وجاء الخريف فجأتن (مقال ينشر سنوياً)

هذا المقال ظل العبدلله ينشره سنوياً منذ خريف العام 2009 وذلك عند قدوم فصل الخريف وهطول الأمطار وإكتشاف كذب تصريحات السادة المسؤولين عن إكتمال التجهيزات إستعداداً للخريف ووضع الخطط والتحوطات لملاقاته ، وفي كل عام نفاجأ بأنه لا توجد إستعدادات ولا تجهيزات ولا يحزنون على الرغم من تأكيد المسؤولين بأنهم قد قاموا بعقد اجتماعات تنسيقية ضمت كل الجهات ذات الصلة نوقشت فيها كل الموضوعات الخاصة بالخريف بما فيها الاشكالات الخاصة بمصارف المياه والأراضي التي تضربها السيول !

لقد تحولت الأمطار بسبب لا مبالاة المسؤولين من كونها تجلب الخير والبركة إلى أداة دمار شامل تروع المواطنين وتدمر منازلهم وممتلكاتهم بل أرواحهم وليس هنالك من عجب أن (مطرة واااحدة) يلقي بسببها حوالى (28) مواطناً مصرعهم جراء حوادث الغرق وانهيار المنازل جراء السيول والأمطار بمحليات شرق النيل والخرطوم وكرري وأمبدة بولاية الخرطوم هذا غير ولاية نهر النيل التي ودعت أرواح (10) مواطنين لذات الأسباب .
لماذا يظل الحال كما هو عليه منذ سنوات طويلة؟ ولماذا تفشل المحليات في (ترتيب أوضاعها) لمواجهة الأمطار في كل عام؟ أين تذهب إيرادات هذه المحليات التي تجبر بائعات الشاي على تأجير الكراسي؟ على سبيل المثال إين تذهب إيرادات إيجار (اللافتات) الضوئية و(التلفزيونية) التي تحتل تقاطعات شوارع العاصمة علماً بأن إيجار اللافتة السنوي عشرات الملايين ؟ أين الضرائب بأنواعها والرسوم بأشكالها والدمغات بألوانها ؟
أين تذهب كل هذه الأيرادات (المليارية) وفيم تنفق ؟ بل اين ذهبت الموارد المالية التى رصدت لتنفيذ تلك التجهيزات التي (دوشنا) بها المسؤولين ولماذا يجلس المسؤولون في هذه المحليات على كراسيهم ولا يحاسبون على هذا الفشل والإخفاق؟ !
ما يحير العبدلله (لو فضلت فيها حيرة) ان هذا المسلسل السنوي المتكرر (بي ضبانتو) لا يتوقف عنده المسؤولين كثيراً ولا يتعاملون معه بجديه تتوافق مع (الكارثية) التي يخلفها وكميات الرعب والخوف التي تعيشها الأسر خاصة في المناطق الطرفية !
لماذا يمر هذا المسلسل السنوي (مرور الكرام) في كل عام على الرغم مما يخلفه من قتلى وغرقى ومنازل منهارة .. أين تكمن الصعوبة في علاج هذا الأمر؟ أليست هذه أولوية من المفترض أن توجه لها الموارد اللازمة في بلاد يفوق ثمن العربة المخصصة لتنقل (الوالي) أو (المعتمد) فيها (نص المليار) !
آن الأوان لتكشف لنا (محليات الجباية) عن حجم إيراداتها وفيم تنفق هذه الإيرادات (المهولة) فالمواطن لا يرى أي إنجازات تماثل هذه الإيرادات على أرض الواقع ولك أن تعلم عزيزي المواطن أنه من جشع (المحليات) وحبها (الجم) للمال حتى وإن أدي ذلك لتوقف حركة السير والمرور وإلى صعوبة تحرك السابلة من المواطنين أنها تقوم في المواسم والأعياد بتأجير شوارع كاملة بالقرب من الأسواق للفراشة وأصحاب الطبالي هذا غير تأجيرها لكل المنافذ وأماكن إيقاف السيارات بدلاً من فرض عقوبات قاسية على من يقوم بذلك (شفتو كيف) ؟
لقد بلغ السيل الزبى (حقيقة لا مجازاً) وآن الأوان لأن تتعامل الحكومة مع هذا الأمر بجدية أكثر وأن تعيد النظر في من تقع على عواتقهم هذه المسؤولية التي عجزوا عن القيام بواجباتها فالأمر قد فاق (تعثر بغلة بالعراق) إلى موت (مواطنين) سنوياً من جراء هذه اللا مبالاة وأهو كل سنة نحنا (بننضم) !!

كسرة :
الجميل في الموضوع إنو المسؤولين كل سنة قاعدين يتفقدو الضحايا !!

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(و+و+و+و)؟
كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(و+و+و+و)؟

33 تعليق

    1. مبروك وكل سنة وانت طيب

    2. مبروكة يا أونكل سام ،،، انتو ما جاكم مطر هناك و الا شنو عشان كدة عرفت جازفتها الليلة !!

    3. مبرووووكه عليك

  1. طالما الحكومة ما قادرة تحل مشكلة السيول دي نحنا من السنة الجاية نمشي الساحة الخضراء وحوش الخليفة وميدان عقرب ونصلي صلاة الاستعطشاء عشان ربنا ينشفا وشكشاكة سااااكت ما تجينا ..

    1. و دى رسومها كم يا جنوبى؟؟

      1. رسومها اكف طاهرة يعني ما يصلني معانا اي واحد منهم والسنة البعدها تنشف البلد وترتاح الحكومة لا حفر مجاري ولا مقال البروف والا شنو

    1. المره دي طنبجت طنبجت

      1. كل سنة وانتي طيبة والسنة الجاية على امنياتك هنا كتمت وطنبجت وقصفت ومحتارين في المخارجة

  2. يا بروف ( لقد بلغ السيل الزبى ) دي قاعد تكتبها كل سنة ؟ شان لو كل سنة حسي نكون وصلنا بعد الزبى و اللى هو الحال الإحنا فيه دا!!!! السيل بلغ الزبى و السنه الفاتت بلغ مرابيع الشريف و السنة دي الله يستر ساي!

    1. كل ما السيل يبلغ بينا الزبي كل ما الخيم المكندشة والاغاثة تبلغ اللحي .. ولكل خساسة فعل رد فعل مضاد له في الاتجاه ومساوي له في القوة ..
      سألت ربي بفضل العيد ورمضان الما بعيد كل مسئول يشيل حاجة من الاغاثة يتشلّ ويجيهوا تبوّل لا ارادي ويغرّق تحت كرعيهو زي غرق شوارعنا ده ..
      عندما يكون دور المسئولين هو التفرج مع المواطنين علي السيول فأبشري بطول سلامة يا سيول .. البشير والخضر ديل فراجين خلاص !

      1. وبرضه لسه ما شبعوا

  3. منتهى السادية .. الحكومة استمرأت ويلات الناس كل خريف وتقول دي فرصة الناس تنشغل بالخريف وتصرفهم عن ملاحقة الحكومة في كل شئ .. عرفنا الناس ما بتقدر تبني بالمسلح طيب الشوارع ليه بتصرف المياه .. زوروا أثيوبيا وارتيريا كيف البلاد تكون جميلة في الخريف والله تقول ادس وأسمرا الشوارع مغسوله بكلوركس.

  4. انتو المطره دي ماتختصر الزمن وتصب ف قطر عشان تريحنا وتريح المسعولين

    1. لما تصب في قطر تبقى القيامة قربت مش قالوا راح يسلموها عيسى

  5. اها اهلي واصدقائي الساخراب اكفكم معنا بالمخارجة من ارض ليبيا الى اهلنا لا غانمين ولا شي سالمين بس كتمت وانا لو رجعت السودان بكتمها ليهم هناك اها الدعاء السريع لانه محل ما مشيت كتمت

    1. الله معاك يالغلبان و ردّ الله غربتك و ردّك لأهلك سالما غير غارم. آمين يا رب!

    2. حفظك الله يا حبيب وردك الى اهلك سالما غانما ,,
      قلوبنا واكفنا والسنتنا تلهج بالدعاء لك ولغيرك ,,,

    3. الغلبان يا خوي بركه الشفنا حروفك وانت سالم ..
      لم نبعد عن اوطاننا ونرضي بفراق الاباء والابناء إلا لتوفير العيشة الكريمة لهم . طبعا زمان كان الاغتراب لتحسين الوضع المادي لكن هسي بقي للأكل والشراب . فياخوي لما الغربة ما توفر الحد الادني يبقي نفارق اولادنا فوق كم ومقابل شنو ؟
      ثم ثانيا ياخوي فكّر بس في قلق اهلك وخوفهم عليك كل ما يسمعوا بالمصايب البتحصل عندكم في ليبيا , زي يومتا لما اتنشر خبر مقتل عشرة سودانيين وما اتعرفوا هم منو , والله انا الما بعرفك الا هنا قلقت عليك ! يلا اتخيل حال امك وزوجتك واولادك يكون عملوا شنو ؟
      الغربة هي البحث عن العيشة الساهلة اما صعب علي صعب فجناً تعرفو ياخوي واولادك في حضنك ..
      امجاد وحق الملاح ولاااا ليبيا والهجمه كل صباح

      1. انا خرجت مقهور وغلبان وشكلي راح اخرج عن طريق تشاد دا معناها ازور الجبل القالوا ضربوهو دا وكمان ممكن الواحد يعرج على كاودا ويستقر هناك لانه لا يصح ان يرفع السلاح من جهة معينة وترجع ريما لعاداتها القديمة شوية كده نشكل الناس الشايله السلاح

  6. كل سنة وانتو طيبين والمطرة الجاية انشاء الله زي ما دايرين
    معاكم جد لا فين لا متين
    ما اتجهجهنا واتبهدلنا واتعفنا
    واتحللنا وقلنا كمان الروب روبين
    النعمة ان جات من الله عشانكم
    تقلب نغمة
    العندو قبيل قطية تغطي عراه انهدت
    والعندو حواشة تقيتو جواه انسدت
    المرة والراجل في فد توب
    وحتى الاطفال عصبوه الطوب
    وتقعد تحسب في ضليعاتم
    تحت الكرتوب
    والحكمة كمان راجنوا يتوب
    او قول يتحلل
    تحت الواطة ما الموت مكتوب

    المعذرة يا بروف ويا شباب بس وقفت في لي حلقي

  7. القمرديناب الأحباب السلام عليكم ورحمة الله وبركاته وعيدكم مبارك وإن شاء الله دائماً تامين ولامين ومبسوطين .. وأخونا الغلبان
    (الله لا غلبك) ورد غربتك سالم وغانم لي بلدك وأهلك ووليداتك يا أخوي شوف ليك طريقة إتخارج وأرجع (ركشه تلمك ولا بلداً يذلك) ..

    أما الخريف البجي فاجأتن دا ربنا يكفينا شرو !! والمسعولين الما مسعولين ديل ربنا يورينا فيهم وعجبوني القطريين الوزعوا الإغاثات بي نفسهم وما أدوها (للمسعوليين) (بالله في إهانة أكثر من كده ؟؟ الله يجيب العواقب سليمة .. سلاااام ..

  8. يا بروف برضو للتوثيق يا ريت ترفق لينا تصريحات المسئولين كل سنة مع المقال ..
    سبحان الله يمكن واحد فيهم ينسي كلمة ولآ كلمتين نقوم نزكروا !!
    هسي شفت يومتا المسئول الداير يبرر فشله و صرّح وقال : نص كمية المطر بتاع السنة دي جانا في مطرة واااحدة !!؟ نفسي اعرف الزول الوراهو انو دي نص مطر السنة منو ؟ يا ربي يكون بلة الغايب !!

    1. من أقوال
      حسن عبد اللّه فضل المولى وزير البنى التحتية بولاية الخرطوم في تقرير قَدّمَه أمام مجلس تشريعي الولاية عن آثار السيول والفيضانات التي شهدتها الولاية أخيراً قال بأن
      ( إزالة مياه السيول والأمطار في وقت وجيز بحاجة إلى إزالة بعض الطرق) ،
      شفت الفهم دا كيف ؟؟ دحين انت يا جنوبي الجات الأول المطرة والسيول ولا الطرق و الخطط للطرق منووووو ؟

      1. بمناسبة الخطط الطرق منو دي يا المندهش , يومتا قاعد مع جماعة وفي واحدة من القنوات السودانية جايبين مشاهد من دمار السيول دي وفي مسئول قال انو دي مشيئة ربنا والناس تتقبلا وبرضو واحد من المواطنين قال الشئ الحصل ده من الله ونحن ما بنقبل العوض فيهو بس دايرين خيم تأوينا .
        اتنين من القاعدين قالوا والله طالما عندنا ايمان زي ده اصلا ما تجينا عوجه ! قت ليهم والله طالما عندنا ايمان زي ده كل سنة تجينا عوجه , قاموا فيني زي الزول القرصتو شحموطه , قول استغفر الله , انت ما مؤمن ؟ قت ليهم ما تكوركوا سااكت المطر ده مش ربنا بغيث بيهو الناس ؟ والناس لما يشتد بيهم المحل والجوع بيصلوا صلاة استثغاء عشان ربنا ينزل المطر ؟ الشر ما المطرة , الشر اننا نخطط بيوت في مجري سيل المطرة والشر اننا نعمل طرق وما نعمل مصارف لموية المطرة والشر انو يدوا مقاول كم مليار عشان يحفر ويفتح المصارف قبل نزول المطرة والقروش تتشال وما تتفتح المصارف ومافي زول يسأل المقاول الشال القروش ده !!
        واحد فيهم هدا شوية الا التاني قعد يقول لي انت علماني وبقي يورجق زيادة !!
        هي الطرق راجية يزيلوها ! ما زمااااااان اتماصت !! ياهو اللقينا من الزفت الصيني !

      2. امشى يا علمانى يا خاين يا عميل ,,,
        قول ليهو السيل دا ممكن يكون غضب ربانى (سيل العرم) ,,
        وما يمشى للعرم والقرم بتاع اللحم ! احححححححح
        ياخ ديل والله ما عندهم دين خالص خالص ,,
        اتفوووووووو عليهم

    2. والفايدة شنو من التذكير !!؟ إذا كان ده الموسم السادس للمقال وما جاب !!!

  9. تفقد الضحايا هذا اصبح أسلوبا مستفزا لحفظ ماء الوجه ،،،

    1. هو فضل للوجه ماء ؟!!!!!!
      يا اخوي ديل عديمي احساس ومسئولية ويشحدو في الله صباح ومساء ان يزيد السيل ويشيل باقي الشعب الفضل عشان تجي الاغاثة القطرية !!!

  10. جاتني في الواتس
    قصيدة طلع المؤتمر الوطني علينا
    للشاعر : مواطن هده السيل وضاع
    طلع المؤتمر علينا من ثنيات الرعاع
    طلع المؤتمر علينا لبس الدين قناع
    فرض القهر علينا ورأي الأنثي متاع
    ورأي النصر المبينا في نكاح وجماع
    ايها المملوء طينا انما العقل شعاع
    وظلام الملتحينا يكره النور المشاع
    ايها المدسوس فينا جئت بالقول الخداع
    جئت خرّبت المدينة وقلبت السقف قاع
    جئت بالامر المشينا جئت بالهمج الرعاع
    شوهوا دنيا ودينا جعلوا الله صراع
    واباحوا السرقة فينا كاللصوص في المراع
    طلع الجهل علينا قال للعلم الوداع
    وجب الصبر علينا ما دعي للصبر داع
    ليسوا اتباع نبينا انهم محض صداع

    1. لا فض الله فوك تعلق في استار الكعبة ربنا يفكنا منهم بحق رب الكعبة

    2. الطير المهاجر | رد

      هذه القصيدة تعبر عن الواقع تماما.
      لك الشكر يا جنوبي بمشاركتكم لهذه القصيدة المعبرة

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: