أيه يعني ربع قرن؟

عند كتابة هذا المقال تكون (الإنقاذ) قد مكثت في دست الحكم (ربع قرن) بالتمام والكمال أي خمسة وعشرون عاما … أي ما يعادل :
• 300 شهراَ
• 1300 أسبوعا
• 9100 يوم
• 218.400ساعة
• 13.104.000 دقيقة
• 786.240.000 ثانية
أى أنه ومنذ أن جاءت الإنقاذ (30 يونيو 1989م) فإن المواطن (الما مات لحدت هسه)
يكون قد دق قلبه (خلال هذه العملية الإنقاذيه) حوالى 967.680.000 دقة (بس) علماً بأن متوسط دقات قلب (المواطن) هي 80 دقة في الدقيقة .
وإذا عرفنا أن (المواطن) يشرب في المتوسط عدد 3 لتر ماء في اليوم (لو الموية ما قاطعة) فيكون المواطن قد شرب خلال هذه الفترة (لمن روى) حوالى 25.200لتراً من الماء بس
وإذا علمنا بأن (المواطن) يتنفس في المتوسط حوالي 15 مرة في الدقيقة فإنه يكون قد تنفس خلال الإنقاذ (رغم الكتمة) حوالى 181.440.000 مرة !
ولك أن تعلم يا عزيزي أنه إذا ترك (المواطن) أظافره ولم يقم بقصها خلال هذه الفترة فإن طولها كان سوف يصبح حوالي 37.5 بوصة (يعني قريب نص متر) إذ أن الأظافر تطول بمعدل بوصة ونص سنوياً !
واذا علمنا بأن متوسط إفراز (المواطن) للعرق يوميا يتراوح بين نصف لتر ولتر ونصف (يعني المتوسط ثلاثه أرباع لتر) فإن المواطن يكون قد أفرز خلال هذه (الحقبة) حوالي 6.300 لتر عرق (يعني 6300 قزازة فاميلي سايز) !
أما ما نامه (المواطن) خلال هذه (الفترة) فهو حوالى 67.200 ساعة (النايم ليها شنو)؟
ولك أن تعلم عزيزي القارئ بأنه خلال هذه (الحقبة المذكورة) حكم أمريكا أربعة رؤساء خلال6 فترات رئاسية وهم :
• جورج بوش 1989 ـ 1993
• بيل كلينتون 1993 ـ 2001
• جورج بوش الابن 2001-2009
• باراك اوباما 2009 – حتى الآن
كما تعاقب على منصب رئيس الوزراء فى بريطانيا أربعة أشخاص خلال6 حملات إنتخابية :
• جون ميجور
• توني بلير
• جوردون براون
• ديفيد كاميرون
كما تم خلال هذه الحقبة تنظيم (7) كاسات عالم !!
• 1990 إيطاليا
• 1994 أمريكا
• 1998 فرنسا
• 2002 كوريا الجنوبية واليابان
• 2006 ألمانيا
• 2010 جنوب أفريقيا
• 2014 البرازيل
عند قيام الإنقاذ كان عمر اللاعب الأرجنتيني ولاعب برشلونة (ميسي) عامان فقط (مواليد 1987)ولاعب ريال مدريد البرتغالي (رولاندو) اربعة أعوام (مواليد 1985) بينما نجد أن جميع لاعبي (المنتخب الغاني) الذين يشاركون في كاس العالم الحالي لم يكونوا قد ولدو بعد لأن أعمارهم أقل من ذلك بكثير !!
كسرة :
يا جماعة الخير أدو الناس دي فرصة وكده .. أيه يعني ربع قرن !!
تنبيه : يوجد (واو) جديد !!
كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(و+و+و+و)؟
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(و+و+و+و) ؟

Advertisements

27 تعليق

  1. برنجييييييييات

      1. تعييييييش وتبارك يا ودبوتين
        انتو وراكم ايه ؟ باركو سااااي ما شايف البروف دا قاليكم وايه يعني ربع قرن؟ في جمهورية أمازونيا
        أرض الديناصورات
        بالله الحق ناس الحكومة وناس المعارضة ملصقين في الزايلة دي جنس لصقة !!!!؟
        أنا خايف إكون عندهم مصنع استنساخ في كافوري !ّ!ّ!ّ

    1. نمبر فور هههه اعتبروها لي الاولي انا في بلد متخلفة الكترونيا

      1. الغلبان وأنا فنجرة مني ساي بقول ليك ألف مبروك البرنجية
        وأبقى عليها عشرة

    2. كفارة ! سكري ولا شنو ؟

      1. آخوي جنوبي سلام لا سكري ولا شي شوية ضعط ياخ شغالين فيهو كركدي خايفين من دكاترة ليبيا هههههه

  2. برنجية رمضان دي ليها طعم خاص.طعم الحلومر.

  3. (من الافضل للشعب السوداني أن يمر بتجربة حكم جماعة الهوس الديني وسوف تكون تجربة مفيدة للغاية إذ انها بلا شك سوف تكشف مدى زيف شعارات هذى الجماعة وسوف تسيطر هذى الجماعة على السودان سياسيا واقتصاديا حتى لو بالوسائل العسكرية وسوف تذيق الشعب الأمرين وسوف يدخلون بلادنا فى فتنة تحيل نهارها إلى ليل وسوف تنتهي فيما بينهم وسوف يقتلعون من أرض السودان اقتلاعا) محمود محمد طه ما قال ليكم زمااااااااااااااااااااااااان

    1. وما قال متين ؟
      صبرا يبلْ الآبري ,,,

      1. شكلها راح تطويل ما شايف انخلاعا واقتلاعا ويعني الشغلانية ما دايرة مباصرة اقتلاعا عشان كده شكلها الخمسة وعشرين سنة دي تسخين ساكت بعدها 25 سنة غليان وبعدها 25 فوران ياخ دي من عمر الشعوب المهم اولاد اولادنا يكونوا اتخلصوا من الكابوس دا نهااااااااااااااااااايئا واخرتا الواحد لو لقى ود امه وابوه كوز بقتلوا

  4. كترة الطلة تمسخ خلق الله , بارك الله في من زار وخف , وبيت الايجار ماااا ببقي مِلك يا هناي ( شان الصوم وكدي ) وفي النهاية الاسم جمهورية ممكن تتخط ليها ديمقراطية ! تتحزف منها ديمقراطية ! لاكين هي جمهورية وان ما اتشالت جودية بتتشال حُمرة عين وانتو اخدوا عرضتكم لامن يجي سيد القسمة اليسوق منكم عزة ويا وداها شقة مفروشة ويا وداها كوشة منفوشة زيكم ويا كمان فندق 10 نجوم … أحححح بس كان ما رمضان اتاري الاكل والشراب هينيييييييييين !!

  5. 25 عاما مرت علي ما يقال عنها (ثورة انقاذ ) ولم ينقذوا إلا انفسهم في الدنيا ويوم القيامة يردون الى أشد العذاب !!!!!
    اللهم عليك بمن طغى وتجبر وتكبر وسرق وإرتشى وإختلس وتكوّز

    1. شوف يا المندهش انا بقسم المصحف (وكمان احط ايديني الاثنين فيهو) كلهم داخلين جهنم رايك شنو بس عاوز فتوى هل يجوز قتالهم عديل كدي ام موقع الكتروني ان شاء الله فيس بوووووووووووووك يوثق للمزيد من فضائحهم

  6. يا بروف نسيت تحسبها لينا بما يعادل يوما مقداره خمسين الف سنة !! بعدين زي جنوبي دا لمن يخصموا من عمره ربع قرن بيبقي زي الغنماية الكرته

    1. ويخصموا ليييه ! ما تراني فييي عمري ده وشايفو فييي جلدي !
      هههههههه جيت خلاص ..
      يا نانو شفتلك ناراً بتشبع ؟

  7. يقول المولى تعالى بعد أعوذ بالله من الشيطان الرجيم: (خلق الإنسان من عجل سأريكم آياتي فلا تستعجلون) الأنبياء “37”

    يا أخوانا حرام عليكم المستعجلين ليها ي شنو ؟؟ الناس ديل لسه بدري عليهم يا دوبم ليهم 25 سنة بس !!

    ( يعني لسه ما لحقوا يشبعوا ) خلوهم يتموا الخمسين، وبعدين نشوف البحصل معاهم شنو !!

    ما تبقوا مستعجلين فالعجلة من الشيطان !!!

    1. اخي نانو امنا بالله وكلامك على عينا وعلى راسنا حتى لما تتم ازالتهم لا تبقى لهم بقية ابدا لانهم اضلوا عباده ولم يلدوا الا كافرا فجارا ما شايف شفعهم في دبي وماليزيا ومصر وغيره ليس لدينا مشكلة هنا ولا نحلم ان يغوروا في ستين داهية الان بالعكس عسي ربي يمهد لهم تمهيدا عشان قلعتهم تكون بدون عودة نهائيا ولا يعود لهم ذكر تربي الشعب السوداني كصوفية وصوفية معتدله لا تشبه صوفية اي احد وكانت المعاملة هي الدين من الكبير والصغير اصبح الحال كل واحد عاوز يصل الى الشأن المادي حتى لو يبيع بايات الله ثمنا قليلا فليمد لهم ربي في ضغيانهم يعمهون ولكن سلوانا حتى لو بعد 100 سنة بانهم لن يكون لهم وجود ابدا ويعود دين الله في الارض

      1. يا غلبان (الله لا يغلبك) أنا بتريق (بقرق) ساااكت، داير شوييه أنفس عن نفسي وعن القمرديناب المعانا عشان ينسو الضغوط العليهم

        وبالمناسبة دي قال ليك واحد علي عوض “مصري” من (أصحاب جنوبي يا ود أونكل سام )، رجع السودان بعد غيبة طويييلة عشان يلقى ليهو شغل، فلقى ليك السودانيين زاااتم عاطلين ما لاقين شغلة !! فرجع بلدو بعدما قنع، ولاقى واحد صاحبو كان منتظر يجيهو منو خبر عشان يركب يجي السودان للشغل فقالو ” جرا إيييه ما أشتغلتش ؟” قالو ” هو في شغل ما فييييش” ؟؟ دا السودانية نفسهم مش لاقين شغل !!!، والحاجة الغريبة إنو السودانيين بقو ينكتو !!

        صاحبو قالو: “قاعوا ولاد الكلب” ههههه !! ، أرجع يا غلبان لردي على المندهش في مدونة أمبارح ففيها ما يغنيك عن سوء الفهم الوقعت فيهو من كلامي بتاع التريقة على تعثر الإنقاذ !! … سلاااام …

  8. معليش يا مندهش نسيت أبارك ليك البرنجييييات .. ويا جنوبي أحييي عليك وعلى لسانك السليييط … سلااام …

  9. وكالات الأنباء العالمية ،،،،

    خمس وعشرون عاما وثلاثة أيام فى اطول عملية انقاذ فى تاريخ البشريه . . . هذا ومازالت عمليات الانقاذ جاريه حتى الان
    و بدون ظهور أي دلائل على إنتهاء عمليات الإنقاذ هذه

    1. يا مندهش شكلو الإنقاذ دا ما حايخلص خالص !! لأنو الطيارة الدايرين ينقذوها وقعت في القطب الشمالي وغطاها الجليد بالكامل، والأحوال الجوية السيئة فاقمت وعرقلت عمليات الإنقاذ !! وبي كده تكون طيارتكم راحت شمار في مرقه زي الطيارة الماليزية !!! … ههههههههه … سلااام …

    2. دي يا المندهش ونانو زكرتني قصة حقيقية في السوق العربي زمااان ايام السوق العربي سوق ! واحد عربجي بتاع ( كارو حمار ) خش بالكارو نص الشارع وقفله تماما , قدامه بتاع تاكسي واقف منتظر بتاع الكارو يفتح الشارع , العربجي مُصر يلف اللجام للحتة المقفولة اكتر , والحمار شايف حتة فاتحه وداير يلف عليها لاكين اظنها ما في اتجاه المشوار الدايرو العربجي , وبقي العربجي يلاوي في الحمار عشان يلف علي الجهة الاصلا مقفولة والحمار داير يمشي في الجهة الفاتحه , عمنا التكاسي زهج خلااااص وفتح الباب ونزل قال للعربجي : ياااا إبني سيب الحمار يتصرّف !!
      هسي البلد دي فيها اتجاه وااااحد بس فاتح وديل كل مره يلفو اللجام علي الحتات المقفولة .. مع الاعتذار للعربجي والبلد علي التشبيهين !!

      1. ههههههههههههههههههههههه , وانت لافى على وين ؟؟
        اششش حاااااااااااااااااااااااااااو

  10. وكم سنة كبيسة؟

  11. استاذ الفاتح ده عبقري .. ياربي ماكمية الحنق والغضب الفي نفس المواطن خلال هذه الفترة وهل هي ليست كافيه ليطالب بالتغيير

    1. كلما تمكنوا وكانت قلعتهم صعبة حلو لانه بعدها بتصبح عودتهم مستحيله

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: