فيزياء وكيمياء

أجب مستعيناً بالله تعالى على جميع الأسئلة التالية مع تبيين خطوات الحل بوضوح :
السؤال الاول : أجب على الآتى :

1-أحسب كمية غاز هيدروكسيد الأمونيوم (النشادر) NH3(نتن الرائحة) الذى ينبعث من الفضلات بالسوق المركزى علما بأن السوق يعمل به أكثر من 1250 عامل ويرتاده يوميا 5 ألف شخص ولا توجد دورة مياه واحده؟

2- أحسب معدل (الرقم الهيدروجيني) في (دم) مواطن يعيش على وجبة واحده (فول طبعن)

3- ما هو الحد الأدنى من (الطاقة) التي يجب أن يمتلكها المواطن لكي لا (يتفاعل) مع تصريحات المسئولين

4- أحسب (متوسط الطاقة) التى يبذلها شرطى مرور يعمل فى درجه حرارة شمس تساوى 49 درجه مئوية حتى يتمكن تسجيل 913 مخالفه مع ملاحظة أن جذر (متوسط الطاقه) يتناسب طرديا مع النسبة المخصصه له فى تسجيل المخالفات .

5- ما هى كمية (الزئبق الاحمر) اللازمة لإكمال عملية (تنزيل) كمية من (الدولارات) كتلتها 10-3 × 3.2 132جم تشغل حيزا قدره (خمسة شنط حديد ) مقاس 2.24 متر X 3.2 متر علما بأن كثافة الزئبق الأحمر 13600 كجم/م3

6- في ظروف واحدة من (الضغط ودرجة حرارة) الفقر كانت (كثافة) مواطن 1.9كجم/م3 و(كثافة) مسئول 1.25 كجم/م 3 وجذر متوسط مربع سرعات لغف المسئول 103×1.8 م/ث احسب جذر متوسط مربع سرعة ثراء المسئول و(مقدار التغير) في قيمة حسابه البنكى الناتج عن كل عملية (هبر) علي اعتبار ان (كتلة) حساب المسئول الإبتدائية كانت تساوى صفرا.

7- احسب مقدار (الضغط) الذي يتعرض له الطابق الأول من عمارة ذات عشرة طوابق من المفترض ان يستخدم فى بنائها 9825 سيخة 5 لينية طول 6 متر غير انه قد تم إستخدام ذات العدد والطول ولكن بإستخدام سيخ 2 لينية مع العلم بأن مساحة البناء هى 670 متراً مربعاً وعجلة الجاذبية ( 10 متر/ثانية ) – الضغط الجوي ( 10 نيوتن/متر ) كثافة الحديد (7850 كجم/م3 ) و وزن المتر الطولي للحديد (7850 كجم/م3 × القطر2 × 3.1428/4 ) : كما أحسب ايضاً :
أ- حجم الحديد (السيخ) الذى تم توفيرة
ب- قيمته الحالية (حسب أسعار سوق السجانه)
ج- الزمن الإفتراضى لإنهيار الطابق الخامس

8- محلول وريدى ملوث بنسبة 23% أحسب كمية العناصر السامة التى توجد به ونسبة
أمكانية بقاء المريض الذى يتناوله على قيد الحياة

السؤال الثانى : وضح بالمعادلات الكيمائية المتزنة الآتى :

1- كيف تحصل على (إعفاء) لعربتك بواسطة نترات (اللإستثمار)

2- كيف يمكن أن تحصل على هيدروكسيد (مرابحة) دون أن يثقل كاهلك تصاعد غاز ثانى أوكسيد (الفوائد) ذو النسبة المرتفعة

السؤال الثالث : أجب بلا أو نعم :

1- هل يمكن تحضير بروميد الصوديوم بإذابة قطعة من (الرغيف) فى محلول موية (الفول) الساخن

2- عند تتأكسد (الجيوب) ويتبخر غاز(المرتب) يتحول لون وجه المواطن إلى الأحمر

3- عند إضافة حامض (الواسطه) المركز الساخن لمحلول (المعاينات) يتصاعد غاز (المحسوبية) ذو الرائحة النتنة

السؤال الرابع : مثل لكل مما يأتى إن إستطعت :

أ- ماء خالى تماماً من ترسبات الطمى

ب- خبز خالى تماما من بروميد الصوديوم

السؤال الخامس : قم بإختيار الإجابة الأكثر صحة :

لماذا لا تتكون على الذهب طبقة من الأوكسيد عند تعرضه للهواء :

أ- لأن هواءنا خال من الأكسجين

ب- لأنو دهبنا دهب مبروك

ج – لأن الشيخ عزم فيهو قبل ما يمشى

د- هو نحنا شفنا دهب من أساسو

السؤال السادس : علل لكل مما ياتى :

1- يزداد ضغط المواطن عند الحديث عن البترول ومشتقاته

2- يتصاعد غاز (تصريحات المسئولين) كلما تم تسخين إنبوب إختبار (الحريات)

3- مع ثبوت (درجة حرارة) الدولار فى السوق تصل الأسعار درجة (الغليان) ويتصاعد (غاز) المعاناة .

4- لا يحدث تغير في سرعة (جزئيات) تنفيذ رفع سقف الحريات

5- ترسب (بلورات الفقر) رغم إزدياد (تفاعل) معدل النمو !!
كسرة :
لو في زول نجح يجي يقابلني !
مسرة ثابته :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و؟

33 تعليق

    1. مبروك / عودة بقوة

    2. وحات الله خااااايلة فيك
      بت السودان No.1

  1. برمجية هامله

  2. برنجية مع الامتحان الصعب ده
    ممكن نخش بي بخرة

  3. غايتو يا بروف ( حمّضتها) لكن! يحلّوا ليك رب العالمين و يحلّنا معاه.

  4. يااستاذ الفاتح شفتا علبة السجائر الاداك ليها صحبك ولانو هو كان متهمك بي انك بتاع سجارات وانت شلتا نفس واحد من العلبة كلها اها من اللحظة قوانيين نيوتن وانشتاين بقت تستحي من قوانينك الجديدة ……ياخ الله يهديك سببتا لينا كحة بي سبب الضحك المتواصل ..هههههههههههههههههههههههههه كحة كحة هههههههههههههههههههههههههه………..!!!!

  5. سلام للبروف والاخوة في القمردينة لو ما كتمت امتحانك دا ما كان ختيتو هع الغلبان

  6. كمية غاز الناشدر ما بنعرفا لاكين قالوا حريم الصحافه ما قعد يحتاجن يختن النشادر للحنة براااااها بتبقي سوووودة بي هواء الله ساااااكت !
    هو نحنا وصلنا حد من الطاقة بقينا ما قعد نتفاعل مع فضايح السرقات دي كووولها دار نجي نتفاعل مع تصريحات !؟ نحنا ماااا بقينا أييييييي كلام .
    درجة حرارة 49 درجه + كف صاموطي وتهديد بالتبوّل !
    نحصل علي اعفاء للعربة بتربية الدقن وخمسة جنيه لعمل ( وشم ) الصلاة من سوق ليبيا وتسجيل منظمة ( كوهين الاسلامية ) والاسلامية دي مهمة طبعا وقبلها ما مهم !
    نحصل علي المرابحة دون حمل عناء الفوائد بي اننا نشيلا ونكب الزوغه لا نسدد فوائد ولا هي ذاااتا في عضما ده ما نسددا .
    اذا وجدنا موية الفول الساخن ! نعم .
    اذا كان المواطن قبطي نعم والا سيتحول الي الاسود الداكن مع باقي المواطنين .
    ماء خالي من ترسبات الطمي .. دمعي الاتشتت وغلب اللقاط
    خبز خالي من بروميد الصوديوم .. القراصة والكسرة والعصيدة ( شرط عدم شراء الدقيق الجاهز )
    لأنه دهب مبروك بيطلع بالساهل ويتهرّب بالساااااهل ..
    يزداد ضغط المواطن عند الحديث عن البترول ومشتقاته لأنه بيتذكر ايام كان بيستورد مشتقاته وكان سعره أقل !
    غاز تصريحات المسئول غاز قابل للتبخر وليس قابل للتكثّف !
    لا يحدث تغير في سرعة (جزئيات) تنفيذ رفع سقف الحريات لان كلما زاد رفع سقف الحريات كلما قل سقف حريات الرافع ..
    ترسب (بلورات الفقر) رغم إزدياد (تفاعل) معدل النمو !! لأنو نحنا عندنا كل شئ ماشي افقي إلا النمو رأسي !! يعني النمو ده سبحان الله مياز خلاص ! بس يختار ليهو زول زولين وباقي اهله دون خلق الله كلها ..
    ياخي ( السيد ) الفي الكسرة التانية دي قعد تغيظني غيظ !!

    1. تقصد السيد ال (…….) آآآآآآآآآآآآجنوبي ريسنا ما نوريقا ريسنا السيف البقطع والا رايك شنو هههههه وشوف كمان دي (قذافي وعمر اجتمعوا والضربة حا تصبح اوجع ) وجع هاك الضرب دا وكمان راح ناكل مما نزرع (هوت دوغ وهمبورجر وكده) ودقي يا مزيكة الحواري اه منك بلد

  7. كدي النمشي اتوضأ وإستجمر وأتحلل وأجي أشوف حل للإمتحان ده مع إنو أنا أدبي لكن نباصر فيهو
    وبمناسبة السيخ يا جماعة إنتو الطيب سيخة وييييييين ؟؟

    1. الطيب سيخة فكت منه

  8. والله ياجماعه البروف دة أنا قايلو بروف بتاع جامعه وتدريس بس لكن السؤال الخامس دة خوفنى منك عديييييل.
    قلت لى الزئبق الاحمر وتنزيل الدولار الاسود …والله منك خوف ززززز

    1. البروف بتاع جامعة وتدريس وكمان بتاع كل الناس الفي الازقة والحواري والميادين الصغيرة والناس الغلبانة والناس الضاق بيها واتوا الي حديقته يتنفسوا وفيهم برضه البروف مثله واصحابه من كل الازقة والحواري والمهجرين قصرا والمتعبين والكادحين يعني زولا كدي تخته في الجرح وان شاء الله ما يجيب يوم شكره ودونه نطرشق بم وكتمت كتمت كتمت

  9. السلام عليكم، أنا الليلة ما داير أعلق على مقال البروف لأنو بفقع المرارة !! ونحنا أصلاً مرارتنا مفقوووعة من زمااان ، علا بدور أسعل لي شوية أسئلة !!

    أولاً: مبروك عليك البرنجية يا بتنا (بت السودان) تستاهليها بجدارة ..

    ثانياً: يا جنوبي وديت ود أونكل سام ويييين؟؟ غتس مررررة وااااحدة وما طلع تاااني ؟؟؟

    ثالثاً: يا شرقاوي أنت من ناس شرقاوي ياتم ناس بورتسودان، ولا ناس الخرتوم، ولا ناس كسلا، ولا ناس أمدرمان/أبروف ؟؟؟
    (ولا إسم علي إسم لأني بعرف العائلة كووووولها بدوووون فرز ) ؟؟؟؟؟؟

    رابعاًاً: وين الليلة ود العبيد وشمباتي وود بوتين؟؟ خليتو جنوبي يبرطع في القمردينة برااااهو … سلاااام …

    1. والله يا شيخنا ابو احمد سؤالك عن أمريكي بقى زي كسرة البروف بتاعت هيثرو، هههه لكن جد اختفى ، ربنا يعودوا بالسلامة

    2. شكرًا يا نانو العزيز
      والله أخوك بس بطنو طاامه من اخبار الفساد واللبعي والتحلل ،
      ويا إخواننا مالو مال الحلال ما لذيذ وحلال وحتي ولو كان قليل،
      شكرًا علي السؤال يا حبيب وتقبل مروري

      1. انا مع الكتمة دي كان لقيت مال الولاية وجغمته واتحللت ما حلال علي

      2. طبعاً لا وألف لا ما حلال عليك لا بي كتمة ولا من غير كتمة !!!!!

    3. تسلم للنصيحة الله بينا وبين حق الناس لان الله يغفر الذنوب كلها الا الحقوق الحقوق دي عندها برضه يوم القيامة تحلل من صاحبها يعني ما تسرق حقي وتحلل بعيد بعيد تتحلل فوق السراط (والجماعة ديل يوم السراط بكثر الضراط) والا شنو سا نانو ابو احمد

  10. ياسين شمباتى | رد

    لا حول ولاقوة الا بالله ,,,,
    دا صعب صعوبية تحير !

  11. كلام تحت تحت عن انو عصابة محكمة الخضر حسب مادة في القانون بتقول لايجوز محاكمة شخص في تهمة واحدة مرتين وانو الجماعه ديل اتحكم عليهم بالتحلل ووكيل وزراة العدل الكان بيشغل وكتها مكان وزير العدل بالانابة قبل الحكم بدليل انو الناس ديل اتحللوا واتحلوا زي بله , ( انتو وكيل وزارة العدل ده ياهو الاتهموهوا بانو عند قطع اراضي كتيرة لما كان مدير الاراضي ده ذاااتو ! ) .
    سمح كان في مادة بتقول كده ! ناس الاقطان قضيتهم في محكمة جنائية وصدرت احكام مبدئية والمتهمين دفعوا دفعات لابداء حسن النية ! وبعد ده شالوها ودوها محكمة جودية لييييييييييييييييييه ؟
    لاكين الملازم ( الحلاااااتو ) ده دقس , لو كان نسخ ليهو ملف ملفين يثبت تورط الكبار كان جابوا ليهو ناس تحلف انو بصلي الفجر قبل وكته ذاااتو !! الا بي طريقتك دي يا ولدي حيخلوك في مفرق البحرين والخضر حيسوق زوله ويمش ..
    عباس ده منو كمان ؟ هم مالم كتاااار كدي زي اولاد مُره بتاع حرب البسوس داك !!

  12. الامتحان الساهل دايما يسقطوا فيهو الجماعه…….
    وانا بحلها ليكم بس جيبو لي الزئبق الاحمر دا ,,, علي الحلال مشاكل السودان دي جت احلها ليكم وكمان ارجع ليكم الجنوب واي مواطن بديهو كاش في ايدو مليون دولار بعمل بيهو مشروع يامن مسقبل اولادو زي ما قال عبد الرحيم حمدي انو باسس ليهو في بنك لاولادو لتامين مسقبلهم ولا نامت اعين المغتربين ,,,,,
    اعتذارات كنيرات للاخوة جنوبي والمندهش وشمباتي وركس وفلادمير (تلفوني لا يخدم الواتساب ,,,, زي جنيهنا البقي ما بقدر بقيف قدام الدولار والريال,,,,,
    وزارة الداخلية بعد اسبوعين

    1. ههههههههههههههههههههههههههااااى ,,
      ارقد يا رز

    2. هههههههههههههه
      اعتذلرك قبلناهو … ووزارة الداخلية الله يجيبا بالسلامة ..

      1. ياسين شمباتى

        ياهناى انا ما قبلت !!

  13. شر البلية ما يضحك دخلت الراكوبة ووجدت الخبر كل المعلقين ما بيتمنو ليهو العافية لقعد عدلت فامنت فنمت يا عمر ههههههه
    وسط تكتم شديد أجريت مساء اليوم عملية عاجلة لعمر البشير بمستشفى رويال كير بسبب علة طارئة بمفصل الركبة.

    وعلمت الركوبة ان البشير نقل على جناح السرعة الى المستشفي المملوك لأسرة البرير وأجريت له العملية ، وسبق ان أجريت عدة عمليات للبشير آخرها كان بالمملكة العربية السعودية العام الماضي بسبب مرض خبيث في العنق.

  14. 05-12-2014 10:53 AM
    دفع المحامي الشهير معاوية خضر بعريضة جديدة لوزارة العدل لضم والي الخرطوم عبد الرحمن الخضر للمشتبه فيهم في قضية الاختلاسات بمكتب الوالي والتحقيق معه.واستند معاوية في طلبه الذي تحصلت «الإنتباهة» عليه على وجود إمضاء الوالي في المستندات محل القضية، وألمح لتورط الوالي في القضية إستناداً إلى تصريحات سابقة للمتهمين بأنهم سيكشفون عن المستور في القضية.
    صحيفة الإنتباهة
    ع.ش

    صحي ناس متهمين باستغلال نفوذ وسرقة مال عام ! كيف الشخص الموقع علي الورق ما يكون متهم معاهم ؟ ما يا يثبت انو الناس ديل مزورين توقيعه وختمه يا كمان يثبت انهم سرقوا الورق ده من مكتبه وبدون علمه , يا هو ذااااتو شريك معاهم !!

    مبروك الركبه الجديدة يا هناي ! ان شاء الله يسجلوك في برشلونه !!

    1. الركبة يا جنوبي من الردحي والشوت ضفاري

  15. و لو وووو وووو وووو ووووواتك دي جابت سعره في زمن التحلل و الوكلاء البيستثمروا بالقانون الحافظنه صم تعال قابلني

  16. وطني السودان | رد

    انا محتار في المؤتمر الوطني وقياداتو – والله لو كان عندهم نقطة دم كان على الاقل احيلوا كل من ورد ذكر اسمه للتقاعد الإجباري إيذانا لمحاكمتهم – ده كان خايفين ع الحزب – وحسب وحسب وجهة نظري ان في حسبانهم ان يبعثوا برسالة مفادها الشفافية داخل اروقة الحكم – ولكن صاحب القضية اندلاع قتال داخلي حول الزعامة الحزبية مما محور القضية تضادا، وهذا من فضل ربي ليظهر ما خفي عن بينة – ارى ان يتوجه كل صاحب قلم في السودان لإستثمار الفرصة بطريقة لعب الشطرنج وليس بطريقة شنحت.
    الفرصة عظيمة – والمعطيات اعظم – والشعب اصبح عظم – وانعدم وجه المؤتمر الوطني من اللحم – وان صحت الفراسة فقريبا سيترجل “المتشبثون” عن صهوة الكراسي والحكم إمعانا في حفظ الماء الذي اختزنوه وقت الجدب.

  17. سلا يا شبيبة
    فيها نسلم … وفيها نجرب الحساب شغال ولا لا ….

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: