بدون إجابات

قال لي صديقي طوااالي معكنن علينا وإنتا تكتب لينا عن حال البلد المايل ده ما تغير لينا شوية … فكان هذا المقال
لهذه الأسئله البدون إجابات :

• لماذا قام من إكتشف (الويكة) بسحن (البامية) بعد تجفيفها ولم يقم بتجفيف (الباذنجان) أو(القرع) أو (الملوخية) مثلاً ليصنع منهم ويكة !
• هل من قام بإختراع السواك بواسطة أغصان شجر (الأراك) دون سائر الشجر كان يعلم بأن الأراك يحتوي على نسبة عالية مادة الكلورين، والسليكا التي تساعد على تبييض الأسنان، و الراتنج الذي يشكل طبقة خارجية تحمي الأسنان من التسوس وللا الحكاية جات صدفة
• من هو ذلك المخترع الذي إخترع (العمة) وجعلنا نلبسها على رؤوسنا طوال هذه الدهور ولماذا قام بلفها حول رأسه لفات عديدة وليست لفة أو إثنتين أو ثلاث وهل هي طويلة هكذا منذ إكتشافها أم إنها ظلت تطول في أوقات متباعدة حتى وصلت إلى هذا الطول (الترباسي)
• لماذا إختفى القيطان من (الجلاليب) وهل لذلك صلة بإختفاء (جيب الساعة)؟
• لماذا لم يقم مخترع التلفزيون بأختراعه (ملوناً) منذ البداية مش الحاجات كووولها كانت موجوده؟
• القميص البلدي(العراقي) الذي نرتديه هل أكتشف أولاً ثم تم تطويله ليصبح جلابية أم الجلابية أكتشفت أولاً ثم تم تقصيرها لتصبح (عراقي)
• لماذا تحتوي سيارات الشحن على عدد كبير من الإطارات (اللساتك) بينما لا تحتوي طائرات الشحن على ذات العدد
• لماذا نشدد الضغط على زر الرموت عندما تكون البطاريه ضعيفة؟
• لماذا نقرأ الصحف من الخلف إلى الأمام وهل إذا تم وضع الصفحة الأولي مكان الأخيرة والعكس برضو ح نقراها من وراء؟
• لماذا يضع البعض (العمة) على الكتف ما دام مش ح يلبسا
• من أول من قام بصنع (حلة كوارع) وهل كان عندو لحم وما عاوز ياكل منو وفضل ياكل كوارع أم طبخها لعدم وجود لحم لديه؟ (مجبور يعني(
• في اي زمن من الأزمان إنطلقت أول مظاهرة إحتجاجية ؟ وهل كان البنبان معروفاً وقتها ؟
• لماذا نقول للتيس (تيس) ولا نقول للغنماية (تيسة) مع إننا نقول للكلب (كلب) وللكلبة (كلبة)؟
• من هو أول شخص قام بالشخبطة على ورقة وسمي ذلك توقيعاً .. والحكاية مشت لحدت يوم الليلة ؟
• لماذا نقول للترزي (ترزي) ولا نقول للمرأة ترزية بل (خياطة)؟
• لماذا نحن حريصون على التسوك صباحاً أكثر من التسوك قبل النوم مع أن الأخير هو الأصح؟
• لماذا لا نسمي (الله) عند ذبح السمكة الحية ونسميه تعالى عند ذبح الحمام والدجاج وكل الذبائح الأخري؟
• لماذا لا يعد العملاء الفلوس عند إستلامها أمام الصراف ثم ما أن خرجوا من البنك حتي يقومون بعدها؟
• إذا كان الإسعاف يسير حاملاً مريض وقام بدهس شخص هل يتوقف لإنقاذه؟
• إذا كانت هنالك سرعة للضوء وسرعة للصوت لماذ لا توجد سرعة (للشم)؟
• عندما نقوم بإنقاص أوزاننا .. إين تذهب تلك (الأوزان النقصت دي؟)
• من هو أول من أكتشف مفعول (التمباك) ولماذا وضعه في فمه ولم يضعه في أنفه مثلاً؟
• لماذا عندما تتصل برقم خطأ لا تجده مشغولاً ؟
• لماذا توجد لمبة في التلاجه ولا توجد لمبه في الفريزر
• لماذا توجد على أقسام الشرطة أبواب خارجية (وحديد كمان)؟

• كسرة : عندما قام أول شخص بإختراع الساعة (عرف كيف الساعة كم؟) عشان يظبطها
كسرة ثابتة (قديمة) :
خبار ملف خط هيثرو العند النائب العام شنو(وووو وووو وووو وووو وووو وووو وووو)+و+و+و؟

كسرة ثابتة (جديدة) :
خبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+و+و+و؟

Advertisements

39 تعليق

      1. و عبيد و جنوبى ،،،
        اما شمباتى داك فخلوهو فى حالو اليومين دى!!

      2. برنجية بي كيتتا هههه عفارم عليك (كيتن) تاني على المندهش تقبلي المرور

    1. انتي لا بتمشي جزر ولا بتقشي حوش !!

      1. بتقش برنجي ههههه نعلها وجعتك برنجيتها

      1. يا تمره واحد مبروكة أنا وشمباتي ما عندنا طريقه مشغولين الايامات دي لكن انت يا فلاديمير والمندهش وجدو جنوبي الشاغلكم شنو

    2. ممممممم سؤال وجيه جداً يا جنوبي !!!

      1. انا ذااااتي قعد اجهّز لسفر الاولاد , اها انت ماااااالك !!؟ راااايق وفايق والمرا جوه الاربعين !
        جدو جنوبي انا يا عبيد ؟ سمح النوريك اصلها السترة ما بتنفع معاكم ! يا اخوانا باركو لاخونا عبيد , ولدو الصغيّر حيتزوج يوم السبت ( ولدو الصغيّر سامعني ) ..
        وبرضو باركوا لأخونا شمباتي , بعد عدة محاولات للحنة اخيرا بقت سودة واهله قدروا يحددوا العروس ! طبعا اليوم ممسوك من السنة الفاتت يوم الخميس الجاي . و أيييييييييييييوي .. كل اول ليهو آخر يا شمباتي ومافي صبحا ما عقبو ليل ( تبرطع سااااااااااكت ) تاني نوم العازب الا تشوفوا في قرد الحلب ..

  1. ههههههه والله صاحبك ده كان اخير ليهو العكننة من المحنة المحنتها ليهو دي ومحنا معاهو !

  2. و السؤال الأزلي الجنن عبدالقادر ومن يأتي بعده من هي أول مخترعة للآبري ” الحلومر” وبهذه التركيبة الفريدة والمعادلة التي لم تتغير في محتوياته و المقادير ؟؟ و اللهم بلغنا رمضان ونحن ننعم بعبير الحرية

    1. الابري والدلكة ههههههه الدلكة محولة لي جنوبي

  3. وبمناسبة العمة ولفها حول الرأس أذكر ونحن في تانية إبتدائي سأل أحد الشفع في الفصل الأستاذ عنها وكان رد الأستاذ بأنها تحمي من الشمس .
    فكان سؤالي للأستاذ هو : ولماذا يلبسها الناس برضو بالليل ؟
    وحتى الآن لم أجد إجابة بالرغم من أنني قد أعدت السؤال لنفس الأستاذ قبل 5 سنوات و اجابني بالضحك كثيراً لأنه لازال يتذكر هذا السؤال ،، وأنا من هنا أدعو له ولكل من علمني حرفاً بالصحة والعافية وطول العمر في طاعة الله وأن يرزقهم من حيث لا يحتسبون وجعل كل ما قدموه لنا في ميزان حسناتهم ويااااا حليل زمن التعليم

    1. والله فعلاً حليل زمن التعليم والتربية كمان

    2. انت من زمن القراية بالعمه !! يجازيك ..

      1. الاستاذ بالعمة والطالب بالرداء

    3. يقال والعلم عند الله ان العمائم تيجان (العرب) اها دا زمن كان فيه عرب مع انوا (نحنا سودانيين) فلو مات الرجل في مكان ما فتصبح العمة هي الكفن حسب ما لدي من تفسير وارجع تاني لاستاذك استفتيه

  4. إشمعنا “بت السودان” ما بيقولوا ليها برنجيتك ما ولعتيها؟
    معليش أختنا ، لكن الظاهر فيها خيار وفقوس
    الله لي ود الحكووومة [موش حكومة الهناء دي اللي هي ليست بحكومة بل سُلطة قهرية]

    1. [موش حكومة الهناء دي اللي هي ليست بحكومة بل سُلطة قهرية] عجبتني كثير لان البين قوسين دي ما عاجبه اي زول

  5. تذكرت سؤال لقريبك وصديقي العزيز ” أحمد عبدالفتاح ” المقيم الآن بالأمارات ( رد الله غربته سالماً غانماً ) حيث سألني ذات مرة : عندما تشطب ملفاً في الكمبيوتر ينتقل فوراً لسلة المحذوفات .. طيب لما تشطبوا من سلة المحذوفات أين يذهب ؟!!!!! تذكرتها و أنا أقرأ ما دونه قلمك الرائع ورددت ” والله حقيقةً ذاك الشبل قريب ذالك الاسد .

    1. عشان تفهم البحصل شنو لازم تكون بتعرف شوية عن الهاردسك بتشغل كيف. لكن حابسطها ليك عالاخر. الوندوز بشوف المساحة الجوا الهاردسك على انها اما مليانة او فاضية. لمن تجي تكتب حاجة بفتش الحتات الفاضية, و بكتب فيها. طيب البحصل شنو لمن تمسح ليك ملف؟ ولا شي, لمن تمسح ملف ما بتمسح فعليا, كل البحصل انو بعلم الحتة على انها فاضية بس. يعني المرة الجاية اذا احتاج يكتب فيها شي الحتة دي فاضية. طيب سلة المحذوفات دي شنو؟ مجرد فولد الوندوز بغشك بيو, لكن الملف بكون قاعد فعليا في مكانو, بس ما بتقدر تفتحوا الا تقول للوندوز انك داير ترجع الملف من سلة المحذوفات.

  6. مقهورين و ساكتين | رد

    معظم اﻻسئلة ممكن تتجاوب
    بالمناسبة التسمية عند الذبح مذكورة في كتب الفقه اذا اطلعت عليها ي استاذ ممكن تلقى جواب شافي لسؤالك
    ما بالضرورة تكتب لو ما عندك موضوع مهم وحتى لو كتبت في اي شي ياريت ما تدخل في حاجات ما بتعرف فيها زيي الفقه اﻻسﻻمي
    بدل ما تتكلم عن اسطولنا البحري والجوي المدمر وعن سمعتنا الراحت وعن بلدنا الكل يوم بتباع فيها جزء

    1. هسي هو قال شنو !!
      ارجع اقرأ تاني يا مقهور … بس اقرأ براااحه

    2. شكلك ماخد العملية جد جد

    3. وانتو يا المقهورين وساكتين لو الموضوع ما عجبكم جلوهو وشوفوا حاجة تانية وما تضيعوا وقتكم .. …بس وبكل بساطة عشان ما تزيدوا على روحكم القهر ..
      دا شنو داااا ؟؟ عالم روحه محرقاها ..

  7. لماذا سمي الجماعه عندنا بالكيزان؟
    هل لان الكوز وسيلتنا للغرف؟ ام لان كوز المزيره مربوط دائما ولا يستطيع التحرك الا بالقدر الذي يسمح به الحبل؟

  8. اها بعد المرور على الجميع برضه كتمت كتمت كتمت

  9. البروف ده حاننتظرو لحدى المقال الجايى (الثالث ) لو لقيناهو برضو ماراكب عدلو يكون الزول دة عملو ليهو حاجه…

  10. لماذا لهانا البترول عن الزراعة والرعي وخلانا نتشالق ونصنع طيارات و نجمِع عربات
    لماذا نعاني من المياه والكهرباء والغذاء و ( شاقينا ) نيل بالطول وليس بالعرض
    لماذا يتم ربط فاتورتي الكهرباء والمياه و الاثنين مافي
    لماذا إمتلأت العاصمه بأهل الريف ورغم – طيبتهم وأصالتهم وروعتهم – باظ كل شيئ
    لماذا تم تعريب الجامعات فطشينا وما لمينا لا في عنب اللغة العربية و لا بلح الإنجليزية
    لماذا تم الاهتمام بكمية التعليم لا بكيفيته فلا كماً أوفينا و لا كيفاً حصدنا
    لماذا اضيفت سنة تاسعة رغم ضيقنا بل وزهولنا و إندهاشنا من سنة ثامنه
    لماذا زاد عدد الحاصلين علي درجتي الماجستير والدكتوراة و إنعدمت الإضافات في أي مجال
    لماذا صعد السماسرة والدولار وهبط المعلم والجنيه
    لماذا زادت هيبة القطاع الخاص وزابت هيبة القطاع الحكومي ( مدارس ؛ جامعات ؛ شركات .. الخ )
    لماذا دمرنا السكة حديد و أغلب الدول تسعي لتطويره
    لماذا هبطت القيم والاخلاق و ارتفع كل ماهو عكسها ( فساد مالي ، إغتصاب ، عرفيات ، مايقوميات ، دجل ، غش ، إستهبال .. الخ )
    لماذا قمنا بتمزيق كل الفواتير ( القمح ، السكر ، الكهرباء … الخ ) ولم نلقها في الزبالة بل تركناها في قارعة الطريق لتتطاير وتزيده نفايات أكثر مما هو ممتلئ
    لماذا يتسابق الناس بعشوائية في إستخراج الدهب وهو مورد دولة وعندنا وزارة معادن
    لماذا نتفاجأ دوماً بالثوابت ( رمضان ؛ العيد ؛ الخريف .. الخ ) ولا نفاجأها بجاهزيتنا
    لماذا زادت الشوارع المسفلته والكباري عدداً و طولاُ ولم نلق بال لعرضها ومساراتها و متانتها و جودتها
    لماذا تقافزت و إحلوت المباني وتدنت الخدمات بمختلف أنواعها .
    لماذا تم إنشاء إستاد الجوهرة بجدة بكل فخامته في كسر من زمن مدينتنا الرياضية
    لماذا أصبحت الجنسية السودانية ملطشه لكل محترف والمحلين – أصحاب الجنسية ذاتهم – أعلي كعباً منهم
    لماذا نستمر في دائرة المدربين الاجانب وتبادلهم بين الفرق بمرتباتهم العالية و نندهش من خبرة وحنكة مدربينا المحليين حينما نسمعهم يتحدثون ويحللون وينتقدون وينظرون
    لماذا نزور اعمار اللاعبين ونخسر المباريات مش البطولات ( ميته وخراب ديار )
    لماذا تم حبس الصادق المهدي وهو الاقرب للحوار وأب لضابط أمن ومستشار رئاسي
    لماذا لا تصبح قوات الدعم السريع جزء وفرع رسمي من الجيش السوداني وجناح من أجنحته الداعمه مثلها مثل المظلات والطيران والمدفعية والاشارة … الخ
    لماذا تم الحكم بالردة علي زوجة أمريكي ( بالجنسية ) في وقت تتحرك فيه جهود وتحركات دبلوماسية وإقتصادية نحو تخفيف الحصار الاقتصادي الامريكي
    لماذا تحولت الرشوه لمصطلح فهلوي يدعي ( حقنا ) و ( لا تنسو الفضل بينكم )
    لماذا زاد عدد الفنانيين والعازفين وقل عدد الشعراء والملحنين .
    لماذا زادت القنوات الفضائية وطش المذيعين والمبدعين والإبداع
    لماذا زادت وتعددت وتنوعت الصحف وقلت وتضاءلت الثقافه
    لماذا إستعجل علي عبداللطيف وكان عاوز يطلع الانجليز من سنة 24
    لماذا غادرنا المستعمر من أساسو .. يعني ما كان قادر يصبر أربعين .. خمسين سنه كده .. محافظاُ علي الخدمة المدنية والسكة حديد ومشروع الجزيرة ونظافة المدينة و سعر الجنيه و هيبة ومكانة الشيوخ والكبار و …. الاخلاق .

    1. ههههههههههه عشان يجو ديل

      1. الغلبان اخوي عيان انتا وين توقيعك

  11. ياشمباتى الف مبروك وشفناك امبارح محنن وجمبك البروف ومعهكم الحرس القديم كلو .
    ماشاء الله وعينى باردة وربنا يتم ليك على خير…

  12. شمباتى .. إنت وين ؟؟
    والحنة شنو البنسمع بيها دى ..
    أوع تكون كاميرا خفية ..

  13. كسلان جداً أشكرك علي المعلومة .. وانا ما عارف لو كنت نشيط جداً كان عملت شنو ؟ !! أظنك كنت ح تجيب لي المعلومة بنفسك كآآآآآآآآآآآش في الرياض .. أكرر شكري وتحياتي

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: