يا سيدنا داؤوووود

عندما كنا نتحدث عن ضرورة إبتعاد المسؤولين عن العمل الخاص والشركات والمشاريع الزراعية (والسمسرة) كنا نعلم جيداً أنه سوف يحدث خلط بين العام والخاص وإنو المسألة ح (تتشربك) وإنو القصة ح تتعارض تمامن مع مسألة إقرارات الذمة (هي الذمة ذاااتا وينا) .. لأنو أي زول يمسكوهو ح يقول ليك (إنتو ما عارفين عندي بيزنيس) ؟ وإشتغال (المسؤولين (بالبيزنيس) مش بس وكمان بيتباهو بيهو لم يعرف في كافة العهود والحقب إلا في هذا العهد المتوضئ .. إن الإسلام (الذي نعرفه) قد منع أبناء المسؤولين من إرتياد العمل الخاص (خليك منهم هم) فها هو الفاروق يسير يوما فيرى رضي الله عنه أبلا ترعي

– ما شاء الله ، ما أجمل هذه الإبل و ما أسمنها ! إبل من هذه؟
ـ هي إبل عبد الله بن عمر يا أمير المؤمنين!
قال عمر و كأنما لسعته حية رقطاء:
ـ إبل عبد الله بن عمر ؟ إبل عبد الله بن عمر ؟
نعم يا أمير المؤمنين!
ـ أين عبد الله بن عمر ؟ ائتني بعبد الله بن عمر !
ـ (وعندما مثل أمامه) :ما هذه الإبل يا عبد الله؟
ـ إبل هزيلة ، اشتريتها من خالص مالي ، و تركتها في الحمى لترعى، أبتغي ما يبتغي سائر المسلمين من الربح و التجارة يا أمير المؤمنين !
ـ بخ بخ ، يا ابن أمير المؤمنين ! إذا رأى الناس إبلك ، قالوا ، ارعوا إبل ابن أمير المؤمنين، اسقوا إبل إبن أمير المؤمنين ! فتسمن إبلك ،و يربو ربحك يا ابن أمير المؤمنين عبد الله!
ـ مرني يا أبت!
ـ انطلق الآن ، و بع الإبل ، و خذ رأس مالك ،و ضع الربح في بيت مال المسلمين ! (المالية طوالي .. تجنيب مااافي) !!

قامت عديد من بلدان العالم بأخذ الحكمة من (الفاروق) إذ إبتكرت عملية ملء أقرارات الذمة من قبل موظفي الدولة لتحقيق الشفافية والحد من استغلال الوظيفة العامة والتربح على حسابها إذ أن هذا من شأنه تفعيل الرقابة والشفافية ونزاهة الوظيفة العامة، ومكافحة الفساد بكل صوره وأشكاله، ومنع وقوع الجرائم التي تمس المال العام أو الوظيفة العامة والعمل على ضبط ما يقع منها.
إن إقرارات الذمة المالية قد تكشف الجرائم الجنائية التي تقع من الموظفين العموميين نتيجة ارتكاب جرائم الرشوة أو الاختلاس أو التربح على حساب الوظيفة العامة كما حدث في بعض فضائح الفساد الأخيرة .
لكن مسألة إقرارات الذمة دي تظل حبر (على ورق) وأي مسؤول يمسكوهو عندو كم مليار وكم عمارة وكم فيلا وكم سيارة (وكم مرا كمان) بينما كان قد جلس على كرسي المسؤولية و(أباطو والنجم) لا يملك من حطام الدنيا شيئاً يقوم يقول ليك ( والله ربحتا من شغل التجارة بتاعتي) !
لم نر في العالم (الكافر والمسلم) حكومة أكثريتها تعمل بالتجارة والمشاريع الزراعية والشركات والمؤسسات التعليمية الخاصة (مثل حكومتنا) ، إن الدول المحترمة تمنع الموظف الحكومى عن مزاولة أي مهنة أو منشط تجاري غير وظيفته لذلك فإن أي تربح للمسؤول أو إستغلال للمنصب لتحقيق مكاسب شخصية أو تضخم لممتلكاته يضعه مباشرة في خانة (من أين لك هذا) وعندها لا يملك المسؤول جواباً !!
لكن عندنا فالجواب جاااهز :
– (يا جماعة إنو نسيتو أنو عندى مدارس الفخامة الخاصة ومشاريع السنبلة الزراعية والمصنع الحديث للولاعات وقاعات التنين الذهبي للمناسبات ) ، ؟؟
– لكن يا سعادتك لمن جيت الكرسي ده كان بدلتك واحده وساكن بالأيجار معقولة هسه عند كم فيلا وكم قطعة واطه مميزه وكم مزرعه وحسابك فيهو مليارات عملتها كيف دي؟
– يا جماعة إنتو ما تبقو (متلقيين حجج) ساكت وتفتكرو أنا زول فاسد .. المدام كانت بتعمل (الأيسكريم) في البيت ، وتوديهو مدرسة الأولاد القدامنا وبعدين لما القصة مشت معاها بقت توديهو مدرسة البنات .. وشويه شويه لمن بقت تبيع للمدار سكووولها !
– يعني القصة دي من الأيسكريم؟
– دقيقه يا جماعة أصبرو .. أها المدام كانت كلما تعمل ليها قرش قلراشين بتمشي لي حماد (الصائغ) تدقا ليها غوايئش … سلاسل .. أها بعد سنة سنتين قمت أقنعتها تبيع الدهب ده كووولو ونشتري لينا بيت عشان نستريح من الإيجار !!
– أها وكت إشتريتو البيت .. وكملتو القروش المال الهسه عندك ده جبتو من وين؟
– يا جماعة ما تصبرو عليا شويه والله زول يلقي عليا حاجه مافي !
– طيب عملتا شنو ؟
– قمنا إشترينا بيت من زول (مزنوق ليهو في قروش) يعني فيهو فرقه .. ولقينا عندنا قروش فضلت أشترينا بيها القطعه اللصقو طوااالي .
– أها يعني عاوز تقول لينا بعتا القطعه وخشيت بيها السوق معملتا القروش دي ؟
– لا
– مال عملتا شنو؟
– سكنتا في القطعة وبعتا البيت خشيت بيهو السوق !!
كسرة :
الزول من ديل :
1- يشتغل الوظيفة العامة
2- ويخش السوق يتاجر
3- ويكون عندو شركات ومشاريع
4- ويكون عضو مجلس إدارة في 5 شركات وبنوك
5- وبعد داك يكون عندو 4 نسوان … يا ملين الحديد ياااااا سيدنا داؤود !!

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و؟

53 تعليق

  1. برنجييييييييية يا داؤوووووووود

    1. مبروك يا مندهش

    2. مبرووووووووووووووووووووك يا داوود ههههه مبروك يا المندهش

    3. ابداوووود افذعنا وانجدنا الغربه ضاقت بينا تقلبوها ولا نجي نقلبا نحنا

    4. شايفك اتعودت يا هناى !
      مبروكة على مضض

  2. ادهشتنا بالحيل ومبروكه وبالغتا عديييل كدا

    1. تتبارك أيامك يا العبيد ،،، عاااارفك خرمان ليك كم يوم كده

  3. النسخة السودانية
    ما شاء الله ، ما أجمل هذه الشركات والمؤسسات و ما أكبرها ! شركات من هذه؟
    ـ هي شركات عبد الله أخو عمر يا أمير المؤمنين!
    قال عمر و كأنما لسعته حية رقطاء:
    ـ شركات عبد الله أخو عمر ؟ مؤسسات عبد الله أخو عمر ؟
    – نعم يا أمير المؤمنين!
    ـ أين عبد الله أخو عمر ؟ ائتني بعبد الله أخو عمر !
    ـ (وعندما مثل أمامه) :ما هذه االشركات يا عبد الله؟
    ـ شركات ومؤسسات مفلسة ، اشتريتها من خالص مالي خصخصة
    – عندها قال عمر وكأنما لسعته حية رقطاء تااااني
    يا فيها ولا أفسيها وهناية شريكة بررررضو

    1. زماااااااااان كان عندنا جارنا عقيد في الجيش وكان عندو تاكسي بيشتغل بيهو بالليل بالدس وكان لو دقشه زول طوالي يعفيهو شان ما يبقي في جرجرة ويمشوا القسم وينكشف !! هسي الضباط يحمدوا ربهم شركات وبزنس عيني عينك ! انتو القانون غيروهوا ولآ شنو ؟
      سنة 89 قبل ( ثورة الاوباش ) انا كنت طالب في معهد الطيران الحربي وكان وقتها وزير الدفاع ده مدير المعهد برتبة عقيد وكان عنده عربية لفت باك اظنها لو ما نسيت , اها هسي شركاته دي من ويييين ؟
      علي الطلاق ناس الانقاذ ديل لو كان قروا سيرة الصحابه اصلهم ما كان جابوا طاري الاسلام ده في خشمهم ! لاكين من حسناتهم خلونا نقرأ عنهم ( وفقّهونا ) في الدين إلا ( فقهونا ) عدييييييييييل ..

      1. والعبد لله ابوهو كان زي جاركم دا بس ما كان عقيد لكن كان برضه بضاري بعربية التكس عشان كده انا طلعت غلبان يا ربي

      2. وأنا يالغلبان ابوي هداهو هيلاسيلاسي نمر وطوالي وداهو جنينه الحيوانات وبرضو كان عميد ولمن هداهو شيخ زايد سيف من الذهب الخالص ومنقوش فيهو اسم الوالد بمناسبه اول دفعه تتخرج من الامارات في الشرطه علي يد الوالد رحمه الله عليهو وبرضو الوالد سلمو لكليه البوليس و مفروض السيف ده يكون لسه موجود وانشالله ما يكون واحد تحللللو

      3. غايتو يا عبيد سيف ابوك ( الله يرحمه ) امش فتشوا عند الناس ديل وطالما مكتوب فيهو اسم ابوك بالقانون تشيلو إلا اوووووعك تسأل عن النمر ! يمين يطلعوهوا ليك ماكل 1000 راس بقر و5000 خروف ومليون جدادة ويقولوا ليك ارح حاسبنا !!

      4. هههههههههههههههههههه ,
        ودخلوها ولا (دخلوا) بيها يا مندهش ؟؟
        وى وى وى

  4. لكن يا بروف حكاية إقرارات الذمة دي عليك الله ما تفتح ليها باب ،،، ديل عديمي ذمة و أميرنا يومداك قال ( عندي بس بيت في كافوري وبيت في الطائف ومزرعة في السليت وشقة ) – وهو الذي صرح في صيف 1989 ( لاأملك منزلا وأسكن في بيت الأسرة في كوبر الحلة ما كوبر العمارات !! ) أها نعمل ليهو الإقرار في ياتو تصريح ؟

    1. البيان رقم واحد بلعه زماااااااااااااااااااااان

  5. طبعا دة ينطبق على كل الموظفين و المهنيين فى الدولة و قياسا على هذا مثلا تدهور النظام الصحى لصالح العيادات و المستشفيات الخاصة و هلم جرا….. القصة أبعادها عميقة و محتاجين من الدعاة و علماء الأمة إلى برامج جاذبة تدعو للقيم الفاضلة و توضح تداعيات إهمالها أو الإستخفاف بها. أعتقد نظام التعليم و الإعلام يجب أن يبدأ به أولا.

  6. مبرووووك يا المندهش الله لا يدهشك !!! قول آااامين .. تقبل مروري … سلااااام …

    1. اللهم آميييين يا شيخنا
      ومرحب بمرورك ومرحب بالسلام ومتوسمين فيك الخير
      كتر لينا من الدعاء عسى أن يكون الفرج قريباً ونتلم علي بلدنا وأهلنا

  7. عشنا وشفنا المسئول يجي للكرسي (جربان وأباطو والنجم) زي ما قال البروف!! وبعد شوية تلاقيهو آخر أبهه (على قول المصريين أصحاب جنوبي)، وعمارات وعربات وكمان شركات !! ويقول ليك دا كوووولو من هدايا أدوني ليها الشركات البنتعامل معاها !! أما سمع قول الرسول صلى الله عليه وسلم للرجل الذي أرسله ليتحصل الزكوات والصدقات من بني سليم، فجاء ومعه الصدقات قال هذه لكم، ومعه (حلال) يعني بهائم (مجنبها) قال هذه أهديت لي!!!
    فغضب منه الرسول غضباً شديداً حتى تغير وجهه ثم قام إلي المنبر وخطب الناس قائلاً في حديثُ أبي حُمَيْدٍ السَّاعِدِيِّ رضي الله عنه قال:
    “اسْتَعْمَلَ رسول الله صلى الله عليه وسلم رَجُلاً على صَدَقَاتِ بَنِي سُلَيْمٍ يُدْعَى بن الْلَّتَبِيَّةِ، فلما جاء حَاسَبَهُ، قال: هذا مَالُكُمْ وَهَذَا هَدِيَّةٌ، فقال رسول الله صلى الله عليه وسلم: فَهَلاّ جَلَسْتَ في بَيْتِ أَبِيكَ وَأُمِّكَ حتى تَأْتِيَكَ هَدِيَّتُكَ إن كُنْتَ صَادِقًا؟! ثُمَّ خَطَبَنَا فَحَمِدَ اللَّهَ وَأَثْنَى عليه، ثُمَّ قال: أَمَّا بَعْدُ: فَإِنِّي أستعمل الرَّجُلَ مِنْكُمْ على الْعَمَلِ مِمَّا وَلاّنِي الله فَيَأْتِي فيقول هذا مَالُكُمْ وَهَذَا هَدِيَّةٌ أُهْدِيَتْ لي أَفَلا جَلَسَ في بَيْتِ أبيه وَأُمِّهِ حتى تَأْتِيَهُ هَدِيَّتُهُ؟! والله لا يَأْخُذُ أَحَدٌ مِنْكُمْ شيئا بِغَيْرِ حَقِّهِ إلا لَقِيَ اللَّهَ يَحْمِلُهُ يوم الْقِيَامَةِ فَلأَعْرِفَنَّ أَحَدًا مِنْكُمْ لَقِيَ اللَّهَ يَحْمِلُ بَعِيرًا له رُغَاءٌ أو بَقَرَةً لها خُوَارٌ أو شَاةً تَيْعَرُ، ثُمَّ رَفَعَ يَدَهُ حتى رؤي بَيَاضُ إِبْطِهِ يقول: اللهم هل بَلَّغْتُ” رواه الشيخان.

    1. مقهورين و ساكتين | رد

      صلى الله عليه وسلم

    2. بس يا نانو اولاد (اللتيبية كتااااااااااااااااار عندنا) يعملوا فيهم شنو؟ نخليهم يوم تسود وجوه وتبيض وجوه والا نعمل ايه نتنيل بايه

      1. يا غلبان الله لا يغلبك !! قول آمين .. لا تتنيل ولا حاجة أنت عندك أقوى سلاح مدمر في العالم بل أقوى من القنبلة النووية إستعملو !!

        عارف هو شنو ؟؟؟ (إنه الدعاء) فليك بالدعاء في الثلث الأخير من الليل، فإن كنت مظلوم الله بينصرك على الظالم فدعوة المظلوم تفتح لها أبواب السماء وليس بينها وبين الله حجاب .. اللهم أصلح أحوالنا وولي علينا من يصلح .. آمين .. سلااام ..

    3. دخل “مُقاتل بن سليمان” رحمه الله على “المنصور” رحمه الله يوم بُويعَ بالخلافة …
      فقال له الخليفة “المنصور” :
      عِظني يا “مُقاتل” !
      فقال :
      أعظُك بما رأيت ,,, أم بما سمعت !
      قال : بما رأيت …
      قال : يا أمير المؤمين !
      إن عمر بن عبد العزيز أنجب أحد عشر ولدا ً وترك ثمانية عشر ديناراً
      ، كُفّنَ بخمسة دنانير ، واشتُريَ له قبر بأربعة دنانير وَوزّع الباقي على أبنائه …
      وهشام بن عبدالملك أنجب أحد عشر ولدا ً ، وكان نصيب كلّ ولدٍ من التركة مليون دينار …
      والله … يا أمير المؤمين :
      لقد رأيت في يومٍ واحدٍ أحد أبناء عمر بن عبد العزيز يتصدق بمائة فرس للجهاد في سبيل الله ،
      وأحد أبناء هشام يتسول في الأسواق

      1. الله الله ,, الا رحم الله عمر بن عبدالعزيز حفيد الفاروق ,,

      2. غايتو يا جنوبي يا أخوي الله يحفظك
        وما بقول ليك يزيدك علماً وتقاً وتفقيهاً لأنو دا معناتو زيادة في عمر حكومتنا الرشيدة وزيادة في ميزان حسناتها
        غايتو دا كلامك انت دا
        هههههههه

      3. أحسنت يا جنوبي تعليق جميل وموعظة رائعة لمن يتعظ !!! ( لكن قول لي الكلام دا من راسك ولا كراسك) ؟؟؟ هههههه لأنو ما عهدنا مثل هذا الكلام الجميل منك !! بالله عليك ما تحرمنا من نفحاتك هذه يا شيخنا … سلاااام …

      4. ههههههه علي الطلاق يا نانو لا من راسي ولااا من كراسي , شف سااااكت و ( مقاتل ) ده أول مره اسمع بيهو !! ما قت ليك فقهونا في الدين ! ده كله عشان نحاججم بي نفس ما جونا بيهو . لاكين مقاتل ده قريت عنه ولقيته زول مشهود ليهو بحسن التفسير الا في شيوخ كتااار ما كانوا معترفين بيهو وبيتهموه في دينه ( ظنيته محمود محمد طه حق عصره )

  8. مقهورين و ساكتين | رد

    انتو برامج الزكاة وتحصيلها البتظهر في وسائل اﻻعﻻم دي بتشيل من ناس التحلل واقرار الذمة ديل
    لو شالت منهم كان فقراءالسودان انتهوا وما ماتو جوع وعطش
    ادونا حق الله الفي الزكاة ده حقكم الجبتو من تجارتكم ما دايرنو

    1. مقهورين وساكتين وغلبانين شكيناهم على الله

  9. الله يلين رؤس المسئولين عندنا يبطلوا السفحي و اللفحي دا

  10. أأخوي ود العبيد السلام عليكم، الله يرحم أبوك وأبوي وناسنا الكبار الزمان لأنو ديل هم الناس الكانو خايفين الله، وبعملوا حساب كل صغيرة وكبيرة ما زي هسع !!! شغالين بنظام ألبع كل ما يقع في يدك وما يهمك (التحلل موجود) كان قبضوك .. حسبي الله عليهم .. سلاااام ..

    1. اللهم امين يا حليلهم كانوا كلهم زي الراعي او ممكن تقول الراعي زيهم في حفظ الامانه وعدم اكل مال حرام ويمكن يا نانو اخوي دي فعلا كانت أخلاق السودانين ويا حليلهم

      1. أخوي ود العبيد السلام عليكم، حا أحكي ليك موقف حصل من أبوي معاي يبين مدى تحملهم للأمانة وعدم المحاباة والمحسوبية والتفرقة بين الناس حتى ولو كان أقرب الأقربين !!

        والموقف هو كان عمري أقل من 6 سنوات وزي ما عارف (زمان) ما كان بيقبلوا أي طالب في الأولية (الأبتدائية) إلا يتم (7) سنوات وكنت بدرس في الخلوة (تمهيدي أو الروضة الآن) طبعاً كتير من الناس هسه ما بعرفوا الخلوة دي شنو ؟؟ المهم شيخ الخلوة (شيخ أمين) رحمه الله، قال لي يا ولد أنت خسارة تقعد في الخلوة سنة تاني لأنو مستواك أحسن من أي واحد في الأولية وأنا حاقدمك للجنة القبول بس المهم تقول ليهم أنا عمري (7) سنوات عشان يقبلوك . وفعلاً أخدني للجنة في يوم القبول ففوجئت بأنو أبوي هو رئيس اللجنة ما كنت عارف !! وأنا داخل أبوي قال ليهو: يا شيخ أمين رجع الولد دا لسه صغير . شيخ أمين قال ليهو لا أبداً دا عمرو (7) سنين، وسألني قلت ليهو عمري (7) سنين . واحد من ناس اللجنة سألني أنت أسمك منو؟ قلت ليهو (7) سنين !! ما خلاس معلقة معاااي ههههه .. رئيس اللجنة قال ليه دا ولدي وأنا عااارف عمرو صغير رجعو !! شيخ أمين قال لي طيب أنا بتحدا بيهو أول سنة رابعة ( آخر مرحلة زمان) جيبوه وأمتحنوهم مع بعض لو ما بقا أحسن منو ما تاخدوه ( كنت حافظ جزء عم وتبارك وقد سمع، وحافظ كل جداول الضرب لحدي ،12 وبقرأ وأكتب كويس جداً وخطي جميل، وبحل أي مسألة حسابية) !! أبوي قال لا لا برضو ما ممكن !!

        ومع إصرار شيخ أمين، ناس اللجنة قالوا ليه يا شيخ أحمد (أبوي) طيب خلينا نمتحنوا ونشوفوا ، وشيخ أمين كان مصر إصرار شديد إنو لازم يجيبوا أول سنة رابعة !! وفعلاً جابوه وأمتحنونا مع بعض في الحساب (الرياضيات) والعربي القواعد والإملاء والدين، وفعلاً كنت أحسن منو (ولا فخر) !! فقبلوني أعضاء اللجنة ولكن أبوي الكان معترض بشدة قال: (القانون قانون لازم يمشي على كل زول) ما دايرين نعمل لينا سابقة في النظام !! لكن أعضاء اللجنة قالوا لي طيب نخلي (مستمع) !! وفعلاً أخدوني كمستمع والحمد لله كنت في كل الإمتحانات (بقفل كل المواد ولا فخر) وطلعت أول الدفعة في الإمتحان النهائي وأستمريت على (البرنجية) حتى خلصت من الأولية وأمتحنت المتوسطة وكنت تاني اللجنة وكان الإمتحان على نطاق مديرية الخرطوم ولا فخر !!

        بالله شوفوا كيف كان الناس زماان وكيف هسا !!! دا ولدي ودا ولد فلان ودا أخوي ووساطات ورشاوي …. إلخ

      2. والله العظيم يا عبيد ونانو ناسنا الزمان ديل كانوا صحابه عديييييييييل في سلوكهم , انا عندي عمي ( الله يرحمه ) خريج كلية غردون وكان مسئول كبير في حكومة نميري وكان من الناس المسئولة عن توزيع اراضي الثورة وفي حكم نميري كان نائب محافظ بورسودان و مسئول عن توزيع اراضي بورسودان كلها , مات قبل كم سنة ووالله العظيم بيت واااحد ما عنده ولااا قطعة واطة ساكت !
        الخلوة دي يا نانو انا قريت فيها شهر واااحد , الشيخ ساقني من يدي وداني لأبوي وقال ليهو ولدك ده شوف ليهو حاجه تانية ده لا بنفع ولا بخلي باقي الاولاد ينفعو .. ودخلت المدرسة ميحي سااااكت الا استاذنا شيخ ( حسن ابو سبيب ) جاب لي راسي تب .. الله يديهو الصحة والعافية …

  11. ربنا يغفر لموتانا جميعا لكن من اين اتى هؤلاء عن جد تساؤل في محله عهدي بهم قبل سنوات كيف حالهم والان تنمروا اصبحنا نتعطش حتى لحكم عسكري او حكم اب تكو بس يساوي الناس في التك والا شنو يا جنوبي

  12. يا ناس يا هو كاتمة وحاجزين برنجي

  13. الزول دة بدون ما يخجل قال أنا بحكم وظيفتى فى ادارة اراضى الخرطوم بعرف الخطط الاسكانية الجديدة والمناطق زات المميزات الخاصة وما فيها حاجة لو إشتريت لى فيها نمرة زيى وزى اى زول .
    بلا يخمك …

    1. شايف كيف كله نظر هههه حلوة نظر دي

    2. ههههههههههههههههههههههههه,,ما زمااااان قلنا كدة قلتوا هناى !!

  14. دي بورسودان الخرطوم متين
    اندلعت التظاهرة إحتجاجا علي شروع والي البحر الاحمر محمد طاهر إيلا في بيع 5 مدارس بوسط المدينة لمستثمرين وتشريد طلابها.
    وتوجه المتظاهرون نحو وزارة التربية والتعليم بعد ان تجمعوا في الموقف العام للمدينة وبعد بلوغهم قسم الشرطة الاوسط اطلقت عليهم الشرطة الغاز المسيل للدموع واعتقلت ثمانية اشخاص بقيادة جعفر عبدالرازق رئيس (الهئية الشعبية للدفاع عن المدارس).

  15. اربع نسوان…….يا ملين الحديد يا سيدنا دااود،
    يعني يا بروف ماهي العلاقة مابين الاربعه والحديد
    أرجو التوضيح مع الشكر،
    ويا جنوبي الما تني ما دخل الجنه،
    ولكن البعملها بكون شبهه وأحسن الواحد يبتعد عن الشبهات وبعدين يا زوول اي واحد يقول ليك شنو ما عارف ده بتاع لبعي وبتاع تحلل وهلمجرا الحاجات التانيه بخليها لي ناس جنوبي وشنباتي يقولوها

    1. أنا !!؟ ابرا من القوالة ..
      ههههههههههههههههههههههههه

  16. ود الحافظ وبت حوه بلوم .. الطيب مصطفي وسبدرات ! اختلفت الاسماء والطبع وااااااااااااااحد !!!
    يا عبيد وطارق : امام الجامع ما قال ليكم ما تتكلوا في الناس عشان ربنا بحاسبكم !!
    اربعة نسوان انت قايل من فحولتهم يعني ! ديل عشان يسجلوا بي اساميهن المسروق .. يوم الاتنين تلقالا قطعة واطة ويوم الخميس تلقالا كم مليار بي اسمها في البنك ! غير كدي تتقلب في سريرا ده سااااااااااااااكت !!!!!!!!

  17. ارحموا عزيز شعبٍ ذلْ
    الداعرين امامكم والمؤتمر الوطني خلفكم فأين المفر …
    بالله معقول وصل بينا الحال للمذلة دي كلها ! نعيش في السودان الحكومة تذلنا وتطلّع زيتنا , نمرق من السودان ناس ندي راصطا وقدورة وبت حوه بلوم وود الحافظ يخلونا نطاطي راسنا .
    وقبل كم يوم ناس تشاد بيناقشوا ظاهرة دخول الفنانين السودانيين تشاد واقامة حفلات دون الحصول علي تصريح وادارتهم لبيوت دعارة وقمار !!
    دعوة لكل الشباب في دول المهجر لفضح مثل هذه البيوت وتبليغ الجهات المختصة في البلد المعني وذلك حفاظا علي ما تبقي لنا من سمعة في هذه الدول ..
    اواخر التسعينات كنا نحنا مجموعة من الشباب بنبلّغ هيئة الامر بالمعروف في الرياض بكل بيت يخص سودانيات او شباب سودانيين ( كدايس ) وخلال سنة واحدة لما عدينا البيوت لقينا اننا خلصنا من 15 بيت في منفوحه بس وبيت بتاع شباب سودانيين في الشميسي ( وديل بي حفرة دخانهم ) و7 بيوت في غبيرة و2 في حي الملز وكنا 5 تنفار بس . وللعلم ما ضروري تمشي تبلغ بي نفسك كل الشغلة تلفون صغير من أي كابينة للجهة المسئولة وتوريهم اسم الحي واسم الشارع ورقم العمارة ورقم الشقة . كانت معظم البيوت يكون واحد مخنس متزوج داعرة وقاعدين علي انهم اسرة في عمارة عوائل !!
    وارحموا عزيز شعبٍ ذلْ
    لما داعرة تقول لداعرة انا عارفه الضابط الضامنك في المطار منو وبيسهل ليكي دخولك ومروقك وتذكر الضابط بالاسم ! ده يسموهوا شنو ؟

    1. حسادتكم عينة !!

    2. سألتك بالله الكلام ده جد؟؟؟
      يلخي فطرت قلبي

      1. كان قصدك البيوت القلتها في الرياض والله جد وابشرك هسي يمكن زادت كمان إلا خلاص هرمنا واشتعل الرأس شيبا .. ودايرين ناس تشيل الراية .. اما لو تقصد مقاطع الصوت حقت الواتساب انا ذااتي اول ما صدقت الا واحد اتطوّع ورسل لي صور الناس ديل كمان واريتني كان اكتفيت بالصوت وما شفت الصور !!

  18. ياحليلينا منها قالوا الفساد وصل كتاب الصحافه بالقطع الفاخره ؟ وبقوا يجاوروا السعيديين؟؟؟؟؟؟

  19. أيوي يوي يووووووووي خبر طاااااااظا
    البرلمان: ملف هيثرو (مرق من يدنا ومشى العدل ) !!!
    وباسم الله ابتدينا كسرة جديدة لواواااااات جديدة وشد الهمة يا بروف

    1. هو يعني كان في البرلمان !!؟
      ملف هيثرو ده زي القنبلة بتاعت توم آند جيري كل واحد يرميها علي التاني لحدي ما تلقي شقي الحال التنفجر في يدو ..
      يا نانو : قالوا تمزمزوا في كوارع الكلاب سااااااااااكت ! صحي جده غير والله .. الرسول طاعمه يا نانو ؟

  20. يا جنوبي السلام عليكم ، معليش الأيام الفاتت كنتا مشغوووول كل يوم إجتماعات وسيمينارات (ليل نهار) هرووونا عشان كدا ما دخلتا إلا واتسآب !! والكوارع إن شاء الله من عندنا تجيكم في الرياض عشان تمزمزوا كويس !!!
    وشوف الناس بتاعين المزمزة أسالهم عنها أكان لذيذة وللا لا ؟؟ لأني أنا ما ضقتها ولا بتاع حاجات ز ي دي والحمد لله !! أما بخصوص مسألة البيوت إياها فجزاكم الله خير (حقتنا ما حقتم) !! ودا عمل خير تشكروا عليه وما تتوقفوا عنو ونحنا بديناهوا هنا من عام 1988م بالتنسيق مع السفارة قبلما ينقلوها ليكم !! ونضفنا البلد بلا هوادة من كل فاجر وفاجرة … سلاااام …

    1. عليك السلام والرحمة يا نانو
      راجين الكوارع بس اختار لينا حقت الجريوات المدوعلات شان عضمهن بتقرمش تِقِرمِش ..
      طبعا هنا برضو في الرياض كان في مجموعة مجنداها السفارة بالاتفاق مع هيئة الامر بالمعروف وبرضو عملوا شغل جامد جدا في بداية الالفين لكن فترة صغيرة ووقفوا , طبعا في شباب سودانيين كتار رغم انهم بتاعين فارغه لكن عندهم غيره علي الوطن وما بيرضوا في سمعتنا ..
      هسي عندنا في شارعنا قبل تلاتة ايام ( بس تقول كانوا راجني اكتب كلامي داك ) ظهروا شباب سودانيين ( جنس تالت ) وكلمني بتاع البقالة الجمبنا ( بقالة الكسرة يا المندهش ) اجروا شقة في الشارع الورانا ويتقدّلوا في الشارع سااااكت , لكن برضو لقيت كم واحد من السودانيين الفي الشارع واتفقنا نكشفهم للهيئة .. والله يا نانو اول امس شفت فيهم واحد في البقالة عامل حُمرة في خدودو !! يعني انا ما عارف الجنسيات التانية دي كووولها عندها جنس تالت لاكين تشوف شكله ما تصدق إلا المعولقين حقننا ديل تقول كان ما اتكسر واتمايع دايرين يغالطوهوا !!

      1. يا جنوبي جزاكم الله خير ( حقتنا ما حقت الجماعة ) !! أنت والشباب المعاك على كل ما تقومون لمحاربة الفساد والمفسدين ولا تتوانوا أن تكشفوا كل المائعين والمائعات والفاسقين والفاسقات وتبلغوا عنهم الهيئة ، حتى وإن تقاعس مسئولي الأمن في سفاراتنا وقنصلياتنا عن أداء واجبهم !!
        ومن تجاربنا أنو واحد وواحدة (من الجماعة إياهم)، يتزوجون على سنة الله ورسوله ويستخرجون قسيمة زواج من السفارة يستأجرون بموجبها شقة لتكون وكراً لهم لممارسة الرذيلة !! فأضربوا عليهم بيد من حديد ولا تنطلي عليكم حيلهم الخبيثة … سلاااام …

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: