضية بين الحرامية الاتنين والتحكيم يغرّم شركة الشعب مليارات المليارات ؟ يعني الحناخدوا من حرامية الاقطان باليمين يرجعوا يشيلوا مننا نفس الحرامية ديل في مدكوت بالشمال واكتر كمان ! يا فرحتنا بالمحاكم وبالتحكيم ! سمح وكت شركة مدكوت دي دايرة قروش قدر دي من شركة الاقطان ساكتة ليه الزمن ده كووووووله !
    زي ما قال عمي ( النوبه اللي جاي هدِ هافز الهمدو ما يهكُمنا ) ..

    1. هههههههههههههههههههههههه , دا عمك برضو !!
      واهدى للحكومة طقطوقة حسين الصادق (تزيدى زيادة بالبعاد يا غاااادة) …

      1. لكن ما باااالغت عديييل حكايه الكورنر دى….غايتو دى جنس نوع يعمينى منو

  3. مبروووكه البرنجيه يا جنوبي
    ولكن أقول ليك إنشاء الله دائماً جايب البرنجيه وطبعا الما تني ما دخل الجنه

    1. اها آآلعبيد مع (وطبعا الما تني ما دخل الجنه) الربعو وفوقنا اتربعوا ديل داخلين وين؟!

      1. ديل داخلين نار جهنم طبعا

  4. الغريبة كل الحرامية المتورطين في ملف فساد الاقطان المعروفين للاعلام والعامة والغير معروفين رغم ان الجميع يعلمهم الا ان ثقل وزنهم الحزبي والتنظيمي جعل الاقلام والناس تتفاداهم امورهم في اروقة الحزب الحاكم ماشة تمام التمام عضوية علي لجان علي كلو وكانما المال الذي لغفوه من العدو الصهيوني وليس من فقر مال الشعب الفضل بالله ده اسمو كلام اين الاوصاية والولاية علي المال العام اذا ما اشتملت عضوية الحزب علي حرامية يشهادات عليا وكمان جابت ليها (مثابرة ) علي اكل مال الشعب الفضل

    1. الغريبة انه الحرامي الكبير بعرض

  5. يا بروف رفقاً بحالك بالطريقة دي لا الحبوب بتنفع ولا الأبر حتى !! وأنت كدى بتلقي بأيديك إلي التهلكة ، الناس ديل حاقدين وما بخافوا الله ممكن يدبروا ليك مصيبة – لا قدر الله – ويقولوا ( قضاء وقدر ) وتكون رحت ( شمار في مرقة ) !! والله يكون في عون أولادك .. عشان كدي أعمل حسابك شديييييد وزي ما قلت ليك قبل كده وأكرر تاني :

    لقد أسمعت لو ناديت حياً *** ولكن لا حياة لمن تنادي
    وناراً لو نفخت بها أضاءت *** ولكن أنت تنفخ في رماد

    1. سلام اخوي نانو
      ما تخاف على البروف يا اخوي، ديل زمااااااان كانوابختشوا. ( مش بخافوا) عشان كدا يعملوا قي الزول عمايل عشان يغطوا فضائحهم ، اما الآن فالإختشوا مااااتوا!! لا في خجلة لا خوف من زول( و كان ما أخاف الكضب، رب العالمين ذاتو ما خايفنو)و لا بهمهم ! يسرقونا فيييي سرقتم و أنتو تعبانين ساااكت أصلا هم ما هاميهم تقولوا و لا ما تقولوا ، قروشو و في جيبهم. والله في واحدة حكت لي عن واحد من الاتنىن ديل ( اظنو محي الدين) و عن معيشته و كيف هو دبل في مرتو واحدة صغيره قريبتها، و ألب تنزلت في فندق عشان كان بغير ليها في البيت كللللو و بعمل صيانه لحدي السيراميك و البت كانت مت ضائقة. المضحك إنو صديقتي ( الغشيمة ) علقت ليها علي دهبها الكانت لابساه، و قالت ليها تعليقا على انه اجمل من دهب المرة الفاتت( غيرتيه وين؟) استغربت زوجته وقالت ليها( غير تو؟ لا لا ذهبي القديم كلو في الخزنة!)

  6. يا أخوي جنوبي نسيت لمن أنا كنت مسافر وقاعد مستني الطيارة بتاعة (Saudi Late Always) في المطار وبكسر في الزمن ومتابع (ومتوثب) للبوست، وأول ما نزل وثبت فيهو طزاااالي.. وأنت قلت لي ” ما ببارك ليك” !! نسيت ؟؟ البوست موجود في الأرشيف لي هسا لو نسيت ( أرجع ليهو) .. سلااااااام .. يا أخونا ويييين ود العام سااام مختفي كلو كلو أن شاء الله خير !!

    1. ههههههههههه آآآي والله اتذكرت , لاكين ما انت غشيتنا وقت لينا حتغيب شهر وتاني يوم لقيناك مبرنج !

      1. شفت كييييف يا جنوبي !!! وبالمناسبة أنا لمن إتكلمت عن ترحيل (أهلك) الجنوبيين عشان ما أديك فرصة تقول لي أنت ساكن جنب (علي دينار) في الفاشر؟؟ لأني عارف لساانك طويييل !! قلت ليك (وسط الخرطوم) يعني قريب من عفراء لو بتعرفها ؟؟ ههههههه

  7. هسي يعني عابدين محمد علي ومحي الدين عثمان ديل في الشكية بتاعت لجنة التحكيم دي كانوا بيمثلوا الشاكي في شركة مدتكوت باعتبار انهم ملاكها وبيمثلوا المشتكي ضده باعتبارهم المسئولين في شركة الاقطان ؟ يعني المستندات الاعتمدت عليها لجنة التحكيم في ادانة شركة الاقطان مستندات موقعة من الشاكين نفسهم !؟ ولا انا ما فاهم ولا الحاصل شنو ؟

    1. بالمختصر المفيد البروف بيحكي ليك عن حساب ابو الكجك

  8. شفتوا الفوق دا كله كتمت كتمت كتمت كتمت كتمت كتمت مبرووووووووووووووك آآآآآآآآآآآآآآفلادمير على الندوة عقبال الوثبة

  9. واحد مم البلد ديييييييك | رد

    ملعووووووبه و الله…… الجماعه ديل شغلن نضيف… ..قال تحلل ..!!!!”

    1. بعد ما حللونا (حللونا اسأل منها اخونا جنوبي)

  10. احنا يا إخوانا يمكن معمول لينا عمل؟ ليه دا كوووولو يحصل قدامنا و لا في زول بختشي و احنا خيمنا عندنا؟ انا بقترح نشوف بلّه الغائب! ألكترابه أكان هو الشغال ليهم ! غايتو يا بروف شايفاه وحامضة كمان ) عندها بقية، غايتو انا ما حاقراها يا اخواني انا عندي عيال عاوزهً اربّيهم!

    1. احنا يا إخوانا يمكن معمول لينا عمل ما عمل يا نونا (عماااااااااااااااااااااااايل)

  11. يا إخوانا كلو كوم والقاضي و المحامين الحددوا اتعابهم بالمليارات ديل!!!!!!!!! حدّدوا دي ما مشكله ، المشكلة في اتعاااابهم دي! أتعاب شنو يا إخوانا ، هو دا حًُكُم ليكم؟ دا حكم المفروض تخجلوا منه و تدس وهو من الورى عشان ما يطّلع عليه زول!!! خسارة يا كدّاره يا قول بلدينا! قضاه فاسده ، ما فضل لينا شي يا اخواني! ( إكس اليها ، يا قول حبوبه الله يرحمها!) كنت أعوزه ات….. لكن ريفي نشف

    1. اتف ليك انا ؟؟؟
      كخخخخخخخخخخخخخخخخخخخخخ

  12. كتمت كتمت كتمت كتمت

  13. هو (أحمد البدوي محمد صالح) دا فاضى من العرس !!؟
    فالرجل مربع (ذو اربعة زوجات) آخرهن عندما كان وزيرا للزراعة بالولاية الشمالية ,,
    اخخخخخخخخخخخخخخخخخخخخخخخخخخخ

    1. هههههههه اخي شمباتي ما كلهم من ذوات الاربع هع كع كرع

  14. والله ياجماعه فضيحة شركة الاقطان دى غبينتا تكتل عديل لانو إنت شايف بى عينك الجماعه ديل رجعوا جزؤ من القروش النهبوها طوعا وللتحلل . ويجو بكرة يفتحوا بلاغات فى شركه الاقطان ويوكلو محامين ومستشارين عشان يستردو أكثر مما رجعوا وبدون ما يحضروا جلسة واحدة .
    اشاالله لاتنفعن القروش الشالوها ولا تنفعن القروش الرجعوها ولاتنفعن القروش الحايشيلوها .
    الخوايس فيهن…

  15. بالجد وبالصراحه ومن غير زعل …..انا مبسوط منهم ….اشعر بان لديهم عقليات فذه …اى نعم فى النصب واﻻحتيال ولكن برضو اجتهدوا وشغلوا مخهم

    1. انت كمان اجتهد هناك عشان يقصوك (والبقص هناك كان هم اصحاب الفكرة عملوهوا هنا كان بقينا سعودية ) هع كع كرع

  16. المبالغ المأخوذة من البنوك “قروض”
    بنك دبي الإسلامي 30 مليون دولار
    البنك الإسلامي للتنمية بجدة 55 مليون دولار
    بنك (A.B.C) الفرنسي 120 مليون يورو (يعني 165.5 مليون دولار)
    المجموع يساوي اكثر من 250 مليون دولار
    يعني دي مبالغ استخدمت لإستيراد حاجات من شاكلت الخيش الفايدة 10 مليون دولار منو = اكثر من 6 مليون دولار (فرق سعر من غير الفائدة الربحية)
    يعني لو الحساب بطريقة الكوار دي تكون فروقات ال250 مليون دولار كم؟
    وفائدتها كم؟
    والمبالغ المستردة (30 مليار سوداني = 3مليون دولار) + 33 مليون دولار (23.9 مليون يورو) = 36 مليون دولار
    اترك لكم باقي التصورات لأني ما قادر اجمع

  17. غايتو قانص ليها من اصبحت لاكين صبرنا كمل والبشيلا مبروك عليهو

    1. آآآآآآآآآآآآآآآجنوبي انا جنس محاحاه غايتو كان ليك مبروكه عليك وكان لي مبروكه علي لكن التانين لا عشان ما قاعدين يدودروا فيها زينا ههههههه

  18. ” كشف لبرلمان حزب البشير تفاصيل قضية الأقطان
    04-22-2014 10:37 AM
    كشف وزير العدل محمد بشارة دوسة عن تفاصيل جديدة أمام البرلمان في قضية شركة الأقطان وشركة مدكوت المتهم فيها الأول: عابدين محمدعلي و المتهم الثاني: محي الدين عثمان وآخرون، حول سير إجراءات التحري وكل تفاصيل التحكيم والمخالفات التي تمت بها ، واتهم جهات –لم يسمها- بممارسة ضغوط مختلفة أثناء سير التحري وحتى الآن على الوزارة وعليه لتسوية القضية ولسحب الملف من المحكمة ،وتفضيل خيار التحكيم على المحاكمة الجنائية، “

    1. أنت يا جنوبي أخوي هووووووي أعمل حسااابك كماااان !! ما تفتكر إنك متخفي تحت مسمى (جنوبي) ما بعرفوك !! صدقني ديل عارفين البير وغطاها وكل شئ .. وما بتغبى عليهم حاجة لأنو عندهم جهاز (أمن) أقوى من الــFBI صارفين عليهو صرف بذخي .. فخلي بالك لي نفسك أنت والبروف ( ما يلحسوكم ) علي عيالكم !!! ألا هل بلغت الله فأشهد .. سلاااام ..

      1. ﻣﺪ ﺍﻳﺪﻙ
        ﻭﺷﻴﻞ ﺳﻼﺣﻚ ..
        ﻻﻙ ﺇﺿﻴﻨﺔ
        ﻭﻻﻛﺎ ﺧﺎﻳﺐ ..
        ﻻﻛﺎ ﺯﻭﻝ ﺗﺮﻛﺔ ﻣﺰﻟﺔ
        ﻻ ﺑﻔﻮﺗﻮﻙ ﻓﻰ ﺍﻟﻀﻜﺎﺭﺓ ..
        ﺍﻧﺖ ﺷﺎﻳﻒ
        ﻏﻄّﺖ ﺍﻷﺣﺰﺍﻥ ﺭﺑﻮﻋﻨﺎ ..
        ﻭﺷﺘّﺖ ﺍﻟﻄﻐﻴﺎﻥ ﺟﻤﻮﻋﻨﺎ ..
        ﻣﺎﻓﻰ ﻏﻴﺮ
        ﺗﺤﻤﻞ ﺳﻼﺣﻚ ..
        ﺗﺤﻤﻰ ﺳﺎﺣﻚ ..
        ﻭﺗﺸﻔﻰ ﺑﻰ
        ﺿﺮﺍﻋﻚ ﺟﺮﺍﺣﻚ ..
        ﻫﻢ ﺃﺭﺍﺯﻝ .. ﺩﻳﻞ ﺃﺭﺍﺯﻝ ..
        ﺧﺎﻧﻮ ﻛﻞ ﺃﻋﺮﺍﻑ ﺑﻼﺩﻙ ..
        ﺟﻬﺰﻭ ﺳﻼﺣﻬﻢ ﻓﻰ ﻏﻔﻠﺔ
        ﺇﺳﺘﺒﺎﺣﻮﻙ ﻓﻰ ﻛﺮﺍﻣﺘﻚ ..
        ﻓﻰ ﺃﺻﻮﻟﻚ ..
        ﻗﻢ ﺗﻘﺪﻡ ..
        ﺃﺻﺤﻰ
        ﻣﻦ ﻭﻫﺪﺓ ﺯﻫﻮﻟﻚ ..
        ﺷﻖ ﻃﺮﻳﻘﻚ ..
        ﻟﻰ ﺭﻓﺎﻕ ﺍﻟﻮﺟﻌﺔ
        ﻣﻨﺘﻈﺮﻳﻦ ﻭﺻﻮﻟﻚ ..
        ﻓﻰ ﺻﻔﻮﻓﻬﻢ
        ﺧﺎﻧﺔ ﻓﺎﺿﻴﺔ ..
        ﺇﻧﺖ ﺳﻴﺪﻩ
        ﻭﻃﻮﻟﻪ ﻃﻮﻟﻚ ..
        ﺑﻨﺪﻗﻴﺘﻚ
        ﺭﺍﺟﻴﺔ ﺟﻴﺘﻚ
        ﺗﺤﻤﻰ ﻗﻮﻟﻚ ..
        ﺷﻴﻞ ﺳﻼﺣﻚ
        ﻗﺒﻞ ﻣﺎ ﺳﻼﺣﻬﻢ
        ﻳﻄـــــــــــــﻭﻟﻚ ..
        ..
        انا لو داير اتخفي كنت دخلت باسمي الحقيقي يا نانو ! واولادي كفاهم ام واحدة في البيت !!
        مش عندكم في الدين بتقولوا افضل الجهاد كلمة حق عند سلطان جائر ؟

      2. صحيح ، ولكن لو كنت داير تجاهد بكلمة حق أمام سلطان جائر كما قلت !! كان تعمل زي الوقف قدام البشير يوم الجمعة وقال له ما قال أمام كل المصلين وأكيد أتلحس طوااالي بعد الصلاة !!

      3. نانو ابو احمد لك التحية لنصائحك المتوالية للبروف وجنوبي ولكن الناس ديل لازم من دم عشان يفكوا عننا لانه باللتي هي احسن ما راح يرحلوا فخليهم يعروا ويعروا ويعروا لحد ما الكتمة دي تحرك ساكن في (محمد احمد ) الاصبح غلبان وحيران ومقهور عله يخرج الشارع او عله يقعد عديييييييييييييييل في البيت كل (محمد احمد) لا شغل ولا مشغلة ولا مواصلات ولا دفع ولا ولا ولا لمدة ايام معدودة واصلا الناس صابرة بس التصبر في بيوتا كم يوم كم يوم كم يوم ونشوف البحصل

      4. احييك يا جنوبى الحبيب ,,,
        وكدة تكون متضامن معاى ضد دعوى الحبيب / حميد رحمه الله (ارضا سلاح) ,,
        وانا بقول : عمودااااااااااااااااااااى سلاح

      5. امبارح لما وزير العدل حاول يطرح المشكلة علي البرلمان , أول نائب طار ليهو في حلقو كان النائب هجو قسم السيد واعترض علي طرح المشكلة داخل البرلمان , وقال المشكلة دي ما بتخص البرلمان ! ( البرلمان البيمثلنا كووولنا ده ! ) !! هجو قسم السيد ده مش ياهو الكان مدير عام البنك الزراعي ؟ وهل لما حصلت مشكلة تحويل الاعتماد لصالح شركة مدكوت كان في عهده ؟ ولآ مالو الكلام حرقو !! هو الواقي الذكري طرحتوا جوه البرلمان ولا عشان ده ما تحت الصُرة ؟ خلاص ياخي اعتبره لباس داخلي من القطن !!

      6. ههههههههههههههههههههه ,, يااااااااهو ,,
        وكمان كان والى فى غرب السودان ,,
        ولبااااااااع وما بخاف الله …..

    2. كشف البرلمان هههه جنس كشف ههههه هاك الدستور دا ههههه دستوووووووووووووور يا اولاد ماما

  19. يا ناس كتمت كتمت كتمت

  20. يا د. شمباتي رسلت ليك الفضائح المسكوها الليلة في الواتس بتاعك شوفا !! ديل أكل الناس زاااتو لحقوهو حسبي اله عليهم ..

    1. اخي نانو ابو احمد لك التحية وعاوزين نعرف د شمباتي دا دكتور شنو ويعني كدي انا قديم معاكم في البرنجية ومحتاج لطبيب باطني لاستشارات بخصوص ضغط الدم من الحاصل والمتحصل ومن الفيهو انا هنا كمان ودا كلام جادي هنا ما فيش دكاترة هههه على قول حبوبة اطباء ما فيش وداير اكون العاقل طبيب نفسه فهلا نجدتوني باي واحد طبيب من قمردينتنا المباركة بس ما يقول لي اشرب كركدي ومنقوع دوم لك التحية تقبل المرور

    2. فضائح عندى فى الواتس حقى !!؟
      سجمممممنا يا نانو ….

      1. واتسابك ده شيتا يقرولوا دعاء دخول الخلاء ..
        شمباتي رسلو لي عليك النبي ..

      2. ههههههههههههههههههه,,, ابيييييييييييييييييت ,,
        انت ما براااااك ملاوز !
        وكمان عاوز !!؟
        وى وى وى

      3. فضائح عندى فى الواتس حقى !!؟ سجممممنا يا نانو …. يا دكتور الله يسامحك الفضائح بتاعة الجماعة مش بتاعتك أنت !!!

        أخوي (الغلبان) الله لا غلبك، وكتر خيرك على المرور .. أخونا د. شمباتي بسمع في كلامك وإن شاء الله هو حايرد ليك !!!

  21. راجين البرنجي وقاعدين في الكتمة في اللحظة دي صوت 14 ملمتر شغال اها كيف

  22. ” الخرطوم: الجريدة
    تبرأت الهيئة النقابية للعاملين بالمواصفات والمقاييس من التهم التي وجهها المراجع العام للهيئة والمتعلقة بالاعتداء على المال العام واتهمت في الوقت ذاته من أسمتهم حاشية المديرالعام الوافدين إلى الهيئة بالتصرف في المبالغ الواردة في بلاغين الأول بمبلغ (6,015,000) دولار، (ستة مليون وخمسة عشر ألف دولار)، والثاني بمبلغ (1,700,000) دولار (مليون وسبمعائة ألف) دولار بجانب مبلغ (3,350) يورو، ثلاثة ألف وثلاثمائة وخمسين يورو، وناشد بيان صادر عن الهيئة رئيس الجمهورية ورئيس المجلس الوطني بضرورة التدخل ووقف الفساد بهيئة المواصفات حسب البيان وأكد البيان صحة ما أورده تقرير المراجع العام من اعتداء ومخالفات وقال إن الأموال ما زالت تنهب من المجموعة الوافدة مع المدير العام الذي تتمتع بحمايته عبر واجهات الشراء والتعاقد والترحيلات والصيانة. وطالب البيان بضرورة السير في التحقيقات لاسترداد ملايين الدولارات المنهوبة من أموال الشعب وشدد على ضرورة محاكمة المتهمين الذين ما يزالون يتمتعون بالرحلات والسفريات الخارجية.

    الجريدة ”
    بالله ديل ناس إتربوا معانا جوه السودان ولعبوا مع الشفع في الشوارع وناموا واكلوا في بيوت الجيران ؟ ياخي الوسخ ديل جوا من وين ؟ المؤتمر الوطني ده اظنه ما بيستأجر الا الخائن اللئيم !!

    1. كلام الرئيس والا كلام جرايد؟؟؟!!!

  23. علي خلفية اغلاق 3 مستشفيات صينية بالخرطوم ( شغالين كيري سااااكت ) حبة اخصائي يخربم ما عندهم ويمكن اعلي واحد فيهم باش ممرض ..
    قالوا سودانية اتزوجت صيني ولدت جنا اخد اسبوع ومات , البت بقت تبكي جناها , حبوبتا قالت ليها يا بتي انا من اوووول قت ليكي الحاجات الصينية دي مااااا بتعيش !!
    لاكين صراحتن قالوا لقوا في المستشفيات دي عرقي نضيف خلاص ! طيب كان يغيروا ليهم الترخيص ! أحححححح

    1. انت الشي شنو آآآآآآآآآآآآآجنوبي جماعة شرق اسيا ديل كلهم عرقيهم نظيييييييييف خلاص وبدل التصريح ما يفكوا اللعب والنقولك دي عاد لانه الكلام جاب الكلام في مرة كدت ان اخذ علقت جنوب سوق خضار بحري محل بيبيعوا (القزاز) الفاضي احصل ليك كمية من مشروب (كحول كدي) (رد ليبل) كزززززززززززاز كثير العبد لله صار يرفع القزازة ويقول هي لله والقزازة البعدها هي لله والبعدها اها انشبك فيني واحد وطالب بالتفسير ههههههه وكانت عركه ربنا يفكنا منهم السؤال المازال يحير القزاز دا جا من وين جديييييييييييييد وبي ريحته وكمان فيه شوية شوية تحت هههههه

      1. جا من وين ؟
        راجع : وكمان سكران , تعرفو جا من وين !!

  24. الله يستر البروف ماله لا يكون كلام نانا فيهو حصل

    1. ههههههههههه
      سيناريو وحامضة كمان 2-2 كان جااااااااهز إلا حركة وزير العدل في البرلمان دي جهجة البروف واظنها خربت الرصة الا يعيد من جدييييد بعد جقلبة هجو وورجقة سبدرات دي !!

      1. آآآآآآآآآآجنوبي التجهيزات دي كلها للفكيك كل واحد مجهز شنطته قال حريات قال الشغلانة ضاقت عليهم وما اظن ماليزيا يستمتعوا بالودوهو ليها لان الشغلانة عالمية ما عندهم شقيش يقبلوا والتسوي كريت في القرض تلقها في جلدها

    2. أنت يا أخوي الغلبان شكلك متلخبت فينا !!! نانا دي واحدة بت نشيطة في القمردينة، وأنا من أول يوم قلتا ليها يا يتغيري إسمك يا أغير أنا إسمي عشان الناس ما تتلخبت فينا !! وهسع حصل الكنتا متوقعو !! فأنا نانو ( راااجل بي شنبات ) فخلي بالك ، وأنا القلت الكلام للبروف بخصوص 1 و 2 الما ظهرت لي هسع وأنا خاااائف على البروف يكون أدوهو خبطه جاااامدة بس الحمد لله مل إتلحس !!!!

      1. اخوي انا من هنا وماشي بقولك اب احمد

  25. رحمة الله عليه قال :
    أموت في سريري
    زوجتي بنتاي
    جيرتي عشيرتي
    وأصدقائي
    قطتي راكوبتي وزيري
    معززا مكرما مهندما
    بناصع البياض
    موكب يحفني لمرقد أخير
    أموت لا أخاف
    كيفما يشاء لي مصيري
    أموت لا أخاف
    قدر ما أخاف
    أن يموت لحظةً ضميري
    وهم بيقولوا شنو؟؟!!!

    1. ابداااااع يا انت !!
      تسمح بالنقل والهناى ؟

      1. ليس انا من يسمح بالنقل ولكن صاحبها ميتا وحي لا يمانع في النقل لانه كان عاوز وطن حدادي مدادي ما بنبنيهو في الرادي ولا الخطب الحماسية لك التحية اخ شمباتي

  26. ” الخرطوم: فوزية محمد
    اتهمت هيئة الدفاع في قضية شركة السودان للأقطان، وزير العدل محمد بشارة دوسة، بتضليل العدالة لكشفه عن تفاصيل قضية الأقطان أمام البرلمان، واصفة ما قام به الوزير بالجريمة مكتملة الأركان، وطالبت الهيئة المحكمة باتخاذ إجراءات قانونية ضد وزير العدل ومحاكمته بالسجن والغرامة، لإشانته سمعة المتهمين لوصفهم بالمجرمين والمفسدين في الأرض”
    انتهي

    يلا تعالوا نشوف دوسة الليلة قال شنو :

    ” نفى وزير العدل محمد بشارة دوسة أن تكون وزارته قد تعرضت لضغوط من جهات سياسية عليا لرفض الوزارة قرار هيئة التحكيم في قضية الأقطان وأشار إلى أن ذات الجهات السيادية العليا كانت حريصة على السؤال والإستفسار حول مجريات الأمر في القضية وأن ما عناه هو تعرض وزارته لعراقيل من الطرف الآخر من القضية ، وقال أن وزارته لم تصدر قراراً ببطلان قرار هيئة التحكيم مشدداً على أن وزارة العدل طرف في القضية ، مضيفاً اننا دولة قانونية وتحتكم أمام القضاء ، ولا نقول أن وزارة العدل أصدرت قراراً ببطلان هذا القرار. موضحاً أن المحكمة العامة هي الجهة الوحيدة التي تملك حق إبطال القرار، ورهن دوسة موافقة الوزارة على مبدأالتحكيم في حال تم تشكيل هيئة التحكيم على النحو القانوني السليم وقبول كل الأطراف وحينها ستقبل بذلك لأن القرار سيكون قضائياً ملزماً لجميع الأطراف، وبالأمس فقط كان رأي السيد وزير العدل أن التحكيم باطل لشبهة أهلية عضو التحكيم عن مدكوت الأستاذ عبد الباسط سبدرات. وباطل لأن (حسب دوسة) التحكيم لا يجوز في القضايا الجنائية ويختص بالنزاعات المدنية ”
    انتهي


    واخيرا نقول : ألمي حار ماااا لعب قعوي .. بس يا دوسة البقلع البطان مااا بمرق من اول سوط !

  27. تحكيم !!؟؟ والله نفسى اقول كلام بذئ !
    وكلام دوسة منطقى جدا جدا وقانونى عن صفة التحكيم هنا ,,,
    والتحكيم باااااااااااااااااااااطل

    1. التحكيم باطل مالو ما متوضي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: