أكلو في خاطركم

عزيزي (المواطن) عزيزتي (المواطنة) لا عليك إن صارت أسعار مستلزمات (الأكل) في غير متناول ميزانيتك (لو في أساساً ميزانية) فهذا (اللحم) الذي فاق سعر كيلو الضان منه الستين ألف جنيه ثبت بأنه ضار بالجيب وبالصحة.. عشان كده لازم نخليهو (نعمل شنو) وهنالك العديد من الغذاءات الضاره (برضو لازم نخليها) وقد اجتهد (العبد لله) في حصر هذه الأغذية من أجل حث الشعب السوداني (الفضل) على مقاطعتها وتركها.. طبعاً (للذين يستطيعون إليها سبيلاً)

!
• السكر الأبيض: سعرو كل يوم يزيد.. السكرماده قاتلة.. إذ أنه عند احتراقه داخل الجسم يقوم بتدمير كميات لا بأس بها من فيتامين «ب» هذه الفيتامينات التي تعمل على تحسين عمليات هضم وامتصاص الأغذية وبالتالي نقصها يؤدي إلى ضعف البنية والاضطرابات العصبية والعضلية والصداع والشعور بالأرق والقلق النفسي والكآبة والضجر.. (يلا خلونا نخلي السكر احتمال الكآبة والنفسيات دى تروح) !
• الرغيف: الرغيفة بقت (عاوزة ليها مايكروسكوب).. خمسين رغيفة ما تشبع ليها زول.. عشان كده حقو نضرب عن تناولو لأنو سبب أساسي لما يُعرف (بالكرش) وهو بيزيد من معدلات السمنة والعجب لو كان (بالبروميد) سرطان وأحمد شرفي على طول..
• الحليب: الرطل عمل كم ألف جنيه … يلا نخليهو.. لأنو الدراسات أثبتت أن تناول الإنسان للحليب البقري باستمرار قد يكون له أثر سلبي تراكمي لأنه ملوث بالعديد من مسببات وناقلات الأمراض، وقد اثبتت التحليلات أن الحليب يحتوي على كميات ضارة من مبيدات الأعشاب، والمبيدات الحشرية والمواد السامة كما إن عدد البكتيريا يتضاعف في الحليب كل (20) دقيقة إذا تركته في درجة حرارة الغرفة! يلا بلا حليب بلا بطيخ..!
• الزيت: لا تحزن عزيزي المواطن لعدم مقدرتك على شراء الزيت الأصبح الرطل بتاعو بالشئ الفلان، فقد تأكد بأنه عند قلي الطعام بالزيوت تتولد مواد تسمى (الجذور الحرة) وهي كيميائيات شديدة التفاعل وتعمل على تدمير الدهون الأساسية المهمة في الغذاء، وهي تزيد من خطر الإصابة بالسرطان وأمراض القلب والشيخوخة المبكرة، ويمكن أن تدمر العناصر الغذائية مثل فيتامين (و).. (يلا فليذهب الزيت غير مأسوفٍ عليه)
• الشاي: كباية الشاي قَرّبت يقت بالشئ الفلاني .. نقاطعو طوااالي.. مُش الدراسات أكدت بأن الشاي يسبب فقدان الشهية وأن مادة الكافين الموجودة فيهو معاها مادة (الثانين) الحامضية القابضة بيزيدوا من حموضة المعدة، بجانب الأثر القابض على شرايين المعدة الذي يؤدي إلى المغص وكمان الدراسات أكدت بأن شرب الشاي الساخن جداً يؤدي إلى تخريب الغشاء المخاطي للبلعوم والمرئ مما يهيئ الخلايا السرطانية للنمو لدى بعض الأشخاص.. (أها نبقى لي جنس السرطانات دي)؟
• الموز: كيلو الموز عمل برضو خمسة ألف زمان كان فاكهة الفقراء.. هسه بقي مشكله ، الموز يا جماعة بيتسبّب في اضطرابات المعدة، لأن مادة النشاء الموجودة فيه تقاوم الهضم وتتسبب بعسر الهضم، كما يشجع وجوده في المعدة على تكاثر البكتيريا المؤدية للاسهال (اقتنعتوا؟؟)
• الطماطم: طارت في السماء.. سعر الكيلو حصل تلاتين ألف على الرغم من أنها تحتوي على مادة سامة هي النيكوتين (الواحد ده) ، وقد حذرت العديد من مراكز الأبحاث، إذ أنهم اكتشفوا أنها سبب من أسباب أمراض المفاصل. (وأنا أقول الكراسي داخل المساجد كترت كده ليه؟).. يلا خلو (الطماطم) عشان تصلوا واقفين ووجع الركب ده يروح!
• الملح: الملح ذاتو عمل ليهو عظمة وبقى الكيس أبو ألف جنيه (ما يملح ليهو يومين) يلا نضرب عن شراء الملح لأنو ذاااتو بيسبب ارهاق وتعب الكُلى مما يؤدي إلى ضعف كفاءتها وزياده تناوله تؤدي إلى توترات عصبية وعضلية ونفسية وصداع مستمر وشعور بالقلق والكآبة والضيق والضجر (وأنحنا ما ناقصين ضجر وكده) .
• الفول: فقد ثبت علمياً أن تناول طبق كامل من الفول قد يصيب الشخص بحالة عدم وضوح الفكر؟ (يعني البلاهة) والسبب هو البروتين الموجود فيه وإذا زادت نسبته يؤدي إلى ارتفاع نسبة اليوريا، وهي مادة سامة إن لم يتخلص منها جسم الإنسان فإنّها قد تؤدي في أوقات مُعيّنة إلى لوفاة، يلا بلا فول بلا عدس هو أنحنا ناقصين تبلد؟ (كفاية التبلد الأنحنا فيهو ده) .

كسرة:
أيها الشعب السوداني الفضل .. الماكلين ليها شنو … أكلو بس في خاطركم !!
كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(و+و+و+و)؟
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(و+و+و+و)؟

Advertisements

13 تعليق

  1. نتقابل في العيد يالفاتح
    حضر كعك العيد

    1. كعك شنو يا العبيد،، ما الكعك زااااتو من اول الحاجات المفروض الناس يخلوها،، بس البروف ما ذكرها هنا،، لانها حاجة معروفة بالفطرة ما محتاج يذكرها لينا…
      عشان كدة أمشى عيد ساااااى و أبقى مارق مأكل فى خاطرك !!
      و مقدما كل عام و انت و البروف و بقية العقد الفريد بخير و عافية …

    2. يكتب ليك ده كووووولو ! وتقول ليهو حضّر الكعك !؟؟

      1. عشان تعرف سغالة الخواجات !
        سمن وزيت ودقيق وسكر ونار كمان !
        احيييييي انا منكم ,,
        آكلت فى خاطرى والله …

  2. أحبتي واخوتي السلام وعليكم ، ليكم وحشة ، وكل عام وأنتم بخير ،، اخوكم امريكي ،،

    1. وعليكم السلام ورحمة الله يا حبيب ,,
      وانت بالف خير والقابلة عندنا وطن حر ديمقراطى ,,

      1. أجي ( القابلة ) عندكم كيفن وانتو يا دااااااب شهرين ما تميتوها !!!
        والله يا شمباتي وطن حر ديقراطي دي تاني الا في الغنا بس ! في الغنا زاااااتو بعد موت الشعراء الشيوعيين ما اظن نسمعا !

      2. هههههههههههههههههههههههه,,اصلك ما بتطمن !

  3. هنا كتمت كتمت كتمت مش عاوزه كعك

  4. نأكل باسطة و امرنا لله

  5. http://safeshare.tv/w/XmBXkJcoui
    لن تمرضوا بعد اليوم بإذن الله تعالى.
    أنظروا إلى هذا السم كيف يفعل بأاجسامنا
    مهم جداً استمعوا له كاملا
    و تعرفوا على ماذا يغذي الخلايا السرطانية و يزيد الوزن و ينقص مناعة الجسم 😦
    مهم جدا ﻻزم تسمعه جيدا

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: