وتعملو رايحين

مما لا شك فيه أن للعلماء فضل ومكانة سامية وأدوار عظيمة يجب عليهم ان يقوموا بها ومسؤولية كبيرة وعظيمة تجاه مجتمعهم إذ عليهم التبليغ إلى الناس لكل ما يصلحهم ويصلح دينهم وحياتهم كما عليهم أن يكونوا معايشينً لواقع المجتمع عالمين بما يفكر فيه الناس وما يطرأ على أساليب تفكيرهم وما يخالج نفوسهم حتى يضعوا الدواء على موضع الداء بالحكمة والرفق والأسلوب الحسن.
كما أن الواجب على العلماء تنوير الناس وتقريبهمإ لى الحق وتعديل السلوكيات والظواهر غير الحميدة التي تظهر في المجتمع من حين إلى آخر والجهر بكلمة الحق .
في معظم البلاد الإسلامية اختفى علماء الحق الفاضلين الصادقين الأصليين وظهر بدلاً عنهم علماء (تجميع) نذروا أنفسهم لتمرير كل ما يخلف الدين ويوافق هوي السلطان ولتحقيق هذا الأمر تجدهم تارة يقومون بإختلاق المسوغات الشرعية المشوشة والمشبوهة محاولين بذلك الإلتفاف حول القضايا وتجميل الباطل وتبرير الفساد والظلم طمعا في تحصيل رضا السلطان ونيل وده وماله وتحصيل بعض من عطاياه و (برادوهاتو) !
مناسبة هذه الرمية كما يقول صديقى (د. البوني) هي هذا السكوت البهيم الفخيم الذي يمارسه علماؤنا الأفاضل تجاه ما يحدث من أحداث جسام في المجتمع أقلها غياب العدالة حيث يتم إطلاق سراح السارق والمزور والمحتال بعد أن يقوم بدفع (جزء) مما أخذه من مال بفقه لم نسمع عنه في الأولين ولا الأخرين في التعامل في مثل هذه المواقف أسماهو (ترزية القوانين) بفقه (التحلل) !
لم نقرأ لكل هيئات علماء السلطان (بيانا) يشجبون فيه تعامل (دولة الإسلام) مع (السارق) بهذ (اللطف) وهذه الرقة ولم نسمع أحدهم يقول أن هذه سرقة (حدية) من الدرجة الأولي فيجب أن ينفذ في فاعليها حد السرقة أو أنها تصل إلى حد الحرابه (هي الحرابة دي شنو) إذا كان غياب هذه الأموال عن خزينة الدولة يمكنه أن يساعد في موت آلاف المواطنين (الما لاقين حق الحقنة) !
بماذا يمكن أن يبرر هؤلاء العلماء سكوتهم عن أحداث جسام كهذه وسرعتهم في الإدلاء بالتصريحات وتفصيل الفتاوي وإصدار البيانات في أشياء تعد من صغائر الأشياء مقارنه (بالتحلل) !
أين ذلك الشيخ المثير للدهشة ( صاحب نظرية : الرجل لم يصمم لمرأة واحدة ) وقاهر المطربة شيرين المتصدى لكرة القدم النسائية والمحتج على توزيع (الواقي الذكري) أليس من واجبه الافصاح المباشر والتعبير عن رأى الشرع بقوة وشجاعة (ولا هو بس تخصص نساء وولادة) !
بالمناسبه هذا الشيخ (المتخصص) سبق وأن صرح وبكل فخر بانه ( صوت مرتين للرئيس فى الانتخابات الاخيرة ) يعني (مزوراتي) فهل يرجى منو أن يقف (ذاااتو) ضد السرقة والإحتيال والتزوير
أليس واجب علي (هيئات علمائنا) المختلفة والتي خرجت علينا ببيانات قوية تدين فيه الانقلاب على الشرعية فى مصر وتستنكر ( سفك الدماء ) و (انتهاك الاعراض ) و ( اهانة الكرامة ) أن تسأل نفسها (كيف جاء هؤلاء)؟ .. يعني جو راكبين (أمجاد) ؟ .. أليس هناك ذرة من الحياء !!
أنه امر مخزي (والله) أن يقف معظم (يعني ما كل) علماء الأمه (متفرجين) لما يحدث الآن من (أهدار) للمال العام وتلاعب به بعد أن صار نهج الدولة في التعامل مع الفاسدين هو (الغتغته) والجودية والتسوية و(التحلل) !
أين صوتكم أيها العلماء؟ هل جعلتم الدين وسيلة لبلوغ الشهوات وتحقيق النزوات ونيل المطالب (والراحات) ؟ لقد أفتى بعضكم بعدم سفر الرئيس .. (هسه في ذمتكم سفر الرئيس وللا التحلل ده)؟ كما أفتي بعضهم بحرمة (التفاوض ) مع الحركة الشعبية قطاع الشمال ووصل بهم الحد فى اصدار فتوى ( بتكفير) الموقعين على ميثاق كمبالا كما أصدروا فتاوي أخري لا تقل (عدم إختصاص) من هذي !!
طيب ما أهو إنتو شغالين كويس .. وبتطلعوا فتاوى ذي العسل طيب ما تطلعوا لينا فتوى في إنتشار الفساد و(التحلل) ده؟ وللا بس القصة مما تجيب ليكم (هواء) مكنتكم تقيف .. وتعملو رايحين؟
كسرة :
العبدلله كلما يكتب عن (سكوت العلماء) يجيهو زول يقول ليهو .. ما تكتب عن العلماء ديل دمائهم مسمومة فيرد العبدلله عليه .. ياخي هم ديل عندهم دم !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و؟

Advertisements

33 تعليق

  1. عملت رايح وشلت البرنجييييييييييييييييية

    1. مبروك يا مندهش والله عجبنا وسرانا

      1. أعجبك جديد وليداتك يا دا !

    2. مبروكة يا المندهش و رايح – و الله لاكين ادهشتنا جنس اندهاشة .. و كمان مبرطع فى اولها برااااك شايف ..
      هذا لا يجوز و انما يجب عليك ان تنتظر, و عندما يأذن لك جنوبى يمكن ان تجازفها (رايك شنو فى الفتوى دى)؟؟

    3. ياسين شمباتى | رد

      يشيلك شنو اقول ليك !!

  2. قال رسول الله صلى الله عليه وسلم ( إنها ستكون أمراء فمن صدقهم بكذبهم وأعانهم على ظلمهم وغشى أبوابهم فليس مني ولست منه ولا يرد على الحوض ومن لم يصدقهم بكذبهم ولم يعنهم على ظلمهم ولم يغش أبوابهم فهو مني وسيرد علي الحوض )
    وهؤلاء هم ( علماء السلطان )
    ولكن الرئيس العندنا دا ظاهرة كونية يستحيل أن تتكرر في العالم مرتين فهو ( سلطان العلماء ) فهو بشوت في أي إتجاه حسب المصلحة ولديه من الشهادات ما يؤهله للعب هذا الدور فهو الرئيس – العسكري – المنتخب – الدكتور – الشّيعي – العالم – الرقاص – الفقيه – الفنان – الفتان – السنّي – ووووووووو علماء شنو يا بروف البجو جمبو ؟

  3. غرييييييييييبة ناس القمردينة كلهم عاملين فيها رايحين !!!
    غايتو اظني ح أبرطع فيها بمزااااج
    العالم المفتي المنافق الذي أفتى لهم و يرى المنكر ولا يتكلم و الحاكم الذي أهلك الحرث والنسل ولا نظن له توبة إن كان له نية توبة .فهم سيأتون يوم القيامة لا محالة يقولون هؤلاء أضلونا السبيل وهم يومئذ أولياء بعض وبئس الأولياء
    وحسبنا الله ونعم الوكيل .

    1. ناس القمردينة يا جوك مع اكل العيش تخيل ناس تحاول تتسلل تحصل عمل في ليبيا ينقذوهم في الصحراء يحاكموهم وناس تتحلل يسيبوهم

      1. وهم زااااتم متسللين ليييييه ما كانو يتحللو ساي
        وكتمت كتمت
        التحية ليك وانت كاتم !

      2. صحى و الله يا الغلبان, هم اصلا محاكمنهم ليه؟ ما هو من ساعة ما رجعو و ما وصلو يعتبرو اتحللو خلاص!!
        و الا ااااااه ,, هم ما كملو التسلل بتاعهم .. بصراحة غلطانين. كان المفروض يوصلو الى مبتغاهم و يعيشو كوييييييس بعدين يرجعو يقولو للجماعة نحنا جيناكم صادين عاوزين نتحلل من التسلل الطلعنا بيو !!
        حاجة توجع القلب و الله ….

      3. هههههههه انتو نسايين خلاص ! الفاتح جبرا ده مش قال :
        – أيها المجرم فشلك في إكمل تنفيذ الجريمة يعني عقابك !
        – أكمل الجريمة بنجاح ودع لنا الباقي
        – أياك ,ان تكتشف في نص الطريق
        – أكمل الجريمة .. المكافأة في إنتظارك
        – لو فشلتا أسأل روحك ما تسألنا
        هسي ديل مش فشلوا ؟ وتييييييب

  4. يا جماعة ما فيكم زول عايز إتحلل كلوكلو ؟؟

    1. يا خوي مبروكة عليك البرنجية بس كنت مندهش قبل لحظات كنت هنا ما كان في قمردين جديد

  5. مبروووكة عليك البرنجية أخوي المندهش ( شكلو الجماعة لسه نااائمييين) !! وكدي حسع خلينا في الفرصة دي النسعلك سعااال ..
    أنت مندهش على شنو ولا شنو ؟؟ ما كل حاجة في البلد بقت (تدهش) ولا مش كده ؟؟؟؟؟ !!!! سلااااام ….

    1. الله يبارك في عمرك يا عمنا
      تصدق كنت مندهش زمااااان قبل 24 سنة يعني بعد سنة واااحدة من الكارثة
      و بعد داك زاد اندهاشي من أثر إنتكاسي . وأتعذر نعاسي . ولي عقدين أقاسي

    2. كل انواع الاندهاشة مرة عليه بس زي ديل ما مرووووووووووو عليه خلوهوووووووووو يندهش تقبل المرور نانو

  6. مثل دارفوري :
    شيخ تحت صلبو برادوياي ولاااااا بفتي ..

    1. وين الترجمة ؟
      عرفت الكلمة الأولى والأخيرة بس !!!

      1. الترجمة على الشريط

      2. الترجمة يا العامل رايح انو شيخ الحكومة بتديهو عربية برادو ينجعظ كدي ويخط صلبو في مراتب البرادو البااااردة وتديهو مرتب بالملايين ينضم كيف تاني ماااا الحكومة بقت ولي نعمته !! يعني معقول يخلي النعم الجااااهزة دي ويرجي شئ غايب لي بعديييييييين في الجنة ! ما بني ادمين برضهم هم ياخ .
        عندنا مره في البلد كان في مزارع ما لاقي الياكلو الليلة , والسنة كانت محل ! ناس الحكومة ادوهوا شوال قمح تقاوي عشان يزرعه , صاحبنا ما صدق شال الشوال وغسل القمح نضييف وداهو الطاحونة دققو واكل مظبوووط هو واولاده , نهاية الموسم جو يشيلو نصيبهم في المحصول والزكاة لقوا صاحبنا واطاتو دلجه ساااكت , قالوا ليهو وينو القمح ؟ قال : ( حاضركي تا غيبيرو تيقرو ؟ ) يعي الحاااااااضر في يدنا ده نغيبه تحت الواطه ونقعد .. يا قام يا ما قام !!
        هسي يا بروف دايرم يجازفوا بالنعم الملموسة دي كووولها ؟

      3. عفيت منو عمنا المزارع دة.
        و بنفس المبدأ بتاعو دة , الناس شغالين ,, يعنى الموظف لمن يلقى ليو ورق مروس و موقع و مختوم طوالى يقوم يشترى و يبيع و يحول ملكيات بيوت و اراضى و اخذ امتيازات ,, و الا البيخليو شنو ينتظر ماهيتو اخر الشهر عشان يوفر منها و يشترى العايزو ,, مش ممكن يشلعوهو قبل ما يشترى (يا قام يا ما قام ) !!!!!

    2. ياسين شمباتى | رد

      غايتو انا (….) برف ! يكون جاياناى برادو ؟
      لوووووووووووووووووووووول

      1. ههههههههههههه ان شاء الله تكون جاياك برادو بس !
        وما بقدر اقول اكتر من كده عشان نانو محذرني !!

      2. كويس يا جنوبي بقيت تسمع الكلااااام .. شاااااطر !!! برضو لي هسع زوووول قال لي ود العم سااام وييين مااافي !!! … سلاااام …

      3. ياسين شمباتى

        هههههههههههههههههههههههاااى ,,
        ارقد ياااااا رز

  7. كدي يا أخوانا (خبراء سرقات الآثار) قولوا لينا كان الكلام دا صحي ولا ما صحي ؟؟ لأنو أكان صحي دي تبقى سرقة القرن مش الموسم !!! والخبر هو:
    قبل 7 شهور إكتشفت شركة تركية تعمل في رصف طريق دنقلا/صادنق (عن طريق الصدفة) مدينة أثرية كاااملة غرب بلدة صلب بالقرب من دنقلا، وهي تعود للملك (أمنيوفيس الثالث بناها لزوجته تي) كما يقول المصدر ، وبحسب شهود عيان من أهالي المنطقة فقد شهودت تحركات مكوكية بالموقع من مسئولين حكوميين ومعهم مسئولين من الشركة المنفذة للطريق !! وشوهدت طائرة هليكوبتر تهبط وتقلع من الموقع بعد منتصف الليل رغما عن أن هذا مخالف لقوانين الطيران المدني !! حيث لا يسمح لطائرات الهليكوبتر بأي تحركات ليلية إلا في ظروف تقنية معينة ومنها توفر نظم ملاحية تدعم الطيران الليلي بالمنطقة !! وبعد ذلك إنسحبت الشركة من المشروع قبل إكماله بحجة (إفلاسها) !! وقد تسرب مقطع فيديو يوضح كمية ضخمة من (الآثار المصنعة من الذهب الخالص) لا تقدر بثمن (نهبت) من الموقع !! ولو صح الخبر، فقيمتها لا تقل عن مليارات الدولارات !!!! وقد أرسلت المقطع والخبر لأحد النافذين بالسودان والذي أرسله بدوره (لمسئول كبيير) بجهاز الأمن للتحقق والإفادة ونحنا في الإنتظار !!! أصلو البلد بقت ما عندها وجيع فهي مستباحة لكل (من هب ودب لينهب) ودقي يا مزييكة !!! … سلاااام ….

    1. انا يا نانو شفت مقطع الفيديو ده في الواتساب وعندي ملاحظات فيهو : اولا يد الزول البتنضف في الموميا اللو افترضنا انه منقب كانت بيضاء وحتي ظهر جزء من وش الزول ده وبرضو ملامحه ما سودانية , تانيا الموميا لفرعونية بيضاء حسب الملامح ونحنا في المنطقة بتاعتنا فراعنه سود وحتي في مومياء تانية برضها بيضاء , ثالثا حسب تماثيل التماسيح الكتيرة داخل المقبرة فالتماسيح دي كانت بتعبد عند الفراعنه المصريين باسم الاله ( سوبك ) ومعابد التماسيح كانت في أمبو و الفيوم وعبدة التماسيح ديل كان بيفتكروا انو بعد الموت الزول بيتحول لتمساح عشان كده كان بيدفنوا تماسيح مع الزول عشان تساعده في التحول داخل المقبره , طبعا ما بستبعد الحكومة تعمل حاجة زي دي في معابدنا بدليل انها فاكه عمليات التنقيب سااكت كده للناس عشان هي تلغف معابد جدودنا الفراعنة السود ( طبعا انا فرعوني , فرعوني زول فاهمني ما فرعوني المعروفه ديك البتجنن دفع الله ) والحكومة عارفه مكان كل المعابد وقاعده تنهب فوقا , بس المقطع الانا شفتو ده تحديدا ما اظن عندنا . والله اعلم ..

      1. هههههههه – حلوة الفرعونى المجننة عمو دفع الله دى !!!

  8. جنوبي شكراً (جزاك….) على قول أخونا ود العبيد على التوضيح .. وأنت يا رااااجل أتاريك من ناس مس كاقنا وإحنا ما عااارفين !!!! … سلاااااام …

    1. يا نانو يا خوي كلنا من البلد الغالي ده الرخصوه ديل ومنك انت ما داير ريحه عنصيرة اها الرجعوها ديل ومن ناس ديل وا اسفاي ودبايوا ومسكاكني او مسكاقني او حتى مال مكواه مال مديد الفصلوه دون ذنب جناه وعموما هم ما خلو شي بنشال وما شالوه الا الكان شالوه ما بنشال وكان خلوووووه حرس الدار اها ليك حبوبتك قالت ليك

  9. ما حسيت انه في مفارقة في الكاريكاتير ولكن لا زيد احزانكم هههههه http://www.alrakoba.net/news-action-show-id-147891.htm

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: