توجد (واو) جديدة

– مما الناس قعدت تهبش فى السلم التعليمى وتغير فيهو التعليم ماضاق عافية وما قامت ليهو قائمة تانى … مره ستة تلاتة تلاتة … ومرة تمانية تلاته صفر …ومرة عوزين يعملوهو تسعة تلاته …ومرة مش عارف أيه .. خلاس خلوها أطناشر صفر وريحونا !

– أيه المشكلة لمن موظفين يشيلوا الورق المروس بتاع والي وكمان الختم ويقلدوا الأمضاء ويستولوا على مليارات وبعدين (يتحللوا) .. يحلنا الحلا بله .
– نفسي أعرف رأي (علماؤنا) في مسألة (التحلل) دي؟ .. ساكتين (جنس سكتة) هههههه
– بعد غلاء السلع ذات القيمة الغذائية العالية كالفراخ واللحوم والفاكهه وكون أنها أصبحت خارج ميزانية المواطن .. سنة سنتين وكل الشعب الفضل ح يكون مصاب بالأنيمياء .. (فقر الدم)
-قرأت تقريراً علمياً عن أضرار تناول الدكوة وتسببها فى مرض السرطان لذلك ومن هذا المنبر أنادى بفصل الدكوة عن السلطة .
– التحدث بالموبايل مخالفة .. ما قلنا حاجة .. لكن الإنهماك فى مشاهدة ما تبثه (الشاشات التلفزيونية العملاقة) الختوها لينا قدام كل صينية وتقاطع (صورة وصوت) دى أكبر مخالفة .. (الشاشات دي تكون بتاعت منووو)؟
– من علامات العبقرية التى أصبح يتمتع بها الشعب السودانى أن الطالب الجامعى بيدخل المحاضرة ما شايل ليهو لا ورقه لا قلم .. فى عبقرية أكتر من كده !
– عندما ذهبت إلى الطبيب اشكو له إرتفاع ضغط الدم كتب لى فى الروشته .. إبتعد عن سماع تصريحات المسئولين (المجغمسة) وملفات الفساد ولأخبار وزارة العدل وتعال قابلنى بعد عشرة يوم (عشان المراجعة المجانية بتنتهى بعد أسبوع)
– نحن شعب لا يعرف الرشوة .. لم تسجل مضابط الشرطة منذ الإستقلال حالة واحدة لا لموظف أو لمسئول تمت رشوته .. نحن شعب مصنع بمواصفات عالية الجودة !
– لو كنت مسئولاً (كبيراً) لأصدرت أمراً بعدم ظهور المسئولين فى حفلات إفتتاح أى مشروعات … معقول وزير يسيب شغلو ومهامو ويمشى يفتتح ليهو (شفخانة) فى (أم جلافيط) مع أنو (أم جلافيط) الكهرباء ذاااتا لسه ما وصلتا ؟
– لو قمت بتضريبه بسيطه لمنصرفات الزول (كان قعد فى سريرو وما قام) لمده شهر لوجدتها حوالى 200 جنيه بالجديد .. نفايات … خط تلفون .. إيجار عداد كهرباء.. إستهلاك مياه .. عوائد .. بالله ده إسمو كلام ؟
– من قام بإتخاذ قرار (السبت إجازه) إضافة ليوم الجمعة أكيد كان غلطان .. يومين إجازه ؟ وخمسة يوم شغل؟ مفروض يكون العكس خمسة يوم إجازة ويومين شغل !
– تمتلئ الوسائط الإعلامية هذه الأيام بإعلانات عن المستوصفات الإستثمارية من شاكلة .. لقد تم بحمد الله وتوفيقه افتتاح (مستوصف تمساح الدميرة التخصصى) لجميع الأمراض وبأطباء عالميين ، المستوصف تتوفر به جميع أقسام الرعاية الطبية…. قسم خاص للغسيل…غسيل كلى…غسيل مخ ..غسيل عدة.. غسيل سجّاد وموكيت …غسيل بخار مستعجل وغسيل جيوب (طبعن)
– بعد وضع الإشارات الضوئية مكانها تأكد لى بأن لدى الحكومة إصرار عجيب فى (حذف) الصينية من حياتنا.
– هل تعلم عزيزى القارئ ان الفرق الوحيد بين عربة الإسعاف (عندنا) والعربة العادية أن الأولى يفسح لها الطريق .. لا كادر طبى لا أدوية منقذة للحياة لا أجهزة ولا يحزنون !
– يقولون أن عهد الأنبياء قد ولى ولكن لدينا خمسة ملايين (مسئول) معصومون عن الخطأ !
– لا يوجد لدينا عاطل واحد عن العمل فنصفهم قد هاجر بينما النصف الثانى قد قضى نحبه منتظراً .
– أعجب لبعض الأثرياء عندنا الذين لهم أكثر من نشاط (أدب – رياضة – صحف – شعر – تلحين) شخصياً لو كنت أمتلك مليوناً واحداً من الدولارات لما كتبت (سطرً واحد) .. أكتب وللا أقعد أعد فى المال ده ؟
كسرة:
حقو الحكومة توزع (ليمونة) لكل مواطن … حالة (طمام) شديد !!
تنبيه :
توجد واو جديده !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و؟

23 تعليق

  1. برنجيه

    1. مبروكة يا جنوبي وانا ما سغييل ببارك ليك البرنجيتين في مره وااحده

      1. الله يبارك فيك ,, يعني انا سغيل مش ؟ سغيل انت وسغيل شمباتي ذاتو !
        اها تنين ! كده بخش الجنة ؟

      2. ياسين شمباتى

        هههههههههههاااى ….
        عشان تختنأوا ظاتو !!

    2. مبروكة يا جنوبى ،،،، المرة دى شايفك ما اتلخمتا بهناك زى المرة الفاتت!!!

  2. ياسين شمباتى | رد

    مشتركة

    1. موافق وكان داير واحدة فيهن شيلا عديييل .. خميس حلو خلاس ..

      1. ياسين شمباتى

        ههههههههههههههههههههه ,,,
        ارجتك ميتة وابوها ماف !!!

  3. ياسين شمباتى | رد

    وعووووووووووووووووووووووووووووع ,,,
    والله الطمام قلب استفلااغ عديييل ,,
    وعن العلماء فما ترجى منهم رجا ,,, ديل بقوا دلاديل وشخاشيخ فى يد السلطان ,, الا قاتلهم الله على العلم الذى يكتمون وعلى جبنهم وخنوعهم ,,و تركهم اعظم الجهاد (كلمة حق عند سلطان جائر) ….

  4. شوفو لينا دكتور يكتشف ليه حبوب للخيبة النحن فيها دي

  5. لو رجعوا السلم التعليمي 4/4/4 بجيب ليهم اكتوبر ولو رجعوهوا 3/3/6 بجيب ابريل ..
    علي بالطلاق لا شالوها ولا قلدوا امضاء اداهو ليهم بكاااامل ارادتو ! سمح غِمر ليه ؟
    صحي العلماء ديل ساكتين ليه ؟ ما كلو بيبدأ بالتِفِلّق وبعده التحلل !! بس هنا نحنا الشيطان ! شطه في ط ؟؟ اماتم ان شاء الله .
    وفصل الدين عن الدولة برضو بالله شان الدكوه ما تزعل ..
    اخير ده افتتح شفخانة الليلة في معتمد افتتح يافطة قف ومتصور معاها !!
    هي زاتا صواني المرور دي بلا تزكرنا صواني الفطور وتحسّرنا ساكت !
    الاثرياء عندهم هم شنو ؟ الفايق يحنن شنو كده يا ود أمي ..
    حقو الحكومة توزع مواطن لكل ليمونة شان الليمون زاااااتو بطنه طمت ..
    الواو تتربي في عزك وعزنا ..
    انتو اخبار الرئيس زااااتو شنو اليومين ديل مالو ساكت ؟ حبوبتي لما شافع يصن في البيت كان تقول انتو الشافع ده صنّ كدي مالو امشوا شوفوا قعد يخرّب في شنو !!

    1. الحكومة قررت ترجع المرحلة المتوسطة..
      و الترابي رجع..
      تقريبا الخطوة الجاية جايبين ليكم يوسف عبد الفتاح.

      1. ههههه ،، يوسف عبد الفتاح يا قويه أصلا حسي رئيس هيئة ترقية السلوك الحضري،ههه سمعتي بيها دي؟ جد والله ما نكتة. جابوا ليكم عشان يرقوكم و برضو ما طمر فيكم ،قصروا معاكم ؟؟

    2. يا جنوبي، الريس كان ضارب الهمبريب في بحر دار / اثيوبيا ، و طواااالي هو بنش يأجّز هناك، و بري ما بن مش نشوفوا، تمش وداد كان دائرة ،ههههه

    3. قوية : رجوع المرحلة المتوسطة ده تخدير سااااكت ! قول دايرين يرجعوها مدارسا القبيل وينا ؟ قول دايرين يبنوا مدارس جديدة يبنوها وين ؟ هي عصابة مكتب الخضر خلت ميدان ؟ أخف الاضرار كان يضيفوها للثانوي ! منها يبقي راعوا الاثر النفسي للتلميذ ومنها ولد ال 15 سنة بيقدر يباصر مع ناس 16 و 17 و 18 سنة ويقي الفرق بين اكبر طالب ثانوي واصغر طالب 3 سنة بس بدل 9 سنة الفي الاساس دي !! انا خايف لما يجو يعالجوا البكور يقوموا يعملوا لينا اليوم 25 ساعة كمان !!
      الترابي رجع ؟ ترااااااابي تراااااااااابي خبر السواد ..
      يوسف عبد الفتاح ده ان شاء الله بس مسجل براءة اختراع لعلامة الصلاة ( الكدود دومية والحصا تمرية ) ..
      نونا : هو ما مؤجز خِلقه !!

  6. قضايا فساد..قضايا فساد…
    فساد الأقطان..
    فساد الصمغ العربي..
    فساد مكتب والي الخرطوم..
    فساد..فساد..
    ده شنو الملل ده..
    مافي خطف؟..مافي دعارة؟.مافي مبادرة من الستات..؟

    1. ههههه قال ليهو إيه يا ابن النيل مافيش شتيمة مافيش يا ابن الوسخة يا ابن .. ؟ بس ضرب علي طول .
      شوف يا قوية د. البوني قال شنو :
      05-03-2014 02:05 AM
      “اقترح الأستاذ الجامعي والكاتب الصحفي الشهير د . عبداللطيف البوني بصحيفة ” السوداني ” الجمعة إنشاء معهد دراسات لتطوير الفساد ، حتى لايصبح السودان ” مضحكة ” مشيراً للطريقة ” الغبية ” التي يتم بها الفساد والسرقة بالسودان ”


      والله كلامه صحي ! طالما ما قدرتوا تحاربوه خلاص طوروهوا !! غايتو يوم بيجلطوا ليهم زول بي طريقتم دي !!!

      1. هييي سجمي صحي؟ بما إنو الناس دي جاادة في العبط و بتعلم حاجات ما سبقها عليهم زول فأكيد حيعملوها. النبي فيكم كان ما سجّلتوني !!! وكت نويت على الإختلاسات دي أحسن نظبط الشغل ، ولا شنو؟

  7. والله يا بروف الواحد بدأ يشعر انه مع القمردينه وتعليقات الاخوه يزداد غباء وهبل زعل وتوتر فى البدايه وغضب فى الوسط وضحك هستيرى فى الاخر….دى يفسروها شنو؟؟

    1. غايتو انا ما بفسر وانت هناى !
      كع

  8. يا إخوانا ، الحا ضر يكلم الغايب، الغايب يكلم ناس ولاية الخرطوم ، الا ان الأسبوع الجاي في أمطار قادمة (فجأتن) في الخرطوم. اللهم هل بلغت اللهم فأشهد؟!!!!!

    1. كان حددتي ليهم اليوم والساعة والحي الوحييييد والشارع الحتنزل فيهو المطره والمجري الحيصرّفا ! برررررضهم ح يتفاجأوا !! والمطرة ح تتفاجأ اكتر اننا اتفاجأنا !

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: