لا يوجد بالأمارات

تشرف العبد لله خلال الفترة من 19 مايو إلى 29 مايو 2014 بزيارة دولة الأمارات العربية المتحدة ملتقياً مع الجالية السودانية في ليال ثقافية بكل من مدينة أبوظبي ودبي والعين وقد لفت إنتباهه أن هنالك أشياء لا توجد بدولة الأمارات منها :

• لا يوجد في الأمارات شرطي مرور .. خلال العشرة أيام التي قضيتها متنقلاً من إمارة إلى أخري لم أشاهد مطلقاً أي شرطي مرور (واقف ليهو في إشارة) وللا قاعد ليهو في عربية يتحصل في الغرامات بينما أفراده يقومون بإيقاف السائقين للبحث عن (مخالفاتهم) !
• لا يوجد في الأمارات أكياس نفايات ملقاة (مردومة) في الشوارع أو حتى الأزقة ولم أر ولو مرة واحدة عربة نفايات تقوم بجمع القمامة فجمع النفايات يتم في أوقات يكون فيها الناس نيام (مش قيام)
• لا يوجد في الأمارات شارغ واحد به حفرة واحده .. كل الشوارع مسفلته بمواصفات عالية أذ أن الشركات التي توكل لها هذه المهمة شركات ذات باع طويل في رصف الطرق لا كتلك الشركات التي يتم تأسيسها بين يوم وليلة ليرسو عليها العطاء وهي لا تمتلك من الأليات (ولا كوريك) واحد.
• لا يوجد في الأمارات حظر للمناسبات وموعد لإنتهائها (لا الشاعة حداشر وللا الساعة عشرين) لا أدري من أين أتينا بهذا الحظر المعاهو كمان (رسوم) !
• لا يوجد في الأمارات تقييد في حرية اللبس بالنسبة لغير المواطنين فأي قادم له الحق في إرتداء ما يحب طالما أنه لا يكشف العورات ومع ذلك لا أحد يتجرأ أن يعاكس أحد (تعاين وبس) ! وإلا فإن القانون لا يرحم .
• لا يوجد في الأمارات رجال شرطة في الطرقات .. لم أر شرطياً واحداً لكن على الرغم من ذلك الناس (ماشين ذي الخيط) ولا يمكن لأي من كان أن يقوم (بقطع) إشارة مرور حتى وإن كان
الشارع ما فيهو (زول)
• لا يوجد في الأمارات سلع مغشوشة أو (مضروبة ) ذي اللمبة البتولع مرة واااحده أو (البسكويت) منهي الصلاحية .. كل السلع والخدمات تخضع لرقابة صارمة ما عدا (الصحف)
• لا يوجد في الأمارات مواطنون متسولون فالدخل القومي يوزع على المواطنين بالتساوي في شكل خدمات صحية وتعليمية وأمنية تمشياً مع المقولة التي تقول بان دخل الدول يجب أن يذهب إلى الشعول وليس إلى (الجيوب)
• لا يوجد في الأمارات باعة متجولون أو على شارات المرور فالمواطنين تقوم الدولة بتوظيفهم وإيجاد فرص العمل لهم عملاص بالمقوله (المواطن في ذمة الحكومة) بينما في دول أخري الحكومة ذاااتا ما عندها ذمة !
• لا يوجد في الأمارات (عربات إسعلف) تطلق صافرتها في الشوارع كل دقيقة مع أن عربات الإسعاف لديهم مزودة بكل وسائل وأجهزة ومعدات الإسعاف وليست (نقاله وبس)
• لا يوجد في الأمارات عاملين بالمطار يقابلونك بتكشيرة ووجه مقضب الجبين كل الموظفين يرسمون على وجوههم إبتسامة ترحيب وكأنهم موظفين علاقات عامة لا أحد منهم يخفي عينية بنظارات سوداء ولابس السفاري (البيجية طبعن)
• لا يوجد بالأمارات (ركشات) لحمل البشر بل توجد بصات (أوكوديون) أنيقة طولها أكثر من عشرين متراً يمكنها أن تسع لأكثر من حمولة (خمسين ركشة) بينما لا تخلف من الغازات السامة ما تخلفه ركشة واحدة
• لا يوجد بالأمارات (صبية) يقومون بتوزيع الصخف أو حمل الأغراض على (الدرداقات) فالحكومة تقوم برعايتهم وتوفير كل إحتياجاتهم (هنا تأجرا ليهم) !
• لا يوجد بالأمارات دار للأطفال فاقدي السند إذ يمكن للخريج أن يتزوج بعد (سنة واااحده) من تخرجه بدون المرور على أي لجنة (إحتيار) !
• لا يوجد بالأمارات سائق واحد يمكنه أن يقوم بركن عربته في مكان غير مخصص لذلك
لأن الغرامه في هذه الحالة (500 درهم) أي ما يفوق المليون جنيه سوداني (يعني ما ممكن تجي تلاقي زول قافلك وبعد ساعة يجي يقول ليك معليش)
• لا يوجد بالأمارات ماكينه (صراف ألي) واحده خارج الخدمة إذ تتم صيانه هذه الماكينات بصورة دوريه وليست (سنوية)
• لا يوجد بالأمارات أي وجه للتصحر مع إنو (قاعدة في صحراء) فالخضرة والأشجار في كل مكان وليست في شارع (القصر) فقط

كسرة :
لا يوجد في الأمارات سوداني واحد لم يسألني عن (خط هيثرو) !! وهذا السؤال نحيله لسعادة النائب العام وبهذه المناسبة نهدي له هذه (الواو) الجديدة !!

أخبار ملف خط هيثرو العند النائب العام شنو(وووو وووو وووو وووو وووو وووو وووو)+و+و+و؟
كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و+و؟

Advertisements

44 تعليق

    1. مبروكة يا العبيد ،، (لاكين) البرنجى الكتير دا ما كويس،، (خاستن) مع الصيف الحار دة !!!

  1. حمدلله علي السلامة استاذنا

  2. برنجيييييييييييييييييية 2 وهناك مؤامررررة

    1. المندهش ،، انتا برضو شاعر بالمؤامرة دى ؟؟

      1. لا توجد مؤامرات ولكن البرنجي مالي السوق وصنع خصيصا في السودان ودي عباره قديمه

  3. مقهورين و ساكتين | رد

    No 2

      1. مقهورين و ساكتين

        لما كتبتها كان في تعليق واحد
        بس شكلها الشبكة خذلتني
        No3

  4. يا بروف أولا بالتبادي ألف حمدا لله بالسلامة
    لكن إمارات شنو وكلام فارغ شنو ديل ولا عندهم مكوة أم ديك ولا عندهم عقارب ولا عندهم تحلل زاتو !!
    وكل حاجة روتين ما فيهو ايتها فضائح ولا صدمات ولا لحس كوع
    خلينا كده احسن لينا

    1. لا تقل مكوه بل قُل مكواة !!
      يعني الامارات دي ما فيها الحبه دي ! اشاعه ساااكت ..
      سمح الشيخ ( ناقص ) بتاعنا ده ما يمشي يجيب منهم كمال ( بن ) حمزه حقهم عشان يبقي لينا الخرطوم زي ابوظبي !!
      الناس تمشي لي قدام ونحنا ماشين لي وراء ورقيصنا ذاااتو بقي ترترة لي وراء ! انتو صحي في بوتيكات الخرطوم بقوا يبيعوا وراء جاااااهز ؟ يجازي محنكم يا السوادنه !!

      1. وكمان رخيييييييس سعرو تمانين جنيه بس ! ولا ابو نجمة ولا ابو هجمة ده كلو بقى موضة قديمة
        ” ثقافة الورا ورا ” اها كمان قل لي دي في الامارات في ؟

      2. اخي جنوبي للتصحيح كمال حمزة دبي واحمد عوض الكريم ابوظبي شوفت السودانين كيف

      3. شكرا يا الغلبان علي المعلومه ..
        والشئ البحير فعلا انو الامارات قامت علي ايدي وعقول السودانيين , ولو حكوماتنا دي كانت بتخلي القروش تعود لفايدة الوطن كنا بقينا افضل واجمل بلد لكن تأتي الحكومات بما لا يشتهي السودانيين .. ياكلو ياكلو .. ياكلو السم ان شاء الله ..

      4. دكتور شنباتى .. حصّل وتعال بسرع قبال الورا ورا ورا دا يفوتك ..
        أكان فاتك تانى ما بتلقا ..وجنوبى شحد الله ..والله اداه ..
        غايتو لاكين جنس غايتو ..

  5. حمدن لله عالسلامة .. وعقبال تجينا زيارة وعُمرة كمان ..

  6. [منْ أمنّ العقوبة أساء الأدب] ولا شنو يا بروف
    الناس هناك شبعانة وعينها ملانة ما زي ناسنا الواحد ما يصدق يلقى ليه كرسي وهاك يا خبت ولحس [عشان الواحد يأمن مستقبله ومستقبل عياله ، يعني الواحد ما يستفيد من منصبه ولا كيف؟]
    حمداً لله على السلامة يا بروف وعوداً أحمدا

  7. لا أعرف الكثير عن الإمارات و لكن ما توصفه يقول أنه يوجد قدر معقول من العدالة. و ما أظنها العدالة “ديييييك” لكنه قدر يضمن أن يستتب الأمن و يتجه الناس لأعمالهم. حيث أن الغالبية العظمى من البشر كويسين و القلة الماكويسة أغلبهم مجبورون على ماهم عليه و البقية هم من المجرمين و برضه يمكن تقويمهم أو ردعهم.
    أظن العدالة أن تكون الأشياء بمقادير تمكن القيادة من التوجه لأهداف الأمة. و يمكن لهذه المقادير أن تتغير بحسب وضع الأمة و موقعها من أهدافها العليا. و هذا ما يبرر أن يتنازل القادة للأصلح و الأوفق لكل مرحلة من مراحل الرحلة للأهداف العامة أو الأممية و ذلك لضمان ثبات التوجه نحو الهدف. و هنا يبرز دور المشاورة و آليات و نظم الإختيار و التى يجب أن تكون بصورة دورية حتى يتجدد الوفاء لأهداف الأمة أو البلد.

  8. نسيت النقاط التالية با بروف
    – انو الامارات مافيها كيزان و تجار دين و افاقين علشان كده ماشة لي قدام
    – انو فيها قومية و انتماء لي دولة و تاريخ مش زي السودان لي يوم الليلة نحن في فلان ود عرب و علان فرخ و الحقيقة انو كلنا لمن نقطع البحر (عبيد قالو ادري انك عبيد ويش اسمك)
    – انو حكزمة الامارات من شيخ زايد عليه رحمة الله بفكرو و بخططو و يحللو و بعد داك ياخدو قرار و في السودان من زمن الازهري ينومو بالليل الواحد يحلم بي حاجة تاني يوم ينفذا و في زمن الكيزان يفكر في سرقة و يطلع ليها قرار
    – انو الامارات ما كان فيها لا انصار لا ختمية اسرة مالكة و كل الناس مقتنعا بيها و الاسرة المالكة مقتنعة بي الشعب و هسي الحكومة كارهة الشعب و الشعب امو …….

    1. واللي بني مصر في الاصل كان حلواني شفت كيف صدق بالله لا اقول ان الشعب السوداني بره بشتغل وجوه ما بيشتغل ولكن اقول ان السياسات الغلط هي التي توخر فينا اساس كل شي في الامارات سوداني صدق دي مش غريبة لكن زي ما قلت كل شي بالتخطيط السليم والتنفيذ بصدق وبدون خم وسرقه الانجليز وهم طالعين من الامارات ادو الشيخ زايد رحمه الله وصيه الخدمة المدنية سودانييين شفت كيف وشفت حالنا اصبح كيف واه واه واه من ديل

  9. مبرووووكة عليك البرنجية أخوي ود العبيد، وأخونا جنوبي منور القمردينة بعد غيبة ويا سلام على اللغة (مكواة) !! ويا (شرقاوي) سألتك قبل كده ما جاوبتني قلت ليك إنت ما ياتو شراقوه؟ حقين أمدرمان ولا الخرتوم ولا بحري ولا عطبرة ولا كسلا ولا بورتسودان؟؟ فأنا بعرفهم كووولهم .. وكمال ود حمزة ده حقنا في الأساس (وهو جارنا في أمدرمان) وأهلو لسه جيرانا وكان ضابط إداري في الحكومات المحلية زمااان أيام نميري ووزيرم جعفر بخيت رحمهم الله.
    بس يا بروف في حاجات في الأمارات وخاصة في أمارة دبي نحنا ما عندنا (والحمد لله) !!! ومنها :
     أي كبري أو نفق تعبرو بي عربيتك النظام يسجل عليك رسوم يعني زي نظام ساهر في السعودية بكون في سنسر في العربية !!
     مواقف العربات حتى في الشوارع العامة بي قروش ما بلااش !!
     والطامة الكبرى المسخرة والإباحية العندهم في المولات والفنادق بل وحتى في المترو بدبي ما شفتها في أي حتة ولا في أوربا !!
    .. سلاااام ..

    1. ركب سالك وابقى سالك بس ما صعبة

      1. أخوي الغلبان (الله لا غلبك) لكن شكلك كدا داير (تغلبني) !! مالك علي سويت ليك شنو ؟؟ صدقني ما فهمت التقتحة من تعليقك على كلامي ترجم لو سمحت .. ههههههههه … سلااااام …

    2. نمشي دبي يعني !!
      معقوله يا مترو دبي !! مانسمع بيك الا من شيخ نانو .. ههههههههه
      كمان قالوا عندهم شارع سريع ما تمشي فيهو الا بالقروش ! هسي ناسنا يسمعوا يقوم يعملوا شارع الغابة بالقروش تاني من امدرمان الا نطير !!

      1. يا جنوبي وييييين تمشي بعد كده ؟؟ ما كفاااك الفات الله يخزي شيطانك !!! هو باقي شيء في العمر ؟؟ أحسن ليييك تستثمر باقي عمرك ده في التجارة (مع الله)، والكلام هنا للجميع ، فأفضل الأزمان والأوقات التي تحصل بها على أعلى الدرجات وتتم خلالها إستجابة الدعوات الصالحات هي في الثلث الأخير من كل شيء :
        فأفضل وقت في يوم الجمعة هو الثلث الأخير منها، وأفضل وقت في الليل هو الثلث الأخير منه، وأفضل وقت في رمضان هو الثلث الأخير من رمضان، وكذلك أفضل وقت في العمر هو الثلث الأخير منه وقد دلنا على ذلك الرسول صلى الله عليه وسلم في حديث جَابِرٍ ، رَضِيَ اللَّهُ عَنْهُ قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ” مَنْ مَاتَ عَلَى شَيْءٍ بَعَثَهُ اللَّهُ عَلَيْه ” . رواه الحاكم في المستدرك وصححه الألباني في صحيح الجامع برقم 6543 .. فالله الله في باقي أعمارنا ، فلنعمرها بطاعة الله … سلااااام …

      2. يا نانو ياخوي ربنا يديك العافية ويعظم اجرك
        بالمناسبة دي اريتك تعمل لينا دروس في القمردينة عن فضل شهر رمضان يعني قبل رمضان باسبوع تتكلم لينا عن فضل العشرة الاوائل واحب الاعمال فيها وقبل العشرة الاواسط تتكلم لينا عن فضلها وبرضو قبل دخول العشرة الاخيرة تورينا فضلها واحب الاعمال في كل عشرة عشان ندخلا ونحنا جاهزين .. معظم الشيوخ يجيبوهم في التلفزيون نكون نحنا في اواخر رمضان ويقوم يتكلم لينا عن فضل اوائل رمضان ..!! نقلب هوبا يعني ؟
        شنو نمت في اليو تيوب وما نزلت لينا حاجه جديدة من اربعه شهور وبالمناسبة معظم المقاطع الصوت ضعيف واريت تراعي الجانب ده في المقاطع الجديدة .. وما تنسانا من الدعاء وخير الدعاء دعاء المؤمن لاخوه المؤمن ..
        وبرررررضو مترو دبي الا اشوفو … مسكتني ام هلا هلا ..

    3. سالك منظومة الكترونية تركب على السيارة تسمح لك بالتجول داخل الطرق في دبي يعني ضريبة صغيرونة كدي كانها نظام شريحه الهاتف كلما تخلص تجيلك رسالة اس ام اس تنبهك وذلك لبعض الطرق في مدينة دبي بس انا ما موجود في الامارات هذا كان العهد بالامارات انا الان في بلد السجم والرماد ههههه ما يبتادر لذهنك السودان فللاوطان في دم كل حر يد سلفت ودين مستحق والدين الحمد لله دفعته بالزيادة ورجعت دفعته تاني بي مغصة

      1. مشكوووور أخوي الغلبان على الإيضاح الله لا يغلبك ، وأنا الأمارات بمشيها شغل ومرات زيارة للأرحام مع تحياتي .. سلاااام ..

  10. تمت مخالفتي في ابوظبي بسبب قطعي الطريق العام من غير الجهة المخصصة للعبور بمبلغ 200 درهم، والله طلعت الفلوس شان اعطيهم رفضوا وقالوا لازم ادفع في المرور (خ11)، النظام نظام ولا كبير على القانون – المهم ان يسود القانون وهذا ما ينقصنا، اما موضوع البارات يا اخونا نانو فموجودة بكثرة في ابوظبي داخل المراقص، وان هدمت بناية زاخر؟
    بس الشهادة لله أنه توجد درجة من الأمان يمكنك معها النوم في الشارع دون خوف؟ كما يمكنك أن تأمن على أولادك وسط بناية بها جميع الجنسيات الغير عربية ودون خوف؟
    مفاراقات غريبة تحملها دولة الإمارات العربية وهو ما جعل منها هذا الإسم الكبير – والأهم القيادة الحكيمة الراشدة – والشهادة لله موضوع البارات وحماية الشرطة لها داخل ابوظبي لأمر كان يثير حفيظتي لكن بلغني بعض الأخوة أن هذه الظاهرة بدأت محاربتها.
    المهم الإمارات نحن بدأناها
    وأكتملت من دوننا
    ونحن نحتاج أن نحذو حذو دولة لنا الفضل من بعد الله وقيادتها في تأسيسها
    وهو أمر يرفع الضغط والسكر
    والغريب أن البشير كان يعمل في الإمارات معارا ورأى ما رأى الا انه خزن ما رأى في ذاكرته دون ان يوجه بإنزال ذلك في ارض الواقع؟
    ولله الأمر من قبل ومن بعد

    1. لك التحية وطني السودان البشير كان بيعمل هناك صح بس كان بيعمل في شنو هههه ما علينا وفضل الامارات على من اغترب فيها كبير بس للاسف ما عملناه منها اخدوه مننا في سنتين سبب حكومة وسبب ذمم فسدت بسبب الحكومة والان في بلد طاخ طاخ بم وعما قريب نتوكل على الذي لا ينام ولا يأكل الطعام ونعبر بقوارب الموت وأسال كما سأل الفنان منو ما عارف لكن اكيد جنوبي عارف هل من عودة للاوطان ؟تقبل مروري والتحية لك

  11. جزاك الله خير (حقتنا ما حقتم) أخوي جنوبي على الفكرة الرائعة بتنزيل بعض النصائح للقروب عن فضل أثلاث رمضان قبل حلولها، وإن شاء الله سأفعل إن بقي في العمر بقية !! وبالنسبة للحلقات الماضية فعلاً الصوت كان ضعيف من المخرج، ولكن لو شفتها على اليوتيوب باللابتوب بتمشي حالها . وأبشرك بأني ماشي السودان نهائي بعد رمضان للتفرغ للدعوة وقد أخطرت إدارتنا بكده قبل 4 شهور وهم بصراحة (ما دايرني أمشي كلوكلو) مش حباً في سواد عيوني لكن لأنهم ما لاقين ليهم بديل لي إلي الآن فكلما نجيب ناس وأدربهم يزوغوا لأنو الشغل بيعتمد أساساً على اللغة الإنجليزية وهم زي ما عارف تعبااانييين في الحتة دي !!

    وأنا هنا بقيت مقيد جداً ما عندي أي نشاط دعوي مع أنو كان ناس الدعوة والإرشاد زمان بوجهوني لعمل جدول لمحاضرات أسبوعية في مساجد بعينها، وفي رمضان كانت بصفة يومية وهم يصدقوا على الجدول ويوزعوه على المساجد.. أما الآن فممنوع منعاً باتاً بأمر من وزارة الداخلية والأمارة !! فنسأل الله أن يوفقنا لما يحب ويرضى وأن يبلغنا رمضان ويوفقنا فيه للصيام والقيام على الوجه الذي يرضيه عنا مع الصحة والقبول آاامين وبالله عليكم ادعوا لي بالتوفيق … سلااااام …

    1. بشارة السواد يا ود امي ! تمشي وين ؟
      يمين الا تبقي زي سيدنا موسي تهرج براااااااااك ! يا خوي اعتبر نفسك واحد من فتية الكهف والبد في جدة دي لحدي ما الحكومة البتفتن الناس في دينا دي تطير ..
      ناس الدعوه والارشاد هنا زمان بيوجهوك لاكين ناس الدعوه والارشاد الهناك بيوجعوك ! هسي عمرك سمعتلك زولا فيهم نضم في الفساد الحكومي ؟ ما سمعت يومتا كبيرم قال الانقلاب علي الحكومة المنتخبه حرام ! تقول الانقاذ دي عملت انقلاب علي نتياهو !!

    2. الأخ الحبيب نانو السلام عليكم ، والله فكره مشاركتك بموضوع في رمضان في قمردينتنا واهو اسم يتزامن مع رمضان من قمردين وخلافه من المشروبات والوجبات الخفيفه والتقيله وبقول لي للأخ جنوبي جزاااااك الله خيرا(بتاعتنا ما بتاعتم)،،
      واهو جنوبي يكتب حاجه بعد الإفطار ومش قبل الإفطار ،،
      مبروك لشمباتي وكذلك مبروك لي وله وللجميع

  12. ماْ سمعـتـُو صوت مـوسي الصّبي..
    صـندوقـُـو بِعـمل كَشْكـَشة
    مـا نـادَي يـوم فـي حـيـّكـُم ؟ :
    … ” الـعـِنـدو حـاجـة نـورْنـِشـا ” !

    مـا مـوسـي واحـد مـن كـُـتـار
    ضـاقــُوا الـمـذلـّة و هـُم صُغـار
    مـن عَـيـلـة كـافـِلا عـقـلـو طـار
    سـكـران يـشـتــِّم لـيـل نـهـار
    و الأم تـقـاوم فـي الـمـرار …
    مـن أجـل جـِنـيـات الـحـَشـا

    شـقـيـانـة تخـدم فـي الـبـيـوت
    شـان تـلـقـي لـي أطـفـالا قـُـوت
    تـعـبـت خـلااااص بـس لـو تـمـوت
    مـب تـرضـي لي الـشُـفـّع تـفـوت
    ضربـات أبـُوهـم قـاسـيـة مـَوت …
    لا راعـي شـَيـبـتـو و لا اخـتـشـا

    فـي يـوم جَـا مـوسـي و قـالـَدا
    بـكي فـوق ايـديـهـا و مـسـَّـدا
    ” يـا يـُـمّـه شـُغـلـي مـُساعـَدة
    و قـرايـتي مـا حـا أفـقـِدا
    أرجـوكي تـقـبـْلي بي كـده …
    و سـلـّم عـلـي راسـا و مـشَـي

    جـهـز صِنـيـديـق الـشـُغـُل
    و عـيـونـو مـلـيـانـات أمـل
    و اخـوانـو فـي الـبـال لـم يـزل
    و الأم دُعــاهــا بـلا كــلـل
    يـقـرا و يـكـافـح فـي الـعـمـل …
    مـا عـنـدو سـاعـة فـرْفـشـة

    لـكـنـّو كـان وكـتـيـن يـشـوف
    الـفـرحـة فـي أخـوانـو شـَوف
    و الأم رضاهـا نـسـيـم يـطـوف
    كـان رغـم عـن مـُـر الـظـروف
    يـرتـاح و يـبـرد لـيهـو جَـوف …
    فـي لحـظـة تـلـقـاهــو انـتـشـي

    لـو شـفـتـو كـيـف شـايـل الـحـِمـِل
    حـا تـنـسـي إنـو الـزول طـِفـِل
    يـامـا انـكـسـر بـس مـا بـِمـِل
    بـي عـزمـو فـات عــزم الـنـّمـِل
    بـالله كـيـفـن محـتـمـِل ؟ …
    هـَـم الـسـنـيـن الـمـُوحـِشـة

    فـي الـسـكـة دايـمـاً كـان يـقـيـف
    جـَم بـيـت زي الـقـصر الـمـنـيـف
    قـدامــو كـان مـالـِي الـرغـيـف
    صنـدوق نـفـايـات فـي الـرصيـف
    موسي اعتـراهـو سـؤال مخـيـف :
    مـافـيـش ضميـر/ مافي اختـشا ؟

    مـُسـتـنـكر الأكـل الجـديـد
    تـرمـيـهـو جـوّه الـكـوشـة إيـد
    مـع إنـو كـان مـمـكـن يـفـيـد
    مـلـيـون بـَطـُن يـبـقـالا عـِيـد
    يـا مـوسـي نـضْمَـك حـار شـديـد …
    لـو سـمـعـوا نـاس الـكـنـدشـة

    شـُفـتـو الـسُّـكـات ودّانـا ويـن ؟
    مـالـِيـن دي طـِيـن و دي بـي عـجـيـن
    وا ضـيـعـة الحـقّ الـمـبـيـن
    أفـتـونـا بـس يـا مـُسـلـمـيـن :
    في يـاتـو شـرْع و يـاتـو دِيـن ؟ .
    تـبـقـي الـطـفـولـة مهـمـّشـة ؟

    فـي يـوم رتـيـب زي كـلّ يـوم
    كـان مـوسـي فـي بـاص الهـمـوم
    فـجـأة و وسـِط لـَـفـْح الـسـَّمـُوم
    راكـِب صـرخ يـقـعـد و يـقـوم
    نـشـّال شَـرَط لـيهـوالـهـدُوم …
    و سـَحَـب قـروشـو و كـوَّشـا

    الـلـِص هُـوْ كـان مـن غـيـر جـِدال
    جـارُو الـلـي فـي الجـَمـْبـة الـشـمـال
    راقـي و مهـنـدَم و لافـِّي شـَـال
    و الـعـِطـْر مـاركـتـو ” فـيـسـْتـِيـفـَال ”
    مـا فـيهـو شـك / طبـعـاً مـُحـال …
    الـنـاس جـيـوبـو تـفـتـّشـا

    طـوّاااالـي فـتــَّـشـت الـعـيـون
    عـن شخـْص فـي الأنـظـار يهـون
    مـيـن غـيـرو طـبـعـاً راح يـكـون ؟
    مـوسـي الـمـبـشْـتـَن و شـكـلـو دُون
    الهـيـئـة مـُزْريـة زول سـجـون …
    أهـِي فـكـرة فـيـنـا معـشـْعـِشـة

    فـجـأة انـضرب راس الـوِلـَـيـد
    مخـلـوع صرخ بـي خـوف شـديـد
    شـلـُّـوت هـِنـا و بـي غـادي إيـد
    جـات خـبـطـتـو ف كـرسـي الحـديـد
    الـدم نـزف /هـل مـن مـزيـد ؟ …
    أسـقـُـوهـا بـشـرة مـغـبـِّـشـة !

    يـا مـوسـي مـا تـزعــل كـتـيـر
    لـو قـالـوا مـوتـك مـا خـطـيـر
    أيـه يـعـني دمَّـك يـا صغـيـر ؟
    لا إنـت والـي و لا وزيـر
    لـو مـُتَّ عـاااادي الـمـوت مـصـيـر …
    مـا فـارقـة لـو زيـّك مـَشـَي

    الإسـمـُو كـان مـوسـي انـتهـي
    و غـادر زمـان الـجـَهـْجـَهـة
    و نحـنـا الـنـفـوسـنـا مـشـوَّهـة
    ح نـعـيـش حـكـايـا مـُشـابـِهـِة
    يـعـجـبـنا جـداً سـردَهـا …
    و نحـكـِيهـا أثـنـاء الـعـَـشَـا
    _____________

    كلمات أ/محمد الحسن السيد

    1. جميلة ومعبره وفعلا في فئة ضايعه ومافي زول حاسي بيها ..

      1. الكل ضائع يا جنوبي شفت كيف وكمان ضائع بعد الخمسين بس ما بتاعت الكوشتينه

    2. ابكتني مرتين قصيدتك لانها في النسيج الحي وتزامنت مع رسالة صغيرتي رسل قروش العملية يا بابا ملعون ابو البلد الشردتنا

  13. كتر خيرك أخوي جنوبي . ودايرني ألبد لمتين !!؟ هو ملك الموت بخليك ؟؟ ما خلااااس مواعيدو قرررربت والله أعلم !! وأنا ماشي أشتغل بقال الله وقال الرسول وليس في السياسة والفساد !! وبعدين الحمد لله كلما أمشي السودان وخاصة في الفترة الأخيرة بقيت أمشي كتير، بقدم محاضرات ومواعظ في مختلف المساجد والأحياء بالعاصمة ولقت قبول من الناس بعون الله ، وكونت لي معارف وأصدقاء كويسين وكل مرة عازمني في جامع .. نسأل الله التوفيق والسداد والقبول … سلاااام …

    1. جزاااك الله خيرا حقتنا وما حقتم(بتاعتنا ما بتاعتم) مبروك للجميع

  14. واهو جنوبي يكتب حاجه بعد الإفطار ومش قبل الإفطار ،، مبروك لشمباتي وكذلك مبروك لي وله وللجميع ..

    أخوي ود العبيد الله يبارك فيك ( هو شنو المبروك ليك ولي شمباتي والجميع ) ؟؟ كدي فرحونا معاكم !!! … سلااااام …

    1. جنوبي في رمضان فلاتي عديييييييييل .. رمضان ده الاستيكه حقتنا
      يا نانو ود العبيد عنده زواج ولده .. وشمباتي حيتزوج يوم الخميس وربنا يتمم ليهم علي خير ..
      ود العبيد ان شاء الله ما نسيت السكسكانية !

      1. شكراً أخوي جنوبي كتر خيرك على المعلومة الساااررة نسأل الله أن يبارك لهم ويبارك عليهم ويجمع بينم في خير ويغلبوا عروساتم بالمال ويغلبوهم هن بالعيال .. آاامين .. وتصدق أنا قبل كده رديت على مداخلتك دي تحديداً لكن لمن رجعت ليها لقيتا قاااعده ما مشت !! وتعليقك ما زال قائم على القمردينة (شكلو ردي زاااتو طش شبكه وما مشى) ههههه ..
        وعلى فكرة أنا زعلان من ود العبيد وشمباتي لأنهم ما كلموني بالعرس مع أنهم متواااصلين معاي بالإميل والواتس، وكمان ود العبيد طلع من نسايبنا بالإضافة إلي أنو من جيرانا !!! مش لي حق أزعل منهم ؟؟؟ … سلاااام …

  15. لا يوجد فى الامارات لمبه واااااحده طافيه ولا قطع كهرباء ولا قطع مويه ولا اى تاخير فى الاجراءات وما سمعت يوم واحد تعال بكره

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: