رباعيات عامية

صنقع: صنقع الرجل أى رفع رأسه فوق (زى العاوزين يكبو ليهو قطرة فى عيونو)
دنقر: عكس صنقع ودنقر الشخص رأسه أى خفضه (زى القاعدين يحلقو ليهو) ودنقير الرأس نحو الأرض دليل على الخجل والإنكسار لكن حرامية اليومين ديل حكمت الله زول بيدنقر راسو مافى ( مش أتحلل؟ يبقى خلاس )

سردب: السردبة (بضم السين وتشديد الباء) يقال انها فى العامية هى أعلى الظهر وسردب الشخص اى وقف منحنياً دون حراك علامة عدم تفاعله وإكتراثه للأمر كقولهم : والله الحياة بقت صعبه لكن مسردبين ليها (سردبو كده لحدت الولار يحصل عشرين ألف)
صهين : الصهينة هي إنو الزول يشوف الحاجه ويعمل رايح (وأحسن نقيف هنا) !!
دغمس : دغمس الشئ أي (جاطو) وغير وبدل في ملامحو (ذي شريعتنا دي)
شوشر : الشوشرة هي إصدار الشخص لأفعال من شأنها تدكير صفو آخر .. كقول متحصل النفايات لمواطن ما عايز يدفع إلا بأولرنيك خمسطاشر : (يا أخونا أدفع وما تعمل لينا شوشرة)
غتغت : من الغطاء حيث قلبت الطاء تاءاً كقوله : والله الجماعة غتغتو ليك الموضوع جنس غتغته (أي لحقوهو أمات طه) !
فرفش : فرفش الشخص إذا فرح وإنتشي (يا حليل الفرفشة)
شركن : الشركنه هي الظن السئ الذي يمنع المواصله في الفعل كقول أحدهم : أنا عاوز أمشي شركة (قنابير) دي أخليهم يشتروا ليا بيت بالأقساط لكن بس (مشركن) !
كبكب : الكبكبة هي الإفراط والتنطع في الإستقبال كما نشاهده عند البعض (لمن يشوفو ليهم مسؤول)
سلبط : السلبطة هي إدعاء ما ليس لك كأؤليك الذين (يتسلبطون) في الميادين العامة ويدعون ملكيتها (بي عين قوية كمان)
سمسر : السمسرة هي أن تأخذ عمولة علي إتمام (بيعة) ما .. كتلك الفتاة التي أخذت خمسين ألف دولار (سمسرة) لأنها قامت بإتمام صفقة (اليخت الرئاسي) !
كركر : الكركرة هي حالة الزهج المصحوب بغضب (الشعب كلو الأيام دي مكركر)
فرتق: فرتق الشئ أى جزأه وقسمه بعد إجتماع كقولك : تفرتقت الأحزاب المعارضة إلى أجنحة (هى بدون أجنحة ما عاملا حاجه) .. أو كقولهم فلان (فرتق الحفلة) أى إفتعل شجاراً فقام الفنان (شال عدتو ومشى)
كنكش : كنكش فى الشئ اى قبض فيهو قبضة (الجن ما يفكها منو) ككنكشة بعض المسئولين فى مناصبهم
برطع :البرطعة هى الجرى فى الفضاء بلا قيود أو موانع يقولون ان فلاناً بعد أن أمسك بزمام المسئولية فى المصلحة أصبح يبرطع فيها ساااى أى اخذ يفعل ما بدا له بصورة حرة دون قيود أو موانع مفيش حد بيسألو
فنجط: الفنجطة هى حالة تصيب الحمير وهو نوع الجرى بصورة غير منتظمة وغير متناسقة وغير مدروسة إذا أردت أن تشاهده فتفرج على أحدى مباريات القمة
هضرب: الهضربة هى الهذيان والكلام الخارم بارم الذى يتفوه به الشخص عندما تتملكه الحمى ويمكن للشخص أن يهضرب بدون حمى إذا ما واجه موقفاً صعباً كتلك الزوجه التى سمعت أن زوجها قد قام بتطليقها فقالت : عادى ما مشكلة بس خلوهو يطهر ليا البيت ويضرب ليا الأولاد جير
مزمز: المزمزة هى تناول الطعام فى لذة وتأنى خاصة المشويات والمحمرات والمتبلات والمقمرات وكده معقولة الزول يمزمز ليهو بى (بوش)؟
زرقن: الزرقينة هى أداة تستخدم فى ورش الحدادة والنجارة لكبس القطع وضغطها ويقولون ان فلاناً قد زرقنوهو فى التحقيق زرقنة شديدة (أكيد ما عندو ضهر)
طربق: الطربقة هى الكلام الكتير دون فائدة يقولون فلان طرباق أى (رادى وإتفتح) والطربقة من الممكن أن تصاحبها هضربة كما نشهد الأن تصريحات المسؤولين فيما يختض بملفات الفساد .. يوم تحكيم ويوم تحليل ويوم شنو ما بعرف داك !
سلفق: السلفقة هى الحصول على المبتغى دون إستحقاق كقولهم والله الزول ده وصل نايب مدير سلفقة ساااكت … (ما سلفقة كيف إذا هو كان شغال عامل بوفيه )
عصلج: يقولون الصامولة عصلجت بمعنى أنها أبت أن تنفك من المسمار ووقفت فى حتة واااحدة وفلان راسو معصلج أى لا يقبل التفاهم والموضوع معصلج (ذي موضوع ملف هيثرو ده)
خرخر: الشخص الخرخار هو ذلك الشخص الذى لا يتقبل الهزيمة أثناء اللعب ويغالط فى مجريات اللعب والنتيجة ولا يمتثل لقانون اللعبة وربما قام ببعض المخالفات حتى يكون الفوز من نصيبو وكده
حندك: يقولون ان فلاناً قد حندك فلاناً إذ أخذ الأول فى التلذذ بشئ أمام مرأى ومشهد الأخير دون أن يكون للأخير مقدرة التلذذ بذلك الشئ وشعب محندك إذ كان معظمه يرى القلة تتلذذ وهو قاعد يعاين بي عيونو
طمبج: طمبج الشئ أى زادو مويه أكتر مما يجب ، وشوارع وساحات مطمبجة بالمياه يعنى مليانة موية من الخريف الما قاعدين يستعدو ليهو ده .
بشتن : بشتن الشئ أى زاده قبحاً والشخص المبشتن هو ذلك الشخص الذى يرتدى ثياباً قبيحة بالية غير متسقة والشوارع المبشتنة (زى شوارعنا دى)
حمبك: أنظر خرخر
عنقد: العنقدة هى أن يحول شخص أو شئ دون إكمال موضوع ما كقول أحدهم: والله كنت جاييك لكن بس ناس المرور عنقدو ليا … (عربيتو ما مرخصة) !
كسرة :
جهجه : جهجه الشئ اى أفقده البوصلة وخلاهو ما عارف الإتجاهات مما جعله يفقد السيطرة على الأشياء
كقول أحدهم: أول ما تظهر قضية فساد يجهجهوها ليك جنس جهجهه
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و؟

Advertisements

19 تعليق

    1. مبروك .. لخمني مندوب واقف فوقي يندبوهوا ان شاء الله ..

      1. اخجل آ جنوبى !

      2. الله يبارك فيك ، و عقبالك !!
        المرة الجاية اطرد المندوب ..

  1. تحلل : التحلل قديما ان تحلل نفسك من مال تشك انه دخل عليك بطريقة غير مشروعة ( الان تسرقه عمدا وتتحلل منه بعد اخذ الارباح وجزء من راس المال المسروق ) .
    تخدير : وهو ان تخدر زول بالكلام وتقول ليهو انا حاعمل ليك كده واعمل ليك كده ( الحكومة بعد خلّصت كل الكلام الممكن تخدرنا بيهو جابت لينا مخدرات عدييييييييل شان التتخدير بالكلام بقي ما بشيل فوقنا ) صحي حلول متكاملة !!
    كلوج : والكلوجه هي المشي الغير عديل في الحكم مما يسبب كلوجه في الكرعين ( 2015 جيبوا لينا زي بوتفليقة بالكرسي المتحرك ) وفوزوهوا كمان !

    1. بوتفليقة قاعد في عجلة وشغال بي عقله بس بس بشه قاعد في شنو ما عارف وينقز سااااااااااااااااكت

    2. دى قويه الصراحه

  2. طنطن : تحدث بصوت منخفض لا يسمعه الا هو (كطنطنة الشعب فى قضايا الفساد) ..
    طاعن : اى حاول ايذاءه بالكلام السئ الذى يعرفه عنه (مطاعنات نافع وعلى) ..
    ورجغ : اى تحدث حديثا كثيرا غير مفهوم او غير ذى فائدة (تابع حسين خوجلى فى برنامجه) …

  3. خندق : بمعنى مارس الخندقة وهي من علامات الأثرياء الجدد , وايضا احيانا بمعنى لبد ليهو بي حاجة !!!
    شك : وهي من مصطلحات الكوتشينة بمعنى شال الورق ( نفسه ) وادخله في بعضه بعضا , وتقال ايضا في التعديلات الوزارية !!!
    ظربن : اي مارس الظربنة والاسم ظربون !!!!!!!!!!!!!!!!

    1. ياسين شمباتى | رد

      يخسى عليك يا انت ,,

      1. والله من الحاصل دا كل شي اصبح ظربن وفن بتمها ليك جنوبي ياناس ما كتمت امرقو ساكت كتمت كتمت كتمت

    2. انت صحي الخندقاوي ده رايحه ليهو حنة ولآ شنو ! شمباتي حيعمل علامة الخندقة غصبن عنو !!
      ظربون حسن احمد ؟

      1. ياسين شمباتى

        هههههههههههههههههههههههههههههههه ,, بريييييية..
        ماقلنا ليك معفيييييييييييييييييي

  4. اقبض حرااااااااااااااااااااااااااااااامي :
    الخرطوم:الانتباهة:
    كشف رئيس مجلس إدارة صحيفة «الإنتباهة» د.بابكر عبدالسلام، عن استيلاء رئيس مجلس الإدارة السابق الباشمهندس الطيب مصطفى، على مبلغ «175» مليون جنيه لمصلحته الشخصية، عبر سحبها من أموال الصحيفة إبان فترته السابقة، وسحب مبلغ «7» ملايين جنيه «مليار بالقديم» بدعوى أنها لصالح حزب منبر السلام العادل. وأوضح د.بابكر لـ«الإنتباهة» أن المبلغ الأول سحبه الطيب دون علم مجلس الإدارة، وأن المجلس اكتشف سحب المبلغ بعد عام من سحبه، وعقب تسلمهم لرئاسة المجلس، وقال إن الطيب سحب أيضاً «247» مليون جنيه لشركة إعلانية تابعة له. وتحدى الطيب في إبراز إيصال مالي واحد، يثبت فيه أنه سدد قيمة أسهمه المدعاة، وأوضح أن رأس مال الشركة يبلغ «40» مليون جنيه، فضلاً عن «6» ملايين ريال سعودي قام بإيداعها المدير العام سعد العمدة، وقام بتسليمها إلى المدير العام السابق الفريق إبراهيم الرشيد. وتساءل عن منطق ادعاء الطيب أنه صاحب «55» سهماً، بينما يودع سعد العمدة قيمة أسهم من ماله الخاص لسداد مديونية لصالح «الإنتباهة»، وتسديد احتياجاتها المالية. لافتاً إلى توضيح الحقائق بالوثائق للإعلام والرأي العام لاحقاً.
    اها يا ربي راح يتحلل؟؟!!

    1. الطير المهاجر | رد

      ما المهمة انتهت (بفصل النص التحت)عشان كدة لازم يطلعوا الفضائح ويرموهو في اقرب كوشة مع الاعتذار للكوشة ذاتها لانها ما بتقبل زي الاشكال دي.

  5. الانتباهة
    نشر بتاريخ الإثنين, 05 أيار 2014 08:35
    قال مدير شرطة الولاية الشمالية اللواء شرطة عباس الطيب، إن السلطات بالولاية ستقوم باتخاذ كل الإجراءات القانونية اللازمة تجاه المتسللين الذين تم القبض عليهم مؤخراً بواسطة القوات المشتركة السودانية الليبية على الحدود بين البلدين. وأكد الطيب قدرة قوات الشرطة والأجهزة الأمنية الأخرى بالولاية على حماية حدود البلاد، محذراً من أخطار الهجرة غير الشرعية.
    بالله برضو شوف ناس تتسلل وناس تتحلل البتسلل بحاكموه والبتحلل للبيت بودوه عجيييييييييييييييب

  6. الطير المهاجر | رد

    جرجر : اي جر (بتشديد الراء) الشئ ، زي جرجرت الواوات الشهرية بتاعات الاستاذ جبرا مع خط هيثرو الما معروف لحدت هسي دا ماشي وين..

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: