حتى تكتمل الصورة

العبدلله إتصل عليه ظهر أول أمس (الإثنين) أحد فريق الإعداد للبرنامج المشاهد (حتى تكتمل الصورة) بقناة الشروق والذي يقدمه الأخ الأستاذ الطاهر على التوم وقد أخبرني المتحدث بأنني سوف أكون أحد المتداخلين عن طريق الهاتف في الحلقة التي تتحدث عن منهج الحكومة في مكافحة الفساد بإعتبار أن العبدلله هو المالك (الحصري) للكسرة الشهيرة وأختها الأشهر .
أوضحت للمتحدث أن العبدلله ليس لديه مانع بل هي فرصة لطرح الموضوع (سمع وشوف) عشان لانو المسؤولين لو ما بيقرو الجرائد إحتمال يكونو بشوفو التلفزيون وكده .

عند حلول موعد البرنامج قمت بفتح التلفزيون .. وأعلن الأخ الطاهر (مقدم البرنامج) عن ضيوف الحلقة وهم في الهجوم الأستاذ الصحفي النور أحمد النور والأستاذ محمد ضياء الدين ، عضو حزب البعث أما في الدفاع فكان الأستاذ أمين حسن عمر والأستاذ الأستاذ الفاضل حاج سليمان رئيس لجنة الشؤون القانونية بالبرلمان .
بداية ملأني الإندهاش في الجماعة (الجايين يدافعو) .. ح يدافعو عن شنو مثلاً ؟ والفساد يضرب بأطنابه زاكماً للأنوف .. حقيقة قد أشفقت عليهما فما من أحد عاقل بالغ رشيد يمكنه أن ينفي وجود فساد كبير في مؤسسات الدوله وإنو (الشغلانة باظت) وأصبح (الكنترول) عليها صعب بل مستحيل في فساد عم المركز والولايات حيث أصبحت أي ولاية (ضيعة) لواليها ومستشاريه ووزرائه وحاشيته كل (يضرب) بدون رحمة ودونكم ما حدث ويحدث في ولاية سنار وولاية الجزيرة والبحر الأحمر وسنار (خلاف الخرطوم) والتي يهدد فيها (لصوص التحلل) – كما جاء بصحيفة الصيحة مؤخراً- بأنهما سوف يكشفان المستور ويهدا المعبد على طريقة (عليا وعلى أعدائي) !
بدات الحلقة وأبتدر الحديث فريق الهجوم بقيادة الأستاذ محمد ضياء الدين وقد قال شجاعة كل ما يمكن أن يقوله أي مواطن وهو يري أستشراء الفساد بهذا الصورة الظاهرة (الما بتدسا) إلا أن قائد فريق الدفاع الأستاذ أمين (كعادته دائماً) بدأ في (اللولوة) والحديث العمومي وتمييع الأسئلة المطروحه حتي أنه قد خرج بالنقاش عن جادته حينما خاطب الأستاذ محمد ضياء الدين قائلاً له :
– إنتو البعثيين ديل ما ماشين تبع أكتر دوله فاسده وغير ديموقراطية !!
شفتو جنس الكلام ده؟ يا سادة يا أفاضل الأستاذ أمين بيقارن بين فساد دولة بعثية ودولتة (الإسلامية الرسالية)؟
يبدو أن الإخوة أمثال الأستاذ أمين الذين تركوا التحدث عن المشروع الحضاري والمد الإسلامي والمش عارف أيه قد أقتنعوا (خجلى) بأنه لا يوجد مشروع حضاري ولا يحزنون ولذلك لا ضير في أن يضع الأستاذ أمين الدوله البعثية مع الدولة (الحضارية) في سرج واااحد !
وتحدث الأخ الأستاذ النور أحمد النورحديثاً منطقياً بالأدلة والشواهد عن إنتشار الفساد والبطء في إجراءأت العدالة وضرب عدة أمثلة وشواهد مثل (ملف هيثرو) لكن الأستاذ أمين بإجادته التامة لجهجه الأسئله فقد أجاب على السؤال إجابة (كان قالو ليهو قولا تاني ما يقدر) !!
أما النائب المحترم مولانا الفاضل حاج سليمان رئيس لجنة الشؤون القانونية بالبرلمان فقد تحاشى الحديث تماما عن (فضيحة التحلل) معللاً ذلك بأن القضية قيد القضاء لكنه سقط سقطة قانونية مريعه حينما أجاب على الأستاذ محمد ضياء الدين الذي سأله : كيف يمكن لمتهم أن يحاكم في قضية واحدة أمام محكمتين ؟ حيث أفاد العضو البرلماني المحترم ورئيس لجنة الشؤون القانونية بالبرلمان بأن اللجنة التى كونتها وزارة العدل وقضت بالتحلل ليست محكمة !! بل (لجنة ساكت) .. الكلام ده كيف يا مولانا؟
كيف للجنة أن تمارس مهاما (قضائية) وفق قانون الثراء الحرام والمشبوه وتحاكم المتهمين بمخالفة المادة 13 منه؟ (إنتو عايزين تجننونا) ؟؟
يا مولانا وأنت (العالم) إن إإدارة مكافحة الثراء الحرام والمشبوه” بوزارة العدل والتي قامت بتكوين تلك اللجنة من إختصاصاتها المنصوص عليها في قانون الثراء الحرام والمشبوه لعام 1989 المادة 5 (ب) التحقيق فى الشكاوى المذكورة فى الفقرة (أ) (ثانياً) وإتخاذ ما تراه مناسباً من الإجراءات وقد جاء في المادة (و) أن إإدارة مكافحة الثراء الحرام والمشبوه يجوز لها : ممارسة سلطات وزير العدل المنصوص عليها فى قانونى الإجراءات الجنائية لسنة 1991 وتنظيم وزارة العدل لسنة 1983 التى يفوضها هو فى ممارستها .
فكيف يا (مولانا) تكون هذه اللجنة ليست جهة قضائية؟ وطيب ياخ لو ما جهة قضائية حاكمت الناس ديل كيف بياتو صفه ؟ (بالله ده إسمو كلام) !!
وقد وقع مولانا رئيس اللجنة القانونية بالبرلمان في سقطة أخري في ذات الموضوع حيث أفاد قائلا (ما معناتو) :
(لمن اللجنه عرفت إنو في موضوع تزوير وأحتيال وكده الناس مشت المحكمة) في هذه النقطة بالذات (كوركت للولد يجيب الحبوب) .. عاوز تقنعنا أيها العضو المحترم بأن هذه اللجنة التى قامت بالتحقيق مع المتهمين لم تكن تعرف أنو القصة فيها تزوير وعرفت بعد كارثة التحلل (غايتو تكون بالغتا) ؟ !
بينما كنت أنتتظر مداخلتي في تشوق (عشان نشوف الفساد المافي ده) .. إتصل بي معد البرنامج وطلب مني أن أكون جاهزاً .. خاصة وأن الأخ الطاهر كان يتحدث بأن شخصي الضعيف سوف يتداخل ولكن إنتهت الحلقة ولم تتم المداخله وقد تلقيت بعد الحلقة إعتذارا رقيقاً من فريق البرنامج يخبرني بأن الوقت (كان ضيق) !!
لو كنت تداخلت لوجهت حديثي للنائب المحترم رئيس اللجنة الإقتصادية بالبرلمان :
يا أخي وزير العدل في البرلمان الإنتا فوقو ده قبل أسبوعين تلاته عندما قدم قضية الأقطان قال إنو هنالك ضغوط عليه لتمييع وقتل القضية … طيب إنتا كنائب ورئيس لجنة الشؤون القانونية بالبرلمان عملتا شنوووو؟ والبرلمان عمل شنو؟ أليس ما أدلي به السيد وزير العدل شيئاً خطيراً يتوجب عليكم أن تتحققوا منه لمعرفة المسؤولين الذين قاموا بالضغط عليه تسترا على الفساد ؟ كيف يمر عليكم هذا الأمر إن كنتم نواباً حقاً !! مش مفروض الشعب يعرف المسؤولين (الضغطو الوزير) ديل منو (حتى تكتمل الصورة؟) !! وللا شنو؟؟
كسرة :
ننتظر الأخ الأستاذ الفاضل حاج سليمان بصفته رئيس اللجنة القانونية بالبرلمان أن يفيدنا (مصير الواوات دي شنووو .. وأين هو ملف خط هيثرو الآن .. وإن لم يفعل فقد (عفيناهو) !!
كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و؟

Advertisements

39 تعليق

  1. برنجيييييييييييييييييييييية

    1. مبروروكه يا المندهش ادهشتنا والله شديد

      1. أدهشتك ساي !!! عليك الله شوف ( مبروروكه ) دي حلوه كيفن يا دكتور ههههههه

    2. المندهش يا عجيييييييييييييييييب ,
      هاك الكف دا ,
      ترااااااااااااااااااااح

    3. التدخين يسبب الضعف الجنسي ..
      الراجل يا المندهش اشتري علبة سجاير , مرق من البقالة داير يفتحا قرأ في العلبة التدخين يسبب الضعف الجنسي , طوالي رجع لبتاع البقالة قال ليهو : اسمع , بتاع السرطان داك مافي ؟
      بالقحه وبلغم السدر ان شاء الله آآ المسنوح ,,

      1. الجنسي شنو آآآآآآآآآآآآجنوبي الناس نستو الشي دا الجووووووووووووووع كااااااااااااااافر

    4. والله دي حكاية نطلع ينزل البرنجي ايامك آآآآآآآآآآآآلمندهش ومبروكة عليك

  2. غايتو يا والي الخرطوم بالغت عديييييييييل
    يا اخوي انت داقس وغافل واطرش واعمى جوووووه مكتبك وما عارف البجري فيهو ونحن المساكين راجيين منك تكون والي علينا ؟ نسأل الله أن يوليك قيادة هذه الزمرة الى نار جهنم ،،
    بالمناسبة الأصلي بتاع بورتسودان عملو عليهو شنو ؟ نزل السوق ولا لسه ؟
    المستغرب ليهو انو باعو الأرض والعرض وأهلكو الحرث والنسل والشباب ما قالو حاجة !! عاوزين يدمروهم بالأفيون ليه ؟
    يخسي عليهم

    1. الشباب لسه ما رقصوا رقصة العروس

  3. ( صراحتن ) كده محمد ضياء الدين ده عجبني شديييد امبارح لأنو مثلنا تمام قال نفس الكلام الجوانا وبنفس النبرة وبنفس نظرة الاشمئزاز البنعاين بيها للناس ديل مع المسحة الاحتقارية في النظرة .
    واتمنيت مداخلة أ. جبرا وكنت منتظرا بفارق الصبر عشان يستفذ لينا امين حسن عمر زي استفذاذه للشريف بدر داك حق صيوان العرس ..
    هسي بالله امين والفاضل ديل جايين يدافعوا عن شنو وكل الفساد منشور قدامنا وداخل المحاكم وداخل البرلمان هي عريانة ودايرين تغطوها بمنديل ورق !!

  4. هههههههه كتمت كتمت كتمت برنجية شنو آآآآآآآآآآآآآلغبيانين هو جابوهو ليكم بالحاويات

  5. المشكله إنو أمين حسن عمر قال الساحة السياسية مافيها زول غيرنا مؤهل يمسك البلد دة وعشان كدة نحن حاننزل الانتخابات وحانفوز .
    سجم اماتنا ….والرماد فى خشمنا ….

    1. شفتو لمن قال لمحمد ضياء البرنامج ده محسوب علي زمن المواطن والتلفزيون ده ذاتو حق المواطن وما دايرين نضيع زمنو وقروشو في الفاضي ! شفت بخاف علينا كيف ويحافظ علي حقنا كيف ؟ كيفن ما نديهو صوتنا ونفوزوا تااااااني ! إبن ال … ملايين الملاييين في الاقطان وعصابة الخضر وخايف علي كم دقيقة في التلفزيون !
      هسي الفرصة الادوها لبتاع الاوقاف داك شِن طعمها وشن نكهتا وشن فايدتا ومن هذا المنطلق نبارك ليهو البراءة اما المراد الخفي يعني يا ايها المواطن لا تصدق كل الاتهامات التي توجه للناس بالفساد بدليل ان هذا الشخص ووزير الاوقاف تم اتهامهم بالفساد وثبتت براءتهم بالمحكمة !!

  6. ضاااااااااقت وكتممممممت فلما استحكمت حلقاتها فرجت بإذن واحد احد

  7. هم مطرطشين عشان يدوك فرصة !!؟ عند الغافل يا حبيب …

  8. سلام شباب،
    فاتتني الحلقة لآني متابعة مسلسل رهيييب تاني أسمو ( الطيب الصالح و المحامي الفااالح).غايتو جنس مسلسل! الردحي الفيهو ما شفتو قريب دا، من ايام فلم ( بمبة كشّر) ( هووووي ماتسيبو الموضوع الأصلي و تنطو لي في حلقي، كنت صغييييييرة!)
    المهم ما الفضائح، الم زعلني إنو البلد دي بالله قايدنها كدا؟ اتحيرت انا

    1. حيرتنا خلتنا عبرنا الصحراء الكبرى البدرسوكم ليها في الجغرافيا يا نونا دا لو فضلت فيها جغرافيا تدرس

  9. وحتى تكتمل اكثر الصورة :

    الخرطوم- خاص الراكوبة

    صفع ضابط برتبة ملازم اول بجهاز امن البشير عصر أمس الأربعاء ضابط شرطة برتبة عقيد يتبع لإدارة المرور أمام عدد من المواطنين بموقف جاكسون بوسط السوق العربي ولم يكتفِ الملازم اول بصفع صاحب الرتبة الأرفع منه بل قام بوصفه بالمرأة وانه قادر علي صفعه مائة مرة والتبول عليه.
    وما آثار حنق المواطنين الذين تجمهروا بالمكان ان العقيد لم يرد الصفعة ، بل ولم ينطق حرفاُ ولم يتخذ اي إجراء تجاه الملازم أول الذي كان يتلفظ بألفاظ نابيه أمام المارة.

    وترجع أسباب الشتائم والضرب الى أنه أثناء قيام العقيد بتوجيه حركة المرور ومعه عدد من الجنود جاءت سيارة تسير في الاتجاه المعاكس فقام الضابط بإيقافها ، إلا ان الشخص الذي كان يقودها ومعه فتاة رفض الانصياع لتوجيهات الضابط بالتوقف وبعد شد وجذب بينهما نزل السائق والذي أوضح لضابط المرور بانه ضابط فى الأمن وباغته بصفعة واتبعها بوابل من الشتائم ومن ثم أمتطى سيارته وغادر المكان لا يلوي على شيء .

    1. وسعادة العقيد ما عمل أيييييييي حاجة !!
      طيب ما كان يديهو مخالفة ربط حزام !
      بتاع الامن شكله ما بيعرفش والصفعة هي تعبير عن احساس داخلي للاحباط الذي تعرض له والتبول هو ما عجز عنه مع من كانت معه ( جنوبي أبو _ باحث اجتماعي )

    2. يبول الحنضل والسم العفن الباطل

  10. قطر العاقلة:
    الدوحة تشرع في تنفيذ اتفاق الرياض
    دفعة جديدة تنتمي للجماعة الاسلامية المصرية تصل مطار معيتيقة الليبي على متن طائرة قادمة من الدوحة عبر قبرص.
    دا اسمه تقدير البلاء قبل وقوعه يا ربي الشعب راح يعمل فيهم ايه ؟؟ ما تقولوا المرة دي سماح زي كل مرة اكتوبر وراحت علينا وابريل وراحت علينا وما عملنا اي دمقراطية لانه ما بنجتث الوسخ ونستأصله من جذوره (دعوه لتكوين حزب القصاص مني لكم هههههه) تقبلوا مرور الغلبان

  11. بعد والي الجزيرة والي سنار ينضم لكشف المشاطيب , ويا ايدي شيليني ختيني في بيت كسلا الجننني !! طبعا الخضر ادوهوا شهادة صلاة الفجر في جماعة عشان كده نشوف غيره !! التقول نحنا نسينا قصة امام المسجد بتاع ( الابيض ) المسكوهو شغال حرامي بالليل يسرق نففففففس ناس الحي البصلي بيهم !

    1. بركة البسرقهم ساكت ما …………..صغارن هههههه (ورائك شنو في صغارن دي)

      1. هيييييييييييييي ,, انقرعوا

    2. طبعا الخضر ادوهوا شهادة صلاة الفجر في جماعة عشان كده نشوف غيره !! صح ادوها ليهو الشهادة ؟ نان مالو ومال ود الناس في السجن حسب الاشاعة السارية؟يعني يدوهو الشهادة بي جاي ويقتل بي جاي؟

  12. خبر السواد !!
    قالوا ود سوداني في امريكا اداهن سيفه وما اكتفي بالرحط بس ! شال منهن أيييي حاجة !!
    الله يقطعك يا الواتساب ي القاطع قلبنا كل يوم ,,,

    1. ههههههههههههههههه ,,,
      ما مرقت النصيحة !

      1. يا نانو ابعد شمباتي ده مني ,,,

      2. هههههههههههههههههههههههههاااى ,, جرى كدى وجرى كدى ,,
        اجيب ليك رحط ؟

  13. يا اهلي بالقمردينة برنجية مقدما لزومو شنو حاجز لاني متواجد وكده

  14. في سابقة لم تحدث في العالم ولن تحدث تم نشر إعلانً مدفوع الثمن يشغل صفحة كاملة بإحدى الصحف اليومية لمجموعة سمت نفسها (رفقاء صلاة الصبح) في إشارة لأن هذه المجموعة التي لم توضح أسماء أعضائها هم أشخاص يؤدون صلاة الصبح بالمسجد مع السيد (والي الخرطوم) الذي شهد مكتبه مؤخراً عمليات تزوير وإحتيال وإنتحال بمليارات الجنيهات .
    وقد كان الإعلان (المليوني) تحت عنوان ” تهنئة وتحية بدافع الوفاء” وقد عددت (المجموعة) في هذا الإعلان محاسن وأعمال (الوالي) الخيّرة من سعيه لأداء صلاة الفجر في ” الظُلَم ” دون حراسة أو حاشيّة أو سائق وملاطفته للشباب ومداعبته للأطفال ومسحه على رؤوسهم وزيارتة للمرضى عقب الفجر وعدم مغادرته المسجد مهرولاً كما يفعل البعض (ديل منو يا ربي؟) بل يقف يحادث الناس ويتبسط مع الجميع ، وأعربت ” المجموعة ” عن قلقها لتداعيات الأخبار وتوالي الإتهام وتوسيع دائرة الظن حتى طالت صاحبهم ( على حد قولهم ) الذي حسبوه انه فوق الشبهات لم يعرفوا عنه إلا دماثة الخُلق ووضاء السيرة ونقاء السريرة فهم يعرفون عنك ما لايعرفه الإعلام المتربص لايتقصد غير الإثارة ولايرى الكوب إلا فارغاً كما جاء بالتهنئة .
    وختمت المجموعة ( إعلانها المدفوع) بالتهنئة للرجل الذي تم تتويجه من قبل الرئاسة التي وجدته الأصلب والأنقى والأكثر إنجازاً فجددت ثقتها فيه .ولم تنس (المجموعة) أن تتوجه بالشكر لفخامة الرئيس ومساعده راجية من الله أن يوفق الوالي للقيام بأمانة التكليف .

  15. سقوط إمبراطور ” أراضي ” جديد
    05-08-2014 06:42 PM

    الخرطوم:
    كشفت وثائق تحصلت عليها ” الصيحة ” عن إمتلاك مدير الارضي السابق عصام الدين عبد القادر الزين، وكيل وزارة العدل الحالي لعدد من القطع السكنية والتجارية تُقدر قيمتها الإجمالية بـ (30) مليار جنيه ــ بالقديم ــ وبحسب تواريخ العقود المبرمة بين عصام الدين عبد القادر كطرف ثانٍ والطرف الأول سواء كان حكوميًا أو غيره فإن حصوله على تلك القطع كلها كان إبان توليه منصب مدير عام الأراضي بولاية الخرطوم، عدا قطعة واحدة هي القطعة رقم (71) وتلاحظ من خلال العقود الرسمية التي حصلت الصحيفة على نسخ منها أن الطرف الثاني عصام الدين عبد القادر الزين مدير عام الأراضي وقتها يورد صفته في تلك العقود إما مستشارًا في وزارة العدل أو موظفًا فيها ولا يظهر على أنه مدير عام الأراضي، وأن الطرف الأول ممثل الحكومة في بعض القطع هو مقرر لجنة الخدمات الاستثمارية سيف الدين عثمان محمد.

    وبحسب المستندات ذاتها فإن عصام عبد القادر الزين حصل على القطع أدناه سواء عن طريق الشراء أوالتصديقات الحكومية إبان توليه منصب مدير عام الأراضي وذلك على النحو التالي :

    1 ــ القطعة رقم 190/6 مربع (6) الشجرة تجاري ــ درجة ثانية ــ مساحة 200 م مربع أبرم العقد في أبريل 2004
    2 ــ القطعة رقم 1200 مربع 81 الجريف غرب تجارية في 4/5/ 2010 (المساحة 265 متًار مربعًا)
    3 ــ القطعة رقم 19/ 25 مربع 13 الرياض سكنية في 6/4/ 2011 (المساحة 384 مترًا مربعًا)
    4 ــ القطعة رقم 193 مربع (70) المعمورة في 28/ 4/ 2011 (المساحة 633 مترًا مربعًا)
    5 ــ القطعة رقم 58 مربع (17) جبرة سكنية – 400 متر مربع
    6 ــ القطعة رقم 71 مربع (17) جبرة سكنية 400 متر مربع بتاريخ 27/ 10/ 2005
    7 ــ عدد (2) شقة بالنصر السكنية
    8 ــ شقة بالرياض

    الصيحة
    وبررررررضو منتظرين تكتمل الصورة !!!

  16. صورتك الخايف عليها ونحن ما خايف علينا
    ترلم ترلم ترلم

  17. سلامات للجميع فردا فردا
    وبالمناسبه ياجماعه انا لى زمن خارج الصوره تماما
    الله يجازي القرايه وسنينه خلتنا ما نكمل الصوره معاكم لكن هانت

    1. ربنا يوفقك ويعدل طريقك ..
      اقري ساااي يا بت شايف سوقكم واااري بقيتوا زي لعيبة الكورة في قعده واااااحده تطلعوا بي مليار !!

      1. آآآآآآآآآآآآجنوبي والله الا بت وراق تركب دقن هههههههه تقبل المرور وتحية لبنت وراق من على البعد

    2. وعليكم السلام ورحمة الله يا رفيقة ,,
      بركة بالطلة …

    3. مراحب – هلا و غلا – 1000 حمد لله بالسلامة – عودا حميدا ,, و ان شاء الله نهاية القراية دى كانت نجاح يا رب …

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: