أيها المجرم : نفذ تسلم

كان العبدلله إلى عهد قريب يظن وليس كل الظن إثم ان حالات الفساد التي يتم إكتشافها بصورة شبه يومية في كافة أرجاء بلادنا السعيدة والتي أضحت ذات أرقام فلكية سوف يتم القضاء عليها بشكل شبه نهائي في ظل ما يصرح به كبار المسؤولين في الدوله بمحاربة الفساد (والشنو ما عارف) لكنه بعد تصريح السيد وزير العدل في البرلمان مؤخراً وهو يستعرض قضية الأقطان والذي صرح فيه بأن هنالك جهات نافذه مارست عليه بعض الضغوط من أجل الإنحراف بسير القضية هنا أيقن العبدلله بأن القصة (بايظه من كبارا) فكيف لمسؤول متنفذ (أعلي مرتبه من وزير العدل) أن يضغط عليه من أجل إجهاض العدالة والتستر على محاكمة من نهبوا ملايين الدولارات؟

كيف نطمئن أن هذا المسؤول قد أسكت وأخرس العدالة وهي في بداياتها وهدد وتوعد صغار المستشارين ووكلاء النيابة وجعلهم ينحرفون عن جاده الطريق وهو هنا يضغط على أعلي سلطة عدليه بالبلاد ؟ أن من يمارس الضغوط على (وزير) بالطبع يمكنه وبسهوله أن يمارسها لمن هم دونه وبهذا يجب أن تقام للعدالة مأتماً (ونحنا نتولي حكاية العويل) !
وحيث أنه لم تجر أي عملية إقالات أو إستقالات أو خروج من الخدمة منذ خطاب وزير العدل الذي كشف فيه عن ممارسة ضغوط من جهات عليا لم يسمها فذلك يعني أن هذه الجهات لا زالت (بالخدمة) تمارس دورها في حماية الفساد والمفسدين ! وكشئ بديهي يمكننا أن (نخمن) بأن هنالك العشرات من ملفات الفساد تم قبرها دون أن تري النور بفضل (أخوان نسيبه) المتنفذين هؤلاء !
وبما أن هؤلاء المتنفذون الذين عناهم السيد وزير العدل يمارسون الضغوط على العدالة والتستر على الفساد فلابد لقضية مثل قضية (مكتب الوالي) أن تكون مخرجاتها صادمة لكل قانوني ولكل مسلم ولكل مواطن على الرغم من أن أفراد اللجنة التي أصدرت قرارها صرحوا في مؤتمرهم الصحافي وهم في كامل (ماء وجوههم) بأنهم إنما ينفذون القانون وإن كانت هنالك ثغرات في القانون فهذا شأن آخر !
وهنا يسأل العبدلله أعضاء اللجنه سعادة المستشارين الذين نالوا قسطا وافراً من دراسة القانون وشهاداته العليا سؤالا منطقيا وهذه الزاوية مفتوحة على مصراعيها لنشر ردودهم (بس ما يقولو لينا ما إتفتح بلاغ بلاغ جنائي وشنو ما عارف).. والسؤال هو :
وقائع الأحداث تثبت وعلى لسان المتهمين وما توصل إليه التحري أن المتهمين قد قاموا بقصد بأفعال يعاقب عليها القانون الجنائي فهم قد حصلوا على الأختام والورق الحكومي المروس لمكتب الوالي من أجل تنفيذ مخططهم (خيانة أمانة) ثم قاموا بمخاطبة جهات حكومية رسمية بخطابات (إنتحال شخصة) ثم قامو بالتوقيع على تلك الخطابات (تزوير) … نفترض إنو (الموظفين اللصوص) ديل شايلين الخطابات وماشين على وزارة التخطيط العمراني (إتقبضوا) يعني قبل أن يكملوا تنفيذ الجريمة ويتحصلوا على الأراضي فهل كانو سوف يحاكموا وفق هذه المواد الجنائية وما تقرره من عقوبات ؟ بالطبع الإجابه هي نعم … (ده لو ما شافو ليهم صرفه ههههه) ..
طيب يا عباقرة القانون في بلادي البائسة الحزينة .. كيف يحاكم الشخص عند شروعه في الجريمة ويطلق سراحه عند تنفيذها وإكمالها ؟ ياتو قانون فى السماء أو الأرض يمكن أن يكافئ من ينفذ الجريمة ويسقط عنه العقوبة الجنائية ويعاقب من يفشل في أكمالها وتنفيذها !! ( فهمونا بس دي تجي كيف)؟
و(إذا أصلو القصة كده ) فإننا نطالب وزارة العدل بعمل ملصقات لتوعية المجرمين والفاسدين من شاكلة :
– أيها المجرم فشلك في إكمل تنفيذ الجريمة يعني عقابك !
– أكمل الجريمة بنجاح ودع لنا الباقي
– أياك ,ان تكتشف في نص الطريق
– أكمل الجريمة .. المكافأة في إنتظارك
– لو فشلتا أسأل روحك ما تسألنا
– نفذ … تسلم

ولتبسيط هذه القاعدة القانونية الجديده لنج لأهلنا البسطاء نقول في هذا المثال :
1- حرامي تلب بيت ناس شايل معاهو عدة الشغل (عتلة) و(فرار) ومفكات قام سيد البيت صحى من النوم قبضوهو ودوهو البوليس .. وإتحاكم .. سنة سنتين !!
– نفس الحرامي.. دخل وشال الملايات ولقط (الموبايلات) وفتح الدولاب شال (دهب المرا) وطلع … زول صحى بيهو مافي .. وبعد شهر شهرين قبضوهو بيبيع في الملايات في (الدلاله ) … قامو قالو ليهو :
– تتحلل !
– أيوه إتحلل
– طيب جيب الحاجات السرقتها دي سلمنا ليها وأمشي !!

كسره :
تنبيه لأهلنا الطيبين : المثال الفوق ده مثال سااااكت .. سامعني مثال سااااكت .. الحرامية السغار وما عندهم ضهر ديل تحلل ليهم مافي .. لكن بس قلنا عشان نشرح ليكم وكده !
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

Advertisements

72 تعليق

    1. قاعد وين حارساها غايتو نقول شنو مبروك عليك

      1. حارسها مع كتلة الملف لابد ليها فى الضل ,, و المرة دى بدون فلهمة يا جنوبى عشان ما يجازفها Obeid !!

    2. مبروك البرنجيه يا ود بوتين،
      ويا جماعه دي ما رجاله ساكت وكان عجبكم و طبعا لمن ما يكون في قانون والقصه تبقي رجاااله

      1. الله يبارك فى عمرك يا Obeid , الليلة وين؟ كنت نبطشى و الا شنو جاى خاشى بعد شاى المغرب؟؟

  1. برنجية متاخرة

    1. مبروك البرنجيه يا بعاتي ..
      وما فاضي مالك ما تراهم ديل مريحنّك ويخلعوا فينا ساااااااااااكت !

  2. ايها المجرم المحترم / نافع بما ان مجموعة طه لا تدخر جهدا في فضح الاعيب مجموعتك فلا تدخر جهدا في فضحها لنا .
    ايها المجرم المحترم / طه بما ان مجموعة نافع لا تدخر جهدا في فضح الاعيب مجموعتك فلا تدخر جهدا في فضحها لنا .
    ايها المجرمين المحترمين طه ونافع / عليكم النبي بطلوا البتعملوا فوقوا ده نحنا ناس اصحاب مرض وباقي عمر وكفاية عليكم تسرقونا ياخي ما تقهمونا كمان ! فلان سرق , فلان اتحلل , جننتونا ياخ .

    1. شمباتى………حول

      1. ههههههههههههههههههههه ,, احولها ويييييين يا حبيب وفى العدل انقطع النصيب ؟؟
        ايها العتل الزنيم / المشير … خسمتك بالغالية العالية بتطل البتعمل فيو دا واستقيل يا سغيل ..
        عووووووووووووووووووووووووووع

    2. هههههههه المديدة حرقتني

  3. يعنى يابروف الحرامية الكبار ديل الحد الادنى ليهم كم مليار عشان يفكوهم بالتحلل. والضهر دة لازم يكون طول شنو …؟؟؟؟؟

    1. من الكلام الفوق دا الضهر دا اكيد بشه لانه البيضغط على وزير عدل اتحادي شنوووووووووووووووووووووووووو

  4. أنا بفتكر بلاش حكاية الواوات دي بعد كلام وزير العدل الأخير دا الحكاية باظت

    1. الواوات دي بتحللوا منها مرة واحدة برضه اااادي

  5. اشهد بالله انو لناس بالغو عدييييييل
    نسو شنو يا ناس
    يا بروف الحبوب زادت عليك تعال عمره فضفض شويه

    1. الناس دى بالغو عديييييل (تصحيح)

      1. ديل ما بالغو بالغنا احنه البنسمع ونقرأ وصامتين صمت القبور

      2. التردي الوصل ليه الحال في بلدنا الان ما حصل في اي بلد واجهت حصار ولا حروب ولا استهداف قبل كدة لانو اصبح مافي فرق بين الحرامي و(الشريف)الان لانها اصبحت دولة الفساد وليس فساد دولة

      3. فمرحبا بكم في جمهورية الفساد الديمقراطييييييية
        ودقي يا مزيكا خلي فلان يرقص

    2. والله يا ابو الشوش صدقت , بالغنا نحنا ديل الكأننا لسه ما بلغنا !!

  6. أخوي جنوبي أنت شكلك خرفت !!! البرنجية لي ود بوتن (مبروووكة عليهو) ما للبعاتي الله يكفينا شر البعاعيت البطلعوا بالليل، ولو إنهم (بعاعيت الجماعة) بقوا يطلعوا نص النهار عديييل كدا ما خائفين لا من زول ولا من الله زاااتو والعياذ بالله !!!
    إنتو ما شفتوا بعدما إختلف اللصان (ظهرت المخدرات) !! وما شفتوا قبل يومين في النيل الأزرق برنامج في الواجهة عثمان مرغني عمل شنو في المتعافي (الله لا يعافيه) لا دنيا ولا آخره أنا شخصياً كنت من ضمن الناس النزع مزارعهم (سكن بستاني 5 فدان في سوبا شرق) وباعها للأماراتين ولحدي الآن ما عوضونا رغماً عن الوعود (الكاذبة) !! قبل 10 أيام قابلت واحد ذكر لي بأنه نزع منه 2 فدان “ملك حر” جوار جامعة أفريقيا العالمية ورثها من أبوه ووزعوها لعلية القوم الذين بنوها فلل فاخرة (ولم يجد أي حق رغماً عن أن شكواه وصلت حتى رئيس الجمهورية وفي الأخير وبعد رشاوي (أعطوه قطعة أرض 500 متر في الأندلس) !!
    وأختم بحديث رسول الله صلى الله عليه وسلم عَنْ سَعِيدِ بْنِ زَيْدِ بْنِ عَمْرِو بْنِ نُفَيْلٍ ، أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ , قَالَ :
    ( مَنِ اقْتَطَعَ شِبْرًا مِنَ الأَرْضِ ظُلْمًا طَوَّقَهُ اللَّهُ إِيَّاهُ يَوْمَ الْقِيَامَةِ مِنْ سَبْعِ أَرَاضِينَ) … سلاااام …

    1. بسسسسسس الله يفتح عليك يا نانو , إتكا لي علي إختلف اللصان دي !
      ما ملاحظ الفضايح دي نازلة زي الرز اليومين ديل , والمعلومات قاعدة تطلع من عندهم هم زاتم يعني واحد يخون ويطلع المعلومة وما شطارة صحفيين ولا شطارة ناس امن اقتصادي ولا جن , انت امس ما سمعت لما ( المتعافن ) قال لعثمان مرغني الورقة الفي يدك دي انا عارف الاداك ليها منو لأنو الورقة دي عندنا نحنا خمسة تنفار بس !!
      اتخيل يدفعوا رشوة 23 مليون دولار للشركة الهندية عشان تقبل تعمل عطاء منافسه وعثمان مرغني جايب ليهو قوانين البنوك الهندية بتلزم الشركة انها تعمل مناقصة وتعلنا في الجرايد الهندية ! يبقي طالما قانون بلده بيلزموا يعمل مناقصة ندفع ليهو قروش ليه عشان يعملا ؟ الله لا بارك فيهم الحرامية ديل وبظهر ليهم في اولادهم , بناتهم نحنا عافنهن الا اولادهم ان شاء الله كلهم يطلعوا هناي !
      كل فضيحة تظهر تابعة لجماعة نافع تظهر قصادها فضيحة تابعه لجماعة طه هو صحي في النهاية كل واحد فيهم قعد يستعمل حق الفيتو ضد محاكمة جماعته والطرف التاني بيحترم حق الفيتو المضاد لكن البركة في الفضيحة .. الا خمسة حاويات مخدرات دي جات تقييييييلة مضرة شوايقة ,,,,
      البرنجيه انا عارفا الا زهجت منو ,,

      1. ( بناتهم نحن عافنهن ) !!!!!!
        اعفى برااااك يا زول , يعني قصور البنات الملن الخرطوم ديل نعفيهن !!
        ولا آآآآآآآآآآآآ , انت قصدك البنات في عضمهن ؟؟؟؟؟
        برضو ما بنعفي ليهن !!!!

      2. هههههههههههههههههههه ,, ما تعفى يا بايخ !
        ركز مع المفييييييد ,,
        لوووووووووووووووووووول

      3. مسألة الفضائح اليومين ديل شكلها خاتمة المطاف يعني بلملموا في اراقهم والى ماليزيا هههههههه بيني وبينك فضل شي يتسرق

  7. بمناسبة كسراتك دي انت ما سمعت بالتحلل … الناس زمان تحللوا وانت زي ما اتنت

  8. هسع الاحرام كيف ؟؟؟؟ التحلل ساهل والله المستعان

  9. مقهورين و ساكتين | رد

    عووووووووووووووووووووووووووووع من قانونا
    ما قانون هندي كان التزمتوا بشرع الله كان الناس دي كلها غنت مواطنها ورئيسها
    لكن نقول فات اﻻوان واﻻنكتب على جبينا الليلة بان

  10. بسم الله الرحمن الرحيم و به نستعين
    اما بعد،
    بإسمي و يإسم جميع الموظفين بولاية الخرطوم ( والولايات التانية) بل و يإسم جميع الموظفين في الأرض، أتقدم بالشكر أجزله للساده وكلاء النيابه و مستشاري وزارة العدل ، أعضاء لجنة التحقيق في فساد موظَّفَي مكتب والي الخرطوم للجهد العظيم الذي بذلوه في التحقيق في هذه القضية ( السااااهلة و مأهلة ) و بقول ليهم ما تخافوا ( كل واحد ٣ مليار كويس؟ برضو رضا!) و أشكرهم من أعماق قلوبنا علي تنبيههم لنا و تنويرنا بذلك القانون ( السمممح بالحيل) الا وهو قانون التحلّل، عجبنا بالحيل والله! و الله و والله ما ليكم علينا حلفان، أكان ما أنتو ما كان عرفناه، عشان كدي إنشاء الله بإذن واااااحد احد ما حنخذلكم تب! و أولهم انا!! اي شي قدامنا حنقشّو ليكم طوالي و البركة في قانون كم دا، عجبنا بالحيل والله! و أقول لكم شي، قريت. قانون وين!! شان مُحمّد ود اخوي علّا عاصرني عصٍر من اليوما داك إلا يقرأ هو ، قال الايامات دي هو الماشي في السوق و الجماعة البيقرو قانون ماشة معاهم باااسطة، و قال لي ما شايكم شغالين شغل نضيف كيف؟؟ ماااا عجبني كلام علا قلت لو تب عليك يا ولد، ديل تنابلة السلطان، قصدي الأقليدي النافذة و شيتا عوج ما بسوهو أنتو بس ناس حاقد يكن ساي علي الكرافتات اللابسنها دي ( اي نعم هي كتيبة عليهم) لكن برضو عيب نقول عليهم شي كعب! ديل حالفين فوق إسم الله و الله دا ما بخونوهو عشان كدا إحنا كمان قررنا ما نخيلهم تب! والله المستعان!
    قوموا الي سرقآتكم و إختلاساتكم يرحمكم الله!

  11. احنا في التحلل و حلل و حلًّ و غطائها ، و يا قول جنوبي شوية و ضمة و شدّة، الجماعه يكونوا مشوا هنااااااك و تاني زول حيلمّ فيهم مافي. والله لو كنت ماكلة شي ما امبارح كان طر….. ليكم تاااني!! قرف يقر فكم!

  12. سلامات يا قبيلة
    اولا وزير العدل بتاعكم دا ذاتو جابوهو (ترضيات ساكت) وبالتالي لا يد يقطع ولا زاني يجلد ولا جنجويد يصلب
    تانيا : الوزير دا ذاتو قبل كم سنة كدة طلع قرار بتطبيق قانون ابراء الذمة وقال لغاية يوم الخميس (الشنو ما عارف داك) لو ناس الحكومة المعنيين بالامر ما استجابوا سيبدأ بنفسه في تطبيقها …. واظنو لغاية هسع الخميس بتاعو دا ما جا ….
    واخيرا ما خطه عنه عبد الباسط سبدرات قبل ايام ونشر في الراكوبة ……………….
    كان راجين منو حاجة الرماد في خشمكم وحتات تانية كمان…..
    كسسسسسسسسسسسسسسسرة خاصة :
    الحكومة في الداخل , والكفيل في الخارج ,,, وفراق الجماعة حار نسوي شنو ,,,,,,,,,,,,,,,,,,,

    1. آآآآآآآآآآآآآآآكتلوني تعال معنانا هنا ارض الميعاد هههههههه

      1. هههههههههههههههههههه ,, واللقيا اجمل فى الحقيقة من الخيااااااال …
        سوى كدة يااااا كتلونى (وغمز بعينه تجاه الطرف الاخر) …..

  13. اخبار عالمية :
    استقالة رئيس وزراء نيو ساوث ويلز الأسترالية بسبب زجاجة نبيذ
    تاريخ النشر: 11:12 ص, أبريل 16, 2014
    استقالة رئيس وزراء نيو ساوث ويلز الأسترالية بسبب زجاجة نبيذ
    (المستقلة)… تسبب لغط حول قبول رئيس وزراء نيو ساوث ويلز الأسترالية، باري أوفاريل، زجاجة نبيذ يقدر ثمنها بـ3 آلاف دولار كهدية، باستقالته من منصبه مفسحاً المجال أمام انتخاب بديل له.

    وأفادت وكالة الأنباء الأسترالية (آي آي بي) اليوم الأربعاء عن استقالة أوفاريل من منصبه كرئيس وزراء نيو ساوث ويلز.

    وأوضحت انه بعد مثوله أمام اللجنة المستقلة ضد الفساد أمس، والتي نفى أمامها قبول زجاجة نبيذ ثمنها 3 آلاف دولار من رئيس شركة المياه الأسترالية نيك دي غيرولامو، تبين اليوم أنه وجه رسالة شكر إلى الرجل على هديته.

    ونقلت عن أوفاريل إعلانه في مؤتمر صحافي أنه يستقيل من منصبه ليسمح بانتخاب أحد الزعماء الليبراليين، ليصبح رئيس وزراء نيو ساوث ويلز المقبل.

    وشدد على أنه لم يقصد تضليل اللجنة، لكنه مستعد لتحمل كل العواقب، مشيراً إلى أن نفيه تلقي زجاجة النبيذ كان نتيجة نسيانه الأمر.

    يشار إلى أن زجاجة النبيذ من إنتاج العام 1959 وهي من نوع ” Penfolds Grange”. (النهاية)

    اخبار محلية :

    وفي السياق نقل عبدالرحمن الصادق المهدي مساعد رئيس الجمهورية تجديد رئاسة الجمهورية الثقة في عبد الرحمن الخضر والي الخرطوم وأعضاء حكومته، وأكد أن الرئاسة مطمئنة للخطوات التي اتخذها لمعالجة قضية استغلال النفوذ رغم ما أثير هنا وهناك، مشيراً إلى أن تجديد الثقة يأتي في إطار استكمال الجهد والمشروعات التي تنفذها حكومة الولاية في مجال الخدمات ومشروعات البنى التحتية. جاء ذلك خلال كلمته في كرنفال افتتاح العمل الصيفي لطلاب الولاية بالساحة الخضراء أمس الأول (الأحد).

    1. اتفووووووووووووووووووووووو على عبدالرحمن وابوهو ..
      وعلى الخضر المضر …
      وعلى المشير العوير …
      اتفووووووووووووو

    2. و قبل كم يوم كدة استقال رئيس وزراء كوريا الجنوبية على خلفية غرق العبارة التى كانت تحمل تلاميذ فى رحلة الى احدى الجزر و اقر بمسئوليته عن الحادث …
      واحد يستقيل و هو بعيد كل البعد ما حدث,, و احنا عندنا يرمى بنايات و يقتل افراد و تدخل طيارات و تبرطع فى البلد و تمرق , و ناس تسرق عينى عينك (جهارن نهارن) و لسة متمسكين بالكرسى !!!

      1. آآآفلادمير ما لسه عنده نظر هع كع كرع

  14. يا جنوبي بالله (اتحلل) واغتسل اولا
    ثم اتمضض بالتراب ثلاثا ,,,,,

    1. هي مضمضة ! وانا الغبيان اتمرغت !!

  15. كسره :
    تنبيه لأهلنا الطيبين: المثال الفوق ده مثال سااااكت .. سامعني مثال سااااكت .. الحرامية السغار وما عندهم ضهر ديل تحلل ليهم مافي .. لكن بس قلنا عشان نشرح ليكم وكده !

    والله يا ناس الحكومة أحذروا غضب أهلنا الطيبين – واحذروا مكر الله – إنا لله وانا اليه راجعون

    1. الله ما بنقطع العشم فوقو إلا نحنا واهلنا الطيبين طيبيييييييييييييييييييييييين !

    2. يا بروف ، حنسرق حنسرق و ما تقول لينا ما عندنا ضهر! و محامي الشيطان قاعد يسوّي في شنو؟ مليارين تلاته و رجعناااالك وجييييينا!!!! هههه
      شفتو المغسسسسسسة يا خواني ، بعد دا كووووللللو و قالوا أحالوهم للجهات الهم تاعين ليها عشان يتخذوا معاهم إجراءات إدارية ، قول رضينا ، و الله ياخواني الموظف طلع شغال بي عقد!!!!!!!!!!!!!!! مضحك مبكي إلا إنني قد إخترت ان … اهئ اهئ اهئاحييييي انا!

  16. طيب السكران يتحللل كيف ؟؟؟
    اكييييد بالطراش !
    عوووووووووووووووووووووووووووع

    1. يمرقو ليهم فش غبينة ! ما سكران كمان بيواخذوا !!؟

      1. ههههههههههههههه ,,
        انت تطلع من هنا خاااااااااااااااالص ,,
        الشئ فبو فتاوى ودين ,,
        لسان ممدود من هنا لا عندك

    2. اضحك الله سنك

  17. رسالة الرئيس للشعب الفصل ..
    أيها الشعب البارد المستفذ ايها الشعب الجائع الجعجاع ايها الشعب المُتنفّس كلاماً المنفّس عملاً ايها الشعب الخنيتة ايها الشعب الفصل ,,
    لايخفي عليكم انني طيلة ال25 سنة اكذب عليكم واسعي لتفتيتكم واشعل البلد حروبا ودماراً , وعندما رأيتكم غير آبهين قلت ربما ان الامر لا يعنيكم فلستم طُلاب سلطة وجاه , ولكن في الفترة الاخيرة وعندما ظهرت خفايا بطانتي الوسخة الفاسدة وسرقاتهم الفادحة لقوتكم ومالكم وتدهور تعليمكم وصحتكم ومعيشتكم وادخال المخدرات لتدمير شبابكم امل مستقبلكم , اقسم بالله لقد ( تكلبت شعرة جلدي ) من هول ما سمعت ورأيت وعرفت , وفورا ارسلت بعض خاصتي لينظروا ما انتم فاعلون , حتي اتدبّر مخرجاً لي , فاتوني خائبين خافضي الرأس يقولون انهم وجدوكم حول ستات الشاي ( متحلقين ) وفي المواقع الالكترونية ( مُنتتين ) تنفسون بالكلام يا ( منفسين ) .
    ايها الشعب البارد الغياظ المُستفذ , يا احفاد اكتوبر وابناء ابريل يا شعباً تقازم يا هذا الحطام , تفج الدنيا ياما وتندس في زحاما وتجيب الطُمام , قسما لأريكم مني ما لم يراه قوم ثمود وعاد وقوم لوط يا لوا؟؟ة .
    ( قال هذا وهو ممسك بتلابيب جُضومنا تارة يشدها وتارة يتفل )
    انطلق صوت : الله اكبر الله اكبر , فتعجبت ! واستمر الصوت اشهد ان لا اله الا الله , فعرفت انه صوت اذان الفجر من الموبايل ينادي الفجر , صحوت وتفلت ثلاثا علي اليسري ولكني وجدت بعض البلل علي وجهي فلا ادري هل لخيبة الزوجه في ليلة امس ام هو ما تطاير من التفلات الثلاث ام بعض الحلم كان حقيقة ..
    عذراً سيدي الرئيس فأنت تحكم شعباً لو؟ي …..

    1. دي من الاعماق يا حبيبي يا غالي تقبل المرور والتحايا

    2. لؤى منو يا جنوبى !!؟
      حلييييل شعبا لهبت ثوريتو ,,,
      لا لقى مرادو ولا الفى نيتو ,,,
      واييييييييييييييييييييييييه

      1. قال لؤى قال …دقست ولا تبتا

      2. ههههههههههههه ,, الله يجازيك يا جنوبى وبالموس الميتة !
        ادونا فندككم ندق ونديكم ….

    3. 1- قسما لأريكم مني ما لم يراه قوم ثمود وعاد وقوم لوط يا لوا؟؟ة . 2- عذراً سيدي الرئيس فأنت تحكم شعباً لو؟ي …..

      للمرة المليووووون يا جنوبي هوووووي حافظ على (ألفاظك) يا بلسانن طوييييل شوف كلامك الفوق دا كيفن شييين !!!
      ما تنسى إنو معانا بنات ناااس وأجانب كمان بقروا البوست وهم عندهم فكرة جيدة عننا نحنا السودانييين فما تخربا لينا ..
      أحسن لييييك ( إنقرع ) بلهجة أهلنا الغرابة … سلاااااام …

      1. وهسي بنات الناس ديل نودي وشنا منهن وين نحنا بي سكوتنا وخنوعنا ده !!
        انا كان مرا زماااان كان قت لينا : ادونا موس الحلاقة وهاكم اولوييزنا !!!!!!!!!!!!!
        هسي انت كمان شمباتي ما قراها ليك ! لؤي لؤي يا نانو ,,,, شمباتي رسل ليهو التعزية بتاعت اهل لؤي اسمهم آل منو ؟

      2. يا جنوبي أزيك ؟؟ ما تتكلم لي بالألغاز لأني ما بفهم فيها !!!!

      3. هههههههههههههههههههههههه ,, ساعى بريد انا ؟؟
        لوووووووووووووووووووول ,,,
        قال آل قال ,,
        العندى انا ما بدى …..

      4. ومال انا لما بقول لشمباتي ما يديك رقمي , خايف عليك من شنو !!؟ مااا من جنس الالغاز دي ! الليلة تعرف معناها وبكره تعرفا هي ذاااااتا ,,,
        موس الحلاقة يستعمله الرجل لحلق لحيته والاولويز تستعمله النساء وبسكوت الرجال وجب التبادل وفي رواية اخري ادونا السيوف وهاكم رحاطتنا ..

    4. الحالة ما لفيت البرنجية — اجازي محنك يالجنوبي اخوي

  18. اتهمت القيادية بالمؤتمر الوطني سعاد الفاتح عملاء داخل السودان ـ لم تسمهم ـ بالعمل لصالح الخارج وتخريب الاقتصاد السوداني، وحرضت على ضرورة تطبيق القوانين، وقالت: «إذا لم تطبق القوانين سنطبقها بضراعنا»، وقالت: «إن العملاء استطاعوا الدخول في كل شيء و «صاتوا» بداية من الدفاع الشعبي الذي لا نعلم أين هو الآن مروراً بالتعليم العالي الذي أصبح «يُحتضر» وانتهاءً بالشؤون الاجتماعية التي ترأستها سامية أحمد محمد وطفشت منها»، وقالت سعاد: «لسنا الآن فى موقع لوم حول الفساد وتبديد المال العام لأننا إذا فعَّلنا قانون الثراء الحرام والمشبوه وحده نجد أن «الحرامية كتار» وثلاثة أرباع نساء ورجال البلد حرامية»
    الانتباهة
    شفتو كيف؟؟؟؟؟ انحنا الحرامية كتمت كتمت كتمت ما فيش غير الدم الدم الدم

    1. سعاد الفاتح دي قبل كده قالت لناس البرلمان يخسي عليكم ونحنا شايلنها ليها جميله ,,
      بس كان تقول تلاتة ارباع نساء ورجال المؤتمر الوطني حرامية !
      هسي لمن تقول البلد , خلت لي فاطنة شاش شنو تقولو !!

      1. هههههههههههههههههههههه ,, لكن عجبتنى صواطتتا !!

  19. فاصل كوميدي :
    أسوة بمنسوبي مكتب والي ولاية الخرطوم
    04-30-2014 04:00 PM
    الراكوبة – الخرطوم- خاص الراكوبة

    أعلن لص تحلله من المسروقات التي وجدت بحوزته عندما قدم للمحاكمة امس امام احد القضاة بمحكمة الخرطوم شمال وقد اثار اعلان اللص موجة من الضحك و (القرقرة) داخل قاعة المحكمة التي لم يعُد الهدوء إليها إلا بعد مجهود مضني من القاضي الذي غالب الضحك بدوره بصعوبة بالغة.
    =====
    =====

    والي جنوب كردفان : علاقتنا بالمتمردين ممتازة ونتبادل رسائل الواتساب

    04-30-2014 10:23 AM
    الخرطوم: أشرف عبدالعزيز
    أكد والي جنوب كردفان المهندس آدم الفكي أن علاقاته مع قيادات المتمردين ممتازة على الصعيد الشخصي وأن الاتصالات معهم لم تنقطع، وكشف – أنه يتبادل رسائل (الواتساب) مع قائد قوات الحركة الشعبية قطاع الشمال بجبال النوبة اللواء جقود والقيادي رمضان حسن. وقال الفكي ” أتصل على كلاهما وأبلغاني أن منازلهما بمدينة كادوقلي تضررت وتم تدميرها تدميراً كاملاً فقمت بتصويرها وأرسلتها لجقود بالواتساب فرد عليَّ بسؤال أين (الزنكي)؟”

    1. ههههههههههههههههههه ,, حتى الزنكى ما عتقوهو ؟؟؟؟

      1. ههههههههه زي ما يقول ناس الكورة في التمانيات يا شمباتي

  20. غايتو وزير العدل وفر لينا مجهود فى البحث عن الفاسدين الحقيقين و يبدو أنهم من رتبة وزير فما فوق غايتو كدة البحث إنحصر فى حوالى10 ألف نفر كدة تقريبا.

  21. حال الناس زمن الانقاذ منقولة من الراكوبة : كنت امارض اختي بمستشفي سوبا،،ايام الشدة توحد عامة الناس،،فكان ان تالفنا،بسطاء وفقراء،يجمعنا الهم والالم،،علي وبشير واحمد ،من جهات الصعيد ،ابسيل من جهات النهود،الشنبلي،ومحمد ادم من الفاشر،وجماعة من الشروق والغروب،،تقاسمنا النهارات وصهدها،الليالي وكرش ناموسها،وروائح الحمامات الطافحة والاوساخ.
    في ليلة سقطت امراة في الحمام،توفاها الله،،نادت علينا النسوة ،لم تكن الممرضات ولا الاطباء في اماكنهن،،قفز بشير فوق الحمام،كانت المراة قد اغتسلت،سترت حالها تماما،وكانها علي موعد مع الموت،،وجدناها في اتم الحضور والالق النوراني،،في راحة مع الرحيم ،،بعد تعب وجدنا الطاقم الطبي بمكتب في شاي وانس،قاموا بواجبهم في تحرير شهادة الموت ،الزمونا بالرجوع بالنقالة الملئة بالدم.
    ركبنا رهط من البسطاء واختها الباكية الملتاعة،كانت المرحومة في زيارة لاختها ،جاءت من نواحي الابيض،ثم فاجئتها الوعكة،،اسلمت روحها من اول جرعة لعلاج سرطان الثدي،،ولا اعتراض..كانت اختها تعمل وزوجها حارسين لاحد المنازل،كانت لهما بنت صغيرة في المنزل عمر ال12 ،سافر الاب للديار ليتدبر امر مال للعلاج لاخت زوجته،.
    في حوالي الواحدة صباحا ،وقفت عربتنا امام المنزل الفاخر،كان اهله في مهجر بعيد،،والبنت مغلقة غرفتها نائمة،،وكان هناك ثلاث من الجيران في مقاعد وثيرة امام منزلهم الفخيم في هذا الحي الراقي المتخم،،شرحنا لهم وضعنا،وانا نريد سريرا لانزال الجثمان…..
    ما حدث انهم اختفوا داخل منازلهم ،اغلقوا بيوتهم ،واطفاؤا الانوار….
    هذا ما حدث،،،،عشرة يشهدون ذلك…

  22. قبضوهم تاني ،، اايوووووووي تسلم يا دوسة

    1. ونشكر كل الشرفاء من صحفي بلادنا الذين مارسوا هامش الحرية لفضح عصابة الاقطان وعصابة مكتب الخضر مما اجبر الكبار لاعادة القضيتين لمكانهم الطبيعي خوفا من الرأي العام , ونشكر مولانا دوسة علي لحظة صحوة الضمير التي زفرها داخل البرلمان مما زاد الحرج علي رؤساء العصابتين ..
      وعقبال واوات جبرا ..
      وبما انني جبنت علي الخروج الي الشارع فاشاطركي بأيوووووووووووووي يوي يوي ..

      1. عاش كفاح الطبقة العاملة ,,,
        ولن يضيع حق وراءه مطالب …..

  23. المعلومات التي جمعتها الأجهزة الأمنيّة كانت السبيل الوحيد لإعتراف المتهمين في قضية فساد بعض كبار موظفي مكتب والي الخرطوم د. عبدالرحمن الخضر ، فحين مواجهتهم بالمعلومات والأدلة إنهار المتهمون وأقروا بالتهم ، خاصة أن بعض المعلومات تحصلت عليها الأجهزة الأمنيّة من أقرب المقربين للمتهمين الموظفين بمكتب ” الخضر ” ، وهم بدورهم أرشدوا إلى بقيّة الشبكة داخل مصلحة الأراضي ، فهناك يتم فرز قطع الأراضي التي ستدخل المزاد لبيعها وبعدها يأتي مهندس المساحة والخرط ويقوم المتهم الثالث ( ن) بإستبعاد أكثر القطع تميّزاً وبالتالي أكثر سعراً ، ويتم بيعها لأسماء وهميّة بسعر المزاد بإستخدام سماسرة .

    وأستخدم وزير العدل ” دوسة ” سلطاته تحت المادة ( 55/3) من قانون الإجراءات الجنائية أعادت الثقة في الأجهزة العدلية بعد أن اهتزت عقب قرار ( التحلل ) ، وبعد إطلاع ” دوسة ” على محضر وقرار لجنة التحقيق في المخالفات المنسوبة في الولاية أصدر أمراً بفتح دعوى جنائية في مواجهة كل المشتبه فيهم تحت المواد 21 الإشتراك في تنفيذ الإتفاق الجنائي (25) المعاونة ، (89 ) مخالفة الموظف العام للسلوك الواجب إتباعه ، (123 ) التزوير ، (124 ) تحرّيف المستند بواسطة الموظف العام ، (177/2 ) خيانة الأمانة من الموظف العام ، من القانون الجنائي لسنة 1991 م .

    سوداناس

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: