أعمل رايح

• إذا تمت محاكمة (الجماعة) بقانون (التحلل) ثم تم إلغاء الحكم وتتم محاكمتهم الأن بالقانون الجنائي .. ما تسأل هل أخوانا القانونيين ما فاهمين القانون ولا شنو يعني ؟ ما تسال وأعمل رايح وبس !

• إذا كنت تسير بعربتك فى أحد شوارع العاصمة الرئيسية وأنت تود اللحاق بموعد مهم وسمعت أصوات العربات ويويويويويوي وتوقفت الحركة حتى يمر موكب أحد المسئولين ما تتكلم وأعمل رايح وبس ح تعمل أيه يعنى ! مش لازم المسئول يوصل مكتبو بى سرعة عشان يطلع ليهو قرار (خطأ) بى سرعة ؟
• إذا كنت صاحب (دكان) صغير فى أحد الأحياء وجاءك موظف الضرائب وعاين للمحل والرفوف الفاضية وصنقر ودنقر وكتب ليك ضرائب عشرة مليون .. ما تتكلم معاهو ولا تناقشوا عشان بعد شوية يفتح ليك بلاغ أعتراض عمل موظف .. أعمل رايح وبس وأرفع إيدينك للسماء !
• لما تشوف الناس المتكالبه على (المال الحرام) ما تحرق دمك .. الناس دي غبيانه ساكت هو (المال الحلال) بقي ممحوق .. ما تقيف في المسألة دي .. وما تحرق أعصابك أعمل رايح وبس
• رغم الوعود التى وعدتك بها الجهات المسئولة بثبات (سعر الدولار) على الأقل بعد الوديعة القطرية (المليارية) إلا أن سعر الدولار (تجاوز العشرة جنيهات) ولسه ماشي .. ما تسأل يه الوديعه م (وقفتو) عشان ما ح تلاقي أي إجابه .. أنسي الموضوع وأعمل رايح .. قال أيه لو ما جينا كان حصل إطناشر جنيه !
• إذا كان قائد العربة القدامك (ماشى على أقل من مهلو) وعندما تخطيته وجدت أنه يتحدث بالموبايل وهو يرتدى الزى العسكرى يعنى ح تقول ليهو شنو؟ الإلتزام بالقانون ده ليك إنتا إنتا عاوز تغلط (الحكومة) أسكت وبس وما تودى نفسك فى داهية !
• إذا طالبك متحصل النفايات برسوم زائده قائلاً (الرسوم زادوها) فلا تسأله عن (الضمير) فى زادوها عائد لمنو؟ لأنو أساسا ديل ناس ماعندهم ضمير وبيزيدوا على كيفهم ولو ما دفعتا ح يودوك (نيابة التفايات عشان كده أعمل رايح وأدفع وبس
• لما تشاهد برنامج حواري فى التلفزيون والمذيع قاعد يتكلم أكتر من الضيف ذاتو ويسأل الضيف ويجاوب على السؤال قبلو اقفل التلفزيون على طول بدل ما يجيك ضغط دم وتمشى الدكتور تلاقى قيمة الكشف مية جنيه .. أعمل رايح وأقفل على طول منها توفر ليك شوية كهرباء
• لما تلاقي الواحد شايل ليهو سبحة وعلامة الصلاة تتوسط جبهتو وكل ما تجى (مرا) ماشة يعاين ويدنقر فى الواطة تسكت .. أعمل رايح وما شايفو .. مش (شيخ حسبو) قال الراجل (مصمم) لأكتر من مرا واحده
• • إذا كانت لديك قضية تنظرها المحاكم ولاحظت أن القاضى يأتى إلى المحكمة متأخراً (بعد ما يفطر في بيتو) بينما المتخاصمون يأتون من (صباح الرحمن) فأعمل رايح وما تسأل ليه؟ فى زول كمان بيسال القاضى؟
• إذا توقفت أمام إشارة المرور وأمامك عربة (بدون لوحات) تجاوزها رجل المرور وجاء ليسألك عن أوراق (عربيتك) ما تندهش وأعمل رايح وما تودى روحك في داهية لأنو أكيد بيكون هو عارف العربية البدون لوحات دى تابعة لمنو!
• إذا عانيت من الأرق وعدم القدرة على النوم والساعة قد تجاوزت الحادية عشر مساء بينما مايكرفونات (الشيخ فلان) تبث على الهواء (حلقة الذكر) الاسبوعى التى يقيمها .. ما تضجر مش (السلطات) سامعة وفايت أضانا .. أبلع ليك (حبه منومة) وأعمل رايح !
• إذا كنت ممكن يعانون من مرض الفشل الكلوى وتعاني من رداءة الأجهزة وعدم وجود المحليل فلا تشكو ولا تسأل (علماء الأمة) عن دور الحاكم فى (توفير العلاج) لأنهم سوف يقولون لك أن الحديث يقول (إذا عثرت بغلة بالعراق) وليس إذا مات (مريض بالفشل الكلوى) .. أعمل رايح وبس!

كسرة :

إذا مقالنا بقي كوووولو (واوات) .. ما تسأل ليه الموضوع ده (غاتس كده) و (المغتسوا شنو) أعمل رايح هو وزير العدل يلاقيها من وين وللا من وين؟

كسرة ثابتة (قديمة) :
أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و؟

24 تعليق

    1. برنجيتك ما ولعتها يا ود الحيكومة

    2. ود الحووومة وعليك السلام حبيبنا ابو الشوش مبروك البرنجيه اصلا ناس الحكومة ديل ما بدخنوا سف سااااااااكت ..

  1. برنجييييييييييييييييييييييييه

    1. واللي ما بيدخن يا أبوالشوش برضو يولع؟ السلام أفضل ولا شنو رأيك؟ [دي والله صادقة ما كيزانية ربنا يشهد]

      1. وعليكم السلام – رد السلام امانة – لكن احنا دخانا شمبر ما جاب خبره

    2. تعليق متأخر برنجييييييييييييييية وفاضنها ليك ليقيت ود الحكومة زي ما قال جنوبي بسف ههههههه

  2. اعمل رايح طوالي هو انت داير عدالة اكتر من كدة سيبك من وكيل العدل وموظين الوالي والكلام الفارغ بس في عدالة اكثر من اعتقال عميد الامن لوالده الي هو والد مستشار الرئيس في نفس الوقت ……..افهم بس ……اظن فهامة صينية ما بتنفع

    1. مسرح امازونيا الكبري – مسرح بحجم مليون ميل م – مفاصلة ستاشر سنة ورجوع بدون اي شروط – بيت واحد فقط فيه كل الوان الطيف الامازوني – حكومة – امن – معارضة عصا قايمة وعصا نايمة – جبهة ثورية وهلم جرا

      1. مليون ميل كان ليك هههههه الان تحت تحت فيه قطعه تانية راح تتباع ناصية

  3. برنجييييية مريم

    1. مريم الاخرى ام المجدلية؟؟؟

  4. وإذا سُرقت مُحتويات من أمتعتك بمطار الخرطوم برضو نعمل فيها رايحين وما فاهمين حاجة أصلو عمال وعساكر المطار أمينين وحريصين على أمتعة الركاب الما تعبانين في شراء أمتعتهم هذه أصلو الناس برا بتلقى القروش في الشارع وبتشتري بالمجان أو الرخيص ، فقط قل (حسبي الله ونعم الوكيل)

    1. الوازع الدييييييني
      انتو يا اخوانا بتاع الوازع الديني ما ورانا رجع مليار تحكيم الاقطان / مدكوت ولا لسة ماهو تحلل برضه

      1. ناس القطاع الطلابى بالموتمر الوطنى مركبين يافطة فى احد شوارع امدرمان مكتوب فيها: اللهم اغننا بحلالك عن حرامك ………
        اعمل رايح لحدى ما يلاقوك كلو كلو !!

      2. حلالك مقصود التحلل يا فلاديمير !

  5. أذا داير تشترى سلعه من الدكان وسيد الدكان قاليك السلعه دى تمنها زاد الضعف أعمل فيها إتنشلت ودخل إيدك فى جيبك وقول الحرامى دة الله لا جعلو بركه وعد الى أدراجك سالما برقبتك…

    1. التجارة نجر ساكت وقطع من الراس يا خوي في دولة امازونيا

  6. ايه الحصل ؟!
    ليه الجدل ؟!
    ايه يعنى
    لو جاكم تراب !!
    او حر شديد !!
    او حتى
    امطار من زحل !!
    القصة ما جو البلد
    القصة فى حال البلد
    الفقر والجوع والدجل
    الظلم والجهل العجيب
    القهر والصمت المريب
    والقصة ..
    فى قانون سخيف
    ﻻ يحكم اﻻ ..
    على الضعيف
    والقصة ..
    اخطاء الطبيب
    القصة..
    جد ما ليها حل
    والحكمة فى
    الصبر الغريب
    فى شعب
    عايش دون امل
    وايه الحصل ؟!
    ليه الجدل ؟!
    القصة جد
    ما ليها حل
    ومصابنا
    ما الجو والتراب
    مصابنا
    فى البلد السراب
    وعزانا فى لمة اهل
    ﻛﻞ ﻋﺎﻡ ﺯﻱ ﺍﻟﻠﻲ ﻓﺎﺕ
    ﻧﻔﺲ ﺍﻟﺘﻔﺎﺻﻴﻞ ﻭﺍﻟﺤﻠﻢ ..
    ﻧﻔﺲ ﺍﻻﻣﺎﻧﻲ ﺍﻟﻄﻴﺒﺎﺕ ..
    ﺍﻟﺒﻨﺎﻳﺎﺕ..
    ﺍﻟﻨﻔﺎﻳﺎﺕ ..
    ﺍﻻﺷﺎﺭﺍﺕ ..
    ﺍﻟﻐﻨﻴﻮﺍﺕ
    ﺍﻟﻜﺘﺎﺑﺎﺕ ..
    ﺍﻟﺸﻌﺎﺭﺍﺕ ..
    ﺍﻟﻌﺒﺎﺭﺍﺕ ..
    ﺍﻟﺤﻜﻮﻣﺎﺕ ..
    ﺍﻟﻘﻴﺎﺩﺍﺕ ..
    ﺍﻟﺤﺮﻭﺑﺎﺕ ..
    ﺍﺟﺘﻤﺎﻋﺎﺕ ..
    ﺍﺗﻔﺎﻗﺎﺕ ..
    ﺍﺧﺘﻼﻓﺎﺕ.
    ﺍﻧﺘﺨﺎﺑﺎﺕ ..
    ﺑﺮﻟﻤﺎﻧﺎﺕ ..
    ﻭﺍﻏﺘﻴﺎﻻﺕ ..
    ﺍﻟﻬﻨﺎﻳﺎﺕ ..
    ﻭﺑﻠﺪﻧﺎ ﺍﻛﻌﺐ ﻣﻦ ﺍﻣﺲ ..
    ﺍﻟﺴﻴﺪ ﺍﻟﺼﺎﺩﻕ ﻳﺒﻴﻊ ..
    ﻭﺍﻟﻤﻴﺮﻏﻨﻲ ﺍﻟﻤﺄﻣﻮﺭ ﻳﻄﻴﻊ ..
    ﻭﻳﺎﺍﺍ ﺷﻌﺒﻨﺎ ﺍﻟﻤﺴﻜﻴﻦ ﺗﻀﻴﻊ..
    ﻭﺍﻟﺮﺍﺩﻱ ﻟﻼﺧﺒﺎﺭ ﻳﺬﻳﻊ..
    ﻧﻔﺲ ﺍﻟﻤﻼﻣﺢ ﻭﺍﻟﺼﻮﺭ ..
    ﻧﻔﺲ ﺍﻟﺘﻤﺎﺭﻳﻦ ﻭﺍﻟﻜﻮﺭ ..
    ﻧﻔﺲ ﺍﻟﻠﻌﺐ ﻧﻔﺲ ﺍﻟﻜﻔﺮ ..
    ﻭﻧﺴﺠﻞ ﺍﻟﻼﻋﺒﻴﻦ ﻛﺘﺎﺍﺍﺍﺭ ..
    ﻭﺗﺠﻴﺐ ﺟﺮﺍﻳﺪﻧﺎ ﺍﻟﺸﻤﺎﺭ ..
    ﺗﻌﻠﻦ ﻭﺻﻮﻝ ﻻﻋﺐ ﺧﻄﻴﺮ ..
    ﻳﻠﻌﺐ ﺳﻨﺔ ..ﺷﻦ ﺍﻟﻠﻌﺐ ..
    ﻭﻓﺮﻳﻘﻨﺎ ﻗﺒﻞ ﻳﺮﻙ ﻳﻄﻴﺮ ….
    ﻭﻟﺴﻪ ﺍﻟﺼﺮﺍﻉ ﻣﺎﺯﺍﻝ ﻃﻮﻳﻞ …
    ﺟﺮﺡ ﺍﻟﻮﻃﻦ ﻣﺎ ﺯﺍﻝ ﻛﺒﻴﺮ ..
    ﻭﻧﺤﻦ ﺑﻨﺮﺍﻗﺺ ﻓﻲ ﺍﻟﺒﺸﻴﺮ ..
    ﻭﻛﻞ ﻋﺎﻡ ﻭﺍﻟﻨﺎﺱ ﺑﺨﻴﺮ ..
    ﻣﺎﺕ ﺟﻮﻥ ﻗﺮﻧﻖ ﻳﻈﻬﺮ ﺧﻠﻴﻞ ..
    ﻳﺮﺣﻞ ﺧﻠﻴﻞ .. ﺣﻴﺒﻴﻦ ﺑﺪﻳﻞ …
    ﻭﻧﺒﻴﻊ ﺿﻤﺎﻳﺮﻧﺎ ﻓﻲ ﻣﺰﺍﺩ
    ﻭﻧﻜﻮﺱ ﻋﻦ ﺍﻟﻮﻃﻨﻴﺔ ﺯﺍﺩ ..
    ﻭﻃﺮﻳﻘﻨﺎ ﺃﻃﻮﻝ ﻣﻦ ﻃﻮﻳﻞ ..
    ﺟﺎﻣﻌﺎﺕ ﺗﺨﺮﺝ ﺑﺄﻻﻟﻮﻑ ..
    ﻭﺷﺒﺎﺑﻨﺎ ﻓﻲ ﺍﻟﻄﺮﻗﺎﺕ ﻳﻄﻮﻑ ..
    ﺗﻌﺒﺎﻥ ﻳﻔﺘﺶ ﻋﻦ ﻋﻤﻞ ..
    ﺑﺤﻠﻢ ﻳﻐﻴﺮ ﻟﻠﻈﺮﻭﻑ ..
    ﻭﺍﻟﻤﺎﺳﻤﻊ ﺑﺎﻛﺮ ﺑﻴﺸﻮﻑ ..
    ﻭﺍﻟﻌﻤﺮﻭ ﻣﺎﺿﺎﻕ ﺍﻟﻠﺤﻢ ..
    ﻛﻴﻔﻦ ﻳﻔﻜﺮ ﻓﻲ ﺍﻟﺨﺮﻭﻑ .. ؟

    ﻏﻨﺎﻧﺎ ﺭﺍﺟﻊ ﻟﻲ ﻭﺭﺍﺀ ..
    ﺣﻔﻼﺗﻨﺎ ﻛﻠﻬﺎ ﻭﺭﺍﺀ ﻭﺭﺍﺀ ..
    ﻭﻗﻴﻤﻨﺎ ﺭﺍﺟﻌﺎﺕ ﻟﻮﺭﺍﺀ.
    ﺟﺎﺭﻱ ﺍﻟﺸﺤﻦ ..
    ﻭﺑﻨﺎﺗﻨﺎ ﺟﺎﺭﻳﺎﺕ ﻭﺭﺍﺀ ﻭﺭﺍﺀ ..
    ﻭﻃﺎﻋﻨﻲ ﺩﺍﻳﻤﺎ ﺑﻲ ﻭﺭﺍﺀ …
    ﻭﻗﺎﺻﺪ ﻣﺤﺒﺘﻲ ﺗﺨﺴﺮﻫﺎ .
    ﻭﺇﻧﺸﺎﺀ ﺍﻟﻠﻪ ﻳﺎﺥ ﺭﺍﺟﻞ ﻣﺮﺓ..
    ﻭﺑﻨﺎﺗﻨﺎ ﻛﺎﻳﺴﺎﺕ ﺍﻟﻌﺮﺱ ..
    ﻛﺎﻥ ﺑﺎﻟﻜﺮﻳﻤﺎﺕ ﻭﺍﻟﺤﺒﻮﺏ ..
    ﻭﺣﺮﺍﻣﻲ ﺳﺮﺍﻕ ﺍﻟﻘﻠﻮﺏ ..
    ﻭﺭﻭﻧﻲ ﻛﻴﻔﻦ ﺑﺲ ﻳﺘﻮﺏ ..
    ﺍﺫﺍ ﺣﺎﻝ ﺍﻟﺒﻠﺪ ﻣﺎﻳﻞ ..
    ﻭﻛﺎﻥ ﻛﻞ ﺍﻟﺒﻠﺪ ﻣﻨﻬﻮﺏ ..
    ﺑﻨﻐﺶ ﻓﻲ ﻧﻔﺴﻨﺎ ﻧﻔﺘﺨﺮ .. ﻭﻧﻜﺎﻭﻱ ﻓﻲ
    ﺑﺎﻗﻲ ﺍﻟﺸﻌﻮﺏ ..
    ﻭﻟﺴﻪ ﺑﻨﻜﺘﺮ ﻓﻲ ﺍﻟﻜﻼﻡ ..
    ﻛﻠﻢ ﻗﺮﺍﻳﺒﻚ ﺑﻘﺮﺵ ..
    ﻭﺍﺻﻞ ﺣﺒﺎﻳﺒﻚ ﻭﺍﻧﺘﻌﺶ ..
    ﻋﺎﻟﻢ ﺟﻤﻴﻞ ..
    ﻛﻞ ﻋﺎﻡ ﻭﺍﻧﺘﻢ ﺑﺨﻴﺮ ..
    ﺭﻳﺢ ﺑﺎﻟﻚ ..
    ﻭﺍﺭﺣﻢ ﺣﺎﻟﻚ ..
    ﻭﺑﻠﺪﻧﺎ ﻛﺎﻥ ﺳﻮﺩﺍﻧﻲ ﻭﻥ ( 1) ..
    ﻭﺍﻟﻠﻴﻠﺔ ﺍﺻﺒﺢ ﺗﻮ( 2 ) ﻭﻃﻦ …
    ﻭﻣﻤﻜﻦ ﻳﻜﻮﻥ ﺍﻛﺘﺮ ﻣﻤﺎ ﺗﺘﻮﻗﻊ ..
    ﻓﻘﻂ ﺍﺿﻐﻂ ﻧﺠﻤﺔ .. ﺣﺮﺏ .. ﻣﺮﺑﻊ ..

    ﻣﻌﻚ ﻓﻲ ﻛﻞ ﻣﻜﺎﻥ …
    ﺁﻵﻡ …ﻋﻠﻰ ﻣﺮ ﺍﻟﺰﻣﺎﻥ ..
    ﻭﻳﻦ ﺍﻻﻫﻞ ..؟
    ﻧﺎﺳﻨﺎ ﺍﻟﺤﻨﺎﻥ ..!
    ﺍﺻﺒﺤﺖ ﻛﻴﻒ ؟ ﻳﺎﺟﺎﺭﻱ ﻛﻴﻒ ..؟
    ﻭﺍﻻﻡ ﺗﻨﺎﺩﻱ ﻋﻠﻰ ﺍﻟﻮﻟﺪ ﻓﻮﻕ ﻟﻠﺼﺮﻳﻒ …!
    ﻫﺎﻙ ﻳﺎﻭﻟﺪ.. ﻭﺩﻱ ﺍﻟﺪﻗﻴﻖ ﺟﻴﺐ ﻟﻲ ﻣﻦ
    ﺍﻣﻚ ﺭﻏﻴﻒ ..
    ﺑﻼﺩﻱ ﺍﻧﺎ ﺑﻼﺩ ﻧﺎﺳﺎ ﻣﻮﺍﺭﻳﺜﻬﻢ ﻛﺘﺎﺏ ﺍﻟﻠﻪ ..
    ﺑﻨﻐﺶ ﻓﻲ ﻧﻔﺴﻨﺎ ﻧﻔﺘﺨﺮ .. ﻭﻧﻜﺎﻭﻱ ﻓﻲ
    ﺑﺎﻗﻲ ﺍﻟﺸﻌﻮﺏ
    اللهم ارحم محجوب شريف وعافه واعفو عنه ..

    1. الله يرحم محجوب وشكرا لك اول مره اجدها كامله

  7. والله يا بروف روحتنا معاك …..على قول الشوايقه ( لكن نسو شنو؟)

  8. أنا أقترح كل 12 واو تكتب بدلها س

  9. ياحليل زمان نحن ضائعون والقادم مهبط

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: