أخصائيون عاطلون

عزيزى القارئ … قديماً قال الشاعر العربى : (والليالي من الزمان حبالى مثقلات يلدن كل عجيب)! وإذا كان الشاعر يعتقد بأن (الليالى) فى زمانه ذاك يلدن (العجائب) فهو بلا شك )ما شاف عجائبنا ) .. هذه (العجيبة) من (تمثيل) وزارة الصحة الإتحادية و(إخراج) مجلس التخصصات الطبية ..

قامت وزارة الصحة الإتحادية في شهر أبريل ٢٠٠٨ بالإعلان عن وجود وظائف نواب أخصائيين وقامت بإبرام عقد مع المتقدمين يتص على الآتي :
– إبتعاث المتدرب لمجلس التخصصات لفتره ٤سنوات
– تلتزم الزارة بدفع مبلغ ١٢٠٠٠ (أطناشر مليون جنيه بالقديم) لمجلس التخصصات عن كل متدرب كرسوم تدريب .
– تقوم الوزارة بدفع مرتب شهري للطبيب مقابل عمله في المستشفيات أثناء فتره التدريب
– تلتزم الوزارة بإستيعاب الطبيب بعد نهاية فترة التدريب بإستيعابه في وظيفة أخصائي بعد سنوات التخصص الأربعه ونجاح الطبيب في الامتحان النهائي .

الكلام الفوق ده كلام واضح ومكتوب في عقد بين الوزارة كطرف أول والطبيب كطرف ثان ، يلا نشوف الحصل :
بعد إنتهاء الأطباء من فترة التدريب ونجاحهم في الإمتحان النهائي تفاجأوا بأن الوزارة لم توفر لهم وظائف كاخصائيين وقامت في ذات الوقت بإيقاف رواتبهم ، تخيل معي أيها القارئ الكريم أن وزارة الصحة الإتحادية لا توجد بها وظائف أخصائيين في فروع الطب المختلفة (يعني شبعانه ومكتفيه) .

فجأة أصبح هؤلاء الأطباء الأخصائيين (عطالي) في هذه الظروف الحياتيه الصعبة وفيهم من يعول أسرة أطفال ومدارس وإيجار وأكل وشراب وجمرة وموية ونفايات وهلم جراً ، أي شخص في مكان هؤلاء الدكاترة الأخصائيين سوف يفكر في شئ واحد للخروج من هذه المحنه ، وهو أن (يغترب) ويترك هذه البلاد الظالم أهلها ، وعشان الواحد فيهم يغترب لازم تكون معاهو شهاده من (مجلس التخصصات الطبية) تثبت إنو (أخصائي) وعشان المجلس يستخرج الشهادة لازم (إذن) من الوزارة وعشان الطبيب ياخد الإذن لازم يعمل (خلو طرف من الوزارة) .
ذهب الدكاترة الاخصائيين للوزارة لإستخراج خلو الطرف فطالبتهم الوزارة بدفع مبلغ (12) أطناشر مليون جنيه (بالقديم) سرعان ما زادتها إلى (24) أربعه وعشرين مليون سرعان ما زادتها إلى (36) ستة وثلاثين مليون حتى رست أخيراً على (60) ستين مليون (الجماعة شغالين مع الدولار) !
ومع أن الوزارة في العقد قد إلتزمت بدفغ مبلغ أطناشر مليون للمجلس إلا انها طالبت الطبيب بعد دفعه للستين مليون (مقابل منحه خلو الطرف) أن يقوم بدفع الأطناشر مليون للمجلس ليكون مجموع ما يدفعه الطبيب للحصول على شهادته هو (72) إثنان وسبعون مليون جنيه علماً بأن هذه الشهادة هي المستند الوحيد عالميا الذي يثبت انك أخصائي وتستطيع أن تعمل بها في بلاد الله التي تحترم انسانها.

في شهر فبراير ٢٠١٤ اعلن مجلس التخصصات ممثلا في أمينه العام للأطباء انه نسبه لان الوزاره لم تلتزم بدفع رسوم التدريب لمبتعثيها لعدد من السنين فإن من يقوم بدفع ال (إطناشر مليون جنيه) من الأطباء للمجلس فإن المجلس يلتزم باستخراج الشهاده له علما بانه لايوجد عقد بين الأطباء والمجلس ( لكن سيد الرايحه يفتش خشم البقرة) .
لم يصدق الأطباء النبأ فطفق كل واحد فيهم (يجمع في القروش) الدخل صندوق وشال الصرفه الأولي ، الباع دهب عرسو، الأهلو عملو ليهو كشف وتدافع الأطباء وعددهم حوالى 250 طبيب وقاموا بدفع (الأطناشر مليون) للمجلس أملاً في إستلام شهاداتهم أنفكاكاً من هذا (الرق) وهذه (العبودية) ولكن أملهم قد خاب بعد أن بدأت المماطلة مره (تغيير أختام) ومره (التوقيعات) ومره ورق الشهادات في مطبعة (سك العمله) وبعد مشاوير ومساسقه و(تكاسي) و(أمجادات) وأيام وليالي كانت الفاجعة وكان رد المجلس (الكارثي) :
– والله ياجماعه الإجراء ده أتوقف من جهات عليا وأخد مجري سياسي ومافي شهادات !
– وهتف الأطباء بصوت واحد (طيب رجعوا لينا قروشنا الدفعناها) !
– قروشكم دي اعتبروها بدل الإفادة وتسجيل المجلس الطبي العملناهم قبل سنه وقروشها في بطنهم أو اشتكوا لو ما عاجبكم .. ومعناتا بالعربي كده (أعلى ما في خيلكم أركبوهو)

الوضع النهائي:
– لاتوجد مع هؤلاء الأطباء شهاده تثبت أنهم أخصائيين لان الوزاره أوقفت خلو الطرف (الظاهر عاوزين يختو ليهم تسعيره جديده)
– لاتوجد وظائف أخصائيين لمن يريد أن ينفذ عقد الوزاره
– قروش الدكاترة ديل الدفعوها لمجلس التخصصات راحت (شمار في مرقه) !!

هل تتدخل شخصيات (نافذه) للضغط على مسؤولي (المجلس) لمنح هؤلاء الأطباء (شهاداتهم) حتي يستطيعوا الأكل من خشاش الأرض وللا الضغط ده بس على (وزير العدل) !!

– كسرة:
لو لقيت ليك زول واقف في صينية وبيكلم في نفسو .. ما تفتكرو زول ساي .. ممكن يكون أخصائي ) أمراض عصبية) !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

40 تعليق

    1. مبروك البرنجية

      1. الله يبارك فيك يا جنوبى،،،،
        الظاهر الخطة نجحت معاك و شغالة كويس !!!!

    2. لقيت اهلاها مافي مبروك فلادمير

      1. و برضو الله يبارك فيك يا الغلبان ،، و يوعدك بيها فى (مغسة) جديدة !!!

    3. يا خوي انت شكلك رابطها مع الموبايل تركنا البرنجي وما بشرب برنجي برنجي شراب عجائز ههههههه المهم اخي في الحاصل والمتحصل وهات يا زمن ……

    4. مبروكة يا حبيب وبس الموضوع بتاع اليوم دبرسني حتي النخاع وعشان كده نسيت اخمس معاك او اجازفها زييك لانو الكلام دخل الحوش وااه عليك يا طبيب السودان

      1. اخي العبيد بعد التحية وطالما انت طبيب والكلام دخل الحوش ما عاوزين لينا استشارة طبية وكدي والا ما بنفع بالقمردينة

  1. مشتركة
    وحليل الاخصائيين في بلدي

  2. ((دخلت النار امرأة في هرة ربطتها فلم تطعمها ولم تدعها تأكل من خَشاش الأرض))،
    المرأة هنا تقابلها وزارة الصحة والهرة هي هؤلاء الاطباء المغلوبين علي امرهم ! لا وزارة الصحة شغلتهم وادتهم رواتب يعيشوا بيها اهاليهم ولااا كمان ادتهم شهاداتهم عشان يشوفوا رزقهم في بلاد الله الواسعة !! حسبي الله عليهم !!
    ابو قردة ده , ما كان ( ثائر ) مالو بقي ( مساير ) !!؟

    1. حلوه حكاية مساير دى

    2. مش بقى مساير بس اظنوا عمل ليهو مساير هههه تقبل المرور

    3. لاحولا ولاقوة الا بالله

      1. قصتنا مع المساير والا المشاط

  3. حسبي الله ونعم الوكيل فيكم يا سجم .. الله يغطس حجركم زي ما غطستو حجرنا

  4. مبروكة عليك البرنجية يا ود بوتن تستاهلها، وعجبني ليك يا جنوبي قاعد متربص من الصباح وختفوها منك هههههههه !!! يا أخوانا لو في واحد عارف أخبار ود العم ساااام يقول لينا أصلو مختفي طووووول .. ويا بروف وين 2-2 ؟؟ سلاااام ..

    1. عجبك لي جنوبي خليهو وتبركتك لي فلادمير قبلناها بس الغلبان لا بواكي له ما كلنا كنا بنحاحي

    2. ههههههه انا برنجية واحدة بتمسكني كم شهر والحمد لله . ما ملاحظ يا نانو الايام دي البرنجية وعبيد زي الطريفي وجملو !!
      نونا بتك وينا الليلة غريبة ما ظهرت مع انو الموضوع عنده علاقة بي ( خائن حميضة ) !
      امريكي وبت السودان وام ايمن وطارق اب احمد وركس وكتلوني والمندهش وناس كتاااار اختفوا ! لاكين الواجعني اكتر بت وراق !

      1. والله وجعت بت وراق بتوجع كفاية وقفتها مع البروف في ارنيك 15 ايرادات برضو تقول لي اخوات نسيبه

      2. ما تجيب لي سيرتو يا جنوبي ( جتتي بتتلبّش) بالرغم من إنو الشأن فيدرالي، الا انه برضو حامض زي حميضة (بحمض في نار جهنم) . لكن يا بروف زي ما قال شمباتي الجماعة ديل ( قصدي الأطباء) زمان كانوا قوى لا يستهان بها و يعملوا ليهم حساب ، زماااان زمن ناس د. الجزولي دفع الله! حسي مالهم بقوا هوينين؟! لكن ما ديل الجماعه ديل في كل كلمة عندهم نقطة، يعني بكون عندهم جماعات جوة الجماعات شغالين عكس! إنشاء الله يدقوا في العراضة. حرام عليهم ، للموضوع ما فروش بس، او كان عندهم المبلغ دا كان احسن يتخصصوا برا. الكلام السنين و إمتحانات التخصص ما هينة و الواحد بعيدا كم مرة عشان ينجح و عينو على إنو يبقى أخصائي، حسبنا الله هو نعم الوكيل في اللي كان السبب( و في حميضة كمان ، أكان كان السبب و لا ما كان!)

    3. يباركو ليك السمح اخوى نانو ،، و حتى جنوبى جازفناها منو و لكن الروح الرياضية عندو عالية ما شاءالله عليو ،،، بس الليلة بكون اكتشف الخطة ،، لازم نغيرها بكرة من أربعة اتنين اتنين الى حاجة تانية …

  5. كدى يا اخوان نفترض افتراضا انو الجماعه ديل قبضناهم ودخلناهم السجن وعاوزين نحاسبهم اها نبدأ حسابهم من وين ومحاكمتهم على جرايمهم بس القاﻻ لينا البروف فى مدوانته دى حتاخد كم ….طبعا هى كوولها تودى المشنقه …هل نكتفى بجريمه واحده وحكم سريع ام ننتظر حكم كل الجرائم؟ غايتو كان منتظرين حكم كل الجرائم ….القيامه تقوم..الله يخارجنا

    1. يا خوي لو ربنا سهل والامور انعدلت ناخذ القمردينة دي وكل واحد ننفذ فيهو حكم قرقوش

  6. الاخصائيين ديل و معاهم واوات الاستاذ عليهم بالانتظار حتى ينفك دوسة من الدوسه الواقعه عليه أم الشعب داك جاب الزيت من كترة الدوس عليه

  7. والله انا لو محل الاطباء ديل ما اركب اعلى خيلى ,, اركب كل المسئولين فى الوزارة من طرف ,,,
    للاسف جبن وخنوع الاطباء هو اللى مخلى الحكومة تستأسد وتقدل ,,, لكن لو اضربوا اضراب عاااام ومفتوح ما بحصل دا كلو ,,
    والبعجنوهو بياكلوهو ,,
    انحنا فى زمننا (2008) عرفنا الفولة والفيهم ومرقنا خلينا التخصص واى شئ وقفينا على آثار من اغترب مبكرا ,,
    الا لعن الله الظلم واعوانه ومن يدافعون عنهم ..

    1. بالله شوف ولو شفت ليبيا هنا يا شمباتي والحاصل والمتحصل يصيبك العجب كم من انسان له مؤهل جيد وشغال في ورشة اشي طبيب واشي مهندس واشي ايه ما تعرف ويا ريتهم لو من جيل الانقاذ ناس ملء هدومهم شفت ودو الناس وين اه يا بلد

    2. لكن المشكله والقصه الكبيرة والسؤال البفرض نفسو …الناس ساكتا مالا؟؟ اصلو وبعدين البسكت ده اكان خوف مشكله كبيرة لانو نفسيتو بتكون شديدة التعقييد ومن هنا يجي الاغتصاب والانقياد وراء مبادئ مختلفه اوتغيير الجلد تماما او كما يقال في مسلسلات الاجانب swich off the huminity putton اكان الانسانيه عندها مفتاح كهرباء تفتحو متى مادرت وتقفلو متى مادرت اكان ارتحنا من شئ اسمو الضمير

  8. وجعى على عمرى و ضياع سنينى و اربى و اعلم فى الطب و فى الاخر قاعدين فى البيت الله المستعان و عليه التكلان و لا حول و لا قوة الا بالله ربنا يحطم الحطم امالنا .

    1. يا دودي انت كان ضيعت سنينك في الطب جرب الطب بالمراسلة في عمك الغلبان

  9. رحم الله محجوب شريف اخر ما غني واخر ما كتب من داخل المستشفى
    أمدرمان صفِّــقوا وغــنُّوا
    دقوا الترمبيتة
    حبَّـتني حبَّــيتا .. ربّــتني ربّـــيتا
    ما بطيق النوم بَــرَّه من بيتا
    إلا في منفاي صورة خـتــيتا
    إن شاء الله ما يحصل
    ينقطِـع خيتا
    حلــيـبها .. شاييها .. كسِــرتا وزيتا
    بيــنـَّا نِدِّية همَّــنا السُترة
    ما استفزتني .. ما استفزيتا
    كم تشاجرنا
    مين سمع صوتنا؟
    ولا غَلَط مَـــرّه .. إيدي مديتا
    زعلتَ رضَّــتني
    برضو رضّـــيتا
    نُـمتَ غـتـتني
    قمتَ غَــتــيتا
    كبرنا تاتتني
    ياما تاتيتا
    والبنات كِــبرَنْ
    أصبحن نِــسوة
    جابن الكِـــسوة
    نوَّرن بيتنا
    الدهب زينا بينا ما بسوى
    سمعه بس سمعة
    في ضحى الجمعة
    ورَّقَــن خُدرة
    فـَرَّن الكِـــسرة
    فَــرَّحَـن ضيفنا
    شاهي بالله ولا صينية
    تفتح النية
    هي ماهية ولا تدبيرا .. وسَّــع القـدرة ؟
    دنيا .. يا دنيا
    ألف شكراً ليك
    هي لاقتني
    وإني لاقيتا

    حبتني .. حبيتا
    ربتني .. ربيتا

  10. انا طالب في الهند لو لاحطت يادكتور تلقي الناس الفتحو المدونه في الهند 565 شخص مع انو عدد الطلاب السودانين اكثر من 10 الف طالب ده عادي لحدي هنا تعال شوف الناس الزارو المدونه في اسرايئل تلقي العدد 400 وزياده ف السوال كم عدد السودانين في اسرايئل ومن الذي اوصلهم لهذا علما انو السودانين يكرهون اسرايئل اكثر من الفلسطينين ودي برضو دايره تعليق دايرين دراسه للموضوعين ديل

  11. قال الشيخ ( زعل ود كتكوت ) : كان فقه السترة ما نجاك .. التحلّل بنجيك .
    شنو حكاية التحلل المرقوا لينا بيها المعفنين ديل ! كل ما يمسكوا زول ناهب دين ام البلد , يعملوا ليهو محكمة ويقولوا لينا قِبل التحلل ودفع القروش !! لا ومن المحكمة يمشي بيتو طوالي ! ده ياتو دين الدايرين يطلعوا بيهو دينا ده !
    الليلة قالوا عصابة مكتب الخضر دفعوا 17 مليون واتفكفكوا مشوا بيوتهم , والقاضي وقف في نهاية الجلسة وصفّق للصحفين وقال ليهم : هييييييييي خلاص خلصنا ما دايرين لمه . ويبقي لي زي الشال ورقه باليمين ورفع طرف عراقيهو تحت اباطو الشمال ومشي !

    1. مشى وين !!؟
      ما يجينا بى جاى ؟؟

      1. انت شفت مدير شركة الاقطان قال لوزير العدل شنو !؟
        قال ليهو انت الدخلك بينا وبين مدكوت شنو ؟ انت مالك ومالنا ! نحنا قبلانيييييييين بحكم لجنة التحكيم وبندفع ليهم القروش وبندفع وبندفع ( وبسط كفه الايسر ووضع كف اليمني مقفولة وادارها باتجاه عقارب الساعة ) .. وكييييييييية للعازل اها اها
        .. ناس واطية !!!

    2. ويبقي لي زي الشال ورقه باليمين ورفع طرف عراقيهو تحت اباطو الشمال ومشي!
      دي يالجنوبي أخوي معناها تصوير بلاغي لعضة النعجه ولا صادفت ساكت؟!
      تسلم على زرع البسمة في زمن الكوليرا.

  12. ” التحلل من الثراء الحرام و المشبوه

    13-(1) يجوز لكل شخص أثرى ثراءً حراماً أو مشبوهاً أو ساعد في الحصول عليه أن يحلل نفسه هو أو زوجه أو أولاده القصر في أي مرحلة قبل توجيه الاتهام إليه.

    (2) لأغراض البند (1) يتم التحلل برد المال موضوع الثراء الحرام أو المشبوه و بيان الكيفية التي تم بها الإثراء.”

    دي المادة 13 من قانون مكافحة الثراء الحرام السوقا واري اليومين ديل , وكل فاسد قاعدين يمرقوهوا بالمادة دي ! طيب مش في فرق بين انو زول يجي بكامل ارادته وبدون ما زول يكتشف سرقته ويقول للمحكمة انا سرقت كده وداير اتحلل من السرقة وبين زول تاني يكتشفوا سرقته وينكر ويتبجح في البداية ويقوم بعد يتعصر يقول آي والله انا شلت كده وهسي داير اتحلل ؟

    1. هي المادة دي زااااتا ما كانت في في القانون ودخلوها المعفنين ديل شهر 7 سنة 89م يعني بعد مسكوا الحكم بي شهر واااحد بس ! شفتوا نظرتم بعيدة كيف ؟

      1. والله يا جنوبي رجعت للقمردينه لأنب عرفتك متكون معلّق على الموضوع دا، و الله انا من ما قريت ولا مؤاخذة باطرش!!! طيب يا خوانا الحرامية البنطوا بالحيط ديل ليه بحاكموهم؟ و لو انا سارقني و عفيت عن الحرامي في حق ام روحي دا مش برضو بحاكموا للحق العام؟ فما بالك و السرقة للمال حقنا كوووووولنا!! و الله ندمونا ألما سرقنا معاهم ، ترانا كان ما اتكشفنا نتنغنغ و كان كشفنا نديمه حقهم ( راس المال بس) و نبقي مارقين !!! و كمان و لا يجيبوا اسامينا!!! و لا يا ربي فقه لأسرته دا ليهم بس؟؟؟ غايتو السنه دي ، الفات كللللو كوم و السووهو ناس وزاره العدل العرعر ديل كوم! و الله خسارة فيهم قماش البدل اللابسنها!! قروا و اقسموا و فعلوا وسوووا ، ولا طمر فيهم ، فاقد تربوي!!

      2. آآآآآآآآآآآآجنوبي وآآآآآآآآآآآآآآآآآآآآنونا هم بردوهو زي ما سرقوهو بفقه السترة بس الجنية كل يوم قيمته نازلة يعني لو سرق مليار ورداها مليار كانه ما عمل حاجة ههههههههههه عجبي من فقه السترة ياخ طلعوا ………………. والله

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: