خوة في الله

بعد أن إرتفعت تكاليف الحياة والمعيشة لدرجه يصعب على المواطن تحملها إتجه بعض ضعاف النفوس إلى ممارسة الإحتيال الذي لا يخطر على بال ، مستعينين على ذلك بمختلف الأساليب (وعدة الشغل) اللازمة .. ولا أخفي عليك ايها القارئ الكريم أن العبدلله (مع إنو عامل فيها تفتيحة) قد كان ضحية … هذا الإحتيال ..

كان العبد لله يسير بعربته نحو مدخل كوبري المك نمر متجها للخرطوم وعند بداية الكوبري إستوقفه أحدهم على طريقه (قدمنا معاك) كان أحدهم هذا في أواخر العقد الخامس من العمر يرتدي لبسة سفاري (بنية) بكم طويل تتدلي لحيته (كم سنتيمتر) بينما تزين منتصف جبهته زبيبة سوداء (علامة صلاة) وهو يحمل في يد شنطة وبالأخري مسبحة تكاد تلامس الأرض.
توقفت له .. جلس على المقعد وهو يلقي تحية الإسلام شاكراً ..ثم إبتدر الحديث :
– والله يا استاذ الحياة بقت صعبه خلاس
– الله بس يكون في العون
– أنا شغال في الأسواق الحرة هنا في الخرطوم .. وكمان في (النقابه) والله الماهية تكمل من يوم خمسة في الشهر مع إنو قاعدين يدونا تسهيلات ..
وما أن نطق بكلمة تسهيلات حتي قام بفتح الشنطه وإخراج بعض الاوراق المطبوعة في شكل جداول ..
– ناس الأسواق ديل يا أستاذ عشان نحنا في النقابة وكده قاعدين يدونا حاجات بالتقسيط .. تقريباً كل الأدوات والأجهزة الكهربائية .. (ثم نظر للجداول):
– تلاجات 16 قدم .. 12 قدم .. ديب فريزرا .. مكيفات موية 5 الف .. 3 الف.. مكيفات فريون 24 وحدة .. 18 وحدة .. إسبليت يونت .. غسالات 12 كيلو .. 10 كيلو .. 8 كيلو … وو (وهو يستعدل في الكرسي ويوجه حديثه لي) :
– ديل كووولهم يا استاذ بيدونا ليهم بالأقساط المريحة .. تدفع 10% بس والباقي على ستة شهور
– وإنتو بتستفيدو شنو ؟؟
– بنختا لينا حاجه بسيطة بس .. لكن والله والله أنا عشان طيبتك دي يا استاذ ووقفتك ليا دي ما عايز منك أي حاجه .. شوف إنتا بس عاوز شنو؟
لان العبدلله كان في أشد الحاجه لغسالة ليستريح من نقة المدام اليومية ومطالبتها الدائمة بشراء غسالة رغم حالة الفلس الدائمة فقد وجدها فرصة :
– والله ياخي عاوز ليا غسالة 10 كيلو
– (وهو يتابع بأصبعه على الورقة) … غسالة عشرة كيلو.. غسالة عشرة كيلو.. (يتوقف ملتفتا) .. دي يا أستاذ بي أربعة مليون .. 10% يعني 400 ألف !!
– جميل جداًوالباقي أكتب ليكم بيهو شيكات؟
– شيكات ؟ إستغفر الله يا استاذ .. بشيلا ليك على ضمانتي بس أديني رقم تلفونك لمن القسط يقرب انا بتصل فيك .. (ثم) الظاهر عليك مستعجل يا استاذ ؟
– والله فعلا مستعجل محصل ليا إجتماع الساعة حداشر ..
– خلاس انا بشيل القروش وبعمل ليك الإجراءأت تجي تلاقي الغسالة بره .. أنتا بس تعال الصالة بعد إجتماعك ده يا استاذ وقول ليهم عاوز شيخ عباس بتاع النقابة .. (يدخل يده في جيبه ) ..وأهو تلاقي تلفوني في الكرت ده !!
في هذه الأثناء كنا قد وصلنا إلى قرابة مبني الإجتماع نهاية شارع المك نمر .. أخذت جانبا .. أوقفت المحرك وأخرجت من درج العربه الأربعمية الف ..
قام بقفل باب العربة وهو يقول لي :
– إن شاء الله تبقى خوه في الله !!
بعد نهاية الإجتماع حاولت الإتصال بشيخ عباس .. (هذا المشترك لا يمكن الوصول إليه الآن) .. قلت ربما هي (الشبكة) .. أدرت محرك عربتي صوب الصالة التي اشار عليها .. أوقفت العربة ودلفت إلى الداخل .. وجدت بعض الموظفين :
– يا جماعة بدور على شيخ عباس بتاع النقابة
– (في صوت واحد) : أوعا تكون حاجات كتيرة !!
كسرة :
– العبد لله طلع طيرة ومباري السيرة !!

– كسرة ثابتة (قديمة)
– أخبار ملف خط هيثرو العند النائب العام شنو(وووو وووو وووو وووو وووو وووو وووو)+(وووو) +و
– كسرة ثابتة (جديدة):
– أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(وووو)+و

28 تعليق

  1. كفارة يا استاذ وربنا يعوضك ان شاء الله

  2. المسلط لكن ماااااا بالغتا ياخ !!!

    1. والله بالغ شيخ عباس.. وبكره في الجايات عزاك

  3. ربنا يعوضك يابروف وزي مابقولو الجاتك في مالك سامحتك..

  4. دي طيره طيري يا أستاذ

  5. الظاهر يا استاذ كسرة سرقة خط هيثرو ما اظنها بتجيب نتيجة اقترح عليك تلغيها وتخليك في الزول السرقك انت وتبقى الكسرة يا شيخ عباس أخبار الغسالة شنو

  6. الغريبة انت عارفو وشايفو شكلو ولابس وشايل عدة الشغل !!!!!!!!
    ما عاوز اقول ليك تستاهل لكن براك ناديتو وقلت ليو تعال أسرقني !!!!!!

  7. لابس سفاري كم طويل وعنده دقن وعلامة صلاة وشغال في النقابة واسمه شيخ عباس وبضبحوا في الضحية ؟!!
    ههههههههه عجبني ليك .. زمنك ده كووووولو توصف لينا في شكل الحرامية وتجي تدقس ؟!! واا شماتة جعفر عباس فيك …

    1. وحات الله انا لو في مكان البروف أولادي في البيت ما أكلمهم بي دقستي دي خوفا من الشماته !!
      كمان انشرها على الملأ !!

      أجيّ !!!!!

      1. نان يرجي لااااامن يجي يشيل منو القسط التاني ؟!!

  8. تستااااااااهل !!

  9. قام بإعادة تدوين هذه على زول وأضاف التعليق:
    صحي الحياة بقت صعبه لكن الناس بقت بتبالغ.
    إنعدام الضمير والغش بإستخدام مظهر زي زولنا دده بيكرة الناس في بعض وبيعدم الثقه، وتشويه الدين بقى مشكله.

    1. كومنتك ذكرني قصة من زمااااااااان عن الشهامة و كدا احكيها ليك. زمان في الابتدائي في قصة عن 1 من العرب ديل مسافر في الصحراء بي حصانو و عدتو, لقى ليو 1 مقطوع قام شالوا معاو. على التعترو الزول داك حرامي, لكن فعلا كان مقطوع.اها عمك شاف الراجل تعبان و حن عليو, قام نزل من الحصان و قال ليو اركب. عمك ما صدق خطوة التانية, وشتاااااااااات يا عمك, كبرا طوالي. لا موية لا يحزنون, زولنا ما فضل معاو أي شي!!!! يعني كلها كم ساعة و يموت بالعطش وسط الصحراء دي, تخيل قال للحارمي شنو؟ قال ليو, في ما معناتو, الحصان و الحاجات حلال عليك, بس ما تكلم الناس بي عملتك دي لئلا تندثر الشهامة (الكرامة) بين العرب!!!!! الحرامي لمن سمع الكلام دا, اتذكر منظر قطعتو وانو لو ما عمك دا جا هسي كان لسة مقطوع وفي رواية ميت, جا راجع لي عمك و رجع الحاجات.

  10. الحمد لله على سلامة روحك .. الأربعمائة ألف طايره .. عموما ما تطلع من البيت حق العيش وبطاقة الصراف الآلي

  11. الحمد لله على سلامة روحك .. الأربعمائة ألف طايره .. عموما ما تطلع من البيت بس معاك حق العيش وبطاقة الصراف الالي !!

  12. معليش يا استاذ زي ما بيقولوا اخوانا المصريين لبسك السلطانية وفيها ملوخية

  13. البلد كلها محتالين و نشالين , والله واحد مغترب جاء السودان هسي قريب ده أتنشل في سوق ليبيا ده 4000 ريال , لي هسي يلعن اليوم الجابه راجع يزور البلد الخربانة دي .. لافي أمن لا في قانون لا في رادع .. أي زول بعمل العاوزه .. غايتو الما بخاف الله ده مافي زول كده بوقفه بعمل العاوزه

  14. بعدين ده البجيك و بحتال عليك ده هين , في شيوخ عديل داقين ليهم صيوانات و عاملين ليهم جوامع , ديل يحتال عليك و يبزغ في وشك وزول كده بقول ليهو حاجة مافي , كل شيخ فيهم مربي ليهو رباطه , بقو زي المافيا الايطالية

  15. بصراحه مثل هؤلاء يعدمون الثقه ……………… بس في اشاره في المقال هذا تشير الي ان هذا المحتال يمكن القبض عليه
    لان ناس محل التقسيط شكلهم بيعرفو شيخ عباس والله اعلم

  16. والله ياجماعه الرجاله والمروه (المرؤة ) إنتهت بين السودانيين يعنى تانى مافى زول يقيف لى زول ومافى فضل الظهر
    والله أخلاق السودانيين بقت فى الحضيض.
    حسبنا الله ونعم الوكيل …حسبنا الله ونعم الوكيل …حسبنا الله ونعم الوكيل …

    1. لالا انت اقيف ليهو لاكين مااا تشتري منو ,,,,,,,

      1. انا إذا وقفت ليهو وهو بقى ود حرام لو ما إشتريت منو إمكن يجيب لى مصيبه أكبر من البيع والشراء . (ما ود حرام)

  17. السلام عليكم …
    يمكن عاوز يوريك نظافة الغسالة
    بدأ معاك من الجيب

  18. والله أنا شايف انو البروف عاوز يوصل لينا رسالة مهمه جدا وهي انه رغم وصيفو للحرامية ومعرفته ليهم من شكلهم او احساسه بيهم لكن وقف لشيخ عبس وعمل معاه الواجب و ما قطع المروة و شاله فضل ظهر ( يعني يا اخوانا ما تقطعو المروة مهما كان وانا ذاتي العامل تفتيحه ده اتدقسته بس هذا الاعلان او المقال ما عشان تشمتو فيني ولكن عشان تعملو حسابكم كمان وكمان ؛ لكن مهما كان ما تقطعوها فهي – اي المروة – الباقية من سوداننا القديم .. منه العوض و ليه العوض .. ربنا يعوضك ..والجاتك في مالك سامحتك أو كما يقولون …. ومااااااااااااااااااااااااااااااااااااااااااااااتستاهل والله

  19. يا بروف بالغته بعد الوصف ده كلو وكمان فى النقابة وبعد تصدقوا والله بااااااااااالغتة
    انت يا بروف هو من الانقاذ دى جات فى نقابات ؟! غايتو بس كان نافذ فيك قدر

  20. والله انا اتلخبطا ولا طولتا من السودان ماعارفه لكن ال 4 مليون دي بشيلوها في في درج العربيه بقت … صحي تستاااااااااهل

  21. اوعك تكون حاجات كتيرة
    سلامات يا احباب بعد طول غياب …. قرفنا من اكل القعونجات

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: