إعتبروهو الضحى !

على مدى عقود من الزمان ظلت فيها الأموال تتدفق على ديوان الزكاة بمختلف (العملات) أشكال وألوان ومن كافة الأنشطة الإقتصادية و(مثال فقط وليس للحصر) إبتداء من كبريات شركات البترول والإتصالات والشركات الصناعية والتجارية والبنوك مروراً بالمغتربين ورجال الأعمال والمجمعات والشركات والمحال التجارية والصيدليات والمستوصفات الخاصة مروراً بالمزارعين والمهنيين والحرفيين وأصحاب الصناعات إنتهاء بأصحاب المطاعم والكافتيريات والبقالات والأكشاك والجزارين وبتاعين الخدار و(الطبالي) ! كل هذا ولم نلحظ أثراً ولو (شبه ملحوظ) بل لم نشاهد ولو مشروعاً ضخماً واحداً يتناسب وحجم هذه الأموال التى تتدفق يومياً على هذا الديوان !

كثير من المرضي التي تتوقف حياتهم على إجراء بعض العمليات الجراحية يتجهون صوب ذلك الديوان أملين أن يجدوا الدعم الذي ينقذ حياتهم لكنهم يجدون أنفسهم في دوامة لا يعلم مداها إلا الله و (أمشي وتعال) على الرغم من ان المرض لا ينتظر وأخيرا يقوم الديوان (ده لو قام) بمنحهم (دريهمات) لا تكفي (حق المواصلات) الذي يعيدهم من حيث اتوا !!
بالأمس وفي عموده المقروء بصحيفة السوداني (إليكم) سرد الأخ الأستاذ الطاهر ساتي قصة أسرة فقيرة يموت أطفالها عندما يكتمل عامهم الاول وقد فجعت هذه الأسرة بوفاة ثلاثة أطفال أما الطفل الرابع (مصعب) فقد أكمل عامه الرابع بفضل أهل الخير الذين يمدون الأسرة بدواء يعمل على إستقرار الحالة نوعاً ما إلى ان يتم زراعة كبد له مصعب الآن يرقد في غرفة العناية المركزة تتدهور حالته يوما بعد يوم إذ ان تكلفة العملية تبلغ خمسين ألف دولار وقد خاطبت الأسرة ديوان الزكاة ولم يجد طلبها قبولا (كما جاء في العمود) !!
ديوان الزكاة لا يستحي .. وللا القائمون عليه يستحون .. فهذه الخمسين الف دولار التي تتوقف عليها حياة مصعب قد قام بدفعها قبل حوالي عشر سنوات الدكتور عبدالقادر الفادني الأمين العام السابق لديوان الزكاة كتبرع لقيام قناة فضائية تسمي ( الضحى) لا نجد لها أثراً حتي الان (وهمية وكده) !! وعندما سئل (الدكتور) عما إذا كان الديوان قد إسترد هذه الخمسين ألف دولار من جماعة (القناة الوهمية) أجاب بالنص في الحوار الذي أجرته معه صحيفة (الحرة) العدد رقم 273 الصادر بتاريخ الأربعاء 10 فبراير 2010م : ( لم أسترده ولكنى سألت عنه وأنا عندما دفعت هذا المبلغ إستندت إلى علمى وفقهى وثقتى فى هؤلاء الأخوان وإشتراطى المسبق بمشاركة الديوان فى القناة عندما تبدأ بثها وذلك بنشر أعمال الزكاة فى السودان وكتبت أسأل أكثر من مرة عن سير العمل فيها ولقد ذكروا أنهم بصدد العمل وإنهم فى شأن إكمال التمويل مع إحدى شركات الإتصال فى البلاد وأقول لكم الآن ربنا يسألنى عن هذا المبلغ إن لم تقم تلك القناة ويسألهم عنه كذلك يوم القيامة)
إنتهي حديث الدكتور الفادني (الغريب وعجيب) والذي لا يستند إلى أي (فقه) ويخالف كل قوانين (المعاملات المالية) وقد خاطبنا سيادته في مقالنا ذاك الذي نشر بصحيفة الرأي العام بتاريخ 19 فبرائر 2010م بعنوان (قبل القيامة) قلنا ليهو ونحن ندين هذا التصرف (العبثي) باموال (الفقراء والمحتاجين) : (عاوزين قروشنا هسه دي قبل القيامة)، وقد تنحي الدكتور الفادني عن منصبه كأمين للديوان وتركنا لا نعلم إن كان قد تم إسترداد (الفلوس) وللا ح (نرجى القيامة) !!
عموما الحديث نوجهه للسيد الأمين العام الحالي لديوان الزكاة وكذلك للمراجع العام لحكومة السودان وسؤالنا المباشر:
هل تمت إستعادة هذه الخمسين ألف دولار من الذين قاموا بإستلامها بعد أن ثبت أن القناة لم تقم؟ وإذا لم تسترد ما هي الإجراءات القانونية التي تمت من أجل إستعادتها؟
إن كان ديوان الزكاة يقوم بدفع له خمسين ألف دولار تبرعاً لقيام قناة فضائية وهمية فالأجدر ان يقوم الديوان الآن وليس الغد بدفع ما يماثلها من أجل زراعة كبد لمصعب حتى توهب له الحياة من جديد وللا ما كده يا (ناس الزكاة)؟
نرجو الرد العاجل من السيد/ الأمين العام لديوان الزكاة .. ومعاهو شيك بخمسين ألف دولار من أجل حياة مصعب !!

كسرة:
أعتبروهو (الضحى) ياااخ !!

كسرة ثابتة (قديمة)
أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و

كسرة ثابتة (جديدة):
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و

32 تعليق

    1. الليله ختفتها مني ياامريكي لكن مبروووكه عليك

  1. برنجيييييييييية 1 فارق توقيت وكده !!!!

    1. المندهش اخوي تحياتي وسلامة نظرك

      1. سلامة نظرك انت ده وسلامتك من كل شر

        المشكلة انك بتكتب برجية قبل الموضوع ما ينزل !!
        غايتو جنس شفقة عليك،، بس شفقة بت حريقة

      2. ههههههههههههههههه , عينك قوية يا مندهش !!
        بس التقول مؤتمر وطنى !
        خخخخخخخخخخخخخخخخخخخخخخ

      3. المندهش اخوي تاني سلامة نظرك ، شوف الموضوع نزل في الدقيقة كم ؟ وانا شتها في الدقيقة كم ؟ اصلوا نحنا بنقدفها من طيارة من غير طيار وكان مكضبني اسأل أخونا عبيد الايامات دي قاعد معانا في بلاد العم سام ،،

    2. ناس يلخمونا بخرابات و ما بعرفو شنو داك و يجازفو البرنجية ،، غايتو عليكم جنس حركات يا انتو !!!!

      1. سجمى يا فلاديمير ! انت مشيت الخرابة !؟
        وى وى وى

  2. يا بروف ياخ ما تصبرو شوية القيامة ما خلاص قربت مستعجلين على شنو ؟؟؟؟
    سيكون ردهم هكذا !!
    ونسأل الله أن يشفي مصعب ويمن عليه بنعمة الصحة والعافية ويسخر له أولاد الحلال من المال الحلال

    1. الاخ نانو إليك السلام والأشواق والتحايا،، ونسأل الله الشفاء للابن مصعب

    2. سلام يا شيخ نانو و رحمة اله تعالى و بركاته ، كل عام و أنتم وجميع أسرتك بخير يا رب

  3. هو شنو يوم القيامة ربنا بيسأني !!
    نحنا دايرين حقنا هسسسسس ي دي ! وكان كل شئ بيخلوا لي يوم القيامة ربنا ما كان عمل عقوبة دنيوية وعقوبة في الآخرة , آآي القرآن ده ما وااااااضح ..
    والله أي زول يحضر برنامج بنك الثواب يحلف ديوان الزكاة ده عقال بعير ما يدي ليهو تاني .. زي المشي ليهم عيان وادوهوا شوال فتريته ! نمل هو !!

  4. لا حول ولا قوة الا بالله ,,
    اللهم اشف مصعب ومرضى المسلمين واغفر لموتانا اجمعين ,,
    وارنا فى القائمين على امر ديوان الزكاة والسودان عجائب قدرتك ….

    1. آميييييين

  5. هسي مدير الزكاة الاتبرع لقناة الضحي بي خمسين الف دولار ده كان ما عميان بصيرة سااااكت ! هسي اسم القناة ده كان زكروا سورة الضحي كان لقي فيها اصناف من الناس المستحقة الزكاة وكان اعتذر لناس القناة إلا بس نقول شنو !
    هسي ديوان الزكاة ده لا سمعنا ليهو حس مع متضررين السيول ولا سمعنا ليهو حس مع اخوانا العالقين في ليبيا وما عندهم حق التزاكر ( هسي ناس ليبيا ديل ما بيدخلوا في ابن السبيل يا نانو ؟ )
    الطفل مصعب ده لموا في ناس برنامج بنك الثواب بتلقي الاجر يا الفاتح اخوي ..

  6. ,
    نسأل الله أن يشفي مصعب ويمن عليه بنعمة الصحة والعافية ويسخر له أولاد الحلال من المال الحلال اللهم اشف مصعب ومرضى المسلمين واغفر لموتانا اجمعين ,,

  7. تصريح من معتمد أمدرمان : “صحيح انو 1450 بيت اتدمر ..لكن الوجه المشرق انو الناس اتجهت للزراعة والباقين بيستفيدوا من الطين الصلصال” !!

    1. ههههههههههههه
      قول ليهو جنوبي قال ليك …. امك

      1. طيب وابوهو ؟؟

      2. يا جنوبي ، بعد دا ( ما بدّهاش) يا قول أصحابك الفراعنة، رسّل لي نمرة تلفون جماعة شمباتي دا!!! ما شايفين شغلهم!

      3. هههههههههههههههههههههههههههههااااو ,,,
        ينجمعوا لى دفن فلانة ,,
        انا اللا بتحكم لا بنشكم ,,
        خوووووووووش

      4. هههههههههه
        هو جماعته فاهمين شئ ! قالوا لليلة تتحسبن وتتحوقل !!

      5. ههههههههههههه ,,, وازيدكم من الشعر بيت ,,
        يوم بتتشكى وتتبكى من عمايلى دى ,, ود عمتى قال ليها : عادى يا مدام ,, ياسين بيعمل اكتر من كدة !
        استعدى للمقاومة !
        لووووووووووووووووووول

  8. اللهم اذهب البأس رب الناس اشف وانت الشافي لا شفاء إلا شفاؤك شفاء لا يغادر سقما
    إن شاء الله بركة الله يامدير ديوان الزكاة يمسكك مرض يطلع عينك وماتلقى البعالجك

  9. وزير الصحة :
    الضفادع غنية بالبروتينات ويمكن الاستفادة منها !!!!
    عليكم الله خلوا موية المطرة دي وااااقفه ما تصرفوها , يمكن بكره نصاحب الفرنسيين كمان عشان الطحالب وكده !
    أمانة يا القعوي ما دااااااابك كوركت بالصح صح وعيونك المنططات ديل بينطن زيادة , عامل لي فيها وثاب ؟ نحنا ماااا شعب الوثبة ذاااااااتو !!

    1. هاهاهاهاو
      يعني تاني عادي نشوف لافتات عوضية ضفادع !!!
      حد الإندهاش !!!

      1. هههههه مطعم شنغهاي قعوي مشوي , قعوي بالفرن , قعوي بالشوربة , قعوي حلة , قعوي طوه .. والجديد أقاشي قعوي ..
        غايتو مأفون حميضه ده الله يعميهو من الضبان !! ما يقول لينا كمان فيهو فيتامين سي !!
        يا حنين وحاتك قالوا اغلي اكلة في المطاعم الفرنسية ياهو القعوي البنعافو ده ! قال ليك يختو ليك القعوي ده في الصحن وجمبه صحن صغيروني بتاع طحالب ما تنادي الجمبك !! اتااااري شان كدي بيغوغوا في حرف الراء اولاد الكلب .. هسي كان اكنالم القعوي ده الخغطوم دي ننطقا كيف تاني ولا امدغمان والعجب الخغتوم بحغي علي الطلاق كلنا تجينا اللوز…

      2. يعنى بعد الوثبة بنخش فى حاله الاندغام…
        أو كما قال الرئيس أبو ركبين جريئه …

    2. ياجنوبى إنت مسؤول من الخير . علاقه الفرنسيين بالضفادع شنو لأنو بعد الامطار بى يومين لاقيت لى فرنسيين فى كافورى وجمب بركه كبيرة مليانه مياه راكضة وصوت القعو يجيب الضهبان وشكلهم بيصطادوا فى الضفادع .فكرك بودوها وين…
      مخير الله…

  10. بتي نونا السلام عليكم ورحمة الله وبركاته، وشكراً على المعايدة ولو إنها متأخرة شوييية!!جماعة شمباتي لسه نااائميين في العسل وما جاااايبين خبر فلو لقيتي ليك طريقة صحيتيهم يكون أحسن !! ولا أقول ليك بلاش “الفتنة أكبر من القتل”،

    لك تحياتي وتقديري على سؤالك وتحياتي لجميع الأخوان القمرديناب وخاصة ود عم سام ..

    ود العبيد طلبنا منو يمشي يأترك في بلد العم سام لكنو كان مشغول ما قابلك بس قال ضرب ليك تلفون … سلاااام …

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: