مراقه لكل حرامي

لعبة الويست من (لعبات) الكشتينة (البريئة) والتي كان يدمنها طلاب الجامعات والثانويات على زماننا وأكبر هزيمة يتلاقاها الفريق المكون من شخصين في لعبة (الويست) هو ألا يأكل أكلة واحدة … وهذه الحالة تسمى (إسنافيك) ولكن في وجود (كارت) واحد (يأكل أكله) ويفشل هذه الإسنافيك فهذا الكارت يسمى (المراقة) لأنه يمرق (الجماعة) من الإسنافيك !

لم تمض أيام على إستخدام (الجماعة) لعملية التحكيم (كمراقة) للصوص من مواجهة القانون الجنائي في قضية (الأقطان) حتي تم إستخدام المادة (13) من قانون الثراء الحرام والمشبوه لعام 1989م (كمراقة) من مواجهة القانون الجنائي لموظفين خانوا الأمانه حيث قموا بإستخدام أوراق رسمية وأختام مؤتمنان عليها وإنتحال صفة من إإتمنهما ومخاطبة المسؤولين بإسمه متملكين بذلك تملكاً جنائيا قطع أراضي تخص حكومة السودان .. فمرقتهم المراقه ذي الشعرة من العجين حيث أعادوا ما أخذوا وتم إطلاق صراحهم !
ماذا تقول هذه المادة (المراقة) من قانون الثراء الحرام والمشبوه تقول المادة :
يجوز لكل شخص أثرى ثراءً حراماً أو مشبوهاً أو ساعد فى الحصول عليه أن يحلل نفسه هو أو زوجه أو أولاده القصر فى أى مرحلة قبل فتح الدعوى الجنائية ضده .
دعونا إذن لا نقوم بالدخول في أي تفسيرات قانونية لهذه المادة ونتساءل (وريالة) الأطفال تسيل من أفواهنا
إن كان فتح الدعوي الجنائية يسد الطريق أمام إستخدام هذه المادة فلماذا لم يتم فتحها؟ بعد أن أشارت إصابع الإتهام لهذين الموظفين لا سيما أن ما قاما به من (جرم) أستهجنه الوالي بإعتبار ما تم منهما غدر وخيانه ؟
أليس الغدر والخيانه دافعان لإتخاذ الخطوات القانونية وأولها فتح بلاغ جنائي؟ وأليس عدم فتح البلاغ حتي لا يكون عائقاً أمام إستخدام المادة 13 من قانون الثراء الحرام والمشبوه لعام 1989م يضع علامة إستفهام كبيرة عندما تحال هذه الجريمة الخطيرة للثراء الحرام وليس للمحاكم الجنائية ثم تستخدم فيها هذه المادة التي شرعت من أجل إسترداد الأموال مجهولة الأصل وليست أموال هذا الشعب المسكين الذي أصبحت مرتعا خصبا وناعما ومأمون بالنسبة للصوص والحرامية وأكلي أموال المرضى واليتامى والمساكين .
تعريف الثراء المشبوه.إن تعريف الثراء المشبوه كما ورد في القانون : يقصد بالثراء المشبوه كل مال يطرأ على أى شخص ولا يستطيع بيان أى وجه مشروع لاكتسابه !
لكن في حالة (أولادنا الحرامية ديل) فمصدر القروش والأموال معروف للجنة التحقيق فلماذا أصرت اللجنة على مسألة التحلل واللجوء إلى المادة 13 ولم تلجأ لفتح بلاغ جنائي في مواجهتهما؟ ألا تري اللجنة أن ما تم يشكل خطراً على المجتمع عموماً وعلى الخدمة المدنية يجب التصدي له بكل قوة وحسم حتي لا يتكرر؟ لماذا لم ينظر أعضاء هذه اللجنة إلى مقاصد القانون وهم من نالو الدرجات العليا فيه ؟ ألم يسمعوا عن فلسفة العقوبة؟ أي رسالة تود اللجنة الموقرة التي قضت بإطلاق سراح هؤلاء (اللصوص) والموظفين غير المؤتمنين تريد أن توجهها للمجتمع؟ أن أسرقو وزوروا وأحتالو !؟
إن اللجنة بعدم إخضاعها لهذه القضية للقانون الجنائي إنما ترسل رسالة واضحة لكل مؤتمن على مال أو (ورق مروس) وأختام أو دفاتر شيكات .. أن (أعمل العاوزو) قم بالتزوير والإحتيال والسبعة وذمتا أغتني من مال هذا الشعب التعس الفقير ما شئت وفي الأخير الحبة ما بتجيك .. ح ترجع بس الشلتو وكمان لو القروش دورتها وربحت الربح ده ذاااتو حلالك !! ده في أسوأ الأحوال لو إنكشفتا وكده .. ولو ما إنكشفتا يلا إتفسح سااااكت !!
والله إنه لشئ يبعث على (الطمام) والغثيان والحنق والغضب أن يتم التلاعب بالقوانين والإجراءآت بهذه الصورة المخلة بمقاصد العدالة توطيناً للفساد الذي أصبحت رائحته فوق طاقة الأنوف من أجل ألا تطال يد العدالة أمثال هؤلاء اللصوص الذي خانوا أمانة الوظيفة وأعتدو على مال هذا الشعب المكافح الغلبان .
إن ما يحدث لهو والله نوع من (مسرح العبث) العبث بالقانون والعدالة وبمقدرات هذا الشعب اليتيم .. ولا يمت بأي صلة كانت للإسلام والمسلمين وبنبيهم الكريم الذي قال : لو أن فاطمة بنت محمد سرقت لقطع محمد يدها !
… يا جماعة عملتوها شينة والله …. يوم واحد خلو ليكم زول وااااحد يتسنفك لو حتفتشوا ليكم مراقة لى كل (حرامي) ح نخلي ليكم (الويست) ذااااتو !

كسرة :
بعد أن تم إستخدام (التحكيم) كمراقة من التحاكم إلى القانون الجنائي في قضية (الأقطان).. وبعد أن تم إستخدام (المادة 13 من قانون الثراء الحرام والمشبوه) كمراقة لموظفي مكتب الوالي .. كدي شوفو ليكم مراقة لي (خط هيثرو ده) !

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

38 تعليق

    1. مبروكة برنجيتك يا العبيد – جازفتها بسبب فلهمتى على قولة جنوبى !!
      كدى انغير الاستراتيجية فى القمردينة الجاية يمكن تلفق …

  1. تصدقوا برنجية برضو ؟؟!!

    1. اقعد ضيع زمنك في تصدقوا وعلامتين استفهام وعلامتين تعجّب .. هسي كان خليت الفلهمة كان شلتها ,,
      عبيد ده ما بارك لي , ما بباركلو ..

      1. خرخاار يا جنوبي والله باركت ليك
        امشي راجع لي برنجيتك اليتيمه وح تلقي المباركة

      2. اى و الله يا جنوبى معاك حق ,, عامل فيها الود حريف و نسيت انو ناس العبيد ديل لابدين ليها فى الضل .. بقيت عامل زى اللاعب النزلوهو الملعب و قعد يحاور فى اللعيبة من النص و عدى من الاستوبر و الباكات و حارس المرمى, و لمن بقى فى خط القون قام عكسا !!!

  2. سلااااااااااام

  3. الاسنافيك اخدناها نحن ودايما متسنفكين، يعني زي أفلام الكاوي بوي اي واحد ماسك للتاني بلوه وده تفسيري لما يحدث

    1. والمراقات راااااقدة بس داسينها لليوم الزي ده !!!!

  4. هو يا استاذ الوست ده ما لعب حُرفا ! ياخي ديل لاعبين 14 وحتي ما مطلعين الجواكر كمان !
    لحدي هسي ظهروا تلاتة جواكر , فقه السترة , لجنة التحكيم , المادة 13 الثراء الحرام , غايتو باقي جوكر واحد بره ولو ظهر اكتر من واحد يبقي لازم نطلع مظاهرات بعد كده !! سكوتنا ده بقي شين والله !
    هسي بالله يا جماعة القاضي بتاع امبارح ده الحاكم الحرامية ديل بالمادة 13 الخاصة بالزول البجي يعترف بكامل ارادته وبدون ما زول يكتشف سرقته ! يكون رجع بيته ونام عااااادي كده !؟ انتو المسيح الدجال ده راجي شنو ؟ انا يبقي لي قاعد يتفرج زي المدرب البيحضر مبارة الفريق الحيلعب معاه المباراة الجاية !

    1. المسيح الدجال بفكر يمرق والا مايمرق يمرق والا ما يمرق يمرق والا ما يمرق

    2. هم أصلاً يا أستاذ جنوبى ما مشوا محكمة عشان يشوفوا قاضى، حتى بلاغ لم يتم فتحه، أصلاً المادة 13 دى بتشتغل قبل فتح الدعوى الجنائية كل ما فى الأمر أنه تم تشكيل لجنة من ثلاثة مستشارين من وزارة العدل – من بيت الكلاوى- للتحقيق فى الأمر، والتحلل واستخدام المادة 13 كان هو قرار اللجنة ، ح يروحوا فين من ربنا ؟ سواء المتحللون أو المستشلرون. حسبنا الله نعم الوكيل .

      1. انا اول ما قايلا محكمة ! لقيتا جودية سااااكت !! زي الشكلة البين كمساري وراكب في الباقي !

  5. بالنسبة لي خط هيثرو ممكن يكون فيه تحكيم تكون نتيجته ان يدفع الشعب السوداني لمجلس ادارة سودانير البائع لخط هيثرو قيمة الخط .لكن المرة دي والله غير اورنيك 15 ماندفع بس .

  6. خلي يشوفوا ليهم مراقه مع الله

    1. زكرتني واحد صاحبنا ماشي بي عربيتو ف الشارع قام بتاع المرور في الاستوب..من بعيد أشر لي..من دون باقي العربات..التقول شايل الحاوية السادسة..
      قال لي: جنب..
      جنب..
      قال داير رخصة القيادة و الترخيص..
      أداهم ليهو..
      شافهم كده..و رجعهم ..قال لي: عندك مخالفة ما رابط الحزام..تلاتين جنيه..
      صاحبنا قال يقوم (أتحلل) هو ذاتو كايس المراقه..
      فتح المحفظه وراهو المحفظة مافيها غير 5 جنيه..
      قال ليهو : دي ياها الفي..أها كيف؟..
      شالا و قال لي أمشي…
      بس قبل ما يمشي العسكري..
      قال ليهو : (جيب الخمسة جنيه دي و ربنا ذاتو قال لا ضرر و لا ضرار)..
      انا قلتا لي صاحبي ده كان تنزل تتصور معاهو..
      الراجل عندو مستقبل في البلد دي و قريبا حيبقى وزير داخلية.

      1. هههههههههههههههههههه ,, قوية يا قوييييية …

  7. يا أخوانا اليومين ديل سامعين موضوع مخدرات وكده – وبيقولوا الموضوع كبيييير وداخل فيه الإنتربول وصراعات المجموعات الداخلية التي استولت على الإقتصاد واحكمت قبضتها عليه – والموضوع الاكبر انو المخدرات بتتباع حتى في دول الجوار مما سيتسبب بأزمة إقليمية؟
    الكلام ده في اي خب عن مدى صحته؟

    ويا أستاذ جبرة ديل بلعبوا ويست أمريكي – يعني المطلوب إبكي بس – وسيتراكم الطلب والبكاء – وما بحلك الا المبكينك إقولوا بطلنا لعب؟؟!

  8. يابا التماسيح مسلمين ,,,
    لا ,, مجرمين ,,,
    اتفووووووو

    1. لو الحبيب عايش كان قال : يابا المسلمين مسلمين ؟
      انا داير اوكل محامي يفتح لي بلاغ في الخضر ذاااتو ! ويتهمه بخيانة الامانة والاهمال !
      ليه يخلي ختمه عند الناس ؟ وليه يوقع ليهم علي ورق ابيض يكتبو فيهو الدايرنو ؟ وليه جاب الناس ديل اساسا في مكتبه ؟ وليه بقي والي الخرتوم ! الانتخبو منو ؟
      قالوا غِمِر ! صحي ؟

      1. اى والله ,, غمر وجروا بيهو لرويال كير ولما فاق نابذهم وقال ليهم دا مستشفى ولا كوشة ؟؟
        ما كان يودوهو مستشفى الخرطوم عشان يعرف الكوشة بى صحها !
        تفوووو اليها

      2. غِمِر ولآ إتغامر ؟
        انا كان معاهم يمين ما اجري بيهو الا علي الدايات ! واقولهن رجعولو المحن الولدن لينا ديل ! وهن مخيرات يرجعوهن بي وين !!

      3. ههههههههههههههههههههههههههههااااى .. المحن عندك ياعمو حمزة !
        غايتو انا بعرف محل رجوعن بى وين !
        آيييييييييييييييييي

      4. د. الخضر د. الخضر د. الخضر وطلع ما عنده دكتوراة ذاتو !! اليسمع دكتور دي يفتكروا محضرا في عسر الطمس لطيور الوطواط !! انا من يوم الليلة حكتب د. جنوبي

      5. مبروووووك عليك الدكترة يااااااااا د. جنووووووبي !!!!!!!!!!! ,,, سلااااااام … لاحظوا النقط زادت مع قرووش (الجماعة) ووووواوات البروف !!!!!!

  9. ياخي ديل قضية بتتحكم الحكم ما بتنفذ (قضية السكن البستاني بتاعت ال25000 مهندس زراعي) قال قضاء قال ياخي بالله روح

  10. عصام الدين الطيب | رد

    المراقة طناش من النوع الجامد حتي مافي رد ولا تهديد اخير توفير حبرك غيرنا مافي زول بيقرا وأواتك خيرك عاقل السودان ضاجت وما عندو وجيع والجيش والأمن والشرطة يا حرامية يا حامي الحرامية يا داقسين

  11. وكيف تم القبض والتحقيق معهم إذا لم يكن هناك بلاغاً مفتوحاً ؟ وكيف توصل وكيل نيابة الثراء الحرام لخلاصة نتائج سرقاتهم إن لم يكن هناك بلاغ؟ واستناداً الى ماذا أجرت النيابة تحقيقاً مع الوالي ومع المتهمين إن لم يكن هناك بلاغ؟
    واين هؤلاء من حديث الرسول صل الله عليه وسلم( إنما أهلك الذين من قبلكم أنهم كانوا إذا سرق فيهم الشريف تركوه ، وإذا سرق فيهم الضعيف أقاموا عليه الحد ، وايم الله : لو أن فاطمة بنت محمد سرقت لقطعت يدها } .
    الله ينعلكم دنيا واخرة ان شاء الله ويعجل بنهايتكم اليوم قبل الغد .

    1. كلامك 100%

    2. هي يا سارة ما كانت 3×1 يعني لجنة تحقيق ونيابة ومحكمة ! شفتيهم عمليين كيف ؟

  12. قام بإعادة تدوين هذه على rabieuo and commented:
    لعبة الويست ..

  13. تسلمي يا سارة بت أخوي لا فض فوك، ومبروك أخوي ود العبيد البرنجية، ومالك يا الحبيب ما بي تدخل الواتس !! هواء شنو الجابو ليك إن شاء الله خير!! ما تكون ( الحكووووومة ) ؟؟ وكمان معليش أخوي ود بوتن فرقت دقيقة واااحدة بس يعني ما في ليك برنجية المرة دي، تكبر وتجيب غيرها !!!! وبرضو يا أخوانا لحدي هسع ما في زووولاً ردا لي بخصوص أخونا ود العم سااام !! ملو غائب من القمردينة وقاطع موية ونور من زمااان ؟؟ بس ما تكون زعلتو أنت يا جنوبي بلسانك الطوييييل ؟؟ وسعال أخيير وين 2/2.. سلاااام ..

    1. الله يبارك فيك يا نانو العزيز،
      فعلا اخونا أمريكي ليهو وحشه وما عارفين وين اراضيو،
      جنوبي بطل خرخره وطلع ال ااتو

  14. ياجماعه المنطق بقول إنت لو إعترفت بسرقة حاجة تم إتهامك بها وقمت بارجاعها فهذا دليل على أنك سرقت حاجات كتيرة ومن ضمنها الحاجة الاتهموك بيها وإعترفت بيها ورجعتها .
    الجماعه ديل زمنن دة كلو بيقولو دايرين نحكم بالشريعه الاسلامية . اسى نحن الشعب الفضل بنطالب بمحاكمة جميع من تثبت علية التهمة بالشريعه لاسلامية…
    هى لله ..هى لله…

  15. حسب قول البروف ……يا جماعة عملتوها شينة والله …. يوم واحد خلو ليكم زول وااااحد يتسنفك لو حتفتشوا ليكم مراقة لى كل (حرامي) ح نخلي ليكم (الويست) ذااااتو ! انا خليت الويست والطربيزة كوووووووووووووووووووووولها احسن لي طاخ طاخ طاخ الحاصلة هنا من ناس بشه

  16. سلام شباب ، و يا بروف لر ما كنت كتبت عن الموضوع دا كنت حأزعل منك زعل شديد خلاص،
    اولا بالتبادي لو خلينا باقي المبلغ الحقيقي الإنتهب واللي هو قريب التريليون و صدقنا و آمنا بالتسعة قطع ديل بس، و بإعتبار انهم في أماكن راقية ونقول بالميت كدا الواحدة تسوى ٥ مليار ، دا أقلو، يعني المفروض يكون قيمة التسع قطع دي ٤٥ مليار!! ولا شنو؟ دا غير الخمسة عربات!!! ياخواني ولا انا ما بعرف احسب؟ و لو صحي هم تسع قطع بس، ليه وزير التخطيط نبّه الوالي ؟ مش معنا تو إنو عدد كبير من التصديقات جاتو؟؟ يا إخوانا أقول ليكم شي؟ من مصدر موثوق الناس دي والله والله والله قبضوا عليهم ٣-٤ ايام فقط و من يومذاك حايميييين يحمد والله !!! و بعدين واحد يقولوا ليك مواليد ٨٨ و التأني ٧٠ و يقولوا ليك باقي القطع بتاع تم من زمان، يعني ساهم اولاد عزّ يا اول ما اتولدوا اشتروا القطع دي ، انحنا يا كافي البلا يا حايد المحن متر ما لامين فيه، إنشاء الله بس نلقي متر نندفن فيه في الخرطوم دي!
    و من هنا يا اخواني ما تلوموني، انا اي شي قدامي شايلاهو من هنا و جاي ، إن تذر ورقتك أغنياء خيرٌمن ان تذكرهم عالة يتكففون الناس ، اعطوهم او منعوهم، و ما تخافوا اكتب في وصيتي المبلغ الشلتو ، أكان كشفوني يريدوه و أكان ما إتكشفت. ياهو حلالي، و بعدين و لا لذكروا إسمي كمان!!! دا غير أنكم شعب نسّاي!! لوحدي هنا كفاكم لكن الموضوع دا حارقني جداً عشان كدا بجي كم تاااااني بس امشي ال…… اوووووووع

    1. أطرشي لي في وش الخضر ده ! لالا اقول ليكي , اطرشي لي في مركوب النمر حقو حيغيظو اكتر !

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: