ثلاثيات عامية

• رزع : تستخدم دائماً في حالة قفل الباب بشده يقال : رزع الخريج الباب بعد المعاينة كناية على صعوبة الأسئلة التي طرحت عليه (من شاكلة عدد المسلمين الماتو في موقعه بدر كم)
• شلع : شلع الشخص أي أحتسى الخمر وشخص (شالع) أي واقف لمبة

• طبز : تستخدم عند أدخال السبابة في العين .. والطبزه هي الفعل الذي يأتي برد فعل سيئ وغير متوقع كطبزة (التحلل)
• شخت : شخت السائق بوهية العربة أي انه (حكاها ) – ما حكومية زكده والشخت هو بقايا لحم الذبيحة وهو لا يؤكل (لكن الأيام دي ناكل ابوهو)
• طفش : أي ترك المكان وتوجه إلى جهة غير معلومة وهي تتلازم وكلمة (خلى) كقولهم : الراجل طفش وخلى للمرا البيت أو كقولهم : معظم الأطباء طفشوا وخلوا البلد .
• ظبط : ظبط أي قبض بالثابتة كقولهم تم ظبط هيئة مياه الشرب وهي تبدد 20 مليون دولار .. وقد كان في زمان غابر يقال لقسم الشرطة (الظبطية) .. والتظبيط يعني الإتقان كقول الموظف للمواطن : خلاس (ظبطتا ليك الموضوع) طبعن بعد ما أخد المعلوم
• تكل : تكل الشئ أي (أداهو سنده) وختاهو على جنبه كقولهم : تكل الموظف الملف (ما لازم يتكلو؟ هو إنتا دفعتا؟)
• كضم : كضم الشخص أي وقع مغشياً عليه وأصبح (لا بيودي ولا بيجيب) كقولهم : مما المدير عرف بالإختلاسات وقع كاضم .. كما أن (الكضم) – بضم الكاف والضاد- هو (الخد) والجماعة أبان (كضوم) أي ذوي الجضوم المنتفخة المتورده كناية على إنتفاخ خدودهم وتوردها من الأكل .. (الحلال طبعن )
• كشم : الكشمة هي الإبتسمة الصغيرة في غير موقعها للتشفي كقولهم : مالك يا زول بتتكشم فيني كده
• قرم : قرم الشئ أي أطبق عليه أسنان فكيه كقولهم : قرم الجقر رجل المريض وهو بالعنبر (حصلت في مستشفي الدمازين)
كما أن الشخص القرمان هو الذي لم يتناول اللحم منذ فترة طويله (يتناولو كيف والكيلو بالشئ الفلاني) والقرمة (بضم القاف) هي جزء من جزع شجرة كبيرة يقطع عليها الجزار اللحم (لما كان في لحم)
• خمش : الخمش هو أخذ الشئ بملء اليد والخمشة من مزاياها أنها تكون مرة واااحده ثمينه (وعلى ماليزيا)

• زعط : تقال عند نزع الصوف أو الشعر كقولهم : زعطت الفنانة عوضية باغات شعر زميلتها حنان رصيد (أختلفوا في النقطة) .. كما يسمي للشخص قليل القيمة للتقليل من شخصيته (زعيط)
• معط : كما زعط غير أن الشخص يسمى ( معيط)
• سهك : أي أزال النتؤ .. عملة معدنية مسهوكة أي لا تبين معالم رسومها .. وسهك فلان (مركوب النمر) أي مشي بيهو أكتر من النمر ذاااتو
• قطم : قطم الشئ اي قطع جزءاً منه بأسنان فكيه وشرطي مرور قطيم أي (ما بتفاهم) !
• لخم : أي شتت الإنتباه .. واللخمه هي حالة من الحالات التي تصيب المواطن عندما يأتيه بتاع العوائد مع بتاع النفايات مع بعض
• كبس : كبس الجزار اللحم في المصران أي أدخله بالضغط عليه عشان يعملو سجق (يا حليلو) .. كما تقال أيضاً عندما يغضب الشخص لدرجه التفوه (بي كلام كعب) كقولهم : الشارع كولو نفايات قام جانا المتحصل والله كبستا ليهو لمن آمن !
• غمت : أي دس داخل اليد كقولهم : الموظف دااااك كان ما غمتا ليهو شغلك ما بمشي
• خرت : تستخدم في لعب الميسر بمعني إستولي على المال كما تستخدم بمعني إزالة كقول إحداهن وهي تخاطب زوجها الذي طلب منها إعداد الطعام : إنتظرني لمن أخرت الحنة دي
• هبر : الهبر هو الأكل بكميات كبيرة (في المرة الواحدة) كهؤلاء الذين (هبروا) مكتب الوالي
• لغف : ك (هبر) غير أنها تستخدم للأشياء السائلة كالسيولة النقدية واللغف والهبر يعتبران من مهددات بقاء الأمم وإرتفاع سعر الولار مقابل عملتها الوطنية
• لهط : اللهط هو الأكل بلا رحمة حتي لا يتبقى في المائده شئ كقولهم : لهط المسؤول أموال المحلية (يعني ما فضل ليهم تعريفه في الخزنه)
• لفح : اللفح هو (الحتف) في سرعة وخفة يد كقولهم : لفح الشماسي الموبايل من الفتاه عندما كانت تتحدث به وعند القبض عليه قال ليهم : يا جماعه أهو ده موبايلكم أنا عاوز أتحلل فكوني ! …. فكوني قال !!

كسرة :
• طنش : بمعني صهين (ذى طناش وصهينة المسؤولين من الواوات التحت دي)

• كسرة ثابتة (قديمة) :
• أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و؟
• كسرة ثابتة (جديدة) :
• أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و؟

Advertisements

23 تعليق

    1. وطني السودان | رد

      مبروووووك

      1. شكرًا جزيلا مصطلح بنعرفوا من زمان
        وحسه جزاك ……….

    2. مبروك اطلع تنزل البرنجية الشي شنو

    3. مبروك يا حبيب
      شنو الايام دي بخيل ده لا مقمرن لا متوسب ..

  1. وطني السودان | رد

    مصطلحات انغاذية

  2. وطني السودان | رد

    اهلنا زمان بيقولوا:_(سفحا ولفحا سيدو بعيش؟)

  3. لخرطوم: حافظ الخير

    هدد المتهمون بتجاوزات في الأراضي والأموال بمكتب والي الخرطوم، بكشف معلومات خطيرة حول الاتهامات التي وجّهت لهم، ويجري التحقيق معهم حولها، هددوا بما أسموه كشف المستور.

    وقال مصدر لصيق للتحريات ان المتهمين تم توقيفهم بحراسة ادارة التحقيق الجنائي التابعة للمباحث الجنائية بالخرطوم بحري. وأكد المصدر أن جملة الأموال السائلة التي أعادها المتهمون 2 مليار جنيه فقط. و15 ملياراً من المال الذي تم استرداده عبارة عن عقارات وأراضي وعربات، وأصول.

    1. ما ياهو اللهط كده وﻻ بلاش هسع الحرامية االبنطو البيوت لو قرو ليهم قراية تتفعهم ما كان لقوا ليهم شغلانية فى المحلية وسرقوا واتحللو

    2. سجمنا .. كشف المستور !!؟ يا ربي نحنا معاهم !
      ولا هم هددوا منو ؟ ديل ما عارفين حاجة ساااكت ! والله هسي يفرجوهم شريط شريطين فديو من المصوّر ليهم يرقدوا سلطة , يمين كان حكموا عليهم بالاعدام ما يقدروا ينطقوا , كمان الكيزان بيلعبوا ! أجي !

      1. ههههههههههههههههههه , ولا تجى ولا شئ ,,,
        فى واحد فيهم خريج ابتدائى ! اححححححححححححححححححح

  4. رصد : يعني تحصل حاجة وتقوم الناس كلها ترصدا وتبدأ تتكلم عنها , اها يقوم المرصود ذاااتو يترصد لي رصدنا دا ويستفيد منه بررررضو لي صالحه وخراب بيتنا زي الحصل ده :
    رصد لها ميزانية قيمتها مليار ونصف
    05-05-2014 04:21 PM
    الخرطوم- محمد

    نظمت أمانة الدعوة والتزكية بحزب البشير أمس الاثنين ورشة أطلق عليها (تعظيم حرمة المال العام) تحدث فيها الدكتور عبد الرحمن الشيخ احمد رئيس دائرة الفتوى بهيئة علماء السودان وحضرتها القيادات النقابية والتنفيذية بولاية الخرطوم وأشارت المصادر الي ان الندوة صاحبها فساد مالي واضح من خلال المبلغ الكبير الذي رصد لها في الوقت الذي يبحث فيه الكثير من الأطفال عن قوتهم بين أكوام النفايات في الأحياء .

    شوف زي ديل شالوا مننا مليار ونص عشان يقولوا المال العام حرام ! تحرم عيشتكم ان شاء الله نحنا ما عااارفنوا حرام ! هسي المليار ونص دي ذاااتا ما حرام ما مال عام !!
    زمااااااان ونحنا شُفع بنلعب وعندنا جار عندو كلب كعب خلاص وكنا بنتحدي بعض البجي جاري جمب الكلب ويفوتوا بدون ما يعضيهو , مره واحد مننا جا جاااري وعِتر قدام الكلب ووقع والكلب اختار ( ألين حتة فيهو ) وعضاهو فيها , طبعا الكواريك ضربت ونحن نسوي عضاهو عضاهو , جوا الناس الكبار يسألوا فيهو عضاك وين كدي نشوف ؟ وهو يسوي ليهم ما عضاني والله ما عضاني .. هسي الحيكومة دي الا نسويلا سوات صاحبنا ده ونكورك ما سرقوني والله ما سرقوني !!

    1. هههههههههههههههههههههه ,, صحى هو عضاهو وين !!؟

      1. ﻻزم تكتب السؤال؟ اضحك وبس

      2. في عضم الشيطان يا شمباتي ..

      3. ياسين شمباتى

        هههههههههههههههههههههههههههههه ,,, بضحك وبكتي يا ركس ,, شن نفرك ؟؟
        جنوبى …. ودا لين !؟ بريييية منكم يا الجنوبيين ,,, نان القاسى عندكم شنو ؟؟

    2. وطني السودان | رد

      والله يالجنوبي شكلك من قمت بتاع محن ههههههههههه

  5. شِرق : تكون بتشرب في موية وتقوم تسمع ليك خبر او تقراهو لحظة الموية في خشمك تقوم دار تضحك وتشرق والموية تطلع بي نخرينك , زي الخبر ده هسي قريتو وانا بشرب موية وشِرقتا .
    اشراقة وزيرة تنمية الموراد تتزكروها ( الما بخلوها تمرق من البيت الا يكون معاها اخوها ديك ) قبل فترة بشرت السودانيين انه قطر دايرة سودانيين كتااار والدار يمشي قطر يقدم عبر موقع الوزارة , أها الليلة جاء واحد وزير دولة في وزارتا وقال للسودانيين انا مشيت وسألت القطريين عن الفيز الحا تسافروا بيها وقالو ما عندهم ليكم الحبه دي بس كان عندك 15 خبير رسلوهم لينا !!
    قرض : يكون عندك شئ نسيتو بره وتجي تلقي الفار قرض منو , او قرض بعني انتهي من الوجود زي الديانصور او قرض بمعني القرض الوااحد حقنا ده بتاع المثل البقول اليسوي القرضاوي في كريت تلقي في جلدا ( أي اتفاق مع القرضاوي ببح يا شوشو قالوا خرمان لي خطبة الجمعة دي وما لاقيها ) !

  6. انا عايز اكبس للحكومة دى !
    افهمونى صاح عليكم الله …..

    1. جنوبى وضح المقصود وبادب لو سمحت؟

      1. ياسين شمباتى

        لاااااااااااااااااااااااااااااااااااااا

  7. يا أخونا مالكم قااايمييين على أخونا جنوبي دا مالو سوا ليكم شنو؟؟ صدقوني جنوبي دا (فاكهة) القمردينة ولو إنو في بض المرات بقوم (أطبز طبيزي شييين) وبنسى إنو معانا (قمردينات) في القمردينة الله يهديه ويخزي شيطانو !!!! ….. سلااااام ….

  8. كل الاحترام لحراميه البيوت على الاقل هنالك مخاطر قد يكون فى نط الحيطه بلاقيه كلب تحت والا حفره والا تكون الحيطه عاليه يقع يكسر رقبته.. يعنى فى شويه مجهود وتعب ومخاطر
    ….

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: